ཐུན་མོང་ངོ་མཚར་བའི་སྦྱོར་བ་བཤད་པ།
༈ གསུམ་པ་ངོ་མཚར་བའི་སྦྱོར་བ་བཤད་པ་ནི། ཅིའི་ཕྱིར་ངོ་མཚར་ཞེ་ན། རྟོགས་བྱེད་ཀྱི་ཐབས་ཉུང་ངུས་རྟོགས་བྱའི་ཁྱད་པར་རྒྱ་ཆེན་པོ་དག་བདེ་བླག་ཏུ་རྟོགས་ནུས་པའི་ཕྱིར་མཚར་བ་སྟེ། དཔེར་ན་སྐར་རྩིས་ཀྱི་རི་མོས་ཉི་ཟླ་ལ་སྒྲ་གཅན་འཇུག་པ་སྟོན་པ་བཞིན། དེ་ལྟར་ཡང་རང་འགྲེལ་ལས། འདི་རྣམས་ཀྱིས་གང་ལས་མ་རྟོགས་པའི་ཁྱད་པར་ཉུང་ངུས་རྟོགས་པར་བྱེད་ཅིང། བསྟན་བཅོས་མཛད་པོ་རྣམས་ཀྱིའང་མཁྱེན་པ་ཕུལ་དུ་བྱུང་བ་ཡང་དག་པར་རྟོགས་པར་འགྱུར་ཏེ། སྒྲ་གཅན་གྱི་སྤྱོད་པ་ལ་སོགས་པ་བརྩིས་པས་སྐར་རྩིས་པ་བཞིན་ནོ། །ཞེས་སོ། །དེ་ལྟ་བུའི་དགོས་པ་ཁྱད་པར་ཅན་གྱི་རྟོགས་བྱེད་དེ་ལ་དབྱེ་ན། ཁྱད་པར་གྱི་རྟོགས་བྱེད་དྲུག་དང་། ཐུན་མོང་གི་རྟོགས་བྱེད་གཅིག་སྟེ་བདུན་ནོ། །དེ་གཉིས་ཀྱི་ཁྱད་པར་ནི། ངོ་མཚར་བའི་སྦྱོར་བ་གང་ཞིག་མཉམ་པའ་ིབྲྀཏྟ་ཁོ་ནའི་རྟོགས་བྱེད་དུ་གྱུར་པ་ནི་དང་པོ་སྟེ། དེ་ལས་པྲསྟཱ་ར་ལ་སོགས་པ་དྲུག་མཉམ་པའི་བྲིཏྟ་རྣམས་ལ་རྟོགས་བྱེད་ཡིན་ཏེ། ཕྱེད་མཉམ་པ་ལ་མ་ཡིན་ཞིང་། མི་མཉམ་པ་ལའང་མ་ཡིན་ལ། ཛཱ་ཏི་རྣམས་ལའང་མི་རིགས་པའི་ཕྱིར་རོ། །ཞེས་སོ། །ངོ་མཚར་བའི་སྦྱོར་བ་གང་ཞིག་བྲྀཏྟ་ཛཱ་ཏི་གཉིས་ཀའི་གྲངས་རྟོགས་བྱེད་དུ་གྱུར་པ་ནི་གཉིས་པ་སྟེ། དེ་ལས། བྲྀཏྟའམ་ཛཱཏི་རེ་རེ་ལ་ལྕི་བ་དང་། ཡང་བ་དང་། ཡི་གེ་དང་། ཕྱི་མོ་རྣམས་ཀྱི་གྲངས་ཤེས་པ་བརྗོད་པར་བྱའོ། །ཞེས་སོ། །དེ་ལས་དང་པོ་ལ།
སོ་སོར་བཤད་པ།
སོ་སོར་བཤད་པ་དང་། དོན་བསྡུ་བ་གཉིས། དང་པོ་ལའང་། སྤྱི་གྲངས་བརྟག་ཐབས་པྲསྟཱ་ར། །བྱེ་བྲག་བརྟག་ཐབས་ནཥྚ་སྟི། །གར་ཡོད་བརྟག་ཐབས་ཨུདྡིཥྚ། །ལྕི་ཡང་བརྟག་ཐབས་ཡང་བྱ་བ། །དུ་ཡོད་སྟོན་པ་གྲངས་ཇི་ཙམ། །འགྲོ་ལམ་སྟོན་པ་ཨ་དྷྭ་དྲུག །དང་པོ་ལ། དམར་སེར་གྱི་དང་། ཤཱནྟི་པ་རང་གི་པྲ་སྟཱ་རའོ། །དང་པོ་ནི། བྲྀཏྟའི་གནས་དང་པོ་སྟེ་སྟེང་མ་ཐམས་ཅད་ལྕི་བ་འབའ་ཞིག་པའོ། །དེ་ནས་ལྕི་བ་ཐོག་མའམ་
གཙོ་བོ་དེའི་འོག་མ་ཡང་ཞིང་། ཕྱི་མ་གཞན་རྣམས་སྟེང་མ་དང་འདྲ་ལ། ཡང་སྔ་མར་ལྕི་བ་དང་། ལྕི་བ་འདིའི་ཕྱི་མ་ཡང་བ་ལྟ་བུ་སྟེ། པྲསྟཱ་རར་ཇི་སྲིད་ཐ་མའི་གནས་ཐམས་ཅད་ཡང་བར་མ་གྱུར་པ་དེ་སྲིད་དུ་བྲི་བར་བྱའོ། །དེ་ནི་དྲང་སྲོང་དམར་སེར་ཅན་གྱིས་བཞེད་པའི་པྲསྟཱ་ར་སྟེ་ཤིན་ཏུ་རྟོགས་དཀའ་བའོ། །གཉིས་པ་ནི། སྟེང་མ་ལྕི་བ་དང་། དེའི་འོག་ཏུ 
་ཡང་བ་གཅིག་བྲིའོ། །པྲསྟཱ་ར་དེ་ཉིད་འཕྲེད་ལ་ཡི་གེའི་གྲངས་དང་མཉམ་པའི་ཕྲེང་བ་དང་། སྟེང་འོག་ཏུ་སྔ་མ་སྔ་མ་ལས་ཕྱི་མ་ཕྱི་མ་ཉིས་འགྱུར་དུ་སྤེལ་བར། གྲངས་དེ་སྙེད་ཀྱི་ཡི་གེ་རིང་པོ་ལ་སོགས་པའི་སྡེབ་སྦྱོར་སོ་སོའི་པྲསྟཱ་ར་སྟོན་ཏེ། དེ་ཡང་ལྕི་བ་དང་ཡང་བའི་གྲངས་ཉིས་འགྱུར་གྱི་ཚོགས་རྣམས་ཀྱིས་རིམ་པ་ཇི་ལྟ་བ་བཞིན་ཏུ། ཇི་སྲིད་གནས་ཐ་མ་ཡང་བ་འབའ་ཞིག་ཏུ་མ་གྱུར་གྱི་བར་དེ་སྲིད་དུ་རེ་རེ་བྲིས་ཏེ་སྤེལ་བར་བྱའོ། །འདི་ནི་ཁོ་བོ་སྟེ་ཤཱནྟི་པ་རང་ཉིད་ཀྱིས་བཞེད་པའི་པྲསྟཱ་རའོ། །དེའི་ལག་ལེན་བདེ་བླག་ཏུ་རྟོགས་པའི་ཕྱིར་སྨྲས་པ། ཡི་གེ་བཞི་པར་དཔེར་མཚོན་པའི། །པྲསྟཱ་ར་ཡི་ཆོ་ག་བཤད། །ཐོག་མར་ཉིས་འགྱུར་ཨངྒི་ནི། །གཅིག་གཉིས་བཞི་བརྒྱད་འཕྲེད་ལ་འབྲི། །དེ་རྣམས་སོ་སོའི་ཐད་དྲང་འོག །གཅིག་འོག་ལྕི་དང་ཡང་བ་གཅིག །གཉིས་འོག་ལྕི་གཉིས་ཡང་བ་གཉིས། །བཞི་འོག་ལྕི་ཡང་བཞི་བཞི་སྟེ། །བརྒྱད་ཀྱི་འོག་ཏུ་ལྕི་བརྒྱད་དང་། །ཡང་བ་བརྒྱད་དེ་བཅུ་དྲུག་བཀོད། །དེ་ལྟར་ཐ་མའི་སྒྲེང་ཚར་ནི། །བཅུ་དྲུག་བར་དུ་སྔ་མ་རྣམས། །རང་རང་ཨང་གྲངས་དང་བསྟུན་ཏེ། །རིམ་པར་སྤེལ་བས་གནས་ཐ་མ། །ཡང་བ་ཁོ་ནར་གྱུར་པ་དེ། །པྲསྟཱ་ར་ཡི་རྫོགས་ཚད་ཡིན། །གཞན་དུ་ཨངྐི་བཞི་པ་ཡན། །རང་རང་མཐའ་གྲངས་མཐུན་པར་སྤེལ། །ཡི་གེ་གཅིག་པ་ལ་སོགས་ཏེ། །དེ་མན་ཡི་གེ་ལྔ་པ་ནས། །
ཨངྒིའི་ཉིས་འགྱུར་དང་བསྟུན་ཏེ། །ཡི་གེ་ཉེར་དྲུག་བར་སྤེལ་བས། །མཉམ་པའི་བྲྀཏྟའི་སྡེབ་སྦྱོར་གྱི། །མཐའ་ཡས་སྦྱོར་བ་རྟོགས་པར་འགྱུར། །འདིར་ཡི་གེ་གཅིག་པ་ནས་བརྩམས་ཏེ་ཉེར་དྲུག་པའི་བར་པྲསྟཱ་ར་ཉིས་འགྱུར་དུ་འཕེལ་བའི་བྲྀཏྟའི་གྲངས་ནི་འདི་ཡིན་ཏེ། དེ་རྣམས་སོ། ༈ །གཉིས་པ་ནི། ཡི་གེའི་གྲངས་གང་ཡང་རུང་བའི་བྲྀཏྟའི་གྲངས་འདི་འདྲ་བ་སྟེ། དེའི་པྲསྟཱ་རའི་རི་མོ་དེ་ནི་འདི་ལྟ་བུའོ། །ཞེས་བྱ་བ་རྟོགས་འདོད་ནས་ཁ་ཅིག་གིས། དེ་ལ་རི་མོ་ཅི་ཞིག་ཡོད་ཅེས་འདྲི་ན། དེ་དག་བདེ་བླག་ཏུ་བརྟག་པའི་ཆོ་ག་ནི། དེ་ཡང་ཡི་གེ་བཞི་པའི་བྲིཏྟ་བཅུ་པ་ལ་མཚོན་ན། བྲྀཏྟའི་གྲངས་ཨངྐི་བཅུ་པ་དེ་བཀོད་པའི་འབྲས་བུ་ལ་བརྟགས་ཏེ། གྲངས་དེ་མཉམ་ན་ཡང་བ་དང་མི་མཉམ་ན་ལྕི་བའི་རི་མོ་འདྲི་དགོས་པས། འདིར་གྲངས་མཉམ་པའི་ཕྱིར་ཡང་བའི་རི་མོ་དྲང་པོ་གཅིག་བྲི། དེ་ནས་འདབ་མ་བྱ་ཞེས་པས། གྲངས་དེ་གཉིས་ཀྱིས་བགོས་པའི་ནོར་ལ་བརྟགས་ཏེ། སྔར་བཞིན་འདྲི་དགོས་པས། འདིར་ལྔ་མི་མཉམ་པའི་རྙེད་ནོར་ཡིན་པས་ལྕི་བ་གཅིག་བྲི། བགོད་གཞི་མི་མཉམ་ན་རྣམ་པ་ཀུན་ཏུ་གཅིག་བསྣན་པ་དང་བཅས་པ་ལ་གཉིས་ཀྱིས་བགོས་ཏེ་འདབ་མ་བྱ་དགོས་པས། འདིར་ནོར་ལྔ་ལ་གཅིག་བྱིན་ཏེ་བགོས་པས། གསུམ་མི་མཉམ་པའི་རྙེད་ནོར་ལྕི་བ་བྲི། དེ་ལ་མི་མཉམ་གཅིག་བསྣན་ནས་འདབ་མ་བྱས་པས། འདིར་གཉིས་མཉམ་པའི་རྙེད་ནོར་ཡང་བ་གཅིག་བྲི་སྟེ། དེ་ལྟར་བྱས་པའི་འབྲས་བུ་ནི། ཡི་གེ་བཞི་པའི་བྲྀཏྟ་བཅུ་པ་ལ་ཡང་བ་གཉིས་ཀྱི་བར་དུ། ལྕི་བ་གཉིས་ཞུགས་པའི་རི་མོ་འདི་བདེ་བླག་ཏུ་ཤེས་པ་ནི་ནཥྚ་སྟེ་འདྲེན་བྱེད་ཅེས་བྱ་བའི་ཆོ་གའོ། །དེའི་ལག་ལེན་རྟོགས་སླ་བའི་ཕྱིར་སྨྲས་པ། བྲྀཏྟ་གང་ཡིན་གྲངས་བཀོད་ལ། །གྲངས་དེ་མི་མཉམ་ལྕི་བ་དང་། །མཉམ་ན་ཡང་བའི་རི་མོ་བྲི། །གྲངས་དེ་མི་
