ངེས་དོན་དབུ་མའི་གྲུབ་མཐའ།
༄༅། །ངེས་དོན་དབུ་མ་ཆེན་པོའི་གཏམ་གཙོ་བོར་བརྗོད་པའི་གྲུབ་མཐའི་སྒོ་འབྱེད་འཕྲུལ་གྱི་ལྡེ་མིག་ཅེས་བྱ་བ་བཞུགས་སོ།།
༄༅། །མཐའ་བརྒྱད་སྤྲོས་པ་བྲལ་བའི་སྟོང་པ་ཆེ། །ཡང་དག་ཚད་མའི་ལམ་ནས་འདོམས་མཁས་པ། །འགྲོ་རྣམས་ཕན་བདེའི་ས་ལ་རབ་སྦྱོར་བའི། །དྲིན་ཆེན་དཔལ་ལྡན་བླ་མར་ཕྱག་བགྱི་འོ། །དེ་ལ་འདིར་གྲུབ་མཐའི་རྣམ་བཞག་མདོར་བསྡུས་ཙམ་བརྗོད་པ་ལས། སྤྱིར་གྲུབ་མཐའ་ཐམས་ཅད་རང་རང་གི་རིགས་པའི་
ལམ་ནས་གྲུབ་དོན་མཐར་ཐུག་ཅིག་ལ་གྲུབ་མཐའི་འཇོག་མཚམས་བྱས་པ་ཐམས་ཅད་འདྲ་ལ། དེ་ལའང་ལུང་རིགས་ལྟར་སྣང་གི་སྒོ་ནས་མངོན་རློམ་དང་བཅས་ཏེ་བདག་དང་གཙོ་བོ་སོགས་ཆེས་ཆེར་སྒྲུབ་ཅིང་བསྟན་པ་འདི་ལས་ཕྱི་རོལ་དུ་གྱུར་པའི་ལྟ་བ་ངན་པའི་མུ་ལ་ལམ་སྟེགས་སུ་
གྲུབ་མཐའ་དང་ནང་པ་སངས་རྒྱས་པའི་གྲུབ་མཐའ་གཉིས་ཡོད། དང་པོ་ཕྱི་རོལ་མུ་སྟེགས་པ་ལ་ཡང་། ལྟ་ལོག་སུམ་བརྒྱ་དྲུག་ཅུ། ལྟ་ངན་དྲུག་ཅུ་རྩ་གཉིས། སྡེ་ཚན་བཅུ་གཅིག་སོགས་དབྱེ་སྒོ་མང་ཡང་བསྡུ་ན་ཏརྐ་ཞེས་རྟོག་གེ་སྟེ་ཚུར་མཐོང་འཁོར་བའི་དོན་ལ་དཔྱོད་པའི་རྟོག་གེ་སྡེ་ལྔའམ་ཏརྐ་སྡེ་ལྔའི་ཁོངས་སུ་འདུ་ལ། གང་ཞེ་
ན། གྲངས་ཅན་པ། བྱེ་བྲག་པ། གཅེར་བུ་པ། དཔྱོད་པ་བ། རྒྱང་འཕེན་པ་དང་ལྔའོ། །དེ་ཡང་བསྡུ་ན་རྟག་ཆད་གཉིས་སུ་འདུ་སྟེ། སྔ་མ་བཞི་རྟག་པར་སྨྲ་བ་དང་། ཕྱི་མ་རྒྱང་ཕེན་པ་ཆད་པར་སྨྲ་བའོ། །དོན་ལ་ཕྱི་རོལ་མུ་སྟེགས་པའི་གྲུབ་མཐའ་དེ་དག་གིས་བདེན་གཉིས་ཀྱི་རྣམ་བཞག་སོགས་ཅི་སྨྲས་ཀྱང་དངོས་
འཛིན་ཞིག་ལ་བརྟེན་ནས་འཇོག་པ་ཡིན་པས་ཐར་པའི་ལམ་ཡང་དག་པ་མེད་དོ། །གཉིས་པ་ནང་པ་སངས་རྒྱས་པའི་གྲུབ་མཐའ་དེ་ལ། རྒྱུ་ལམ་དུ་བྱེད་པ་མཚན་ཉིད་ཐེག་པ་དང་། འབྲས་བུ་ལམ་དུ་བྱེད་པ་གསང་སྔགས་རྡོ་རྗེ་ཐེག་པ་དང་གཉིས་ལས། དང་པོ་རྒྱུ་མཚན་ཉིད་ཀྱི་ཐེག་པ་ལའང་བཞི་སྟེ། ཐེག་དམན་བྱེ་མདོ་གཉིས་དང་། ཐེག་ཆེན་དབུ་སེམས་གཉིས་སོ། །ཐེག་དམན་བྱེ་མདོ་གཉིས་ལ་ཐུན་མིན་གྱི་འདོད་པ་བདུན་བདུན་ཡོད་ཀྱང་། ཐུན་མོང་ཙམ་དུ། མཛོད་ལས། གང་ལ་བཅོམ་དང་བློ་ཡིས་གཞན། །ཞེས་སོགས་གསུངས་པ་ལྟར། རྒྱུན་དང་རགས་པའི་ཆོས་ཐམས་ཅད་ཀུན་རྫོབ། རྡུལ་དང་སྐད་ཅིག་མའི་ཆོས་ཐམས་ཅད་དོན་དམ་དུ་འདོད། དེ་ཡང་གཟུགས་མཐའ་ཐམས་ཅད་རྡུལ་དང་། ཤེས་མཐའ་ཐམས་ཅད་སྐད་ཅིག་མས་བརྩམས་ཏེ་སྣོད་བཅུད་ཀྱི་དངོས་པོ་
ཐམས་ཅད་ཆ་མེད་གཉིས་ཀྱིས་བསྐྱེད་པས། སྣང་བ་འདི་ཐམས་ཅད་གཞི་མེད་དུ་མི་འགྱུར་བ་ཆ་མེད་ཀྱི་རང་བཞིན་དུ་ཁས་བླངས་པས་ལྟ་བ་གང་ཟག་གི་བདག་མེད་པའི་སྟོང་ཉིད་རྟོགས་ཀྱང་། ཕྲ་བ་ཆ་མེད་གཉིས་དོན་དམ་བདེན་གྲུབ་ཏུ་འདོད་པར་སོང་བས་ཆོས་ཀྱི་བདག་མེད་མ་རྟོགས་ཤིང་ཕྱི་དོན་ཡོད་པར་སྨྲ་བས་དོན་སྨྲ་སྡེ་གཉིས་ཞེས་གྲགས་ལ། འདི་གཉིསཀྱིས་ཁམས་གསུམ་འཁོར་བའི་རྩ་བ་གང་ཟག་གི་བདག་འཛིན་བདག་མེད་རྟོགས་པའི་ལམ་ནས་གཏན་དུ་བཅོམ་པས་འཁོར་བ་ལས་ཐར་པའི་མྱང་འདས་ཉི་ཚེ་བ་མངོན་དུ་བྱེད་པ་ཡོདན་ཡང་། འོན་ཀྱང་ཆོས་ཀྱི་བདག་མེད་མ་རྟོགས་པས་གྲོལ་བ་མཐར་ཐུག་པ་མེད་པའི་ཚུལ་རིན་ཆེན་ཕྲེང་བ་དང་། རྩོད་ཟློག །སྤྱོད་འཇུག་ཤེས་རབ་ལེའུའི་སྐབས་སུ་རྒྱས་པར་སྒྲུབ་པ་ལྟར་རོ། །ཐེག་ཆེན་དབུ་སེམས་
གཉིས་ལས། སེམས་ཙམ་པ་རྣམས་ནི་མདོ་སྡེ་ས་བཅུ་པ་དང་། ལང་ཀར་གཤེགས་པ་ལ་སོགས་པའི་རྗེས་སུ་འབྲངས་ནས་གང་སྣང་བ་སྣ་ཚོགས་པ་ཐམས་ཅད་སེམས་ཀྱི་རོལ་པ་ཙམ་ལས་གཞན་ཕྱི་དོན་བེམ་པོའི་ཆོས་སུ་མ་གྲུབ་པར་འདོད་པས་སེམས་ཙམ་པ་ཟེར། དེ་ལའང་རྣམ་པ་ཐམས་ཅད་སེམས་ཙམ་དུ་བདེན་པར་འདོད་པའི་རྣམ་པ་བདེན་པ་དང་། རྣམ་པ་ཐམས་ཅད་ཕྱི་ནང་གང་དུའང་མ་གྲུབ་པར་རྫུན་པར་ཁས་ལེན་པའི་རྣམ་རྫུན་པ་དང་གཉིས་ཡོད། དེ་གཉིས་ཀས་ཐུན་མོང་ཙམ་དུ་ཤེས་བྱའི་ཆོས་ཐམས་ཅད་ཀུན་བཏགས་གཞན་དབང་ཡོངས་གྲུབ་གསུམ་གྱི་ཁོངས་སུ་བསྡུས་ནས་གཏན་ལ་དབབ་པ་ལ་མཐུན་ཏེ། དེ་ཡང་གཟུང་འཛིན་རྒྱང་ཆད་དུ་འཛིན་པ་ཀུན་བཏགས། ཤེས་པ་ཉིད་གཟུང་འཛིན་གཉིས་སུ་སྣང་ཙམ་པ་གཞན་དབང་། གཞན་དབང་ལ་ཀུན་བཏགས་ཀྱིས་
