གསུམ་པ་འོད་བྱེད་པ་བཤད་པ།

གསུམ་པ་གསུམ་པ་འོད་བྱེད་པ་བཤད་པ་ལ།

ཁྱད་གཞི་སའི་ངེས་ཚིག ཁྱད་ཆོས་སའི་ཡོན་ཏན། ཕར་ཕྱིན་དང་པོ་གསུམ་གྱི་ཁྱད་པར་གྱི་ཆོས། སའི་ཡོན་ཏན་བརྗོད་པའི་སྒོ་ནས་མཇུག་བསྡུ་བ་དང་བཞི་ལས། དང་པོ་ནི། རྩ་བར། ཤེས་བྱའི་བུད་ཤིང་མ་ལུས་སྲེག་པའི་མེ། །འོད་འབྱུང་ཕྱིར་ན་ས་ནི་གསུམ་པ་འདི། །འོད་བྱེད་པ་སྟེ་བདེ་གཤེགས་སྲས་དེ་ལ། །དེ་ཚེ་ཉི་ལྟར་ཟངས་འདྲའི་སྣང་བ་འབྱུང༌། །ཞེས་ས་གསུམ་པ་ཐོབ་པ་དེའི་ཚེ་གཉིས་སྣང་འཁྲུལ་བའི་ངོར་སྣང་བའི་ཤེ༷ས་བྱ༷འི་བུ༷ད་ཤི༷ང་མ༷་ལུ༷ས་པ་བསྲེ༷ག་པ༷འི་ཡེ་ཤེས་ཀྱི་མེ༷། མཉམ་བཞག་ཏུ་གཉིས་སྣང་གི་སྤྲོས་པ་མ་ལུས་པ་ཞི་བར་བྱེད་ནུས་ཀྱི་འོ༷ད་འབྱུ༷ང་བའི་ས་ཡིན་པའི་རྒྱུ་མཚན་དེའི་ཕྱི༷ར་ན་ས༷་ནི༷་གསུ༷མ་པ༷་འདི༷་ལ་འོ༷ད་བྱེ༷ད་པ༷་ཞེས་བྱ་སྟེ༷། དོན་དམ་པའི་སེམས་གསུམ་པ་བསྐྱེད་པའི་བདེ༷་བར་གཤེ༷གས་པའི་རྒྱལ་བའི་སྲ༷ས་པོ་དེ༷་ལ༷་ས་གསུམ་པ་ཐོབ་པ་དེ༷འི་ཚེ༷་མཉམ་བཞག་གི་གཉིས་སྣང་བསྲེག་པའི་ཡེ་ཤེས་ཀྱི་མེ་ཐོབ་པའི་རྟགས་སུ་རྗེས་ཐོབ་ཏུ་དཔེར་ན་ཉི༷་མ་འཆར་ཁ་ལྟ༷ར་ཟ༷ངས་འདྲ༷འི་སྣ༷ང་བ༷་འབྱུ༷ང་བ་ལྟར་ཡེ་ཤེས་ཀྱི་སྣང་བ་འོད་དམར་པོའི་མེར་གྱིས་ཀུན་ཏུ་ཁྱབ་པའི་སྣང་བ་འབྱུང་བའི་ཕྱིར་ཏེ། རྒྱན་ལས། ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་པའོ། །ཞེས་དང༌། རིན་ཆེན་འཕྲེང་བ་ལས། ས་གསུམ་པ་ལ་ནི་འོད་བྱེད་པའོ། །ཞེསགསུངས་པའི་ཕྱིར་རོ། །

གཉིས་པ་ཁྱད་ཆོས་སའི་ཡོན་ཏན་བཤད་པ་ལ།

ས་འདིར་བཟོད་པ་ལྷག་པར་བསྟན་པ། བཟོད་པ་གཞན་ཇི་ལྟར་བསྟེན་པའི་ཚུལ། བཟོད་པའི་ཕར་ཕྱིན་གྱི་དབྱེ་བ། ས་འདིར་འབྱུང་བའི་དག་པའི་ཡོན་ཏན་གཞན་བསྟན་པ་དང་བཞི་ལས། དང་པོ་ནི། རྩ་བར། གལ་ཏེ་གནས་མིན་འཁྲུགས་པ་འགའ་ཡིས་དེའི། །ལུས་ལས་ཤ་ནི་རུས་བཅས་ཡུན་རིང་དུ། །སྲང་རེ་རེ་ནས་བཅད་པར་གྱུར་ཀྱང་དེའི། །བཟོད་པ་གཅོད་པར་བྱེད་ལ་ལྷག་པར་སྐྱེ། །ཞེས་ཡེ་ཤེས་ཀྱི་སྣང་བ་དེ་ལྟ་བུ་རྙེད་པའི་བྱང་ཆུབ་སེམས་དཔའ་དེ་ལ། བཟོད་པའི་ཕ་རོལ་ཏུ་ཕྱིན་པ་ལྷག་པ་ཉིད་དུ་བསྟན་ལ། ག༷ལ་ཏེ༷་བྱང་སེམས་ལ་ཁྲོ་བ་པོ་གཞན་དག་གིས་བྱང་སེམས་ལ་ཀུན་ནས་མནར་སེམས་པའི་གཞི། བྱང་སེམས་འདིའི་བདག་དང་བདག་གི་གཉེན་ལ་གནོད་པ་སྔར་བྱས་པའོ། །ད་ལྟར་བྱེད་དོ། །མ་འོངས་པ་ན་བྱེད་པར་འགྱུར་རོ། །སྙམ་པའི་གཞིའི་སྒོ་གསུམ་གྱི་བྱ་བ་ཅུང་ཟད་ཀྱང་མི་མངའ་བས་ན་ཁོང་ཁྲོ་བའི་གན༷ས་ཡུལ་མི༷ན་ཡང༌། བྱང་སེམས་དེ་འདྲ་བ་ལ་ཁོང་འཁྲུ༷ག་པ༷་ཅན་འག༷འ་ཡི༷ས། བྱང་སེམས་དེ༷འི་ལུ༷ས་ལ༷ས་ཤ༷་ནི༷་རྐྱང་བ་གཅོད་པ་མིན་པར་རུ༷ས་པ་དང་བཅ༷ས་པར་རྒྱུན་ཐུང་ངུ་གཅིག་ལ་མི་གཅོད་པར་སྡོད་ཅིང་སྡོད་ཅིང་ཡུ༷ན་རི༷ང་མོ་ཞིག་ཏུ༷་གཅོད་པ་དང༌། དེ་ཡང་ཤིན་ཏུ་ཆེ་བ་མི་གཅོད་པར་སྲ༷ང་རེ༷་རེ༷་ན༷ས་བཅ༷ད་པ༷ར་གྱུ༷ར་ཀྱ༷ང༌། གཅོད་པ་པོ་དེ་ལ་ཁོང་ཁྲོ་མི་འབྱུང་བར་མ་ཟད། སྡིག་པའི་ལས་དེ༷འི་རྐྱེན་གྱིས་དམྱལ་བ་ལ་སོགས་པའི་སེམས་ཅན་གཞན་གྱིས་མྱོང་བའི་སྡུག་བསྔལ་ལས་ཆེས་ལྷག་པའི་སྡུག་བསྔལ་མྱོང་བར་དམིགས་པའི་སྒོ་ནས་བཟོ༷ད་པ༷་གཅོ༷ད་པ༷ར་བྱེ༷ད་པ་པོ་དེ་ལ༷་དམིགས་ནས་ཆེས་ལྷ༷ག་པ༷ར་སྐྱེ༷་བར་འགྱུར་བ་ཡིན་ནོ། །བཟོད་པ་ལྷག་ཚུལ་ནི་གཞན་གྱིས་གནོད་པ་ཇི་ཙམ་བྱེད་བཞིན་གནོདཔ་ལ་བཟོད་པ་ཤིན་ཏུ་ཆེས་ཆེ་བར་འགྱུར་བ་དེའོ། །

དེ་ལས་རྒྱུ་གཞན་གྱིས་ཀྱང་བཟོད་པ་ཆེས་ལྷག་པར་སྐྱེ་བར་འགྱུར་ཏེ། རྩ་བར། བདག་མེད་མཐོང་བའི་བྱང་ཆུབ་སེམས་དཔའ་ལ། །གང་ཞིག་གང་གིས་གང་ཚེ་ཇི་ལྟར་གཅོད། །གང་ཕྱིར་ཆོས་ཀྱང་དེ་ཡི་གཟུགས་བརྙན་ལྟར། །མཐོང་བ་དེས་ན་དེ་ཡིས་བཟོད་པར་འགྱུར། །ཞེས་བད༷ག་མེ༷ད་མངོན་སུམ་དུ་མཐོ༷ང་བ༷འི་བྱ༷ང་ཆུ༷བ་སེ༷མས་དཔ༷འ་ཡི་ལུས་ལ༷། ག༷ང་ཞི༷ག་གཅོད་པར་བྱ་བ་དང༌། ག༷ང་གི༷ས་གཅོད་པ་དང༌། དུས་ག༷ང་གི་ཚེ༷་ཇི༷་ལྟ༷ར་གཅོ༷ད་པའི་འཁོར་གསུམ་རྒྱུ་མཚན་ག༷ང་གི་ཕྱི༷ར་བཟོད་ན་དེས་ཆོ༷ས་རྣམས་ཀྱ༷ང་དེ༷་ཡི༷་བདེན་མེད་གཟུ༷གས་བརྙ༷ན་ལྟ༷ར་མངོན་སུམ་དུ་མཐོ༷ང་བ༷་དེ༷ས་ན༷་བྱང་སེམས་དེ༷་ཡི༷ས་གནོད་པ་ལ་ཆེས་ལྷག་པར་བཟོ༷ད་པ༷ར་འགྱུ༷ར་བའི་ཕྱིར་རོ། །རང་འགྲེལ་ལས། ཀྱང་གི་སྒྲས་ནི་བཟོད་པའི་རྒྱུ་བསྡུ་བར་བྱ་བའི་ཕྱིར་རོ། །ཞེས་སོ། །

