དྲང་ངེས་རྣམ་བཞག
༈ ཡང་བསྟན་པ་དེ་དག་དྲང་ངེས་གཉིས་སུ་རྣམ་པར་བཞག་ན། ཆོས་ཀྱི་འཁོར་ལོ་རིམ་པ་གསུམ་པོ་དེ་དག་གིས་གོང་དུ་སྒྲིབ་བྱེད་གློ་བུར་པའི་དྲི་མ་རགས་པ་དང་། ཕྲ་བ་དང་། ཤིན་ཏུ་ཕྲ་བའི་ཚུལ་རྣམས་སྦྱོང་བྱེད་ཀྱི་ཐབས་རྒྱ་ཆེ་ཆུང་ལས་དོན་དུ་གཤེགས་སྙིང་གཅིག་པུའི་སྟེང་གི་དྲི་མ་སྦྱོང་བ་ལ་གསུམ་ཀ་མཐུན་ཞིང་། འདི་ལྟར་དང་པོས་མི་རྟག་པ་སོགས་ཀྱིས་འཁོར་བ་ལས་ཡིད་འབྱུང་ཞིང་མྱ་ངན་ལས་འདས་པའི་སྒོར་འཇུག་པའི་རྒྱུ་བྱེད། གཉིས་པ་རྣམ་པར་ཐར་པའི་སྒོ་གསུམ་གྱིས་འཇིག་རྟེན་པའི་བདག་ཏུ་ལྟ་བ་སོགས་མཚན་འཛིན་གྱི་གཉེན་པོར་འགྱུར་ཞིང་། གསུམ་པ་ཕྱིར་མི་ལྡོག་པའི་གཏམ་གྱིས་བདེ་བར་གཤེགས་པའི་ཚུལ་རྒྱ་ཆེན་པོ་ཁོང་དུ་ཆུད་པར་བྱེད་པ་ལ་དགོངས་པ་སྟེ། གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་ལས། རིགས་ཀྱི་བུ་འདི་ལྟར་དཔེར་ན་ནོར་བུ་མཁན་མཁས་
པས་ནོར་བུ་སྦྱོང་བའི་ཚུལ་ལེགས་པར་ཤེས་པ་དེས། ནོར་བུ་རིན་པོ་ཆེའི་རིགས་ནས་ཡོངས་སུ་མ་དག་པའི་ནོར་བུ་བླངས་ཏེ་ལན་ཚྭའི་ཆུ་རྙོག་པོར་སྦངས་ནས་སྐྲའི་རེ་བས་ཡོངས་སུ་སྦྱོང་བར་བྱེད་དོ། །དེ་བཞིན་དུ་དེའི་འོག་ཏུ་ཟས་ཀྱི་ཁུ་བར་སྦངས་ཏེ་བལ་གྱི་ལྭ་བས་ཡོངས་སུ་སྦྱོང་བས་ཡོངས་སུ་སྦྱོང་བར་བྱེད་དོ། །དེ་བཞིན་དུ་དེའི་འོག་ཏུ་སྨན་བཟང་པོའི་ཁུ་བས་སྦངས་ཏེ་རས་སྲབ་མོས་ཡོངས་སུ་སྦྱོང་བས་ཡོངས་སུ་སྦྱོང་བར་བྱེད་དོ། །ཡོངས་སུ་སྦྱངས་ཏེ་དྲི་མ་དང་བྲལ་བ་ནི་བཻ་ཌཱུརྱའི་རིགས་ཆེན་པོ་ཞེས་བརྗོད་དོ། །དེ་བཞིན་དུ་སེམས་ཅན་ལ་དང་པོ་མི་རྟག་པ་དང་། སྡུག་བསྔལ་བ་སོགས་ཡིད་འབྱུང་བའི་གཏམ་གྱིས་འདུལ་བ་ལ་འཛུད་པར་མཛད་པ་དང་། དེའི་འོག་ཏུ་རྣམ་པར་ཐར་པ་གསུམ་གྱི་གཏམ་གྱིས་དེ་བཞིན་གཤེགས་པའི་ཚུལ་རྟོགས་པར་མཛད་པ་དང་། དེའི་འོག་ཏུ་ཕྱིར་མི་ལྡོག་པའི་འཁོར་ལོའི་གཏམ་གྱིས་དེ་བཞིན་གཤེགས་པའི་ཡུལ་ལ་འཇུག་པར་མཛད་དོ། །ཞུགས་པར་གྱུར་ཅིང་ཆོས་ཉིད་རྟོགས་ན་ནི་བླ་ན་མེད་པའི་ཡོན་གནས་སོ། །ཞེས་