(༡) སྒྲུབ་སྡེ་བཀའ་མ།
གཉིས་པ་མ་ཧཱ་ཡོ་གའི་ཟབ་པ་སྒྲུབ་སྡེ་ལ་བཀའ་གཏེར་གཉིས་ལས། དང་པོ་སློབ་དཔོན་འཇམ་དཔལ་བཤེས་གཉེན་ནི་སྐུ་རྣམ་སྣང་གི་རིགས་འཇམ་དཔལ་ཁྲོས་པ་གསང་རྒྱུད་སོགས་གཤིན་རྗེ་གཤེད་ཀྱི་བཀའ་བབ་ཏེ། རྒྱ་གར་ནུབ་ཕྱོགས་རིམ་པ་གཉིས་པ་ཞེས་བྱ་བའི་གྲོང་ཁྱེར་དུ། ཡབ་སཱ་དྷུ་སཱ་སྐྲྀ་དང་ཡུམ་སྣང་བ་སྒྲོན་མའི་སྲས་སུ་འཁྲུངས། རིག་བྱེད་ཡན་ལག་དང་བཅས་པར་མཁས་པར་གྱུར། སློབ་དཔོན་དགའ་རབ་རྡོ་རྗེ་སོགས་ལས་གསང་སྔགས་ཕྱི་ནང་གི་དབང་དང་གདམས་ངག་ཐུན་མོང་ཐུན་མིན་ཐམས་ཅད་ཐོབ། སློབ་དཔོན་རོལ་བའི་རྡོ་རྗེ་ལས་དགྲ་གདོང་འཇིགས་གསུམ་སོགས་ཀྱང་གསན། སྤྱོད་པ་ལ་གཤེགས་པའི་ཚེ་མུ་སྟེགས་ཀྱི་རྒྱལ་པོ་ཆེན་པོ་ཞིག་གླང་པོར་ཞོན་ནས་འོང་བ་དང་ཟམ་པ་གཅིག་གི་སྟེང་ནས་འཕྲད་པ་ན་ལམ་མ་བཟུར་བས་སྡིགས་མཛུབ་གཏད་པས་རྒྱལ་པོ་གླང་ཆེན་དང་བཅས་ལུས་ཕྱེད་ཚལ་དུ་གས། སླར་བཟོད་པར་གསོལ་བས་བསོས་ནས་ནང་པའི་བསྟན་པ་ལ་བཀོད། འཕགས་པ་འཇམ་དཔལ་དང་མི་གཉིས་པའི་ཟུང་འཇུག་གི་གོ་འཕང་མཐོན་པོར་གཤེགས། འཇམ་དཔལ་ཡ་མནྟ་ཀ་མངོན་སུམ་དུ་སྣང་བས་དབང་བསྐུར་ཞིང་རྒྱུད་དང་གདམས་ངག་བསྟན། སྤྲུལ་པ་ལས་ཀྱི་གཤིན་རྗེ་མང་པོས་སྐོར་བ་བྱེད་ཅིང་སྲོག་སྙིང་ཕུལ། རི་མ་ལ་ཡ་ནས་ལས་བཞི་ཚང་བའི་གསེར་གྱི་གླེགས་བམ་ལ་བཻ་ཌཱུཪྱས་བྲིས་པ་གཏེར་ནས་བཏོན་ཞིང་གཟིགས་པའི་མོད་ལ་ཐུགས་སུ་ཆུད་ཅིང་ལས་ལ་སྦྱར་བས་མུ་སྟེགས་ཀྱི་རྒྱལ་ཁམས་བརླགས། གླེགས་བམ་དེ་ཉིད་རྡོ་རྗེ་གདན་གྱི་བྱང་དུ་མི་སྣང་བར་རྒྱས་བཏབ་བོ། །སློབ་མ་བསམ་གྱིས་མི་ཁྱབ་པ་ཡོད་པ་ལས་གཙོ་བོ་ཧཱུྃ་ཀཱ་ར་དང་། པདྨ་འབྱུང་གནས། དྷ་ན་ཏེ་ལ་རྣམས་ལ་གསུངས་ནས་དར་བར་མཛད་དོ། །ལོ་རྒྱུས་རྙིང་པ་རྣམས་སུ་འཇམ་དཔལ་བཤེས་གཉེན་འདི་ལ་རྒྱལ་རིགས་གཅིག བྲམ་ཟེའི་རིགས་གཅིག བརྫུས་ཏེ་སྐྱེས་པ་གཅིག་བཅས་གསུམ་དུ་སྣང་ཡང་རང་ས་རང་སར་གསུམ་ག་འཐད་དེ་སྤྲུལ་པ་སྒྱུ་མ་ལྟ་བུས་འགྲོ་བའི་དོན་མཛད་པའི་བདག་ཉིད་ཅན་ནོ་ཞེས་མཁས་མཆོག་གུ་རུ་བཀྲ་ཤིས་བཞེད་དོ། །
