དྲུག་པ་རིག་མ་བཅུ་དྲུག་འབུལ་བ།
དྲུག་པ་རིག་མ་བཅུ་དྲུག་འབུལ་བ་ནི།
བདེ་མཆོག་སྒྱུ་མའི་ལོངས་སྤྱོད་རྫོགས་གསལ་མ། །པི་ཝང་གླིང་བུ་རྔ་ཟླུམ་རྫ་རྔ་ཅན། །རྒོད་དང་སྒེག་དང་གླུ་ལེན་བྲོ་གར་མཁན། །མེ་ཏོག་བདུག་པ་སྣང་གསལ་དྲི་མཆོག་མ། །གཟུགས་མ་རོ་མ་རེག་མ་ཆོས་འབྱུང་མ། །བཅུ་དྲུག་དགའ་མའི་ཆ་ཤས་ཡོངས་རྫོགས་མ། །རྡོ་རྗེ་རིག་མ་དགའ་བས་རོལ་པ་འདིས། །ཧེ་རུ་ཀ་ཁྱོད་རྡོ་རྗེ་ཡིད་དགྱེས་མཛོད། །ལྷ་མོ་ཐམས་ཅད་ཀྱང་བདེ་བ་ཆེན་པོ་མཆོག་སྟེར་བའི་ཡེ་ཤེས་ཀྱི་སྒྱུ་མའི་གཟུགས་དང༌། ཡང་ན་ཆགས་སོགས་མེད་པའི་སྒྱུ་མའི་འཕྲུལ་ལྟར་ཕྱག་རྒྱ་ལོ་བཅུ་དྲུག་གི་ན་ཚོད་ཅན་གཟུགས་དང་ལང་ཚོ་སོགས་ལོངས་སྤྱོད་ཐམས་ཅད་ཡོངས་སུ་རྫོགས་པ་མཚན་དཔེ་གསལ་རྫོགས་ཀྱིས་བརྒྱན་པའི་རྡོ་རྗེ་རིག་མ།རྡོ་རྗེ་པི་ཝང་མ་སྔོན་མོ་ཕྱག་གཉིས་པི་ཝཾ་འཛིན་པ། རྡོ་རྗེ་གླིང་བུ་མ་སེར་མོ་ཕྱགགཉིས་གླིང་བུ་འཛིན་པ། རྡོ་རྗེ་རྔ་ཟླུ་མ་དམར་མོ་ཕྱག་གཉིས་རྔ་ཟླུམ་འཛིན་པ། རྡོ་རྗེ་རྫ་རྔ་མལྗང་མོ་ཕྱག་གཉིས་རྫ་རྔ་འཛིན་པ་ཅན། རྡོ་རྗེ་བཞད་པ་མ་དམར་མོ་རྒོད་པའི་གད་མོའི་སྒྲོགསཔ་དང༌། རྡོ་རྗེ་སྒེག་པ་མ་མཐིང་ག་ཕྱག་གཉིས་རྡོར་དྲིལ་བཟུང་ཞིང་སྒེག་པའི་ཕྱག་རྒྱ་ཅན་དང༌།རྡོ་རྗེ་དབྱངས་མཁན་མའམ་གླུ་མ་ནི་ལི་ཁྲིའི་མདོག་ཅན་བདེ་སྟོང་གི་གླུ་དབྱངས་སྣ་ཚོགས་ལེན་པ།རྡོ་རྗེ་གར་མ་མོ་ལྗང་མོ་བྲོ་གར་སྣ་ཚོགས་བྱེད་མཁན་དང༌། རྡོ་རྗེ་མེ་ཏོག་མ་དམར་མོ་མེ་ཏོག་གིའཕྲེང་བ་འཛིན་པ། རྡོ་རྗེ་བདུག་པ་མ་དཀར་མོ་ཕྱག་གཉིས་བདུག་སྤོས་ཀྱིས་གང་བའི་སྣོད་འཛིནཔ། རྡོ་རྗེ་སྣང་གསལ་མ་སེར་མོ་མར་མེ་འཛིན་པ། རྡོ་རྗེ་དྲི