པ་ལ་སོགས་པས་རྒྱས་པར་གསུངས་ཤིང་། དེ་བཞིན་དུ་བཀའ་རིམ་པ་གསུམ་པོ་དྲང་དོན་དང་ངེས་དོན་དུ་རྣམ་པར་དབྱེ་བ་ཡང་། དགོངས་པ་ངེས་པར་འགྲེལ་པའི་མདོ་ལས། བཅོམ་ལྡན་འདས་ཀྱིས་ཉན་ཐོས་ཀྱི་ཐེག་པ་ལ་ཞུགས་པ་རྣམས་ལ་འཕགས་པའི་བདེན་པ་བཞི་སྟོན་པའི་ཆོས་ཀྱི་འཁོར་ལོ་དང་པོ་བསྐོར་བ་དེ་ཡང་བླ་ན་མཆིས་པ། སྐབས་མཆིས་པ། དྲང་བའི་དོན་རྩོད་པའི་གཞིའི་གནས་སུ་གྱུར་པ་ལགས་ལ། བཅོམ་ལྡན་འདས་
ཀྱིས་ཆོས་རྣམས་ཀྱི་ངོ་བོ་ཉིད་མ་མཆིས་པ་ཉིད་ལས་བརྩམས་ཏེ། ཐེག་པ་ཆེན་པོར་ཡང་དག་པར་ཞུགས་པ་རྣམས་ལ་སྟོང་པ་ཉིད་སྟོན་པའི་ཆོས་ཀྱི་འཁོར་ལོ་གཉིས་པར་བསྐོར་བ་དེ་ཡང་བླ་ན་མཆིས་པ། སྐབས་མཆིས་པ། དྲང་བའི་དོན། རྩོད་པའི་གཞིར་གྱུར་པ་ལགས་ཀྱི། བཅོམ་ལྡན་འདས་ཀྱིས་ཆོས་རྣམས་ངོ་བོ་ཉིད་མ་མཆིས་པ་ཉིད་ལས་བརྩམས་ཏེ་ཐེག་པ་ཐམས་ཅད་ལ་ཡང་དག་པར་ཞུགས་པ་རྣམས་ལ་ལེགས་པར་རྣམ་པར་ཕྱེ་བ་དང་ལྡན་པའི་ཤིན་ཏུ་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གསུམ་པ་བསྐོར་ཏེ། ཆོས་ཀྱི་འཁོར་ལོ་བསྐོར་བ་དེ་ནི་བླ་ན་མ་མཆིས་པ། སྐབས་མ་མཆིས་པ། ངེས་པའི་དོན། རྩོད་པའི་གཞིར་མ་གྱུར་པ་ལགས་སོ། །ཞེས་པ་ལ་སོགས་པའི་སྒོ་ནས་དྲང་ངེས་ཀྱི་རྣམ་བཞག་མཛད་ལ། དེ་ལྟར་འཁོར་ལོ་བར་པ་དྲང་དོན་དུ་བཞག་པའི་རྒྱུ་མཚན་ནི། ཆོས་འཁོར་འདིར་དགོས་པའི་དབང་གིས་བདེ་བར་གཤེགས་པའི་སྟོབས་སོགས་དོན་དམ་གྱི་ཡོན་ཏན་རང་སྟོང་མ་ཡིན་པ་རྣམས་ཀྱང་ཕལ་ཆེར་རང་སྟོང་དུ་སྟོན་པ་དང་དེ་དག་ལེགས་པར་ཕྱེ་སྟེ་ནང་འགལ་མེད་པར་མ་བསྟན་པ་སོགས་ཀྱིས་བླ་ན་མཆིས་པ་ལ་སོགས་པ་གསུངས་ལ། གསུམ་པར་ནི། ཀུན་རྫོབ་ཀྱི་ཆོས་རྣམས་རང་སྟོང་དང་། དོན་དམ་པའི་ཆོས་གཞན་གྱིས་སྟོང་པས་དེ་དག་གི་ཚུལ་ཉིད་ལེགས་པར་རྣམ་པ་ཇི་ལྟ་བར་ཕྱེ་ནས་བསྟན་པའི་རྒྱུ་མཚན་གྱིས་ཀྱང་དེ་ལྟར་དུ་བཞག་གོ། གལ་ཏེ་འཁོར་ལོ་བར་པར་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པའི་ཕྱིར་ངེས་དོན་ཡིན་ལ། དེ་ལས་བཟློག་ནས་སྟོན་པའི་ཕྱིར་ཐ་མ་དྲང་དོན་དགོངས་པ་