མཉམ་གཅིག་བསྣན་ནས། །ལག་པས་བགོས་པའི་རྙེད་ནོར་ལ། །མི་མཉམ་མཉམ་བརྟགས་ལྕི་ཡང་བྲི། །དེ་ལྟར་མིག་གིས་ཐོབ་ནོར་ལ། །རང་གི་ཡིག་གྲངས་མ་རྫོགས་པར། །མི་མཉམ་གཅིག་བྱིན་ལག་པ་ཡིས། །ཐོབ་ནོར་ལ་བརྟགས་ཡང་ཡང་བྱ། །ཚུལ་དེས་བྲྀཏྟ་གང་གང་གི། པྲསྟཱ་ར་ཡི་རི་མོའི་གཟུགས། །ཚེགས་མེད་རྟོགས་ཕྱིར་ནཥྚར་གྲགས། ༈ །གསུམ་པ་ནི། གང་གི་ཚེ་ཐོག་མར་པྲསྟཱ་རའི་རི་མོ་བྲིས་ནས། བྲིཏྟ་འདི་ནི་དུ་པ་ཡིན་ཞེས་འདྲི་བ་ན། འདིར་ཨུདྡིཥྚས་བརྟག་པར་བྱ་སྟེ། དེ་ཡང་པྲསྟཱ་ར་དེའི་རི་མོ་རེའི་སྟེང་དུ། ཨངྐི་གཅིག་ལ་སོགས་ཏེ་རིམ་པས་ཉིས་འགྱུར་དུ་བྲིའོ། །དེ་ནི་ཡང་བའི་རི་མོའི་སྟེང་གི་ཨངྐི་ཇི་སྙེད་པ་ཐམས་ཅད་གཅིག་ཏུ་བསྡོམས་པ་ལ། སླར་ཡང་གཅིག་བསྣན་པ་དང་བཅས་པ་ལས་གང་ཤར་བའི་རི་མོས་འདི་ལྟར་གྲངས་གནས་དེ་དང་དེ་ན་ཡོད་པའི་བྲྀཏྟ་འདི་ཉིད་ཡིན་ནོ་ཞེས་རྟོགས་པ་ནི། ཨུདྡིཥྚ་སྟེ། སྟེང་ནས་སྟོན་ཞེས་བྱ་བའི་ཆོ་གའོ། །དཔེར་ན་ཡི་གེ་དྲུག་པའི་ནང་ཚན་དབུས་ཕྲའི་པྲསྟཱ་ར་བྲིས་ནས། དེ་སྟེང་ཉིས་འགྱུར་གྱིས་ཨངྒི་བཀོད་པ་ལས། ༡༢༤༨༡༦༣༢ཡང་བ་གཉིས་ཀྱི་སྟེང་གི་ཨངྐི་བཞི་དང་བརྒྱད་བསྲེས་པས་བཅུ་གཉིས། དེ་ལ་གཅིག་བསྣན་པས་བྲྀཏྟ་བཅུ་གསུམ་པ་ཉིད་ཡིན་པར་ཤེས་པ་བཞིན་ནོ། །དེའི་ལག་ལེན་གོ་བདེར་སྨྲས་པ། པྲསྟཱ་ར་ཡི་ལྕི་ཡང་གི། རི་མོ་མ་ནོར་རིམ་བཞིན་བཀོད། །དེ་སྟེང་གཅིག་གཉིས་བཞི་ལ་སོགས། །ཉིས་འགྱུར་འཕེལ་བའི་གྲངས་ཡིག་བཏབ། །དེ་ནས་ཡང་པའི་སྟེང་གི་གྲངས། །བསྲེས་ལ་དེ་སྟེང་གཅིག་སྦྱིན་པའི། །རི་མོས་གྲངས་གནས་གར་ཡོད་རྣམས། །སྟོན་ཕྱིར་ཨུདྡིཥྚ་རུ་བརྗོད། ༈ །བཞི་པ་དམར་སེར་ཅན་གྱི་དང་། ཤཱནྟི་པ་རང་གི་ཡང་བའི་བྱ་བའོ། །དང་པོ་ནི། སྡེབ་སྦྱོར་འདི་ལ་ལྕི་བ་འབའ་ཞིག་པ་ནི་དུ། གཅིག་ཡང་བ་ནི་དུ། གཉིས་ཡང་བ་ནི་དུ་ཞེས་སོགས་འདྲི་ན། དེ་བརྟག་པའི་ཆོ་ག་ནི། གཟུགས་ཏེ་དང་པོ་གཅིག་ཡིག་བཀོད་ལ། ༼༡༽དེའི་སྟེང་དུ་ཡི་གེ་གཅིག་ལ་གཅིག་དང་། ༼༡༽གཉིས་པ་ལ་གཅིག་ཡིག་གཉིས་དང་། ༼༡༽གསུམ་པ་ལ་གཅིག་ཡིག་གསུམ་དང་། ༼༡༽བཞི་པ་ལ་གཅིག་ཡིག་བཞི་
བརྩེགས། ༼༡༽ལྟ་བུའི་སྡེབ་སྦྱོར་སོ་སོའི་ཡི་གེའི་གྲངས་ཀྱིས་སྟེང་དུ་བསླང་ངོ་། །དེ་ནས་རང་རང་མ་ཕྱིས་པར་འོག་ནས་ཡི་གེ་དང་མཉམ་པའི་གྲངས་ཀྱི་སྟེང་མ་སྟེང་མར་བཅུག་པས་ལོངས་ཤིང་། གང་ལོངས་པ་དེ་རྣམས་ལ་མཚན་མ་རིམ་པར་བཏབ་པས། ལོངས་པའི་འོག་ཏུ་གནས་པ་ཐུང་ངུར་འགྱུར་ཏེ། ཡི་གེ་བཞི་པ་ལ་མཚོན་ན་གནས་ལྔ་ལས། དང་པོ་ལ་བྲྀཏྟ་ཡང་བ་མེད་པ་སྟེ་ཐམས་ཅད་ལྕི་བ་གཅིག་དང་། དེ་ནས་གཅིག་ཡང་བ་བཞི་དང་། གཉིས་ཡང་བ་དྲུག་དང་། གསུམ་ཡང་བ་བཞི་དང་། བཞི་ཀ་ཡང་བ་གཅིག་སྟེ། ཡི་གེ་ལྔ་པ་སོགས་ཐམས་ཅད་ལ་དེ་ལྟར་བྱའོ། །འདི་ནི་དམར་སེར་ཅན་གྱི་ཡང་བའི་བྱ་བའོ། །དེའི་ལག་ལེན་གོ་བདེར་སྨྲས་པ། ཡི་གེ་བཞི་པ་ལ་མཚོན་ན། དང་པོ་གཅིག་ཡིག་བྲིས་པའི་སྟེང་། །གཅིག་ཡིག་བཞི་ནི་བསླང་བར་བྱ། །སྟེང་མའི་གཅིག་ཡིག་སྟེང་དུ་དོར། །ལོངས་པའི་མཚན་མ་བཏབ་སྟེ་བཞག །སླར་ཡང་རང་རང་མ་ཕྱིས་པར། །གོང་མར་བསྲེས་པས་བཞི་ལོངས་དོར། །དེ་མན་སྔར་ལྟར་བསྲེས་བྱས་པས། །དྲུག་ལོངས་སླར་ཡང་སྔར་བཞིན་བསྲེ། །དེ་ཡིས་བཞི་ལོངས་དམར་སེར་ལུགས། །གཉིས་པ་ནི། གཟུགས་བསླང་བ་སོགས་ནི་དང་པོར་མ་བྱས་ཀྱང་རུང་སྟེ། བྱས་ཀྱང་མི་འགལ་ལོ། །དེ་ལ་དང་པོ་གཅིག་ཡིག་གཅིག་བྲིས་པ་སྟེང་དུ་གཞུག་པ་སྟེ་སྟེང་དུ་བཀོད་ནས། དེའི་གནས་སུ་སྡེབ་སྦྱོར་གང་ཡིན་གྱི་ཡི་གེའི་གྲངས་བྲིའོ། །དཔེར་ན་ཡི་གེ་གཅིག་པའི་སྡེབ་སྦྱོར་ལ། ༼༡༽དེ་ནས་ཡི་གེ་གཉིས་པ་ལ་དང་པོའི་གཟུགས་སྟེང་དུ་བཀོད་ནས། དེའི་གནས་སུ་སྟེ་གཅིག་ཡིག་གཉིས་པོའི་བར་དུ་ཡི་གེའི་གྲངས་གཉིས་བྲིའོ། །༼༡༽གསུམ་པ་ལ་དང་པོའི་གཅིག་ཡིག་
འོག་ཏུ་གསུམ་བྲི་བ་སོགས་སྔར་ལྟར་བྱས་ལ། དེ་ནས་དེའི ་འོག་གི་གཉིས་ཡིག་དེ་ལ་རང་གི་འོག་གི་གཅིག་ཡིག་རང་མ་ཕྱིས་པར་བསྲེའོ། །༼༡༽དེ་བཞིན་དུ་ཡི་གེ་བཞི་པ་ལ་དང་པོའི་གཟུགས་ཀྱི་ འོག་ཏུ་ཡི་གེའི་གྲངས་བཞི་བྲིས་ལ། དེ་ནས་དེའི ་འོག་ན་གནས་པའི་གནས་གསུམ་པོ་རང་རང་གི་འོག་གི་མཉམ་པ་གསུམ་ཡིག་དང་། དེའི་འོག་གི་གཅིག་ཡིག་རྣམས་རང་མ་ཕྱིས་པར་
གོང་མ་ལ་བསྲེ་བར་བྱ་སྟེ། ༼༤༽དེས་བྲྀཏྟ་ཡང་མེད་གཅིག་ཡང་བ་སོགས་བདེ་བླག་ཏུ་རྟོགས་པའི་ཆོ་ག་འདི་ནི་ཁོ་བོ་ཤཱནྟི་པའི་ཡང་བའི་བྱ་བའོ། །དེའི་ལག་ལེན་ཡང་། དང་པོའི་གཟུགས་འོག་གཟུགས་ཉིད་བྲི། །ཡི་གེ་གཅིག་པའི་སྡེབ་སྦྱོར་ཡིན། །དེ་ནས་དང་པོའི་གཟུགས་ཀྱི་འོག །ཡི་གེའི་གྲངས་ཀྱི་གཉིས་ཡིག་བྲི། །ཡི་གེ་གཉིས་པའི་སྡེབ་སྦྱོར་ཡིན། །སླར་ཡང་དང་པོའི་གཟུགས་ཀྱི་འོག །གསུམ་བྲི་དེ་འོག་གཉིས་ཡིག་དེར། །རང་མ་ཕྱིས་པར་གཅིག་ཡིག་བསྲེ། །ཡི་གེ་གསུམ་པའི་སྡེབ་སྦྱོར་རོ། །དེ་ཡི་དང་པོའི་གཟུགས་འོག་དེར། །ཡི་གེའི་གྲངས་ཀྱི་བཞི་ཡིག་བྲི། །དེ་འོག་རང་རང་མ་ཕྱིས་པར། །གསུམ་ཡིག་འོག་མ་གོང་མ་དང་། །གཅིག་ཡིག་རང་སྟེང་གསུམ་ལ་བསྲེ། །ཡི་གེ་བཞི་པའི་སྡེབ་སྦྱོར་ཏེ། །དེ་བཞིན་ཀུན་ལ་སྦྱར་ཏེ་བརྟག །དེ་ལས་གཞན་དུ་དང་པོའི་གཟུགས། །མ་བཀོད་པར་ཡང་འདི་ལྟར་ཏེ། །ཡི་གེའི་གྲངས་བྲི་སྔ་མ་ལས། །ཕྱི་མའི་གྲངས་ཡིག་སྟེང་དུ་བཀོད། །ངོ་ཐོག་རང་གྲངས་མ་གཏོགས་པའི། །འོག་མ་སྟེང་གཞུག་དེ་ལའང་འོག །རང་མ་བསུབ་པར་རིམ་བཞིན་དུ། །ཇི་སྙེད་ཡོད་པ་དེ་སྙེད་བསྲེ། ༈ །ལྔ་པ་ནི། བྲྀཏྟ་རྣམས་ཀྱི་གྲངས་ནི་དུ་ཞེས་འདྲི་ན། དེ་ལ་བརྟག་པའི་ཐབས་གསུམ་སྟེ། གཟུགས་ཏེ་གཅིག་ཡིག་བྲིས་ནས་དེ་ཉིད་ཟུང་ཞེས་པ་གཉིས་ཀྱིས་ལན་ཡི་གེའི་གྲངས་སུ་བསྐྱར་ཏེ་བསྒྱུར་རོ། །དཔེར་ན་ཡི་གེ་བཞི་པ་ལ་མཚོན་ན། བསྒྱུར་གཞི་གཅིག་ཉིད་སྒྱུར་བྱེད་གཉིས་ཀྱིས་ལན་བཞིར་བསྐྱར་ནས་བསྒྱུར་བས། ཡི་གེ་བཞི་པ་ལ་བྲྀཏྟ་རིགས་མི་གཅིག་པ་བཅུ་དྲུག་ཡོད་པ་སྟོན་ཅིང་། དེ་བཞིན་དུ་ཡི་གེ་ཉེར་དྲུག་པ་ལ་ལན་དེ་སྙེད་དུ་བསྐྱར་ཏེ་བསྒྱུར་བས། ༼༦༧༡༠༨༨༦༤༽བྱེ་བ་དྲུག་དང་ས་ཡ་བདུན། །འབུམ་ཕྲག་གཅིག་དང་སྟོང་ཕྲག་བརྒྱད། །བརྒྱད་བརྒྱ་དྲུག་ཅུ་རྩ་བཞིའོ། །ཞེས་ཡོད་པ་གསལ་བར་སྟོན་ཏོ། །ཡང་ན་ཨུདྡིཥྚའི་ཨངྐིའི་གྲངས་ཡིག་ཐ་མ་དེ་ཉིས་འགྱུར་དུ་བྱས་པས་ཀྱང་རྟོགས་ཏེ། དཔེར་ན་ཡི་གེ་བཞི་པ་ལ་པྲསྟ་རའི་སྟེང་གི་གྲངས་ཡིག་ཐ་མ་བརྒྱད་པོ་དེ་ཉིད་གཉིས་ཀྱིས་བསྒྱུར་བས་བཅུ་དྲུག་འབྱུང་བ་བཞིན་ནོ། །ཡང་ན་དང་པོའི་གཟུགས་དང་བཅས་པའི་ཡང་བའི་
བྱ་བ་བསྡུ་བར་བྱ་སྟེ། དཔེར་ན་ཡི་གེ་བཞི་པ་ལ་མཚོན་ན། སྔར་བཤད་པའི་ཡང་བའི་བྱ་བ་གཅིག་དང་། བཞི་དང་། དྲུག་དང་། བཞི་དང་གཅིག་རྣམས་ཡོད་པ་ལ། གཅིག་ཏུ་བསྲེས་པས་བཅུ་དྲུག་འབྱུང་བའི་ཕྱིར། ༈ དེ་ནས་བྲྀཏྟ་རྣམས་ཀྱི་ཡི་གེ་ལྕི་ཡང་དང་། ཕྱི་མོ་རྣམས་དུ་ཞེས་འདྲི་ན། དེ་བརྟག་པའི་ཆོ་ག་ནི་འདི་ཡིན་ཏེ། གང་བརྟག་པར་འདོད་པའི་བྲྀཏྟའི་གྲངས་དེ་ཉིད་ཝརྞ་ཎ་སྟེ་དབྱངས་ཀྱི་ཡི་གེ་ཇི་ཙམ་ཡོད་པ་དེས་བསྒྱུར་བ་ནི་རྐང་པ་གཅིག་གི་ཡི་གེའི་གྲངས་དང་། དེ་ནས་གྲངས་ཀྱི་ཚོགས་དེ་ཕྱེད་དུ་གཏུབས་པས་ལྕི་ཡང་གི་གྲངས་དང་། དེ་ནས་ཡི་གེ་དང་ལྕི་ཡང་གི་གྲངས་གཉིས་ཀའང་གཅིག་ཏུ་བསྡོམས་པས་ཕྱི་མོ་རྣམས་སྟོན་ཏེ། དཔེར་ན། ཡི་གེ་བཞི་པ་ལ་བརྟགས་པའི་ཚེ་བྲྀཏྟ་བཅུ་དྲུག་པོ་ཡི་གེ་བཞིས་བསྒྱུར་བས་ཡི་གེ་དྲུག་ཅུ་རྩ་བཞི། དེ་གཉིས་ཀྱིས་བགོས་པས་ལྕི་ཡང་སོ་གཉིས། དེ་གཉིས་གཅིག་ཏུ་བསྲེས་པས་ཕྱི་མོ་གོ་དྲུག་སྟེ། དེ་ལྟར་རིམ་བཞིན་དང་པོ་དབྱངས་ཀྱི་ཡི་གེའི་གྲངས་དང་། དབུས་མ་ནི་ལྕི་བ་དང་ཡང་བ་སོ་སོའི་གྲངས་དང་། དེ་ནས་རྗེས་མ་ནི་ཕྱི་མོའི་གྲངས་རྣམས་སྟོན་བྱེད་ཡིན་ནོ། ༈ །དྲུག་པ་ནི་སྡེབ་སྦྱོར་འདི་ལ་པྲསྟཱ་ར་འཕྲེད་དང་འོག་ཏུ་ཇི་ཙམ་འགྲོ་ཞེ་ན། དེ་བརྟག་པའི་ཆོ་ག་ནི། པྲསྟཱ་རའི་རི་མོའི་ཚད་དང་། བར་ཐག་གཉིས་ཀ་ལ་ནས་རེའམ་སོར་རེ་ཡོད་པ་གཞིར་བྱས་ནས། ཡི་གེ་བཞི་པ་ལ་མཚོན་ན། ཡི་གེའི་གྲངས་བཞི་དང་། བྲྀཏྟའི་གྲངས་བཅུ་དྲུག་སྟེ། དེ་གཉིས་ཀ་སོ་སོར་གཉིས་ཀྱིས་བསྒྱུར་ནས་རེ་ཞིག་ཡི་གེ་ལ་བརྒྱད་དང་། བྲྀཏྟ་ལ་སོ་གཉིས་འབྱུང་། དེ་གཉིས་ཀ་ལས་གཅིག་རེ་དམན་པས་ཨ་དྷྭ་ཞེས་པ་ལམ་སྟེ། ཕར་འཕྲེད་ལ་ལྕི་ཡང་རྣམས་ཀྱི་རི་མོའི་ས་ལ་བཞི་དང་། བར་སྟོང་ལ་གསུམ་སྟེ་ནས་སམ་སོར་བདུན་དུ་འགྲོ་བ་དང་། འོག་ཏུ་ཡང་རི་མོ་ལ་བཅུ་དྲུག་དང་། བར་སྟོང་ལ་བཅོ་ལྔ་སྟེ་བསྲེས་པས་སོ་གཅིག་ཏུ་འགྲོ་ཞེས་པའོ། །མདོར་ན་ལྕི་ཡང་གི་རི་མོའི་ས་དེ་ལ་ཇི་ཙམ་ཡོད་པའི་ཚད་བར་སྟོང་ལའང་མཚུངས་ཏེ། དེའི་ཕྱིར་དཀར་ནག་ཆ་སྙོམ་པར་བྱའོ། །
