ལྔ་པ་ལྷ་མོའི་མཆོད་པ་ལྔ་འབུལ་བ།
ལྔ་པ་ལྷ་མོའི་མཆོད་པ་ལྔ་འབུལ་བ་ནི།
རྒྱལ་བ་རྣམས་ཀྱི་འདོད་འབྱུང་ལྷ་མོའི་ཚུལ། །གཟུགས་སྒྲ་དྲི་རོ་རེག་བྱའི་བདེ་སྟེར་མ། །མེ་ལོང་པི་ཝང་སྤོས་ཁང་བཟའ་བཏུང་སྣོད། །རས་ཕྲན་བཟང་དང་པདྨ་བྷཉྫ་ནཾ། །ཅང་ཏེའུ་སྒྲ་སྒྲོག་ཁ་ཊཱཾ་ལ་བསྟེན་མ། །དཀར་སྔོ་སེར་དང་དམར་དང་ལྗང་བའི་གཟུགས། །གཟུགས་མཛེས་དབྱངས་སྙན་དྲི་དང་བཅུད་ལྡན་མ། །བདེ་ལྡན་ལང་ཚོས་དྲེགས་པའི་སྨིན་ལེགས་མ། །ནམ་མཁའ་གང་བའི་བླ་མ་ལྷ་ཚོགས་མཆོད། །རྡོ་རྗེ་གུར་གྱི་རྒྱུད་ལས། རྒྱལ་བ་རྣམས་ཀྱི་འདོད་འབྱུང་ཞེས་གསུངས་པ་ལྟར་བདུད་བཞི་ལསརྒྱལ་བ་རྣམས་ཀྱི་སློབ་ལམ་གྱི་སྐབས་སུ་འདོད་དགུ་མ་ལུས་པ་འབྱུང་བའི་ཏིང་ངེ་འཛིན་ལ་མངའ་བརྙེས་པ་མཛད་པའི་འབྲས་བུ་ཡུལ་ལྔ་གཟུགས་སྒྲ་དྲི་རོ་རེག་བྱ་དག་པ་ལྷ་མོ་ལྔའི་ཚུལ་དུ་ཤར་བའི་གཟུགས་ལྷ་མོ་དཀར་མོ་ཞལ་གཅིག་ཕྱག་བཞི་མ་ཕྱག་དང་པོ་གཉིས་ཐུགས་ཀར་མེ་ལོང་འཛིན་པ། ཐ་མ་གཉིས་པདྨ་བྷཉྫ་ནཾ་ཞེས་པ་ཐོད་པ་བདུད་རྩིའི་གང་བ་དང་ཆོས་ཉིད་ཀྱི་སྒྲ་སྒྲོག་པའི་ཅངཏེའུ་དང་མཆན་ཁུང་དུ་རྡོ་རྗེ་མཚན་པའི་ཁ་ཊཱཾ་ལ་བསྟེན་པ་སྟེ་འཛིན་པའོ། །སྒྲས་ལྷ་མོ་སྐུ་མདོག་སྔོན་མོ་ཕྱག་གཉིས་ཀྱི་པི་ཝང་དང་ཅང་ཏིའུ་དང་ཁ་ཌཾ་འཛིན་པ་གོང་བཞིན་ནོ། །དྲིའི་ལྷ་མོ་སེར་མོ་ཕྱག་དང་པོ་གཉིས་ཨ་དཀར་སོགས་སྤོས་ཁང་ངམ་དྲིའི་དུང་ཆོས་འཛིན་པ་ཐ་མ་གཉིས་གོང་ལྟར་རོ། །རོ་ཡི་ལྷ་མོ་དམར་མོ་བཟའ་བཏུང་གི་སྣོད་དང་བཅས་པ་བཟུང་ཞིང་ཐ་མ་གཉིས་གོང་དང་འདྲ། རེག་བྱའི་ལྷ་མོ་ལྗང་ཁུ་རས་ཕྲན་གོས་བཟང་པོ་འཛིན་པ་ཐམས་ཅད་ཀྱང་ཞལ་གཅིགཕྱག་བཞི་སོགས་གོང་བཞིན་ནོ། །གཟུགས་ཀྱི་ལྷ་མོ་གཟུགས་མཛེས་པ། སྒྲའི་ལྷ་མོ་དབྱངས་སྙནཔ། དྲིའི་ལྷ་མོ་དྲི་བཟང་གི་ངད་དང་ལྡན་པ། རོའི་ལྷ་མོ་ཁ་ནས་སྦྲང་རྩིའི་བཅུད་ཀྱི་རོ་དང་ལྡན་མ།རེག་བྱའི་ལྷ་མོ་ལུས་ལ་རེག་པ་ཙམ་གྱིས་བདེ་བ་དང་ལྡན་པ་ལང་ཚོ་རྒྱས་ཤིང་ནུ་མ་འབུར་བ་བྷ་ག་ནས་དྲི་བཟང་གིས་ཁྱབ་པ་ཆགས་པའི་ཟུར་མིག་གཡོ་བ་དྲེགས་པའི་སྨིན་མ་ལེགས་མ་སོགས་ཡིད་དུ་འོང་བའི་ཡོན་ཏན་དུ་མ་དང་ལྡན་པ་ནམ་མཁའ་གང་བར་སྤྲུལ་ནས་བླ་མ་དང་དཀྱིལ་འཁོར་གྱི་ལྷ་ཚོགས་ལ་མཆོད་ཅེས་པའོ། །