ལེའུ་བཞི་པའི་རྣམ་པར་བཤད་པ།
༈ སྤྱི་དོན་གཉིས་པ་དེ་ལས་ཞི་ཁྲོ་གཉིས་ཀྱི་དཀྱིལ་འཁོར་ཇི་ལྟར་འཕྲོས་ཚུལ་བསྟན་པ་ལ་གཉིས་ཏེ། ཞི་བ་ལྷུན་གྱིས་གྲུབ་པའི་དཀྱིལ་འཁོར་བསྟན་པ་དང་། ཁྲོ་བོ་མངོན་པར་འབྱུང་བའི་དཀྱིལ་འཁོར་བཤད་པའོ། །དང་པོ་ལ་གསུམ་སྟེ། གཞི་དཀྱིལ་འཁོར་བསྐྱེད་ཅིང་དབང་བསྐུར་བ། ལམ་བསྐྱེད་པ་དང་རྫོགས་པའི་རིམ་པ་བསྟན་པ། འབྲས་བུ་སྐུ་དང་ཡེ་ཤེས་ཀྱི་རང་བཞིན་ལ་བསྟོད་པའོ། །དང་པོ་ལའང་གཉིས་ཏེ། དཀྱིལ་འཁོར་གསུམ་གྱི་རང་བཞིན་སྤྱིར་བསྟན་པ་དང་། དབང་བསྐུར་བའི་ཐབས་བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ། རྒྱུའི་ཡི་གེ་སྤྲིན་གྱི་དཀྱིལ་འཁོར་བསྟན་པ། དེ་ལས་བྱུང་བ་ཏིང་ངེ་འཛིན་གྱི་དཀྱིལ་འཁོར་བསྟན་པ། དེ་གསལ་བར་བྱེད་པ་གཟུགས་བརྙན་གྱི་དཀྱིལ་འཁོར་བསྟན་པའོ། །དང་པོ་ལ་གཉིས་ཏེ། ཡི་གེ་སྤྲིན་གྱི་དཀྱིལ་འཁོར་དགོད་པ་དང་། དེ་ལྟར་བསྒྲུབ་པའི་རིམ་པའོ། །དང་པོ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་གཉིས་ཏེ། སྤྱིར་བསྟན་པ་དང་། བྱེ་བྲག་ཏུ་བཤད་པའོ། །
དང་པོ་ལ་གསུམ་སྟེ། ཡི་གེའི་སྒྲ་དོན། མཚན་ཉིད། དབྱེ་བའོ། །དང་པོ་ནི། ཨཀྵ་རའི་སྒྲ་ལས། ཨ་ནི་དགག་པ་དང་། ཀྵ་ར་ནི་འགྱུར་བ་ལ་འཇུག་པས། ངོ་བོ་འགྱུར་བ་མེད་ཅིང་དོན་གསལ་བར་སྟོན་པའི་རྟེན་དུ་རུང་བའོ། །དེ་ལ་འདིར་སྒྲ་པ་རྣམས་ནི་ཡི་གེ་དང་། ཡི་གེ་ཕྱི་མོ་གཉིས་སུ་འདོད་པ་ལས། ཡི་གེ་ནི་སྒྲ་སྤྱིའི་རྣམ་པ་སྟེ། འཆད་པ་པོ་དང་ཉན་པ་པོ་གང་རུང་ལ་རྣམ་སྤྱི་དེར་སྣང་བའོ། །ཕྱི་མོ་ནི་གཟུགས་སུ་བྲིས་པ་ལ་འདོད་དེ། དེ་ཉིད་བཀླགས་པ་ལས་སྒྲ་དོན་གྱི་རྣམ་སྤྱིའི་ཡི་གེ་བསྐྱེད་ཅིང་སྣང་བར་བྱེད་པའི་ཕྱིར་རོ། །མཚན་ཉིད་ནི་མི་ལྡན་པའི་འདུ་བྱེད་ཀྱིས་བསྡུས་པ་གང་ཟག་གི་སྒྲ་(༩༡)དོན་གྱི་རྣམ་པ་སྤྱིར་ཤར་བའོ། །དབྱེ་ན་དབྱངས་ཡིག་བཅུ་དྲུག་དང་། གསལ་བྱེད་སུམ་ཅུ་རྩ་བཞི་སྟེ། དེ་ཡང་ཐུང་ངུ་དང་། རིང་པོ་དང་། ཤིན་ཏུ་རིང་པོའོ། །ཐུང་ངུ་ནི་ཡི་གེ་གཅིག་བརྗོད་པའི་ཚད་དེ་ཀ་ཞེས་པ་ལྟ་བུའོ། །རིང་པོ་ནི་གཉིས་ཀྱི་ཚད་དེ་ཀཱ་ཞེས་པ་ལྟ་བུའོ། །ཤིན་ཏུ་རིང་པོ་ནི་གསུམ་གྱི་ཚད་དེ་ཨཻ་དང་ཨཽ་ལ་སོགས་པ་ལྕི་བ་རྣམས་སོ། །དེ་དག་ལའང་ཕོ་མོ་མ་ནིང་གི་དབྱེ་བས་རྣམ་པ་གསུམ་མོ། །འདི་དག་གང་ལས་བྱུང་ཞེ་ན། མཆུ་དང་། ལྕེ་དང་། རྐན་དང་། ཁོང་ནས་འབྱུང་བ་སྟེ། པ། ཙ། ཡ། ཨ་ཞེས་པ་ལྟ་བུའོ། །དེ་དག་འབྱུང་བའི་རྒྱུ་ནི། སྨྲ་སྒོ་ལས། གནས་རྣམས་དང་ནི་བྱེད་པ་དང་། །རྣམ་པར་རྟོག་དང་རླུང་གཉིས་དང་། །ང་རོ་གསལ་བྱེད་སྣང་ཆ་ཡིས། །ངག་དུ་འདུ་བྱེད་ཀུན་ཏུ་བསྐྱེད། །ཅེས་པས་རྒྱུ་བདུན་པོ་དག་ལས་སྐྱེ་སྟེ་སོ་སོར་བཤད་ན། ཡང་དེ་ཉིད་ལས། གནས་རྣམས་གཞི་ཡི་རྒྱུ་ཡིན་ཏེ། །བྱེད་པ་འབྱིན་པར་བྱེད་པའི་རྒྱུ། །དེ་བཞིན་རྣམ་རྟོག་བསྐུལ་བའི་རྒྱུ། །ཇི་ལྟར་ཤིང་ལ་རླུང་བཞིན་དུ། །བྱེད་པ་བསྐྱོད་རྒྱུ་པཱ་ཡ་ཏ། །སྐྱེས་བུ་དང་ནི་བཞོན་པ་བཞིན། །ལྷན་ཅིག་འབྱུང་བ་ནི་ཤྭ་སྭ། །ང་རོ་རྣམས་དང་གསལ་བྱེད་ནི། །ཀུན་ཏུ་ཁྱབ་པར་འགྲོ་བའི་རྒྱུ། །སྣང་ཆ་འདྲ་བར་འབྱུང་བ་ནི། །སྐལ་བ་མཉམ་པའི་རྒྱུ་ཞེས་བྱ། །ཞེས་སོ། །
གཉིས་པ་བྱེ་བྲག་ཏུ་བཤད་པ་ལ་གསུམ་སྟེ། ཡི་གེའི་ངོ་བོ། དབྱེ་བ། དགོས་ཆེད་དོ། །དང་པོ་ནི། སེམས་ཉིད་གདོད་ནས་དག་པའི་རང་བཞིན་ཡི་གེའི་རྣམ་པར་སྣང་བ་ལ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་རྟེན་བྱེད་པའོ། །གང་ལ་གནས་ན་སངས་རྒྱས་དང་སེམས་ཅན་སོ་སོའི་འཁོར་ལོ་བཞི་ན་རྩའི་ནང་གི་ཐིག་ལེ་ལ་བརྟེན་ནས་སོ་སོར་གནས་ཏེ། དེ་ཡང་ཁ་དོག་དང་ཡོན་ཏན་གསལ་བས་འགྲོ་བའི་རྣམ་ཤེས་དྭངས་ཤིང་དབང་པོ་རྣོ་ལ་དཔལ་ཆེ་བའོ། །ཡི་གེའི་གཟུགས་མི་གསལ་བས་བླུན་ཞིང་སྐྱོན་དང་ལྡན་པའོ། །སྙིང་ག་ལ་སོགས་པར་བསྒོམས་པས་དེའི་ཁ་དོག་དང་ཡོན་ཏན་འཕེལ་ཏེ་དངོས་གྲུབ་འབྱུང་བའི་རྒྱུ་བྱེད་པ་ཡང་དེ་ཡིན་ནོ། །དབྱེ་ན་ལུས་གནས་རྩའི་ཡི་གེ། ཕྲོ་བྲང་ལྷའི་ཡི་གེ། ཆོ་འཕྲུལ་སྤྲུལ་པའི་ཡི་གེ། མཚོན་བྱེད་སྒྲའི་ཡི་གེའོ། །དང་པོར་རྒྱུད་སྡེ་སོ་སོར་རྩ་འདབ་འཁོར་ལོར་ཡི་གེ་གནས་ཚུལ་དུ་མ་གསུངས་ཤིང་། འདིར་ནི་སྤྱི་བོ་མགྲིན་པ་སྙིང་ག་གསུམ་དུ་ༀ་ཨཱཿཧཱུྃ་གསུམ་དང་། སྙིང་གར་ཞི་བ་བཞི་བཅུ་རྩ་གཉིས་ཀྱི་ཡི་གེ་དང་། སྤྱི་བོར་ཁྲག་འཐུང་ལྔ་བཅུ་རྩ་བརྒྱད་ཀྱི་ཡི་གེ་སྟེ་རིགས་བརྒྱའི་སྐུ་གསུང་ཐུགས་ཀྱི་ཡི་གེ་དང་བཅས་པས་བརྒྱ་དང་གསུམ་དུ་(༩༢)གསུངས་སོ། །གནས་སྐབས་སུ་འགྲོ་བ་དྲུག་གི་ས་བོན་གྱི་ཡི་གེ་མ་དག་པ་དྲུག་ནི་སྦྱང་གཞིར་བསྟན་ཏེ། ལྷ་དེ་དག་གི་ཡི་གེས་གནས་སུ་དག་པའི་ཐབས་སུ་བཤད་པའོ། །དེའང་སྤྱི་བོར་རམ་སྨིན་མཚམས་སུ་ཨ་དང་། སྨིན་མཚམས་སུ་དང་མགྲིན་པར་ཏྲི། སྙིང་གར་ནྲི། ལྟེ་བར་སུ། གསང་གནས་སུ་པྲེ། རྐང་མཐིལ་དུ་དུ་རྣམས་འགྲོ་བ་དྲུག་གི་ཡི་གེ་སྟེ། དེ་དག་ལ་འགྲོ་དྲུག་སོ་སོར་སྐྱེ་བའི་ལས་དང་བག་ཆགས་བརྟེན་པར་བཤད་དོ། །སྦྱང་གཞིའི་དྲུག །སྦྱོང་བྱེད་བརྒྱ་དང་གསུམ་ནི་ལུས་ལ་གནས་སོ། །ཕོ་བྲང་ལྷའི་ཡི་གེ་ནི་ལྷ་བསྒོམ་པའི་ཚེ་དཀྱིལ་འཁོར་གྱི་གནས་སོ་སོར་བསྐྱེད་པའོ། །སྤྲུལ་པའི་ཡི་གེ་ནི་སངས་རྒྱས་ལོངས་སྤྱོད་རྫོགས་པ་སྐུའི་སྐུ་གསུང་ཐུགས་རྡོ་རྗེ་ལས་ཡི་གེ་སྤྲིན་འཐོན་ཏེ་སྤྲུལ་པ་དུ་མ་འཕྲོ་བས་འགྲོ་བའི་དོན་མཛད་པའོ། །སྒྲའི་ཡི་གེ་ནི་སྔགས་སུ་ཟློས་པ་སྟེ་སྒྲ་སོ་སོར་བརྗོད་པའོ། །དགོས་པ་ནི་སོ་སོའི་དོན་བསྒྲུབ་པ་སྟེ། དེའང་རྩའི་ཡི་གེས་སྐུ་དང་ཡེ་ཤེས་འདུ་འབྲལ་མེད་པའི་རྟེན་བྱེད་པའོ། །ལྷའི་ཡི་གེས་ལྷ་སོ་སོའི་འཕྲོ་གཞི་བྱེད་པས་བསྐྱེད་རྫོགས་དག་པའི་དོན་བྱེད་པའོ། །སྤྲུལ་པའི་ཡི་གེས་སེམས་ཅན་ཚད་མེད་པའི་དོན་བྱེད་པའོ། །སྒྲའི་ཡི་གེས་གསང་སྔགས་འགྲུབ་པའི་རྒྱུ་བྱེད་པའོ། །དེའང་སྐབས་འདིའི་ཨའི་ཁོངས་ནས་ཡི་གེ་གཞན་རྣམས་འཕྲོ་བ་ཡིན་ཏེ། ཀུན་འདུས་ལས། དབྱིངས་ལས་ཨ་བྱུང་ཨ་ལས་ནི། །ཡི་གེའི་ཚོགས་རྣམས་མ་ལུས་འཕྲོ། །ཞེས་སོ། །འདིར་གསལ་བྱེད་རྣམས་ཚང་ཡང་དབྱངས་མ་ཚང་བ་ནི་བསྡུས་ཏེ། ལྷའི་རྣམ་གྲངས་དང་མཐུན་པར་སྦྱར་བ་ཡིན་ནོ། །དེའང་ཨཱ་རིང་པོ་ནི་ཤད་དུ་བསྡུས། མཐའ་མའི་ཨཿརྣམ་པར་བཅད་པ་ནི་ཚེག་ཏུ་བསྡུས། རིང་པོའི་གོང་གི་ཨ་དང་ཨྃ་སྣ་དང་ལྡན་པ་ནི་ཨོ་ལ་སྦྱར་ནས་ཨ་དང་ཨྃ་གཉིས་ཀ་ཨཱ་དུ་བསྡུས། མ་ནིང་གི་ཡི་གེ་ར྇་རཱ྇་ལ྇་ལཱ྇་བཞི་ནི་གསལ་བྱེད་ཀྱི་ར་དང་ལར་བསྡུས་པས་བཞི་བཅུ་ཞེ་གཉིས་སོ། །ཐོག་མའི་ཨ་ལྷག་པ་ནི་ཡི་གེ་རྣམས་ཀྱི་འཕྲོ་གཞི་སྟེ། ཡི་གེ་བསྡུས་པའི་དབང་དུ་གསུངས་པས་ཨོ་གྲོགས་སུ་སྦྱར་བ་སྟེ་ཨཱ་གྱི་ཁོངས་སུ་གཏོགས་སོ། །དེ་ལྟར་ཡི་གེའི་འཕྲེང་བ་དག་ནི་གནས་གང་ལས་བྱུང་ཞེ་ན། ཀུན་འདུས་རིན་པོ་ཆེའི་རྒྱུད་ལས། ཀ་ལ་སོགས་པ་རྣམ་པ་ལྔ། །མགུལ་གྱི་གསུང་གི་རང་བཞིན་ཡིན། །གཉིས་པ་ཙ་ལ་སོགས་པ་ལྔ། །ཟླ་གམ་ལྗགས་ཀྱི་རང་བཞིན་ཡིན། །གསུམ་པ་ཊ་ལ་སོགས་པ་ལྔ། །ལྗགས་ཀྱི་རྩེ་མོའི་རང་བཞིན་ཡིན། །བཞི་པ་པ་ལ་སོགས་པ་སྟེ། །ཞལ་གྱི་སྒྲོས་ལས་འབྱུང་བར་བཤད། །སྐྱེས་བུ་ཆེན་པོའི་སྨིན་མ་ལས། །འཁོར་བར་གནས་པའི་ཡིག་འབྲུ་ཡ། །སྐྱེས་བུ་ཆེན་པོའི་དཀུ་སྐབས་ལས། །གཏི་མུག་སེལ་བའི་ཡིག་འབྲུ་ཝ། །སྐྱེས་(༩༣)བུ་ཆེན་པོའི་སྟ་ཟུར་ལས། །འདོད་ཆགས་བསྲེག་པའི་ཡིག་འབྲུ་ར། །སྐྱེས་བུ་ཆེན་པོའི་དཔུང་པ་ལས། །རྟོག་པ་འཇོམས་པའི་ཡི་གེ་ལ། །ཐུགས་ལས་འཁྱིལ་པའི་དཔལ་བེ་ལས། །མཚན་མ་དག་པའི་ཡི་གེ་ཤ །ཕྱག་གི་འཁོར་ལོའི་འོད་ཟེར་ལས། །ཆོ་འཕྲུལ་སྟོན་པའི་ཡི་གེ་ཥ། །སྐུ་ཡི་ཁྲུ་ཚད་ལྟེ་བ་ནས། །འདོད་པ་འབྱུང་བའི་ཡི་གེ་ས། །ཞབས་ཀྱི་འཁོར་ལོའི་འོད་ཟེར་ལས། །སྒྲིབ་པ་བསྲེག་པའི་ཡིག་འབྲུ་ཧ། །གསང་བ་མཁའ་ཡི་རང་བཞིན་ནས། །ཆོ་འཕྲུལ་འབྱུང་བའི་ཡི་གེ་ཀྵཿ སྐྱེས་བུ་ཆེན་པོའི་སྤྱན་གཉིས་ལས། །རང་བཞིན་ཡི་གེ་ཨི་གཉིས་ཤར། །སྐྱེས་བུ་ཆེན་པོའི་སྙན་གཉིས་ལས། །རང་བཞིན་ཡི་གེ་ཨུ་གཉིས་ཤར། །སྐྱེས་བུ་ཆེན་པོའི་ཞབས་གཉིས་ལས། །རང་བཞིན་ཡི་གེ་ཨེ་གཉིས་ཤར། །སྐྱེས་བུ་ཆེན་པོའི་སྤྱི་གཙུག་ལས། །རྒྱལ་བའི་ཡི་གེ་ཨཱ་དུ་ཤར། །ཞེས་སོ། །དེའང་ཡི་གེ་འདི་དག་སངས་རྒྱས་ཀྱི་སྐུ་ལས་ཡི་གེ་སྤྲིན་དུ་འཕྲོ་ཞིང་དཀྱིལ་འཁོར་བསྐྱེད་པའི་ས་བོན་དུ་བྱུང་ལ། སེམས་ཅན་གྱི་རྩ་གནས་ན་རང་བཞིན་གྱིས་གནས་སོ། །དེ་ལྟར་བཞི་བཅུ་རྩ་གཉིས་ཀྱི་སྟེང་དུ་ཨི་གླང་པོ་ཆེའི་སྣ་ལྟ་བུ་དང་། ཨཱ་རིང་པོ་མདའ་ལྟ་བུ་དང་། ཚེག་སྟེ་ཨཿདབང་ཕྱུག་ཆེན་པོའི་མིག་ལྟ་བུ་གསུམ་ཡི་གེ་རྣམས་ཀྱི་ཁོངས་ན་ཡོད་པ་དེ་སོ་སོར་བགྲངས་པས་བཞི་བཅུ་རྩ་ལྔའོ་ཞེས་རོང་པ་གསུང་ལ། ཁ་ཅིག་སྐུ་གསུང་ཐུགས་ཀྱི་ཡི་གེ་གསུམ་དུ་བཞེད་དེ། ཡི་གེ་ལྟར་ན་སྔ་མ་ལྟར་གནས་ཀྱང་། ལྷའི་དབང་གིས་ཕྱི་མ་ཉིད་རིགས་སོ་ཞེས་པའང་འདོད་མོད་ཀྱི། འདིར་ཡི་གེའི་མགོ་གླང་པོ་ཆེའི་སྣ་ལྟ་བུ། ཐིག་ལེ་ཚེག་དྲག་མིག་ལྟ་བུ། ཤད་མདའ་ལྟ་བུ་ཉིད་ལ་ངོས་བཟུང་ངོ་། །སྤྱིའི་དོན་ཏོ། །
གཉིས་པ་གཞུང་གི་དོན་ལ་གསུམ་སྟེ། དོན་གྱི་འབྲེལ་དགོད། ཚིག་གི་དོན་བཤད། སྐབས་ཀྱི་དོན་བསྡུ་བའོ། །
དང་པོ་ནི། གཞི་ལྷུན་གྱིས་གྲུབ་པའི་ངང་ལས་ཐུགས་རྗེ་འཕྲོས་ཏེ་ཆོས་ཐམས་ཅད་གཏན་ལ་ཕབ་པའི་དོན་གསུངས་པ་དེ༵་ན༵ས་ཕྱོགས་བཅུ་དུས་བཞིའི་དེ༵་བཞི༵ན་གཤེ༵གས་པ༵་ཐམ༵ས་ཅ༵ད་ཡི་གེ་སྒྱུ་འཕྲུལ་གྱི་རང་བཞིན་ཡེ་ནས་སངས་རྒྱས་པའི་དོན་གྱི་དགོ༵ངས་པ༵་གཅི༵ག་ཏུ༵་གྱུ༵ར་ན༵ས་ཆོས་ཐམས་ཅད་དབྱེར་མེད་པའི་མཉ༵མ་པ༵་ཆེ༵ན་པོ༵འི་ཚུ༵ལ་སྐུ་གསུང་ཐུགས་ཡོན་ཏན་འཕྲིན་ལས་ཆེན་པོའི་རང་བཞིན་རྡོ༵་རྗེ༵འི་དབྱི༵ངས་སུ༵་སྣང་སྲིད་འཁོར་འདས་ཀྱི་ཆོ༵ས་ཐ༵མས་ཅ༵ད་ཡི་གེའི་ངོ་བོར་ཡེ༵་ན༵ས་སང༵ས་རྒྱ༵ས་པ༵འི་ཏིང༵་ངེ༵་འཛི༵ན་ལ༵ས་དགོངས་པ་མི༵་གཡོ༵་བ༵ར་ཆོས་ཉིད་མཉམ་རྫོགས་ཆེན་པོའི་དོན་བསྟན་པའི་ཕྱིར། ཆོས༵་ཐ༵མས་ཅ༵ད་དོན་ལ་གྲུབ་པ་མེད་པས་མི༵ང་ཙ༵མ་དུ༵་གདོད་མ་ཉིད་ནས་གན༵ས་པ༵འི་རང་བཞིན་ཡི༵་གེ༵འི་ཕྲེ༵ང་བ༵འི་འཁོ༵ར་ལོ༵་ཞེ༵ས་བྱ༵་བ༵་འདི༵་དེ་བཞིན་གཤེགས་པ་ཉིད་ཀྱི་སྐུ༵་ད༵ང་ག༵སུང་ད༵ང་ཐུ༵གས་རྡོ༵་རྗེ༵་(༩༤)ལ༵ས་ཕྱུ༵ང་ངོ༵་། །ཞེས་སོ། །
གཉིས་པ་ལ་གསུམ་སྟེ། ཡི་གེ་འཁོར་ལོའི་རང་བཞིན་སྤྱིར་བསྟན་པ། ལྷ་དང་སྦྱར་ཏེ་བྱེ་བྲག་སོ་སོར་བཤད་པ། དེ་གཉིས་ཀའི་དོན་བསྡུ་བའོ། །དང་པོ་ལ་གསུམ་སྟེ། ཡི་གེ་ཇི་ལྟར་བསྒོམ་པའི་ཚུལ། ཡི་གེའི་སྤྲིན་ཇི་ལྟར་སྤྲོས་པའི་ཚུལ། ཡི་གེའི་རང་བཞིན་ཇི་ལྟར་བཤད་པའི་ཚུལ་ལོ། །དང་པོ་ལ་གཉིས་ཏེ། བསྒོམ་ཚུལ་དངོས་དང་། དེའི་ཕན་ཡོན་བསྟན་པའོ། །དང་པོ་ལ་གསུམ་སྟེ། བསྐྱེད་པའི་རིམ་པ་དང་། རྫོགས་པའི་རིམ་པ་དང་། དེའི་ལས་ཚོགས་དང་སྦྱར་ཏེ་ཇི་ལྟར་བསྒོམ་པའི་ཚུལ་ལོ། །
དང་པོ་ནི། སྐྱབས་སུ་འགྲོ་བ་དང་སེམས་བསྐྱེད་པ་དང་སྟོང་པ་ཉིད་དུ་བསམ་པའི་ངང་ལས་པདྨ་དང་ཟླ་བའི་སྟེང་དུ་ཨ༵ཿརབ་ཏུ༵་བརྟ༵ན་ཞིང་གཡོ་བར་མ་གྱུར༵་པའི་རང་བཞིན་དུ་དྲི་མ་མེད་པའི་ཨ༵་དཀ༵ར་པོ་དྭངས་ཤིང་འཚེར་བ་ལས༵་ཡུངས་འབྲུ་བརྒྱར་གཤགས་པའི་ཚད་ཙམ་གྱི་ཤིན༵་ཏུ༵་ཕྲ༵་བའི༵་ཨ༵་དཀར་པོ་གྲངས་མེད་པ་རྣ༵མས་སྤྲོས་པས། ཕྱོ༵གས་བཅུ༵འི་འཇིག་རྟེན་གྱི་ཁམས་ཐམས་ཅད་ཡོངས་སུ་ག༵ང་བ༵ར་བྱས་པའི་འོད་ཟེར་གྱིས་སྣང་སྲིད་ཐམས་ཅད་ཨའི་རྣམ་པར་གས༵ལ་བར་གྱུ༵ར་ན༵ས། དེ་ཐམས་ཅད་སླར་རྩ་བའི་ཨ་ཉིད་ལ་བསྡུ༵ས་ཤིང་ཐིམ་པར་གྱུར་ཀྱ༵ང་ཨ་དེ་ཉིད་སྔོན་ལས་ཆེར་འཕེ༵ལ་བའམ་ཆུང་དུ་འགྲིབ༵་པ་མེ༵ད་པ༵ར་བརྟན༵་པའི་ངང་ལ་དར་གཅིག་མཉམ་པར་བཞག་གོ། །དེ་ནས་རྩ་བའི་ཨ་དེ༵་ཉིད་ལས༵་མིང༵་གི་ཡི་གེ་ཀ་ལ་སོགས་པ་སུམ་ཅུ་རྩ་བཞིའི་ཚོ༵གས་དང་སྒྲའི་ཡི་གེ་དབྱངས་ཡིག་རྣམས་ཕྱོགས་བཅུར་སྤྲོས་པའི་འོད་ཀྱིས་སེམས་ཅན་ཐམས་ཅད་ཡི་གེའི་རྣམ་པར་གསལ༵་ཞིང་འོད་ཟེར་གྱི་ཕུང་པོ་གཅིག་ཏུ་འབ༵ར་བར་གྱུར་པ་ཀུན༵་སླར་འདུས་ཨ་ལ་ཐིམ། ཡང་འཕྲོས་པ་ལ་སོགས་པའི་སྤྲོ༵་ཞིང༵་བསྡུ༵་བ༵འ༵ང༵་སྔ་མ་དེ༵་ཁོ་ན་བཞི༵ན་ནོ༵། །དེ་ནས་སླར་ཡང་པདྨའི་དབུས་སུ་ཉི་མ་དང་ཟླ་བའི་སྟེང་ན་ཨ་དང་ཀྵའི་མཐར་རིམ་པ་བཞིན་ས་བོན་རྣམས་བཀོད་ལ་ལྷར་བསྐྱེད་པའོ། །དེ་ནི་བསྐྱེད་པའི་རིམ་པ་རྒྱུའི་ཡི་གེ་སྤྲིན་ནོ། །
གཉིས་པ་རྫོགས་པའི་རིམ་པ་ནི། ལྷར་གསལ་བའི་ཐུགས་ཀར་པད་ཟླའི་སྟེང་ན་ཨ་རབ་ཏུ་བརྟན་པ་དཀར་པོ་ལས་ཨ་གྲངས་མེད་པ་འཕྲོས་པས་ཕྱོགས་བཅུའི་འཇིག་རྟེན་ཐམས་ཅད་གང་ནས། སེམས་ཅན་ཐམས་ཅད་ཨའི་རྣམ་པར་གྱུར་པ་སླར་འདུས་སྙིང་གིའི་ཨ་ལ་ཐིམ་པས་འཕེལ་འགྲིབ་མེད་པའི་ངང་ལ་མཉམ་པར་གཞག་གོ། །དེ་ནས་ཡང་མཐའ་སྐོར་གྱི་ཡི་གེ་དང་ཨ་ལས་མིང་གི་ཡི་གེའི་ཚོགས་དེ་ཁོ་ན་བཞིན་འཕྲོས་པ་སླར་འདུས་འཁོར་འདས་གཉིས་སུ་མེད་པའི་ཆོས་ཉིད་འཕེལ་འགྲིབ་མེད་པའི་ངང་ལ་མཉམ་པར་གཞག་གོ། །དེ་ནི་རྫོགས་པའི་རིམ་པའི་ཡི་གེ་སྤྲིན་ནོ། །
གསུམ་པ་ལས་ཚོགས་(༩༥)དང་སྦྱར་བ་ནི་ཞི་བ་དང་རྒྱས་པ་དང་དབང་དང་དྲག་པོ་ལ་ཨ་དང་མིང་གི་ཡི་གེ་རྣམས་དཀར་པོ་དང་སེར་པོ་དང་དམར་པོ་དང་མཐིང་ནག་ཏུ་སྤྲོས་ཏེ། ནད་གདོན་ཞི་བ་དང་། ཚེ་དང་བསོད་ནམས་རྒྱས་པ་དང་། བསྒྲུབ་བྱ་དགུག་ཅིང་དབང་དུ་བྱ་བ་དང་། གདུག་པ་ཅན་ཚར་བཅད་པའི་ལས་བྱས་ནས། མཐར་འཕེལ་འགྲིབ་མེད་པའི་ངང་ལ་མཉམ་པར་གཞག་གོ། །རྒྱས་པར་ནི་ལེའུ་ལྔ་པའི་སྐབས་བཞིན་ནོ། །དེ་ནི་ལས་ཚོགས་སྒྲུབ་པའི་ཡི་གེ་སྤྲིན་ནོ། །
གཉིས་པ་དེའི་ཕན་ཡོན་བསྟན་པ་ནི་དེ་ལྟ་བུའི་བསྒོམ་ཚུལ་འདི༵་ནི༵་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་རྡོ༵་རྗེ༵་ཀུན་ཏུ་བཟང་པོའི་དངོ༵ས་གྲུབ༵་ཕུན་སུམ་ཚོགས་པ་ཐམས་ཅད་ཀྱི༵་རང་བཞིན་ཇི་ལྟར་འདོད་པ་ཐམས་ཅད་བརྟན༵་པར་འབྱུ༵ང་བའི་ཡེ༵་ཤེ༵ས་ཀྱི་རྒྱུ༵་ཡི༵ན་ནོ༵། །དེའི་ཕྱིར་མཆོག་དང་ཐུན་མོང་གི་དངོས་གྲུབ་ཕུན་སུམ་ཚོགས་པ་ཐམས་ཅད་འགྲུབ་པའོ། །ཁ་ཅིག་ཨ་རབ་ཏུ་བརྟན་གྱུར་ནས་འཕེལ་འགྲིབ་མེད་པར་བརྟན་གྱི་བར་ཡི་གེ་གཅིག་ལ་བསླབ་པ་དང་། དེ་ལས་མིང་ཚོགས་ལ་སོགས་པས་མང་པོ་ལ་བསླབ་པ་སྟེ་ཆོས་སྐུ་དང་གཟུགས་སྐུའི་རྟེན་འབྲེལ་ལམ་དུ་བྱེད་པར་འདོད་དེ་ཕྱོགས་ཙམ་ལས་ཇི་ལྟ་བ་བཞིན་མ་ཡིན་ཏེ། ཡི་གེ་སྤྲིན་ཐམས་ཅད་ཀྱི་གཞིར་འཆད་དགོས་པའི་ཕྱིར་རོ། །