སྟོང་པའི་ཆ་ལ་ཡོངས་གྲུབ་ཏུ་འདོད། ཀུན་བཏགས་ཀུན་རྫོབ་དང་། གཞན་དབང་གནས་སྣང་གཉིས་སུ་ཕྱེས་པས་སྣང་ཚུལ་དབང་བཙན་དུ་བྱས་ན་ཀུན་རྫོབ་དང་། གནས་ཚུལ་དབང་བཙན་དུ་བྱས་ན་དོན་དམ་དུ་བསྡུ་ལ། ཡོངས་གྲུབ་མཐའ་གཅིག་ཏུ་དོན་དམ་དུ་ཁས་བླངས་ནས་ཤེས་བྱ་ཐམས་ཅད་བདག་མེད་པར་འདོད་ཀྱང་། འཁོར་འདས་ཀྱི་སྣང་བ་སྣ་ཚོགས་པ་འདིའི་སྣང་གཞི་ཤེས་པ་རང་རིག་རང་གསལ་བདེན་གྲུབ་ཏུ་ཁས་བླངས་པས་དབུ་མ་པས་གཞལ་ན་ཆོས་བདག་ཕྲ་བ་མ་རྟོགས་པས་ཐམས་ཅད་མཁྱེན་པའི་ལམ་ཡང་དག་པར་མེད་གསུངསནས་དབུ་མའི་སློབ་དཔོན་ཆེན་པོ་རྣམས་ཀྱིས་དགག་པར་མཛད་དོ། །དབུ་མ་པ་ལའང་རང་རྒྱུད་པ་དང་ཐལ་འགྱུར་པ་གཉིས་ལས། རང་རྒྱུད་པ་ལའང་གོང་འོག་གཉིས་ཡོད་པ་ལས། རང་རྒྱུད་འོག་
མའི་སློབ་དཔོན་དཔལ་སྦས་སོགས་ཀྱིས་ཆོས་ཐམས་ཅད་དོན་དམ་པར་སྟོང་པ་ཉིད་དང་། ཐ་སྙད་སྣང་ཙམ་དུ་ཁས་བླངས་ནས་སྣང་སྟོང་གཉིས་ཀྱང་གཞི་གཅིག་གི་སྟེང་ན་ངོ་བོ་ཐ་དད་པའི་ཚུལ་གྱིས་འབྲལ་མི་ཤེས་པར་འདོད། སྒྱུ་མ་རིགས་གྲུབ་པའི་སློབ་དཔོན་རྒྱ་མཚོའི་སྤྲིན་སོགས་ཀྱིས། བདེན་གཉིས་ཀྱིས་བསྡུས་པའི་ཆོས་ཐམས་ཅད་སྒྱུ་མ་ཙམ་དུ་གཏན་ལ་ཕབསནས་སྒྲམའི་ངོ་བོ་ལ་དེར་འཛིན་ཞིག་པར་མི་བྱ་བར་འདོད་པས། དོན་ལ་དེ་གཉིས་ཀས་དངོས་པོའི་གནས་ཚུལ་དང་མི་མཐུན་པའི་བདེན་གཉིས་ཐ་དད་དང་སྒྲ་འཛིནམ་ཞིག་པའི་རང་རྒྱུད་འོག་མ་ཞེས་བཞག་ལ། རང་རྒྱུད་གོང་མ་ལའང་གཉིས་ལས། མདོ་སྡེ་སྤྱོད་པའི་དབུ་མ་པའི་སློབ་དཔོན་ལེགས་ལྡན་འབྱེདནི། ཐ་སྙད་མདོ་སྡེ་པ་ལྟར་ཕྱི་དོན་གྱི་རྣམ་བཞག་མཛད་ཅིང་། དོན་དམ་དབུ་མ་པ་ལྟར་རྣམ་གྲངས་དང་
རྣམ་གྲངས་མ་ཡིན་པའི་དོན་དམ་གཉིས་སུ་ཕྱེས་ནས་སྟོང་ཉིད་དུ་གཏན་ལ་ཕབས། རྣལ་འབྱོར་སྤྱོད་པའི་དབུ་མའི་སློབ་དཔོན་ཞི་བ་འཚོ་ནི་ཐ་སྙད་སེམས་ཙམ་པ་ལྟར་ཞལ་གྱིས་བཞེས་ཤིང་། དོན་ལམ་དབུ་མ་པ་ལྟར་ཆོས་ཐམས་ཅད་གནས་སྐབས་རྣམ་གྲངས་པའི་སྟོང་ཉིད་དུ་བསྟན་ནས་མཐར་ཐུག་རྣམ་གྲངས་མ་ཡིན་པའི་སྟོང་ཉིད་དུ་ལ་བཟླ་བར་མཛད། དེསན་དེ་གཉིས་ཀས་དང་པོ་ནས་རྣམ་གྲངས་པའི་དོན་དམ་རྩལ་དུ་བཏོན་ནས། བདེན་གཉིས་སོ་སོར་ཕྱེས་ཏེ་དོན་དམ་པར་ཆོས་ཐམས་ཅད་མེད། ཐ་སྙད་དུ་ཡོད་ཅེས་ཁས་བླངས་པས་རྗེས་ཐོབ་རྒྱུ་ཡི་དབུ་མའམ། ཤན་འབྱེད་ལམ་གྱི་དབུ་མ་ཞེས་གྲགས། ཐལ་འགྱུར་པའི་སློབ་དཔོན་ཟླ་བ་གྲགས་པ་དང་ཞི་བ་ལྷ་ལ་སོགས་པ་ནི། དང་པོ་ཉིད་ནས་བདེན་གཉིས་མ་ཕྱེས་པར་ཆོས་ཐམས་ཅད་ཡོད་མེད་ཡིན་
མིན་ལ་སོགས་སྤྲོས་པའི་མཐའ་ཐམས་ཅད་དང་བྲལ་བ་རྣམ་གྲངས་མིན་པའི་སྟོང་ཉིད་དུ་གཏན་ལ་ཕབས་ནས། ཁས་ལེན་གང་ཡང་མེད་པར་བཞེད་པས་ཐལ་འགྱུར་པ་ཁས་ལེན་མེད་ཅེས་གྲགས། འདི་རང་སྟོང་པ་རྣམས་ཀྱི་ལྟ་བ་མཐར་ཐུག་ཡིན། དེང་སང་འདིའི་གཞུང་ལུགས་རྣམས་ལས་ཁས་ལེན་མེད་པ་སོགས་བྱུང་བའི་ཚིག་ཙམ་ལ་སྐྱབས་སུ་བཟུང་ནས་སྤྲོས་པ་བྲལ་ཙམ་གྱི་སྟོང་རྐྱང་ཧད་པོ་ཞིག་ལ་བློ་རྩེ་གཅིག་ཏུ་གཏདནས་ལམ་དང་འབྲས་བུའི་རྣམ་བཞག་ཚོ་དང་། བདེ་གཤེགས་སྙིང་པོ་ཡང་མི་འདོད་ཟེར། འདི་པས་གང་སྨྲས་ཀྱང་སྤྲོས་བྲལ་སྤྲོས་བྲལ་ཟེར་ནས་གཞན་སྟོང་དབུ་མའི་གྲུབ་མཐའ་ལ་ཐན་དུ་རྩི་ཡང་། ལེགས་པར་མ་བརྟགསན་མུ་སྟེགས་གཅེར་བུ་པའི་ལྟ་བ་དང་མགོ་མཉམ་པའི་ཆད་པར་ལྟ་བའི་ཕྱོགས་སུ་ཉེ་འོ་ཞེས་གཞན་སྟོང་དབུ་མའི་སློབ་དཔོན་