ཅན་ཡིན་ནོ་ཞེས་སྨྲ་བ་ནི་ལེགས་པར་མ་བརྟགས་པ་སྟེ། མ་སྐྱེས་མི་འགག་གདོད་ནས་ཞི་བ་ལ་སོགས་པ་ཤེར་ཕྱིན་སྒྲ་ཇི་བཞིན་པ་ནི་འཁོར་ལོ་ཐ་མ་ཉིད་དུ་མཆོག་ཏུ་རྒྱས་ཤིང་། ཤིན་ཏུ་ཟབ་པའི་ཚུལ་ནི་རྡོ་རྗེ་ཐེག་པར་བསྟན་ལ། དེ་ཉིད་མི་གསལ་བ་དང་། གསལ་བ་དང་། རབ་ཏུ་གསལ་བར་སྟོན་པའི་རྒྱུ་མཚན་གྱིས་བླ་ན་ཡོད་མེད་དང་སྐབས་ཡོད་མེད་ཀྱི་ཁྱད་པར་གསུངས་པ་ཡིན་གྱི་ཤེར་ཕྱིན་གྱི་ངོ་བོ་ལ་ཁྱད་པར་ཡོད་པ་མ་ཡིན་ཏེ། གང་བདེ་གཤེགས་སྙིང་པོ་དང་། ཆོས་ཀྱི་དབྱིངས་དང་། འོད་གསལ་བའི་སེམས་དང་། རང་བཞིན་གྱིས་དག་པའི་རིགས་དང་། ཡང་དག་པའི་མཐའ་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་ལ་སོགས་པ་མིང་གིས་བསྟན་པ་མཐའ་ཡས་པ་ཐམས་ཅད་རང་བྱུང་གཉིས་སུ་མེད་པའི་ཡེ་ཤེས་སུ་གཅིག་པ་ཡིན་ལ། དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། སློབ་དཔོན་ཕྱོགས་ཀྱི་གླང་པོས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱའི་དོན་དེ་དང་ལྡན་པས། །གཞུང་ལམ་དག་ལ་དེའི་སྒྲ་ཡིན། །ཞེས་གསུངས་པའི་ཕྱིར་རོ། དེ་བས་ན་བཀའ་ཐ་མ་ངེས་དོན་མཐར་ཐུག་ཏུ་ལུང་དང་རིགས་པ་ཐམས་ཅད་ཀྱིས་འགྲུབ་སྟེ། རྒྱལ་བ་ཉིད་ཀྱིས་དྲང་ངེས་དབྱེ་བར་མཛད་པ་དང་། གཞན་ཡང་ཇི་སྐད་(འཇམ་དཔལ་རྩ་རྒྱུད་)དུ། ཐོགས་མེད་ཅེས་བྱའི་དགེ་སློང་ནི། །བསྟན་བཅོས་དེ་ཡི་དོན་ལ་མཁས། །མདོ་སྡེ་དྲང་དོན་ངེས་པའི་དོན། །རྣམ་པ་མང་པོའང་རབ་ཏུ་འབྱེད། །ཅེས་རྒྱལ་བས་དྲང་ངེས་འབྱེད་པར་ལུང་དུ་བསྟན་པའི་འཕགས་པ་
དེ་ཉིད་ཀྱིས་ཐ་མ་མཐར་ཐུག་ཏུ་བཞག་པ་ཡིན་ཞིང་། བར་པ་ངེས་དོན་དང་ཐ་མ་དྲང་དོན་ཡིན་པའི་ལུང་གང་ཡང་མིན་མོད་ཀྱི། འོན་ཀྱང་བཀའ་ཐ་མ་འདི་ཉིད་རྣམ་རིག་སྨྲ་བར་འདོད་པ་དག་གིས་དེ་ལྟར་བྱས་པ་ཡིན་སྲིད་ཀྱང་གོང་དུ་དྲངས་པའི་ནོར་བུ་སྦྱོང་བའི་དཔེ་དང་། ནད་པའི་སྨན་དང་། ཡི་གེ་སློབ་པའི་དཔེ་སོགས་ཀྱིས་བསྟན་པའི་གོ་རིམ་དང་འགལ་བ་དང་། རྒྱལ་བ་ཉིད་དང་འཕགས་པས