དམ་ཅན་སྐྱེས་བུ་ཆེན་པོའི་ལོ་རྒྱུས་སྙན་གྲགས་བསྐལ་པའི་འབྲུག་སྒྲ་དྲག་པོ།
དམ་ཅན་སྐྱེས་བུ་ཆེན་པོའི་ལོ་རྒྱུས་སྙན་གྲགས་བསྐལ་པའི་འབྲུག་སྒྲ་དྲག་པོ་ཞེས་བྱ་བ་བཞུགས་སོ། །
ན་མོ་གྱ་གྱི་ཝ་ཡེ། བླ་མ་ཡི་དམ་དབྱེར་མེད་ཐུགས་རྗེ་ཅན། །རྟ་མཆོག་ཧེ་རུ་ཀ་ལ་ཕྱག་འཚལ་ནས། །བསྟན་སྲུང་སྐྱེས་བུ་ཆེན་པོའི་ལོ་རྒྱུས་བྲི། །སྐྱེས་བུ་འཁོར་བཅས་བཀའ་ཡི་གནང་བ་སྩོལ། །དེ་ལ་ཡེ་ཤེས་ཀྱི་རྡོ་རྗེ་ལེགས་པ་དང་། །དམ་ཚིག་གི་རྡོ་རྗེ་ལེགས་པ་དང་། །འཇིག་རྟེན་གྱི་རྡོ་རྗེ་ལེགས་པ་དང་། །གསུམ་ཡོད་དེ། དེ་གསུམ་ཡང་སྐུ་ཡི་བཀོད་པ་ཐ་དད་ཅིང་མཛད་པ་ཕྲིན་ལས་སོ་སོར་ཡོད་ཀྱང་ཐུགས་རྒྱུད་ཀྱི་ངོ་བོ་ནི་གཅིག་ཡིན་ཏེ། དཔེར་ན་སངས་རྒྱས་ཐམས་ཅད་ལ་ཡང་ཆོས་སྐུ་ལོངས་སྐུ་སྤྲུལ་སྐུ་གསུམ་ཡོད་པ་དང་། །མགོན་པོ་ཐམས་ཅད་ལ་ཡང་ཡེ་
ཤེས་དང་ལས་དང་འཇིག་རྟེན་གྱི་མགོན་པོ་གསུམ་རེ་ཡོད་ཅིང་། དེ་དག་བཞུགས་གནས་དང་སྐུ་མདོག་ཆ་ལུགས་མི་འདྲ་ཡང་ངོ་བོ་གཅིག་ཡིན་པ་ལྟ་བུའོ། དེ་ལ་དང་པོ་ཡེ་ཤེས་ཀྱི་རྡོ་རྗེ་ལེགས་པ་ནི། འོག་མིན་འཐུག་པོ་བཀོད་པའི་ཞིང་ཁམས་ནས། བཅོམ་ལྡན་རྣམ་པར་སྣང་མཛད་ཆེན་པོའི་འཁོར་དུ་བཞུགས་པའི་ཕྱིར། རྒྱུད་ཀྱི་རྒྱལ་པོ་དེ་ཉིད་བསྡུས་པ་དང་། དཔལ་མཆོག་དང་པོ་དང་། རྡོ་རྗེ་རྩེ་མོ་དང་། ངན་སོང་སྦྱོང་རྒྱུད་དང་། པདྨ་དྲྭ་བ་དང་། གཙུག་དགུ་ལ་སོགས་པ་བྱ་བ་དང་སྤྱོད་པ་དང་རྣལ་འབྱོར་གྱི་རྒྱུད་སྡེ་ཆེན་པོ་དུ་མ་ནས། བྱང་ཆུབ་སེམས་དཔའ་
རྡོ་རྗེ་ལེགས་པ་འདི་གསུངས་སོ། །དེ་ལ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་དང་། ཀུན་རིག་རྣམ་པར་སྣང་མཛད་ཀྱི་དཀྱིལ་འཁོར་གཉིས་ཀ་ནས། །རྩ་བའི་ལྷ་སུམ་ཅུ་སོ་བདུན་གྱི་ནང་ནས་སེམས་དཔའ་བཅུ་དྲུག་གི་ནང་ཚན་རྡོ་རྗེ་ལེགས་པ་ལྗང་གུ་ཐུགས་ཀར་སེ་གོལ་གཏོགས་པ། ཞེས་མངོན་རྟོགས་སྔགས་དང་བཅས་པ་གསུངས་ཏེ། བྱང་ཆུབ་སེམས་དཔའ་རྡོ་རྗེ་ལེགས་པ་དེ་ཉིད་ཀྱང་རྣམ་པར་སྣང་མཛད་ཉིད་ཀྱི་སྤྲུལ་པ་ཡིན་ཚུལ་རྣལ་འབྱོར་རྒྱུད་ཀྱི་བཤད་པ་རྣམས་ནས་རྒྱ་ཆེར་འབྱུང་ངོ། །ཡེ་ཤེས་ཀྱི་རྡོ་རྗེ་ལེགས་པ་དེའི་མཛད་པ་ཕྲིན་ལས་ཡང་ཅི་ལྟ་བུ་ཞེ་ན། ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཐུགས་རབ་ཏུ་མཉེས་པར་བྱེད་དོ། །སངས་རྒྱས་ཐམས་ཅད་མཉེས་པས་རྡོ་རྗེ་རིགས་ཀྱི་བྱང་ཆུབ་སེམས་དཔའ་ཁྱེད་ནི་ལེགས་སོ་ལེགས་སོ། །ཞེས་བསྔགས་པ་དང་ལེགས་སོ་གནང་བ་ཆེན་པོ་ལ་བཞུགས་པའི་བྱང་ཆུབ་སེམས་དཔའ་ཐམས་ཅད་ཀྱང་། བྱང་ཆུབ་སེམས་དཔའ་ཆེན་པོ་རྡོ་རྗེ་ལེགས་པའི་བྱང་ཆུབ་ཀྱི་སྤྱོད་པ་རླབས་པོ་ཆེ་མགུ་ནས་བསྟོད་ཅིང་ལེགས་སོ་བརྗོད། རྒྱུ་མཚན་དེའི་ཕྱིར་རྡོ་རྗེ་ལེགས་པ་ཞེས་བྱ་བ་ཡིན་ཏེ། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་རྩེ་མོ་ལས། རྡོ་རྗེ་ལེགས་པ་ཅི་
ཡིན་བརྗོད། །སངས་རྒྱས་ཐམས་ཅད་མཉེས་བྱེད་ཅིང་། །ལེགས་སོ་ཞེས་བྱ་རབ་སྟེར་བྱེད། །བྱང་ཆུབ་སེམས་དཔའ་ཀུན་མགུ་བྱེད། །དེ་ནི་རྡོ་རྗེ་ལེགས་པ་ཞེས་བརྗོད་།ཅེས་གསུངས་སོ། །དེ་ལྟར་སངས་རྒྱས་བྱང་སེམས་ཐམས་ཅད་རྡོ་རྗེ་ལེགས་པ་ལ་མཉེས་པའི་རྒྱུ་མཚན་ཅི་ཡིན་ཞེ་ན། བྱང་ཆུབ་སེམས་དཔའ་རྡོ་རྗེ་ལེགས་པ་འདི་ཉིད་འོག་མིན་འཐུག་པོ་བཀོད་དུ་བཞུགས་བཞིན་དུ། སྤྲུལ་པ་ཡང་སྤྲུལ་དང་སུམ་སྤྲུལ་དཔག་ཏུ་མེད་པས། འཛམ་བུ་གླིང་བྱེ་བ་ཕྲག་བརྒྱར་སྐྱེས་བུ་ཆེན་པོ་བྱེ་བ་ཕྲག་བརྒྱར་སྤྲུལ། །དེ་རེ་རེ་ལ་ཡང་འཁོར་དང་སྤྲུལ་པ་དཔག་ཏུ་མེད་པ་དང་བཅས་ཏེ། སེམས་ཅན་གང་དག་འདི་ཉིད་མཆོད་སྒྲུབ་བྱེད་པ་རྣམས་ལ། ཅི་བསམ་པ་ཐམས་ཅད་འགྲུབ་ཅིང་གང་འདོད་པའི་དངོས་གྲུབ་བྱིན་པས་སེམས་ཅན་དག་པ་སྟེ། དམ་ཚིག་དང་ལྡན་པ་ཐམས་ཅད་མགུ་བར་བྱེད་ཅིང་། །ས་དང་ལམ་གྱི་བར་ཆད་ཐམས་ཅད་བསལ་ནས་རྡོ་རྗེ་འཆང་གི་གོ་འཕང་འགྲུབ་པའི་སྡོང་གྲོགས་བྱེད། །དམ་ཚིག་ཅན་མ་ཡིན་པའི་སྐྱེ་བོ་ཕལ་པ་རྣམས་ལ་ཡང་། དགྲ་བླ་དང་དམག་དཔོན་དང་ཇག་དཔོན་དང་ཚོང་དཔོན་གྱི་ཚུལ་གྱིས། འདི་ཉིད་མཆོད་པ་རྣམས་ཅི་འདོད་པ་
འགྲུབ་པས་དགའ་བར་བྱེད། ཁྱད་པར་གསང་སྔགས་འཛིན་པ་རྣམས་ལ་ལུས་གྲིབ་མ་ལྟར་བསྲུང་ཞིང་ཕྲིན་ལས་བསྒྲུབས་པས། གསང་སྔགས་འཆང་བའི་རྣལ་འབྱོར་པ་རྣམས་ཡི་རང་བར་བྱེད། དོན་དམ་པའི་ཐུགས་རྒྱུད་ཆོས་སྐུ་ནི་སངས་རྒྱས་རྣམ་པར་སྣང་མཛད་དང་དབྱེར་མེད་ཅིང་། ལོངས་སྤྱོད་རྫོགས་པའི་སྐུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ལེགས་པ་སྐུ་མདོག་ལྗང་གུ། ཕྱག་གཉིས་ཐུགས་ཀར་སེ་གོལ་གཏོགས་པའི་སྐུར་བཞེངས་ནས་སངས་རྒྱས་ཐམས་ཅད་ཀྱི་ཕྲིན་ལས་སྒྲུབ་ཀྱང་། དོན་ལ་ནི་བཅོམ་ལྡན་རྣམ་སྣང་ཉིད་ཡིན་ཆོས་འདི་དྲུག་དང་ལྡན་པའི་ཕྱིར་དང་། མཛད་པ་དེ་རྣམས་སྒྲུབ་པའི་ཕྱིར། རྡོ་རྗེ་ལེགས་པ་ཞེས་བྱ་བ་ཡིན་ཏེ། རྒྱུད་རྡོ་རྗེ་རྩེ་མོ་ལས། སེམས་ཅན་དག་པ་མགུ་བྱེད་ཅིང་། །རྡོ་རྗེ་འཆང་རྣམས་སྒྲུབ་པར་བྱེད། །སེམས་ཅན་ཁམས་རྣམས་དག་བྱེད་ཅིང་། །གསང་བ་འཛིན་པ་རང་བར་བྱེད། །ཆོས་དང་ལོངས་སྤྱོད་རྫོགས་སྐུའི་ཕྱིར། །བཅོམ་ལྡན་འདས་འདིས་ཆོས་རྣམས་དྲུག །གང་གི་ཚེ་ན་མངོན་བསྒྲུབ་པ། །རྡོ་རྗེ་ལེགས་པ་ཡང་དག་འབྱུང་། །ཞེས་དང་། ཡོ་གའི་རྒྱུད་རྣམས་ནས་གསུངས་པ་རྡོ་རྗེ་བསྟོད་རིང་ལས།
