ཐུན་གྱི་སྔོན་འགྲོས་བློ་སྦྱོང་བ།
གཉིས་པ་ཐུན་གྱི་སྔོན་འགྲོས་བློ་སྦྱང་བ་ནི། བདེ་བའི་སྟན་ལ་ལུས་དལ་ཞིང་། སེམས་ཁོང་ལྷོད་པ་ལ་སོགས་པ་ཚུལ་སྔ་མ་རྣམས་འདྲ་བ་ལ། དངོས་གཞི་ནི། བློ་ཆོས་སུ་འགྲོ་བའི་ཐབས་རྣམས་ཀྱིས་རང་རྒྱུད་ལས་སུ་རུང་བར་བྱས་རྗེས། ཐར་བའི་ཕན་ཡོན་གྱིས་བྲོད་པ་བསྐྱེད་དེ། ཐར་བའི་ལམ་ལ་ཐོག་མའི་འཇུག་སྒོ་ཐེག་པ་རྣམས་ཀྱི་རྐང་རྟེན། དོན་དུ་གཉེར་བའི་གཞི་མ་སྐྱབས་འགྲོའི་སྒོ་ནས་ཉམས་སུ་ལེན་པར་བྱེད་པ་སྟེ། དེ་ཡང་འོལ་སྤྱི་ཙམ་དུ་ལུས་པར་མི་བྱ་ལ། གནད་དུ་ཐེང་ངེས་པས་རྟེན་ཚོགས་ཞིང་གསལ་འདེབས་དང་། བརྟེན་པ་སྐྱབས་འགྲོའི་རིམ་པ་གཉིས་ཐུན་དུ་བཅད་པ་ལེགས་པར་བསྒོམ་སྟེ། མཐར་དགེ་བ་གཞན་དོན་དུ་བསྔོ་བར་བྱའོ། །དེ་ལྟར་སྐྱབས་སུ་སོང་བའི་བསླབ་བྱ་ལ། དགག་པའི་བསླབ་བྱ་གསུམ། སྒྲུབ་པའི་བསླབ་བྱ་གསུམ། ཆ་མཐུན་གྱི་བསླབ་བྱ་ལྔ་རྣམས་སུ་གསུངས་པས་ན། དང་པོ་གསུམ་ནི། སངས་རྒྱས་ལ་སྐྱབས་སུ་སོང་ནས་བཟུང་འཁོར་བ་ན་གནས་པའི་ལྷ་ཉི་ཚེ་བ་ལ་སྐྱབས་སུ་མི་བརྟེན། ཆོས་ལ་སྐྱབས་སུ་སོང་ནས་བཟུང་ལས་དང་ལས་ཀྱི་འབྲས་བུ་ལ་ཡིད་ཆེས་པས་གཞན་སེམས་ཅན་ལ་གནོད་འཚེ་མི་བྱེད། དགེ་འདུན་ལ་སྐྱབས་སུ་སོང་ནས་བཟུང་མི་དགེ་བའི་བཤེས་གཉེན་ནམ་སྡིག་པར་ལྟ་བ་ཅན་དང་མི་འགྲོགས། གཉིས་པ་ལ་གསུམ་ནི་སངས་རྒྱས་ཀྱི་སྐུ་གཟུགས་ལུགས་སུ་བླུགས་པ། རི་མོར་བྲིས་པ། འབུར་དུ་དོད་པ་གང་ཡང་རུང་། ཐ་ན་དེ་དག་གི་རས་མ་ཙམ་ཡང་འགོམ་བརྫིས་སོགས་མ་དད་པའི་ཆ་སྤང་བར་བྱའོ། །དམ་པའི་ཆོས་གླེགས་བམ་པུསྟི་ཀའི་ཚད་དུ་ལོང་པ་ལྟ་ཅི་སྨྲོས། ཐ་ན་རྒྱ་ཇའི་ཁ་བྱང་ལ་ཡང་གུས་འདུད་བཀུར་སྟིས་དང་དུ་ལེན་པར་བྱའོ། །དགེ་སློང་བཞི་སྡེ་གཅིག་ཏུ་ལོང་བ་མན་ཆད་ནས། ཐ་ན་ན་བཟའ་ངུར་སྨྲིག་གི་རས་མ་ཙམ་འཆང་བ་ལ་ཡང་དད་གུས་བསྐྱེད་པར་བྱའོ། །གསུམ་པ་ལྔ་བོ་ནི། རང་སྲོག་འདོར་དགོས་པའི་དུས་དང་རྒྱལ་སྲིད་ལ་སོགས་པའི་བྱ་དགའི་རྔན་སྦྱིན་ཤིན་ཏུ་ཆེན་པོ་ཐོབ་པའི་ཆེད་དུའང་སྐྱབས་འགྲོ་མི་སྤོང་བ་དང་། སྡུག་བསྔལ་དོས་དྲག་པོས་མནར་བས་དགོས་གལ་ཇི་ལྟར་ཆེ་ཡང་དཀོན་མཆོག་གསུམ་ལས་ཐབས་གཞན་མི་འཚོལ་བ་དང་། ཅི་ཟ་ཅི་འཐུང་གི་ཕུད་ཀྱིས་མཆོད་པ་མི་ཆགས་པར་བྱ་བ་དང་། རང་རྒྱུད་དང་གཞན་གང་ཡང་སྐྱབས་འགྲོ་ལ་ལེགས་པར་འགོད་པ་དང་། ཕྱོགས་གར་འགྲོ་ན་ཡང་དེར་བཞུགས་ཀྱི་དཀོན་མཆོག་གསུམ་ལ་ཕྱག་འཚལ་བར་བྱེད་པ་དང་ལྔའོ། །དེ་ལྟར་རྒྱུ་མཚན་དང་ངོ་བོ་དང་བྱེད་ལས་དང་གསུམ་གྱིས་སྐྱབས་སུ་འགྲོ་བའི་རིམ་པ་སོང་ནས།