དོན་བསྡུ་བ།
༈ གཉིས་པ་དོན་བསྡུ་བ་ནི། གང་པྲསྟཱར་དང་། ནཥྚ་དང་། ཨུདྡིཥྚ་དང་། ཡང་བའི་བྱ་བ་དང་། གྲངས་དང་། ཨ་དྷྭ་སྟེ། དེ་ལྟར་ངོ་མཚར་བའི་སྦྱོར་བ་དྲུག་པོ་འདི་རྣམས་ནི་རིམ་པ་ཇི་ལྟ་བ་བཞིན་དུ་མཉམ་པའི་བྲྀཏྟ་རྣམས་ལ་རྟོགས་བྱེད་ཀྱི་ཆོ་ག་རྨད་དུ་བྱུང་བར་འགྱུར་ཏེ། དེ་རྣམས་ཀྱིས་མེ་ལོང་དུ་གཟུགས་བརྙན་བཞིན་གསལ་བར་སྟོན་པ་ཡིན་པའི་ཕྱིར་རོ། །གཉིས་པ་ཐུན་མོང་གི་གྲངས་རྟོགས་བྱེད་ནི། དཔེར་ན། ཡཿཔརམཿཔརམཱརྠོཡདཁིལཔརམཱརྠགཏིཕལཾབརྟྨེ། ཏཛྫནིཏོཡཤྩཛནོཛཡནྟིཏེབུདྡྷདྷརྨགཎཿགང་ཞིག་མཆོག་དང་གང་ཞིག་དམ་པའི་དོན། །མ་ལུས་དོན་དམ་ལམ་འབྲས་རྟོགས་གྱུར་ཅིག །སྐྱེ་བོ་གང་ཡང་དེར་ནི་སྐྱེད་མཛད་པ། །སངས་རྒྱས་ཆོས་ཚོགས་དེ་རྣམས་རྒྱལ་གྱུར་ཅིག །ཛཡཏིཛིནོདྷརྨཱམོཛཡཏིཔྲཛྙཱཙསཧཙརཱིཏསྱ། ཨུབྷཡཱདྷིམུཀྟིབཱིཛཔྲསབཏནུརྫཡཏིཙཱརྱགཎཿརྒྱལ་ཆོས་ནད་ལས་རྒྱལ་བ་རྒྱལ་གྱུར་ཅིག །དེ་ཡི་ལྷན་ཅིག་སྤྱོད་མ་ཤེས་རབ་ཀྱང་། །གཉིས་ལ་ལྷག་མོས་ས་བོན་ལས་བྱུང་བ། །ལུས་ཅན་འཕགས་པའི་ཚོགས་རྣམས་རྒྱལ་གྱུར་ཅིག །ཞེས་པ་ཚིགས་སུ་བཅད་པ་གཉིས་པོ་འདི་དག་ལྟ་བུ་སྟེ། དེའང་ཤློ་ཀ་གཉིས་ཀ་ལ་འདིར། ཕྱི་མོ་ལྔ་བཅུ་རྩ་བདུན། ཡི་གེ་བཞི་བཅུ། ལྕི་བ་བཅུ་བདུན། ཡང་བ་ཉི་ཤུ་རྩ་གསུམ་མོ། །དེ་ནས་གྲངས་གཉིས་གཉིས་ཀྱི་བྱ་བའི་འབྲས་བུ་ཅིག་ཤོས་རྣམས་སྟོན་ཏེ། ཇི་ལྟར་ན་ལྕི་བ་དང་། ཡང་བ་དང་། ཡི་གེ་དང་། ཕྱི་མོ་དང་། དེ་རེ་རེ་ལའང་རྟོགས་བྱེད་གསུམ་གསུམ་སྟེ་བཅུ་གཉིས་ལས། ༈ དང་པོ་ལྕི་བ་རྟོགས་བྱེད་ཀྱི་ཆོ་ག་གསུམ་ནི། ཡང་བ་ཉེར་གསུམ་རྣམས་ཀྱིས་ཡི་གེ་བཞི་བཅུའི་སྟེང་ནས་དོར་བ་སྟེ་ཕྲི་བས་བཅུ་བདུན། ཕྱི་མོའི་གྲངས་ང་བདུན་ལས་ཡང་བ་ཉེར་གསུམ་དོར་ལྷག་སོ་བཞི་ལ་འདབ་མ་སྟེ་ཕྱེད་དུ་གཏུབས་པས་ཀྱང་བཅུ་བདུན། ཕྱི་མོ་ང་བདུན་ལས་ཡི་གེ་བཞི་བཅུས་དོར་བའི་ལྷག་མའང་བཅུ་བདུན་ཏེ་བྱ་བ་གསུམ་པོ་དེ་རྣམས་ཀྱི་འབྲས་བུས་གྲངས་ཇི་སྙེད་ལུས་པ་ནི། འདིར་ལྕི་བའི་གྲངས་སོ། ༈ །གཉིས་པ་ཡང་བའི་རྟོགས་བྱེད་གསུམ་ནི། ལྕི་བ་བཅུ་བདུན་པོ་ཉིས་འགྱུར་སོ་བཞིས་ཕྱི་མོ་ང་བདུན་ལ་ཕྲི་བས་ཀྱང་