རྡོ་རྗེ་ལེགས་པ་སེམས་དཔའ་མཆོག །རྡོ་རྗེ་མགུ་བ་དགའ་བ་ཆེ། །རབ་དགྱེས་རྒྱལ་པོ་རྡོ་རྗེ་མཆོག །ཕྱག་འཚལ་རྡོ་རྗེས་དགྱེས་ཁྱོད་ལ། །ཞེས་དང་། སྦྱོང་རྒྱུད་ལས། རྡོ་རྗེ་ལེགས་པ་དགྱེས་མཛད་པ། །ཞེས་གསུངས་སོ། །འོ་ན་རྡོ་རྗེ་ལེགས་པ་དེའི་ཆོས་སྐུའི་ངོ་བོ་བཅོམ་ལྡན་འདས་རྣམ་པར་སྣང་མཛད་དང་གཅིག་པའི་རྒྱུ་མཚན་ཅི་ཡིན་ཞེ་ན། རྣལ་འབྱོར་རྒྱུད་ཀྱི་འགྲེལ་ཆེན་དེ་ཉིད་སྣང་བ་ལས། རྣམ་པར་སྣང་མཛད་རྩ་བའི་ལྷ་སོ་བདུན་ཐམས་ཅད་རྣམ་སྣང་ཉིད་ཀྱི་སྤྲུལ་པར་གསུངས་ཤིང་། ལྷའི་དེ་ཁོ་ན་ཉིད་ཀྱི་སྐབས་སུ་སངས་རྒྱས་ཐམས་ཅད་གཅིག་ཏུ་བསྡུས་པའི་ངོ་བོ་ནི་རྣམ་སྣང་ངོ། །ཞེས་སོགས་ནས། དེའི་ཕར་ཕྱིན་དྲུག་གི་སྤྱོད་པ་དང་། འབྲས་བུ་ཐུགས་ནི་རྡོ་རྗེ་ལེགས་པའོ། །ཞེས་གསུངས་སོ། །གཞན་ཡང་པདྨ་དྲྭ་བའི་རྒྱུད་ལས། སྤྱན་རས་གཟིགས་ཕྱག་སྟོང་སྤྱན་སྟོང་གི་དཀྱིལ་འཁོར་རྒྱས་པའི་ལྷ་གྲངས་སུ་ཡང་བྱང་ཆུབ་སེམས་དཔའ་རྡོ་རྗེ་ལེགས་པ་འདི་ཉིད་པ་བཞུགས་སོ། །སྦྱོང་རྒྱུད་ཀྱི་དཀྱིལ་འཁོར་ཆེན་པོ་རྣམས་ནས། རྡོ་རྗེ་ལེགས་པ་ལ་སོགས་པ་ཤར་ཕྱོགས་ཀྱི་སེམས་དཔའི་བཞིས་ཀྱང་ཚེ་ལས་འདས་པའི་ངན་སོང་ཐམས་ཅད་སྦྱོང་བའི་
ཕྲིན་ལས་མཛད་དུ་གསོ་ལ། །ཞེས་འབྱུང་བས། སེམས་དཔའ་ཆེན་པོ་རྡོ་རྗེ་ལེགས་པ་འདི་མཆོད་ཅིང་བསྟེན་ན། འཁོར་བ་ངན་སོང་གི་སྡུག་བསྔལ་ཐམས་ཅད་སྐྱོབས་ནུས་པ་ཡིན་ནོ། །འདི་ནི་ས་བཅུའི་སེམས་དཔའ་ཡིན་པས་སྤྲུལ་པ་བྱེ་བ་ཕྲག་བརྒྱ་འགྱེད་ནུས་པའི་ཕྱིར། འཛམ་གླིང་བྱེ་བ་ཕྲག་བརྒྱར་ཤཱཀ་ཐུབ་བྱེ་བ་ཕྲག་བརྒྱའི་བསྟན་པ་བསྲུང་བ་དང་། ཕ་ཝཾ་ལོང་བུའི་སྐུ་མཁར་བྱེ་བ་ཕྲག་བརྒྱར་གནས་བཅས་ཏེ། པདྨ་འབྱུང་གནས་བྱེ་བ་ཕྲག་བརྒྱའི་གཏེར་སྲུང་མཛད་པ་ཡིན་ནོ། །དེ་ལྟར་སྐྱེས་བུ་ཆེན་པོ་བྱེ་བ་ཕྲག་བརྒྱ་ཡོད་པའི་རྒྱུ་མཚན་ཅི་ཞེ་ན། སངས་རྒྱས་ཀྱི་སྤྲུལ་པ་བྱེ་བ་ཕྲག་བརྒྱ་པོ་དེ་དག་ཐམས་ཅད་འཁོར་དང་མཛད་པ་ཕྲིན་ལས་ཐམས་ཅད་གཅིག་དང་འདྲ་བར་ཁྱད་ཅུང་ཟད་མེད་པར་མདོ་སྡེའི་བཤད་པ་རྣམས་ནས་འབྱུང་བའི་ཕྱིར། །གསང་བདག་བྱེ་བ་ཕྲག་བརྒྱ་དང་ཨོ་རྒྱན་བྱེ་བ་ཕྲག་བརྒྱའི་བཀའ་སྡོད་སྐྱེས་བུ་ཆེན་པོ་བྱེ་བ་ཕྲག་བརྒྱ་ཡང་ངེས་པར་ཡོད་ཅིང་། དེ་ཐམས་ཅད་ཀྱང་འོག་མིན་དུ་བཞུགས་པའི་བྱང་ཆུབ་སེམས་དཔའ་རྡོ་རྗེ་ལེགས་པའི་སྤྲུལ་པར་ངེས་སོ། །འོ་ན་ཡེ་ཤེས་ཀྱི་རྡོ་རྗེ་ལེགས་པའམ། བྱང་ཆུབ་སེམས་དཔའ་རྡོ་རྗེ་ལེགས་པ་ནི་ཡེ་ཤེས་པ་ཡིན་ཀྱང་། འཇིག་
རྟེན་གྱི་མགར་བ་དམར་ནག་ཏུ་གྲགས་པའི་རྡོ་རྗེ་ལེགས་པ་འདི་ནི། དེའི་སྤྲུལ་པའི་ཆ་ཤས་ཙམ་ཡིན་སྲིད་ཀྱང་། འཇིག་རྟེན་གྱི་ལྷ་འདྲེ་དྲེག་པ་ཅན་ཡིན་གྱིས། ཡེ་ཤེས་ཀྱི་ཆོས་སྐྱོང་མིན་ནམ་སྙམ་ན། འཇིག་རྟེན་པའི་དྲེགས་པ་ཅན་རྣམས་ཀྱི་སྡེ་དཔོན་མཛད་པ་དང་། སངས་རྒྱས་ཀྱི་བསྟན་པ་ལ་གནོད་པའི་གདུག་པ་ཅན་ཐམས་ཅད་མྱུར་དུ་ཚར་གཅོད་པའི་ཕྱིར། །འཇིག་རྟེན་གྱི་བཙན་རྒོད་དྲག་པོ། ཐེའུ་རང་རྫུ་འཕྲུལ་ཅན་གྱི་ཚུལ་བཟུང་ནས་ཆ་ལུགས་འཛིན་ན་ཡང་། ངོ་བོ་ཡེ་ཤེས་པ་ཡིན་ཏེ། ཨོ་རྒྱན་རིན་པོ་ཆེའི་གསུང་ལས། ཧཱུྃ། བཅོམ་ལྡན་རྡོ་རྗེའི་བཀའ་ཉན་ཐ་ཚིག་ཅན། །དབྱིངས་ཉིད་དོན་དམ་ངང་ལས་མ་གཡོས་ཀྱང་། །སྨོན་ལམ་ཐ་ཚིག་ཡལ་བར་མི་འདོར་ཕྱིར། །འཇིག་རྟེན་པ་ལ་བཞུགས་ནས་ཕྲིན་ལས་མཛད། །ཅེས་དམ་ཅན་མདོས་གཞུང་ལས་གསུངས་སོ། །ཐུགས་རྗེ་ཆེན་པོ་གསང་འདུས་ཀྱི་ཆོས་ཚན་མགར་དམར་གྱི་རྗེས་གནང་དབང་གི་རིམ་པ་ཨོ་རྒྱན་རིན་པོ་ཆེའི་གསུང་སླད་མེད་པ་ལས། ཧཱུྃ། པདྨ་ཧེ་རུ་ཀ་ཡི་སྤྲུལ་པ་སྟེ། །བཙན་གྱི་རྒྱལ་པོ་རྫུ་འཕྲུལ་ཅན། །ནུབ་ཕྱོགས་གནམ་ས་ཕྱེད་ཀྱི་བདག །རྡོ་རྗེའི་ཕོ་རྒྱུད་ཕོ་ཉར་འགྱེད། །
ཙིཏྟའི་མོ་རྒྱུད་ལས་ལ་འཛུད། །རྡོ་རྗེ་ལེགས་པའི་དབང་ཐོབ་ཤོག །ཅེས་གསུངས་སོ། །ལ་ལ་དག་ན་རེ། མགར་ནག་ནི་ཡེ་ཤེས་པ་རྟ་མགྲིན་གྱི་སྤྲུལ་པ་ཡིན། མགར་དམར་ནི། གཙང་བཙན་རྡོ་རྗེ་ལེགས་པ་ཞེས་འཇིག་རྟེན་པ་ཡིན་ཟེར་བ་ཡང་མི་བདེན་པ་དེས་གསལ་ལོ། །མགར་ནག་གི་གཞུང་ཉིད་ལས། དཔལ་ལྡན་དྲེགས་པ་རྟ་མགྲིན་ཐུགས་ལས་སྤྲུལ། །ཞེས་གསུངས་པ་དང་། མངའ་བདག་ཉང་གི་གཏེར་ཁ་སྡེ་དཔོན་སུམ་ཅུའི་གསོལ་ཁ་ཆེན་པོ་ཨོ་རྒྱན་ཉིད་ཀྱིས་མཛད་པ་ལས། །དུག་ལྔ་མ་སྤངས་སྐུ་ལྔ་ལྷུན་གྲུབ་པ། །འགྲོ་དྲུག་བསྒྲལ་ཕྱིར་ཡེ་ཤེས་ཁྲོ་བོའི་ཚུལ། །གདུག་པ་འདུལ་ཕྱིར་རྡོ་རྗེ་རྩེ་དགུ་བསྣམས། །དགྲ་བླ་རྡོ་རྗེ་ལེགས་པའི་སྐུ་ལ་བསྟོད། །ཅེས་གསུངས་སོ། །དེ་དག་གིས་ནི་འཇིག་རྟེན་པའི་རྡོ་རྗེ་ལེགས་པ་འདི་ཉིད་ཡེ་ཤེས་ཀྱི་ཆོས་སྐྱོང་ཡིན་པ་གསལ་ལོ། །འོ་ན་དམ་ཚིག་གི་རྡོ་རྗེ་ལེགས་པ་དེ་ཅི་ལྟར་ཞེ་ན། རྒྱ་གར་ཡུལ་གྱི་ཕ་མཐའ། ནུབ་ཕྱོགས་ཨོ་རྒྱན་ཡུལ་གྱི་ཚུར་ཐ་དེའི་མཚམས་ན། རི་བོ་མ་ལ་ཡ་གནམ་ལྕགས་འབར་བ་ཞེས་བྱ་བ། ལྷོ་ནུབ་རྔ་ཡབ་གླིང་གི་སྔོན་རུ་ཏྲ་བཏུལ་བའི་རི་མ་ལ་ཡ་གནམ་ལྕགས་འབར་བ་ཞེས་བྱ་བ། དབྱིབས་ཟུར་གསུམ་ལ་
རྡོ་དང་བྲག་ཕལ་ཆེར་གནམ་ལྕགས་ལས་གྲུབ་པ། རི་བོ་མ་ལ་ཡ་གནམ་ལྕགས་ཡོད་པ་ཞེས་ཀྱང་བྱ་སྟེ། དེ་ན་ཤིང་ཙནྡན་དམར་པོའི་ནགས་ཚལ་ཆེན་པོ་མེ་ཏོག་གི་ཚལ་རྒྱས་པ། སྟག་དང་དུག་སྦྲུལ་དང་ཕག་རྒོད་དང་གླང་རྒོད་སྨྱོན་པ་མང་པོ་རྒྱུ་བས། དེ་རུ་མི་བསྐྱོད་པར་མི་ནུས་པ། དུས་བཟང་རྣམས་སུ་འཇའ་གུར་དང་མེ་ཏོག་གི་ཆར་འབེབས་པ། རྒྱུན་དུ་ན་བུན་གཏིབས་པས་མཐོང་དཀའ་བ་ཡོད་དེ། དེའི་རྩེ་ན་མིས་ནི་དངོས་སུ་མི་མཐོང་བར། མི་མགོ་སྐམ་རློན་བརྩེགས་པའི་ཐོད་མཁར་མེ་རླུང་འཚུབ་པས། ཞིང་ལྤགས་དང་མི་མགོ་སྐམ་རློན་གྱི་རྒྱན་ནི་མང་པོ་སྦྱར་བ། མི་རོ་དང་རྟ་རོ་བཅལ་དུ་བཀྲམ་ཞིང་མི་ཁྲག་དང་རྟ་ཁྲག་གི་ཆུ་བོ་འབབ་པ། ཕྱི་དུར་ཁྲོད་ཀྱི་གཞལ་ཡས་ཁང་ནང་རིན་པོ་ཆེ་སྣ་ཚོགས་ཀྱི་གཞལ་ཡས་ཁང་ཡོད་དེ། དེ་ན་དཔལ་ཡེ་ཤེས་ཀྱི་མགོན་པོའི་ཚོགས་ཐམས་ཅད་དུས་རྟག་ཏུ་བཞུགས་ཤིང་། དུས་བཟང་པོ་རྣམས་སུ་བཅོམ་ལྡན་འདས་ཕྱག་ན་རྡོ་རྗེ་དེར་བྱོན་ནས། མཁའ་འགྲོ་མ་རྣམས་དང་ལྷ་སྲིན་སྡེ་བརྒྱད་རྣམས་ལ་ཆོས་སྟོན་ཅིང་ཚོགས་ཀྱི་འཁོར་ལོ་བསྐོར་བར་མཛད་དེ། རི་དེའི་ལྷོ་ནུབ་ངོས་ན་ཤེལ་གྱི་བྲག་ཕུག་དབྱིབས་སྲིན་པོའི་ཁ་