དེས་ན་ས་དང་པོ་དང་གཉིས་པའི་དུས་སུ་གནོད་པའི་འཁོར་གསུམ་གཟུགས་བརྙན་ལྟ་བུར་མངོན་སུམ་དུ་མཐོང་བ་དེའི་རྒྱུད་མི་འཁྲུགས་པར་བཟོད་པ་ཙམ་བྱེད་པ་དང༌། གསུམ་པས་དེའིཆེས་ལྷག་པར་བཟོད་པ་སྐྱེ་བར་བྱེད་ནུས་སོ། །

གཉིས་པ་བཟོད་པ་གཞན་ཇི་ལྟར་བསྟེན་པའི་ཚུལ་ལ།

ཁོང་ཁྲོ་བྱ་བར་མི་རིགས་པ་དང༌། བཟོད་པ་བསྟེན་པར་རིགས་པ་དང་གཉིས། དང་པོ་ལ། དགོས་པ་མེད་ཅིང་ཉེས་དམིགས་ཆེ་བའི་ཁོང་ཁྲོ་བར་མི་རིགས་པ་དང༌། ཕྱིས་ཀྱི་སྡུག་བསྔལ་མི་འདོད་པ་དང་གནོད་ལན་བྱེད་པ་གཉིས་འགལ་བར་བསྟན་པ། སྔར་ཡུན་རིང་བསགས་པའི་དགེ་བ་འཇོམས་པས་ཁོང་ཁྲོ་བརམི་རིགས་པ། མི་བཟོད་པའི་སྐྱོན་མང་པོ་བསམ་ནས་ཁོང་ཁྲོ་དགག་པ་དང་བཞི།

དང་པོ་ནི། རྩ་བར། གནོད་པ་བྱས་པས་གལ་ཏེ་དེར་བཀོན་ན། །དེ་ལ་བཀོན་པས་བྱས་ཟིན་ལྡོག་གམ་ཅི། །དེ་ཕྱིར་དེ་བཀོན་ངེས་པར་འདིར་དོན་མེད། །འཇིག་རྟེན་ཕ་རོལ་ཡང་ནི་འགལ་བར་འགྱུར། །ཞེས་བཟོད་པ་འདི་ནི་བྱང་སེམས་སར་གནས་རྣམས་ཀྱི་ཐུགས་དང་འཚམས་པའི་ཆོས་ཡིན་པ་ཙམ་དུ་མ་ཟད་ཀྱི། སར་གནས་ལས་གཞན་པ་རྣམས་ཀྱི་ཡང་ཡོན་ཏན་མཐའ་དག་མི་འཛད་པར་སྲུང་བའི་རྒྱུ་ཡང་ཡིན་པས་མི་བཟོད་པའི་ཁྲོ་བ་ལས་ལྡོག་ནས་བཟོད་པ་བསྟེན་རིགས་པར་འཆད་པ་ལ། གཞན་གྱིས་ཚུར་གནོ༷ད་པ༷་བྱ༷ས་པ༷ས་ག༷ལ་ཏེ༷་གནོད་བྱེད་དེ༷ར་ཕར་བཀོ༷ན་པའམ་ཁྲོ་ན༷། གནོད་བྱེད་དེ༷་ལ༷་བཀོ༷ན་པའམ་ཞེ་འཁམས་བྱས་པ༷ས་ཚུར་རང་ལ་གནོད་པ་བྱ༷ས་ཟི༷ན་པ་དེ་ལྡོ༷ག་ག༷མ་ཅི༷་སྟེ་ལྡོག་ཏུ་མེད་པ་དེ༷འི་ཕྱི༷ར་གནོད་བྱེད་དེ༷་ལ་བཀོ༷ན་པ་ངེ༷ས་པ༷ར་འདི༷ར་དོ༷ན་ཅུང་ཟད་ཀྱང་འབྱུང་བ་མེ༷ད་པ་དང༌། རང་ལ་རྨ་འབྱིན་པ་སོགས་གནོད་བྱས་པ་ལས་སླར་ཁྲོ་བས་རྨ་འབྱིན་པ་དག་པར་འགྱུར་བ་སོགས་གནོད་པ་སླར་ལྡོག་པའི་དགོས་དོན་མེད་པ་མ་ཟད་འཇི༷ག་རྟེ༷ན་ཕ༷་རོ༷ལ་གྱི་དོན་དང་ཡ༷ང་ནི༷་འག༷ལ་བ༷ར་འགྱུ༷ར་ཏེ་སླར་ཁོང་ཁྲོ་བས་ནི་འཇིག་རྟེན་ཕ་རོལ་ཏུ་བདེ་བ་འབྱུང་བའི་དོན་དང་བྲལ་ནས་རྣམ་སྨིན་སྡུགབསྔལ་འཕེན་པའོ། །

གཉིས་པ་ཕྱིས་ཀྱི་སྡུག་བསྔལ་མི་འདོད་པ་དང་གནོད་ལན་བྱེད་པ་གཉིས་འགལ་བར་བསྟན་པ་ནི།

རྩ་བར། སྔོན་བྱས་པ་ཡི་མི་དགེའི་ལས་ཀྱི་འབྲས་བུ་གང༌། །ཟད་པར་བྱེད་པར་བརྗོད་པར་འདོད་པ་དེ་ཉིད་ཀོ། །གཞན་ལ་གནོད་པ་དང་ནི་ཁྲོ་བས་སྡུག་བསྔལ་ཕྱིར། །ས་བོན་ཉིད་དུ་ཇི་ལྟ་བུར་ན་ཁྲིད་པར་བྱེད། །ཞེས་སྔོ༷ན་གྱི་དུས་སུ་བྱ༷ས་པ༷་ཡི༷་སྲོག་གཅོད་ཀྱི་མི༷་དགེ༷འི་ལ༷ས་ཀྱི༷་རྣམ་སྨིན་གྱི་འབྲ༷ས་བུ༷་ག༷ང་ཡིན་པ་ནི་ངན་སོང་གསུམ་དུ་སྡུག་བསྔལ་དྲག་པོ་མྱོང་ནས། ཚེ་འདིར་དགྲ་བོ་དག་གིས་རང་གི་ལུས་ལ་གནོད་པའི་སྡུག་བསྔལ་ཆེན་པོ་བསྐྱེད་པ་དེ་སྲོག་གཅོད་ཀྱི་མྱོང་བ་རྒྱུ་མཐུན་གྱི་འབྲས་བུ་མྱོང་བ་ཡིན་པས་དེ་ཙམ་མྱོང་བས་ལས་ཀྱི་ལྷག་མ་ཟ༷ད་ནས་རྒྱུ་མཐུན་གྱི་འབྲས་བུ་ཡིད་མི་འོང་བ་མ་ལུས་པར་ལྡོག་པ༷ར་བྱེད༷་པའི་རྒྱུ་ཡིན་པ༷ར་བརྗོ༷ད་པ༷ར་འདོ༷ད་པ༷་དེ༷་ཉི༷ད་ཀོ༷་སྟེ་སྲོག་གཅོད་ཀྱི་འབྲས་བུ་མ་ལུས་པ་ཟད་བྱེད་ཀྱི་རྒྱུར་གྱུར་པ་ནི། གཞ༷ན་ལ༷་གནོ༷ད་ལན་བྱེད་པ༷་ད༷ང་ནི༷། རྒྱུད་ཁོང་ནས་འཁྲུགས་པའི་ཁྲོ༷་བ༷ས་སྡུ༷ག་བསྔ༷ལ་ཚེ་འདིར་མྱོང་བའི་རྒྱུར་དང༌། དེ་ལས་ཆེས་ལྷག་པའི་ཕྱི༷ར་ཡང་སྟེ་སླར་ཡང་འབྱུང་བའི་ངན་སོང་གིས༷་བོ༷ན་རྣམས་རྒྱུ་ཉི༷ད་དུ༷་ཇི༷་ལྟ༷་བུ༷ར་ན༷་འཁྲི༷ད་པ༷ར་ཏེ་བསྒྱུར་བར་བྱེ༷ད་རིགས་ཏེ་མི་རིགས་སོ། །

