ལེའུ་ཉེརདགུ་པ། འབྱོར་པ་ཆུང་ཞིང་སྒྲུབ་ལ་བརྩོན་པ་ལ། །སྦྱིན་སྲེག་ནོར་བུ་སྣ་ཚོགས་མདོག་ཅན་ཡོད། །
༼ཧ༽ རི་ཆོས་མཚམས་ཀྱི་ཞལ་གདམས་ལས་སྤྲོས་མེད་ལས་བཞིའི་སྦྱིན་སྲེག་རི་ཁྲོད་པ་ལ་ཕན་པ་ནོར་བུ་སྣ་ཚོགས་མདོག་ཅེས་བྱ་བ་བཞུགས་སོ། །ན་མོ་གུ་རུ་པྲ་ཝ་ཀཱ་ར་ཡེ། ལས་བཞིའི་སྦྱིན་སྲེག་མན་ངག་ཅུང་ཟད་བྲི། །ཨོ་རྒྱན་ཆེན་པོས་བཀའ་གནང་བྱིན་གྱིས་རློབས། །ལས་བཞི་རྒྱས་པར་གཞན་དུ་གསལ་བ་ལྟར། །བསྡུས་པ་ལ་ཡང་སྤྲོས་བཅས་སྤྲོས་མེད་གཉིས། །སྤྲོས་བཅས་མདུན་མེ་འབུད་སར་ཐབ་བརྩེག་གམ། །ཡང་ན་རྡུལ་ཚོན་སྟེང་དུ་ས་ཡིས་གཡོགས། །བུད་ཤིང་ལས་བཞི་སོ་སོའི་དབྱིབས་ལྟར་བརྩེག །ཁ་ཁྱེར་ཀུ་ཤ་བཀོད་པ་ཀུན་ལ་དགོས་། །ཡམ་ཤིང་མར་ཁུ་ཀུན་ལ་དགོས་པ་ཡིན། །བདུན་ནམ་ཉེར་གཅིག་ཙམ་རེ་འབུལ་བས་ཆོག །དངོས་གཞི་རྫས་གཅིག་བརྟེན་པའི་སྦྱིན་སྲེག་ཞེས། །ལྷ་སྔགས་རྫས་
སྔགས་ལས་སྔགས་གསུམ་པོ་དེ། །སྦྲེལ་བ་བརྒྱ་རྩ་ཚང་བས་གྲངས་ཚང་སྟེ། །ལྷ་སྔགས་ཨོ་དང་རྫས་སྔགས་ཨོ་གཉིས་གཅིག །དེ་བཞིན་སཱ་ཧཱ་ཡོད་ན་གཅིག་ཏུ་བསྡུ། །སྡིག་པ་ཞི་འདོད་ཏིལ་ནག་ཁོ་ན་སྟེ། །བགེགས་ཞི་ཡུངས་ཀར་ནད་ཞི་གྲོ་ཉིད་འབུལ། །ཞི་བའི་སྦྱིན་སྲེག་དེ་གསུམ་གཙོ་བོ་ཡིན། །ཚེ་རྒྱས་དུར་ཝ་བསོད་ནམས་རྒྱས་པ་འབྲས། །སྟོབས་རྒྱས་སྲན་མ་ནོར་འབྲུ་རྒྱས་སོ་བ། །བདེ་སྐྱིད་དངོས་གྲུབ་དབང་སྡུད་ཟས་མཆོག་སྟེ། །ཡང་ན་མེ་ཏོག་དམར་པོ་སྲེག་རྫས་གཙོ། །མེ་ཏོག་མེད་ན་འབྲུ་ལ་ཚོན་གྱིས་བསྒྱུར། །དྲག་པོར་ཤ་ཁྲག་ལིང་ག་ཁོ་ནས་ཆོག །འཇིག་རྟེན་མེ་ལྷ་དེ་ནང་ཡེ་ཤེས་པ། །གཉིས་ཀ་ལས་བཞི་སོ་སོའི་མདོག་ལྟར་བསྒོམ། །མངོན་རྟོགས་བསྒྱུར་རམ་མ་ལྕོགས་ཡིད་ཀྱིས་བསྒྱུར། །མེ་ལྷའི་ཐུགས་ཀར་ཡི་དམ་དཀྱིལ་འཁོར་བསྒོམ། །དེ་ཡི་བསྲེག་རྫས་མཆོད་བསྟོད་རྫོགས་པའི་རྗེས། །དཀྱིལ་འཁོར་ཕྱི་ཁྱམས་རྡོ་རའི་ནང་དེ་རུ། །གཏོར་མགྲོན་བཞིན་དུ་ལྷ་ཚོགས་གང་འདོད་ཀུན། །མངོན་རྟོགས་བསྒོམ་མམ་སྐད་ཅིག་སྤྱན་དྲངས་ལ། །བསྲེག་རྫས་མཆོད་བསྟོད་ཆ་རེ་གང་འགྲུབ་འབུལ། །དེ་
བཞིན་དཀྱིལ་འཁོར་མེད་པའི་གཙོ་རྐྱང་ལའང་། །མེ་ལྷའི་ཐུགས་ཀར་གཙོ་བོའི་མཐའ་བསྐོར་དུ། །རིམ་བཞིན་སྤྱན་དྲངས་མཆོད་བསྟོད་གོང་བཞིན་བྱ། །སྦྱིན་སྲེག་གཅིག་ནང་སྲོག་མང་པོ་ཤོང་། །བསྲེག་རྫས་འབུལ་བས་ལྷ་ཚོགས་རབ་ཏུ་མཉེས། །ཞི་བའི་དུས་སུ་འོད་ཟེར་མུ་ཏིག་མདོག །བདེ་བའི་རེག་བྱ་ལྡན་པ་དཔག་མེད་འཕྲོས། །འགྲོ་བ་ཀུན་དང་བདག་དང་བསྲུང་བྱ་ཡི། །ཚངས་བུག་ནས་ཞུགས་ལུས་གང་ནད་གདོན་སྡིག་།བ་མོར་ཉི་ཟེར་ཕོག་ལྟར་དག་གྱུར་ཏེ། །བདེ་སྟོང་ཉམས་སྐྱེས་དྲི་མེད་ཤེལ་ལྟར་བསྒོམ། །།རྒྱས་པའི་དུས་སུ་འོད་ཟེར་གསེར་གྱི་མདོག །བདག་དང་བསྲུང་བྱ་ལ་ཕོག་ཚེ་བསོད་འཕེལ། །ཟེར་གྱི་གསེབ་ནས་རིན་ཆེན་ཆར་འབེབ་བསམ། །དབང་གི་དུས་སུ་འོད་ཟེར་རཱ་གའི་མདོག །ལྕགས་ཀྱུའི་དབྱིབས་འཕྲོས་འཇིག་རྟེན་སྤྱི་དང་ནི། །བྱེ་བྲག་གང་དམིགས་མེ་ལྷའི་མདུན་དུ་བཀུག །གུས་འདུད་ལྡན་པ་ཆགས་པའི་མེ་ཡིས་ཞུ། །འོད་དམར་ཞུ་ནས་བདག་ལ་ཐིམ་པར་བསམ། །དྲག་པོའི་དུས་སུ་ལྷ་དེ་ཞལ་གདངས་པའི། །ནང་དུ་ཤ་ཁྲག་ལིང་ཕུལ་བ་དེ། །དགྲ་བགེགས་དངོས་ཉིད་རྐང་རྟིང་སྐྱ་ལྷག་ལྷག ། །
མགོ་མཇུག་ལོག་སྟེ་ཞལ་དུ་སོང་བར་བསམ། །དེ་ནས་མེ་ཞགས་ལ་སོགས་བརྒྱབ་པ་ན། །མེ་དཔུང་ཐོགས་པའི་ཁྲོ་བོ་དཔག་མེད་ཀྱིས། །མེ་རླུང་ཞུན་མའི་རྟ་ལ་ཞོན་ནས་རྒྱུག །གནོད་བྱེད་དགྲ་བགེགས་ཐམས་ཅད་བསྲེག་པར་བསྒོམ། །དེ་ལྟར་རྫས་གཅིག་སྦྱིན་སྲེག་འདོན་འགྲིག་ནི། །རང་ཉིད་ཡི་དམ་བདག་བསྐྱེད་སྔོན་སོང་ནས། །བསྲེག་རྫས་བྱིན་རླབས་ཐབ་བསྐྱེད་ཀུ་ཤ་བཀྲམ། །མེ་ལྷ་བསྐྱེད་བསྟིམ་ཨགྷཾ་སོགས་ཀྱིས་མཆོད། །ཡམ་ཤིང་མར་ཁུ་གསུམ་བདུན་གང་འགྲུབ་འབུལ། །མེ་ལྷར་བསྟོད་ཅིང་དེ་ཡི་ལྟོ་བའི་ནང་། །རྒྱས་པར་ཡི་དམ་མངོན་རྟོགས་བཞིན་དུ་བསྐྱེད། །བསྡུ་ན་སྐད་ཅིག་སྤྱན་དྲངས་བཞུགས་ཀྱང་ཆོག །དེ་ལ་རྣམ་ལྔའི་མཆོད་པ་བསྡུས་ཙམ་འབུལ། །དངོས་བཤམས་མེད་ནའང་སྔགས་དང་ཚིག་གིས་ཆོག །གང་ཡིན་བསྲེག་རྫས་གཅིག་པོ་བརྒྱ་རྩ་འབུལ། །གཏོར་མ་བསྔོས་ཕུལ་འདོད་དོན་གསོལ་བ་གདབ། བསྟོད་པས་བསྟོད་ནས་རྗེས་ཆོག་སྔགས་མཆོད་བསྟོད། །རྗེས་ཆོག་ལྷ་བྲན་སོ་སོར་མི་དགོས་པས། །གང་ཡིན་གཙོ་བོའི་རྗེས་ཆོག་དེ་གས་ཆོག །ཡེ་ཤེས་གཤེགས་ཤིང་དམ་
ཚིག་བདག་ལ་བསྟིམ། །འཇིག་རྟེན་མེ་ལྷར་དྲིན་ལན་གཏོར་མ་འབུལ། །འདོད་དོན་གསོལ་ཞིང་ཨརྒྱུ་སོགས་ཀྱིས་མཆོད། །བསྟོད་པས་བསྟོད་ཅིང་ཡེ་ཤེས་དྲང་སྲོང་དེ། །ཤར་ལྷོའི་ཕྱོགས་གཤེགས་དམ་ཚིག་མི་དམིགས་བསམ། །འདི་ནི་རྫས་གཅིག་བརྟེན་པའི་སྦྱིན་སྲེག་ཅེས། །སྤྲོས་མེད་ལུགས་ཀྱི་སྦྱིན་སྲེག་བསྡུས་པ་ཡིན། །སྦྱིན་སྲེག་བརྒྱ་རྩ་སོགས་ལ་འདི་བྱ་སྟེ། །ཆོ་ག་བསྡུས་པའི་གསུང་རམ་ཁྱོག་པ་ཡི། །བཙུན་པ་དུ་ཡོད་གྲངས་སུ་བརྩི་བ་ཡིན། །སྦྱིན་སྲེག་རེ་རེར་སྔགས་གྲངས་བརྒྱ་རྩ་རེ། །དེ་ཉིད་འགྲུབ་པར་དཀའ་བར་གྱུར་པ་ན། །ཆོ་ག་ཚང་མའི་རམ་བུ་མི་ཁྱོག་ཀྱང་། །སྔགས་དེའི་རྗེས་ཟློས་རམ་བུ་ཁྱོག་ཚད་བརྩི། །འདི་ནི་རང་གཞན་ཀུན་ལ་ཕན་སྟོབས་ཆེ། །ཨྠྀི། །ཤིན་ཏུ་སྤྲོས་མེད་ལས་བཞིའི་སྦྱིན་སྲེག་ནི། །རི་ཁྲོད་ཡིན་ན་ཐབ་ཀྱི་མེ་ལ་རུང་། །བླ་མ་སློབ་དཔོན་ཡིན་ན་མདུན་མེ་བུས། །འདི་ནི་ཤིན་ཏུ་སྤྲོས་མེད་ཡིན་པའི་ཕྱིར། །འཇིག་རྟེན་མེ་ལྷ་འདི་ལ་བསྐྱེད་མི་དགོས། །མངོན་རྟོགས་དྲན་རྫོགས་ཡིད་ཀྱིས་བསྒོམ་པ་སྟེ། །དམ་ཡེ་དབྱེར་མེད་སྤྱན་འདྲེན་བྱ་མི་དགོས། །བདག་དང་ཚེ་འདས་ལ་སོགས་འགྲོ་ཀུན་
གྱི། །སྡིག་སྒྲིབ་སྣ་བུག་ནས་ཐོན་ཏིལ་ལ་བསྟིམ། །ཏིལ་མེད་ལྡུམ་ཏིལ་ཡུངས་ནག་ཡུངས་གཞི་སོགས། །བརྩིར་བས་སྣུམ་འབྱུང་ཏིལ་ནག་ཚབས་སུ་འོང་། །མེ་དཔུང་ཞི་བའི་ཐབ་ཁུང་ཡོངས་རྫོགས་དབུས། །ཡི་དམ་གཙོ་རྐྱང་མདོག་དཀར་ཞལ་གདངས་བསམ། །དེ་ནང་ཕུལ་དམིགས་སྔགས་རེ་ཏིལ་འབྲུ་རེ། །ཡི་དམ་རྩ་སྔགས་གང་ཡིན་ཤམ་བུ་རུ། །བདག་དང་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་ཐམས་ཅད་སརྦ་པཱ་པཾ་ད་ཧ་ན་ཤཱནྟིཾ་ཀུ་རུ་སྭཱ་ཧཱ། །དགུ་ལས་མི་ཉུང་བརྒྱ་ལས་མི་མང་བ། །ཕྲེང་བ་མི་བགྲང་གྲངས་སུ་མི་བཞག་པར། །ཚོད་ཀྱི་གང་འགྲུབ་ཙམ་ཞིག་ཕུལ་བའི་རྗེས། །ཨགྷཾ་སོགས་མཆོད་བསྟོད་པ་ཤོ་ལོས་བསྟོད། །ལྷ་དེ་རྟེན་ལ་ཐིམ་མམ་རང་ཐིམ་དམིགས། །འདི་ནི་སྒྲིབ་སྦྱོང་ཞི་བའི་ཕྲིན་ལས་འགྲུབ། །འབྲུ་སྣ་རིན་ཆེན་སྣ་ཚོགས་ཕྱེ་མ་དང་། །ཟས་སྣ་དར་རས་དུམ་བུ་གང་འཛོམ་རྣམས། །ཟངས་སམ་གང་འབྱོར་སྣོད་དུ་མང་བར་སྒྱུ་བསག་བྲན་ཞིང་ཨ་ཀཱ་རོ་ཡིས་བདུད་རྩིར་བསམ། །མདུན་གྱི་མེ་དཀྱིལ་རྒྱས་པའི་ཐབ་ཁུང་དབུས། །ཡི་དམ་མམ་ནི་ནོར་ལྷ་གང་འདོད་བསྒོམ། །བསྲེག་རྫས་ཕུལ་བས་
ལོངས་སྤྱོད་ཆར་འབེབས་བསམ། །རྩ་སྔགས་ཤམ་བུར་སྔགས་འདི་སྦྱར་ལ་འབུལ། །ཛྭ་ལ་རཾ་རཾ་རཏྣ་སིདྡྷི་ཧཱུཾ། བརྒྱ་རྩ་ཕུལ་ཞིང་ཨགྷཾ་སོགས་ཀྱིས་མཆོད། །བསྟོད་པ་ཉུང་ངུས་བསྟོད་ཅིང་རང་ལ་བསྟིམ། །དེ་ཡིས་དཔལ་འབྱོར་རྒྱས་པའི་ཕྲིན་ལས་འགྲུབ། །བསྲེག་རྫས་མེ་ཏོག་དམར་པོ་རྙེད་ན་རབ། །མེད་ན་འབྲུ་ལ་ཚོན་གྱིས་ཁ་དོག་བསྒྱུར། །ཆང་གི་གླུམ་དང་འབྲི་མོག་སིནྡཱ་ར། །རྒྱ་སྐྱེགས་ཤིང་ཐོག་དམར་པོ་ལ་སོགས་