གདངས་བ་འདྲ་བ་ཡོད་དེ། དེ་ཉིད་མིས་ནི་མི་མཐོང་བར་རིན་པོ་ཆེ་སྣ་ཚོགས་ལས་གྲུབ་པའི་སྐུ་མཁར་ལོངས་སྤྱོད་བཀོད་པ་ཕུན་སུམ་ཚོགས་པ་ཡོད་དེ། དེ་ན་དམ་ཚིག་རྡོ་རྗེ་ལེགས་པ་བཞུགས་ནས། རི་མ་ལ་ཡ་དེའི་གནས་བདག་ཞིང་སྐྱོང་གི་ཚུལ་ཡིན་པས། རིའི་རྩེ་དེར་དུས་བཟང་ལ་ཕྱག་རྡོར་ཕེབས་པ་ན། རྡོ་རྗེ་ལེགས་པ་ཡང་ཕྱག་ན་རྡོ་རྗེའི་འཁོར་དུ་འདུས་ནས་དབང་ཆོས་ཉན་པར་བྱེད་པ་སྟེ། གཞུང་ལས། རི་མ་ལ་ཡ་གནམ་ལྕགས་འབར་བའི་རྩེ་མོ་ཐོད་པའི་གཞལ་ཡས་ཁང་ན་དཔལ་ཕྱག་ན་རྡོ་རྗེའི་འཁོར་དུ་གནས་པའི་དམ་ཚིག་རྡོ་རྗེ་ལེགས་པ། ཞེས་དང་། ཨོ་རྒྱན་རིན་པོ་ཆེས་མཛད་པའི་དམ་ཅན་གྱི་བསྐུལ་པ་ཆེན་པོ་རཏྣ་གླིང་པའི་གཏེར་མ་ལས། ཀྱི། ལྷོ་ནུབ་མཚམས་ཀྱི་འཇིག་རྟེན་ན། །རི་བོ་མ་ལ་ཡའི་ཤར་ཕྱོགས་ནས། །གསང་བའི་རྫོང་ཆེན་ཤེལ་གྱི་བྲག་ཕུག་ནས། །སྲིན་མོ་མ་གྷའི་བྲག་ཕུག་ནས། །རླུང་ནག་འཚུབ་མའི་དཀྱིལ་འཁོར་ནས། །རྗེ་གཅིག་ཉག་གཅིག་སྐུར་བཞེངས་ཤིག །ཅེས་དང་། ཨོ་རྒྱན་རིན་པོ་ཆེས་མཛད་པ་རྡོ་རྗེ་གླིང་པའི་གཏེར་མ་དང་། ཉང་ཏིང་འཛིན་བཟང་པོས་མཛད་པའི་བསྐུལ་པ། མཁས་པ་ཀློང་ཆེན་རབ་འབྱམས་པའི་ལུགས་
གཉིས་ཀ་ནས། ལྷོ་ནུབ་སྲིན་པོའི་འཇིག་རྟེན་གྱི། །མ་ལ་ཡ་ཡི་ཤར་ཕྱོགས་ན། །སྲིན་པོ་ཁ་ཡི་བྲག་ཁུང་ན། །རླུང་ནག་འཚུབ་མའི་དཀྱིལ་འཁོར་ནས། །དགྲ་ལྷ་ཉག་གཅིག་སྐུར་བཞེངས་པ། །ལྕགས་སྤྱང་ནག་པོའི་མགོ་དགུའི་སྟེང་། །སྐུ་སྟོད་དར་དཀར་རས་དཀར་གསོལ། །སྐུ་སྨད་སྟག་གི་ཤམ་ཐབས་ཅན། །ཕྱག་གཡས་ཞགས་པ་ནག་པོ་ཐོགས། །གཡོན་པས་དབྱུག་ཏོ་འབར་བ་བསྣམས། །ཞལ་ནས་གདུག་པའི་ངན་སྔགས་སྒྲོག །སྐུ་ལ་མེ་ཡི་ཚྭ་ཚྭ་འཕྲོ། །སྐྱེས་བུ་དེ་ཡི་བཀའ་ཉན་ནི། །སྡེ་བརྒྱད་བཙན་འཁོར་གོ་ཞུབས་ཅན། །སུམ་བརྒྱ་དྲུག་ཅུ་སི་ལི་ལི། །ཐོག་སེར་བུ་ཡུག་ཐུ་ལུ་ལུ། །མེ་འོད་མཚོན་ཆ་ཡ་ལ་ལ། །ཞེས་དང་། གཞན་ཡང་གཏེར་ཁ་མང་པོ་ནས་དེ་དང་མཚུངས་པར་གསུངས་སོ། །དམ་ཚིག་གི་རྡོ་རྗེ་ལེགས་པ་འདི་ནི། མགོན་པོ་ཕྱག་བཞི་པའི་ལས་མགོན་བྱ་རོག་གདོང་མཆེད་གསུམ་གྱི་ནང་ནས་གཅིག་ཡིན་ཏེ། ཐོད་ནག་སྲོག་གི་སྤུ་གྲིའི་རྒྱུད་ཀྱི་འགྲེལ་པ་བླ་མ་རྡོ་རྗེ་གདན་པའི་གསུངས་བཞིན་དཔལ་རྒ་ལོའི་ཡི་གེར་བཀོད་པ་ལས། དེ་ལ་ལས་ཀྱི་མགོན་པོ་གསུམ་བརྟེན་པ་ནི། རྡོ་རྗེ་གནོད་སྦྱིན་དང་། རྡོ་རྗེ་སྲིན་པོ་དང་། །
རྡོ་རྗེ་ཀླུ་བདུད་གསུམ་ཡིན་ཏེ། དེ་ལ་གནོད་སྦྱིན་ནི་གནོད་སྦྱིན་རྣམ་ཐོས་ཀྱི་སྤྲུལ་པའོ། །རྡོ་རྗེ་སྲིན་པོ་ནི་ལྷོ་ཕྱོགས་རི་མ་ལ་ཡའི་བྲག་སྲིན་པོ་ཡིན་ནོ། །རྡོ་རྗེ་ཀླུ་བདུད་ནི་ཤི་ལེ་རུ་རྩེ་ཚེའི་སྤྲུལ་པ་ཡིན་ནོ། །ཞེས་དང་། དེའི་ཡིག་ཆུང་ལས། རྡོ་རྗེ་སྲིན་པོ་རི་མ་ལ་ཡའི་བྲག་སྲིན་གཙང་བཙན་ནོ། །ཞེས་དང་། དེ་ཡང་བཞི་པའི་ལས་སྦྱོར་གྱི་སྔགས་ཐམས་ཅད་ཀྱི་རྩ་བ་ནི། ཨོཾ་མ་ཧཱ་ཀཱ་ལ་སི་ཏི་ཡ་མ་དུ་ར༔ ཞེས་པོ་འདི་ཡིན་ལ། སྔགས་འདི་ནི་དམ་ཚིག་གི་རྡོ་རྗེ་ལེགས་པ་དེའི་སྙིང་པོ་ཡིན་ཏེ། །ཐོད་ནག་སྲོག་གི་སྤུ་གྲིའི་རྒྱུད་ཀྱི་འགྲེལ་པ་དེ་ལ།་སི་ཏི་ཡ་མ་ནི་རྡོ་རྗེ་སྲིན་པོའི་སྙིང་པོའོ། །ཞེས་གསུངས་སོ། །དེ་བཞིན་དུ་བྱ་རོག་གདོང་ཅན་མཆེད་དགུའི་སྐབས་སུ་དགེ་བསྙེན་བྱ་རོག་གདོང་ཅན་ཞེས་བྱ་བ་དམ་ཚིག་གི་རྡོ་རྗེ་ལེགས་པ་འདི་ཉིད་ཡིན་པ་དང་། མདོས་ཉི་ཤུ་སོགས་དང་བརྒྱ་བཅུ་སོགས་མདོས་ཀྱི་སྐབས་སུ། ཤར་དུ་གཙང་བཙན་སེང་གེ་ལ་ཞོན་པ་རྡོ་རྗེ་ཐེག་པ་ཞེས་པ་ནི། འཇིག་རྟེན་གྱི་སྐྱེས་བུ་ཆེན་པོ་དངོས་ཡིན་པའི་ཕྱིར། མགོན་པོ་ལས་གསང་བའི་རྒྱུད་ལས། ཨོཾ་མ་ཧཱ་ཀཱ་ལ་རྒྱུག་རྒྱུག་བྲིང་བྲིང་། མ་ཧཱ་ཀཱ་ལ་ས་དུ་ས་མ་ཡ། འུར་བ་འུར་བ་རྒྱུག་ཏྲི་རྒྱུག་ཏྲེ། མ་ཧཱ་ཀཱ་
ལ་གིང་ཀ་ར་ཏེ་ཤང་ཀུ་རུ་རྒྱུག་རྒྱུག་བྲིང་བྲིང་། མ་ཧཱ་ཀཱ་ལ་ཡ་བྷྱོ་བྷྱོ། ཞེས་སོགས་སྔགས་དང་བཅས་པ་གསུངས་པ་དང་། མགོན་པོ་ར་ཐོད་མ་རྒྱས་འབྲིང་བསྡུས་གསུམ་ཐམས་ཅད་ཀྱང་གཙོ་བོ་མགོན་པོའི་རྣོ་མདེལ་ལ་སྐྱེས་བུ་ཆེན་པོ་འདི་བཏགས་པའི་གདམས་པ་ཡིན་པར་གསལ་ལོ། །དེ་བཞིན་དུ་ནག་པོ་ཆེན་པོ་སྐུ་གསུང་ཐུགས་ཁྲོས་པའི་རྒྱུད་ཉང་གི་གཏེར་མ་ལས་ཀྱང་། བྷྱོ། དཔལ་ལྡན་མགོན་པོ་ནག་པོ་ཡི། །ནུབ་ཕྱོགས་སྒྲོལ་གིང་མཐུ་བོ་ཆེ། །ཞེས་སོགས་དམ་ཅན་སེང་ཞོན་གྱི་བསྐུལ་བ་དང་། བཛྲ་སཱ་དྷུ་དགྲ་བོའི་བླ་ལ་རྒྱུག་རྦད་སོད། ཅེས་སོགས་གསུངས་པའི་ཕྱིར། མགོ་ན་པོ་ཕྱག་བཞི་པའི་ལས་མཁན་གྱི་གཙོ་བོ་ནི། དམ་ཚིག་གི་རྡོ་རྗེ་ལེགས་པ་དང་འཇིག་རྟེན་གྱི་སྐྱེས་བུ་ཆེན་པོ་ཡིན་པས། ལ་ལ་དག་ཕྱག་བཞི་པ་དང་ལྷ་རུ་ཡོད་ཟེར་བ་སོགས་སྙིང་པོ་མེད་པར་ཤེས་པར་བྱའོ། །དེ་བཞིན་དུ་མགོན་པོ་སྤྱི་ཡི་རྒྱུད་ཁྲག་མཚོ་ཁོལ་ཆེན་ལས། གྲི་གུག་དང་ཁྲོས་པའི་དཀྱིལ་འཁོར་གསུངས་པའི་སྐབས་སུ། ནུབ་བྱང་གི་གྲྭར་སྲོག་བདུད་ནག་པོ་གཡས་གྲི་གུག་དང་གཡོན་ཐོད་ཁྲག་ཅན། ར་སྐྱེས་ཁམས་པའི་སྟེང་དུ་མེའི་སྤུ་གྲི་ལ་དབང་བྱེད་པའོ། །ཞེས་དང་།
ཧཱུྃ༔ སྲོག་བདུད་ནག་པོ་མ་རུངས་པ། །སྐུ་མདོག་དུད་ཁོའབར་བ་སྟེ། །ཞལ་གཅིག་སྤྱན་གསུམ་ཞལ་བསྒྲད་ནས། །མཆེ་གཙིགས་མི་བསྲུན་ང་རོ་ཅན། །ར་སྐྱེས་ཁམ་པའི་སྟེང་ན་བཞེངས། །ཕག་རྒོད་ལྤགས་པས་ཤམ་ཐབས་ཅན། །དྲེད་མོའི་གཡང་གཞི་སླག་པ་གྱོན། །རླུང་ལྷའི་ཕྱོགས་ཀྱི་ཕོ་ཉ་ཁྱོད། །གྲི་གུག་ཐོད་པ་དགྲ་སྙིང་ཕྱུངས། །ཐོད་པས་སྙིང་ཁྲག་ཆོས་ལ་འཐུང་། །མི་ཡི་ཁམས་ལ་དབང་བྱེད་པས། །དགྲ་བོའི་ལུས་ཀྱིས་དྲོད་སྡུས་ཤིག །འཁོར་དུ་སྲུལ་པོ་ལུས་སྲུལ་པོ། །ལྷ་མ་ཡིན་དང་མིའམ་ཅི། །ནག་པོ་ཀླུ་ཡི་འཁོར་གྱིས་བསྐོར། །ལས་ངན་སྡིག་ཅན་དགྲ་བོ་འདིའི། །སྙིང་རྩ་ཆོད་ལ་རེངས་པར་ཟོ། །ཁྱོད་ཀྱི་ཐུགས་དམ་དུས་ལ་བབ། །ཅེས་གསུངས་སོ། །གྲི་གུག་ཁྲོས་པའི་དཀྱིལ་འཁོར་གཙོ་བོ་མ་མགོན་གཉིས་ཀ་ཡིན་པ་དང་། །ལྷ་མོའི་རྒྱུད་གཞུང་མང་པོ་ནས། །སྲིན་མོ་ར་སྐྱེས་ལ་ཞོན་པ་སྐྱ་རེངས་ཀྱི་རྟ་ལ་ཞོན་ནས་དཔལ་ལྡན་ལྷ་མོའི་ཕྱི་བཞིན་དུ་འབྲང་བ། ཞེས་གསུངས་ཤིང་། གྲུབ་ཆེན་ཀརྨ་པའི་ལུགས་མ་མགོན་མགར་གསུམ་ཆོ་ག་གཅིག་ཏུ་བྱེད་པས། ལྷ་མོ་དང་ལྷ་རུ་ཡོད་ཟེར་བ་ཡང་བརྟག་པར་བྱའོ། །ལྷ་མོའི་བཤད་པ་ལས། མགར་