གཉིས་པ་ཡི་གེའི་སྤྲིན་ཇི་ལྟར་སྤྲོས་པའི་ཚུལ་ལ་གཉིས་ཏེ། ཡི་གེ་སྤྲོས་པ་དང་། ངོ་མཚར་གྱི་ལྟས་ཁྱད་པར་ཅན་སྣང་བའོ། །
དང་པོ་ནི་ཨ༵ཿཡི་གེ་རྣམས་ཀྱི་འབྱུང་གནས་ཏེ་འཕྲོ་གཞི་ཡིན་པས་ཁོངས་ནས་འབྱུང་བའི་རང་བཞིན་དུ་སྤྲོས་ཏེ། དེའང་འབྱུང་བ་ལས་གྱུར་པའི་གཟུགས་ཐམས་ཅད་འབྱུང་བ་ཆེན་པོའི་རྣམ་པར་སྐྱེ་བ་བཞིན། ཡི་གེ་ཐམས་ཅད་ཀྱང་ཨའི་རྣམ་པར་སྐྱེ་སྟེ། འདི་ལྟར་ངག་གི་གཞི་མ་ནི་ཨའོ། །དེ་ཡང་ངག་གི་འདུ་བྱེད་ཀྱི་དབང་གིས་ཨ་ཉིད་བཀུག་པ་ནི་ཨི། སྨད་པ་ནི་ཨུ་སྟེ་རྩ་བ་གསུམ་མོ། །དེ་ལས་ཨ་དང་ཨི་སྦྱར་བས་ཨེ། ཨ་དང་ཨུ་སྦྱར་བས་ཨོ། བསྒྲིམས་པས་ར྇། གློད་པས་ལ྇། དེ་རེ་རེ་ལའང་རིང་ཐུང་གི་དབྱེ་བས་སྒྲའི་ཡི་གེ་བཅུ་བཞི་དང་། སྣ་དང་ལྡན་པ་ཨཾ། རྣམ་པར་བཅད་པ་ཨཿསྟེ་བཅུ་དྲུག་ཏུ་འགྱུར་རོ། །དེའང་ཨའི་སྒྲ་དེ་ཉིད་མགུལ་པའི་གནས་དང་ཕྲད་པ་ལས་ཀ༵་དེ་ཉིད་ཅུང་ཟད་ཞུམ་ཞིང་སྤྱི་བོའི་གནས་དང་ཕྲད་པ་ལས་ཁ༵། དེ་ཅུང་ཟད་ཞུམ་པས་ག༵ །དེ་ཁོག་སྦུབས་ཀྱི་གནས་དང་ཕྲད་པས་གྷ༵། དེ་སྣ་དང་ཕྲད་པས་ང༵་སྟེ་སངས་རྒྱས་ཀྱི་མགུལ་གྱི་བུམ་པ་ལས་འཐོན་པའོ། །རིམ་པ་དེ་ཉིད་ལས་དཔགས་ཏེ་གཞན་ལའང་ཤེས་པར་བྱའོ། །དེ་ལ་ཙ༵་ཚ༵་ཛ༵་ཛྷ༵་ཉ༵་རྣམས་ནི་ཨ་དེ་ཉིད་རྐན་གྱི་དབུས་དང་ལྕེའི་དཀྱིལ་དུ་ཕྲད་པ་ལས་བྱུང་བས་ལྗགས་ལས་བྱུང་བའོ། །ཊ༵་ཋ༵་ཌ༵་ཌྷ༵་ཎ༵་རྣམས་ནི་ཨ་དེ་ཉིད་(༩༦)ལྕེའི་རྩེ་མོར་ཉེ་བ་རྐན་གྱི་མཐར་ཕྲད་པ་ལས་སྤྱི་བོའི་སྒྲ་འབྱུང་བས་ལྗགས་ཀྱི་རྩེ་མོ་ལས་འཐོན་ནོ། །ཏ༵་ཐ༵་ད༵་དྷ༵་ན༵་རྣམས་ནི་ཨ་དེ་ཉིད་ལྕེའི་རྩེ་མོ་དང་སོ་ཕྲད་པ་ལས་བྱུང་བས་ལྗགས་ཀྱི་རྩེ་མོ་དང་ཚེམས་ལས་འཐོན་ཏོ། །པ༵་ཕ༵་བ༵་བྷ༵་མ༵་རྣམས་ནི་ཨ་དེ་ཉིད་མཆུ་དང་ཕྲད་པ་ལས་བྱུང་བས་མཆུ་ལས་འཐོན་ཏོ། །དེ་དག་གི་ནང་ཚན་གྱི་བྱེ་བྲག་ནི་ཀ་ལ་སོགས་པ་བཞིན་ནོ། །ཡི་གེའི་ལྷག་མ་དགུ་ནི་སྡེ་ཚན་གྱི་གནས་ལ་ཡ༵་དང་ཤ༵་རྐན་གྱི་སྡེའོ། །ཝ་ནི་མཆུའོ། །ར་དང་ཥ་སྤྱི་བོའོ། །ལ་དང་ས་སོའི་སྡེའོ། །ཧ་མགུལ་པའི་སྡེའོ། །ཀྵ་མགུལ་པ་དང་སྤྱི་བོའི་ཆར་གཏོགས་པས་དེ་ནས་འབྱུང་ཡང་། གདུལ་བྱའི་དོན་དུ་འཕྲོ་ཚུལ་གྱི་དབང་དུ་བྱས་ནས། སྨིན་མ་ལས་ཡ༵། དཀུའི་སྐབས་ལས་ཝ༵། སྟ་ཟུར་ལས་ར༵། དཔུང་པ་ལས་ལ༵། ཐུགས་ཀ་ལས་ཤ༵ །ཕྱག་གི་འཁོར་ལོ་ལས་ཥ༵། ལྟེ་བ་ལས་ས༵། ཞབས་ཀྱི་འཁོར་ལོ་ལས་ཧ༵། གསང་གནས་ལས་ཀྵ༵་རྣམས་འཐོན་ཏོ། །ཡི་གེ་དེ་དག་ལ་ཨའི་སྒྲས་ཁྱབ་པ་ནི་པི་ཝང་གི་སྒྲ་སྙན་དེས་པི་ཝང་གི་སྒྲ་མཐོ་དམན་དང་དྲག་ཞན་ཐམས་ཅད་ལ་ཁྱབ་པ་བཞིན་ནོ། །ཡང་སྤྱན་གཉིས་ལས་ཨི༵་ཨཱི༵། སྙན་གཉིས་ལས་ཨུ༵་ཨཱུ༵། ཤངས་གཉིས་ལས་ཨེ༵་ཨཻ༵། དབུའི་གཙུག་ཏོར་ལས་ཨཱོ༵ཾ་རྣམས་འཐོན་ཏོ། །
གཉིས་པ་ངོ་མཚར་གྱི་ལྟས་ཁྱད་པར་ཅན་སྣང་བ་ནི་ཡི་གེ་དེ༵་དག༵་སྐུ་གསུང་ཐུགས་ལས་ཕྱུང༵་བ༵ས་འཇི༵ག་རྟེན༵་དྲུག༵་གི༵་ཕྱོག༵ས་བཅུ༵་མཐ༵འ་ཡ༵ས་པ༵་ཐམས་ཅད་དུ་ཡི་གེ་སྤྲིན་གྱི་སྣང་བ་ཆེན་པོས་ཤར་མཐོ་ན་ནུབ་དམའ། ནུབ་མཐོ་ན་ཤར་དམའ། ལྷོ་མཐོ་ན་བྱང་དམའ། བྱང་མཐོ་ན་ལྷོ་དམའ། མཐའ་མཐོ་ན་དབུས་དམའ། དབུས་མཐོ་ན་མཐའ་དམའ་བའི་ཚུལ་གྱིས་རྣམ་པར་འགྱུར་བ་རྣ༵མ་པ༵་དྲུག༵་ཏུ༵་ཆུ༵ང་ངུར་གཡོ༵ས་པས་སྣང་བ་ཐམས་ཅད་གཟུགས་བརྙན་གྱི་རང་བཞིན་དུ་དག་པར་བྱས། འབྲིང་དུ་ར༵བ་ཏུ༵་གཡོ༵ས་པས་སྟོང་པ་ཐམས་ཅད་ཡེ་ཤེས་ཀྱི་རང་བཞིན་དུ་གསལ་བར་བྱས། ཆེན་པོའི་ཚུལ་གྱིས་ཀུན༵་ཏུ༵་རབ་ཏུ་གཡོ༵ས་ནས༵་གཉིས་སུ་མེད་པའི་རང་བཞིན་རྫོགས་པ་ཆེན་པོའི་ངང་དུ་འཁོར་འདས་ཀྱི་ཆོ༵ས་ཐ༵མས་ཅ༵ད་གང་དུའང་མ་གྲུབ་པས་མི༵ང་གི༵་མཚ༵ན་ཉིད༵་བཏགས་པ་ཙམ༵་དུ༵་གྱུར༵་ཏོ༵། །དེ་ཉིད་ལ་དེ་བཞིན་གཤེགས་པ་ཉིད་མཆོག་ཏུ་དགྱེས་པས་ཧོ༵་ཞེས་མཉམ་པ་ཉིད་ཀྱི་ངང་དུ་བཞག་པའོ། །
གསུམ་པ་ཡི་གེའི་རང་བཞིན་ཇི་ལྟར་གསུངས་པའི་ཚུལ་ལ་དྲུག་སྟེ། ཡི་གེ་གསུངས་པའི་རྒྱུ་བརྗོད་པ། སྐྱེ་བ་མེད་པ་ཡི་གེའི་འཁོར་ལོར་སངས་རྒྱས་ཀྱི་དགོངས་པ་ཐམས་ཅད་འདུས་པས་ཆོས་ཀྱི་སྐུར་བསྟན་པ། ཡི་གེ་བཞི་བཅུ་རྩ་གཉིས་ཨའི་རང་བཞིན་དུ་འདུས་པས་ཡི་གེ་མངོན་རྫོགས་ལོངས་སྤྱོད་རྫོགས་པའི་སྐུར་སངས་རྒྱས་པར་བསྟན་པ། ཡི་གེ་ཉིད་ཀུན་(༩༧)གྱི་འབྱུང་གནས་སུ་གྱུར་པས་རོལ་པ་སྣ་ཚོགས་སུ་འཆར་བའི་ཕྱིར་སྤྲུལ་པའི་སྐུར་བསྟན་པ། དེ་ཉིད་དུ་རྒྱལ་བའི་དགོངས་པ་འདུས་པས་དཀྱིལ་འཁོར་བཞི་བཅུ་རྩ་ལྔའི་རྫོགས་ཚུལ་བསྟན་པ། སེམས་ཉིད་སྣང་སྟོང་གཉིས་སུ་མེད་པར་ཡི་གེའི་སྒྲ་དོན་བཤད་པའོ། །
དང་པོ་ནི། ཡི་གེའི་སྤྲིན་སྤྲོས་པ་དེ༵་ན༵ས་དེ༵་བཞི༵ན་གཤེ༵གས་པ༵་ཐམ༵ས་ཅ༵ད་ཀྱི༵ས་ཡི་གེ་སྤྲིན་གྱི་ཆེ༵ད་དུ༵་བརྗོ༵ད་པ༵་འདི༵་སྐད་ཅེས་བརྗོ༵ད་དོ༵། །
གཉིས་པ་ནི། ཡི་གེ་ཨ༵་ནི༵་ཡི་གེ་རྣམས་ཀྱི་འབྱུང་གནས་སྣང་བའི་ཆ་ཙམ་མ་དོར་བས་སྟོང༵་པའི་མཐར་ཡང་མ་གྲུབ་པ་དང༵་། དེ་ཉིད་དངོས་པོ་མཚན་མར་མེད་པས་མི༵་སྟོ༵ང་བ་ཞེས་ཀྱང་དམིགས་སུ་མེད་པ་གང་གི༵་ཚེ། དེ་གཉིས་ཀྱི་རང་བཞིན་གཉིས་སུ་མེད་པའོ་ཞེས་པའི་དབུ༵་མ༵འང༵་དམི༵གས་སུ༵་ཡོ༵ད་པ་མ༵་ཡི༵ན་ཏེ། ལྟོས་ས་སྣང་བ་དང་སྟོང་པའི་རང་བཞིན་ལས་འདས་པའི་ཕྱིར་རོ། །དེ་ལྟར་ཆོས་ཐམ༵ས་ཅ༵ད་མི༵ང་ཙམ༵་ལས་སྨྲ་བསམ་སྤྲོས་བརྗོད་ཀྱི་ངོ་བོར་མ་གྲུབ་པ་ནི་ས༵ངས་རྒྱ༵ས་ཀུན༵་གྱི་དགོངས་པ་སྟེ། དེ་ཉིད་ཡི༵་གེ༵འི་ཕྲེང༵་བ༵་ཉིད༵་ཀྱི་ངང་ལ༵་གན༵ས་སོ། །དེའི་གནས་ལུགས་ནི་ཆོས་སྐུ་ལྷུན་གྱིས་གྲུབ་པའི་རང་བཞིན་ནོ། །
གསུམ་པ་ནི། ཡི་གེ་ཐམས་ཅད་ཀྱི་འབྱུང་ཁུངས་ཨ༵་ཉིད༵་རྐྱེན་གྱིས་ཡི་གེའི་རྣམ་པ་སྣ༵་ཚོག༵ས་པར༵་སྣང༵་བའི༵་རང་བཞིན་ཡིན་ཏེ། སྔར་བསྟན་པ་ལྟར་རྩ་བའི་ཨ་ལས་བཀུག་པས་ཨི། སྨད་པ་ཨུ་གསུམ་གྱི་ཁོངས་ནས། ཨ་དང་ཨི་ལས་ཨེ། ཨ་དང་ཨུ་ལས་ཨོ་སྟེ་དབྱངས་ལྔ། བསྒྲིམས་པས་ར྇། གློད་པས་ལ྇། དེ་དག་ཀྱང་ཐབས་དང་ཤེས་རབ་གཉིས་སུ་ཕྱེ་བས་བཅུ་བཞི། ཐབས་གསལ་བོར་སྟོན་པ་ཨཾ། ཤེས་རབ་གསལ་བོར་སྟོན་པ་ཨཿསྟེ་ཨཱ་ལི་ཞེས་བྱའོ། །ཨ་ཉིད་མགྲིན་པ། རྐན། ལྕེ་རྩེ། སོ། མཆུ་རྣམས་ལ་བརྟེན་ཏེ་བརྗོད་པས། ཀ་ཙ་ཊ་ཏ་པ། དེ་རྣམས་སྒྲ་དྲག་ཏུ་བོས་པ་ལས། ཁ་ཚ་ཋ་ཐ་ཕ། ཞན་དུ་བོས་པ་ལས། ག་ཛ་ཌ་ད་བ། དེ་དག་ཆེར་བོས་པ་ལས། གྷ་ཛྷ་ཌྷ་དྷ་བྷ། དེ་དག་སྣ་དང་ལྡན་པར་བརྗོད་པས། ང་ཉ་ཎ་ན་མ་སྟེ་སྡེ་ཚན་ལྔ་འབྱུང་ངོ་། །དེ་དག་དང་མཐུན་པར་ཡ་དང་ཤ་ནི་རྐན་ལས། ར་དང་ཥ་ནི་ལྕེ་རྩེ་བསྒྱུར་བ་ལས། ལ་དང་ས་ནི་སོ་ལས། ཝ་ནི་མཆུ་ལས། ཧ་ནི་མགྲིན་པ་ལས། ཀྵ་ནི་སྤྱི་བོ་ལས་སོ། །ཨའི་སྒྲ་དེ་ཉིད་མགུལ་པའི་གནས་སོགས་དང་ཕྲད་པས་ཀ༵་ལ༵་སོ༵གས་པ༵་བཞི༵་བཅུ༵་རྩ་གཉི༵ས་སུ་ཀཱ་ལི་དང་ཨཱ་ལིའི་སྒྲའི༵་མི༵ང་གི༵ས་བརྗོད་པ་ཐམ༵ས་ཅ༵ད་བསྡུས༵་པ་ནི་ཡེ་ནས་མངོ༵ན་པར་རྫོག༵ས་པར་བྱང་ཆུབ་པའི་རྒྱལ༵་པོ༵་ཨ་སྐྱེ་བ་མེད་པ་ཆོས་ཀྱི་སྐུར་སངས་རྒྱས་པས་ན། ཨ་སངས་རྒྱས་པ་བཞིན་(༩༨)དུ་ཨའི་ངང་ལས་འཕྲོས་པའི་ཡི་གེ་བཞི་བཅུ་རྩ་གཉིས་པོ་དེ༵་ཉིད༵་ཀྱང་སངས་རྒྱས་པར་ངེ༵ས་ཏེ་ངོ་བོ་གཅིག་གི་རོལ་པ་ཡིན་པའི་ཕྱིར་རོ། །དོན་ལ་ཨ་ནི་ཀུན་ཏུ་བཟང་མོའི་དབྱིངས་སོ། །ཡི་གེ་བཅུ་བཞི་རྩ་གཉིས་ནི་དེའི་ངང་ལས་འཕྲོས་པའི་སངས་རྒྱས་བཞི་བཅུ་རྩ་གཉིས་སོ། །དེའི་རང་བཞིན་ནི་ཡི་གེ་ལོངས་སྤྱོད་རྫོགས་པའི་སྐུར་བསྟན་པ་ཡིན་ནོ། །
