བེང་།
བེང་འདི་གཙོ་བོ་དཔལ་ལྡན་མགོན་པོའི་ཕྱག་མཚན་སྟེ། མགོན་ནག་དངོས་གྲུབ་འབྱུང་རྒྱུད་ལས། གསང་བ་བེང་འཛིན་མགོན་པོ་ཡིས། །ལྷ་མ་ཡིན་གྱི་གྲོང་ཁྱེར་ནི། །སུམ་བརྩེགས་ལ་སོགས་ཁང་བཟང་རྣམས། །ཁྲོ་བོ་ཙན་དན་བེང་བསྣམས་ཀྱིས། །ཞེས་དང་། མེ་ལྕེ་ཕྲེང་རྒྱུད་ལས། ཙན་དན་བེང་གི་བར་ཤེད་ནས། །སྤྲུལ་བའི་ཕོ་ཉ་འབུམ་བཀྱེ་བས། །ཞེས་སོ། །
༡ བེང་གི་རྒྱུ་ནི། རྙིང་རྒྱུད་མེ་ལྕེ་ཕྲེང་རྒྱུད་ལས། དེ་ནས་བེང་གི་བཅས་དག་ནི། །ཙན་དན་སེང་ལྡེང་ཤེར་ཤིང་དང་། །སྐྱེར་ལྡེང་མཛོ་མོ་གླ་བ་དང་། །རྒྱ་ཤུག་དག་ལ། ཞེས་གསུངས་པ་དང་།
༢ དབྱིབས་ནི། རྒྱུད་དེ་ཉིད་ལས། རྒྱ་ཤུག་དག་ལ་འདོམ་གང་ངམ། །མདའ་ཚད་གང་དུ་བྱས་པ་ལ། །ལོགས་བརྒྱད་རྒྱ་མདུད་གཉིས་ལྡན་པ། །མགོ་བོར་ནོར་བུ་མེ་འབར་བ། །རྡོ་རྗེ་རྩེ་མོ་ཕུར་བུའི་དབལ། །ཁ་དོག་སྨུག་པོ་ཡང་ན་གནག །ཕྱོགས་བརྒྱད་ལྷ་སྲིན་སྡེ་བརྒྱད་ཀྱི། །སྲོག་སྙིང་དྲག་སྔགས་བཅས་པ་གཞུག །ཅེས་དང་། ཡང་ཁ་ཅིག སྟོད་ལ་ཁྱུང་སོགས་འདབ་ཆགས་དང་། སྐེད་པར་འབྲུག སྨད་ལ་སྟག་གཟིག་གི་རི་མོ་འབྲི་བར་ཡང་བཤད་དོ། །