བ་དག་ནི་ཁྱོད་ཀྱི་དགྲ་ཡིན་ཀྱང་། །མ་བསྐྱོད་བརྟེན་པར་གྱུར་པ་མཐོལ་ལོ་བཤགས། །ཞེས་འདི་ཡང་རྒྱུད་གཞུང་ཚད་ལྡན་ཡིན་ནམ། མེ་ལྕེ་འབར་བའི་རྒྱུད་ལ་ནི་མི་སྣང་ངོ། །དེ་ལྟར་ཁྲག་མཚོ་ཁོལ་ཆེན་དང་གཞན་ཡང་གསར་རྙིང་གི་རྒྱུད་སྡེ་དུ་མ་ནས་སྐྱེས་བུ་ཆེན་པོའི་སྒྲུབ་ཐབས་མཆོད་བསྟོད་སོགས་གསུངས་ཤིང་། རྒྱུད་དེ་དག་ཕལ་ཆེར་ནི་སྤྲུལ་སྐུ་ཤཱཀ་ཐུབ་འཇིག་རྟེན་དུ་མ་བྱོན་པའི་གོང་རོལ། སྐྱེས་བུ་ཆེན་པོ་འདི་ཉིད་ཀྱང་མ་འཁྲུངས་གོང་རོལ་ནས་གསུངས་པ་མང་སྟེ། དེ་དག་ནས་གསུངས་པའི་ཡེ་ཤེས་ཀྱི་རྡོ་རྗེ་ལེགས་༴ པ་དང་། དམ་ཚིག་གི་རྡོ་རྗེ་ལེགས་པ་དེ་ཉིད་ཡིན་པར་ངེས་སོ། །དེ་ནས་འཇིག་རྟེན་པའི་རྡོ་རྗེ་ལེགས་པ་ཅི་ལྟ་བུ་ཞེ་ན། ཡེ་ཤེས་ཀྱི་རྡོ་རྗེ་ལེགས་པ་འོག་མིན་དུ་བཞུགས་པ་ལས་མ་གཡོས་པ་བཞིན་དུ་སྤྲུལ་པ་དམ་ཚིག་རྡོ་རྗེ་ལེགས་པ་བྱེ་བ་ཕྲག་བརྒྱར་སྤྲུལ་ཏེ། ལྷོ་ནུབ་རྔ་ཡབ་གླིང་ཕྲན་བྱེ་བ་ཕྲག་བརྒྱའི། རི་བོ་མ་ལ་ཡའི་བྱེ་བ་ཕྲག་བརྒྱའི་ཞིང་སྐྱོང་མཛད། མཚན་ལ་རྡོ་རྗེ་སྲིན་པོ་དང་། རི་བོ་མ་ལ་ཡའི་བྲག་སྲིན་དང་། རྗེ་གཅིག་ཉག་གཅིག་དང་། དགེ་བསྙེན་བྱ་རོག་གདོང་དང་སྲོག་བདུད་མ་རུངས་པ་སོགས་སུ་མཚན་ཐོགས་ཏེ། ཕྱག་ན་རྡོ་
རྗེ་བྱེ་བ་ཕྲག་བརྒྱའི་བཀའ་སྡོད་བྱེད་བཞིན་ལས་མ་གཡོས་པར། ཡང་སྤྲུལ་འཇིག་རྟེན་གྱི་སྐྱེས་བུ་རྡོ་རྗེ་ལེགས་པ་བྱེ་བ་ཕྲག་བརྒྱར་སྤྲུལ་ལོ། །དེ་རེ་རེ་ལ་ཡང་སུམ་སྤྲུལ་སྤྲུལ་པ་མཆེད་ཟླའི་ཚུལ་སུམ་བརྒྱ་དྲུག་ཅུ་རེ་རེར་སྤྲུལ་ལོ། །དེ་ལྟར་གཙོ་བོ་དང་འཁོར་སུམ་བརྒྱ་དྲུག་ཅུ་པོ་རྣམས་རེས་འགའ་ལྷ་འདྲེའི་ཚུལ་དང་། རེས་འགའ་མིའི་སྐྱེ་བ་མང་དུ་བརྒྱུད་དེ། དེ་ཐམས་ཅད་ཅིག་མིར་སྐྱེ་ཚེ་གཞན་ཐམས་ཅད་ཀྱི་དེའི་སྡོང་གྲོགས་བྱེད་པ་ཁོ་ན་འབྱུང་བས། མི་ཕལ་པ་དང་མི་འདྲ་བའི་རྫུ་འཕྲུལ་ཅན་དེ་འབྱུང་བ་སྟེ། དེ་ཡང་རྒྱ་གར་གྱི་ཡུལ་དུ་དམ་པའི་ཆོས་སྐྱོང་བའི་རྒྱལ་པོ་དུ་མ་དང་། རྒྱ་ནག་གི་ཡུལ་དུ་རྒྱལ་ས་བཟུང་ནས་ཁྲིམས་སྐྱོང་ཞིང་གཙུག་ལག་གི་རྩིས་དར་བར་བྱེད་པ་དང་། སྟག་གཟིག་ནོར་གྱི་རྒྱལ་པོ་དང་། དེ་བཞིན་རྫུ་འཕྲུལ་མཐུ་དང་ལྡན་པའི་སྔགས་པ་དང་། བནྡེ་ཆེན་པོ་དང་བོན་པོ་ཆེན་པོ་དང་། ཞང་བློན་ཆེན་པོ་དང་། དམག་དཔོན་ཆེན་པོ་དང་། ཇག་དཔོན་ཆེན་པོ་དང་། ཚོང་དཔོན་ཆེན་པོ་མཚོན་ཆ་བསམ་ཚོད་འབར་བ། གོ་ཁྲབ་མཚོན་ཆ་རྒྱུག་པ་དག་བཟོ་བའི་མགར་བའི་སྐྱེ་བ་མང་དུ་བརྒྱུད་དེ། ཨོ་རྒྱན་རིན་པོ་ཆེས་མཛད་པའི་བསྟོད་པ་བཀའ་མ་དང་གཏེར་མ་
གཉིས་ཚིག་མཐུན་པར། སྔོན་ཚེ་ཐོག་མར་རང་གི་བག་ཆགས་སམ། །སྨོན་ལམ་དམ་བཅའ་ཉིད་ཀྱི་མོས་པ་ཡི། །རྒྱ་བོད་མདོ་གཙང་བགྲོད་པའི་སྣ་འདྲེན་པ། །ཚོང་དཔོན་ཆེན་པོའི་སྐུ་ལ་མཆོད་འབུལ་བསྟོད། །ཅེས་དང་། རྗེ་རང་བྱུང་པས་མཛད་པའི་གསོལ་ཁ་ནས། བརྒྱ་ནི་རྒྱ་གར་ཡུལ་དུ་བཞུགས། །རྒྱ་གར་ཆོས་ཀྱི་རྒྱལ་ས་མཛད། །བརྒྱ་ནི་རྒྱ་ནག་ཡུལ་དུ་བཞུགས། །རྒྱ་ནག་ཡུལ་གྱི་ཨ་ཇོ་མཛད། །རྒྱ་ནི་འབྲོ་མཆོག་ཡུལ་དུ་བཞུགས། །འབྲོ་མཆོག་ཡུལ་གྱི་མཁས་དཔོན་མཛད། །དྲུག་ཅུ་བོད་ཡུལ་དབུས་སུ་བཞུགས་།སྔགས་པ་མཐུ་བོ་ཆེ་ཡང་མཛད། །ཅེས་གསུངས་སོ། །དམ་ཅན་ཡང་འགྱེད་ལས། །ལྔ་བཅུ་གེ་སར་ཡུལ་དུ་བཞུགས། །གེ་སར་དམག་གི་རྒྱལ་པོ་མཛད། །ལྔ་གཟིག་ཡུལ་དུ་བཞུགས། །སྟག་གཟིག་ནོར་གྱི་རྒྱལ་པོ་མཛད། །དྲུག་ཅུ་བོད་ཡུལ་དབུས་སུ་བཞུགས། །བནྡེ་རྣམས་ཀྱི་ཆོས་སྐྱོང་མཛད། །གཙུག་ལག་ཁང་གི་སྲུང་མ་།དྲུག་ཅུའི་ནང་ནས་ཁྱད་པར་འཕགས། །མཚན་ནི་རྡོ་རྗེ་དྲག་པོ་སྟེ། །གསང་མཚན་མགར་བ་ནག་པོ་ལ། །ཞེས་གསུངས་སོ། །དེ་ལྟར་མཛད་པའི་ལོ་རྒྱུས་ཅི་ལྟ་བུ་ཞེ་
ན། མཆེད་ཟླ་བཙན་གྱི་གིང་ཆེན་ཡམས་ཤུད་དམར་པོར་སྤྲུལ་པ། ཀླུ་སེ་ཧུའི་བུ། རྒྱ་ནག་གི་རྟ་རྫི་དེས་རྒྱལ་པོ་འཕྲོག་སྟེ། མེ་ཉག་འགའི་རྒྱལ་པོ་ཞེས་རྒྱ་མེ་ཉག་གཉིས་ཀ་ལ་དབང་བསྒྱུར་བ་དང་། མཆེད་ཟླ་ལྷའི་གིང་ཆེན་ཚངས་པ་དཀར་པོ་ཞེས་ཀྱང་བྱ། གནམ་ཐེལ་དཀར་པོ་ཞེས་ཀྱང་བྱ་བ་ཧོར་གྱི་བུར་སྤྲུལ་ནས། རྒྱ་ནག་གི་རྒྱལ་ས་འཕྲོག་སྟེ། རྒྱ་བོད་ཧོར་གསུམ་ལ་དབང་བསྒྱུར་བ་སེ་ཆེན་རྒྱལ་པོ་དང་། གཞན་ཡང་བར་ཧོར་གྱི་ཕ་མྱེས། ཧོར་སྟོད་ཐའི་ཕ་མྱེས་རྒྱལ་པོ་དཀར་པོ་དང་། ཧོར་བར་ཐའི་རྒྱལ་པོ་ཕ་མྱེས་རྒྱལ་པོ་དམར་པོ་དང་། ཧོར་སྨད་ཐའི་ཕ་མྱེས་རྒྱལ་པོ་ནག་པོ་དང་། དེ་རྣམས་ཀྱང་མཆེད་ཟླ་གནམ་ས་བར་གྱི་ཐེའུ་གསུམ་གྱི་སྤྲུལ་པར་སྣང་ལ། དུས་ཕྱིས་ཧོར་སྟོད་ཐའི་རྒྱལ་པོ་ཞིག་གིས་ཆོས་དྲན་ལ་འདྲེས་བརྩལ་བས། ཞིང་སྐྱོང་གི་མདོས་བཅས་ནས་དེ་བསྒྲལ་དགོངས་ཏེ་ཟླ་བ་གཅིག་ལ་མདོས་ཆ་བཟོས་ཙམ་ན། ནུབ་གཅིག་ཧོར་གྱི་རྒྱལ་པོ་དེས་བེར་ལྗང་ཁུ་གྱོན་ཏེ། །འབྲུག་ལ་ཞོན་ནས་ནམ་མཁར་བྱུང་ཛ། ཆོས་སྐྱོང་རྣམས་ཀྱང་བཞའ་ཡུད་ཡུད་བྱེད་པ་གཟིགས་ཏེ། དམ་ཅན་གྱི་མཆེད་ཟླ་གཅིག་གི་སྤྲུལ་པ་ཡིན་པར་དགོངས་ནས། མདོས་མ་བཅས་
མདོས་ཆ་དེ་ད་ལྟ་བྱུང་ཡང་པ་ཅན་དུ་ཡོད་སྐད། མདོར་ན་གློ་བུར་གྱི་རྒྱལ་པོ་སྟོབས་དང་ལྡན་པ་ཕལ་ཆེར་སྐྱེས་བུ་ཆེན་པོའི་མཆེད་ཟླ་རེ་མིར་སྐྱེ་བ་བླངས་པ་ཡིན་ལ། །འཁོར་དང་ཡང་འཁོར་རྣམས་ཀྱང་མིར་སྐྱེས་སྐབས་བརྡུང་བའི་གྲི་དང་གོ་ཁྲབ་ཐེལ་རང་མགར་བས་བརྡུང་ཟེར་བ་ཡིན་ནོ། །དེ་ལ་གཙོ་བོ་སྐྱེས་བུ་ཆེན་པོ་འདི་ཉིད་རིགས་གསུམ་གྱི་སྐྱེ་རྒྱུད་ནི། རྣམ་སྣང་གི་སྤྲུལ་པ་བྱང་ཆུབ་སེམས་དཔའ་རྡོ་རྗེ་ལེགས་པ་དེ་ནི། །བསྐལ་པ་དཔག་ཏུ་མེད་པར་སངས་རྒྱས་ཀྱི་ཞིང་ཁམས་མཐའ་ཡས་པ་རྣམས་སུ་ཕ་རོལ་ཏུ་ཕྱིན་པ་དྲུག་ལ་སྤྱད་པ་སྤྱོད་ནས། ས་བཅུ་ཆོས་ཀྱི་སྤྲིན་ཐོབ་པ་ན། འོག་མིན་འཐུ་ས་པོ་བཀོད་པའི་ཞིང་ཁམས་ན། མེ་ཏོག་པདྨའི་སྙིང་པོ་ལ། བརྫུས་ཏེ་འཁྲུངས་ནས་སངས་རྒྱས་རྣམ་པར་སྣང་མཛད་ཀྱི་ཞབས་འབྲིང་མཛད་ཅིང་བཞུགས་ཏེ། དེ་བསྐལ་པ་མང་པོའི་གོང་ནས་དེ་ལྟར་བཞུགས་སོ། །དེའི་སྤྲུལ་པ་གཅིག་འདས་པའི་སངས་རྒྱས་ཞིག་གི་བསྟན་པ་ལ་དགེ་བའི་བཤེས་གཉེན་མཁས་པ་ཞིག་ཏུ་སྐྱེས་པ་ཙ་ན། ཚུལ་ཁྲིམས་འཆལ་བར་གྱུར་པས། དེའི་རྣམ་སྨིན་གྱིས་རི་མ་ལ་ཡའི་བྲག་སྲིན་བཙན་འགོང་དུ་སྐྱེས་སོ། །དེ་ཡང་མྱེས་པོ་རྣམས་ཀྱི་རུམ་རུམ་རྗེ་ཞེས་
