གནོད་སྦྱིན་ཛཾ་ལྷའི་གསོལ་བསྡུས་རིན་ཆེན་དབང་སྔོན།
གནོད་སྦྱིན་ཛཾ་ལྷའི་གསོལ་བསྡུས་རིན་ཆེན་དབང་སྔོན་བི་ཛ་ཧ་རཾ༔ ཀ་དག་རིག་སྟོང་སྤྲོས་བྲལ་མཁའ་དབྱིངས་སུ༔ ཁ་དོག་ལྷུན་གྲུབ་བསྟན་སྲུང་ནོར་གྱི་ལྷ༔ ག་དར་དྲི་མེད་ཕྱྭ་འགུགས་ཛཾ་ལྷ་བརྒྱད༔ ང་ཡིས་འབོད་དོ་དམ་ཚིག་དབང་གིས་བྱོན༔ ཅ་རེ་སྤྱན་གྱིས་གདུལ་བྱའི་ཡུལ་ལ་གཟིགས༔ ཆ་ལུགས་རང་མཐུན་པད་ཉི་ཅང་ཤེས་ཁྲིར༔ ཇ་ཧོང་ངུར་སྨྲིག་འཆང་བའི་དགེ་འདུན་སྡེ༔ ཉ་རྒྱས་ཟླ་བཞིན་དབུ་འཕང་བསྟོད་ལ་བཞུགས༔ ཏ་ཐ་ག་ཏཱའི་བསྟན་སྲུང་ཛཾ་བྷ་ལ༔ ཐ་དད་མ་ཡིན་རང་བྱུང་རིག་པའི་འཕྲུལ༔ ད་ལྟ་བདག་གི་ལོངས་སྤྱོད་སྤེལ་བའི་གཉེན༔ ནཱ་དའི་དབྱིངས་ཀྱིས་བསྔགས་འོས་གུས་ཕྱག་འཚལ༔ པ་ཏྲ་རིན་ཆེན་འཕན་གདུགས་རྫས་རྟགས་བརྒྱད༔ ཕ་རོལ་ཡིད་འཕྲོག་འདོད་འབྱུང་གཏེར་གྱི་བུམ༔ བ་བཞིན་ནོར་རྫས་སྲིད་འདིར་ཚོགས་ཚད་ཀུན༔ མ་ཚང་མེད་པ་ཀུན་ཀྱང་མཆོད་སྤྲིན་འབུལ༔ ཙ་རི་ཏྲ་སོགས་གནས་
སྲུང་གཏེར 
་གྱི་བདག༔ ཚ་ཟེར་དྲག་པོས་དཔུང་ཚོགས་གཞོམ་ལ་དཔའ༔ ཛ་ཡ་སྲས་བཅས་བཀའ་བསྒོས་དམ་བཞག་བཞིན༔ ཝ་འདྲའི་ལོག་རྟོག་ཉམས་པའི་སྲོག་གི་གཤེད༔ ཞྭ་གོས་ལོངས་སྤྱོད་ཡིད་ལ་མཐུན་པའི་རྫས༔ ཟ་ཐང་འཁོར་ལོས་བསྒྱུར་ལ་འགྲན་བྱེད་ལྟར༔ འ་འུར་མ་ཡིན་སྒོ་གསུམ་གཅིག་དྲིལ་གྱིས༔ ཡ་མཚན་མཆོད་པ་རྒྱ་མཚོས་ཐུགས་དམ་བསྐང༔ ར་ག་དབང་གི་ལྷ་མཆོག་ཛཾ་བྷ་ལ༔ ལ་ལུང་སྐྱེ་འགྲོའི་ཀ་ཆ་དཀོར་ནོར་རྫས༔ ཤ་ཆང་སྨན་གཏོར་རཀྟ་ཏ་ན་གན༔ ས་ལམ་དྲོད་རྟགས་ལྟ་སྒོམ་སྤྱོད་འབྲས་བསྐང༔ ཧ་ལ་དུག་ལྔ་རང་གྲོལ་སྔགས་ལམ་གྱི༔ ཨ་ཏིའི་རྣལ་འབྱོར་རིག་འཛིན་སྒྲུབ་པ་པོས༔ ས་བརྒྱད་ངལ་གསོས་དགོས་འདོད་མཆོད་སྦྱིན་མཁན༔ ཛཾ་ལྷ་འཁོར་བཅས་བསྟོད་དོ་གསོལ་བ་ནི༔ བདག་གི་རླུང་སེམས་སྣང་བ་དབང་འདུས་ནས༔ ཚེ་གཅིག་སངས་རྒྱས་ཐོབ་པར་མཛད་དུ་གསོལ༔ འཁོར་འདས་ལམ་གསུམ་ཚེ་བཅུད་དབང་འདུས་ནས༔ འཆི་མེད་དངོས་གྲུབ་ཐོབ་པར་མཛད་དུ་གསོལ༔ མཁས་གྲུབ་བཤེས་གཉེན་ཐམས་ཅད་དབང་འདུས་ནས༔ ཐུབ་བསྟན་དར་ཞིང་རྒྱས་པར་མཛད་དུ་གསོལ༔ སྣོད་ལྡན་དམ་གཙང་ཐམས་ཅད་དབང་འདུས་ནས༔ སྒྲུབ་པའི་སྡེ་ཆེན་ཚུགས་པར་མཛད་དུ་གསོལ༔ རིགས་བཟང་བློ་གསལ་ཐམས་ཅད་དབང་འདུས་ནས༔ བཤད་སྒྲུབ་བསྟན་པ་དར་བར་མཛད་དུ་གསོལ༔ ཚུལ་ཁྲིམས་ལྡན་པ་ཐམས་ཅད་དབང་འདུས་ནས༔ དགེ་འདུན་སྡེ་ཆེན་ཚུག་པར་མཛད་དུ་གསོལ༔ རྒྱལ་པོ་རྒྱལ་ཕྲན་ཐམས་ཅད་དབང་བསྡུས་ནས༔ ཡུལ་ཁམས་ཆོས་ལ་བསྒྱུར་བར་མཛད་དུ་གསོལ༔ འབྱོར་ལྡན་སྦྱིན་བདག་ཐམས་ཅད་དབང་འདུས་ནས༔ དགེ་འདུན་བཀུར་སྟི་འཕེལ་བར་མཛད་དུ་གསོལ༔ ལྷ་ཀླུ་གཞི་བདག་ཐམས་ཅད་དབང་འདུས་ནས༔ བཀྲ་ཤིས་བདེ་ལེགས་འཕེལ་བར་མཛད་དུ་གསོལ༔ སྐྱེ་འགྲོ་ཕོ་མོ་ཐམས་ཅད་དབང་འདུས་ནས༔ ལུས་སེམས་དགེ་ལ་སྦྱོར་བར་མཛད་དུ་གསོལ༔ བདུད་རིགས་ལོག་ལྟ་ཅན་ཀུན་དབང་འདུས་ནས༔ བསྟན་ལ་བར་ཆད་མེད་པར་མཛད་དུ་གསོལ༔ ལྷ་འདྲེ་མི་གསུམ་ཐམས་ཅད་དབང་འདུས་ནས༔ བཤད་སྒྲུབ་རྒྱལ་བསྟན་རྒྱས་པར་མཛད་དུ་གསོལ༔ རིན་ཆེན་འབྲུ་ནོར་ཐམས་ཅད་དབང་འདུས་ནས༔ ལོངས་སྤྱོད་ཟད་པ་མེད་པར་མཛད་དུ་གསོལ༔ མདོར་ན་སྲིད་ཞིའི་དཔལ་འབྱོར་ཡོན་ཏན་ཀུན༔ ཅི་ལྟར་འདོད་པའི་གནས་ཀུན་དབང་འདུས་ནས༔ ལེགས་ཚོགས་འཕེལ་རྒྱས་ནུབ་མེད་ཕྲིན་ལས་མཛོད༔ སྡུས་སྡུས་སརྦ་པ་ཤཾ་ཀུ་རུ་ཡེ་སྭཱ་ཧཱ༔ འཕེལ་འཕེལ་སརྦ་པུཥྚིཾ་ཀུ་རུ་ཡེ་སྭཱ་ཧཱ༔ ལས་རྣམས་འགྲུབ་ཅིང་ཕྱྭ་གཡང་བཀྲ་ཤིས་བདེ་ལེགས་ཐམས་ཅད་ནམ་ཡང་ནུབ་མེད་དུ་བརྟན་པར་གྱུར་ཅིག༔ སརྦ་མངྒ་ལཾ༔ སྭ་སྟི་ཏིཥྛ་བཛྲ་ཡེ་སྭཱ་ཧཱ༔ ཞེས་པ་འདི་རིག་འཛིན་གསང་སྔགས་གླིང་པའི་གཏེར་བྱོན་ཛཾ་ནག་ལ་བསྐང་བའམ་གསོལ་བསྡུས་ཤིག་རྩོམ་དགོས་ཞེས༔ གཏེར་སྟོན་ཉིད་ཀྱིས་དབུགས་དབྱུང་བའི་ལྷ་གྲོགས་ལུང་རྟོགས་བསྟན་འཛིན་གྱིས་བསྐུལ་ངོར༔ བདག་ལ་དེ་འདྲ་རྩོམ་པའི་རེ་བ་མ་མཆིས་ཀྱང༔ ཞལ་གསུང་མི་ལྡོག་ཙམ་དུ་ཀ་ཡི་ཕྲེང་བའི་མཇུག་ཏུ་ཆགས་མེད་རིན་པོ་ཆེའི་གསུང་བྱིན་རླབས་ཅན་གྱིས་བརྒྱན་ཏེ་ཕུལ་བས༔ འགྲོ་བ་ཡོངས་ཀྱི་བཀྲེས་སྐོམ་དབུལ་བའི་སྡུག་བསྔལ་ཞི་ཞིང་བདེ་གཤེགས་རཏྣ་སཾ་བྷ་ཝའི་རྒྱལ་སྲིད་ལ་དབང་འབྱོར་བར་ཤོག་ཅིག་གུ༔