ཐུགས་རྗེ་ཆེན་པོ་པདྨ་གཙུག་ཏོར་ཐེག་དགུ་དང་འབྲེལ་བ་ལས། ལྷ་མིའི་ཐེག་པ་ཐུབ་པ་གནས་བཅུའི་དབང་གི་ཟིན་བྲིས།
༈ ཐུགས་རྗེ་ཆེན་པོ་པདྨ་གཙུག་ཏོར་ཐེག་དགུ་དང་འབྲེལ་བ་ལས། ལྷ་མིའི་ཐེག་པ་ཐུབ་པ་གནས་བཅུའི་དབང་ལ། དཀྱིལ་འཁོར་བཅས་བཤམ་དང་སྒྲུབ་མཆོད་གྲུབ་ནས། བདག་འཇུག་ནི། རང་ཉིད་ཐུབ་པར་མོས་པའི་སྤྱི་བོའི་གཙུག །རིན་ཆེན་འོད་ཟེར་འབར་བའི་སྣང་བ་ཡིས། །ཕྱོགས་བཅུའི་རྒྱལ་བ་སྲས་བཅས་བྱིན་རླབས་ཀུན། །འོད་ཀྱི་རྣམ་པར་བསྡུས་ཏེ་རང་ལ་ཐིམ། །སླར་ཡང་སྤྱི་བོའི་འོད་ཀྱིས་བསྐུལ་བ་ལས། །དཀྱིལ་འཁོར་ལྷ་ལས་རང་འདྲའི་གཉིས་པ་འཕྲོས། །སྤྱི་བོ་ནས་ཐིམ་སྡུག་བསྔལ་ཀུན་འབྱུང་འགགས། །འགོག་ལམ་ཡོན་ཏན་རྒྱུད་ལ་སྐྱེས་པར་གྱུར། །དེ་ནས་སློབ་མ་རྗེས་བཟུང་ལ་ཁྲུས་བྱ། ཆོས་
བཤད་ཀྱིས་མཚམས་སྦྱར་ཏེ་མཎྜལ་ཕུལ། སྦྱོར་བ་སྐྱབས་འགྲོ་དང་། དངོས་གཞི་བསྙེན་གནས་ཀྱི་སྡོམ་པ་དང་། དེའི་གདམས་ངག་འབོགས་པ། རྗེས་བསླབ་པ་གསུམ་མི་ཉམས་ཤིང་བརྟན་པར་བྱ་བའི་སླད་དུ་དབང་བསྐུར་བའོ། །ཕྱི་མ་ལ་མཎྜལ། ཀུན་མཁྱེན་ཡེ་ཤེས་སོགས་གསོལ་འདེབས། སྦྱོར་བ་སྡིག་སྒྲིབ་དག་ཕྱིར། ཇི་ལྟར་བལྟམས་པ་སོགས་དང་མུ་ནེ་བཟླས་པས་བུམ་ཁྲུས་བྱ། །དངོས་གཞི་ལུས་ཀྱི་སྡོམ་པ་ལེགས་པའི་ཆེད་ལྷ་རྣམས་སྤྲོས་ཏེ། འདས་དང་མ་བྱོན་ད་ལྟར་གྱི། །དུས་གསུམ་སངས་རྒྱས་ཇི་སྙེད་པའི། །བཅོམ་ལྡན་གཙོ་བོས་དབང་བསྐུར་བས། །འཁོར་བའི་སྡུག་བསྔལ་གྲོལ་བར་ཤོག །སྔགས་བརྗོད། མཆོག་གསུམ་བདེན་པའི་བྱིན་རླབས་ཀྱིས། །རིགས་ཀྱི་བུ་ལ་འཕགས་པ་ཆེ། ཡན་ལག་འབྱུང་གིས་དབང་བསྐུར་བས། །དམ་ཆོས་ཆབ་སྲིད་འཛིན་པར་ཤོག །ཨོཾ་མ་ཧཱ་སྭཱ་ཝི་ར་ཨ་བྷི་ཥིཉྩམི། ཞེས་སོ་སོར་སྦྱར་ལ་གནས་བརྟན་བཅུ་དྲུག་དང་། དྷརྨ་ཏཱ་བཅས་བསྐུར། སྔགས་བྱང་གཏད་ལ། མཆོག་གསུམ༔ རིགས་ཀྱི་བུ་ལ་དམ་པའི་ཆོས། །ཀུན་ཚང་སྙིང་པོའི་དབང་བསྐུར་བས། །ཆོས་ཀྱི་མཛོད་མཆོག་འཛིན་པར་ཤོག །ཡེ་དྷརྨཱ་བརྗོད། མཆོད་རྟེན་གཏད་ལ། མཆོག་གསུམ༔ རིགས་ཀྱི་བུ་ལ་སངས་རྒྱས་ཀྱི། །ཆོས་སྐུའི་རྟེན་མཆོག་དབང་
བསྐུར་བས། །ཟད་དང་མི་སྐྱེ་ཤེས་པར་ཤོག །མུ་ནེ་དང་། དྷརྨ་ཀཱ་ཡ་ཨ་བྷི་ཥིཉྩ་མི། མཐའ་རྟེན་བཀྲ་ཤིས་བརྗོད་ཅིང་མེ་ཏོག་འཐོར། བསླབ་བྱ་ཁས་བླངས། མཎྜལ་སོགས་སྤྱི་ལྟར་རོ། །གཏེར་ཆེན་རིན་པོ་ཆེའི་ཕྱག་བཞེས་ལྟར་བྲིས།། །།