བྱ་བ་དང་། ཕྱི་མོ་པའི་མེར་མེར་བདག་ཅེས་བྱ་བའི་བུ། བདུད་གདུག་པ་ཅན་རི་མ་ལ་ཡ་ལ་གནས་བཅས་པ་ཞིག་དང་། མ་ལ་ཡའི་བྲག་སྲིན་མོ་གཉིས་ཀྱི་སྲས་ཡིན་པས། སེམས་ཅན་ལ་གནོད་འཚེ་བྱེད་ཅིང་གླིང་བཞི་ཁྱབ་པར་རྒྱུག་ཙམ་ན། བལ་ཡུལ་ཨ་སུ་རའི་བྲག་ཕུག་ཏུ་བཅོམ་ལྡན་འདས་ཕྱག་ན་རྡོ་རྗེ་དང་མཇལ་ཏེ་དམ་ལ་བཏགས་ནས་གསང་སྔགས་ཀྱི་སྲུང་མར་བསྐོས་ཏེ། འདི་ནི་སྤྲུལ་སྐུ་ཤཱཀ་ཐུབ་མ་བྱོན་པའི་སྔོན་ཙམ་ཡིན་པར་སྣང་ངོ། །དེའི་དོན་ཨོ་རྒྱན་རིན་པོ་ཆེས་མཛད་པའི་དམ་བརྡར་ལས། ཧོ། ལྷའི་དགེ་བསྙེན་ཆེན་པོ་ཁྱེད་ཉོན་ཅིག །དང་པོ་བྱང་ཆུབ་མཆོག་ཏུ་སེམས་བསྐྱེད་ཙམ་ན། རྒྱུན་གྱིས་ཁྲིམས་བསྲུང་ཙ་ན་འཆལ་བར་གྱུར་ཏེ། དེའི་རྣམ་སྨིན་གྱིས་ཤིང་ཕྱོགས་བཙན་འགོང་དུ་སྐྱེས་སོ། །དེ་ཚེ་ཀུན་ལ་གནོད་ཅིང་འཚེ་བ་ལས། མཇུག་ཏུ་སངས་རྒྱས་ཀྱི་བསྟན་པ་ལ་དད་པར་གྱུར་ཏེ། །དཀོན་མཆོག་གསུམ་ལ་སྐྱབས་སུ་གསོལ་ནས། ཨ་སུ་རའི་བྲག་ཕུག་ཏུ། རྡོ་རྗེ་འཛིན་པའི་ཞལ་མཐོང་ནས། ལག་ཏུ་རྡོ་རྗེ་གཏད་ཅིང་ལྕེ་ལ་བདུད་རྩི་ཨ་མྲྀ་ཏ་བཞག་ནས། སྙིང་ཁར་སྲོག་གི་སྙིང་པོ་ཏྲི་བརྗོད་ནས་རྡོ་རྗེ་བཞག་ནས། གསང་སྔགས་རྡོ་རྗེ་མཆོག་གི་གྲལ་དུ་
བཞག་སྟེ་ཐར་པ་ཐོབ་པའི་ལུང་བསྟན་ཅིང་གསང་བའི་མིང་བཏགས་ནས་མ་འོངས་པའི་རྣལ་འབྱོར་པས་སྒྲུབ་པའི་གྲོགས་བྱ་བར་ཁས་བླངས་པ་ཡིན་པས། བདག་གི་ཕྲིན་ལས་མྱུར་དུ་སྒྲུབས་ཤིག །གལ་ཏེ་ཁྱེད་ཀྱིས་དམ་ཚིག་ལས་འདས་པར་གྱུར་ན། སྙིང་གི་དཀྱིལ་དུ་སྡིག་པ་ནས་ཙམ་ཞིག་ཞུགས་ནས། སྙིང་ཁྲག་འཇིབས་ཏེ། ཚེ་འདིར་བརླག་ཅིང་ཕྱི་མ་རྡོ་རྗེའི་དམྱལ་བར་འགྱུར་རོ། །དེ་བས་རྡོ་རྗེ་འཛིན་གྱི་བཀའ་ཉོན་ལ་དམ་ཚིག་ཚུལ་བཞིན་ཏུ་སྲུངས་ཤིག །ཅེས་འབྱུང་ངོ། ༈ །དེ་ནས་འཇིག་རྟེན་གྱི་རྡོ་རྗེ་ལེགས་པའི་ཡབ་མོན་པ་ནག་པོའི་སྐྱེ་རྒྱུད་ནི། རྒྱ་གར་ནུབ་ཕྱོགས་ཕ་ཝཾ་ལོང་བུའི་སྐུ་མཁར་ན། ཕ་སྲིན་པོ་སྤེལ་མགོ་གདོང་། མ་བདུད་མོ་ཁྲག་གདོང་མ་གཉིས་ཀྱི་ཟས་སུ་སྐྱེ་འགྲོ་ཤ་ཁྲག་ཟ་ཞིང་ལས་སུ་སྐྱེ་འགྲོའི་སྲོག་གཅོད་ཅིང་གནས་པ་ལ། དེ་གཉིས་ལ་བུ་སྲོག་གཅོད་མོན་པ་ནག་པོ་བྱ་བ་སེམས་ཅན་གྱིས་བདུད་ཅིག་བྱུང་སྟེ། དེའི་འཁོར་མོན་ཕོ་མོ་དང་བྱ་གཅན་གདུག་པ་ཅན་གྱིས་བསྐོར་ནས་གནས་པ་ལ། བདུད་ཁ་ལ་མེ་འབར་གྱིས་བསད་དོ། །དེའི་སྐྱེ་བ་ཕྱི་མ་ལ་རྒྱུ་བསྟན་གྱི་མགར་བ་ས་ཆོག་བྱ་བར་སྐྱེས་ནས། དེ་མཚོན་ཆའི་བཟོ་ལ་ཤིན་ཏུ་
མཁས་པར་གནས་པ་ལས། རྒྱལ་པོའི་ཆད་པ་བྱུང་ནས་སྙིང་བཏོན་ནས་བསད་དོ། །དེའི་སྐྱེ་བ་ཕྱི་མ་ལ་ཨ་ཙ་ར་ནག་པོ་ཅིག་ཏུ་སྐྱེས་ཏེ། དེ་ཡང་སྔོན་སྐྱེས་པའི་ཕ་ཝཾ་ལོང་བུའི་གནས་ན། ཕ་སྲིན་པོ་སྤེལ་གདོང་དང་། མ་བདུད་མོ་ཁྲག་གདོང་མའི་བུ་ཡིན་པས། ཁོ་རང་བདུད་དང་སྲིན་པོ་གཉིས་ཀ་ཡིན་པས་ཏེ། དཔེར་ན། ལས་ཀྱི་མགོན་པོ་ཐམས་ཅད་བདུད་དང་སྲིན་པོ་གཉིས་ཀ་ཡིན་པ་ལྟ་བུའོ། །དམུ་རྗེ་བཙན་ཞེས་བྱ་བ་སྟེ། ངོ་བོ་དམུ་ཡིན་རྒྱལ་པོ་སྟག་ཞུ་ཅན་དང་། བདུད་རེ་ལྡེ་མགོ་ཉག་ཅེས་ཀྱང་བྱ། ཕྱག་རྡོར་ཞལ་མཐོང་ཞིང་དད་ཟློཔ་དང་ལྡན་ནོ། །འཁོར་ཨ་ཙ་ར་དང་། མོན་པ་སྟོང་ཕྲག་དུ་མ་ཡོད་དོ། །ལུས་ནི་སྲིན་པོའི་གཟུགས་ཅན་ལ་བྱི་བའི་གདོང་པ་ཅན་ནོ། །མིང་ནི་མོན་པ་ནག་པོ་ཞེས་ཀྱང་བྱ། སྤྲུལ་པ་ནི་ཨ་ཙ་ར་ནག་པོ་གཅིག་ཏུ་འོང་བས། མོན་པ་སྒོ་རྡུང་སོགས་ཆོ་འཕྲུལ་བཏང་བ་དེ་ནི། དམ་ཅན་གྱིས་ཡབ་ལས་ལ་ཆད་པ་ཡིན་ནོ། །འདི་ནི་དྲེགས་པ་ཉི་ཤུ་གི་གཅིག་ཡིན་ནོ། །དམུ་ལ་རིགས་མང་བའི་ནང་ནས་དམུ་བདུད་ཀྱི་རིགས་ཏེ། དམུ་དང་བདུད་བཤོས་པའི་སྲས་མོ། བདུད་མོ་སྤྲེའུ་གདོང་པ་ནི་དམ་ཅན་གྱི་ཡུམ་ཡིན་ཏེ། མིང་མོན་མོ་ནག་མོ་ཞེས་
ཀྱང་བྱ། གངས་དཀར་ཉི་མ་འཕྲུལ་ཡང་ཟེར། བདུད་ཟ་སྨིན་དཀར་མ་ཞེས་ཀྱང་བྱ་སྟེ། འཁོར་བུད་མེད་ཁྲག་གི་རྒྱུ་མ་དང་ནད་ཀྱི་རྐྱལ་པ་རྡེག་པ་འབུམ་ཕྲག་དང་བཅས་པའོ། །དེ་ལ་སྐྱེས་བུ་ཆེན་པོ་འདི་དང་པོ་གཤིན་རྗེ་ཆོས་རྒྱལ་གྱི་སྲས་སུ་འཁྲུངས་པ་དེ་ཚེ་འཕོས་ནས་ཡབ་མོན་པ་ནག་པོ་དང་། ཡུམ་མོན་མོ་ནག་མོ་དེ་གཉིས་ཀྱི་སྲས་སུ་འཁྲུངས་སོ། །དེ་ཡང་རྒྱ་གར་ཡུལ་གྱི་ནུབ་ཕྱོགས་དུར་ཁྲོད་རུལ་དབང་རོ་མྱག་མིན་པའི་དཀྱིལ་ཞེས་ཀྱང་བྱ། གཤིན་རྗེའི་གྲོང་སྡོང་ཆེན་པོ་ཞེས་ཀྱང་བྱ། གཤིན་རྗེའི་གྲོང་ཁྱེར་ལྟར་ཤིན་ཏུ་འཇིགས་ཤིང་སྐྱི་གཡའ་བ། སྟེང་ནས་འབྱུང་བ་ཆུ་དང་རླུང་་འཁོར་ལོ་འཁོར་བ། འོག་ནས་འབྱུང་བ་རླུང་དང་སའི་འཁོར་ལོ་འཁོར་བ། དུས་མ་ཡིན་པའི་ཐོག་དང་སེར་བ་དང་བུ་ཡུག་དང་ཁུ་འཕང་དང་མཚོན་ཆ་སྣ་ཚོགས་ཀྱི་ཆར་འབེབས་པ། གསོད་གཅོད་རྔམས་པའི་འབྲུག་སྒྲ་སྒྲོག་པ། སྐབས་སུ་སྐར་མདའ་དྲག་པོ་གཏོང་ཞིང་གཟའ་དང་ལྷ་མ་ཡིན་སྡེ་བརྒྱད་འགྱུ་བ་འཁྲུག་པ་ཉིན་བཞིན་དུ་རླུང་ནག་འཚུབ་པ། མཚན་བཞིན་དུ་མེ་འབར་བ། སྟེང་ན་སྤྲིན་ནག་པོ་མུན་ལྟར་གཏིབས་པའི་ནང་ན་གློག་འགྱུ་བ། འབྱུང་བ་ཚ་གྲང་འཁྲུག་པའི་སྒྲ་