གསུམ་པ་སྔར་ཡུན་རིང་བསགས་པའི་དགེ་བ་འཇོམས་པས་ཁོང་ཁྲོ་བར་མི་རིགས་པ་ལ།

རྩ་བར། གང་ཕྱིར་རྒྱལ་སྲས་རྣམས་ལ་ཁྲོ་བ་ཡིས། །སྦྱིན་དང་ཁྲིམས་བྱུང་དགེ་བ་བསྐལ་པ་བརྒྱར། །བསགས་པ་སྐད་ཅིག་གིས་འཇོམས་དེ་ཡི་ཕྱིར། །མི་བཟོད་ལས་གཞན་སྡིག་པ་ཡོད་མ་ཡིན། །ཞེས་མི་བཟོད་པ་ཁོང་ཁྲོ་ནི་རྣམ་སྨིན་ཡིད་དུ་མི་འོང་བ་ཡངས་པ་འཕེན་པའི་རྒྱུ་ཡིན་པ་ཙམ་དུ་མ་ཟད་ཡུན་རིང་བོར་བསགས་པའི་བསོད་ནམས་ཀྱི་ཚོགས་རྣམས་ཟད་པའི་རྒྱུ་ཡང་ཡིན་ཏེ། ག༷ང་གི་ཕྱི༷ར་ན་བྱང་སེམས་བདག་ཉིད་ཆེན་པོ་དེས། ཡུལ་བྱང་སེམས་དེ་བྱང་སེམས་ཡིན་པར་མ་ངེས་པའམ་བྱང་སེམས་ཡིན་པར་ངེས་ཀྱང་ཉོན་མོངས་པའི་གོམས་པ་ཤས་ཆེ་བའི་དབང་གིས་རྒྱ༷ལ་སྲ༷ས་བྱང་ཆུབ་ཏུ་སེམས་བསྐྱེད་པ་རྣ༷མས་ལ༷་བདེན་པའི་ཉེས་པ་དང་མི་བདེན་པའི་ཉེས་པ་ལྷག་པར་སྒྲོ་བཏགས་ནས་ཁོང་ཁྲོ༷་བ༷་བསམ་པ་སྐད་ཅིག་ཙམ་ཞིག་སྐྱེ་བ་ཡི༷ས་བསོད་ནམས་ཀྱི་ཚོགས་སྔར་བཤད་པའི་སྦྱི༷ན་པ་ད༷ང་ཚུལ་ཁྲི༷མས་ཀྱི་ཕར་ཕྱིན་ལ་གོམས་པ་ལས་བྱུ༷ང་བའི་དགེ༷་བ༷་རྣམས་བསྐ༷ལ་བ༷་བརྒྱ༷ར་བས༷གས་པ༷་དེ་ཁོང་ཁྲོ་བའི་སྐ༷ད་ཅི༷ག་གི༷ས་འཇོ༷མས་པར་འགྱུར་ན། བྱང་སེམས་མ་ཡིན་པས་བྱང་སེམས་ལ་ཁོང་ཁྲོ་བས་ནི་ལྟ་ཅི་སྨོས་པས་ན། རྒྱ་མཚོ་ཆེན་པོའི་ཆུའི་ཚད་སྲང་གྲངས་ཀྱིས་གཞལ་མི་ནུས་པ་ལྟར་བྱང་སེམས་ལ་ཁྲོས་པའི་རྣམ་སྨིན་གྱི་ཆེ་ཆུང་གི་མཚམས་ངེས་པར་མི་ནུས་པ་དེ༷་ཡི༷་ཕྱི༷ར་ན་འབྲས་བུ་ཡིད་དུ་མི་འོང་བ་འཕེན་པ་དང་དགེ་བ་ལ་གནོད་པ་བྱེད་པའི་སྡིག་པ་ལ་ནི། མི༷་བཟོ༷ད་པ་ཁོང་ཁྲོ་བ་ལ༷ས་གཞ༷ན་པའི་སྡི༷ག་པ༷་ཆེན་པོ་གྱུར་པ་ཞིག་ཡོ༷ད་པ་མ༷་ཡི༷ན་པ་ཤེས་པར་བྱས་ནས་སྤང་བར་བྱ་སྟེ། རང་འགྲེལ་ལས། དེ་ཙམ་གྱིས་ཀྱང་བསྐལ་པ་བརྒྱར་བསགས་པའི་བསོད་ནམས་ཀྱི་ཚོགས་སྔར་བསྟན་པའི་སྦྱིན་པ་དང༌། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གོམས་པ་ལས་བསྐྱེད་པ་འཇོམས་པར་འགྱུར་ན། བྱང་ཆུབ་སེམས་དཔའ་མ་ཡིན་པས་བྱང་ཆུབ་སེམས་དཔའ་རྣམས་ལ་བསྐྱེད་པ་ལྟ་ཅི་སྨོས་ཏེ། དེའི་ཕྱིར་རྒྱ་མཚོ་ཆེན་པོའི་ཆུའི་ཚད་སྲང་གྲངས་ཀྱིས་ངེས་པར་མི་ནུས་པ་ལྟར། དེར་རྣམ་པར་སྨིན་པའི་མཚམས་ངེས་པར་མི་ནུས་སོ། །དེའི་ཕྱིར་དེ་ལྟར་ན་འབྲས་བུ་ཡིད་དུ་མི་འོང་བ་འཕེན་པ་དང༌། དགེ་བ་ལ་གནོད་པ་བྱེད་པའི་སྡིག་པ་ནི་མི་བཟོད་པ་ལས་གཞན་མཆོག་ཏུ་གྱུར་པ་ཡོད་པ་མ་ཡིན་ནོ། །དེ་སྐད་དུ་ཡང༌། འཇམ་དཔལ་ཁོང་ཁྲོ་བ་ཁོང་ཁྲོ་བ་ཞེས་བྱ་བ་ནི། བསྐལ་པ་བརྒྱར་བསགས་པའི་དགེ་བ་ཉེ་བར་འཇོམས་པར་བྱེད་པ་དེའི་ཕྱིར་ཁོང་ཁྲོ་བ་ཁོང་ཁྲོ་བ་ཞེས་བྱའོ་ཞེས་གསུངས་སོ། །ཞེས་གསུངས་པས་སོ། །ཡུལ་རྟེན་གཉིས་ཀ་བྱང་སེམས་ཀྱི་དབང་དུ་བྱས་ནས་ཁོང་ཁྲོ་ན་དགེ་རྩ་འཇོམས་ཚུལ་ཡོད་དེ། མདོ་ཀུན་བཏུས་སུ་བྱམས་པ་སེང་གེའི་སྒྲའི་མདོ་དྲངས་པ་ལས། བྱང་ཆུབ་སེམས་དཔའ་གང་ལ་ལ་ཞིག་གིས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཐམས་ཅད་སྤྱོས་པ་དང༌། བརྒྱད་པ་དང༌། དབྱུག་པ་དང༌། ཁུ་ཚུར་གྱིས་བརྡེག་པ་དེ་ཙམ་གྱིས་བྱང་ཆུབ་སེམས་ལ་རྨ་འབྱུང་ཞིང་རྨས་པར་མི་འགྱུར་གྱི། བྱང་སེམས་གང་གིས་བྱང་ཆུབ་སེམས་དཔའ་གཅིག་ལ། ཐ་ན་གནོད་སེམས་དང༌། ཐ་བ་དང་ཞེ་སྡང་གི་སེམས་བསྐྱེད་པ་དེ་ཙམ་གྱིས་བྱང་ཆུབ་སེམས་དཔའ་ལ་རྨ་བྱུང་ཞིང་རྨས་པར་འགྱུར་རོ། །དེ་ཅིའི་ཕྱིར་ཞེ་ན། གལ་ཏེ་དེས་ཐམས་ཅད་མཁྱེན་པ་ཡོངས་སུ་མ་བཏང་ན། བྱང་ཆུབ་སེམས་དཔའ་བྱང་ཆུབ་སེམས་དཔའ་ཅིག་ཤོས་ལ་གནོད་སེམས་དང༌། ཐ་བ་དང་ལྡན་པའི་སེམས་ཇི་སྙེད་དུ་བསྐྱེད་པ་དེ་སྙེད་ཀྱི་བསྐལ་བར་གོ་ཆ་གཟོད་ཀྱང་བགོ་དགོས་སོ། །ཞེས་གསུངས་པའི་ཕྱིར་རོ། །བྱང་སེམས་མ་ཡིན་པས་བྱང་སེམས་ལ་ཁྲོས་ན་བསྐལ་བ་སྟོང་དུ་བསགས་པའི་དགེ་རྩ་འཇོམས་ཏེ། ཞི་བ་ལྷས། བསྐལ་བ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང༌། །ཁོང་ཁྲོ་གཅིག་གིས་འཇོམས་པར་བྱེད། །ཞེ་སྡང་ལྟ་བུའི་སྡིག་པ་མེད། །བཟོད་པ་ལྟ་བུའི་དཀའ་ཐུབ་མེད། །དེ་བས་བཟོད་ལ་ནན་ཏན་དུ། །སྣ་ཚོགས་ཚུལ་གྱིས་བསྒོམ་པར་བྱ། །