ཆེན་པོ་རྣམས་ཀྱིས་མགྲིན་གཅིག་ཏུ་གསུངས་པས། རང་སྟོང་པ་རྣམས་ཀྱིས་བློ་གྲོས་གཟུ་བོར་གནས་ཏེ་རང་གིས་འདོད་པའི་ལྟ་བ་དེ་ལ་ལུང་རིགས་ཡང་དག་གི་སྒོ་ནས་སླར་ཡང་ལེགས་པར་དཔྱད་འཚལ། སྤྱིར་དངོས་དང་དངོས་མེད་གང་དུ་ཞེན་ཡང་མཐར་འཛིན་ལས་མ་འདས་མོད། འོན་ཀྱང་བློས་བྱས་ཡིད་དཔྱོད་ཀྱིས་མཐའ་ཐམས་ཅད་བཀག་པའི་མཐའ་དང་བྲལ་ཙམ་གྱི་སྟོང་ཆ་རྐྱང་པ་ཞིག་ཀྱི་གནས་ལུགས་མཐར་ཐུག་ཡིན་པ་མི་འདྲ་སྟེ། ཀུན་མཁྱེན་ཆོས་རྗེས། ཚིག་ཏུ་ཡོད་མེད་མཐའ་བྲལ་ཞེས་སྨྲ་ཡང་། །བྲལ་གཞི་མི་ཤེས་སྲིད་རྩེའི་ལྟ་བ་ཅན། །བསྟན་པ་འདི་ལས་ཕྱི་རོལ་གྱུར་པའི་ཕྱིར། །ནམ་མཁའི་ཡིད་ཅན་ཐལ་བས་བྱུག་པར་རུང་། །ཞེས་གསུངས་པ་བཞིན་ནོ། །གཞན་སྟོང་པའི་སློབ་དཔོན་ཆེན་པོ་གྲུབ་ཆེན་ཡུ་མོ་པ། ཀུན་མཁྱེན་
དོལ་པོ་སངས་རྒྱས། རྗེ་བཙུན་ཏཱ་ར་ན་ཐ། ཀུན་མཁྱེན་རང་བྱུང་རྡོ་རྗེ། ཀཿཐོག་མ་ཧཱ་པཎྜི་ཏ་དགེ་བརྩེ་འགྱུར་མེད་ཚེ་དབང་མཆོག་གྲུབ། འགྱུར་མེད་བསྟན་པ་རྣམ་རྒྱལ། ཞེ་ཆེན་མ་ཧཱ་པཎྜི་ཏ། དབོན་སྤྲུལ་མཐུ་སྟོབས་རྣམ་རྒྱལ། རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར། ཁྱད་པར་སྨིན་གླིང་གཏེར་བདག་ཡབ་སྲས། ཆོས་རྗེ་ཀློང་ཆེན་པ་སོགས་ནི། འཁོར་ལོ་བར་པའི་སྦས་དོན་དུ་སོང་བ་དངོས་གཞི་འོད་གསལ་གྱི་ཆ་རྣམས། ཁམས་བསྟན་པའི་མདོ་དང་། མྱ་ངན་ལས་འདས་པའི་མདོ་དང་། ལྷ་མོ་དཔལ་ཕྲེང་གིས་ཞུས་པའི་མདོ་སོགས་འཁོར་ལོ་མཐའ་མས་དངོས་བསྟན་དུ་བཀྲལ་བའི་ངེས་དོན་ཕྱིར་མི་ལྡོག་པའི་གཏམ་བདེ་བར་གཤེགས་པའི་སྙིང་པོ། སེམས་ཅན་ཐམས་ཅད་ཀྱི་རྒྱུད་ལ་ཡེ་ལྡན་དུ་བཞུགས་པ་སྟོང་གསུམ་དར་ཡུག་ཆེན་པོའི་དཔེ་སོགས་ཀྱིས་བསྟན་པ་དང་
མཐུན་པར་རྗེ་བཙུན་བྱམས་པ་མགོན་པོས་ཐེག་པ་ཆེན་པོ་རྒྱུད་བླ་མ་ལས་ཇི་ལྟར་གསུངས་པ་རྣམས་དང་། ཁྱད་པར་དུ་དཔལ་ལྡན་དུས་ཀྱི་འཁོར་ལོ་སོགས་སྔགས་རྒྱུད་རྣམས་ནས་གསལ་བར་བསྟན་པ་ལྟར། སེམས་ཅན་ཐམས་ཅད་གདོད་ནས་ཡེ་སངས་རྒྱས་པའི་རང་བཞིན་ཅན། དེ་ཡང་ཆོས་ཉིད་ཀྱི་གཤིས་ལ་དྲི་མས་ཡེ་ནས་གོས་མ་མྱོང་བས་འཁོར་བ་ཞེས་པ་དོན་ལ་མིང་ཙམ་ཡང་མ་གྲུབ་ཅིང་། མྱ་ངན་ལས་འདས་པའི་ཆོས་ཐམས་ཅད་རྟག་བརྟན་འཕོ་འགྱུར་དང་བྲལ་བར་གདོད་ནས་སེམས་ཀྱི་ཆོས་ཉིད་དུ་རང་ཆས་སུ་བཞུགས་པས་ན། བྱམས་མགོན་གྱིས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་པ་ལྟར་རོ། །ཆོས་ཉིད་དེ་ཡང་བློ་སྤྲོས་བཅས་ཀྱིས་གསར་དུ་མ་སྟོང་པ་དང་། གསལ་བ་ལྟ་བུ་བྱས་པ་མ་
ཡིན་པར་རང་བཞིན་གཤིས་ཀྱིས་མེ་དང་ཚ་བ་གཉིས་འདུ་འབྲལ་མེད་པ་བཞིན་གསལ་སྟོང་དབྱེར་མི་ཕྱེད་པ་འདུས་མ་བྱས་པའི་བདག་ཉིད་ཅན་ཏེ། རྒྱུད་བླ་མར། སེམས་ཀྱི་རང་བཞིན་འོད་གསལ་གང་ཡིན་པ། །དེནི་ནམ་མཁའ་བཞིན་དུ་འགྱུར་མེད་དེ། །ཡང་དག་མིན་རྟོག་ལས་བྱུང་འདོད་ཆགས་སོགས། །གློ་བུར་དྲི་མས་དེ་ཉོན་མོངས་མི་འགྱུར། །ཞེས་གསུངས་པ་ལྟར་ཡིན་ལ། དེ་ལྟ་བུའི་ཆོས་ཉིད་བསམ་གྱིས་མི་ཁྱབ་པ་དེ་རང་གི་ངོ་བོ་ཡོད་དམ་མེད་ཅེས་བརྗོད་ན། ཅི་ཡང་མེད་པའི་སྟོང་པ་ཕྱོགས་ཆོད་པ་ནམ་མཁའ་དང་མོ་ཤམ་གྱི་བུ་ལྟ་བུ་ཡང་མ་ཡིན་ལ། མི་སྟོང་བའི་རྟག་པ་བདེན་གྲུབ་མུ་སྟེགས་པའི་བདག་ལྟ་བུ་ཡང་མ་ཡིན་ཏེ། མདོ་ལས། སེམས་ལ་སེམས་མ་མཆིས་ཏེ། སེམས་ཀྱི་རང་བཞིནནི་འོད་གསལ་བའོ། །ཞེས་གསུངས་པ་ལྟར་ཡོད་མེད་རྟག་ཆད་སོགས་