པོ་སྒྲོག་པ། དེ་ལྟ་བུའི་དུར་ཁྲོད་ཆེན་པོའི་དབུས་ན།། སྣ་སྲིད་ཀྱི་ལྷ་འདྲེ་ཐམས་ཅད་ཀྱི་བླ་རྡོ། རྡོ་ཕ་བོང་ལོང་བུ་ལས་གྲུབ་པའི་སྐུ་མཁར་འོད་རྣམ་པ་ལྔའི་འཇའ་ཚོན་གྱིས་བསྐོར་བ་གཅིག་ཡོད། ནང་ནི་རིན་པོ་ཆེ་སྣ་ཚོགས་པ་ལས་གྲུབ་པའི་གཞལ་ཡས་ཁང་། ལོངས་སྤྱོད་དཔག་ཏུ་མེད་པ་དང་བཅས་པར་སྣང་ངོ། །དེ་ལྟ་བུའི་གནས་ནས་ཡབ་འོལ་རྒོད་སྟོང་རྗེ་མོན་པ་ནག་པོ་སྲིན་པོ་བྱི་ལའི་གདོང་ཞེ་སྡང་གི་མེ་འབར་བ་དང་། ཡུམ་དམར་བཤམས་གནོད་སྦྱིན་སྙིང་འཕྲོག་མ་ཞེས་བྱ་བ་ཉི་ཟ་ཁྲི་བཙུན་ཟེར་མོན་མོ་བདུད་མོ་སྤྲེའུ་གདོང་། །འདོད་ཆགས་ཀྱི་ཆུ་ཁོལ་པ། ཟས་སུ་སྐྱེ་འགྲོའི་ཤ་ཟ་བ་སྐོམ་དུ་སྐྱེ་འགྲོའི་ཁྲག་འཐུང་བ། ལས་སུ་སྐྱེ་འགྲོའི་སྲོག་གཅོད་པ་དེ་གཉིས་ཉོན་མོངས་རང་གར་སྤྱོད་པ་ལས་སྲས་འཇིག་རྟེན་གྱི་སྐྱེས་བུ་ཆེན་པོ་འདི་འཁྲུངས་ཏེ། དེ་ཡང་རིགས་ནི་གནོད་སྦྱིན་གྱི་རིགས་ཀྱི་བཙན་ཡིན་ཏེ། དམུའི་བཙན་རོལ་པོ་སྐྱེས་ཞེས་བྱ། ཤིན་ཏུ་འཇིགས་ཤིང་སྐད་འབྲུག་ལྟར་ལྡིར་བ། ལྕེ་གློག་ལྟར་འཁྱུག་པ། ལུས་ཀྱིས་སྤྲུལ་བསྒྱུར་སྣ་ཚོགས་སྟོན་ཅིང་། རབ་ཏུ་ཁྲོས་ཆེ་ཟ་བྱེད་སྤྱང་ཀའི་གདོང་། གཅན་གཟན་གདུག་པའི་མཆེ་བ་སྟོན་པ། སྐྱེས་འགྲོའི་ཤ་ཟ་ཞིང་ཁྲག་
འཐུང་བ། དེ་ལ་འཁོར་དུར་ཁྲོད་ཀྱི་བདུད་ནག་པོ་སྤུན་གསུམ་ཞེས་བྱ་བས་བསྐོར་ནས། སྐྱེ་འགྲོ་ཀུན་གྱི་བདུད་དུ་བྱུང་ངོ། །གཞན་ཡང་འདབ་ཆགས། གཅན་གཟན་དཔག་ཏུ་མེད་པས་དུར་ཁྲོད་ཀྱི་རོ་གསར་རྙིང་ལ་ལོངས་སྤྱོད་ཅིང་། ཁྱད་པར་ཤ་ཟ་གདུག་པ་ཅན་སེང་གེ་དང་སྟག་དང་སྤྱང་ཀི་གསུམ་གྱིས་སྐྱེ་འགྲོའི་བླ་སྲོག་འཕྲོག་པར་བྱེད་ཅིང་གནས་པའོ། །དེའི་ཚེ་གཤིན་རྗེ་ཆོས་ཀྱི་རྒྱལ་པོས་རང་གི་བུ་ཡིན་པར་ཤེས་ནས་ཁམས་གསུམ་གྱི་མཐུ་སྟོབས་བསྡུས་ཏེ་ཐོ་བ་གཅིག་ཏུ་བྱས་ནས་ལག་ཏུ་བྱིན་ནོ། །དེ་ནས་མགར་བ་ཞེས་གྲགས་སོ། །དེའི་དུས་སུ་རྒྱ་གར་གྱི་ཡུལ་འབྲོག་གནས་ཀྱི་དགོན་པ་ཞེས་བྱ་བ་བྲམ་ཟེ་པྲ་སེ་ན་ཞེས་བྱ་བའི་དྲང་སྲོང་མངོན་ཤེས་དང་ལྡན་པ་ཞིག་ར་རྫི་བྱེད་ཅིང་ཡོད་པ་ལ། དེའི་ཚེ་གནོད་སྦྱིན་ཟ་བྱེད་སྤྱང་ཀིའི་གདོང་དེས་ལྕགས་སྤྱང་འུར་བ་མང་པོར་སྤྲུལ་ནས་ར་ཐམས་ཅད་བསད་ནས་ཟོས་ཏེ་ར་རྗེས་མ་ཐུབ་བོ། དེའི་ཚེ་དྲང་སྲོང་དེ་ཉིད་བཅོམ་ལྡན་འདས་ཤཱཀྱ་ཐུབ་པ་དག་ལ་དེར་སོང་ནས་ཕྱག་འཚལ་པུས་མོ་ས་ལ་བཙུགས་ནས། བཅོམ་ལྡན་འདས་ལ་གསོལ་པ། འཁོར་བར་འཁོར་བའི་མཐུ་སྟོབས་ཅན། །ད་ལྟ་འཇིག་རྟེན་ཁམས་འདི་ན། །ཡི་
དྭགས་རྫུ་འཕྲུལ་ནུས་མཐུ་ཅན། །ཁམས་གསུམ་སེམས་ཅན་བདུད་དུ་བྱུང་། །ཐམས་ཅད་མཁྱེན་པས་འདུལ་བར་ཞུ། །ཞེས་གསོལ་པ་དང་། བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་ཐུལ་ཅིག་བཀའ་བསྒོས་པ་དང་། ཕྱག་ན་རྡོ་རྗེ་ཐུགས་རབ་ཏུ་ཁྲོས་པའི་ཚུལ་གྱིས་ཚེ་སྲོག་འགུགས་པའི་སྔགས་ཀྱིས་ཁོ་རང་རྒྱུད་པ་བཀུག །ཕྱིར་མི་ལྡོག་པའི་སྔགས་ཀྱིས་འབྲོས་ལམ་བཅད་། གཟུགས་ལ་དབབ་པ་སྔགས་ཀྱིས་དབང་དུ་སྡུས་ཏེ། ཨོཾ་བཛྲ་པཱ་ཎི་ཧཱུྃ། ཞེས་གཟིར་ཞིང་རྡོ་རྗེ་སྙིང་ཁར་གཏད་པས་ཁོ་བརྒྱལ་བར་གྱུར་ཏེ། བརྒྱལ་སངས་ནས་རང་དབང་མེད་པར་བསྔང་ཞིང་བྲད་ནས། རང་རྟགས་སྲོག་གི་སྙིང་པོ་ཧྲི་ཞེས་ཕུལ་ལོ། །བསྟན་པ་བསྲུང་བར་ཁས་བླངས་དམ་བཅས་གསང་མཚན་མིང་ཡང་རྡོ་རྗེ་ལེགས་པ་སྟེ། བཛྲ་སཱ་དྷུ་བཏགས་ཝཀ་ཏྲ་ཤེ་ནི་ཞེས་བྱང་ཆུབ་མཆོག་ཏུ་སེམས་བསྐྱེད་ཀྲ་མ་ནི་ཞེས་དབང་བསྐུར། ས་མ་ཞེས་དམ་ཚིག་ཕོག །སཱ་དྷུ་ཞེས་དམ་ལས་འདས་ན་རྡོ་རྗེའི་དམྱལ་བར་སོང་ཞིག་དམོད་བོར། ཛཿཧཱུྃ་བཾ་ཧོ༔ ཞེས་བཀུག་གཞུག་དབང་དུ་བྱས་དགྱེས་པ་བསྐྱེད་ནས། ཞིང་བཅུ་བསྒྲལ་བའི་ཤན་པར་བསྐོས། དམ་པའི་ཆོས་ཀྱི་སྲུང་མར་དབང་བསྐུར་རོ། །དེའི་
བྲམ་ཟེའི་དྲང་སྲོང་པྲ་སེ་ནས་ཞུས་པའི་ངོར། བཅོམ་ལྡན་འདས་ཕྱག་ན་རྡོ་རྗེས་དམ་ཅན་མགར་ནག་གི་རྒྱུད་ལེའུ་བཅུ་པ་གསུངས་སོ། །དགྲ་བླ་སྟག་སྤྱང་རོལ་པ་ཞེས་ཀྱང་བྱ། དགྲ་བླ་སྟག་སྤྱང་ཁ་སྤྲོད་ལེའུ་དགུ་པ་ནི། གཞན་གྱིས་མ་ཞུས་པས་ཕྱག་ན་རྡོ་རྗེ་ཉིད་ཀྱིས་གསུངས་ཏེ། ལྷ་དབང་ཕྱུག་ཆེན་པོ་དང་མ་མོ་ཨེ་ཀ་ཙ་ཏི་ལ་གཏད་དོ། །རྒྱུད་དེ་གཉིས་ནི་མགར་ནག་གི་རྒྱུད་ཡིན་ལ། ཡང་སུམ་ཅུ་རྩ་གསུམ་ལྷའི་གནས་རི་བོ་རྩུབ་འགྱུར་གྱི་ཚལ། སྟེང་ཕྱོགས་འཁོར་ལོ་དང་པདྨ། འོག་ཕྱོགས་ཁྲག་དང་ཞག་གི་རྦ་རླབས་འཕྱོ་བ། དུར་ཁྲོད་ཆེན་པོའི་གནས་ན་བཅོམ་ལྡན་འདས་དཔལ་ཕྱག་ན་རྡོ་རྗེ་ལ། འཁོར་ལྷ་དང་མི་དང་ལྷ་མོ་ཡིན་ལ་སོགས་པ་བསམ་གྱིས་མི་ཁྱབ་པས་བསྐོར་ནས་བཞུགས་པའི་ཚེ། །བྲམ་ཟེ་པྲ་སེ་ན་སྟན་ལས་ལངས་ཏེ། བཅོམ་ལྡན་འདས་ལ་བསྐོར་བ་ལན་གསུམ་བྱས་ནས། ལྷ་རྫས་ཀྱིས་མཆོད་པ་བསམ་གྱིས་མི་ཁྱབ་པས་མཆོད་ནས་ཞུས་པའི་ངོར། རྡོ་རྗེ་ལེགས་པ་དུག་མདའ་གསང་བ་འཁོར་ལོའི་རྒྱུད་ལེའུ་བཅུ་བདུན་པ་གསུངས་ཏེ། འདི་ནི་མགར་དམར་ཡིན་ནོ། །གཞན་ཡང་བཀའ་བརྒྱུད་བྱེ་བྲག་གི་རྒྱུད་ལས། སྡེ་དཔོན་སུམ་ཅུའི་ནང་དུ་
དམ་ཅན་གྱི་རྒྱུད་ཅིག་བཞུགས། དྲེགས་པ་བཅོ་བརྒྱད་ཀྱི་རྒྱུད་བཅོ་བརྒྱད་གྲར། དམ་ཅན་གྱི་རྒྱུད་གཅིག་བཞུགས། དེ་རྣམས་སྒེར་རྒྱུད་ཡིན་ལ། སྤྱི་རྒྱུད་ནི་འཇིག་རྟེན་མཆོད་བསྟོད་ཀྱི་རྒྱུད་དང་། དམོད་པ་དྲག་སྔགས་ཀྱི་རྒྱུད་དང་། མགོན་པོ་སྟག་ཞོན་གྱི་རྒྱུད་དང་། གཏེར་མགོན་ཕྱག་བཞི་པའི་རྒྱུད་ལ་སོགས་པ་རྒྱུད་མང་པོའི་ནང་ནས་སྐྱེས་བུའི་སྒྲུབ་ཐབས་གསུངས་སོ། །སློབ་དཔོན་པདྨས་མཛད་པའི་རྒྱུད་བུ་ཆུང་དུག་རི་ནག་པོའི་རྒྱུད་ཅེས་བྱ་བ་ལ་སོགས་པདྨ་སཾ་བྷ་ཝས་མཛད་པའི་རྒྱ་གཞུང་རྒྱ་སྐད་ཡོད་པ་དང་། མེད་པ་ཤིན་ཏུ་མང་ལ། རྒྱ་བོད་ཀྱི་སློབ་དཔོན་གཞན་མང་པོ་དང་མང་པོའི་རྒྱུད་ལ་བརྟེན་པ་དང་ཞལ་གཟིགས་ནས་སོ་སོ་ལ་ཁས་བླངས་ཕུལ་ནས་བརྩམས་པའི་སྒྲུབ་ཐབས་གསོལ་ཁ་སོགས་ནི་ཤིན་ཏུ་མང་ངོ། །དེ་ཡང་རྒྱ་གར་དུ་སློབ་དཔོན་པདྨ་འབྱུང་གནས་ཀྱིས་རྒྱ་གར་དང་ཨ་སུ་རའི་བྲག་ཕུག་ཏུ་དམ་ལ་བཏགས། ཧཱུཾ་ཆེན་ཀ་ར་དང་། པཎྜི་ཏ་སངས་རྒྱས་གསང་བ་དང་། ཕུང་བྱེད་ཤིནྟཾ་གནྡྷ་དང་། བལ་པོའི་སློབ་དཔོན་བཞེད་པ་རྡོ་རྗེ་ལ་སོགས་པས་དབང་བསྐུར་རྒྱུད་བཤད་ངག་ཏུ་དམ་ཚིག་གི་བདུད་རྩི་བྱིན་ནས་གསང་སྔགས་ཀྱི་བསྲུང་མར་བསྐོས་སོ། །དེ་ནས་ཨོ་རྒྱན་