ཉེར་གསུམ། ཡི་གེ་བཞི་བཅུ་པོ་ཉིས་འགྱུར་བརྒྱད་ཅུ་ལ་ཕྱི་མོ་ང་བདུན་གྱིས་སྤངས་པས་ཀྱང་ཉེར་གསུམ། ཡི་གེ་བཞི་བཅུའི་སྟེང་ནས་ལྕི་བ་བཅུ་བདུན་ཕྲལ་བས་ཀྱང་ཉེར་གསུམ་རྣམས་ཏེ། དེ་རྣམས་ཇི་སྙེད་འདིར་ཡང་བའི་གྲངས་སོ། ༈ །གསུམ་པ་ཡི་གེ་རྟོགས་བྱེད་གསུམ་ནི། ལྕི་བ་བཅུ་བདུན་དང་ཡང་བ་ཉེར་གསུམ་བསྡོམས་པ་ཇི་སྙེད་པ་དེ་ལའང་བཞི་བཅུ། ཕྱི་མོ་ང་བདུན་ལས་ལྕི་བ་བཅུ་བདུན་ཕྲལ་ནའང་བཞི་བཅུ་པོ་ཇི་སྙེད་དོ། །ཇི་སྙེད་པའི་ཕྱི་མོ་ང་བདུན་དང་། ཡང་བ་ཉེར་གསུམ་བསྡོམས་པའི་བརྒྱད་ཅུ་ལ་འདབ་མ་བྱས་པས་ཀྱང་བཞི་བཅུ་སྟེ། དེ་སྙེད་འདིར་ནི་དབྱངས་ཀྱི་ཡི་གེའི་གྲངས་རྣམས་སོ། ༈ །བཞི་པ་ཕྱི་མོ་རྟོགས་བྱེད་གསུམ་ནི། ལྕི་བ་བཅུ་བདུན་ཉིས་འགྱུར་དུ་བྱས་པའི་སོ་བཞི་ལ། ཡང་བ་ཉེར་གསུམ་བསྲེས་པས་ང་བདུན། ཡི་གེ་བཞི་བཅུ་པོ་ཉིས་འགྱུར་བརྒྱད་ཅུ་ལས་ཡང་བ་ཉེར་གསུམ་རྣམས་དོར་བས་ཀྱང་ང་བདུན། ལྕི་བ་བཅུ་བདུན་པོ་ཡི་གེ་བཞི་བཅུ་ལ་བསྲེས་པའི་ཚོགས་རྣམས་ལའང་ང་བདུན་ཏེ། དེ་རྣམས་ཇི་སྙེད་འདིར་ཕྱི་མོ་རྣམས་ཀྱི་གྲངས་སོ། །ངོ་མཚར་སྦྱོར་བ་བདུན་བཤད་ཟིན་ཏོ། །
དེ་ཐོབ་དགེ་བ་བསྔོ་བ།
༈ གསུམ་པ་དེ་ཐོབ་དགེ་བ་བསྔོ་བ་ནི། རྒྱལ་བའི་རིག་པ་ནི་སྡེབ་སྦྱོར་གྱི་རིག་པའོ། །ཅིའི་ཕྱིར་དེ་དག་དམར་སེར་སོགས་ཀྱིས་དང་པོར་བྱས་ཟིན་པ་མ་ཡིན་ནམ་ཞེ་ན། དེས་བྱས་པའང་སངས་རྒྱས་ཀྱི་མཐུ་ཡིན་པས་མི་འགལ་ཏེ། འཇིག་རྟེན་གྱི་ཡོན་ཏན་ཐམས་ཅད་ཀྱང་སངས་རྒྱས་ཀྱི་མཐུ་ཁོ་ནར་ངེས་པའི་ཕྱིར། རྣམ་པ་གཅིག་ཏུ་ན། གང་ཀུན་མཁྱེན་རྒྱལ་བའི་གོ་འཕང་ལ་བགྲོད་པར་བྱེད་པའི་ཐབས་སུ་གྱུར་པའི་ཕྱིར་རྒྱལ་བའི་རིག་པ་སྟེ། རྒྱལ་ཚབ་མ་ཕམ་པས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །ཞེས་དང་། མགོན་པོ་ཀླུ་སྒྲུབ་ཀྱིས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་འགྱུར། །ཞེས་སོ། །དེ་ཡང་འཕགས་ཡུལ་ན་གསུང་རབ་ཕལ་མོ་ཆེ་ཞིག་ལེགས་པར་སྦྱར་བའི་སྐད་དང་། ཁྱད་པར་ཚིགས་སུ་
བཅད་པ་རྣམས་སྡེབ་སྦྱོར་གྱིས་ཀྱང་འཆིང་དགོས་པས་ན། དེ་དག་དཔྱིས་ཕྱིན་པར་གོ་བ་འདི་ལ་ལྟོས་དགོས་པའི་ཕྱིར་ཏེ། མེ་ཏོག་ཆུན་པོ་ལས། དེ་འདྲའི་སྡེབ་སྦྱོར་ལེགས་རྟོགས་ནས། །ཚིགས་བཅད་རྣམས་ལ་འཇུག་པ་ཡིན། །འདི་ལ་རྒྱན་གཞན་སྦྱོར་ཤེས་ན། །མཁས་པ་རྣམས་ཀྱི་ཡིད་འཕྲོག་བྱེད། །ཅེས་དང་། སྙན་ངག་མེ་ལོང་ལས། རིག་དེ་སྙན་ངག་རྒྱ་མཚོ་ནི། །ཟབ་མོ་བརྒལ་འདོད་རྣམས་ཀྱི་གྲུ། །ཞེས་གསུངས་པའི་ཕྱིར། དེ་བས་ན་འདི་རྩོམ་པ་ལ་ཤཱནྟི་པ་བདག་ཤིན་ཏུ་དད་པའི་སྒོ་ནས། བསྟན་བཅོས་བརྩམས་པའི་བསོད་ནམས་གང་ཞིག་བདག་ལ་རབ་ཏུ་སྐྱེས་པའི་མཐུ་དེ་ཡིས། འགྲོ་བ་ཀུན་གྱིས་དོན་དམ་པའི་གནས་ལུགས་ཇི་ལྟ་བ་བཞིན་དུ་རྟོགས་པ་དང་། གནས་སྐབས་སུའང་ཐུན་མོང་རིག་པའི་གནས་རྣམས་དང་། དེ་ལས་ཀྱང་མཆོག་ནང་རིག་པ་ལ་རབ་ཏུ་དད་པས་འཇུག་ཅིང་ཞུགས་ནས་ཀྱང་ཐམས་ཅད་མཁྱེན་པའི་གོ་འཕང་ཐོབ་པར་གྱུར་ཅིག་པའོ། །གསུམ་པ་མཇུག་གི་དོན་ལ། མཛད་པ་པོའི་སློབ་དཔོན་དང་། སྒྱུར་བྱེད་ལོ་ཙཱ་བའི་མཚན་སྨོས་པ་གཉིས་ལས། དང་པོ་ནི། བསྟན་བཅོས་འདི་ནི་མཁས་པ་སྒོ་དྲུག་ལས་ཤར་སྒོ་སྲུང་བ་པོ། རྩོད་པའི་དུས་ཀྱི་ཐམས་ཅད་མཁྱེན་པ་རཏྣ་ཨཱ་ཀ་ར་ཤཱནྟི་སྟེ་རིན་ཆེན་འབྱུང་གནས་ཞི་བའི་ཞལ་སྔ་ནས་མཛད་པའོ། །གཉིས་པ་ནི། ཆོས་ལྡན་ར་ས་དང་། ཡར་ཀླུང་པ་གྲགས་པ་རྒྱལ་མཚན་གྱིས་རྩ་བ་རང་འགྲེལ་དང་བཅས་པ་བསྒྱུར་བ་ལ། སླད་ཀྱི་ལོ་ཙཱ་བ་ཆེན་པོ་བྱང་ཆུབ་རྩེ་མོ་དང་། སྟག་ལུང་ལོ་ཙཱ་བ་ནམ་མཁའ་བཟང་པོ་གཉིས་ཀྱིས་འགྱུར་བཅོས་ལེགས་པར་མཛད་ཅིང་། སླར་ཡང་འགོས་ལོ་ཙཱ་བ་ཆེན་པོ་དྷརྨ་པ་ལ་བྷ་དྲས་རྩ་བ་ལས་འགྱུར་བཅོས་མཛད་པ་རྣམས་མཐོང་བ་ལས། འདིར་ནི་འགྱུར་ཕྱི་མ་ཉིད་ལ་གཙོ་བོར་བརྟེན་ཏེ་བཤད་པ་ཡིན་ནོ། །སྨྲས་པ། སློབ་དཔོན་ཉིད་ཀྱི་རང་འགྲེལ་ལ་བརྟེན་ནས། །སྡེབ་སྦྱོར་རིན་ཆེན་འབྱུང་གནས་གཞུང་གི་དོན། །རབ་གསལ་འགྲེལ་པ་མེ་ལོང་ལྟ་བུ་འདི། །སྨྱོས་ཀྱི་བན་ཆུང་དྷརྨཱ་ཤྲཱིས་སྦྱར། །སྦྱངས་དང་རང་བཞིན་བློ་གྲོས་མཐུ་ཆུང་ཞིང་། །སྣ་ཚོགས་ཡི་གེར་མ་བལྟས་
ཐོག་མའི་ངག །སཾ་ཊར་བརྟེན་སོགས་ཉིས་བྲིས་མ་ཁོམ་པས། །འགལ་གྱུར་སྲིད་མོད་མཁས་ལ་བཟོད་པར་གསོལ། །བཤེས་གཉེན་མཁས་པའི་གསུང་དང་གཞུང་བཟང་ལ། །བརྟེན་ནས་ལེགས་བཤད་གང་མཆིས་དགེ་བ་དེས། །འགྲོ་ཀུན་རིག་པ་མཆོག་གི་ལམ་ཞུགས་ནས། །ཀུན་མཁྱེན་རྒྱལ་བའི་གོ་འཕང་ཐོབ་པར་ཤོག །ཅེས་སྡེབ་སྦྱོར་རིན་ཆེན་འབྱུང་གནས་ཀྱི་འགྲེལ་པ་དོན་གསལ་མེ་ལོང་ཞེས་བྱ་བ་འདི་ནི་མཚན་བརྗོད་པར་དཀའ་བ་རྗེ་བཙུན་ཐམས་ཅད་མཁྱེན་པ་གཏེར་ཆེན་ཆོས་ཀྱི་རྒྱལ་པོའི་བཀའ་དྲིན་གྱིས་འཚོ་བ་བན་ཆུང་ངག་དབང་ཆོས་དཔལ་གྱིས་རང་གི་དྲན་གསོ་དང་། བློ་དམན་འགའ་ལ་ཕན་པའི་ཕྱིར་ཨོ་རྒྱན་སྨིན་གྲོལ་གླིང་གི་ཆོས་གྲྭར་སུག་བྲིས་སུ་སྦྱར་བའོ། །སརྦ་དཱ་ཀ་ལྱཱ་ཎཾ་བྷ་ཝ་ཏུ།། ༈ །།ལེགས་བཤད་ནོར་བུ་ཇི་སྙེད་འདྲེན་པའི་ཀླུང་། །སྙན་ངག་རྒྱ་མཚོའི་འཇིངས་ལས་བརྒལ་བའི་གྲུ། །སྡེབ་ལེགས་སྦྱོར་བའི་གཞུང་བཟང་རིན་པོ་ཆེའི། །འབྱུང་གནས་ཟླ་མེད་སློབ་དཔོན་ཞི་བའི་གསུང་། །གང་དེ་འགྲེལ་ལ་ཕུལ་བྱུང་རྣམ་དཔྱོད་ཀྱིས། །མཁས་རྣམས་དགྱེས་པའི་ངོ་མཚར་འཆར་བཟོད་པ། །བརྗོད་དོན་རབ་གསལ་མེ་ལོང་དག་པ་འདི། །ལྔ་རིག་སྨྲ་རྣམས་ཡིད་འོང་ལྟད་མོའི་ཡུལ། །བསྟན་པའི་ས་ཆེན་རིས་སུ་མི་བཅད་པས། །མཆོག་གི་གོ་འཕང་བརྙེས་པ་མཁྱེན་བརྩེའི་རྗེས། །ཆོས་རྒྱལ་སྡེ་དགེའི་ཆོས་མཛོད་ཆེན་མོ་རུ། །རིག་གཞུང་མཐའ་དག་རྫོགས་པའི་ཡན་ལག་ཏུ། །སྤར་དུ་དགོད་བཞེད་དགོངས་པའི་ཆ་འདི་ལྟའང་། །གུས་པས་བླངས་པའི་བསོད་ནམས་གང་སྐྱེས་པ། །དེས་ཀྱང་སྐྱེ་བར་རྗེས་སུ་འཛིན་པ་དང་། །ཡོངས་རྫོགས་བསྟན་པ་ཕྱོགས་མཐར་རྒྱས་གྱུར་ཅིག །མངྒ་ལཾ་བྷ་བནྟུ།། །།