ཀུན་མཁྱེན་གོ་རམས་པའི་ལུགས་ལ་ཐལ་རང་གི་ཁྱད་པ།
ཀུན་མཁྱེན་གོ་རམས་པའི་ལུགས་ལ་ཐལ་རང་གི་ཁྱད་པར་ནི།
དབུ་མ་ལྟ་བ་ངན་སེལ་ལས། དེས་ན་འདི་གཉིས་ཀྱི་ཁྱད་པར་གཙོ་བོ་ནི་དོན་དམ་སྒྲུབ་བྱེད་ཀྱི་རིགས་པ་བཀོད་ཚུལ་གྱི་སྒོ་ནས་འཇོག་སྟེ། ཀླུ་སྒྲུབ་ཀྱིས་མཐའ་བཞིའི་སྐྱེ་བ་བཀག་པའི་དམ་བཅའ་གསུངས་པ་སངས་རྒྱས་བསྐྱངས་ཀྱིས་ཐལ་འགྱུར་གྱི་རིགས་པས་བསྒྲུབ། ལེགས་ལྡན་འབྱེད་ཀྱིས་རང་རྒྱུད་ཀྱི་རིགས་པས་བསྒྲུབ་པ་ལ་ཐལ་རང་གཉིས་སུ་ཕྱེ་བའི་ཕྱིར་རོ། །དེ་ལྟར་བཤད་ན་དོན་དམ་སྒྲུབ་བྱེད་ཀྱི་རིགས་པའི་ཁྱད་པར་དང༌། ཐ་སྙད་ཀུན་རྫོབ་འཇོག་ཚུལ་གྱི་ཁྱད་པར་གཉིས་ལས། དང་པོ་ལ་ཆོས་ཅན། ཆོས་དང༌། དམ་བཅའ་དང༌། གཏན་ཚིགས་དང༌།དཔེ་དང༌། སྦྱོར་ངག་གི་ཁྱད་པར་དང་དྲུག་ལས། ཞེས་པ་ནས། གཉིས་པ་ནི། རང་རྒྱུད་པས་དགག་བྱ་ལ་དོན་དམ་གྱི་ཁྱད་པར་སྦྱར་ནས་དོན་དམ་པར་བདག་ལས་སྐྱེ་བ་མེད་པ་སོགས་བཞི་བསྒྲུབ་བྱའི་ཆོས་སུ་འདོད་ལ། ཐལ་འགྱུར་བས་དེ་བཀག་ནས་མཐའ་བཞི་སྐྱེ་བ་ནི་ཐ་སྙད་དུ་ཁས་མི་ལེན་པས་དོན་དམ་གྱི་ཁྱད་པར་སྦྱར་མི་དགོས་ཤིང༌། སྐྱེ་བ་ཙམ་བཀག་ན་ཡང་མཐར་ཐུག་དཔྱོད་པས་རིག་ངོར་ཡིན་པས་དོན་དམ་གྱི་ཁྱད་པར་སྦྱར་མི་དགོས་པར་བཞེད་དོ། །ཞེས་སོགས་ཁྱད་པར་དྲུག་གིས་གསུངས་པ་དང༌། ལྟ་བ་ཤན་འབྱེད་ལས། གནས་ལུགས་དཔྱད་བྱའི་ཆོས་ཉིད་ནི། །སྣང་དང་མི་སྣང་འདོད་པའི་བྱེ་བྲག་གིས། །ཐལ་རང་གཉིས་ཀྱི་ཁྱད་པར་བྱུང་བ་ལ། །ཞེས་གསུངས་སོ། །དེ་ལ་སྐྱེ་བ་བཀག་དགོས་མིན་དང༌། སྣང་མི་སྣང་གིས་འཇོག་པའི་ཁུངས་ཐལ་རང་གི་གཞུང་རྣམ་དག་ཡོད་མེད་སོགས་དཔྱད་པར་ཞུ། གོ་རམས་པའི་ཐལ་རང་གཉིས་ཀྱི་ཁྱད་པར་ལྟ་བ་མི་འདྲ་བས་མི་འཇོག་སྟེ། དབུ་མ་ལྟ་བ་ངན་སེལ་ལས། དེས་ན་སྒྲོ་སྐུར་དང་བྲལ་བའི་ཐལ་རང་གྱི་ཁྱད་པར་ནི་དོན་དམ་ལྟ་བའི་སྒོ་ནས་མི་ཕྱེ་སྟེ། ཞེས་སོགས་གསུངས་སོ། །རང་རྒྱུད་པའི་གཞུང་ན་རང་མཚན་དང་རྫས་ཡོད་འདོད་པ་དང་དགག་བྱའི་ཁྱད་པར་སྦྱར་དགོས་པའི་རྒྱུ་མཚན་སོགས་ཀྱིས་དཔྱད་རྒྱུ་ཡོད་དོ། །