ཀྱི་མཐའ་ཐམས་ཅད་དང་བྲལ་བ་དབྱིངས་ཡེ་དབྱེར་མི་ཕྱེད་པའི་ངོ་བོ་སྟོང་ལ་རང་བཞིན་གསལ་བའི་བདག་ཉིད་ཅན་དུ་བཞུགས་ཏེ། སྟོང་པའི་རང་བཞིན་རང་འོད་གསལ། །ཞེས་གསུངས་པ་ལྟར་ཡིན་ལ། དེ་ལྟ་བུའི་ཆོས་ཉིད་དེའི་ངང་ནས་མཉམ་པར་བཞག་ཚུལ་ཡང་། བྱམས་མགོན་གྱིས། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་གསུངས་པ་ལྟར། བསལ་བཞག་དགག་སྒྲུབ་ཐམས་ཅད་དང་བྲལ་བར་འཛིན་མེད་ཡང་དག་པའི་མཐའ་ལ་བློས་བྱས་དྲི་མས་མ་གོས་པར་མཉམ་པར་འཇོག་དགོས་པ་ནི། ཟབ་མོ་སྔགས་ཀྱི་ཐེག་པ་དང་མཐུན་པར་ཤེར་ཕྱིན་དང་རྒྱུད་བླ་མ་སོགས་ཕར་ཕྱིན་ཐེག་པ་ལས་ཀྱང་མཚོན་ཙམ་འབྱུང་བ་ཡིན་པས། དེ་
ལྟ་བུའི་ཆོས་ཉིད་མཉམ་པ་ཉིད་ཀྱི་དགོངས་དོན་ཟབ་མོ་ལ་བློ་གྲོས་མ་རེག་པ་དེ་སྲིད་དུ་དཔལ་ལྡན་བླ་མའི་ཞབས་པད་མཉེས་པ་གསུམ་གྱིས་བསྟེན་ནས་ཚོགས་བསགས་པ་དང་སྒྲིབ་པ་སྦྱོང་བ་སོགས། ཀུན་རྫོབ་ལམ་གྱི་གནད་གསང་ལ་རང་ཉམས་དང་བསྟན་ནས་ཆོས་ཉིད་དོན་གྱི་དགོངས་པ་ལ་དབང་འབྱོར་བར་ཅི་ནས་གལ་ཆེ་སྟེ། མདོ་ལས་ཀྱང་རིགས་ཁམས་ནོར་བུ་སྦྱོང་བའི་དཔེ་དང་། བྱིས་པ་ཁ་ཟས་འཇམ་རྩུབ་སོགས་ཀྱི་དཔེས་ལམ་ལ་སློབ་ཚུལ་རྒྱས་པར་གསུངས་པ་ལྟར་རོ། །དེས་ན་ཀུན་མཁྱེན་དོལ་པོས་རི་ཆོས་ངེས་དོན་རྒྱ་མཚོར། མཉམ་བཞག་ལ་བཟླ་བའི་ཚེ་ན་འཁོར་ལོ་བར་པ་ལྟར་ཆོས་ཐམས་ཅད་སྤོས་པ་ཀུན་བྲལ་དུ་སྒོམ་ཞིང་། རྗེས་ཐོབ་ཤན་འབྱེད་པའི་ཚེ་ན་འཁོར་ལོ་ཐ་མའི་དགོངས་དོན་ལྟར་རྟག་བརྟན་གཡུང་དྲུང་གི་ཚུལ་དུ་གདུལ་བྱ་གཞན་ལ་ངོ་སྤྲོད་
ཅེས་གསུངས་པ་ལྟར་ཤིན་ཏུ་ཟབ་པར་གྲུབ་སྟེ། སྤྱིར་བཀའ་དང་བསྟན་བཅོས་ཀུན་ལས་བདེན་གཉིས་འཇོག་ཚུལ་རྣམ་པ་གཉིས་སུ་གསུངས་པ་ལས་གནས་ཚུལ་དོན་དམ་ལ་དཔྱོད་པའི་ཚད་མའི་དབང་བཙན་དུ་བྱས་པའི་སྣང་སྟོང་གི་བདེན་གཉིས་འཇོག་ཚུལ་ལྟར་ན། གཟུགས་ནས་རྣམ་མཁྱེན་གྱིས་བསྡུས་པའི་ཆོས་ཐམས་ཅད་རང་གི་ངོ་བོ་བདེན་པར་གྲུབ་པ་རྡུལ་ཙམ་མ་མཆིས་ཤིང་སྣང་ཡང་བདེན་པར་མེད་པའི་སྟོང་ཉིད་དུ་གཞན་སྟོང་པའི་མཁས་གྲུབ་ཆེན་པོ་ཐམས་ཅད་ཀྱིས་བཞེད་ལ། སྣང་ཚུལ་ལ་དཔྱོད་པ་ཀུན་ཏུ་ཐ་སྙད་པའི་ཚད་མའི་དབང་བཙན་དུ་བྱས་པའི་གནས་སྣང་གི་བདེན་གཉིས་ལྟར་ན། དོན་དམ་པར་རང་གི་ངོ་བོ་མི་སྟོང་པར་རྟག་པ་བདེན་གྲུབ་ཏུ་ཡང་གྲུབ་སྟེ། འཁྲུལ་ཆོས་འཁོར་བ་དང་མ་འཁྲུལ་མྱང་འདས་གཉིས་ལ། རྟག་དང་མི་
རྟག །བདེན་དང་མི་བདེན། བསྡུ་དང་མི་བསྡུ་དོན་ལ་གྲུབ་པའི་རང་གི་ངོ་བོ་མི་སྟོང་པ་དང་། དོན་ལ་མ་གྲུབ་པས་རང་གི་ངོ་བོ་སྟོང་སོགས་ཀྱི་ཁྱད་མེདན་ཐ་སྙད་རྗེས་ཐོབ་ཤན་འབྱེད་ཀྱི་ངོར་ཡང་འཁོར་འདས་མགོ་མཉམ་དུ་གྱུར་པས། ལམ་དང་ལམ་མིན་དང་། བླང་དོར་འཇུག་ལྡོག་གི་གནས་ལ་ཐམས་ཅད་རྨོངས་ནས་འཁྲུལ་བ་ཤ་སྟག་ཏུ་འཕྱན་པར་འགྱུར་གྱི། ཡང་དག་པའི་ཤེས་རབ་ཀྱི་མིག་ཐོབ་པ་ནམ་ཡང་མི་སྲིད་དོ། །དེསན་མྱ་ངན་ལས་འདས་པའི་མདོ་ལས་ཀྱང་། གང་ཞིག་དེ་བཞིན་གཤེགས་པ་ནི་རྟག་པའོ། །མི་འགྱུར་མི་འཕོ་བར་སྨྲ་བ་ནི་ངེས་པའི་དོན་ཞེས་བྱའོ། །ཞེས་གསུངས་པ་དང་། བློ་གྲོས་མི་ཟད་པའི་མདོ་ལས། གང་ཡེ་ཤེསནི་རྟག་ལ། རྣམ་ཤེསནི་མི་རྟག་གོ། །ཞེས་དང་། སློབ་དཔོན་གྱིས། མྱ་ངན་འདས་པ་བདེན་གཅིག་པུ། །ཞེས་སོགས་ལུང་
མཐའ་ཡས་པ་དང་། གང་རྟག་པ་ལ་རྟག་པར་ཤེས་པའི་སྒོ་ནས་བདེ་གཤེགས་སྙིང་པོར་རྟག་པར་སྨྲས་པའི་ཕན་ཡོན་ཡང་། རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་ཏིང་འཛིན་ཞེས་པའི་མདོ་ལས། འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལས་ལྷའི་བསྐལ་པ་བྱེ་བར་ཕྱོགས་་བཅུའི་འཇིག་རྟེན་གྱི་ཁམས་རེ་རེར་འཁོར་བཞི་ལ་ཇི་འདོད་པའི་སྦྱིན་པ་བྱིན་པ་བས། རིགས་ཀྱི་བུའམ་རིགས་ཀྱི་བུ་མོ་གང་གཞན་གྱིས་མཐུན་པར་བྱ་བའི་དོན་དུ་གསོལ་བ། དེ་བཞིན་གཤེགས་པ་ནི་གཡུང་དྲུང་ངོ་། །ཞེས་ཚིག་ཏུ་སྨན་ཡང་དེ་དེ་བས་ཆེས་བསོད་ནམས་གྲངས་མེད་པ་བསྐྱེད་དོ་ཞེས་དང་། མྱ་ངན་ལས་འདས་པ་ཆེན་པོའི་མདོ་ལས། འོད་སྲུང་རིགས་ཀྱི་བུའམ་རིགས་ཀྱི་བུ་མོ་དག་ནི་རྟག་ཏུ་རྩེ་གཅིག་པའི་སེམས་ཀྱིས་སངས་རྒྱས་རྟག་པར་གནས་པའོ། །