བོད་དུ་བྱོན་དུས་གཙང་འོ་ཡུག་བྲེ་མོའི་སྣར། དགེ་བསྙེན་རྡོ་རྗེ་ལེགས་པ་རང་ཕོ་བྲང་དུ་ཨོ་རྒྱན་ཆེན་པོ་སྤྱན་དྲངས་བསྙེན་བཀུར་ཞུས། དེར་ཨོ་རྒྱན་ཆེན་པོའི་ཤངས་ཟམ་བུ་ལུང་གི་གནས་བྱིན་གྱིས་བརླབས། གཏེར་ཁ་དཔག་ཏུ་མེད་པ་སྦས་ཏེ། གནས་དང་གཏེར་གྱི་སྲུང་མར་བསྐོས། འོག་ཡུག་བྲག་ཕུག་ཏུ་གཏེར་ཁ་བརྒྱད་སྦས། འོ་ཡུག་གང་སྔོན་དུ་གཙུག་ལག་ཁང་བཞེངས། དེ་ཡང་མདའ་དང་གྲི་ཁོ་ནར་གྲབ་བྱས་པའི་མགོན་ཁང་བྱས་ནས། དེར་སྐྱེས་བུ་ཆེན་པོའི་སྐུ་འདྲ། སྣ་ནམ་རྡོ་རྗེ་བདུད་འཇོམས་ཀྱིས་ཕྱག་བཟོ་ལ། ཨོ་རྒྱན་ཆེན་པོས་རབ་གནས་མཛད་པ། དེ་ཡང་ཤིན་ཏུ་གཉན་པར་ཡོད་དོ། །དེ་ནས་ཨོ་རྒྱན་ཆེན་པོས་དཔལ་གྱི་བསམ་ཡས་བཞེངས་དུས། ཙནྡན་གྱི་ཀ་བ་དགུ་བསྒྲིལ་དེ་ལེན་པའི་ཕྱིར་སྐྱེས་བུ་ཆེན་པོ་རྒྱ་ནག་གི་ཡུལ་དུ་བཏང་བས། ཚོང་དཔོན་ཆེན་པོ་གཅིག་ཏུ་སྤྲུལ་ནས་སོང་སྟེ། ཙནྡན་གྱི་ཀ་བ་དེ་ཕྲག་ཏུ་བཀལ་རྡོ་རིང་གནམ་གྱི་ཀ་བ་དེ་སྔོན་གྲི་བྱས། རྡོ་ཐུང་པའི་བརྟེན་ཕུར་ལ་རྒྱབ་གྲི་བྱས་ཏེ་དངོས་སུ་འོང་བ། ལྷོའི་སྒྲིས་རག་ཐག་བྱ་བ་རྒན་མོ་ཅིག་ལ་གནས་ཚང་གཡར་ན་བ་ཤིང་མེད་ནས། ཚོང་དཔོན་གྱིས་ངར་གདོང་གཞོག་ནས་
འབུད་པར་མཐོང་། ཕྱིམ་ནངས་བལྟས་པས་དཀའ་བ་ཆད་ལ་ཁད་དུ་སྣང་། ཕྱིར་ནངས་གནས་ཚང་ལ་དངོས་གྲུབ་གང་འདོད་སྦྱིན་ཟེར་བས། རྒན་མོ་རྒྱུན་དུ་ཆང་མི་ཞིམ་པས་དམུས་ནས། ཆང་ཞིམ་པའི་དངོས་གྲུབ་དགོས་ཞུས་པས། རྒན་མོའི་མི་རྒྱུད་དེང་སང་བར་ཆང་མི་ཞིམ་པ་མི་སྲིད་པ་ཡིན་སྐད་དོ། །དེ་ནས་ཙནྡན་ཀ་བ་དེ་ཉང་པོའི་ཡུལ་བར་ཁྱེར་ནས་དེར་བཞག་སྟེ། དེ་ནས་སྤྲུལ་པ་བསྡུས་སོ། །དེ་ནས་རྒྱལ་པོ་ཁྲི་སྲོང་གིས་དབུས་གཙང་ཐམས་ཅད་ཀྱི་འུ་ལག་བསྡུས་ནས། ཙནྡན་ཀ་བ་དྲུག་དོག་པའི་ཀ་བ་དྲུད་པའི་མདོས་བཞིའི་རྒྱ་ཙམ་རྡོ་གྱིས་བསྒྲིགས་པ་ད་ལྟ་ཡང་ཡོད་དོ། །ཉང་པོ་ནས་བསམ་ཡས་བར་མིས་ཁུར་བས་ཙནྡན་ཀ་བ་དང་རྡོ་རིང་རྡོ་ཐུང་བ་རྣམས་ཤིན་ཏུ་འདྲེན་དཀའ་བར་བྱུང་སྟེ། ཙནྡན་ཀ་བ་དགུ་བསྒྲིལ་ནི་ད་ལྟ་བསམ་ཡས་ཀྱི་དཀྱིལ་ཀ་འདི་ཡིན་ནོ། །རྡོ་རིང་ནི་བསམ་ཡས་ཀྱི་རྡོ་རིང་འདི་ཡིན། རྡོ་ཐུང་ནི་དབུ་རུ་ཞྭའི་ལྷ་ཁང་གི་རྡོ་རིང་དེ་ཡིན་སྐད་དོ། །དེ་ནས་བསམ་ཡས་དབུ་རྩེ་འོག་མའི་སྐོར་ཁང་གི་སྒོ་ཆེན་གྱི་གཡས་སུ་མ་མགོན་གཉིས། གཡོན་དུ་དམ་ཅན་མགར་དམར་དང་ཡུམ་ཤ་མེད་གངས་དཀར་མ་གཉིས་ཀྱི་ལྡེར་སོ་ཁང་རྩག་ཙམ་རེ་སྒོ་སྲུང་གི་ཚུལ་དུ་
བཞེངས་པ་ལྟ་ཡང་ཡོད་དེ། དེ་ནས་ཨོ་རྒྱན་རིན་པོ་ཆེ་བསམ་ཡས་ཀྱི་སྒྲ་བསྒྱུར་རྒྱ་གར་གླིང་དུ་བཞུགས་དུས་ཉིན་གཅིག་སྤྱང་ཀི་སྔོན་པོ་འུར་བ་ཅིག་བྱུང་ནས། ལུས་སློབ་དཔོན་གྱི་ཁྲིའི་འོག་ཏུ་འདུག་ཅིང་གདོང་སློབ་དཔོན་ལ་ལྟའོ། །དེ་སློབ་དཔོན་གྱིས་སྡིགས་མཛུབ་ཀྱིས་གཟིར་བས་ཁྱེའུ་ལག་ན་ལྕགས་ཀྱི་རྡོ་རྗེ་ཐོགས་པ་གཅིག་ཏུ་གྱུར་ཏེ་ཐལ་མོ་སྦྱར་ནས་སློབ་དཔོན་གྱི་བཀའ་འབངས་སུ་མཆིའོ་ཟེར། སློབ་དཔོན་གྱི་ཁོའི་སྤྱི་བོར་རྡོ་རྗེ་བཞག །ངག་ཏུ་བདུད་རྩི་བྱིན་ནས། ཁྱོད་ཀྱི་ལས་སུ་ཅི་བྱེད། དམ་རྫས་གང་ལ་དགྱེས། ཁ་ཟས་གང་ལ་དགའ། སྲོག་གི་སྙིང་པོ་གང་ཡིན་ཕུལ་ཅིག །གསུངས་པས། བདག་ལས་སུ་རྣལ་འབྱོར་དགྲ་ལ་ཆོ་འཕྲུལ་བཏང་ཞིང་ཚེ་སྲོག་ལེན། དམ་རྫ་ས་ཁམ་ས་པོ་དོམ་སྟག་དང་སྤྱང་ཀི་སེང་གེའི་གཟུགས་ལ་དགའ། ཁ་ཟས་རའི་ཤ་ཁྲག་ཆང་ཕུད་རིན་ཆེན་བརྡར་བ་ལ་དགའ། ཞེས་ཞུས་ཤིང་སྲོག་གི་སྙིང་པོ་ཕུལ་ལོ། །སློབ་དཔོན་གྱིས་སྒྲུབ་ཐབས་མང་དུ་མཛད་དེ་གཏེར་ཁ་རེ་ལ་རེ་རེ་སྦས། གཙུག་ལག་བརྒྱ་རྩ་དང་སྒྲུབ་གནས་བརྒྱ་རྩ་བརྒྱད་དང་ས་འོག་གི་གཏེར་ཐམས་ཅད་ཀྱི་སྲུང་མར་བསྐོས། ཁྱད་པར་བལ་ཡུལ་འབྲས་མོ་ལྗོངས་
སོགས་སྦས་ཡུལ་རྣམས་ཀྱི་ཡང་སྲུང་མར་བསྐོས། སངས་རྒྱས་ཀྱི་བསྟན་པ་བསྲུང་བ་དང་། གཙུག་ལག་ཆོས་འཁོར་གཉན་པོ་བསྲུང་བ་དང་། སྔགས་པ་དམ་ཚིག་ཅན་མགོན་བྱེད་པ་ལྷདང་། རྣལ་འབྱོར་ཡོན་མཆོད་རྣམས་ཀྱི་མགོན་སྐྱབས་བྱེད་པ་དང་། སྔགས་པ་རྣམས་ཀྱི་གྲོགས་པོ་དང་བཤེས་གཉེན་དང་། དཔུང་དང་གྲོགས་དང་སྡོང་གྲོགས་བྱེད་པ་དང་། ཚོང་པ་ཐམས་ཅད་ཀྱི་ཚོང་དཔོན་བྱེད་པ་རྒྱ་བོད་མདོ་གཙང་བགྲོད་པའི་སྣ་འདྲེན་བྱེད་པ་དང་། སྐྱེ་བོ་ཡོངས་ཀྱི་དགྲ་བླ་བྱེད་ཅིང་དམག་དང་ཇག་གི་དཔུང་རོག་བྱེད་པར་ཁས་བླངས་དམ་བཅས་སོ། །དེར་ཁོས་ནུབ་གཅིག་ལ་ལྕགས་ཀྱི་རྡོ་རྗེ་བརྒྱ་རྩ་བརྒྱད་བརྡུངས་ནས་ཨོ་རྒྱན་ལ་ཕུལ་ནས། དམ་ཅན་རྡོ་རྗེ་ནི་ལེགས་སོ་གསུངས་པས་རྡོ་རྗེ་ལེགས་པ་ཡིན་ཀྱང་ཀུན་ལ་གྲགས་པར་གྱུར་ཅིག །རྡོ་རྗེ་ལ་དེ་རྣམས་བསམ་ཡས་ལྕགས་རིའི་སྟེང་དུ་མཆོད་རྟེན་བརྒྱ་རྩ་བརྒྱད་བཞེངས་པའི་མཆོད་རྟེན་རེ་རེའི་ནང་དུ་རྡོ་རྗེ་རེ་རེ་ནང་གཞུག་ཏུ་བཞག་པས། དུས་ཕྱིས་མཆོད་རྟེན་རྣམས་ཞིག་ནས་ལྕགས་ཀྱི་རྡོ་རྗེ་བོད་ཡུལ་ཀུན་ཏུ་འཁྱར་རོ། །དེ་ནས་དམ་ཅན་འདིའི་བཀའ་ཉང་ཏིང་འཛིན་བཟང་པོ་ལ་གཏད་པས་ཀྱང་དམ་ལ་ཐོགས་ཏེ། མཚན་རྡོ་རྗེ་དྲག་པོ་
རྩལ་དུ་བཏགས། དབུ་རུ་ཞྭའི་ལྷ་ཁང་ཉང་ཏིང་འཛིན་བཟང་པོས་བཞེངས་དུས་ཆོས་ཀས་མ་སྐྱོལ་བའི་དུས། རྡོ་རྗེ་ལེགས་པས་དབུས་རུ་ལྷོ་ངོས་སུ་སེར་བ་ཕབ་ནས་། ནས་རྔ་མོང་གི་རྒྱབ་ལྔ་བརྒྱ་དངོས་སུ་ཁྱེར་ཏིང་འཛིན་བཟང་པོ་ལ་ཕུལ་ཏེ། ཞྭའི་ལྷ་ཁང་ཡང་གྲུབ། ལྷ་ཁང་དེའི་བཀའ་སྲུང་དུ་བསྐོས་པས། ཞྭའི་མགོན་པོ་ར་རྟ་ཅན་གྲགས་སོ། །དེ་ནས་ཆོས་སྐྱོང་འདིའི་བསྐོར་བཀའ་གཏེར་གཉིས་སུ་བརྒྱུད་དེ། བཀའ་མ་ནི་ཉང་ཏིང་འཛིན་བཟང་པོ། ཡང་ན་གསང་བའི་བདག་པོ། པདྨ་འབྱུང་གནས། ཁྲི་སྲོང་ལྡེའུ་བཙན་། རྒྱལ་བ་མཆོག་དབྱངས། སངས་རྒྱས་ཡེ་ཤེས་མན་འདྲའོ། གནུབས་སངས་རྒྱས་ཡེ་ཤེས་ཕྱི་མ། དེའི་སྲས་ཆུང་ལུང་ཡོན་ཏན་རྒྱ་མཚོ། དེའི་སྲས་ཆེ་བ་ཡེ་ཤེས་རྒྱ་མཚོ་དང་། ཆུང་བ་ལྷ་རྗེ་ཧཱུྃ་ཆུང་གཉིས་ལ། དེའི་སློབ་མ་ཉང་ཡེ་ཤེས་འབྱུང་གནས། དེའི་སློབ་མ་ཟུར་ཆེན་པ། དེའི་སློབ་མ་ཟུར་ཆུང་པ། དེའི་སྲས་ཤཱཀྱ་སེང་གེ་མདའ་ཚ་ཧོར་པོ། དེའི་སློབ་མ་འཛམ་སྟོན་འགྲོ་བའི་མགོན་པོ། དེའི་སློབ་མ་དམ་པ་བདེར་གཤེགས། དེའི་སློབ་མ་གཙང་སྟོན་རྡོ་རྗེ་རྒྱལ་མཚན། དེའི་སློབ་མ་ཀཿཐོགས་པ་བྱམས་པ་འབུམ་སྟེ།
