སྐད་བཅོས་ཚངས་པའི་རྒྱུད་མང་།
༈ སྐད་བཅོས་ཚངས་པའི་རྒྱུད་མང་ཞེས་བྱ་བ་བཞུགས་སོ། །སྨན་བླ་དྲང་སྲོང་བརྒྱུད་པར་བཅས། །གུས་པས་སྤྱི་བོར་མཆོད་བྱས་ནས། །ཚངས་དབྱངས་སྐད་ཀྱི་གདམས་པ་ནི། །ཤིན་ཏུ་གསལ་བར་འདིར་བརྗོད་བྱ། །སྔོན་འགྲོ་ཤ་ཆང་མར་རྙིང་དང་། །མངར་སྐྱུར་དུད་པ་ས་འཚུབ་སོགས། །ལུས་ངག་འཁྲུགས་པའི་ཟས་སྤྱོད་སྤངས། །ལྟོ་སྟོང་དུས་སུ་གྲེ་བ་ཡིས། །བད་ཀན་སྦྱོངས་ཕྱིར་ཞག་བདུན་ནམ། །དགུ་དང་བཅུ་གཅིག་བར་དག་ཏུ། །འཇམ་སྐྱུགས་ལན་འགའ་གཏོང་བ་གནད། །དངོས་གཞི་གི་ཝཾ་གུརྒུམ་དང་། །ཅུ་གང་ལི་ཤི་སྲོ་ལོ་དཀར། །སུག་སྨེལ་ཤིང་མངར་རུ་རྟ་ནི། །ཐུན་བཟང་ཨ་རུ་གསེར་མདོག་དང་། །ལུང་པ་བྱང་ལྟས་སྤངས་རྒྱན་དཀར། །བ་མོ་མ་ཕོག་ལོ་འདབ་ནི། །ཐུན་ལོག་མོ་ཅོང་བཅས་པ་རྣམས། །རྩི་བཞིན་བཏགས་ནས་ཀ་ར་ཡིས། །མགོ་བསྡུས་རིལ་བུ་ཐོ་རངས་དང་། །ལྟོ་སྟོང་རྣམས་སུ་མྱང་བར་བྱ། །རྗེས་ནི་སྨན་རྣམས་མང་སྦྱར་ཏེ། །རྒྱུན་དུ་བསྟེན་ཞིང་ལུས་ངག་གི །སྤྱོད་ལམ་བག་དང་ལྡན་པ་ཡིས། །སྐད་བཟང་ལྡན་པའི་གྲོགས་དང་བཅས། །འགྱུར་ཁུག་སྦོམ་ཕྲ་འདེགས་འཇོག་སོགས། །དབྱངས་ཀྱི་ཡན་ལག་ཡོངས་རྫོགས་པའི། །
སྦྱོར་བ་དག་པས་ནན་ཏན་བྱ། །བསྲུང་བྱ་སྤྱི་དང་ཁྱད་པར་དུ། །དྭ་ཚོད་ཤ་རུལ་མར་རྙིང་དང་། །ཉ་ཕག་བུ་རམ་ཁུ་བ་དང་། །བསུར་གཞོབ་དུད་པ་ས་འཚུབ་རྣམས། །རྒྱུན་དུ་སྤང་བ་ཤིན་ཏུ་གཅེས། །དེ་ལྟར་འབད་པས་གནས་སྐབས་སུ། །བྷ་མ་ར་ལྟར་ཕྲ་བ་དང་། །དུང་དཀར་ལྟ་བུར་གསང་བ་དང་། །ཀ་ལ་པིངྐ་ལྟར་སྙན་དང་། །སྤྲིན་སྒྲ་ལྟ་བུར་བརྗིད་པ་སོགས། །ཚངས་པའི་གསུང་ལ་དབང་ཐོབ་ཅིང་། །མཐར་ཐུག་མིང་ཚིག་བརྗོད་པ་ཀུན། །གསལ་བས་མཆོད་ཡུལ་མཉེས་པ་དང་། །ཚོགས་པ་ཀུན་གྱིས་རྣ་བར་སྙན། །ལྷ་དང་མཁའ་འགྲོ་དམ་ཅན་འདུ། །མང་པོའི་ཡིད་ཀྱང་སྐད་ཅིག་པུས། །ཟིལ་གྱིས་ནོན་བའི་གྲགས་པ་ཡིས། །ལྷར་བཅས་འཇིག་རྟེན་དགའ་བསྐྱེད་ཅིང་། །ངག་གི་སྒྲིབ་དག་གསུངས་རྡོ་རྗེའི། །གོ་འཕང་མཆོག་ལ་མྱུར་བར་འགྲོ། །དེ་ཕྱིར་གཞུང་དང་མན་ངག་གི། །སྙིང་པོ་གདམས་པའི་བདུད་རྩི་འདི། །དོན་གཉེར་ཡིད་ཀྱི་ཨུཏྤ་ལ། །ཀུན་གྱི་འཛུམ་ཕྲེང་གྲོལ་བར་ཤོག །ཞེས་པའང་ཐ་སྙད་རིགས་པར་སྨྲ་བའི་གཞོན་ནུ་ཨ་བྷ་ཡས་ཨེ་ཝཾ་གཙུག་ཏོར་དུ་བྲིས་པ་ཤུ་བྷཾ། །