ཞེས་བྱ་བའི་ཚིག་འདི་གཉིས་ལ་ནན་ཏན་དུ་བྱའོ། །ཞེས་དང་། གང་གིས་བསམ་མི་ཁྱབ་པ་དེ་ལ་རྟག་པའི་འདུ་ཤེས་ཀྱིས་ནན་ཏན་བྱེད་ན་དེའི་སྐྱབས་སུ་འགྲོ་བའི་གནས་ཡིན་ནོ། །ཞེས་སོགས་དང་། དེ་བཞིན་གཤེགས་པའི་སྐུ་ལ་མི་རྟག་པར་བལྟ་བ་ལ་སྐྱབས་འགྲོ་ཙམ་ཡང་མེད་པ་དང་། རྡོ་རྗེའི་སྐུ་ལ་མི་རྟག་པར་བལྟ་ན་ཉེས་པ་ཚད་མེད་པར་འབྱུང་བར་མདོ་ལས་གསུངས་པ་ལྟར་ཤེས་པར་བྱས་ནས་ཡང་དག་པའི་ཟབ་མོའི་གཏམ་སྨྲ་བ་ལ་གུས་པ་བྱ་ཡི་ནམ་དུ་ཡང་ལྡང་བར་མི་རིགས་སོ། །དེ་ཡང་བདེན་པ་ལ་བདེན་པར་ཤེས་པ་འཕགས་པའི་ལམ་མི་བསླ་བར་ཤེས་པ་དང་། མི་བདེན་པ་ལ་མི་བདེན་པར་ཤེས་པ་མུ་སྟེགས་པས་བདག་སྒོམ་པས་གྲོལ་བར་སྨྲ་བ་ལྟ་བུ་ལོག་པར་ཤེས་པ་དང་། མི་རྟག་པ་ལ་མི་རྟག་པར་ཤེས་པ་འདུས་བྱས་ཀྱི་དངོས་པོ་ཐམས་ཅད་སྐད་ཅིག་མར་ཤེས་
པ་དང་། རྟག་པ་ལ་རྟག་པར་ཤེས་པ་བདེ་གཤེགས་སྙིང་པོ་རང་བྱུང་གི་ཡེ་ཤེས་རྣམ་པ་ཐམས་ཅད་མི་འགྱུར་བར་ཤེས་པ་དང་། མེད་པ་ལ་མེད་པར་ཤེས་པ་གཟུང་འཛིན་དུ་སྣང་བ་རང་བཞིན་མ་གྲུབ་པར་ཤེས་པ་དང་། ཡོད་པ་ལ་ཡོད་པར་ཤེས་པ་སེམས་ཅན་ཐམས་ཅད་ལ་ཆོས་ཉིད་བདེ་གཤེགས་སྙིང་པོ་ལྷུན་གྲུབ་ཀྱི་ཡོན་ཏན་བཅས་རང་བཞིན་མ་གྲུབ་པར་གནས་པར་ཤེས་པ་ལ་སོགས་པ་ལྟ་བུནི། ཐ་སྙད་ཤན་འབྱེད་ཀྱི་སྐབས་སུ་དངོས་པོའི་ཡིན་ལུགས་ལ་ཕྱིན་ཅི་མ་ལོག་པའི་ཤེས་རབ་ཀྱི་འཛིན་སྟངས་ཡིན་པས་དེ་ལྟར་ཤེས་ཤིང་བཞུགས་པ་ལས། ཡོན་ཏན་རྒྱ་ཆེན་པོ་ཐོབ་པ་ནི་འཐད་པ་དང་བཅས་ཏེ་གཏི་མུག་མེད་པའི་དགེ་རྩ་ཡིན་པའི་ཕྱིར་རོ། །དེ་ལྟ་བུའི་ཆོས་ཉིད་རྟག་བརྟན་གཡུང་དྲུང་ཆེན་པོ་དེ་གདོད་ནས་སེམས་ཅན་རྣམས་ཀྱི་མགོན་དུ་སེམས་ཀྱི་
ཆོས་ཉིད་ཀྱི་ཚུལ་དུ་བཞུགས་པ་ལ། དེ་ཡང་གཙང་བདེ་བདག་རྟག་གི་རང་བཞིན་ཅན་ཡིན་པར། མྱ་ངན་ལས་འདས་པའི་མདོ་ལས། དགེ་སློང་ཁྱེད་ཀྱང་མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། ཡོངས་སུ་མ་དག་པའི་འདུ་ཤེས་ལ་ནན་ཏན་དུ་བྱེད་པ་ནི། ཇི་ལྟར་མི་མང་པོ་དག་སོ་སོནས་གྱོ་མོ་དང་། རྡོ་བ་དང་། རྩ་དང་། ཤིང་དང་། གསེག་མ་དག་སྤུངསནསནོར་བུ་རིན་པོ་ཆེ་རྙེད་དོ་སྙམ་དུ་སེམས་པ་དང་འདྲའོ། །ཁྱེད་རྣམས་ཀྱང་ཐབས་ཤིན་ཏུ་མཁས་པར་གང་ནས་གང་དུ་གནས་ཀྱང་། བདག་ཏུ་འདུ་ཤེས་པ་དང་། རྟག་པ་དང་། བདེ་བ་དང་། ཡོངས་སུ་དག་པ་ཐབས་དང་ལྡན་པ་དེས་ནོར་བུ་རིན་པོ་ཆེ་བྱུང་བ་དང་འདྲ་བར། བདག་ཏུ་འདུ་ཤེས་པ་དང་། རྟག་པ་དང་། བདེ་བ་དང་། ཡོངས་སུ་དག་པར་འདུ་ཤེས་པ་དག་ནན་ཏན་དུ་བྱའོ། །ཞེས་དང་། བྱིས་
པ་མ་རབས་ཀྱི་བདག་ཏུ་འཛིན་པའི་མཐེ་བོང་ཙམ་ཞེའོ། །ཕྲ་མོ་ཙམ་འཛིན་ཏོ། །དེ་བཞིན་གཤེགས་པས་བདག་ཅེས་བརྗོད་པའི་དེ་ལྟ་བུ་མ་ཡིན་པས་ཆོས་ཐམས་ཅད་ལ་བདག་མེད་དོ་ཞེས་གསུངས་ཀྱང་། ཡང་དག་པ་ན་བདག་མེད་པ་མ་ཡིན་ཏེ། བདག་ཅེས་བྱ་བནི་ཆོས་གང་བདེན་པ། ཡང་དག་པར་རྟག་པར་གནས་པ། བདག་པོར་གྱུར་པ། མི་འགྱུར། མི་འཕོ་བ་སྨྲ་བ་ནི་བདག་ཅེས་བྱ་སྟེ། ཞེས་དང་། ཇི་ཙམ་དུ་སངས་རྒྱས་དང་ཆོས་དང་དགེ་འདུན་ལ་མི་རྟག་གོ་ཞེས་སྨྲ་བ་དེ་དགནི་བདག་ཅེས་བྱ་སྟེ་ཞེས་དང་། ཇི་ཙམ་དུ་སངས་རྒྱས་དང་ཆོས་དང་དགེ་འདུན་ལ་མི་རྟག་གོ་ཞེས་སྨྲ་བ་དེནི་བདག་ཀྱང་བསླུས་ལ་ཕ་རོལ་པོ་གཞན་ཡང་བསླུས་པ་ཡིན་ཏེ། རལ་གྲི་རྣོན་པོས་ལྕེ་བཅད་ཀྱང་བསླ་ཡི། སངས་རྒྱས་དང་ཆོས་དང་དགེ་འདུན་ལ་མི་རྟག་གོ་ཞེས་མི་