ཞེས་དང༌། དེའི་འགྲེལ་བར་དཀོན་བརྩེགས་ཀྱི་ལུང་དྲངས་པ་ལས། ཁོང་ཁྲོ་བ་ཞེས་བྱ་བ་ནི། བསྐལ་བ་སྟོང་དུ་བསགས་པའི་བསོད་ནམས་དག་ཀྱང་འཇོམས་པར་བྱེད་ཅིང༌། འབྲས་བུ་འཇོམ་པར་བྱེད་དོ། །རྟེན་བསྲེགས་པས་གཞན་བསྲེག་པར་བྱེད་དོ། །དེ་བས་ན་ཞེ་སྡང་ལ་ཁོངཁྲོ་བ་ཞེས་བྱའོ། །ཞེས་གསུངས་སོ། །

བྱང་སེམས་སྟོབས་ཆུང་བས་ཆེ་བའམ་ལུང་བསྟན་མ་ཐོབ་པའི་བྱང་སེམས་ཀྱིས་ལུང་བསྟན་ཐོབ་པ་ལ་ཁྲོ་བས་དགེ་རྩ་འཇོམས་ཚུལ་ཡོད་དེ། སྡུད་པ་ལས། ལུང་བསྟན་མ་ཐོབ་བྱང་ཆུབ་སེམས་དཔའ་གང་ཞིག་གིས། །ལུང་བསྟན་ཐོབ་ལ་སེམས་ཁྲོས་རྩོད་པ་རྩོམ་བྱེད་ན། །

ཐ་བ་སྐྱོན་ལྡན་སེམས་ཀྱི་སྐད་ཅིག་ཇི་སྙེད་པ། །དེ་སྙེད་བསྐལ་བར་གཞི་ནས་གོ་ཆ་བགོ་དགོས་སོ། །ཞེས་དང༌། སྤྱོད་འཇུག་ལས། གལ་ཏེ་ངན་སེམས་སྐྱེད་པར་བྱེད་ན་དེ། །

ངན་སེམས་བསྐྱེད་པའི་གྲངས་བཞིན་བསྐལ་པར་ནི། །དམྱལ་བར་གནས་པར་འགྱུར་ཞེས་ཐུབ་པས་གསུངས། །ཞེས་དང༌། བྱམས་པ་སེང་གེའི་སྒྲའི་མདོ་ལས། བྱང་ཆུབ་སེམས་དཔས་བྱང་ཆུབ་སེམས་དཔའ་ཅིག་ཤོས་ལ་གནོད་སེམས་དང་ཐ་བ་དང་སྡང་བའི་སེམས་ཇི་སྙེད་དུ་བསྐྱེད་པ་དེ་སྙེད་ཀྱི་བསྐལ་བར་གོ་ཆ་གཟོད་བགོ་དགོས་སོ། །ཞེས་གསུངས་པའི་ཕྱིར་རོ། །དེ་ལས་ཀྱང་བྱང་སེམས་ཆུང་བས་ཆེན་པོ་ལ་ཁྲོས་ན་ཉེས་པ་ཆེ་བ་ཡོད་དེ། རབ་བཞི་རྣམ་ངེས་ཆོ་འཕྲུལ་གྱི་མདོ་ལས། གང་དག་སྡོམ་པར་མི་བྱེད་ཅིང༌། །བྱང་ཆུབ་སེམས་དཔར་གནོད་བྱེད་པ། །དེ་ནི་སེམས་ཅན་དམྱལ་སྐྱེ་སྟེ། །དུད་འགྲོའི་སྐྱེ་གནས་འགྲོ་བར་བྱེད། །ཚུལ་འདི་སྤོང་བར་བྱེད་པ་ནི། །

བསྐལ་བ་བྱེ་བ་སྟོང་རྣམས་དང༌། །བརྒྱ་དང་ཁྲག་ཁྲིག་རྣམས་སུ་ཡང༌། །མནར་མེད་པར་ནི་སྡུག་བསྔལ་རྙེད། །ཅེས་གསུངས་པས་སོ། །དེ་དག་སོ་སྐྱེས་ཀྱི་དབང་དུ་བྱས་པ་འདྲ་སྟེ། བསླབ་བཏུས་ལས། ཕན་པར་བྱེད་པ་དང་གནོད་པར་བྱེད་པ་འདི་བྱང་ཆུབ་སེམས་དཔའ་གང་གི་དབང་དུ་བྱས་ཤེ་ན། སོ་སོ་སྐྱེ་བོ་ཉིད་ཀྱི་དབང་དུ་བྱས་པ་སྟེ། ཞེས་གསུངས་པའི་ཕྱིར་རོ། །

བྱང་ཆུབ་ཏུ་བསྔོས་ཟིན་པའི་དགེ་རྩ་འཇོམས་པ་མེད་པར་ཐལ། ལི་ཙྪ་བཱིས་ཞུས་པའི་མདོ་ལས། མང་པོ་ཡང་ཉུང་ངུ་རིག་པར་བྱ་སྟེ། །ཀུན་མཁྱེན་དུ་མ་བསྔོས་པའི་ཕྱིར་རོ། །ཞེས་དང༌། འཕགས་པ་ཕ་རོལ་ཏུ་ཕྱིན་པ་ལྔ་བསྟན་པ་ཞེས་བྱ་བ་ཐེག་པ་ཆེན་པོའི་མདོ་ལས། སྦྱིན་པ་མང་པོར་ཡང་ཉུང་ངུར་འགྱུར་བ་ཡོད་པ་རིག་པར་བྱ་སྟེ། དེ་ཅིའི་ཕྱིར་ཞེ་ན། འདི་ལྟར་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་མ་བསྔོས་པའི་ཕྱིར་རོ། །ཞེས་གསུངས་པའི་ཕྱིར་ཟེར་བ་དང༌། བསྐུར་བ་བཏབ་པ་ལས་གཞན་གྱིས་བྱང་སེམས་ཀྱི་དགེ་རྩ་འཇོམས་པ་མེད་པར་ཐལ། རབ་ཏུ་ཞི་བ་རྣམ་ངེས་ཆོ་འཕྲུལ་གྱི་མདོ་ལས། འཇམ་དཔལ་བྱང་ཆུབ་སེམས་དཔའ་གཞན་ལ་བསྐུར་བ་བཏབ་པའི་ལས་དེ་མ་གཏོགས་པར་བྱང་ཆུབ་སེམས་དཔའ་ནི་མི་དགེ་བའི་ལས་གཞན་གང་གིས་ཀྱང་ལོག་པར་ལྟུང་བར་བྱེད་མི་ནུས་སོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །

ཞིང་ཁྱད་པར་ཅན་ལ་ཕན་གནོད་གང་བྱེད་ན་དགེ་སྡིག་ཆེན་པོར་འགྱུར་ཏེ། ཉེ་བ་འཁོར་གྱིས་ཞུས་པ་ལས། དགེ་སློང་དག་དགེ་སློང་གིས་འདི་ལྟར་སྐྲ་དང་སེན་མོའི་མཆོད་རྟེན་ལ་ཡན་ལག་ཐམས་ཅད་ཀྱིས་ཕྱག་འཚལ་ཏེ། སེམས་དང་བར་བྱེད་པ་ལ་ལྟོས། བཙུན་པ་དེ་ལྟར་ལགས་སོ། །

དགེ་སློང་དག་དགེ་སློང་འདིས་ཇི་ཙམ་ཞིག་ནོན་པའི་འོག་དཔག་ཚད་བརྒྱད་ཁྲི་བཞི་སྟོང་ན་ཡོད་པའི་གསེར་གྱི་འཁོར་ལོ་ལ་ཐུག་གི་བར་ན། བྱེ་མ་ཇི་སྙེད་ཡོད་པ་དེ་སྙེད་དུ་དགེ་སློང་འདིས་འཁོར་ལོས་སྒྱུར་བའི་རྒྱལ་སྲིད་སྟོང་འགྱུར་དུ་ལོངས་སྤྱོད་པར་འགྱུར་རོ། །ཞེས་པ་ནས། བཅོམ་ལྡན་འདས་དགེ་བའི་རྩ་བ་དེ་དག་གང་དུ་བསྲབས་པ་དང༌། ཡོངས་སུ་བྱང་བ་དང༌། ཡོངས་སུ་ཟད་པར་འགྱུར། ཉེ་བ་འཁོར་ཇི་ལྟར་ཚངས་པ་མཚུངས་པར་སྤྱོད་པ་ཕན་ཚུན་ལ་ཁྲོ་བའི་སེམས་ཀྱིས་ཕན་ཚུན་གྱི་དགེ་རྩ་ལ་རྨ་བྱུང་བ་དང༌། རྨས་པར་བྱས་པ་དེ་ལྟ་བུ་ནི་ངས་མ་མཐོང་སྟེ། ཉེ་བར་འཁོར་དེས་དགེ་བའི་རྩ་བ་ཆེན་པོ་འདི་དག་བསྲབས་པ་དང་ཡོངས་སུ་བྱང་བ་དང༌། ཡོངས་སུ་ཟད་པར་འགྱུར་རོ། །ཉེ་བར་འཁོར་དེ་ལྟ་བས་ན་ཅི་ནས་འགལ་བ་ལ་ཡང༌། སེམས་ཀྱིས་གནོད་པར་མི་བྱ་ན། རྣམ་པར་ཤེས་པ་དང་བཅས་པའི་ལུས་ལྟ་སྨོས་ཀྱང་ཅི་དགོས། ཞེས་གསུངས་པའི་ཕྱིར་རོ། །དེ་ལ་སྤྱོད་འཇུག་ལས། གང་ལ་གནོད་པ་བྱས་ཀྱང་བདེ་འབྲེལ་བ། །