པ། །ཕྱོགས་གཅིག་བསྡུས་ལ་བྲན་ཏེ་བྱིན་གྱིས་རླབས། །མེ་དཀྱིལ་དབང་གི་ཐབ་ཁུང་གསལ་བའི་དབུས། །ཡི་དམ་གཙོ་རྐྱང་སྐུ་མདོག་དམར་པོའམ། །འཛམ་དམར་ཀུ་རུ་ཀུལླེ་གང་རུང་བསྐྱེད། །རྩ་སྔགས་མཇུག་ཏུ་འདི་སྦྱར་བརྒྱ་རྩ་འབུལ། །ལོ་ཀ་སརྦ་པ་ཤཾ་ཀུ་རུ་ཧཱུྃ༔ འོད་ཟེར་དམར་པོས་སྣང་སྲིད་དབང་བསྡུས་བསམ། །ཨརྒྱུ་སོགས་མཆོད་བསྟོད་ནས་རང་ལ་བསྟིམ། །དེ་ཡིས་སྣང་སྲིད་དབང་སྡུད་ཕྲིན་ལས་འགྲུབ། །ཐོད་ཏིང་ངམ་ནི་ཟངས་ལྕགས་ཐེབ་ཙེའི་ནང་། །ཡུངས་ཀར་བླུགས་ལ་དགུག་གཞུག་ཅི་མང་བྱ། །མེ་ནང་དྲག་པོའི་ཐབ་ཁུང་ཡོངས་རྫོགས་དབུས། །རྟ་མགྲིན་ཕྱག་རྡོར་གུར་དྲག་སེང་གདོང་མ། །
གཤིན་རྗེའི་གཤེད་དང་མ་མགོན་ལ་སོགས་པ། །གཙོ་རྐྱང་འཇིགས་རུང་ཞལ་ནི་གནམ་དུ་གདངས། །ཞལ་དང་སྐུ་ལུས་མེ་ཡི་རང་བཞིན་ཅན། །ཡུངས་འབྲུ་རེ་རེ་དགྲ་བགེགས་དངོས་བསམ་སྟེ། །རྐང་མཐིལ་སྐྱི་དང་ལྷག་ལྷག་ཞལ་དུ་སོང་། །ལུས་ངག་ཡིད་གསུམ་བྱ་སྒྲོ་མེས་སྲེག་བཞིན། །སེམས་ནི་དངོས་མེད་ཆོས་སྐུར་ཐིམ་པར་བསམ། །འབྲུ་རེ་སྔགས་རེ་སྤྲད་ལ་བརྒྱ་རྩ་འབུལ། །རྩ་སྔགས་ཤམ་དུ་འདི་ཉིད་སྦྱར་བར་བྱ། །གནོད་བྱེད་དགྲ་བགེགས་མཱ་ར་ཡ་ཕཊ། །ཨརྒྱུ་སོགས་མཆོད་བསྟོད་པ་ཤོ་ལོས་བསྟོད། །ལྷ་དེ་འོད་ཞུ་ཐུགས་ཀའི་ས་བོན་བསྟིམ། །ས་བོན་རང་ཐིམ་ཉམས་ལེན་ངང་ལ་གཞག། །འདི་ནི་ཤིན་ཏུ་ཟབ་པའི་གདམས་པ་སྟེ། །སེང་གདོང་མ་ཡི་གདམས་ངག་སྙན་བརྒྱུད་ཡིན། །དེ་ལྟར་སྤྲོས་མེད་ལས་བཞིའི་སྦྱིན་སྲེག་འདི། །གསར་རྙིང་རྒྱུད་གཞུང་མན་ངག་དུ་མའི་བཅུད། །གཞན་ལ་སྤེལ་ཕངས་བརྩོན་འགྲུས་ཁྱོད་ལ་ཀླུ་གདམས། །དེ་སྐད་རཱ་ག་ཨ་སྱས་སྨྲས་པ་དེ། །ཡི་གེ་པ་ཡང་བཱིརླ་སཱ་ག་ར། །དགེ་བས་ལས་བཞིའི་ཕྲིན་ལས་འགྲུབ་པར་ཤོག །ལེའུ་ཉེར་དགུ་པའོ་མངྒ་ལཾ།། །།