བཞི་པ་ལ་གཉིས་ཏེ། ཡི་གེ་ཚིག་གི་འབྱུང་ཁུངས་སུ་བསྟན་པ་དང་། ཡི་གེའི་རོལ་པ་སྣ་ཚོགས་སུ་འཆར་ཚུལ་བསྟན་པའོ། །
དང་པོ་ནི། ངོ་བོ་ཆོས་སྐུར་གནས་པས་ཨེ༵་མ༵་ཧོ༵་རང་བཞིན་ལོངས་སྐུར་སྣང་བས་ངོ༵་མཚ༵ར་ཐུགས་རྗེ་སྤྲུལ་སྐུར་ཤར་བས་ཡ༵་མཚ༵ན་པའི་དོན་གྱི༵་ཡི་གེ་སྤྲིན་གྱི་འཁོར་ལོ་ནི་རྫུ་འཕྲུལ༵་ཆེན༵་པོ་བསམ་གྱིས་མི་ཁྱབ་པའི་རང་བཞིན་བཞི༵་བཅུ༵་རྩ༵་གཉིས་ཀྱི་སྟེང་དུ་མགོ་ཚེག་ཤད་གསུམ་བསྣན་པས་བཞི་བཅུ་རྩ་ལྔའི༵་ཚོགས་རྣམས་ནི་མིང༵་དང་ཚི༵ག་རྣ༵མས་མ༵་ལུས༵་པ་འཛི༵ན་པ༵འི་གན༵ས་ཡིན་ནོ། །ཇི་ལྟར་འཛིན་ན་དཔེར་ན་གཟུགས་ཀྱི་མཐའ་རྡུལ་ཕྲན། རྡུལ་ཕྲན་འདུས་པ་ལས་གོང་བུ་སྟེ། རྡུལ་ཕྲན་ནི་གོང་བུ་འཛིན་པའི་གནས་ཡིན་པ་བཞིན་དུ། མིང་གི་མཐར་ཐུག་པ་ནི་ཡི་གེ་ཡིན་ནོ། །ཡི་གེ་འདུས་པ་ལས་དབྱངས་ཨ་གཅིག་གིས་བཅིངས་པའི་ཡི་གེ་༼ཀ་ལྟ་བུ་དེ་དཔྱད་༽འགྲུབ་བོ། །དེ་འདུས་པས་ཀ་བ་དང་བུམ་པ་ལ་སོགས་པ་དངོས་པོ་རྣམས་ཀྱི་མིང་འགྲུབ་བོ། །དེ་འདུས་པས་ཚིག་གི་ཚོགས་མ་ལུས་པ་འགྲུབ་པས་ན། ཡི་གེ་རྣམས་ནི་མིང་ཚིག་གི་གནས་སོ། །དེ་ལས་ཐེག་པའི་ཆོས་སྣ༵་ཚོག༵ས་པའི་དོན༵་ཆེ༵ན་པོ་ངག་ཏུ་སྨྲ༵་ཞི༵ང་གཞན་ལ་སྟོན༵་པའི་ཕྱིར་ཡི་གེ་ཚིག་དོན་མ་ལུས་པའི་འབྱུང་གནས་སུ་ཡེ་ནས་གྲུབ་པ་ཡིན་ནོ། །
གཉིས་པ་ནི། རགས་པའི་དངོ༵ས་པོར་གྲུབ་པ་མེ༵ད་པ་ཡི༵་གེ༵འི་ར༵ང་བཞི༵ན་རང་གི་སེ༵མས་ཉིད་འོད་གསལ་བ་སྟེ། གང་ཟག་དང་ཆོས་ཀྱི་བད༵ག་མེ༵ད་ཅིང་སྤྲོས་པའི་མཐ༵འ་ཐམས་ཅད་དང་བྲལ༵་བའི་ཆོས་ཉིད་ཡེ་གདོད་མ་ཉིད་ནས་དངོས་པོ་དང་མཚན་མའི་ཆོས་སུ་མི༵་དམི༵གས་ཀྱང༵་། སྣང་བའི་རང་བཞིན་ཆུ་ཟླ་ལྟར་གཉིས་སུ་མེད་པའི་ཚུལ་གྱིས་སངས་རྒྱས་ཀྱི་སྐུ་དང་སེམས་ཅན་གྱི་རྩ་གནས་འཁོར་ལོ་རྣམས་ན་ཡི་གེ་དེ་དག་གི་དབྱི༵བས་སྣང་ལ་རང་བཞིན་མེད་པར་གནས་ཏེ། ཨ་སེང་གེ་བསྒྱིངས་པ་ལྟ་བུ་དང༵་། ཀ་བ་དན་བརྩེགས་པ་ལྟ་བུ་ལ་སོགས་པར་གནས་ཤིང་། ཁ༵་དོ༵ག་ཀྱང་ཨཱ་ལི་རྣམས་དམར་པོ་དང་། ཀཱ་ལི་རྣམས་དཀར་པོའི་རང་བཞིན་དུ་གནས་སོ། །དེ་དག་བསྒོམས་པ་ལས་རྣལ་འབྱོར་པའི་ལམ་དང་འབྲས་བུའི་དོན་ཡང་རྫོགས་པར་བྱེད་པ་ནི་ནང་དོན་གྱི་ཡི་གེའི་མཛད་པའོ། །སངས་རྒྱས་ཀྱི་གནས་སྐབས་ན་ཡི་གེའི་སྤྲིན་ཁ་དོག་དང་དབྱིབས་དང་མིང་དང་ཚིག་རྣམ་པ་སྣ་ཚོགས་ཀྱིས། རྣམ་(༩༩)པར་འཕྲུལ་པའི་རོལ་པ་ཅིར་ཡང་སྤྲུལ་ཅིང་འགྲོ་བའི་སྐལ་བ་དང་མཐུན་པར་ཆོས་ཀྱི་རྣམ་གྲངས་དཔག་ཏུ་མེད་པ་སྟོན་པར་མཛད་པའོ། །འདི་ལྟར་སྣང་བ་གཟུགས་བརྙན་གྱི་ཡི་གེའི་གླེགས་བམ་གྱི། ཁ་དོག་དང་དབྱིབས་དང་མི༵ང་ཚིག་གི་ཚོ༵གས་ཀྱི༵ས་ཀྱང་འགྲོ་བའི་དོན་མཐུན་པར་སྒྲུབ་པ་ནི་ཡི་གེ་འཁོར་ལོའི་མཛད་པ་ཡིན་ཞིང་། ལྷའི་ས་བོན་བསྒོམས་པའི་ཡི་གེ་ལས་ཀྱང་གསང་སྔགས་འགྲུབ་པ་ནི་ཡི་གེ་འཁོར་ལོའི་སྤྲུལ་པ་སྟེ། དེ་ལྟར་ན་ཡི་གེ་སྤྲིན་སྤྲུལ་པ་ཉིད་དུའང་གནས་སོ། །
ལྔ་པ་དཀྱིལ་འཁོར་བཞི་བཅུ་རྩ་ལྔ་རྫོགས་པར་བསྟན་པ་ནི་ཕྱོ༵གས་བཅུ༵་དུ༵ས་བཞི༵ར་སྔ་ཕྱི་ད་ལྟ་འགྲོ་བའི་དོན་ལ་གཤེ༵གས་པ༵འི༵་སངས་རྒྱས་ཐམས་ཅད་ཀྱི་གསང་བ་རང་བྱུང་གི་ཡེ༵་ཤེ༵ས་སེ༵མས་དཔ༵འི་སྐུ༵འི་དཀྱིལ་འཁོར་ནི་སྐུའི་སྐུ། སྐུའི་གསུང་། སྐུའི་ཐུགས་རེ་རེ་ལའང་ཡོན་ཏན་འཕྲིན་ལས་གཉིས་བསྣན་ནས་ལྔ་ལྔར་ཕྱེ་བས་བཅོ་ལྔ། དེ་བཞིན་དུ་གསུ༵ང་དང་ཐུ༵གས་ལའང་བཅོ་ལྔ་བཅོ་ལྔ་སྟེ་རིགས་ལྔའི་དཀྱི༵ལ་འཁོ༵ར་བཞི༵་བཅུ༵་རྩ༵་ལྔ༵་པོ་དེ་ཉི༵ད་ཡི༵་གེ༵འི་མགོ༵་ཨ་ན༵ས་མཇུག་ཀྵ༵འི་བར་ལ༵་རྫོ༵གས་པས་རིགས་ཀྱི་དཀྱིལ་འཁོར་ཇི་སྙེད་པའི་དབྱེ་བ་ཡང་ཡི་གེ་འཁོར་ལོ་ཉིད་ལ་ཚང་ཞིང་འདུས་པས་དཀྱིལ་འཁོར་ཐམས་ཅད་ཀྱི་རྩ་བ་ཡིན་ནོ། །འདི་ལ་ཁ་ཅིག་ཡི་གེ་བཞི་བཅུ་རྩ་ལྔ་ཉིད་དུ་འཆད་པ་དེ་དག་གིས་ནི་ཡི་གེ་འཁོར་ལོ་ལ་དཀྱིལ་འཁོར་རིགས་འདུས་པར་བཤད་པའི་ཕྱོགས་ཙམ་ཡང་མ་མཐོང་བར་ཟད་དོ། །
དྲུག་པ་སེམས་ཉིད་ཡི་གེར་སྣང་བའི་ངེས་ཚིག་བཤད་པ་ལ་གསུམ་སྟེ། སེམས་ཉིད་སྐྱེ་བ་མེད་པ་ཡི་གེའི་དོན་དུ་བསྟན་པ། སྐྱེ་བ་མེད་པ་ཉིད་ཀྱི་ངང་ལས་ཡི་གེར་སྣང་བས་ཡོན་ཏན་ལྷུན་གྱིས་གྲུབ་ཚུལ། སྣང་སྟོང་གཉིས་སུ་མེད་པའི་ཡི་གེ་གང་གིས་བྲིས་ཤིང་བཀོད་ཚུལ་ལོ། །
དང་པོ་ནི། སེ༵མས་ཀྱི་རང་བཞིན་འོད་གསལ་བ་དེ་ཉིད༵་རང༵་བཞིན༵་ལྷུན་གྱིས་གྲུབ་པའི་ཡི༵་གེ༵་སྟེ༵། ཡི༵་གེ༵་དེ་ཉིད་ལ་དངོ༵ས་པོ༵་དང་མཚན་མར་གྲུབ་པ་ཡོ༵ད་པ་མ༵་ཡི༵ན་ཏེ། མཚན་བརྗོད་ལས། ཨ་ནི་ཡིག་འབྲུ་ཀུན་གྱི་མཆོག །ཁོང་ནས་འབྱུང་བ་སྐྱེ་བ་མེད། །དོན་ཆེན་ཡི་གེ་དམ་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཚིག་ཀུན་རབ་ཏུ་གསལ་བར་བྱེད། །ཅེས་པ་དང་། མདོ་ལས། རབ་འབྱོར་ཡི་གེ་ནི་དོན་དམ་པར་མ་སྐྱེས་པ་སྟེ་ཨའི་ངོ་བོ་ཉིད་དོ། །ཨའི་ངོ་བོ་ཉིད་གང་ཡིན་པ་དེ་ནི་སེམས་ཀྱི་རང་བཞིན་ཏེ་དངོས་པོ་དང་དངོས་པོ་མེད་པ་ཐམས་ཅད་ལས་ཡང་དག་པར་འདས་པའོ། །ཞེས་པ་ལྟར་རོ། །
གཉིས་པ་ནི། སེམས་ཉིད་དམི༵གས་སུ་མེ༵ད་པ་དོན་དམ་པའི་ཡི་གེ་དེ༵་ཉིད༵་འོད་གསལ་བའི་ཁམས་སྣ༵་ཚོ༵གས་པའི༵་ཕྱིར། རྟེན་བྱེད་པའི་སྐུའི༵་འཁོར་ལོ་ཆེན་པོ་གོ་བརྡ་སྤྲོད་པའི་གསུ༵ང་གི་འཁོ༵ར་ལོ༵་ཆེ༵ན་པོ་མཉམ་པར་འཇོག་པ་ཐུ༵གས་ཀྱི༵་འཁོར་ལོ་ཆེན་པོ་དང་ཐམས་ཅད་མཁྱེན་པས་ཡོན་ཏན་གྱི་འཁོར་ལོ། ཐོགས་པ་མེད་པས་ཕྲིན་ལས་ཀྱི་འཁོར་ལོ་ཆེན་པོ་སྟེ། རང་བཞིན་སངས་རྒྱས་ཐམས་ཅད་ཀྱི་སྐུ༵་གསུ༵ང་ཐུག༵ས་མི་ཟད་པ་རྒྱན་གྱི་འཁོར་ལོ་དེ་ནི༵་ཡོན་ཏན་ཕུན་སུམ་(༡༠༠)ཚོགས་པ་ཡེ་ནས་ལྷུན་གྱིས་གྲུབ་པས་ངོ༵་མཚ༵ར་གྱི༵་མཆོག་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་ཡ༵་མཚན༵་གྱི་ཆོ་འཕྲུལ༵་ཆེ༵ན་པོ་རང་ལ་སྣང་བར་བྱེད་པས་ར༵བ་ཏུ་འགུ༵གས་པ༵་ཉིད་ཡིན་ནོ། །དེའང་བསྒོམས་པས་སྐུ་གསུམ་རང་ལ་འཆར་བའི་དོན་ཏོ། །
གསུམ་པ་ནི། དེ་ལྟར་སྣང་བའི་ཡི་གེ་དེ་ཉིད་སེམས་ཉིད་ཡེ་ནས་དག་པ་ཆོས་ཀྱི་དབྱི༵ངས་འགྱུར་བ་མེད་པའི་ངང་ལ༵་ཡེ་ཤེས་ལྷུན་གྱིས་གྲུབ་པ་བྱ་རྩོལ་མེད་པའི་དབྱི༵ངས་ཀྱི༵ས་ཡེ་ནས་བྲིས༵་པ༵་སྟེ༵་གཏན་དུ་འཕོ་འགྱུར་མེད་པའི་ཆོས་ཉིད་རང་བཞིན་གྱིས་འོད་གསལ་བ་ལ་ཡི༵་གེ༵་ཞེས༵་བྱ་བའི་དོན་དོན་དུ་བཏགས་པ་ནི༵་གསར་དུ་བྱས་པའམ་བྱུང་བ་མ་ཡིན་པ་དེའི༵་ཕྱིར༵་ལྷུན་གྱིས་གྲུབ་པའི་ཡི་གེ་སྤྲིན་གྱི་འཁོར་ལོ་འཁོར་འདས་ཐམས་ཅད་ལ་ཡེ་ནས་རང་ཆས་སུ་གནས་པར་བརྗོད༵་པའོ། །