བདེ་བའི་འབྱུང་གནས་དེ་ལ་སྐྱབས་སུ་མཆི། །ཞེས་པས་ཅུང་ཟད་དཔྱད་རྒྱུ་སྣང་ངོ། །

བཞི་པ་མི་བཟོད་པའི་སྐྱོན་མང་པོ་བསམ་ནས་ཁོང་ཁྲོ་དགག་པ་ནི།

རྩ་བར། མི་སྡུག་གཟུགས་སུ་བྱེད་ཅིང་དམ་པ་མིན་པར་དཀྲི། །ཚུལ་དང་ཚུལ་མིན་ཤེས་པའི་རྣམ་དཔྱོད་འཕྲོག་བྱེད་ཅིང༌། །མི་བཟོད་པ་ཡིས་མྱུར་དུ་ངན་འགྲོར་སྐྱུར་བར་བྱེད། །ཅེས་ཁོང་ཁྲོ་བ་འདི་དག་དགག་པར་བྱ་རིགས་ཏེ། ལུས་ངག་གི་རྣམ་འགྱུར་ལ་ཐོན་མི་ནུས་པའི་མི་བཟོད་པ་ནུས་པ་མེད་པས་ནི་རང་ཉིད་ཁོ་ནས་དགེ་བ་འཇོམས་ཤིང་ཕྱི་མའི་སྡུག་བསྔལ་མི་བཟད་པ་བསྐྱེད་པས་རང་ཉིད་ཁོ་ན་འཇོམས་ལ། ལུས་ངག་གི་བྱ་བ་ལ་ཐོན་པའི་ནུས་པའི་ནུས་པ་ཅན་གྱིས་ནི་གོང་ལྟར་རང་གཞན་གཉིས་ཀ་འཇོམས་པར་བྱེད་པ་འདི་ནི། སྐྱེས་ཙམ་ཉིད་ཀྱིས་བཞིན་མི༷་སྡུ༷ག་པའི་གཟུ༷གས་སུ༷་བྱེ༷ད་ཅི༷ང༌། ད༷མ་པ༷་མི༷ན་པ༷ར་གྱུར་བའི་གནས་སུ་བཀྲི༷་བར་བྱེད་པ་དང༌། ཁོང་ཁྲོའི་དབང་གིས་རང་དབང་མེད་པར་ལུས་ངག་གི་བྱ་སྤྱོད་བྱ་བའི་ཚུ༷ལ་ད༷ང༌། བྱ་བའི་ཚུ༷ལ་མི༷ན་པ་ཤེ༷ས་པ༷འི་རྣ༷མ་དཔྱོ༷ད་འཕྲོ༷ག་པར་བྱེ༷ད་ཅི༷ང༌། དེ་འདྲའི་མི༷་བཟོ༷ད་པ༷་ཁོང་ཁྲོ་ཡི༷ས་ནི་ཤི་བའི་འོགཏུ་མྱུ༷ར་དུ༷་ང༷ན་འགྲོ༷ར་སྐྱུ༷ར་བ༷ར་བྱེ༷ད་པའི་ཕྱིར་ན་ཉེས་པ་ཆེན་པོ་ཡིན་ནོ། །

གཉིས་པ་བཟོད་པ་བསྟེན་པར་རིགས་པ་ལ།

བཟོད་པའི་ཡོན་ཏན་མང་པོ་བསམ་པ་དང༌། དོན་བསྡུས་ཏེ་བཟོད་པ་བསྟེན་པར་གདམས་པ་དང་གཉིས། དང་པོ་ནི། རྩ་བར། བཟོད་པས་བཤད་ཟིན་དང་འགལ་ཡོན་ཏན་རྣམས་བྱེད་དོ། །བཟོད་པས་མཛེས་ཤིང་སྐྱེ་བོ་དམ་པ་ལ། །ཕངས་དང་ལུགས་དང་ལུགས་མིན་ཤེས་པ་ལ། །མཁས་པར་གྱུར་ཞིང་དེ་ཡི་འོག་ཏུ་ནི། །ལྷ་མིའི་སྐྱེ་དང་སྡིག་པ་ཟད་པར་འགྱུར། །ཞེས་གལ་ཏེ་མི་བཟོད་པའི་སྐྱོན་བཤད་ཟིན་པ་ལྟར་ཡིན་ན། མི་བཟོད་པ་དང་འགལ་བའི་བཟོད་པའི་ཡོན་ཏན་གང་ཡིན་ཞེ་ན། བཟོ༷ད་པ་བསྒོམ་པ༷ས་ནི་སྔར་ཁོང་ཁྲོའི་ཉེས་པ་བཤ༷ད་ཟི༷ན་པ་དེ་ད༷ང་འག༷ལ་བའི་ཡོ༷ན་ཏ༷ན་རྣ༷མས་བྱེ༷ད་དོ༷། །

གང་ཞེ་ན། བཟོ༷ད་པ་བསྒོམ་པ༷ས་གཟུགས་མཛེ༷ས་པ་ཐོབ་པ་ཡིན་ཞི༷ང་གཞན་ལ་ཞེ་མི་སྡང་བས་སྐྱེ༷་བོ༷་ད༷མ་པ༷་གྲངས་ལ༷་ཕ༷ངས་ཤིང་གཅེས་པ་ད༷ང༌། ལུ༷གས་སམ་རིགས་པ་ད༷ང་ལུ༷གས་མི༷ན་པ་མི་རིགས་པའི་གནས་ཤེ༷ས་པ༷་ལ༷་མཁ༷ས་པ༷ར་གྱུ༷ར་བ་ཡིན་ཞི༷ང༌། ཤི་བ་དེ༷་ཡི༷་འོ༷ག་ཏུ༷་ལྷ༷་མི༷འི་སྐྱེ༷་བ་ལེན་པ་ད༷ང༌། ཁོང་ཁྲོ་སོགས་ཀྱི་སྒོ་ནས་བསགས་པའི་སྡི༷ག་པ༷་ཟ༷ད་པ༷ར་གྱུ༷ར་བ་རྣམས་ཐོབཔ་ཡིན་ནོ། །

གཉིས་པ་དོན་བསྡུས་ཏེ་བཟོད་པ་བསྟེན་པར་གདམས་པ་ནི།

རྩ་བར། སོ་སོའི་སྐྱེ་བོ་དང་ནི་རྒྱལ་སྲས་ཀྱིས། །ཁྲོ་དང་བཟོད་པའི་སྐྱོན་ཡོན་རིག་བྱས་ཏེ། །མི་བཟོད་སྤངས་ནས་འཕགས་པའི་སྐྱེ་བོ་ཡིས། །བསྔགས་པའི་བཟོད་པ་རྟག་ཏུ་མྱུར་བསྟེན་བྱ། །ཞེས་སོ༷་སོ༷་སྐྱེ༷་བོ༷་ད༷ང་ནི༷་རྒྱ༷ལ་སྲ༷ས་རྣམས་ཀྱི༷ས་ཁྲོ༷་བ་ད༷ང་བཟོ༷ད་པ༷འི་ཉེས་སྐྱོ༷ན་དང་ཕན་ཡོ༷ན་རི༷གས་པར་བྱ༷ས་ཏེ༷། མི༷་བཟོ༷ད་པ་ཁོང་ཁྲོ་སྤ༷ངས་ན༷ས་འཕ༷གས་པ༷འི་སྐྱེ༷་བོ༷་ཡི༷ས་བསྔ༷གས་པ༷འི་བཟོ༷ད་པ༷་དུས་རྟ༷ག་ཏུ༷མྱུ༷ར་དུ་བསྟེ༷ན་པར་བྱ༷་དགོས་སོ། །