་རྣམ་པར་བཞག་པ་ལའང་དགོས་པ་མེད་པ་འགྱུར་བ་སོགས་སྐྱོན་མཐའ་ཡས་ཤིང་། དེར་མ་ཟད་གདུལ་བྱ་རྣམས་ལ་དང་པོར་དྲང་དོན་དང་བར་དུ་ངེས་དོན་བསྟན་ནས་སླར་ཡང་དྲང་དོན་ཟློས་ཏེ་བསྟན་པ་ལ་དགོངས་པ་ལེན་ལུགས་དང་དགོས་པ་ཅི་ཡོད་ཀྱང་བསམ་དགོས་སོ། །དེ་བས་ན་ངེས་དོན་མཐར་ཐུག་ལ་དངོས་པོར་སྨྲ་བའི་གྲུབ་མཐར་བཞག་པ་དང་། སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ལ་ཀུན་རྫོབ་བསྟན་པའི་སྐུར་ཞུས་དང་། སྙིང་པོའི་ཆོས་འདི་སྤང་བར་འགྱུར་བ་སོགས་སྡིག་ཏོ་མི་ཟད་པར་ཤེས་པར་བྱའོ། །གཞན་ཡང་ཐེག་པ་གསུམ་གྱི་སྒོ་ནས་ཀྱང་ངེས་དོན་འཁོར་ལོ་ཐ་མར་འདུ་བའི་དབང་དུ་མཛད་པས་ཀྱང་ངེས་དོན་མཐར་ཐུག་ཏུ་གྲུབ་སྟེ། ཕྱིར་མི་ལྡོག་པ་འཁོར་ལོའི་མདོ་ལས་ཀྱང་། དེ་ནས་བཅོམ་ལྡན་འདས་དེའི་བསྙེན་བཀུར་བ་བྱང་ཆུབ་སེམས་དཔའ་ཆེན་པོ་སྒྲ་དབྱངས་སྙན་པ་ཞེས་པ་དེ་པདྨའི་སྟན་ལས་ལངས་ཏེ་གསོལ་པ། བཅོམ་ལྡན་འདས་འཇིག་རྟེན་གྱི་ཁམས་མི་མཇེད་འདི་ཇི་སྲིད་ཅིག་ན་མཆིས། བཀའ་སྩལ་པ། རིགས་ཀྱི་བུ་འཇིག་རྟེན་གྱི་ཁམས་འདི་ནས་ནུབ་
ཕྱོགས་ལོགས་སུ་འཇིག་རྟེན་གྱི་ཁམས་གདྒའི་ཀླུང་བྱེ་མ་སྙེད་ལས་འདས་པ་ནའོ། །གསོལ་པ་བཅོམ་ལྡན་འདས་འཇིག་རྟེན་གྱི་ཁམས་དེ་ན་བཅོམ་ལྡན་འདས་གང་ཆོས་སྟོན། དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱའོ། །ཆོས་སྟོན་པ་ཅི་འདྲ་ཞིག་ལགས། ཐེག་པ་གསུམ་ལས་བརྩམས་ཏེའོ། །ཐེག་པ་གསུམ་གང་ལགས། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོ་སྟེ། ས་གསུམ་དེ་དག་ལས་བརྩམས་ཏེ་ཆོས་སྟོན་ཏོ། །སངས་རྒྱས་བཅོམ་ལྡན་འདས་ཀྱིས་ཆོས་བསྟན་པ་མཐུན་ལགས་སམ། རིགས་ཀྱི་བུ་སངས་རྒྱས་བཅོམ་ལྡན་འདས་ཀྱིས་ཆོས་བསྟན་པ་ནི་མཐུན་ནོ། །སངས་རྒྱས་བཅོམ་ལྡན་འདས་རྣམས་ཀྱིས་ཆོས་བསྟན་པ་ཅི་ཙམ་ཞིག་མཐུན། བཀའ་སྩལ་པ། སངས་རྒྱས་བཅོམ་ལྡན་འདས་རྣམས་ཀྱིས་ཆོས་བསྟན་པ་ནི་ཕྱིར་མི་ལྡོག་པའི་ཆོས་ཀྱི་འཁོར་ལོར་མཐུན་ནོ། །ཞེས་པ་ལ་སོགས་པས་རྒྱ་ཆེར་གསུངས་སོ། །