གཉིས་པ་ལྷ་དང་སྦྱར་ཏེ་བྱེ་བྲག་སོ་སོར་བཤད་པ་ལ་གསུམ་སྟེ། ཡི་གེ་གསུམ་གྱི་དོན་སྤྱིར་བསྟན་པ་དང་། ཡི་གེ་བཞི་བཅུ་རྩ་གཉིས་ཀྱི་དོན་བྱེ་བྲག་ཏུ་བཤད་པ་དང་། དེ་དག་གི་དོན་བསྡུའོ། །
དང་པོ་ནི། ཡི་གེའི་མགོ༵་བེར་ཀ་རིས་ནི༵་ཨི་གླང་པོ་ཆེའི་སྣ་ལྟ་བུས་མཚོན་ནས་ཐབས་དང་ཤེས་རབ་གཉིས་སུ་མེད་པའི་དོན་སྟོན་པར་བྱེད་པ་ནི་ཐུགས་རྡོ་རྗེ་མ༵་ནོ༵ར་བ་སྟེ། གླེགས་བམ་ལ་སོགས་པའི་ཡི་གེ་ཐམས་ཅད་ཀྱི་ཐོག་མའི་མགོ་འདྲེན་ཅིང་འཇུག་པའི་སྒོར་གྱུར་པས་ལ༵མ་གྱི་ལས་སུ་བྱ་བ་བྱེད་པ་ཡི༵ན་ཏེ༵། ཤིང་རྟའི་འདྲེན་བྱེད་བཞིན་ནོ། །ཡི་གེའི་ཐི༵ག་ལེ་ནི༵་ཚེག་སྟེ་ཨཿདབང་ཕྱུག་ཆེན་པོའི་མིག་ལྟ་བུ་ནི་མཚན་མ་ཉེ་བར་ཞི་བ་མྱ་ངན་ལས་འདས་པའི་རང་བཞིན་བརྗོད་དུ་མེད་པ་གསུང་རྡོ་རྗེ་མཚོན་པ་ཤེས༵་རབ༵་མཐའ་གཉིས་ལ་མི་གནས་པ་སྟེ། ཨའི་རྣམ་པ་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ནོ། །དེའི་བྱེད་ལས་ནི་དངོས་པོ་རྣམས་ཀྱི་མིང༵་དུ༵་སོ་སོར་གྲུབ་ཅིང་སྨྲ༵་བའི་ལས་བྱེད་དོ། །དེའང་ཨ་རེ་རེས་མ་བཅིངས་ན་དབྱངས་གཅིག་གིས་བཅིངས་པའི་ཡི་གེ་རྣམས་ཀྱི་མིང་མི་འགྲུབ་ལ། དེ་མ་གྲུབ་ན་ཀ་བ་དང་བུམ་པ་ལ་སོགས་པ་དངོས་པོ་རྣམས་ཀྱི་མིང་མི་འགྲུབ་པས། འདིར་དངོས་པོ་སོ་སོའི་མིང་གྲུབ་པའི་ལས་བྱེད་པའོ། །ཡི་གེའི་ཤད༵་ནི༵་ཨ་དྲང་པོ་མདའ་ལྟ་བུ་སྟེ་ཐུགས་རྗེ་ཆེན་པོས་འགྲོ་བ་སྐྱོབ་པའི་མཚོན་བྱེད་སྐུ་རྡོ་རྗེ་ཐ༵བས་ཀྱི་ཆོ་འཕྲུལ་ཆེན་པོ་སྟེ། བྱེད་ལས་ཡི་གེ་རྣམས་མ་འདྲེས་པར་ཚིག༵ས་སུ༵་གཅོད༵་པའོ། །འདིར་ལེགས་པར་སྦྱར་བའི་གཙུག་ལག་གི་དོན་མཐའ་དག་བལྟ་བའི་མིག་ལྡོངས་ཤིང་། མདོ་དང་རྒྱུད་སྡེའི་གཞུང་ལུགས་ཀྱི་རང་བཞིན་ལེགས་པར་མི་ཤེས་པར། རྡོལ་ཐབས་སུ་སྨྲ་བ་དག་ན་རེ། ཁྱོད་ཀྱིས་མགོ་ཤད་ཚེག་ཅེས་སྨྲོས་པ་མི་འཐད་དེ། རྒྱ་དཔེ་ལ་མེད་པས་བོད་ཀྱིས་བྱས་པའོ་ཞེས་ཟེར་ཏོ། །བཤད་པར་བྱ་སྟེ། ཁྱོད་ནི་བོད་དུ་སྐྱེས་ཀྱང་བོད་ཀྱི་སྡེ་སྣོད་(༡༠༡)ཆེན་པོ་རྣམས་ཀྱི་གཞུང་མ་མཐོང་ཞིང་། རྒྱ་གར་དུ་ཕྱིན་ཀྱང་ལེགས་པར་སྦྱར་བའི་བསྟན་བཅོས་ལེགས་པར་མ་བསླབས་པ་ཡུལ་ཐ་དད་ཀྱི་གླེགས་བམ་མ་མཐོང་བས་རེ་བདེན། དེ་ལྟ་ནའང་འདི་དག་གི་འཐད་པ་ཅུང་ཟད་ལུང་གིས་དགོད་པར་བྱ་སྟེ། དཔལ་སྦྱིན་གྱིས་ཞུས་པའི་མདོ་ལས། མགོ་ནི་ཐོག་མར་མཚོན་པ་སྟེ། །དང་ལ་གཟུགས་སུ་མཚོན་པའོ། །དེ་ནི་ཡི་གེའི་མགོ་ཡིན་ཕྱིར། །བེར་ཀ་རིས་ལ་མགོ་ཞེས་བྱ། །ཞེས་པ་དང་། གཟུགས་ཅན་སྙིང་པོས་ཞུས་པའི་མདོ་ལས། ཡི་གེ་མགོ་ནི་ཐིག་ཡིན་ཏེ། །ཡི་གེ་བཞི་བཅུ་རྩ་གཉིས་ལས། །མ་ནོར་ལམ་ནི་ཐིག་ཡིན་ཕྱིར། །ལམ་མཁན་ཐིག་ནས་ཡི་གེར་ཞུགས། །ཞེས་པ་དང་། དྲག་ཤུལ་ཅན་གྱིས་ཞུས་པའི་མདོ་ལས། ཚེག་ནི་ཚིག་ཏུ་བསྒྲུབ་པ་སྟེ། །ཡི་གེ་སྡུད་ཕྱིར་མིང་དུ་སྨྲ་། །དོན་གྱི་སྙིང་པོ་བདེར་སློང་བ། །དེ་ཕྱིར་ཚེག་ལ་ཏིག་ཅེས་བྱ། །ཞེས་པ་དང་། རྒྱན་དམ་པ་ལས། སྡུད་པའི་ཕྱིར་ན་ཚེག་ནི་ཏིག །ཐོར་བ་བསྡུས་པས་མིང་དུ་སྨྲ། །གཅོད་པར་བྱེད་པའི་ལས་ཅན་ལས། །དེ་ནི་ཤད་དུ་སྣང་བའོ། །ཞེས་པ་དང་། དཔུང་བཟང་ལས། གུག་སྐྱེད་ཀླད་ཀོར་ཚེག་རྣམས་མ་ཉམས་པར། །ཞེས་གསུངས་པས་ན། བཀའ་ཡང་དག་པ་དེ་དག་ཀྱང་བོད་མར་ཐལ་བའི་ཕྱིར་རོ། །དེ་ལྟ་བུའི་རྩོད་པ་ངན་པ་ཕྲག་དོག་གི་མུན་པ་མི་བཟད་པས་ཀུན་ནས་དཀྲིས་པའི་དབང་གིས་སྐུར་པ་འདེབས་པ་དག་གི་རྒོལ་བ་ནི་དོན་ལ་མི་གནས་པས་འདིར་སྤང་བར་བྱ་བ་ཙམ་དུའང་མི་འོས་ཏེ། རྣམ་ངེས་ལས། ལོག་པའི་ལམ་ལ་མཐའ་མེད་ཕྱིར། །དེ་དག་འདིར་ནི་སྤྲོ་བྱ་མིན། །ཞེས་པ་ལྟར་རོ། །འོན་ཀྱང་ལ་ལ་དག་གི་ཐེ་ཚོམ་ཅུང་ཟད་བསལ་བའི་ཕྱིར་བཀོད་ཀྱི། རང་བཞིན་ལ་འདི་ལྟར་སེམས་ཏེ་བདུད་དང་མུ་སྟེགས་བྱེད་ཀྱིས་བཅོམ་ལྡན་འདས་ལ་རྒོལ་བའམ། སྒོ་ཁྱི་ངན་པ་དག་གིས་འཁོར་ལོས་སྒྱུར་བའི་རྒྱལ་པོ་ལ་ཟུག་པའམ། བ་ལང་རྫི་དག་གིས་ཐམས་ཅད་མཁྱེན་པའི་རང་བཞིན་ལ་དམོད་པ་བས་ཀྱང་བློ་གྲོས་བླུན་པའི་ཕྱིར། ཕྱུགས་པས་ཀྱང་ཕྱུགས་ཡིན་ནོ་ཞེས་བཤད་པ་དང་མཐུན་ནོ། །
གཉིས་པ་ཡི་གེ་བཞི་བཅུ་རྩ་གཉིས་ཀྱི་དོན་བཤད་པ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་གསུམ་སྟེ། འཁྲུགས་ཀྱི་དོན་སྡེབས་པ། མིང་གི་བརྡ་བཤད་པ། གདངས་ཀྱི་འཆར་ཚུལ་བསྟན་པའོ། །
དང་པོ་ནི། གཞུང་གི་སྐབས་འདིར་ཡི་གེའི་རིམ་པ་ཅུང་ཟད་འཁྲུགས་པར་སྣང་བ་ནི་ལྷའི་གནས་ལུགས་ཀྱི་དབང་དུ་བྱས་པ་སྟེ་འདི་ལྟར་ཡིན་ནོ། །དེའང་ཐོག་མའི་ཨ་ནི་ཆོས་དབྱིངས་ཀུན་ཏུ་བཟང་མོ་སྟོང་པའི་རང་བཞིན་དང་། སྒོ་མ་བཞིའི་རྗེས་ཉིད་དུ་ཀྵ་ནི་སྣང་བའི་ངོ་བོ་ཡེ་ཤེས་ཀུན་ཏུ་(༡༠༢)བཟང་པོ་སྟེ་གདངས་ཀྱི་ཀུན་བཟང་ཡབ་ཡུམ་མོ། །དེ་གཉིས་ལྷན་ཅིག་ཏུ་མི་སྨྲོས་པར་ཐུབ་པ་དྲུག་ལས་གཞན་པའི་ཐོག་མཐར་བཤད་པས་རང་སྣང་གི་ལོངས་སྐུ་རྣམས་སྣང་སྟོང་གཉིས་སུ་མེད་པ་གཞིའི་ཀུན་བཟང་ཉིད་ཀྱི་ངང་ལས་ཤར་བའི་རོལ་པར་བསྟན་པའི་དགོས་པ་ཡོད་དོ། །དེའང་གཞིའི་སེམས་ཉིད་འོད་གསལ་བ་ནི་ཐོག་མའི་ཀུན་ཏུ་བཟང་པོ་སྟེ་མཐར་ཐུག་གི་གྲོལ་གཞིའོ། །དེའི་སྣང་སྟོང་གི་ཆ་གདངས་ཀྱི་ཀུན་བཟང་ཡབ་ཡུམ་མོ། །དེ་ལྟར་ཆོས་སྐུ་འོད་གསལ་བའི་ངང་ལས་ལོངས་སྐུ་རང་སྣང་དུ་འཆར་བར་བསྟན་པའོ། །དེའི་ངང་ལས་རང་སྣང་དག་པའི་རིགས་ལྔ་ཡབ་ཡུམ་འཇའ་ཚོན་ལྟར་དཀྱིལ་འཁོར་གྱི་དབུས་ན་གནས་པའི་ཕྱིར་དེ་ནས་རིགས་ལྔ་ཡབ་ཡུམ་གྱི་ས་བོན་བསྟན་པའོ། །དེ་ནས་ལྷ་དེ་དག་གི་ཐུགས་ཀྱི་རྩལ་ལས་ཐུགས་ཀྱི་སེམས་དཔའ་བཞི་འཆར་བར་བསྟན་པའི་ཕྱིར་ནང་གི་སེམས་དཔའ་བཞིའི་ས་བོན་བསྟན་ཏོ། །དེ་དག་གི་སྣང་ཆས་ཉོན་མོངས་པ་སེམས་སུ་ཞེན་པ་ཤེས་བྱའི་སྒྲིབ་པ་འཇོམས་པར་མཚོན་པའི་ཕྱིར་ཐུགས་ཀྱི་སེམས་དཔའ་བཞིའི་གདངས་ལས་གཤིན་རྗེ་གཤེད་ཀྱི་ས་བོན་བསྟན་ཏོ། །སེམས་དཔའ་དེ་དག་གི་སྤྱད་བྱའི་ཡུམ་བཞི་ནི་སོ་སོའི་ཡུལ་དུ་སྣང་བར་མཚོན་པས་དེ་དག་གི་ས་བོན་བསྟན་ཏོ། །དེ་ནས་སྣང་ཡུལ་བཞི་པོའི་ཞེན་པ་ཉོན་མོངས་པའི་སྒྲིབ་པ་འཇོམས་པར་མཚོན་པའི་ཕྱིར་དེ་དག་གི་རྩལ་ལས་སྟོབས་ཆེན་སྣང་བས་དེའི་ས་བོན་བསྟན་པའོ། །ཡང་རྩ་བའི་རིགས་ལྔའི་གསུང་གི་རྩལ་ལས་གསུང་གི་སེམས་དཔའ་བཞི་སྣང་བས་དེ་དག་གི་ས་བོན་བསྟན་ཏོ། །གསུང་དེས་ངག་གི་སྒྲིབ་པ་འཇོམས་པར་མཚོན་པ་ལ་རྟ་མགྲིན་ཤར་བས་དེའི་ས་བོན་བསྟན་ཏོ། །དེ་དག་གི་གཞལ་བྱའི་སྣང་ཡུལ་དུས་ཀྱི་སེམས་མ་བཞི་ནི་གསུང་སྒྲིབ་པ་མེད་པ་དུས་བཞི་ཀུན་ཏུ་སྣང་བས་ཡུམ་བཞིའི་ས་བོན་བསྟན་ཏོ། །དེ་དག་གི་རང་བཞིན་མཐའ་བཞིའི་དྲི་མ་ལས་འདས་པར་མཚོན་པས་སྒོ་མ་བཞི་སྣང་བའི་ཕྱིར་སྒོ་མ་བཞིའི་ས་བོན་བསྟན་ཏོ། །དེ་དག་སྣང་བའི་གཟུགས་བརྙན་ཐམས་ཅད་ཀུན་ཏུ་བཟང་པོའི་ངང་ལས་འཆར་བར་བསྟན་པའི་ཕྱིར་ཀྵ་ནི་སྔར་བསྟན་པ་བཞིན་ནོ། །ལྷ་དེ་དག་གི་སྐུའི་རྩལ་ལས་འཇིག་རྟེན་སོ་སོར་ཐུབ་པ་དྲུག་སྣང་བ་ནི་འཕྲིན་ལས་ཕུན་སུམ་ཚོགས་པ་སྤྲུལ་པའི་རང་བཞིན་མཚོན་པས་དེ་དག་གི་ས་བོན་བསྟན་ཏོ། །དེ་དག་ཀྱང་སྐུའི་རང་བཞིན་ལས་འཕྲིན་ལས་སུ་ཤར་བའི་གཙོ་བོའི་འཕྲིན་ལས་ཀྱི་གདངས་ལས་བདུད་རྩི་འཁྱིལ་པ་སྣང་བའི་ཕྱིར་དེའི་ས་བོན་བསྟན་ཏོ། །དེ་ཐམས་ཅད་ཀྱི་གདངས་ལས་ཁྲོ་བོའི་ཞིང་ཁམས་རང་སྣང་བར་བསྟན་པའི་ཕྱིར་བུདྡྷ་ཧེ་རུ་ཀའི་ས་བོན་ཨཱ་གྱིས་མཚོན་པའི་ངོ་བོར་མཐར་(༡༠༣)བསྟན་པ་ཡིན་ནོ། །