གསུམ་པ་བཟོད་པའི་ཕར་ཕྱིན་གྱི་དབྱེ་བ་ནི།

རྩ་བར། རྫོགས་སངས་རྒྱས་ཀྱི་བྱང་ཆུབ་ཕྱིར་བསྔོས་ཀྱང༌། །གསུམ་དམིགས་ཡོད་ན་དེ་ནི་འཇིག་རྟེན་པའོ། །དམིགས་པ་མེད་ན་དེ་ཉིད་སངས་རྒྱས་ཀྱིས། །འཇིག་རྟེན་འདས་པའི་ཕ་རོལ་ཕྱིན་ཅེས་བསྟན། །ཞེས་བཟོད་པའི་ཕར་ཕྱིན་ལ་དབྱེ་ན། འཇིག་རྟེན་ལས་མ་འདས་པ་དང་འདས་པའི་བཟོད་པ་གཉིས་ཡོད་པ་ལས་རྫོ༷གས་པའི་ས༷ངས་རྒྱ༷ས་ཀྱི༷་བྱ༷ང་ཆུ༷བ་ཀྱི་ཕྱི༷ར་དུ་དེའི་རྒྱུར་བསྔོ༷ས་ཀྱ༷ང་གང་བཟོད་པ་དང༌། གང་གིས་བཟོད་པ་དང༌། སེམས་ཅན་གང་དག་ལ་བཟོད་པའི་འཁོར་གསུ༷མ་དུ་བདེན་པར་དམི༷གས་པས་བཅིང་བ་ཡོ༷ད་ན༷་དེ་འདྲའི་བཟོད་པའི་ཕར་ཕྱིན་དེ༷་ནི༷་འཇི༷ག་རྟེ༷ན་ཡིན་པ༷འོ༷། །འཁོར་གསུམ་བདེན་པར་དམི༷གས་པ་མེད་པ༷་མངོན་སུམ་དུ་རྟོགས་པའི་ཟག་མེ༷ད་ཡེ་ཤེས་ཀྱིས་ཟིན་ན༷་བཟོད་པ་དེ༷་ཉི༷ད་རྫོགས་པའི་ས༷ངས་རྒྱ༷ས་ཀྱི༷ས་འཇི༷ག་རྟེ༷ན་ལས་འད༷ས་པ༷འི་ཕ༷་རོ༷ལ་ཏུ་ཕྱི༷ན་པ་ཡིན་པརགྱུར་ཅེ༷ས་བསྟ༷ན་པའི་ཕྱིར་རོ། །

བཞི་པ་ས་འདིར་འབྱུང་བའི་ཡོན་ཏན་གཞན་བསྟན་པ་ལ།

རྩ་བར། ས་དེར་རྒྱལ་སྲས་བསམ་གཏན་མངོན་ཤེས་དང༌། །འདོད་ཆགས་ཞེ་སྡང་ཡོངས་སུ་ཟད་པར་གྱུར། །དེས་ཀྱང་རྟག་ཏུ་འཇིག་རྟེན་པ་ཡི་ནི། །འདོད་པའི་འདོད་ཆགས་འཇོམས་པར་ནུས་པར་འགྱུར། །ཞེས་ས་གསུམ་པ་ལ་གནས་པའི་རྒྱལ་སྲས་བཟོད་པ་ཡོངས་སུ་དག་པ་ཐོབ་པ་ལས་གཞན་ཡང་དག་པའི་ལྷག་པའི་ཡོན་ཏན་དུ་མ་འབྱུང་བ་ནི། ས༷་གསུམ་པ་དེ༷ར་རྒྱ༷ལ་བའི་སྲ༷ས་པོ་དེ་ལ། བཟོད་པའི་ཕར་ཕྱིན་དག་པ་ཐོབ་པ་དེ་བཞིན་དུ་བས༷མ་གཏ༷ན་བཞི་པའི་སྙོམས་འཇུག་བཞི་དང༌། དེས་མཚོན་ནས་གཟུགས་མེད་བཞིའི་སྙོམས་འཇུག་བཞི་དང༌། བྱམས་པ་ཚད་མེད་སོགས་ཚད་མེད་བཞི་དང༌། རྫུ་འཕྲུལ་གྱི་མངོ༷ན་ཤེ༷ས་སོགས་མངོན་པར་ཤེས་པ་རྣམས་དག་པ་ཐོབ་པ་ད༷ང༌། ཁམས་གསུམ་གྱི་འདོ༷ད་ཆ༷གས་ཞེ༷་སྡ༷ང༌། དང་སྒྲས་བསྡུས་པ་གཏི་མུག་དང་གསུམ་པོ་ཆེ་འབྲིང་སོགས་སྐོར་དགུ་ཆགས་བྲལ་ལམ་རང་སའི་ངོས་སྐལ་གྱི་དུག་གསུམ་ཆེན་པོའི་འབྲིང་བོ་རྣམས་ས་བོན་སྤངས་པའི་སྒོ་ནས་ཡོངས་སུ་ཟད་པར་སྤངས་པའི་ཡོ༷ངས་སུ༷་བསྲབ་པའི་ཟ༷ད་པ༷ར་འགྱུ༷ར་བ་དང༌། ཡོན་ཏན་དེ་རྣམས་དག་པ་ཐོབ་པའི་ས་གསུམ་པ་པ་དེ༷ས་ཀྱ༷ང་རྟ༷ག་ཏུ༷་འཇི༷ག་རྟེ༷ན་པ༷་སེམས་ཅན་རྣམས་ཀྱི་འདོད་ཡོན་ལྔ་ལ་ཆགས་པ་ཡི༷་ནི༷་འདོ༷ད་པ༷འི་འདོ༷ད་ཆ༷གས་རྣམས་འཇོ༷མས་པ༷ར་བྱེད་ནུ༷ས་པ༷ར་འགྱུ༷ར་བ་ཡིན་ནོ། །འདིའི་ཐད་ཀྱི་མདོ་ལས། དེ་དེ་བས་ཀྱང་ཤས་ཆེར་འདོད་པའི་དུག་གསུམ་གྱི་འཆིང་བ་ཐམས་ཅད་མངོན་གྱུར་གཏན་སྤང་གི་སྒོ་ནས་བསྲབས་པར་འགྱུར་རོ། །ཞེས་སོགས་ཀྱིས་ས་གསུམ་པར་དུག་གསུམ་སྤྱི་དེ་ཆགས་བྲལ་གྱི་ཟད་པ་དེ་བསྟན། མདོ་དེ་ཉིད་ལས། ལོག་པའི་འདོད་ཆགས་དང་ཞེ་སྡང་དང་གཏི་མུག་ཐོག་མེད་ནས་ད་སྔར་ཟད་མ་མྱོང་བས་བསྐལ་པ་ཁྲག་ཁྲིག་འབུམ་ཕྲག་དུ་མར་འགྲིབ་པར་བྱ་བ་མ་ཡིན་པ་དེ་དག་ས་འདིར་སྤངས་པར་བསྟན་པ་དེས་རང་གི་ངོས་སྐལ་གྱི་དུག་གསུམ་གཏན་ཟད་ཀྱི་ཚུལ་དེ་བསྟན།

