རིག་སྔགས་དྲན་པའི་ཕན་ཡོན།
གཉིས་པ་ནི།
དེ་ཡི་དུག་ནི་དྲག་པོ་ཆེན་པོ། །
བརྟན་གནས་པའམ་གཞན་ཡང་འགྲོ་བ། །
ཟོས་པ་དང་ནི་འཐུངས་པ་ཉིད་ཀྱང་། །
དྲན་པས་རབ་ཏུ་སེལ་བ་ཉིད་ཐོབ། །
གདོན་དང་རིམས་དང་དུག་གིས་བཟིར་བའི། །
སྡུག་བསྔལ་ཚོགས་ནི་རྣམ་པར་སྤོང་སྟེ། །
སེམས་ཅན་གཞན་པ་རྣམས་ལ་ཡང་ངོ་། །ཞེས་པ་སྟེ།
ལྷ་མོའི་རིག་སྔགས་བཅོས་མིན་གྱི་དད་པས་དྲན་པའི་གང་ཟག་དེའི་རྒྱུད་ལ་ཟོས་འཐུངས་རེག་པ་སོགས་ཀྱིས་རྒྱུ་བ་དང་མི་རྒྱུ་བའི་དུག་སྡུག་བསྔལ་ཚབས་ཆེན་བསྐྱེད་པའི་དྲག་པོ་ཞུགས་པ་ཡང་སེལ་བ་དང་། གདོན་དང་རིམས་ཀྱིས་གཟིར་བའི་སྡུག་བསྔལ་སྣ་ཚོགས་པ་རྣམས་ཀྱང་སྤོང་བར་འགྱུར་ཞིང་། རིག་སྔགས་ཀྱི་སྦྱོར་བ་བསྟེན་ན་སེམས་ཅན་གཞན་གྱི་དུག་དང་སྡུག་བསྔལ་ཡང་མེད་པར་བྱེད་དོ། །