གཉིས་པ་ཡི་གེའི་བརྡ་བཤད་པ་ནི། སྐྱེ་མེད་དང་ཐུགས་ཀྱི་བརྡ་ཀུན་བཟང་ཡབ་ཡུམ་ལ་བརྗོད་པ་ནི་དབྱིངས་སྐྱེ་བ་མེད་པའི་སེམས་ཉིད་དང་། ཡེ་ཤེས་རང་བྱུང་གི་ཐུགས་རྗེ་འགག་པ་མེད་པར་བསྟན་པའི་ངང་ལས་དཀྱིལ་འཁོར་རྣམས་འཆར་བའི་གཞིར་གོ་བའི་བརྡར་བརྗོད་པའོ། །རིགས་ལྔ་ཡབ་རྣམས་ལ་སྒྱུ་འཕྲུལ་གྱི་སྒྲས་བརྗོད་པ་ནི། ཐབས་ཀྱི་སྒྱུ་མ་རང་སྣང་ཕུང་པོ་ལྔ་གནས་སུ་དག་པར་བསྟན་པའོ། །ཡུམ་ལྔ་ལ་དྲྭ་བའི་སྒྲས་བརྗོད་པ་ནི་ཤེས་རབ་གཉིས་སུ་མེད་པས་འབྲེལ་པར་མཚོན་པ་སྟེ། འབྱུང་བ་ལྔ་དབྱིངས་སུ་དག་པར་བསྟན་པའོ། །ནང་གི་སེམས་དཔའ་བཞི་ལ་ཐུགས་ཀྱི་སྒྲས་བརྗོད་པ་ནི་རྣམ་པར་ཤེས་པའི་རང་བཞིན་དག་པ་ཉིད་མཚོན་པའོ། །ཡུལ་གྱི་སེམས་མ་བཞི་ལ་སྐུའི་སྒྲས་བརྗོད་པ་ནི་དབང་ཤེས་འཆར་བའི་སྣང་ཡུལ་རགས་པར་སྣང་བ་སྟེ། དེ་དག་གནས་སུ་དག་པར་མཚོན་པའོ། །ཕྱིའི་སེམས་དཔའ་བཞི་ལ་གསུང་གི་སྒྲས་བརྗོད་པ་ནི། དབང་པོ་གསལ་ཅིང་རྟོག་པར་བྱེད་པའི་བདག་ཉིད་དེ་དེ་དག་གནས་སུ་དག་པར་མཚོན་པའོ། །དུས་ཀྱི་སེམས་མ་བཞི་ལ་དག་པའི་སྒྲས་བརྗོད་པ་ནི། དུས་བཞི་ཐམས་ཅད་ཡོད་མེད་རྟག་ཆད་ལས་འདས་པ་སྟེ་གནས་སུ་དག་པར་མཚོན་པའོ། །སྒོ་བ་བཞི་ལ་འཇིག་པའི་སྒྲས་བཏགས་པ་ནི། ཉོན་མོངས་པ་དངོས་པོ་དང་མཚན་མར་འཛིན་པའི་རང་བཞིན་བདུད་བཞི་དང་ཕྱིར་རྒོལ་བ་འཇོམས་ཤིང་གནས་སུ་དག་པའི་བརྡའོ། །སྒོ་མ་བཞི་ལ་ཆོས་ཉིད་དོན་གྱི་སྒྲས་འཕངས་པ་ནི། ཡེ་ནས་རྣམ་པར་དག་པའི་ཚད་མེད་པས་འགྲོ་བའི་དོན་ལྷུན་གྱིས་གྲུབ་ཅིང་བདག་དང་བདག་གི་དངོས་པོ་དང་མཚན་མར་འཛིན་པ་གནས་སུ་དག་པར་མཚོན་པའོ། །ཐུབ་པ་དྲུག་ལ་རྡུལ་སྙེད་ཀྱི་སྒྲས་བརྗོད་པ་ནི། སྤྲུལ་པ་གྲངས་མེད་པས་འཇིག་རྟེན་མུ་མེད་པར་ལྷུན་གྱིས་གྲུབ་པའི་དོན་མཛད་ཅིང་འགྲོ་བ་དྲུག་གི་བག་ཆགས་གནས་སུ་དག་པར་མཚོན་པའོ། །ཁྲོ་བོའི་རང་བཞིན་ལ་ཐམས་ཅད་ཞིག་པར་བརྗོད་པ་ནི། གདུལ་བྱ་དྲེགས་པ་འདུལ་ཞིང་སྣང་ཡུལ་ཡེ་ཤེས་སུ་དག་པར་མཚོན་པའོ། །
གསུམ་པ་གདངས་ཀྱི་འཆར་ཚུལ་ལ། སངས་རྒྱས་ཀྱི་རང་སྣང་ལྷུན་སྟུག་པོ་བཀོད་པ་ན་གཙོ་བོ་ཕྱོགས་རྣམས་གང་ནས་བལྟས་པ་དེ་ཉིད་དུ་ཞལ་གཟིགས་པའི་ཤར་དུ་མི་བསྐྱོད་པ་ཡབ་ཡུམ་ལ་སའི་སྙིང་པོ་དང་། བྱམས་པ། ལཱ་སྱེ་མ་དང་། དྷུ་པེ་མ་བཞིས་བསྐོར་བའི་ཤར་དུ་སྒོ་བ་གཤིན་རྗེ་གཤེད་དང་ལྕགས་ཀྱུ་མས་མཚོན་པ་སྟེ་དཀྱིལ་འཁོར་དྲུག་ཕྲག་གཅིག་དང་། ལྷོར་རིན་ཆེན་འབྱུང་ལྡན་ཡབ་ཡུམ་ལ་སྤྱན་རས་གཟིགས་དང་། སྒྲིབ་པ་རྣམ་པར་སེལ། མཱ་ལེ་མ་དང་། པུཥྤེ་མ་བཞིས་བསྐོར་བའི་ལྷོར་སྟོབས་པོ་ཆེ་དང་ཞགས་(༡༠༤)པ་མས་མཚོན་པ་སྟེ་དྲུག་དང་། ནུབ་ཏུ་འོད་དཔག་མེད་ཡབ་ཡུམ་ལ་ནམ་མཁའི་སྙིང་པོ། ཀུན་ཏུ་བཟང་པོ། གཱིརྟི་མ་དང་། ཨཱ་ལོ་ཀེ་མ་བཞིས་བསྐོར་བའི་ནུབ་ཏུ་རྟ་མགྲིན་དང་ལྕགས་སྒྲོག་མས་མཚོན་པ་དྲུག་དང་། བྱང་དུ་དོན་ཡོད་གྲུབ་པ་ཡབ་ཡུམ་ལ་ཕྱག་ན་རྡོ་རྗེ་དང་། འཇམ་དཔལ་དང་། ནིརྟི་མ། གནྡྷེ་མ་བཞིས་བསྐོར་བའི་བྱང་དུ་བདུད་རྩི་འཁྱིལ་པ་དང་དྲིལ་བུ་མས་མཚོན་པ་སྟེ་དྲུག་ཕྲག་དྲུག་གི་དཀྱིལ་འཁོར་དུ་རང་གསལ་བའི་གདངས་ལས། སྟེང་གཞི་ཁྲོ་བོའི་ཞིང་ཁམས་དང་། ཐུབ་པ་དྲུག་གི་སྤྲུལ་པ་གྲངས་མེད་པ་འཇིག་རྟེན་གྱི་ཁམས་ཐམས་ཅད་དུ་འཕྲོ་བར་རང་སྣང་བས་ཚུལ་གྱིས། དུས་རྟག་པ་རྒྱུན་གྱི་འཁོར་ལོར་བཞུགས་པར་འདོད་དེ། ཡེ་ཤེས་རིན་པོ་ཆེའི་རྒྱུད་ལས། སྟུག་པོ་བཀོད་པའི་ཞིང་ཁམས་ན། །རང་སྣང་ལོངས་སྤྱོད་རྫོགས་པའི་སྐུ། །དྲུག་ཕྲག་དྲུག་གི་འཁོར་གྱིས་བསྐོར། །གདངས་ཀྱི་ཁྲོ་བོའི་དཀྱིལ་འཁོར་དང་། །ཐུབ་པ་གྲངས་མེད་རྟག་པར་འཕྲོ། །དེ་བཞིན་འགྲོ་ལ་རྟག་གནས་པའོ། །ཞེས་སོ། །སེམས་ཅན་གྱི་གནས་སྐབས་ན་ཡང་སྙིང་ག་དང་སྤྱི་བོ་ལ་བརྟེན་པར་འདོད་དེ། ཉི་ཟླ་ཁ་སྦྱོར་ལས། ཙིཏྟ་རིན་ཅེན་གཞལ་ཡས་ན། །ཞི་བའི་སྐུ་ནི་རྫོགས་པ་དང་། །རང་རང་མགོ་ལ་ཁྲོ་སྐུར་གསལ། །གདངས་ཀྱི་སྐུ་ནི་བསམ་མི་ཁྱབ། །ཅེས་སོ། །ཕྱིས་བར་དོར་ཡང་སྐུ་དེ་དག་བསམ་གཏན་གྱི་ཞག་ལྔར་རིམ་གྱིས་ཚོམ་བུའི་དཀྱིལ་འཁོར་དུ་འཆར་བར། མན་ངག་སྙིང་གི་དགོངས་པ་ལས། བར་དོར་སངས་རྒྱས་ཀྱི་སྐུ་དྲུག་ཕྲག་དང་བཅས་པ་འཆར་ཏེ། ཞེས་གསུངས་སོ། །དེའང་རྒྱུད་འདི་ནི་གསང་བ་རྫོགས་པ་ཆེན་པོ་སེམས་དང་ཡེ་ཤེས་རང་སྣང་བར་སྟོན་པ་གསུངས་པས་གོང་མ་རྣམས་དང་གཅིག་ཏུ་འདུ་བ་ཡིན་པའི་ཕྱིར་རྫོགས་པ་ཆེན་པོའི་ཐིག་ལེའི་སྐོར་བཞིན་དགོངས་པ་བླང་བར་རིགས་སོ། །དེའང་ཚུལ་འདི་ནི་སློབ་དཔོན་ཆེན་པོ་པདྨ་དང་། བི་མ་ལས་ཞི་ཁྲོ་དོན་གྱི་སྒྲུབ་ཐབས་མཛད་པའི་མན་ངག་གི་ཡི་གེ་ཆེན་པོ་ནས་བཏུས་ཏེ་འདིར་བཀོད་པ་ཡིན་ནོ། །སྤྱི་དོན་འདི་ནི་ཤིན་ཏུ་གསང་ཞིང་གཅེས་པ་སྟེ་རྒྱུད་འདིའི་དགོངས་པ་མཐར་ཐུག་པའོ། །
གཉིས་པ་གཞུང་གི་དོན་ནི་སྔ་རབས་པ་བཞིན་སྡེ་ཚན་སོ་སོར་ཕྱེ་ཡང་འགལ་བ་མེད་ཀྱི། འོན་ཀྱང་དཀྲུགས་ཏེ་བཤད་པས་འཆད་པ་པོས་འཆད་མི་བདེ་ཞིང་། ཉན་པ་པོས་གོ་དཀའ་བས་ཡི་གེའི་རིམ་པ་བཞིན་བསྟན་པར་བྱ་བ་ལ་ལྔ་སྟེ། དབྱིངས་རིགས་ལྔ་ཡབ་ཡུམ་དང་བཅས་པའི་ཡི་གེ། ནང་སེམས་སྒོ་བ་དང་བཅས་པའི་ཡི་གེ། ཕྱི་སེམས་སྒོ་མ་དང་བཅས་པའི་ཡི་གེ། ཡེ་ཤེས་ཐུབ་པ་དང་བཅས་པའི་ཡི་གེ། སྒོ་སྐྱོང་ཁྲོ་བོ་དང་བཅས་པའི་ཡི་གེ་བསྟན་པའོ། །དང་པོ་ལ་གསུམ་སྟེ། དབྱིངས་ཀུན་ཏུ་བཟང་མོའི་ཡི་གེ། རིགས་ལྔ་(༡༠༥)ཡབ་ཀྱི་ཡི་གེ། ཡུམ་གྱི་ཡི་གེའོ། །དང་པོ་ནི། ཨ༵་ནི༵་ཆོས་ཐམས་ཅད་སྐྱེ༵་བ་མེད༵་པའི་དེ༵་བཞིན༵་ཉིད༵་ཀུན་ཏུ་བཟང་མོའི་ངོ་བོ་ཉིད་ཤེས་རབ་ཀྱི་ཕ་རོལ་ཏུ་ཕྱིན་མ་སྟེ། ཡུམ་བར་མ་ལས། དེ་ལ་ཨ་ཞེས་བྱ་བ་ནི་གདོད་མ་ནས་མ་སྐྱེས་པའི་ཕྱིར་ཆོས་ཐམས་ཅད་ཀྱི་སྒོའོ། །ཞེས་པ་ལ་སོགས་པ་ཡི་གེ་བཞི་བཅུ་རྩ་གཉིས་ཀྱི་དོན་གསུངས་པ་དང་གཅིག་གོ། །
གཉིས་པ་ནི། ཋ༵་ནི༵་རྣམ་པར་ཤེས་པའི་དེ་བཞིན་ཉིད་ཁོང་དུ་ཆུད་པའི་སྒོ་སྟེ་ཐབས་སྣང་བའི་སྒྱུ༵་མ་སྣ་ཚོགས་སུ་འཕྲུལ༵་པའི་ངོ་བོ་དབྱིངས་ལས་མ་སྐྱེས་པས་དེ་བཞིན་ཉིད་རྣམ་པར་ཤེས་པའི་རྡོ༵་རྗེ༵་ཐུགས་རྣམ་སྣང་གི་ས་བོན་ཉིད༵་དོ། །ཊ༵་ནི་གཟུགས་ཀྱི་དེ་བཞིན་ཉིད་ཁོང་དུ་ཆུད་པའི་ཐབས་སྣ༵ང་བ༵འི་སྒྱུ༵་མ་སྣ་ཚོགས་སུ་རྣམ་འཕྲུལ༵་མི་བསྐྱོད་པའི་ས་བོན་ཉིད༵་དོ། །ཌ༵་ནི༵་ཚོར་བའི་དེ་བཞིན་ཉིད་ཁོང་དུ་ཆུད་པའི་ཐབས་ཀྱི་སྒྱུ༵་མ་སྣ་ཚོགས་སུ་སྣང་བའི་རྣམ་འཕྲུལ༵་ཡི༵ད་བཞི༵ན་རིན་ཅེན་འབྱུང་ལྡན་གྱི་ས་བོན་ཉིད༵་དོ། །ཌྷ༵་ནི༵་འདུ་ཤེས་ཀྱི་དེ་བཞིན་ཉིད་ཁོང་དུ་ཆུད་པའི་ཐབས་ཀྱི་སྒྱུ༵་མ་སྣ་ཚོགས་སུ་འཕྲུ༵ལ་པ་འོད་དཔག་མེད་ཀྱི་ས་བོན་རྣ༵མ་པར་དག༵་པ་ཉིད༵་དོ། །ཎ༵་ནི༵་འདུ་བྱེད་ཀྱི་དེ་བཞིན་ཉིད་རྟོགས་པའི་ཐབས་ཀྱི་རང་བཞིན་དུས་ཀུན༵་ཏུ༵་སྒྱུ༵་འཕྲུལ༵་དོན་གྲུབ་ཀྱི་ས་བོན་ཉིད༵་དོ། །