མདོ་དེ་གཉིས་ཀྱིས་དེ་ལྟར་བསྟན་པ་དེ་འགྲེལ་བའི་དགོངས་པ་ཡང་ཡིན་ནོ། །

རང་འགྲེལ་ལས། ཤེས་བྱའི་སྒྲིབ་པ་ཅན་གྱི་མ་རིག་པ་ཀུན་ཏུ་སྤྱོད་པ། ཞེས་དང༌། རྗེ་བླ་མ་ཙོང་ཁ་བའི་རང་ལུགས་ལ་ཉོན་སྒྲིབ་སྤངས་ཟིན་ནས་གཟོད་ཤེས་སྒྲིབ་སྤོང་པའི་མགོ་རྩོམ་པ་ཡིན་ཏེ། རྒྱུད་བླ་མ་ལས། དྲི་མེད་དབྱིངས་ལ་ཆགསམེད་དང༌། །ཐོགས་མེད་ཕྱིར་དེ་དག་པ་ཡིན། །ཡེ་ཤེས་གཟིགས་པ་དག་པས་ན། །སངས་རྒྱས་ཡེ་ཤེས་བླ་མེད་ཕྱིར། །འཕགས་པ་ཕྱིར་མི་ལྡོག་པ་ནི། །ཞེས་དང༌། དེའི་ཐོགས་འགྲེལ་ལས། མདོར་བསྡུས་ན་རྒྱུ་གཉིས་ཀྱིས་ན་ཅིག་ཤོས་ཉི་ཚེའི་ཡེ་ཤེས་ཀྱི་མཐོང་བ་ལ་ལྟོས་ནས་ཤིན་ཏུ་རྣམ་པར་དག་པ་ཞེས་བརྗོད་དེ། གཉིས་པོ་གང་གིས་ཤེ་ན། ཆགས་པ་མེད་པའི་ཕྱིར་དང༌། ཐོགས་པ་མེད་པའི་ཕྱིར་རོ། །ཞེས་དང༌། དེ་ལྟར་ཕྱིར་མི་ལྡོག་པའི་ས་ལ་གནས་པའི་བྱང་ཆུབ་སེམས་དཔའ་རྣམས་ཀྱིས་གཟིགས་པ་དེ་ནི། ཞེས་གསུངས་པའི་ཕྱིར། ཁྱབ་སྟེ། ལུང་དེའི་ཕྱིར་མི་ལྡོག་པ་ནི་ས་བརྒྱད་པའི་མིང་གི་རྣམ་གྲངས་ཡིན་ལ། རྒྱུད་བླ་མར་ཐོགས་སྒྲིབ་ལས་གྲོལ་བའི་ཡེ་ཤེས་ཀྱི་མ་མཐའ་ས་བརྒྱད་པ་འདི་ནས་བཟུང་བ་ལ་དགོས་པ་ཡོད་པའི་ཕྱིར་ཏེ། འཇུག་ཊཱིཀ་དགོངས་པ་རབ་གསལ་ལས། ས་བོན་དེ་ལས་གཞན་པའི་བག་ཆགས་ཀྱི་སྒྲིབ་པ་ཤེས་སྒྲིབ་ཏུ་འཇོག་པ་ནི་ས་བརྒྱད་པ་མ་ཐོབ་བར་དུ་སྤོང་བར་བྱེད་པ་མ་ཡིན་པའི་ཕྱིར་རོ། །ཞེས་གསུངས་པའི་ཕྱིར་རོ། །ཟླ་བའི་བཞེད་པ་ཡིན་མིན་དཔྱད་པར་ཞུའོ། །བྱིང་རྒོད་གཉིས་སྙོམས་འཇུག་གི་སྒྲིབ་པ་ཡིན་དགོས་པ་འདྲ་སྟེ། རྒྱུད་བླ་མ་ལས། གཉིས་མེད་ལས་སུ་རུང་བའི་ཕྱིར། །ཞེས་གསུངས་སོ། །སྒྲིབ་པ་ལ་རྫས་སྤྱི་སོགས་ཆོད་ན་སྒྲིབ་གཉིས་གང་རུང་གིས་ཁྱབ་སྟེ། དབུས་མཐའ་ལས། ཉོན་མོངས་པ་ཡི་སྒྲིབ་པ་དང༌། །ཤེས་བྱའི་སྒྲིབ་པ་ཉིད་དུ་བསྟན། །དེར་ནི་སྒྲིབ་པ་ཐམས་ཅད་དཻ། །དེ་ཟད་ནས་ནི་གྲོལ་བར་འདོད། །ཅེས་གསུངས་པའི་ཕྱིར། ཤེས་སྒྲིབ་དང་ཤེས་པའི་གཞི་མཐུན་ཡོད་དེ། རང་འགྲེལ་ལས། ཤེས་བྱའི་སྒྲིབ་པའི་མཚན་ཉིད་ཅན་གྱི་མ་རིག་པ་ཀུན་ཏུ་སྤྱོད་པ། ཞེས་དང༌། ཟླ་བའི་སྐྱབས་འགྲོ་བདུན་ཅུ་པ་ལས། མི་ཤེས་ཉོན་མོངས་མིན་སྤང་ཕྱིར། །ཕྱིས་ནས་སངས་རྒྱས་ཀྱིས་བསྐུལ་ལས། །བྱང་ཆུབ་ཀྱི་ནི་ཚོགས་བསགས་ནས། །དེ་ཡང་འཇིག་རྟེན་འདྲེན་པར་འགྱུར། །ཞེས་དང༌། །མ་རིག་ཉོན་མོངས་མིན་ཡོད་པས། །རྣམ་པ་ཀུན་མཁྱེན་སྤངས་པ་ཉིད། །

ཅེས་དང༌། འཁོར་བའི་སྡུག་བསྔལ་སྤོང་བ་ཙམ་གྱི་ཐར་བ་ཐོབ་པ་ལ་གཙོ་བོར་བར་དུ་གཅོད་པའི་རིགས་སུ་གནས་པའི་སྒྲིབ་པ་དེ། ཉོན་སྒྲིབ་ཀྱི་མཚན་ཉིད། གཙོ་བོ་དང་རིགས་གནས་ཞེས་པས་ཉེར་ཕུང་སྡུག་བདེན་དང་ལས་སྒྲིབ་སོགས་ཀྱང་ཐར་བ་ལ་བར་གཅོད་ཡིན་ཡང་ཉོན་མོངས་སྤངས་ན་རང་ལ་ནུས་པ་མེད་པས་ཐར་བ་ལ་གཙོ་བོར་བར་དུ་གཅོད་པའི་རིགས་སུ་གནས་པ་མ་ཡིན་པར་བསྟན་པར་འཇུག་འགྲེལ་རབ་གསལ་སྣང་རྒྱན་ལས་བཤད་དོ། །བློ་གཅིག་གིས་དུས་གཅིག་ལ་ཤེས་བྱ་བདེན་པ་གཉིས་ཀ་མངོན་སུམ་དུ་རྟོགས་པ་ལ་གཙོ་བོར་བར་དུ་གཅོད་པའི་རིགས་གནས་ཀྱི་སྒྲིབ་པ་དེ། ཤེས་སྒྲིབ་ཀྱི་མཚན་ཉིད་དང༌། ཤེས་སྒྲིབ་དང་ཐོགས་སྒྲིབ་དོན་གཅིགརྒྱུད་བླ་མ་ལས། ཉོན་མོངས་ཤེས་བྱ་སྙོམས་འཇུག་གི། །སྒྲིབ་གསུམ་ལས་ནི་ངེས་གྲོལ་ཏེ། །ཞེས་པའི་སྒྲིབ་གསུམ་སོ་སོར་ཡིན་མིན་གྱི་མུ་གསུམ་མུ་བཞི་ཡོད་མེདདཔྱད་པར་ཞུའོ། །

གསུམ་པ་ཕར་ཕྱིན་དང་པོ་གསུམ་གྱི་ཁྱད་པར་གྱི་ཆོས་བཤད་པ་ལ།

རྩ་བར། སྦྱིན་སོགས་ཆོས་གསུམ་དེ་དག་ཕལ་མོ་ཆེར། །བདེ་བར་གཤེགས་པས་ཁྱིམ་པ་རྣམས་ལ་བསྔགས། །

བསོད་ནམས་ཞེས་བྱའི་ཚོགས་ཀྱང་དེ་དག་ཉིད། །སངས་རྒྱས་གཟུགས་ཀྱི་བདག་ཉིད་སྐུ་ཡི་རྒྱུ། །

ཞེས་བྱང་སེམས་ཁྱིམ་པ་དང་རབ་བྱུང་གཉིས་ཀ་སྦྱིན་སོགས་ཕར་ཕྱིན་དྲུག་གི་རྟེན་ཡིན་ཡང༌། ཁྱིམ་པ་དང་རབ་བྱུང་གི་རྟེན་ལ་སྒྲུབ་དཀའ་སླ་ལ། སྦྱི༷ན་པ་སོ༷གས་པས་ཚུལ་ཁྲིམས་དང་བཟོད་པའི་ཕར་ཕྱིན་གྱི་ཆོ༷ས་གསུ༷མ་དེ༷་ད༷ག་ཕ༷ལ་མོ༷་ཆེ༷ར་བདེ༷་བ༷ར་གཤེ༷གས་པ༷ས་ཁྱི༷མ་པ༷་རྣ༷མས་ཀྱི་རྟེན་ལ༷་སྒྲུབ་པར་བསྔ༷གས་པ་ཡིན་ཏེ། དེ་གསུམ་ཁྱིམ་པའི་རྟེན་ལ་སྒྲུབ་སླ་བའི་ཕྱིར་ཏེ། སོ་སྐྱེས་བྱང་སེམས་རབ་བྱུང་ལས་བྱང་སེམས་ཁྱིམ་པས་ཟང་ཟིང་ལོངས་སྤྱོད་ཀྱི་སྦྱིན་པ་དང༌། ཤན་པ་སོགས་ཀྱིས་གསོད་པའི་སེམས་ཅན་གྱི་སྲོག་བླུ་བ་མི་འཇིགས་པའི་སྦྱིན་པ་སྟེ་སྦྱིན་པ་ཕལ་ཆེར་སྒྲུབ་སླ་བ་དང༌། ཚུལ་ཁྲིམས་ཀྱི་ནང་ནས་ཁྱིམ་པའི་ཕྱོགས་ཀྱི་ཚུལ་ཁྲིམས་དང༌། བཟོད་པའི་ནང་ནས་ལས་འབྲས་དང་དཀོན་མཆོག་གི་ཡོན་ཏན་ཕུང་ཁམས་ཀྱི་མཚན་ཉིད་ཟབ་མོའི་དོན་སོགས་ལ་གཏད་མི་བཟོད་པ་མེད་པར་ཡང་ཡང་སེམས་པའི་ཆོས་ལ་ངེས་སེམས་ཀྱི་བཟོད་པ་རྣམས་སྒྲུབ་སླ་བ་ཡིན་པས་དེ་གསུམ་ཁྱིམ་པའི་རྟེན་ཅན་དུ་བཞག་པ་ཡིན་གྱི་ཕར་ཕྱིན་ཕྱི་མ་གསུམ་མེད་པ་མ་ཡིན་པ་གང་ཞིག བྱང་སེམས་རབ་བྱུང་གི་རྟེན་ལ་ལམ་མཐའ་ཡས་པ་ལ་སྤྲོ་ཞིང་རྩོལ་བའི་བརྩོན་འགྲུས་དང༌། རྩེ་གཅིག་ཏུ་གནས་པའི་བསམ་གཏན་སྒོམ་པ་དང༌། བདག་མེད་རྟོགས་པའི་ཤེས་རབ་ཀྱི་ཕར་ཕྱིན་སྒོམ་པ་གསུམ་ཁྱིམ་པའི་རྟེན་ལས་སྒྲུབ་སླ་བས་དེ་གསུམ་རབ་བྱུང་གི་རྟེན་ལ་བཞག་པ་ཡིན་གྱི་དང་པོ་གསུམ་དེའི་རྟེན་ལ་མེད་པ་མ་ཡིན་པའི་ཕྱིར་རོ། །

