བཞི་པ་སྡོམ་པའི་གྲངས་དང་གཙོ་འཁོར་གཏན་ལ་དབབ་པ།
བཞི་པ་སྡོམ་པའི་གྲངས་དང་གཙོ་འཁོར་གཏན་ལ་དབབ་པ་ནི།
འོ་ན་སྡོམ་པའི་གཟུགས་གྲངས་ཇི་སྙེད་ཡོད་ཅེ་ན། ཁ་ཅིག་ན་རེ་དགེ་སློང་གི་སྡོམ་པའི་གཟུགས་དཔག་ཏུ་མེད་དེ། སྤང་བྱ་དཔག་ཏུ་མེད་པའི་ཕྱིར་རོ་ཞེས་འཆད་དེ། དྲིན་ལན་བསབ་པའི་མདོ་ལས་ཀྱང༌།དགེ་སློང་གི་སྡོམ་པའི་གཟུགས་དཔག་མེད་དུ་གསུངས་སོ། །འོན་ཀྱང་དེ་ངེས་དོན་དུ་མི་གཟུང་སྟེ། རང་བཞིན་གྱི་ཁ་ན་མ་ཐོ་བ་སྤོང་བའི་སྡོམ་པའི་གཟུགས་བདུན་དུ་གསུངས་པ་རྣམས་ངེས་པར་གཟུང་ངོ༌། །དེ་ཡང་མཛོད་འགྲེལ་ལས། སོ་སོ་ཐར་པའི་སྡོམ་པ་ནི་འབྱུང་བ་གཞན་དང་གཞན་དག་རྒྱུར་བྱས་ནས་རྣམ་པར་རིག་བྱེད་མ་ཡིན་པ་བདུན་སྐྱེའོ། །ཞེས་དང༌། ཊཱི་ཀ་ལས། ཚུལ་ཁྲིམས་ཞེས་བྱ་བ་ནི་སྤོང་བ་བདུན་འཁོར་དང་བཅས་པ་སྟེ། ཞེས་དང༌། འོད་ལྡན་ལས། ཡིད་ཀྱི་ལ་ནི་སོ་སོ་ཐར་པའི་སྡོམ་པ་ཉིད་མེད་པའི་ཕྱིར་སོ་སོ་ཐར་པའི་སྡོམ་པ་ནི་སྤོང་བ་བདུན་གྱི་མཚན་ཉིད་ཅན་ཡིན་ཏེ། ལུས་ཀྱི་རྣམ་པ་གསུམ་དང་ངག་གི་རྣམ་པ་བཞི་ཞེས་བྱ་བར་ངེས་པའི་ཕྱིར། ཞེས་དང༌། དེ་ཉིད་ལས། དགེ་སློང་དང་དགེ་སློང་མའི་སྡོམ་པ་ནི་སྤོང་བ་བདུན་གྱི་མཚན་ཉིད་ཅན་ཡིན་ལ། དགེ་ཚུལ་ལ་སོགས་པ་དག་གི་སྡོམ་པ་ནི་སྤོང་བ་བཞིའི་མཚན་ཉིད་ཅན་ཡིན།ཞེས་སོ། །སྤོང་བ་བཞི་ནི། རྩ་བ་བཞིའི་ཉེས་པ་སྤོང་བའོ། །ཕྲ་མ་ཚིག་རྩུབ་ངག་འཁྱལ་དང་གསུམ་ནི་དགེ་ཚུལ་ལ་སོགས་པ་གསུམ་གྱིས་སྤོང་བར་དངོས་སུ་ཁས་མ་བླངས་ཏེ། དེ་གསུམ་སྤོང་བར་ཁས་ལེན་པའི་ཚིག་ནི་ཆོ་ག་ལས་མ་གསུངས་པའི་ཕྱིར་རོ། །དེ་གསུམ་སྤོང་བའི་སྡོམ་པ་དངོས་སུ་ཁས་མ་བླངས་ཀྱང༌། བླངས་པའི་ཕྱོགས་དང་མཐུན་པ་ཡིན་པས། དེ་དག་ལས་འདས་ན་ཡིད་ཀྱི་བསྡམ་བྱའི་ཉེས་བྱས་སུ་འགྱུར་བའོ། །འོ་ན་སྤོང་བ་བདུན་འཁོར་དང་བཅས་ཞེས་གསུངས་ན་གཙོ་བོ་ནི་གང༌། འཁོར་ནི་གང་ཞེ་ན། རང་བཞིན་གྱི་ཁ་ན་མ་ཐོ་བ་ལུས་ངག་གི་བདུན་པོ་སྤོང་བ་ནི་གཙོ་བོ་ཡིན་ལ། ཆང་འཐུང་བ་ལ་སོགས་པ་བཅས་པའི་ཁ་ན་མ་ཐོ་བ་སྤོང་བ་ཐམས་ཅད་འཁོར་ཡིན་ཏེ། གཙོ་བོ་ཤིང་ཐོག་ཨ་མྲ་ལྟ་བུ་དང༌། འཁོར་སྨྱུག་ཚལ་གྱི་ར་བ་ལྟ་བུ་སྟེ། འདུལ་བ་ལ་བསྟོད་པ་ལས། གང་གིས་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་འཐོབ། །སྨྱུག་ཚལ་བྲེགས་པས་ཨ་མྲའི་ཚལ་ཉམས་བཞིན། །ཞེས་དང༌། རྣམ་འབྱེད་འགྲེལ་པ་ལས། རང་བཞིན་གྱི་ཁ་ན་མ་ཐོ་བ་དང་བཅས་པ་ཨ་མྲའི་ཚལ་ལྟ་བུ། བཅས་པའི་ཁ་ན་མ་ཐོ་བ་དང་བཅས་པ་སྨྱུག་མའི་ཚལ་ཞེས་པ་ལྟ་བུ། ཞེས་གསུངས་པའི་ཕྱིར་རོ། །
དགུ་པ་སོ་སོར་ཐར་པའི་སྡོམ་པའི་གནས་ཚུལ་ལ་གསུམ་ལས། དང་པོ་གཞན་ལུགས་དགག་པ་ནི། ཁ་ཅིག་ན་རེ། དགེ་བསྙེན་དགེ་ཚུལ་དགེ་སློང་གི་སྡོམ་པ་གསུམ་རིམ་གྱིས་བླངས་ན་སྡོམ་པ་སྔ་མ་ལས་ཕྱི་མར་གནས་གྱུར་པ་སྟེ་ན་ཚོད་ཀྱི་གནས་སྐབས་གསུམ་བཞིན་ནོ། །དེ་དང་མཐུན་པར་ལུང་ཞུ་བའི་འགྲེལ་པ་ལས། གཞོན་ནུ་དང་དར་ལ་བབ་པ་དང་རྒན་པོ་ཉིད་བཞིན་དུ་རབ་ཏུ་བྱུང་བ་བསྙེན་པར་མ་རྫོགས་པ་ཉིད་དང༌། བསྙེན་པར་རྫོགས་པའི་གནས་སྐབས་རྣམས་ནི་རྟེན་ཐ་དད་པར་བྱེད་པ་ཉིད་མ་ཡིན། ཞེས་གསུངས་པའི་ཕྱིར་ཞེ་ན། གཞུང་དེ་ནི་རྟེན་གང་ཟག་གི་རྒྱུད་ཐ་དད་པ་མ་ཡིན་ཞེས་བསྟན་པ་ཡིན་ཏེ་གཞན་དུ་ན་མཛོད་འགྲེལ་ལས། དེ་ལྟར་མ་ཡིན་ན་དགེ་སློང་གི་བསླབ་པ་ཕུལ་བས་སྡོམ་པ་གསུམ་ཆར་གཏོང་བར་འགྱུར་བ་ཞིག་ན་དེ་ནི་མི་འདོད་དོ། །དེ་ལྟ་བས་ན་སྡོམ་པ་དེ་དག་ནི་ཐ་དད་པ་ཁོ་ནའོ། །ཞེས་གསུངས་པ་དང་འགལ་ལོ། །