སྨྲའོ། །གཞན་དེ་སྐད་དུ་སྨྲ་བ་ལ་ཡིད་མི་ཆེས་ཏེ། དེ་སྐད་དུ་སྨྲ་བ་དེ་ལ་སྙིང་རྗེའི་སེམས་བསྐྱེད་དོ། །སངས་རྒྱས་དང་ཆོས་དང་དགེ་འདུན་ལ་བསམ་གྱིས་མི་ཁྱབ་པར་བཟུང་སྟེ་ཞེས་གསུངས་པ་སྟེ། རྒྱུད་བླ་མར་ཡང་། གཙང་བདག་བདེ་དང་རྟག་ཉིད་ཀྱི། །ཡོན་ཏན་ཕ་རོལ་ཕྱིན་པ་འབྲས། །ཞེས་དང་། འཇམ་དཔལ་མཚན་བརྗོད་ལས། ཐོག་མ་མེད་པ་སྤྲོས་མེད་བདག །དེ་བཞིན་ཉིད་བདག་དག་པའི་བདག །ཞེས་སོགས་མདོ་རྒྱུད་བསྟན་བཅོས་ཐམས་ཅད་ཀྱི་སྐབས་སུ་མཐུན་པར་གཞན་སྟོང་དབུ་མ་ཆེན་པོ་ནི་ཚིག་རིས་སུ་དུ་མ་འབྱུང་བ་དང་། དེ་ཡང་ངེས་དོན་གྱི་མདོ་དང་རྒྱུད་རྣམས་སུ་འབྱུང་བསན་ཐེག་པ་ཆེན་པོའི་ཆོས་སྐད་ཐུན་མོང་མ་ཡིན་པ་དང་། མཐར་ཐུག་གི་ཁྱད་པར་ཅན་ཡིན་པ་ཤེས་པར་བྱས་ནས་དོན་གྱི་གནད་གསང་ལ་མཁས་པར་བྱ་ཡི། ཚིག་གི་འཐེན་
ཁྱེར་གྱི་རྩོད་པས་གར་ཡང་མི་ཕྱིན་པ་ན་ཆོས་དང་གང་ཟག་གང་ལའང་ལོག་པར་མི་བལྟ་བར་དག་སྣང་ཕྱོགས་མེད་དུ་སྦྱོང་བའི་སྒོ་ནས། མེ་ཏོག་གང་ལ་ཕོག་པའི་ལྷ་སྐལ་སྔ་འགྱུར་རང་ལུགས་དྲི་མ་མེད་པའི་དགོངས་དོན་ཟབ་མོ་ངེས་དོན་དབུ་མ་ཆེན་པོའི་ལམ་སྲོལ་འདི་ལ་བློ་མིག་འབྱངས་བ་ཤིན་ཏུ་གལ་ཆེའོ། །དེ་ཡང་རྒྱ་བོད་གྲུབ་ཐོབ་ཐམས་ཅད་དགོངས་པ་གཅིག་ཟེར་བ་ལྟར། སྤྱིར་བསྟན་པའི་སྒོར་ཞུགས་ཐམས་ཅད། སྐྱབས་གནས་དཀོན་མཆོག་གསུམ་ལ་སྐྱབས་སུ་འགྲོ་བ་དང་། ལྟ་སྤྱོད་བཀའ་རྟགས་ཀྱི་ཕྱག་རྒྱ་བརྒྱད་ལས་མི་འདའ་བར་མཚུངས་ཤིང་། ཁྱད་པར་ས་དགེ་བཀའ་རྙིང་སོགས་ཀྱི་མཁས་གྲུབ་ཆེན་པོ་རྣམས་ཀྱི་གནས་སྐབས་དགོངས་གཞི་དང་དགོས་པའི་དབང་གིས་རྩལ་བཏོན་མཛད་ཚུལ་ཙམ་མ་གཏོགས། དོན་ལ་ཐེག་
པ་ཆེན་པོའི་གྲུབ་མཐའ་ཁོ་ནར་འཛིན་པར་མ་ཟད། གཞི་ལྟ་བ། ལམ་སྒོམ་པ། འཐོབ་བྱ་འབྲས་བུ་སོགས་གང་ལ་ཡང་ཁྱད་པར་མེད་ཅིང་། དེ་ལས་རང་སྟོང་གཞན་སྟོང་ཞེས་བྱ་བ་འདི་ཡང་ཀུན་རྫོབ་རང་ངོས་དང་། དོན་དམ་གཞན་ངོས་ནས་སྟོང་ཚུལ་གཉིས་སོ་སོར་རྩལ་དུ་བཏོན་པ་ཙམ་ལས་དོན་ལ་འགལ་བར་མི་སེམས་ཏེ། གཞན་སྟོང་པ་རྣམས་ཀྱིས་ཀྱང་མཉམ་བཞག་ལ་བཟློ་བའི་ཚེ་སྤྲོས་པ་ཀུན་བྲལ་དུ་བསྒོམ་པར་གསུངས་པས་ཆོས་ཐམས་ཅད་སྟོང་ཉིད་དུ་བཞེད་ལ། དེ་མ་བཞེད་ན་ཀུན་རྫོབ་རང་ངོས་ནས་སྟོང་ཚུལ་མི་ཤེས་པས་དངོས་འཛིན་གྱི་སྤྲོས་པ་མི་འདོར་བ་དང་། གཉིས་སྣང་དང་གཉིས་འཛིན་གྱིས་བསྡུས་པའི་ཀུན་རྫོབ་ཀྱི་ཆོས་རྣམས་བདེན་གྲུབ་ཏུ་འགྱུར་པསན། ཀུན་མཁྱེན་རོང་ཀློང་གཉིས་དང་། རྗེ་བཙུན་ཏཱ་ར་ན་ཐ་སོགས་ཀྱི་གཞུངན་སྤྲོས་པ་ཀུན་དང་།
བྲལ་བའི་སྟོང་ཉིད་ཟབ་མོའི་ཆ་གཞིར་བཞག་ནས་རང་བཞིན་བདེ་གཤེགས་སྙིང་པོ་མི་སྟོང་པར་སྒྲུབ་པས་ན་བདེན་གྲུབ་ཏུ་འགྱུར་བའི་སྐྱོན་རྣམ་པ་ཀུན་ཏུ་མེད་དོ་ཞེས་འཇམ་མགོན་ཐུགས་ཀྱི་སྲས་གཅིག་འཇམ་དབྱངས་མི་ཕམ་རྒྱ་མཚོའི་གཞན་སྟོང་ཁས་ལེན་སེང་གེའི་ང་རོན་ལུང་རིགས་དང་བཅས་པས་གསལ་བར་བསྟན་པ་བཞིན་ཡིན་ལ། རང་སྟོང་པ་རྣམས་ཀྱིས་ཀྱང་རྗེས་ཐོབ་ཤན་འབྱེད་པའི་ཚེ་ན་དོན་དམ་པར་རང་གི་ངོ་བོ་མི་སྟོང་པ་དང་། དེ་ཡང་སེམས་ཅན་ཐམས་ཅད་ཀྱི་རྒྱུད་ལ་ཡེ་ནས་རྟག་བརྟན་འཕོ་འགྱུར་མེད་པར་བཞུགས་པའི་ཆོས་ཉིད་ཀྱི་དགོངས་དོན་ཟབ་མོ་ཚུལ་བཞིན་དུ་མ་བཤད་ན་དོན་དམ་གཞན་ངོས་ནས་སྟོང་ཚུལ་མི་ཤེས། དེ་མི་ཤེས་ན་ལམ་གྱི་སྔོན་འགྲོའི་སྟོང་ཉིད་ཙམ་ལས་དངོས་གཞི་འོད་གསལ་གྱི་དགོངས་དོན་ཟབ་མོ་ཇི་བཞིན་མི་
ཤེས་པས་དངོས་མེད་ཀྱི་སྤྲོས་པ་མི་འདོར་བས་དང་། དོན་དམ་སྟོང་དབྱིངས་འབའ་ཞིག་ཉན་ཐོས་ཀྱི་འགོག་པ་ལྟ་བུ་ལས་འཇོག་རྒྱུ་མེད་པ་དང་། སྣང་ཆ་སྟོབས་སོགས་ཀྱི་ཡོན་ཏན་ཐམས་ཅད་འདུས་བྱས་སུ་འགྱུར་བས་ན་གཞན་བྱུང་འཁྲུལ་པའི་ཡེ་ཤེས་ཙམ་ལས་རང་བྱུང་འདུས་མ་བྱས་པའི་ཡེ་ཤེས་བཞག་རྒྱུ་མེད་པ་དང་། ངེས་དོན་གྱི་ལུང་རྣམས་དང་ཡང་འགལ་བར་འགྱུར་བས་ན་རྒྱལ་བ་ཙོང་ཁ་པ་དང་། ཀུན་མཁྱེན་གོ་རམས་པ་སོགས་ཀྱི་ཡིག་ཆནང་། ཀུན་ཉོན་ཕྱོགས་འཇོམས་པའི་ཐབས་མཁས་ཀྱིས་རེ་ཞིག་ཆོས་ཉིད་རང་གི་ངོ་བོ་སྟོང་ཉིད་དུ་རྩལ་དུ་བཏོན་ནས་བཤད་ཀྱང་། མཐར་ཐུག་དངོས་གཞིའི་དགོངས་དོན་འཛིན་མེད་ཡང་དག་པའི་འོད་གསལ་མཉམ་ཉིད་ཆེན་པོའི་སྒོམ་པ་ཟབ་མོ་ཟུར་དུ་མཉམ་བཞག་སློབ་བཤད་ཀྱི་ཚུལ་དུ་མཚོན་ཙམ་རེ་བྱུང་བས་དོན་དམ་