ཚོགས་གཉིས་ཀྱི་ནང་ནས་བསོ༷ད་ན༷མས་ཞེ༷ས་བྱ༷་བའི་ཚོ༷གས་ཀྱ༷ང་སྦྱིན་སོགས་གསུམ་པོ་དེ༷་ད༷ག་ཉི༷ད་ཡིན་ལ། ཚོགས་དེ་ནི་ས༷ངས་རྒྱ༷ས་ཀྱི་གཟུ༷གས་ཀྱི༷་བད༷ག་ཉི༷ད་ཀྱི་སྐུ༷་ཡི༷་རྒྱུ༷་གཙོ་བོ་ཡིན་པ་དང༌། སྤྱིར་ཡེ་ཤེས་ཀྱི་ཚོགས་ནི་བསམ་གཏན་དང་ཤེས་རབ་ཀྱི་ཕར་ཕྱིན་གཉིས་ཡིན་ཞིང་དེ་གཉིས་གཙོ་བོར་ཆོས་སྐུའི་རྒྱུ་དང༌། བརྩོན་འགྲུས་ནི་ཚོགས་གཉིས་ཀའི་རྒྱུ་ཡིན་ཏེ། རང་འགྲེལ་ལས། དེ་ལ་བསོད་ནམས་ཀྱི་ཚོགས་ནི་ཕ་རོལ་ཏུ་ཕྱིན་པ་གསུམ་པོ་དེ་དག་ཉིད་ཡིན་ལ་ཡེ་ཤེས་ཀྱི་ཚོགས་ནི་བསམ་གཏན་དང་ཤེས་རབ་བོ། །བརྩོན་འགྲུས་ནི་གཉིས་ཀའི་རྒྱུ་ཡིན་ནོ་ཞེས་བྱ་བར་རྣམ་པར་གཞག་གོ། །དེ་ལ་བསོད་ནམས་ཀྱི་ཚོགས་གང་ཡིན་པ་དེ་ནི་རྫོགས་པའི་སངས་རྒྱས་བཅོམ་ལྡན་འདས་རྣམས་ཀྱི་གཟུགས་ཀྱི་སྐུ་བསོད་ནམས་བརྒྱའི་མཚན་ཉིད་ཅན་རྨད་དུ་བྱུང་ཞིང་བསམ་གྱིས་མི་ཁྱབ་པའི་གཟུགས་སྣ་ཚོགས་དང་ལྡན་པའི་རྒྱུ་ཡིན་ནོ། །ཆོས་ཀྱི་བདག་ཉིད་ཅན་གྱི་སྐུ་སྐྱེ་བ་མེད་པའི་མཚན་ཉིད་ཅན་གྱི་རྒྱུ་ནི་ཡེ་ཤེས་ཀྱི་ཚོགས་ཡིན་ནོ། །ཞེས་གསུངས་པའི་ཕྱིར་རོ། །འཇུག་པར་ཕར་ཕྱིན་དང་པོ་གསུམ་བསོད་ནམས་ཀྱི་ཚོགས་གཙོ་ཆེ་བ་དང༌། བསམ་གཏན་ཡེ་ཤེས་ཀྱི་ཚོགས་ཁྱད་པར་ཅན་གྱི་རྟེན་གྱི་དབང་དུ་བྱས་པར་འདྲའོ། །

མདོ་སྡེ་རྒྱན་ལས། སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །

གསུམ་པོ་གཞན་ནི་གཉིས་ཀའི་སྟེ། །ལྔ་ཆར་ཡང་ནི་ཡེ་ཤེས་ཚོགས། །ཞེས་གསུངས་པའི་དགོངས་པ་ནི་དང་པོ་གཉིས་དང་ཕྱི་མ་ཚོགས་ཀྱི་ངོ་བོའི་དབང་དུ་བྱས་ལ། བར་བ་གསུམ་ལ་གཉིས་ཀའི་ངོ་བོ་ཡོད་ལ། ཚིག་རྐང་ཕྱི་མའི་དོན་ཤེས་རབ་ཀྱི་ཕར་ཕྱིན་གྱིས་ཟིན་པའི་དབང་དུ་བྱས་པ་འདྲ་ལ། རྒྱུད་བླ་མ་ལས། བསོད་ནམས་ཕ་རོལ་ཕྱིན་པ་ལྔ། །ཞེས་གསུངས་པ་སྟོངཉིད་རྟོགས་པས་མ་ཟིན་པའི་དབང་དུ་བྱས་ན་ལུང་དེ་དག་ལ་འགལ་བ་མེད་པ་འདྲའོ། །

བཞི་པ་སའི་ཡོན་ཏན་བརྗོད་པའི་སྒོ་ནས་མཇུག་བསྡུ་བ་ནི། རྩ་བར། རྒྱལ་བའི་སྲས་པོ་ཉི་མ་ལ་གནས་འོད་བྱེད་འདི། །རང་གཏོགས་མུན་རྣམས་དང་པོ་ཡང་དག་བསལ་བྱས་ནས། །

འགྲོ་བའི་མུན་པ་རྣམ་པར་འཇོམས་པར་མངོན་པར་འདོད། །ས་འདིར་ཤིན་ཏུ་རྣོ་བར་གྱུར་ཀྱང་ཁྲོ་མི་འགྱུར། །ཞེས་རྒྱ༷ལ་བ༷འི་སྲ༷ས་པོ༷་ཉི༷་མ༷་ལྟ་བུའི་རྒྱུད་ལ༷་གན༷ས་པའི་ས་གསུམ་པ་འོ༷ད་བྱེ༷ད་པ་འདི༷་ར༷ང་གི་རྒྱུད་དུ་གཏོ༷གས་པའི་མི་ཤེས་པའི་མུ༷ན་པ་དོན་དམ་པའི་ས་གསུམ་པ་སྐྱེ་བའི་གེགས་སུ་གྱུར་པ་རྣ༷མས་ས་གསུམ་པ་འོད་བྱེད་པ་དེ་ད༷ང་པོ༷་སྐྱེ་བཞིན་པའི་སྐབས་སུ་ཡ༷ང་ད༷ག་པར་བས༷ལ་བར་བྱ༷ས་ན༷ས། གཞན་དག་ལའང་དོན་དམ་པའི་ས་གསུམ་པ་རྒྱུད་ལ་བསྐྱེད་ནས་དེའི་གེགས་ཀྱི་མུན་པ་བསལ་བར་བྱེད་པའི་ཐབས་བསྟན་པའི་སྒོ་ནས་གཞན་གྱི་འགྲོ༷་བ༷འི་རྒྱུད་ལ་ས་གསུམ་པ་སྐྱེ་བའི་གེགས་ཀྱི་མུ༷ན་པ༷་རྣམས་རྣ༷མ་པ༷ར་འཇོ༷མས་པ༷ར་བྱེད་པ་ཡིན་པར་མངོ༷ན་པ༷ར་འདོ༷ད་པ་ཡིན་ལ། ས༷་གསུམ་པ་འདི༷ར་གནས་པའི་བྱང་སེམས་ལ་རང་གཞན་གྱི་ཡོན་ཏན་འཇོམས་བྱེད་ཀྱི་མུན་པ་འཇོམས་པ་ལ་ཉི་མ་ལྟར་ཤི༷ན་ཏུ༷་རྣོ༷་བ༷ར་གྱུ༷ར་ཀྱ༷ང་སྐྱོན་ལྡན་གྱི་སྐྱེ་བོ་ལ་ཁྲོ༷་བར་མི༷་འགྱུ༷ར་ཏེ། བཟོད་པ་ལ་ཆེས་ལྷག་པར་གོམས་པ་དང༌། སྙིང་རྗེས་རྒྱུད་སྣུམ་པ་བྱས་ཟིན་པའི་ཕྱིར་རོ། །དབུ༷་མ༷་ལ༷་འཇུ༷ག་པ༷འི་ཚིག་དོན་ཟླ་བ་གྲགས་པའི་དགོངས་རྒྱན་རིན་ཆེན་སྒྲོན་མེཞེས་བྱ་བ་ལ༷ས་དོན་དམ་པའི་སེ༷མས་བསྐྱེ༷ད་པ༷་གསུ༷མ་པའི་རྣམ་པར་བཤད་པ༷འོ༷།། །།