གསུམ་པ་ནི། ཐ༵་ནི༵་ཐབས་དང་ཤེས་རབ་གཉིས་སུ་མེད་པ་ནམ་མཁའི་རང་བཞིན་ཟུང་དུ་འབྲེལ་བའི་དྲྭ༵་བ༵་མངོ༵ན་པར་རྫོ༵གས་པར་བྱང་ཆུབ་པ་ནམ་མཁའ་དབྱིངས་ཀྱི་དབང་ཕྱུག་མའི་ས་བོན་ཉིད༵་དོ། །ཏ༵་ནི༵་ཤེས་རབ་ཀྱི་དྲྭ༵་བ་བརྟན༵་པ༵་སངས་རྒྱས་སྤྱན་མའི་ས་བོན་ཉིད༵་དོ། །ད༵་ནི༵་ཡེ་ཤེས་ཀྱི་དྲྭ༵་བ༵ས་འོད་ཟེར་ལྷམ༵་མེ༵་སྣང་བ་གོས་དཀར་མོའི་ས་བོན་ཉིད༵་དོ། །དྷ༵་ནི༵་ཆོས་ཉིད་ཀྱི་དྲྭ༵་བ༵ས་འཁྲིལ་བ༵་མཱ་མ་ཀཱིའི་ས་བོན་ཉིད༵་དོ། །ན༵་ནི༵་དེ་བཞིན་ཉིད་ཀྱི་དྲྭ༵་བས༵་ཀུན༵་ཏུ༵་མཛེས་པ་དམ་ཚིག་སྒྲོལ་མའི་ས་བོན་ཉིད་དུ་འགྱུར༵་རོ། །
གཉིས་པ་ནང་སེམས་སྒོ་བ་དང་བཅས་པའི་ཡི་གེ་ལ་གཉིས་ཏེ། དབང་ཤེས་ཀྱི་སེམས་དཔའ་བཞི་དང་ཐུགས་ཀྱི་སྒོ་བའི་ཡི་གེ། ཡུལ་གྱི་སེམས་མ་བཞི་དང་སྐུའི་སྒོ་བའི་ཡི་གེའོ། །དང་པོ་ནི། ཀ༵་ནི༵་སྤྱན༵་གྱི༵་ཐུག༵ས་མིག་གི༵་རྣམ་པར་ཤེས་པ་དབྱིངས་སུ་དག་པའི་མཆོ༵ག་སའི་སྙིང་པོའི་ཡི་གེའོ། །ཁ༵་ནི༵་སྙན༵་གྱི༵་ཐུག༵ས་རྣ་བའི་རྣམ་ཤེས་དག་པའི་མཆོག་ཕྱག་ན་རྡོ་རྗེའོ། །ག༵་ནི༵་ཤངས༵་ཀྱི༵་ཐུ༵གས་སྣའི་རྣམ་ཤེས་དག་པའི་མཆོག་ནམ་མཁའི་སྙིང་པོའོ། །གྷ༵་ནི༵་ལྗག༵ས་ཀྱི༵་ཐུག༵ས་ལྕེའི་རྣམ་ཤེས་དག་པའི་མཆོག་སྤྱན་རས་གཟིགས་སོ། །ང༵་ནི༵་དབང་ཤེས་དེ་དག་གི་འཛིན་པ་ཐུག༵ས་ཀྱ༵ང་འཇི༵ག་པར་བྱེད༵་པ༵་དང་སྒོ་གསུམ་གྱི་ཞེན་པ་དག་པའི་སྒོ་བ་གཤིན་རྗེ་གཤེད་དོ། །གཉིས་པ་ནི། ཙ༵་ནི༵་སྤྱན༵་གྱི༵་སྐུ༵་ཡི༵་མཆོ༵ག་གཟུགས་དག་པ་སྒེག་མོའོ། །ཚ༵་ནི༵་སྙན༵་གྱི༵་སྐུ༵་ཡི༵་མཆོ༵ག་སྒྲ་དག་པ་གླུ་མའོ། །ཛ༵་ནི༵་ཤ༵ངས་ཀྱི༵་སྐུ༵་ཡི༵་མཆོ༵ག་དྲི་དག་པ་ཕྲེང་བ་མའོ། །ཛྷ༵་ནི༵་ལྗ༵གས་ཀྱི༵་སྐུ༵་ཡི༵་མཆོ༵ག་རོ་དག་པ་གར་མའོ། །ཉ༵་ནི༵་སྐུ༵་ཡ༵ང་འཇིག༵་པར་བྱེད༵་པ༵་སྟེ་ཡུལ་རྣམས་དང་སྒོ་གསུམ་ལ་ཞེན་བྱེད་ཡུལ་དུ་འཛིན་པ་དག་པའི་སྐུའི་ཁྲོ་བོ་སྟོབས་པོ་ཆེར་བསྟན་པའོ༵། །
གསུམ་པ་ནི་ཕྱི་སེམས་སྒོ་བ་དང་བཅས་པའི་ཡི་གེ་ལ་གཉིས་ཏེ། (༡༠༦)དབང་པོའི་སེམས་དཔའ་བཞི་གསུང་གི་སྒོ་བ་དང་བཅས་པ། དུས་ཀྱི་སེམས་མ་བཞི་སྒོ་མ་དང་བཅས་པའོ། །
དང་པོ་ནི། པ༵་ནི༵་སྤྱན༵་གྱི༵་གསུང༵་མིག་གི༵་དབང་པོ་གནས་སུ་དག་པའི་མཆོག༵་བྱམས་པའི་ཡི་གེའོ། །ཕ༵་ནི༵་སྙན༵་གྱི༵་གསུང༵་གི༵་མཆོ༵ག་རྣ་བའི་དབང་པོ་དག་པ་སྒྲིབ་པ་རྣམ་སེལ་ལོ། །བ༵་ནི་ཤ༵ངས་ཀྱི༵་གསུང༵་གི༵་མཆོག༵་སྣའི་དབང་པོ་དག་པའི་ཀུན་ཏུ་བཟང་པོའོ། །བྷ༵་ནི༵་ལྗག༵ས་ཀྱི༵་གསུང༵་གི༵་མཆོག༵་ལྕེའི་དབང་པོ་དག་པ་འཇམ་དབྱངས་སོ། །མ༵་ནི༵་གསུ༵ང་ཡང༵་འཇི༵ག་པར༵་བྱེད༵་པ་སྟེ་བདག་ཏུ་འཛིན་པ་དང་སྒོ་གསུམ་གྱི་ཞེན་བྱེད་དག་པ་རྟ་མགྲིན་ནོ། །
གཉིས་པ་ནི། ཡ༵་ནི༵་འདས་པའི་ཆོས་རྣམས་སྐྱེ༵་བ༵་རྣམ༵་པར༵་དག༵་པའི་ཆོས་ཉིད་བདུག་སྤོས་མའོ། །ཝ༵་ནི༵་ད་ལྟར་གནས༵་པ༵་རྣམ༵་པར༵་དག༵་པའི་ཆོས་ཉིད་མེ་ཏོག་མའོ། །ར༵་ནི༵་མ་འོངས་པ་ན་འཇི༵ག་པ༵་རྣ༵མ་པར༵་དག༵་པའི་ཆོས་ཉིད་སྣང་གསལ་མའོ། །ལ༵་ནི༵་དུས་བཞི་མཉམ་པ་ཉིད་ཀྱི་ཡེ་ཤེས་སུ་རང་སྣང་བའི་སྟོང༵་པ༵་རྣམ་པར་དག༵་པ༵འི་ཆོས་ཉིད་དྲི་ཆབ་མའོ༵། །སྒོ་མ་བཞི་ལ། ཤ༵་ནི༵་ཆོས་ཐམས་ཅད་རྟག༵་པའི༵་རང་བཞིན་དུ་མེད་པས་རྣམ་པར་དག༵་པ༵་སྟེ༵་ལྕགས་ཀྱུ་མའོ། །ཥ༵་ནི༵་ཆོས་ཐམས་ཅད་ཆད༵་པའམ༵་ཡོད༵་པ༵་མ༵་ཡིན༵་པས་ཞགས་པ་མའོ། །ས༵་ནི༵་ཆོས་ཐམས་ཅད་རྟག་ཆད་ཀྱི་མཐའ༵་དང་བྲ༵ལ་ཞིང་བདག༵་མེད༵་པས༵་ལྕགས་སྒྲོག་མའོ། །ཧ༵་ནི༵་ཆོས་ཐམས་ཅད་དངོས་པོ་དང་མཚ༵ན་མ༵་མེ༵ད་པ༵་ཉིད༵་ཀྱིས་དྲིལ་བུ་མའོ། །
བཞི་པ་ཡེ་ཤེས་ཐུབ་དྲུག་དང་བཅས་པའི་ཡི་གེ་ལ། ཀྵ༵་ནི༵་ཆོས་ཉིད་ཟད་པའི་སྒོ་སྟེ་རང་སྣང་གི་ཡེ༵་ཤེས༵་རྣམ་པར་དག་པ་ཐུག༵ས་རང་བྱུང་གི་ཡེ་ཤེས་ཀྱི༵་ཐུག༵ས་རྗེ་སྟེ་ཀུན་ཏུ་བཟང་པོ་ཡབ་ཀྱི་ཡི་གེའོ། །ཐུབ་པ་དྲུག་ལ། ཨི༵་ནི༵་ལྷའི་གནས་ཇི་སྙེད་པར་ལྷའི་ཐུབ་པ་འཇིག་རྟེན་གྱི་ཁམས་རྒྱ་མཚོའི་རྡུལ༵་ཕྲ་བ་སྙེད༵་འཕྲོས་པས་ལྷ༵་རྣ༵མས་ཡོངས་སུ༵་འདུལ་བ་བརྒྱ་བྱིན་དང་། དེ་བཞིན་དུ་སྦྱར་ཏེ་ཨཱི༵་ནི༵་རྡུལ༵་སྙེད༵་ལྷ༵་མ༵་ཡི༵ན་གྱི་ཐུབ་པ་ཐག་བཟང་རིས་དང་། ཨུ༵་ནི༵་རྡུལ༵་སྙེད༵་མི༵་རྣ༵མས་སུ༵་ཤཱཀྱ་ཐུབ་པ་དང་། ཨཱུ༵་ནི༵་རྡུལ༵་སྙེད༵་བྱོལ༵་སོ༵ང་རྣ༵མས་ཀྱི་ཐུབ་པ་སེང་གེ་རབ་བརྟན་དང་། ཨེ༵་ནི༵་རྡུལ༵་སྙེད༵་ཡི༵་དྭག༵ས་སུ༵་ཁ་འབར་དྷེ་བ་དང་། ཨེེ༵་ནི༵་རྡུལ༵་སྙེད༵་དམྱ༵ལ་བ༵་རྣམ༵ས་ལ་ཨ་ཝ་གླང་མགོས་འདུལ་བའི་ཡི་གེའོ། །ཡི་གེ་དྲུག་པོ་དེ་ཡང་ཚངས་པ་དབྱིངས་ཀྱི་སྒོ་སྟེ་ཐུགས་རྗེ་ཆེན་པོའི་རྣམ་པར་ཐར་པའོ། །
ལྔ་པ་སྒོ་སྐྱོང་ཁྲོ་བོ་དང་བཅས་པའི་ཡི་གེ་ལ་གཉིས་ལས། སྒོ་བ་ནི་ཨོ༵་ནི༵་མཚན་མ་ཐ༵མས་ཅ༵ད་དང་སྒོ་གསུམ་གྱི་སྤྲོས་པ་མཐའ་དག་འཇིག༵་པར་བྱེ༵ད་ཅིང་ཆོ་འཕྲུལ་ཆེན་པོ་སྟོན་པ་སྟེ་བྱང་སྒོའི་ཁྲོ་བོ་བདུད་རྩི་འཁྱིལ་པའོ། །གཉིས་པ་ཁྲོ་བོའི་ཡི་གེ་ནི་ཨཱོ༵ྃ་ནི༵་གཟུང་འཛིན་ཐ༵མས་ཅ༵ད་ཞི༵ག་པ༵་ཡི༵ན་ཏེ་ཞི་བའི་གདངས་ཡེ་ཤེས་ལྔའི་རང་བཞིན་ཁྲོ་བོར་སྣང་བའོ། །དེའང་བིནྡྷུ་ཆོས་ཀྱི་(༡༠༧)དབྱིངས་ཀྱི་ཡེ་ཤེས། ཟླ་ཚེས་མེ་ལོང་ལྟ་བུའི་ཡེ་ཤེས། ཁོག་པ་མཉམ་པ་ཉིད་ཀྱི་ཡེ་ཤེས། ནཱ་ད་སོ་སོར་རྟོག་པའི་ཡེ་ཤེས། རང་བཞིན་བྱ་བ་གྲུབ་པའི་ཡེ་ཤེས་སོ། །ཐ་མ་བདུད་རྩི་འཁྱིལ་པའི་སྙིང་པོར་བྱེད་པ་དེ་དག་གིས་ཞི་ཁྲོའི་དཀྱིལ་འཁོར་ཡི་གེ་སྤྲིན་ལས་འཕྲོ་ཚུལ་ཕྱོགས་ན་ཡོད་པར་མ་མཐོང་ངོ་། །ཡི་གེའི་སྤྲིན་ནི་ལྷའི་དཀྱིལ་འཁོར་ཐམས་ཅད་ཀྱི་ས་བོན་དུ་གནས་ལ། ཁྲོ་བོའི་དཀྱིལ་འཁོར་ནི་བུདྡྷ་ཧེ་རུ་ཀའི་ས་བོན་ཨཱ་ཡེ་ཤེས་ལྔ་ལྡན་ལས་འཕྲོས་པའོ། །
གསུམ་པ་དེ་དག་གི་དོན་བསྡུ་བ་ནི། དེ་ལྟར་ལྷུན་གྱིས་གྲུབ་པའི་རང་བཞིན་ཡི༵་གེ༵་འཁོ༵ར་ལོ༵་ཚོ༵གས་ཆེ༵ན་གྱི་སྤྲིན་འདི༵ས་སངས་རྒྱས་ཐམས་ཅད་ཀྱི་སྐུ༵་གསུང༵་ཐུག༵ས་ཀྱི་ཡེ་ཤེས་ཀྱི༵་ཕྲེང༵་བ༵་མ་ལུས་པ་ཐམས་ཅད་བསྡུས༵་སོ་ཞེས༵་དེ་བཞིན་གཤེགས་པ་ཉིད་ཀྱིས་ཆེད་དུ་བརྗོ༵ད་དོ༵། །དེ་ལྟར་ཡི་གེ་སྤྲིན་དེ་ཉིད་སྐུ་དང་ཡེ་ཤེས་འདུ་འབྲལ་མེད་པའི་ངོ་བོར་ཡེ་ནས་གནས་པ་ལ་ངོ་མཚར་བར་བསྟན་པའི་ཚུལ་ནི་ཨ༵་ཧོ༵་ཞེས་དགྱེས་པ་ཆེན་པོས་བཞད་པའོ། །
གསུམ་པ་དེ་གཉིས་ཀའི་དོན་བསྡུ་བ་ལ་གཉིས་ཏེ། ཚུལ་ཇི་ལྟར་ཕྱུང་བ་དང་། དོན་བསྡུ་བ་དངོས་སོ། །
དང་པོ་ནི། ཡི་གེ་རྒྱས་པར་བཤད་པ། དེ༵་ནས༵་རང་སྣང་བའི་དེ༵་བཞིན༵་གཤེ༵གས་པ༵་བཙུན༵་མོའི༵་ཚོག༵ས་དང༵་རང་བཞིན་གཉིས༵་སུ༵་མེད༵་པའི༵་དཀྱི༵ལ་འཁོ༵ར་དེ༵་དག༵་ཉིད༵་ཀྱི༵་སྙིང་པོ་ཡི་གེའི་སྤྲིན་གྱི་གས༵ང་བ༵་ཆེན་པོ་འདི༵་ཉིད༵་དེ་བཞིན་གཤེགས་པ་ཐམས་ཅད་ཀྱི་སྐུ༵་དང་གསུང༵་དང་ཐུག༵ས་དང་ཡོ༵ན་ཏན༵་དང་འཕྲིན༵་ལས༵་རྡོ༵་རྗེ༵་ལ༵ས་འདི་དག་ཕྱུང༵་ངོ༵་། །