གཞན་ངོས་ནས་སྟོང་ཚུལ་བཞེད་དོ་སྙམ་མོ། །དེས་ན་ས་དགེ་བཀའ་རྙིང་སོགས་ཀྱི་མཁས་གྲུབ་ཆེན་པོ་རྣམས་ཀྱི་དགོངས་པ་ལ་གནས་སྐབས་སྒྲོ་བསྐུར་གྱི་མཐའ་རེ་རེ་དགག་པའི་ཆེད་དུ་སྣང་སྟོང་གཉིས་སོ་སོར་རྩལ་བཏོན་མཛད་ཚུལ་བཤད་ཚུལ་སོ་སོར་ཡོད་པ་དང་། མཐར་ཐུག་དགོངས་པའི་ཞེ་ཕུགས་ལ་སྒྲོ་སྐུར་གྱི་མཐའ་གཉིས་ཀ་དང་བྲལ་བའི་བདེན་གཉིས་ཀྱི་གཞུང་ལམ་ཡོངས་སུརྫོགས་པ་ལ་ཁྱད་པར་མེད་པར་ཤེས་དགོས་ཀྱི། གཞན་དུ་དག་སྣང་ཆེ་མདོག་གི་མཐའ་གཅིག་ཏུ་ཁྱད་མེད་དུ་སྒྲུབ་པ་ལ་དམ་བཅའ་ཙམ་ལས་སྒྲུབ་བྱེད་ཡང་དག་མེད་པས་དེ་ལ་གཞན་གྱིས་ལུང་རིགས་ཀྱི་སྒོནས་གནོད་པ་བསྟན་པ་ལ། ལན་མེད་པར་སྡང་མིག་གཡོ་བའི་བཀའ་བཅད་ལས་རང་གཞན་གཉིས་ཀ་ཕུང་བའི་ཁོང་ཁྲོ་ལ་སྦྱར་བ་དང་། ཡང་གྲུབ་མཐའ་ལ་རྣོ་
བའི་སོ་བཏོན་མདོག་གིས་མཐའ་གཅིག་ཏུ་ཁྱད་པར་ཕྱེས་ཏེ་སུན་འབྱིན་ལྟར་སྣང་གི་དགག་སྒྲུབ་ཀྱིས་ཉི་མ་འཕུལ་བ་ལས། རྨོངས་པ་རྣམས་ལོག་ལམ་དུ་ཁྲིད་ནས་ཆོས་དང་གང་ཟག་ལ་དབང་ཟོས་ཀྱིས་ཆོས་སྤོང་ཡ་ངའི་ལས་ལ་སྦྱར་བ་སོགསནི། བློ་གྲོས་ཀྱི་གོ་དོག་པའི་རྣམ་འགྱུར་དུ་གསལ་བས་རྣམ་པ་ཀུན་ཏུ་གོ་བ་ཟོལ་ཡངས་པོར་བྱས་ཏེ་བསྟན་པ་ཐམས་ཅད་འགལ་མེད་དང་། གྲུབ་མཐའ་ཐམས་ཅད་གདམས་ངག་ཏུ་གོ་ནས་བསྟན་པའི་ལྷག་ཞབས་ཀླ་ཀློའི་སྡུད་དབང་དུ་ཉེ་བ་ན་བསྟན་པའི་སྒོར་ཞུགས་ཆོས་མཐུན་གྱི་སྡེ་རྣམས་ལ་སྙིང་ལྟར་བརྩེ་བའི་སྒོ་ནས། ཕྱོགས་རིས་ཀྱི་མིག་ཅན་རང་མཐོང་ཨུ་ཚུགས་ཀྱི་སྙེམ་པ་རིང་དུ་སྤོང་སྟེ་གཞུང་ལུགས་རབ་འབྱམས་ལ་བློ་གྲོས་མཆོག་ཏུ་བསྐྱེད་ནས་ཐོས་བསམ་རྒྱུད་ཐོག་ཏུ་ཁེལ་དགོས་པའི་ལམ་དོན་གཉེར་གྱི་གང་ཟག་རྣམས་ཀྱི་
སྙིངནོར་དུ་བྱ་བར་རིགས་སོ། །འབྲས་བུ་ལམ་དུ་བྱེད་པ་གསང་སྔགས་རྡོ་རྗེ་ཐེག་པ་ལའངནང་རང་ལུས་ལྷ་རུ་མི་འདོད་པར་ལྷ་ཕྱི་རོལ་ནས་བཙལ་བས་ཕྱི་རྒྱུད་སྡེ་གསུམ་དང་། ལྷ་ཕྱི་རོལ་ནས་འཚལ་མི་དགོས་པརནང་རང་ལུས་ལྷ་རུ་འདོད་པསནང་རྒྱུད་སྡེ་གསུམ་དང་གཉིས་ཡོད། དང་པོ་རང་བཞིན་ལྷར་འདོད་ཅིང་ངོ་བོ་ལྷར་མི་འདོད་པའི་ཕྱི་རྒྱུད་སྡེ་གསུམ་ལས་ཕྱི་ལུས་ངག་གི་བྱ་བ་གཙོ་བོར་བཏོན་པ་བྱ་བ་རྒྱུད་ཀྱིས་དོན་དམ་པར་རང་གི་སེམས་ཉིད་སྤྲོས་པའི་མཐའ་ཐམས་ཅད་དང་བྲལ་བ་སྟོང་གསལ་འདུས་མ་བྱས་པའི་བདག་ཉིད་དུ་བཞུགས་ནའང་། དེའི་རྩལ་ལས་ཤར་བའི་སྣང་བ་སྣ་ཚོགས་སྣང་བ་འདི་རྣམས་ད་ལྟ་ཉིད་ནས་ལྷ་མིན་པར་རྐྱེན་གྱིས་བསྐྱེད་པའི་འཁྲུལ་སྣང་དུ་ཁས་ལེན་ཅིང་དེ་ཡང་དམ་ཡེ་ཐ་དད་རྗེ་ཁོལ་གྱི་ཚུལ་དུ་བལྟས་
ནས། ཀུན་རྫོབ་ཀྱི་སྣང་ཆ་འདི་རྣམས་ཡོངས་སུ་དག་པའི་ལྷའི་རང་བཞིན་ཅན་དུ་བསྒོམ་ན་མཐར་ཐུག་དེར་འགྱུར་བའི་ཡོན་ཏན་ཡོད་པར་འདོད། དེ་ཡང་འདི་པས་ཡོན་ཏན་ལྷར་འདོད་པས་མཚན་ཉིད་ཐེག་པའི་ངེས་དོན་གྱི་མདོ་རྣམས་དང་སྔགས་གཉིས་གཅིག་ཏུ་འགྱུར་པའི་དོགས་པ་མི་དགོས་ཏེ། བྱ་རྒྱུད་དུ་ཡང་མི་འདྲ་ན་ནང་རྒྱུད་དང་མི་འདྲ་བ་ལྟ་ཅི་སྨོས་སོ། །སྤྱོད་པ་བྱ་རྒྱུད་ལྟ་བ་རྣལ་འབྱོར་གྱི་རྒྱུད་དུ་གཏོགས་པས་གཉིས་ཀའི་ཐེག་པའམ། སྤྱོད་རྒྱུད་ནི་ཕྱི་ལུས་ངག་གི་སྤྱོད་པ་དངནང་ཏིང་ངེ་འཛིན་གཉིས་ཆ་མཉམ་པར་སྤྱོད་པའི་དོན་དམ་པར་སྣང་སྤྱོད་ཐམས་ཅད་ལྷར་འདོད་པ་མ་ཟད། མ་དག་འཁྲུལ་པའི་སྣང་ཆ་ལྷར་ཤར་བའི་ཀུན་རྫོབ་ཀྱི་ཆོས་འདི་རྣམས་དམ་ཡེ་མཉམ་པ་སྤུན་གྲོགས་ཀྱི་ཚུལ་དུ་བལྟསནས་བསྒོམན་དེར་འགྱུར་བ་འདོད། ནང་གི་བསྒོམ་པ་གཙོ་བོར་བཏོན་པའི་