་མཆོག་མ་དཀར་མོ་དྲི་ཡི་དུང་ཆོསའཛིན་པ། རྡོ་རྗེ་གཟུགས་མ་དཀར་མོ་པི་ཝཾ་འཛིན་པ། རྡོ་རྗེ་རོ་མ་དམར་མོ་ཞལ་ཟས་འཛིན་པ།རྡོ་རྗེ་རེག་བྱ་མ་ལྗང་མོ་གོས་བཟང་འཛིན་པ། རྡོ་རྗེ་ཆོས་ཁམས་མ་སྔོན་མོ་ཆོས་འབྱུང་དཀར་པོའཛིན་པ་ཐམས་ཅད་ཀྱང་བཅུ་དྲུག་དགའ་མའི་རིག་མ་མཆོག་མཚན་ཉིད་ཀྱི་ཆ་ཤས་ཐམས་ཅད་ཡོངས་རྫོགས་པ་མ་རྡོ་རྗེ་རིག་མ་རྩེ་ཞིང་དགའ་བས་རྩེ་ཞིང་རོལ་པ་ནམ་མཁའི་གང་བར་སྤྲོས་པའི་མཆོད་པ་འདིས་ཧེ་རུ་ཀ་ནི་ཁྲག་འཐུང་སྟེ། གཉིས་སྣང་འཁྲུལ་བ་ཐམས་ཅད་ནི་ཁྲག་དང་དེ་གཉིསམེད་ཡེ་ཤེས་ཀྱི་ངང་དུ་ཐིམ་པ་ནི་འཐུང་བ་སྟེ། དེ་འདྲའི་ཧེ་རུ་ཀ་རྡོ་རྗེ་འཆང་ཁྱོད་རྡོ་རྗེ་ཡིད་དམ་ཐུགས་དགྱེས་པའི་སྒོ་ནས་བཞེས་པར་མཛོད་ཅིག་ཅེས་པའོ། ། རིག་མ་བཅུ་དྲུག་ཡང་བརྟག་པདང་པོའི་རྒྱུད་ལས། མེ་ལོང་པི་ཝང་གླིང་བུ་རྫ་རྔ་དང༌། །བཞད་མ་གླུ་མ་ཕྲེང་མ་གར་མ་དང༌། །རྫ་རྔ་ཆེ་དང་མེ་ཏོག་བདུག་སྤོས་དང༌། ། མར་མེ་དྲི་ཆབ་ཞལ་ཟས་སྣོད་འཛིན་དང༌། །གོས་དང་ཆོསའབྱུང་ལ་སོགས་འཛིན་པ་ཡི། །བཅུ་དྲུག་རིག་མ་ལྷ་མོ་རྣམ་སྒེག་ཅིང༌། །རོལ་པའི་ལག་པས་ཀུན་དུ་སྒྱུར་བ་ནི། །འོད་ཀྱི་སྣང་བས་སྤྲུལ་པ་སྣ་ཚོགས་པའི། ། མཆོད་པའི་སྤྲིན་གྱི་དྲ་བས་ཁྱབ་པ་དང༌། །དངོས་རྣམས་སྒྱུ་མ་ལྟ་བུར་སོ་སོར་ནི། །ཡང་དག་རིག་ཅིང་འཇིག་རྟེན་ལྟ་མཁས་པ། །རྟོག་པ་མ་ལུས་ཀུན་ལས་ངེས་གྲོལ་ཞིང༌། །མཆོག་ཏུ་བདེ་བ་བསྐྱེད་པའི་རྒྱུར་གྱུར་པ། །གཟུགས་ལ་སོགས་པ་ལྷ་མོ་རྣམས་དང་ནི། །དེ་བཞིན་ཕྱི་ཡི་དྲི་སོགས་ཐམས་ཅད་ཀྱིས། །རྒྱལ་བའི་དབང་པོ་རྣམས་ནི་ལེགས་མཆོད་ཅིང༌། །ཐ་དད་རྣམ་པར་རྟོག་ལས་ངེས་གྲོལ་བའོ། །ཞེས་གསུངས་སོ། །