གཉིས་པ་ནི། གཉིས་སུ་མེད་པའི་རང་བཞིན་ལ་བསྔགས་པའི་ཕྱིར་ཨ༵་ཧོ༵་ཞེས་བཞད་ནས་ཡི་གེའི་འཁོར་ལོ་དེ་ཡང་ཐ༵བས་རང་བྱུང་གི་ཐུགས་རྗེ་ཆེན་པོ་དང༵་ཤེས༵་རབ༵་མཐའ་གཉིས་ལས་འདས་པའི་རང་བཞིན་གྱི་ངང་ལས་སྟོན་པ་ཉིད་ལྷག་པའི་ཡེ་ཤེས་གདུལ་བྱའི་དོན་ལ་རབ་ཏུ་དགྱེ༵ས་པའི་ཐུགས་རྗེའི་སྤྲིན༵་ཕུང་བྱང༵་ཆུབ༵་ཀྱི་སེམ༵ས་ཕུན་སུམ་ཚོ༵གས་པའི་རྒྱུ༵་མི་ཟད་པ་རྒྱན་གྱི་འཁོ༵ར་ལོ༵་ཡེ་ནས་མངའ་བའི་འབྲས༵་བུ༵་རྒྱལ༵་བ་བཞི་བཅུ་རྩ་གཉིས་ལ་སོགས་པའི་དཀྱིལ་འཁོར་ཆེན་པོ་སྨིན༵་པ་སྟེ་སྣང་བ་ལས། སྤྲུལ་པའི་སྐུ་འཕྲོ་བས་འགྲོ་བའི་དོན་ལྷུན་གྱིས་གྲུབ༵་པར་འབྱུང་བའི་རྒྱུ་ངོ༵་མཚ༵ར་བའི་ཡི་གེ་ཀཱ་ལི་ལ་སོགས་པའི་མི༵ང་ཚོག༵ས་བཞི༵་བཅུ༵་རྩ་གཉིས༵་སྣང་བ་དེ་ཉིད། རྒྱུ་རྐྱེན་གྱིས་གསར་དུ་འདུས༵་མ༵་བྱས༵་པ་ཉིད༵་ཀྱི་ངོ་བོ་ལྷུན་གྱིས་གྲུབ་པའི་ཆོས་ཡེ་ནས་གནས་པའི་ངང་ལས་འགྲོ་བའི་དོན་དུ་རང་བྱུང་གི་ཐུགས་རྗེ་སྣང་བས་འདུས༵་བྱས༵་པ་ལྟར་འཁོར་ལོ་བཀོད་པ་ངོ་བོ་ལ་འཕོ་འགྱུར་མེད་པའི་དོན་གྱིས་གཉིས་སུ་མེད་པའི་རྡོ༵་རྗེ༵་སྟེ། དེ་ཉིད་སྐུ་གསུང་ཐུགས་ཡོན་ཏན་འཕྲིན་ལས་ཀྱི་དཀྱིལ༵་འཁོར༵་ལྔ་བཅུ་རྩ་ལྔ་ལ་སོགས་པ་འབྱིན༵་པ༵འི་རང་བཞིན་ཁོ་ནར་ངེས་པས། དཀྱིལ་འཁོར་འཕྲུལ་ཅིང་སྣང་(༡༠༨)བར་བྱེད་པའི་དམ༵་ཚིག་ཆེན་པོ་ལས་དུས་རྟག་ཏུ་འད༵འ་བ༵ར་མི༵་མཛ༵ད་པ་ནི་ཉི་མ་འོད་ཟེར་གྱི་དམ་ཚིག་ལས་མི་འདའ་བ་བཞིན་ཏེ། དཀྱིལ་འཁོར་སྣང་བའི་རང་བཞིན་དེ་ཡང་གཟུགས་དང་མེ་ལོང་འཛོམ་པ་ལས་གཟུགས་བརྙན་དབང༵་མེད༵་དུ་འཆར་བ་བཞིན་དུ། ཡི་གེ་འཁོར་ལོ་ལས་རང་བྱུང་གི་ཡེ་ཤེས་ཤར་བའི་ཚེ་རང་སྣང་གི་དཀྱིལ་འཁོར་དང་འགྲོ་བ་འདུལ་བའི་དཀྱིལ་འཁོར་ཕྱོགས་བཅུར་འཕྲོ་བ་ཐམས་ཅད་རང་དབང་མེད་པར་འཆར་བ་ནི་རྒྱུ༵་ཡི་གེ་སྤྲིན་དང་རྐྱེན༵་ཡེ་ཤེས་དང་གདུལ་བྱའི་སྣང་བ་ཚོག༵ས་པའི༵་མཐུ༵་ཆེན༵་པོ་ལས་སྣང་བ་ཡིན༵་པའི་ཕྱིར་ངོ་མཚར་བས་ཧོ༵་ཞེས་བཞད་དོ། །དེ་ནི་སངས་རྒྱས་ལས་སྤྲོས་ཚུལ་ལྟར་བཤད་དོ། །
གཞན་དུ་ན་ཡི་གེ་འཁོར་ལོ་ལུས་ལ་གནས་ཚུལ་དང་། ལམ་བསྒོམ་ཚུལ་ལྟར་བཤད་པ་གཉིས་ལས། དང་པོ་ནི། ལུས་ཅན་ཀུན་གྱི་ལུས་ལ་ཐབས་དང་ཤེས་རབ་ཐིག་ལེ་དཀར་དམར་གཉིས་སུ་མེད་པ་དགྱེས་པའི་སྤྲིན་གྱི་ཁམས་བྱང་ཆུབ་སེམས་ཀྱི་ཚོགས་ནི་རྒྱུ་ཀུན་རྫོབ་ཀྱི་རང་བཞིན་སྣུམ་དང་ལྡོང་བུ་ལྟ་བུ་རྩ་འཁོར་ལོ་བཞིའི་དབུས་དང་འདབ་མ་ལ་གནས་པའི་དྭངས་མ་མར་མེ་ལྟར་འོད་གསལ་བ་ཉིད་ཡི་གེའི་གཟུགས་སུ་སྣང་བ་སྟེ། དེ་ཉིད་འབྲས་བུ་རྒྱལ་བ་སྨིན་ཅིང་གྲུབ་པར་བྱེད་པས། ངོ་མཚར་བའི་མིང་ཚོགས་བཞི་བཅུ་རྩ་གཉིས་ཏེ། རང་བཞིན་ཡེ་ནས་གནས་པས་འདུས་མ་བྱས་པའི་ཆོས་ཉིད་འོད་གསལ་བའི་ངང་ལས་ལམ་གོམས་པར་བྱེད་པའི་འདུས་བྱས་ཐབས་ལ་མཁས་པའི་རང་བཞིན་དང་ཤེས་རབ་ཟུང་དུ་འབྲེལ་བའི་རྡོ་རྗེ་སྐུ་དང་ཡེ་ཤེས་ཀྱི་དཀྱིལ་འཁོར་མངོན་དུ་འབྱིན་པའི་དམ་ཚིག་ཆེན་པོ་ལས་མི་འདའ་བར་མཛད་པ་ནི། གཞི་ཡི་གེ་ཉིད་ལམ་གྱི་རྐྱེན་གྱིས་ལྷའི་དཀྱིལ་འཁོར་དུ་གསལ་བར་བྱེད་པ་རྟེན་ཅིང་འབྲེལ་བར་འབྱུང་བའི་དབང་གིས་རྒྱུ་རྐྱེན་ཚོགས་པའི་ནུས་མཐུ་འབྱུང་རུང་དུ་གཞི་ལ་ད་ལྟ་ནས་ཡོད་པ་ནི་ངོ་མཚར་ཆེའོ་ཞེས་བསྟན་པའོ། །ཡང་ལམ་བསྒོམ་ཚུལ་དང་སྦྱར་ན་གཉིས་ལས། གྲོལ་ལམ་བསྐྱེད་རྫོགས་ལ་སྦྱར་བ་ནི་ཐབས་བྱང་ཆུབ་ཏུ་སེམས་བསྐྱེད་པ་དང་ཤེས་རབ་དེ་བཞིན་ཉིད་ཀྱི་ཏིང་ངེ་འཛིན་དང་། དགྱེས་སྤྲིན་ཀུན་ཏུ་སྣང་དང་བྱང་ཆུབ་སེམས་ཚོགས་རྒྱུའི་ཏིང་ངེ་འཛིན་རྣམས་བསྒོམས་ནས། ཡི་གེ་སྤྲིན་གྱི་འཁོར་ལོ་སྔར་བསྟན་པ་བཞིན་བསྒོམ་ན་འབྲས་བུ་རྒྱལ་བའི་དཀྱིལ་འཁོར་སྨིན་གྲུབ་འབྱུང་བས་ངོ་མཚར་གྱི་མིང་ཚོགས་བཞི་བཅུ་རྩ་གཉིས་ཀྱིས། འདུས་མ་བྱས་ཆོས་སྐུ་དང་། འདུས་བྱས་གཟུགས་སྐུའི་རྡོ་རྗེ་གཉིས་སུ་མེད་པའི་དཀྱིལ་འཁོར་དམ་པ་འབྱིན་པའི་དམ་ཚིག་ལས་འདའ་བར་མི་མཛད་པ་ནི། རྟེན་འབྲེལ་གྱི་དབང་མེད་རྒྱུ་རྐྱེན་ཚོགས་པའི་མཐུ་སྟེ། གཟུགས་བརྙན་དང་སྒྱུ་མའི་སྣང་བ་བཞིན་འབྱུང་བ་ནི་ངོ་མཚར་ཆེ་ཧོ་ཞེས་པའོ། །(༡༠༩)ཐབས་ལམ་ལྟར་ན། ཐབས་ཡབ་ཀྱི་ཟླ་བ་དང་། ཤེས་རབ་ཡུམ་གྱི་ཉི་མ་གཉིས་སུ་མེད་པར་འདྲེས་པའི་དགྱེས་སྤྲིན་དགའ་བ་བཞིའི་ངོ་བོ་ཉིད་ནི་ཁམས་བྱང་ཆུབ་ཀྱི་སེམས་ཀྱི་ཚོགས་འཁོར་ལོ་བཞིར་བབས་པ་ལས་བྱུང་བའི་བདེ་སྟོང་གཉིས་སུ་མེད་པ་བསྒོམས་པའི་འབྲས་བུ་རྒྱལ་བ་སྨིན་ཅིང་གྲུབ་པར་བྱེད་པ་ངོ་མཚར་བའི་མིང་ཚོགས་བཞི་བཅུ་རྩ་གཉིས་ཀྱི་ངོ་བོ་དེ་ཡང་། འདུས་མ་བྱས་པའི་ཡེ་ཤེས་བཞི་པོ་ཉིད་བསྲུབས་པ་དང་འགེངས་པ་དང་འགྲེམས་པ་ལ་སོགས་པས་འདུས་བྱས་པའི་དབང་གིས་ཐབས་ཤེས་གཉིས་སུ་མེད་པའི་རྡོ་རྗེའི་དོན་དུ་གནས་པས། དཀྱིལ་འཁོར་དམ་པ་སྐུ་ལྔ་ལྷུན་གྱིས་གྲུབ་པ་འབྱིན་པའི་དམ་ཚིག་ལས་འདའ་བར་མི་མཛད་པ་ནི་ཡེ་ཤེས་དེ་བསྒོམས་པས་དབང་མེད་དུ་འབྱུང་བ་ནི་རྒྱུ་རྐྱེན་ཡབ་ཡུམ་གྱི་རྟེན་འབྲེལ་ཚོགས་པའི་མཐུ་ཆེན་པོས་འགྲུབ་པ་ཡིན་ཏེ། ངོ་མཚར་ཆེའོ་ཞེས་པའོ། །གཞུང་འདི་ནི་ཟབ་ཅིང་གཏིང་དཔག་དཀའ་བས་ཅུང་ཟད་རྒྱས་པར་བསྟན་ཏོ། །དོན་དེ་ཉིད་ཡེ་ཤེས་ཀྱི་བདག་ཉིད་གཉིས་སུ་མེད་པའི་རྡོ༵་རྗེ༵་གསང༵་བ༵་འདི་ཉིད་ཀྱི་ཚིག༵་ཏུ༵་གསུངས་པའོ༵། །
གསུམ་པ་སྐབས་ཀྱི་དོན་བསྡུ་བ་ནི། ཆོས་ཐམས་ཅད་ཡི་གེའི་སྤྲིན་དུ་ཡེ་ནས་སངས་རྒྱས་པའོ། །ཞེས༵་བརྗོ༵ད་པ༵ས་རིགས་ལྔའི་དཀྱིལ་འཁོར་རང་སྣང་བའི་དེ༵་བཞིན༵་གཤེ༵གས་པ༵་ཐ༵མས་ཅད༵་ངོ་བོ་རང་བཞིན་གྱིས་རྣམ་པར་དག་པ་དེ་ཉིད་ཡི༵་གེ༵་འཁོར༵་ལོ༵འི་ཆོས་ཉིད་ལས་ཡེ་ནས་ཐ་མི་དད་ཅིང་གཉིས་སུ་མེད་པའི་ངོ་བོ་དང་འདུ་འབྲལ་མེད་པའི་དབྱིངས་སུ་རོ་གཅིག་པ༵ར་གྱུར༵་ཏོ༵། །དེ་ཡང་རང་བཞིན་སྤྲོས་པ་དང་བྲལ་བའི་རྗེས་སུ་འགྲོ་བ་ཙམ་ལས་གནས་གྱུར་ཅིང་གཞན་དུ་སྤྲུལ་མི་དགོས་ཏེ། ངན་སོང་སྦྱོང་བའི་ཐིག་གི་ཆོ་གའི་སྐབས་ལས། ཆོས་ཀུན་ཐ་དད་རྗེས་འཇུག་ཅིང་། །ཆོས་ཀུན་ཕན་ཚུན་རྗེས་སུ་འཇུག །ཆོས་ཀུན་རྗེས་སུ་འཇུག་པ་སྟེ། །མཐའ་བྲལ་རྗེས་སུ་འགྲོ་བའོ། །ཞེས་པ་ལྟ་བུའོ། །དེ་བཞིན་དུ་དཀྱིལ་འཁོར་གསལ་བར་གྱུར་ཏོ། །ཞེས་པ་ལའང་རང་སྣང་བའི་དཀྱིལ་འཁོར་དེ་ལས་གཞན་དུ་མི་འཕོ་བ་སྟེ། ཆོས་ཉིད་དེ་དང་མཚུངས་པར་ཤེས་པར་བྱའོ། །ཁ་ཅིག་ནི་གདུལ་བྱའི་ངོར་དེ་ལྟར་སྣང་བའོ་ཞེས་པའང་འཇིག་རྟེན་དུ་སྒྲོན་མ་བཀོད་པ་ལ་སོགས་པའི་སྐབས་སུ་དེ་ལྟར་བློ་དང་མཐུན་པར་སྣང་བ་མི་འགལ་མོད། སྐབས་འདིར་ནི་ལྷུན་སྟུག་པོ་བཀོད་པའི་ཞིང་གི་དཀྱིལ་འཁོར་དེ་ཉིད་རྟག་ཏུ་འཕོ་འགྱུར་མེད་པའི་ཆོས་ཉིད་ཡིན་པས་མ་འབྲེལ་བ་ཉིད་དོ། །ཡེ་ནས་གས༵ང་བ༵འི་སྙིང༵་པོ༵་ཡི་གེ་ཕྲེང་བའི་ཆོས་ཉིད་དེ༵་ཁོ༵་ན༵་ཉིད༵་ངེ༵ས་པ༵་ལ༵ས། ལྷུན་གྱིས་གྲུབ་པ་ཡི༵་གེ༵་ཕྲེང༵་བ༵འི་འཁོ༵ར་ལོ༵་ཆེན་པོ་བཀོ༵ད་པ༵འི་ལེ༵འུ༵་སྟེ༵་བཞི༵་པའི་རྣམ་བཤད་གཏན་ལ་ཕབ་པ༵འོ༵།། །།