སློབ་དཔོན་འཕགས་པ་ཀླུ་སྒྲུབ་ལ་གསུང་སྣང་མཐའི་རིགས་རྟ་མཆོག་རོལ་བ་སོགས་པདྨ་གསུང་གི་ཏནྟྲ་རྣམས་ཀྱི་བཀའ་བབ་ཅིང་། འདི་ཉིད་ཀྱི་ཐུན་མོང་ཕྱིའི་རྣམ་ཐར་ཡོངས་གྲགས་འོག་ཏུ་སོ་ཐར་སྡོམ་བརྒྱུད་ཀྱི་སྐབས་སུ་འབྱུང་བ་ལྟར་ལ། ཁྱད་པར་ཡེ་ཤེས་ཀྱི་མཁའ་འགྲོ་མ་རྣམས་ལས་གདམས་པ་ཐོབ། རྟ་མཆོག་ཧེ་རུ་ཀའི་དགོངས་པ་རིག་འཛིན་ཆེན་པོ་པདྨ་འབྱུང་གནས་དང་སློབ་དཔོན་ཧཱུྃ་ཀཱ་ར་ལ་གནང་། ཤྲཱི་པར་ཏར་མི་ལོ་ཉིས་བརྒྱར་གནོད་སྦྱིན་མོ་རྣམས་ཀྱི་འཁོར་དང་བཅས་སྔགས་ཀྱི་སྤྱོད་པ་ལ་ཞུགས་ནས་མཐར་རྡོ་རྗེའི་སྐུ་གྲུབ་པ་གྲགས་སོ། །
སློབ་དཔོན་ཧཱུྃ་ཀཱ་ར་ལ་ཐུགས་མི་བསྐྱོད་པའི་རིགས་ཧེ་རུ་ཀ་གལ་པོ་སོགས་ཡང་དག་ཐུགས་ཀྱི་བཀའ་བབ་པ་སྟེེ་རྒྱ་གར་མཐའ་འཁོབ་ཅིག་ཏུ་བྲམ་ཟེའི་རིགས་སུ་སྐུ་འཁྲུངས། རིག་བྱེད་སོགས་མུ་སྟེགས་ཀྱི་གཞུང་ལུགས་ལ་ཤིན་ཏུ་མཁས་ཤིང་ནུས་པའང་ཐོབ། ཕྱིས་སངས་རྒྱས་པའི་བསྟན་པ་ལ་དད་ནས་ནཱ་ལེནྡྲར་སངས་རྒྱས་ཡེ་ཤེས་དང་སྒྲ་གཅན་འཛིན་བཟང་པོ་ལས་རབ་ཏུ་བྱུང་། ཕ་རོལ་ཏུ་ཕྱིན་པ་ནས་བཟུང་གསང་སྔགས་ཕྱི་ནང་གི་བར་གྱི་ཐོས་པས་རྒྱུད་སྦྱངས། དབང་བསྐུར་དང་གདམས་པ་རྗེས་སུ་གདམས་པ་མཐའ་དག་ཡོངས་སུ་ནོས་ཤིང་། ཁྱད་པར་ཤྲཱི་ཧེ་རུ་ཀའི་དབང་གི་ཚེ་མེ་ཏོག་ཧཱུྃ་མཛད་ལ་ཕོག་ཅིང་བསྒོམས་པས་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེས། གདོལ་བའི་བུ་མོ་ཨུཏྤལ་སྔོན་པོའི་མདོག་ལྟ་བུ་རྡོ་རྗེ་རིགས་ཀྱི་མཚན་རྟགས་ཚང་བའི་ལས་རྒྱ་དང་ལྷན་ཅིག་ཏུ་ཟླ་བ་དྲུག་ལ་བསྙེན་སྒྲུབ་མཛད་པས་བཛྲ་ཧེ་རུ་ཀའི་དཀྱིལ་འཁོར་ཐམས་ཅད་མངོན་སུམ་དུ་མཐོང་བ་དང་ནམ་མཁའ་ནས་ཧཱུྃ་གི་སྒྲ་ཆེན་པོ་གྲགས་ཏེ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ། རུ་ལུ་གསེར་ཕྲེང་དང་ཡང་དག་གྲུབ་པ་སོགས་བསྟན་བཅོས་མང་དུ་མཛད་ནས་མཐར་སྐུ་ལུས་དེ་ཉིད་ཀྱིས་སངས་རྒྱས་མི་འཁྲུགས་པའི་ཞིང་ཁམས་སུ་བཞུད་དོ། །སློབ་དཔོན་འདི་དང་བལ་པོ་ཧཱུྃ་ཀཱ་ར་གཉིས་འགའ་ཞིག་གཅིག་ཏུ་བཞེད་ཀྱང་གཏེར་བདག་གླིང་པ་དང་གུ་རུ་བཀྲ་ཤིས་སོགས་ཀྱིས་ཐ་དད་ཡིན་པར་གསུངས་སོ། །
སློབ་དཔོན་བཱི་མ་མི་ཏྲ་ལ་ཡོན་ཏན་རིན་ཆེན་འབྱུང་ལྡན་གྱི་རིགས་བདུད་རྩི་བམ་བརྒྱད་སོགས་བདུད་རྩི་ཡོན་ཏན་གྱི་བཀའ་བབ་ཏེ། ནུབ་ཕྱོགས་གླང་པོའི་ཚལ་དུ་ཡབ་ཁྱིམ་བདག་བདེ་ལྡན་དང་། ཡུམ་བདག་ཉིད་གསལ་རིག་གཉིས་ཀྱི་སྲས་སུ་སྐུ་འཁྲུངས། ཐུན་མོང་ཐུན་མིན་གྱི་ཤེས་བྱའི་གནས་ཀུན་ལ་མཁས། སློབ་དཔོན་སངས་རྒྱས་གསང་བ་སོགས་རྡོ་རྗེ་འཛིན་པ་ཆེན་པོ་དུ་མ་ལས་རྒྱུད་སྡེ་མཐའ་དག་གསན། བསྒོམས་པས་ཕྱག་རྒྱ་ཆེན་པོའི་དངོས་གྲུབ་ཉམས་འོག་ཏུ་ཆུད། སྒྱུ་འཕྲུལ་གཙོ་བོར་གྱུར་པའི་བསྟན་བཅོས་མང་པོ་མཛད་པ་སོགས་རྣམ་ཐར་རྒྱས་པ་འོག་ཏུ་འབྱུང་ངོ་། །
སློབ་དཔོན་པྲ་བྷ་ཧསྟི་དང་པདྨ་འབྱུང་གནས་རྣམ་གཉིས་ལ་དོན་གྲུབ་རིགས་ཕྲིན་ལས་ཕུར་བའི་བཀའ་བབ་པ་སྟེ། དང་པོའི་རྣམ་ཐར་གོང་དུ་སོང་ཟིན་པས་འདིར་ཡང་དུ་མི་ཟློས་ལ། སློབ་དཔོན་སངས་རྒྱས་གཉིས་པས་ནི་བལ་ཡུལ་དུ་ཕྱག་རྒྱའི་རིག་འཛིན་སྒྲུབ་པའི་ཚེ། ཀླུ་གྱོང་པོ་དང་། གནོད་སྦྱིན་རྒོད་མ་ཁ་སོགས་ཀྱིས་ཐོ་བརྩམས་པའི་གཉེན་པོར་རྡོ་རྗེ་ཕུར་པའི་དཀྱིལ་འཁོར་ཞལ་ཕྱེས་པས་ཤྲཱི་བཛྲ་ཀུ་མཱ་རས་ཞལ་བསྟན། བར་ཆད་ཀྱི་གཡུལ་ལས་རྒྱལ་ཏེ་མ་མོ་བཅུ་གཉིས་སོགས་དམ་འོག་ཏུ་བཅུག སླར་ཡང་སློབ་དཔོན་པྲ་བྷ་ཧསྟི་ལས་ཀཱི་ལ་ཡའི་རྒྱུད་ཚར་བཅོ་བརྒྱད་གསན་པས་ཕྲིན་ལས་ཕུར་བའི་བཀའ་བབ་ཏུ་གྱུར་པ་བཅས་རྣམ་ཐར་རྒྱས་པ་འོག་ཏུ་འབྱུང་བ་ལྟར་རོ། །