རྣལ་འབྱོར་རྒྱུད་ནི། དོན་དམ་པར་སྣང་སྤྱོད་ཐམས་ཅད་ཡེ་ནས་ལྷའི་རང་བཞིན་ཅན་དུ་རྟོགས་པའི་བྱིན་བརླབས་ལས། ཀུན་རྫོབ་ཀྱི་སྣང་ཆ་འདི་རྣམས་རྡོ་རྗེ་དབྱིངས་ཀྱི་ལྷར་བལྟས་ནས་དམ་ཡེ་དབྱེར་མེད་དུ་བསྒོམས་ནས་དེར་འགྱུར་བར་འདོད། ངོ་བོ་དང་རང་བཞིན་གཉིས་ཀ་ལྷར་འདོད་པའི་ནང་རྒྱུད་སྡེ་གསུམ། དང་པོ་བསྐྱེད་པ་མ་ཧཱ་ཡོ་ག་ནི། དོན་དམ་དཀོར་བདུན་ངོ་བོ་ཉིད་སྐུར་ལྷུན་གྱིས་གྲུབ་ཅིང་རྩལ་སྣང་ཀུན་རྫོབ་ཀྱི་ཆོས་ཐམས་ཅད་ཡེ་ནས་གདན་གསུམ་ཚང་བ་ལྷའི་ངོ་བོར་གནས་ཤིང་། དེ་ཡང་ལྡོག་པས་ཕྱེ་བ་ལས་ངོ་བོ་ཐ་དད་མེད་པར་ལྷག་པའི་བདེན་གཉིས་དབྱེར་མེད་ཆོས་སྐུ་ཆེན་པོར་གཏན་ལ་ཕབས་ནས་གང་སྣང་བ་ཐམས་ཅད་བསྐྱེད་རིམ་གྱི་ལམ་དུ་བསླངས་ཏེ། མ་དག་མཚན་མར་འཛིན་པའི་དྲི་མ་ཐམས་ཅད་སྦྱངས་དགོས་པར་བཞེད་
པས། ཞེན་རྟོག་གཉིས་ཆོས་ཉིད་དུ་མི་འདོད་ཀྱང་སྔགས་ཕྱི་པ་ལས་ཁྱད་པར་འཕགས་སོ། །རྫོགས་རིམ་གཙོ་བོར་བཏོན་པ་ཨ་ནུ་ཡོ་གནི། དབྱིངས་སྐྱེ་མེད་སྤྲོས་པའི་མཐའ་ཐམས་ཅད་དང་བྲལ་བ་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར་དང་ཡུལ་ཅན་རང་བྱུང་གི་ཡེ་ཤེས་རང་བཞིན་ལྷུན་གྱིས་གྲུབ་པའི་ཀུན་ཏུ་བཟང་པོའི་དཀྱིལ་འཁོར་དང་། དེ་གཉིས་དབྱེར་མི་ཕྱེད་པ་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཏེ་ཆོས་ཐམས་ཅད་ཡེ་ནས་དཀྱིལ་འཁོར་རྣམ་གསུམ་གྱི་ངོ་བོར་བྱང་ཆུབ་ཅིང་མ་འདྲེས་ཡོངས་རྫོགས་སུ་གཏན་ལ་ཕབས་ནས། གང་ཤར་ཐམས་ཅད་རྫོགས་རིམ་གྱི་ལམ་དུ་བསླངས་ཏེ་རྩ་ཐིག་རླུང་གསུམ་སོགས་རང་ལུས་ལ་གནད་དུ་བསྣུན་པའི་སྒོནས་ཐ་མལ་འཁྲུལ་རྟོག་གི་ཆ་རྣམས་དབྱིངས་སུ་སྡོམ་དགོས་པར་འདོད་པས། བཏགས་པ་ཆོས་ཉིད་
དུ་མི་འདོད་ཀྱང་སྣང་ཞེན་གཉིས་ཀ་ཆོས་སུ་འདོད་པས་མ་ཧཱ་ལས་ཁྱད་པར་དུ་འཕགས་སོ། །བསྐྱེད་རྫོགས་གཉིས་སུ་མེད་པ་ཨ་ཏི་ཡོ་ག་ནི། སྣང་སྲིད་འཁོར་འདས་ཀྱི་ཆོས་ཐམས་ཅད་རིག་པ་ཡེ་ཤེས་ཀྱི་ཀློང་དུ་རྫོགས་ཤིང་། ཆོས་ཉིད་དོན་དམ་གྱི་གཞི་ལ་འཕོ་འགྱུར་མེད་པ་སྣང་ཞེན་སྟོང་སོགས་གང་སྣང་ཆོས་སྐུའི་ཡོ་ལང་དུ་འདོད་པས། གདོད་ལམ་གྱི་རོལ་རྩལ་ལ་ལྟོས་ཏེ་གསར་དུ་སྒྲུབ་མི་དགོས་པར་ཡེ་ནས་སངས་རྒྱས་ཟིན་པའི་དགོངས་པ་རྙེད་པས། ཨ་ཏི་ཡོ་ག་འདིནི་ལམ་གྱི་མེ་རྩ་ལྟ་བུ་ཡིན་པས་ཐེག་པ་ཐམས་ཅད་ཀྱི་མཐར་ཐུག །འབྲས་བུ་ཐམས་ཅད་ཀྱི་སྐྱེལ་སོ། །ལམ་ཐམས་ཅད་ཀྱི་ནང་ནས་ཉེ་ལམ་ཆེན་པོ་མཆོག་ཏུ་གྱུར་པ་སྐད་ཅིག་གིས་གྲོལ་བ་སྟེར་བའི་ཆོས་ཟབ་མོའོ། །དེ་ལ་རོལ་པ་ཕྱི་ཤར་ཆོས་ཉིད་ཀྱི་རྒྱན་དུ་འདོད་པ་ཆོས་ཅན་སེམས་ཀྱི་
སྡེ་དང་། སེམས་ཉིད་མཐའ་བྲལ་ཀུན་ཏུ་བཟང་མོའི་ཀློང་ནས་འདའ་ས་མེད་པར་འདོད་པ་ཆོས་ཉིད་ཀློང་གི་སྡེ་དང་། ཕྱི་ནང་གཉིས་འཛིན་གྱི་རྟོག་པ་ཕྲ་མོ་ཙམ་ཡང་མེད་པ་སྣང་རིག་ཟང་ཐལ་འདོད་པ་དབྱེར་མེད་མན་ངག་གི་སྡེ་སོགས་ཤིན་ཏུ་མང་པོ་སྤྲོ་རྒྱུ་ཡོད་ན་ཡང་། ཟབ་དོན་རྗེན་ལ་ཕུད་ནས་གབ་སྦས་མེད་པར་བཤད་ན་རྟོག་གེའི་རྣ་བར་མི་མཛེས་ཤིང་། སྔགས་ཀྱི་དགོངས་པ་ཟབ་མོ་གསང་སྒྲོགས་སུ་འགྱུར་བས་ན་མཚོན་ཙམ་ལས་མ་སྨྲས་སོ། །དེ་ལྟར་གྲུབ་མཐའི་ཟབ་གནད་སྙིང་པོ་ཙམ། །ཡང་དག་ཚད་མའི་གཞུང་ལས་འདིར་བསྡུས་པ། །འགལ་བ་མེད་སྙམ་དགེ་དེས་ལུས་ཅན་རྣམས། །རྣམ་གྲོལ་བྱང་ཆེན་རྒྱ་མཚོར་འཇུག་གྱུར་ཅིག །ཅེས་པ་འདིའང་སྤྲུལ་པའི་སྐུ་དཀོན་མཆོག་དཔལ་བཟང་ནས་བཀྲ་ཤིས་པའི་ལྷ་རེག་དང་བཅས་བསྐུལ་ངོར། ཐུགས་འཛིན་བདེ་ཕྱིར་ཉུང་ངུ་རྣམ་གསལ་གྱི་ཚུལ་
དུ་ཨཀཱ་ར་ཤི་ལའི་མིང་གིས་བཀོད་པ་འདིས་ཀྱང་ཡང་དག་སྣང་བ་དམ་པ་སྦྱིན་པའི་རྒྱུར་གྱུར་ཅིག །སརྦ་མངྒ་ལཾ།། །།བཀྲ་ཤིས་ཀྱིས་བསྟོད།།