དེ་ཡན་གྲུབ་པ་ཐོབ་པ་ཁོ་ན་སྟེ། ཆོས་སྐྱོང་འདི་ཡང་མི་བཞིན་དངོས་སུ་འཁོར་བ་གཅིག་གིས་གཅིག་ལ་རིམ་པར་བཀའ་གཏད་ཏེ། ཤར་ཀཿཐོག་ཏུ་ཡབ་མོན་པ་ཡུམ་མོན་མོ་སོགས་ཀྱི་མགོན་ཁང་ཤིན་ཏུ་གཉན་པོ་ཡོད་སྐབས། གྲུབ་ཆེན་ཀརྨ་པཀཱི་དེར་བྱོན་ཏེ་བྱམས་པ་འབུམ་ལ་རབ་བྱུང་བསྙེན་རྫོགས་དང་རྫོགས་ཆེན་དབང་ལུང་དཔག་ཏུ་མེད་པ་ཞུས། དེ་དུས་མགར་ནག་གི་བཀའ་གཏད་དང་ལུང་སོགས་ཞུས་པས། སྐྱེས་བུ་ཡང་ཀརྨ་པའི་རྗེས་སུ་འབྲང་སྟེ་མགོན་ཁང་མི་གཉན་དུ་སོང་བས་ཕྱིས་ཕལ་ཆེར་ཞིག་སྐད་དོ། །གྲུབ་ཆེན་ཀརྨ་པཀྵི་ལ་ནི་མི་བཞིན་དངོས་སུ་འཁོར་ཞིང་མི་རབས་བརྒྱུད་པ་བཅུ་གསུམ་དུ་བརྟེན་ནས་བསྲུང་བར་ཁས་བླངས་དམ་བཅས་ཤིང་། སྒྲུབ་ཐབས་དང་མན་ངག་མང་པོ་དངོས་སུ་ཕུལ་བ་ཡིན་ཏེ། རང་བྱུང་རྡོ་རྗེའི་གསུངས་ལས། དཔལ་ལྡན་ཀརྨ་པ་ལ་ནི། །དམ་ཅན་ཉིད་ཀྱིས་སྲོག་སྙིང་ཕུལ། །མི་རབས་བརྒྱུད་པ་བཅུ་གསུམ་ལ། །བསྟན་པ་བསྲུང་བར་ཁས་བླངས་པའི། །ཞལ་གྱིས་གདམས་པ་ཡོད་པ་རྣམས། །གཅིག་ཏུ་དྲིལ་བའི་སྒྲུབ་ཐབས་ནི། །སྔོན་ཆད་གཞན་གྱིས་མི་ཤེས་ཤིང་། །རང་གི་དྲན་པ་གསོ་བ་དང་། །སངས་རྒྱས་བསྟན་པ་བསྲུང་སླད་
དུ། །རང་བྱུང་རྡོ་རྗེ་སྡེབ་པ་ཡིན། །ཅེས་གསུངས་སོ། །དེའི་ཕྱིར་ཀཾ་ཚང་པ་རྣམས་པཀྴི་ཡན་ལ་བརྒྱུད་པ་མི་འདེད་པར་སྣང་ངོ། །གཏེར་མ་ནི་ཉང་གི་མགར་ནག །གུ་རུ་ཆོས་དབང་གི་གཏེར་མ་མགར་ནག །རིག་འཛིན་རྒོད་ལྡེམ་གཏེར་མ་མགར་སྔོན་གོ་ཁྲབ་རྟ་སྔོན་ཅན། རཏྣ་གླིང་པའི་ཐུགས་རྗེ་ཆེན་པོའི་བཀའ་སྲུང་མགར་དམར་དང་མགར་ནག་རྐང་ཐང་། ཞིག་པོ་གླིང་པའི་མགར་དཀར་གོ་ཁྲབ་རྟ་དཀར་ཅན། སངས་རྒྱས་གླིང་པའི་བཀའ་སྲུང་དགྲ་བླ་ལྕགས་ཀྱུ་ཅན། རྡོ་རྗེ་གླིང་པའི་རྫོགས་ཆེན་བཀའ་སྲུང་དམ་ཅན་ཐིག་ལེ་རྩལ། ཕྱི་ནང་གསང་གསུམ། དེ་ལ་སོགས་པ་གཏེར་ཁ་རེ་རེ་ནས་ཀྱང་དམ་ཅན་རིགས་མི་གཅིག་པ་གཉིས་གསུམ་རེ་བྱུང་ཞིང་། དྲེགས་པ་ཉི་ཤུའི་རླུང་འཁོར་ཉི་ཤུའི་ནང་ནས་བརྒྱད་ཐམ་པ་དམ་ཅན་རིགས་མི་ཅིག་པ་བརྒྱད་ཡིན་པར་སྣང་བས། ཆོས་སྐྱོང་འདི་ཤིན་ཏུ་དྲག་རྩལ་ཆེ་བར་སྣང་ལ། དྲེགས་པ་ཉི་ཤུ་འདི་ཡང་མུ་སྟེགས་དབང་ཕྱུག་ཆེན་པོའི་རྒྱུད་ནས་བཏུས་པ་ཡིན་པར་གསུངས་པས། ཕྱི་རོལ་མུ་སྟེགས་ལ་ཡང་སྐྱེས་བུ་སྒྲུབ་ཐབས་ཡོད་ཅིང་བཀའ་སྲུང་དུ་བསྟེན་པ་ཡིན་པར་འདུག་སྟེ། ཤཱཀ་ཐུབ་མ་བྱོན་ཕྱག་རྡོར་གྱིས་དམ་ལ་མ་
ཐོགས་སྔོན་དུ། སྐྱེས་བུ་འདི་མུ་སྟེགས་པས་ལྷར་བསྟེན་ནས་མཆོད་པར་སྣང་སྟེ། དེའི་ཕྱིར་ཕྱི་ནང་ཐུན་མོང་གི་ལྷ་ཡིན་པས། ཨོ་རྒྱན་གྱིས་གསུངས་པའི་བསྟོད་པ། འཇིག་རྟེན་འདི་ན་ལྟ་བ་ལོག་པ་ཡི། །ཐོག་མར་མུ་སྟེགས་མེད་སྨྲ་རབ་བརྟན་ཀྱང་། །དད་དང་མཐུན་པའི་འཇིག་རྟེན་སྐྱོང་མཛད་པའི། །ཐུན་མོང་ལྷ་མཆོག་ཁྱེད་ལ་མཆོད་འབུལ་བསྟོད། །ཅེས་གསུངས་སོ། །སྟོན་པ་གཤེན་རབ་ཀྱིས་རྐང་རྗེའི་བུ་མོ་ཆུང་མར་བླངས་བས་དགྲས་ཁ་དུམ་ལ་ཁྱེར། དེར་གཤེན་རབ་ཀྱིས་གཙང་བཙན་བསྒྲུབས་པས་མཐུ་ཆེན་པོ་བྱུང་སྟེ་དགྲ་བོ་དེ་བརླག །དགྲ་ཐུབ་པའི་གཏང་རག་ཏུ་རྟེན་མཁར་ཤམ་པོ་དགུ་བརྩེགས་ཅིག །དམ་ཅན་གྱིས་ཡང་བོན་གྱིས་བསྟན་པ་བསྲུང་བའི་ཐ་ཚིག་བྱིན་པས་མཚན་སྐྱེས་བུ་མི་ཐང་གྲྭ་པ་ཞེས་བཏགས་ཏེ། ཐ་ཚིག་བོན་ལ་མངའ་ཞིང་འབྲེལ་པ་ཆོས་ལ་མངའ་ཞེས་བྱ་བ་ཡང་དེའི་དོན་ཏེ། མདོར་ན་བན་བོན་ཕྱི་ནང་སྐྱ་སེར་ཐམས་ཅད་ཀྱི་ལྷ་དང་སྲུང་མ་ནི་སྐྱེས་བུ་ཆེན་པོ་ཡིན་ནོ། །གྲུབ་ཆེན་ཀརྨ་པ་ནས། གཉེན་རས་དགེ་འདུན་འབུམ། རང་བྱུང་བ། གཡུང་སྟོན་པ། རོལ་པའི་རྡོ་རྗེ། མཁའ་སྤྱོད་དབང་པོ། དེ་བཞིན་གཤེགས་པ་དེས་མཁའ་སྤྱོད་པ་ལ་མ་
མགོན་མགར་གསུམ་ཀའི་དབང་ལུང་གནང་ནས། འདི་གསུམ་དང་ཕྱག་བཞི་པའི་སྔགས་རྒྱུད་དང་ཁྱོད་ཀྱིས་མི་རྒྱུད་རྣམས་བཀྲ་ཤིས་པར་འོང་གསུངས་སོ། །ཁྱད་པར་དྲུང་ཆེན་མཁའ་སྤྱོད་པའི་དྲུང་དུ་སྐྱེས་བུ་ཆེན་པོ་ཁྱེའུ་ཆུང་ལག་ན་ལྕགས་ཀྱི་རྡོ་རྗེ་ཐོགས་པ་གཅིག་བྱུང་ནས། གཏོར་མ་བྱིན་དང་མི་རབས་བཅུ་གསུམ་དུ་བསྟན་པ་སྲུང་ཞེས་ཁས་བླངས། དམ་ཅན་མགར་དམར་སྐུ་ཡིས་ངོམ་པའི་སྡེ་ཐམས་ཅད་ཁྱབ་པ་གཅིག་ཞལ་གཟིགས་ཏེ་བཀའ་གཏད་པས། ངོམ་ཡུལ་སྤྱི་ཡི་ཡང་སྲུང་མར་གྱུར་ཏེ། ངོམ་གྱི་མི་འཆར་ཡུལ་གཞན་དུ་སོང་ན་དམ་ཅན་འཁྲི་ཞེས་རྣམ་རྟོག་བྱེད་པ་བྱུང་སྐད། དྲུང་བྱ་བྲལ་བ་མི་རྩ་ཕྲ་བ་ལ་ཕ་ཝཾ་ལོང་བུ་འདྲ་བའི་མཁར་བརྩེགས་ཏེ་བསྒྲུབས་པས་དངོས་གྲུབ་གྲུབ་ཅིང་ཞལ་གཟིགས་རིགས་རྒྱུད་འཕེལ་བའི་དངོས་གྲུབ་བྱུང་སྟེ། མི་གཅིག་གིས་རྒྱུད་ལ་ཨ་ནུ་བྲེ་བརྒྱད་ཕུལ་དོ་ཟེར་བ་བྱུང་། ར་སྐྱེས་བརྩོན་པ་ལ་རྭ་ཅོ་སྐར་ཁུང་སུམ་བརྩེགས་ཡོད་པ་བྱུང་ཞིང་མི་རྒྱུད་རྣམས་ལ་ཡང་འཁོར་བར་གྲགས་སོ། །ཆོས་སྐྱོང་འདིའི་ཡོན་ཏན་ནི། སྟག་སྤྱང་རོལ་པའི་རྒྱུད་ལས། ལྷས་སྲུང་དགྲ་རྣམས་ངེས་པར་འཆི། །དེ་ལྟར་བྱུང་ན་དོན་རྣམས་འགྲུབ། །
ཅེས་དང་། ཨོ་རྒྱན་རིན་པོ་ཆེའི་འདིའི་ཡོན་ཏན་རྣམས་གསུངས་པ་ཕྱོགས་གཅིག་ཏུ་བརྗོད་ན། བདག་འདྲ་པདྨ་འབྱུང་གནས་ཀྱིས། །རིག་པའི་རང་རྩལ་དབང་ཡང་ཐོབ། །ལྷ་སྲིན་ཀུན་གྱི་སྟོང་སྲོག་ཐོབ། །དྲེགས་པའི་ཚོགས་ལ་དབང་ཡང་བསྒྱུར། །ཁྱད་པར་དམ་ཅན་ཐིག་ལེ་རྩལ། །པདྨ་ང་ཡི་བཀའ་ཉན་ཏེ། །སྙིང་ཉེ་དམ་གཙང་ལས་ལ་མྱུར། །བོད་ཡུལ་མཐའ་དབུས་ཐམས་ཅད་དུ། །རྒྱུད་དང་སྡོམ་པ་བདག་མེད་པ། །གཏེར་ཁ་དུ་མ་སྦས་ཏེ་བཞག །ཡང་ཟབ་སྲོག་གི་སྤུ་གྲི་འདི། །ཡང་ཐིག་སྙིང་པོ་བཀའ་བསྲུང་ཕྱིར། །མོན་ཁའི་བྲག་ལ་སྦས་ཏེ་བཞེངས། །ལན་གཅིག་དུས་ཀྱི་ཐ་མ་ལ། །གསང་སྔགས་བསྟན་ལ་དགྲ་དར་ཚེ། །ལས་ཅན་བུ་དང་འཕྲད་པར་ཤོག །སྐལ་ལྡན་དེ་དང་འཕྲད་ནས་ཀྱང་། །བསྟན་པའི་སྲོག་འཛིན་བུ་གསུམ་ལས། །མང་དུ་སྤེལ་བར་མི་རུང་ངོ། །ཞེས་དང་། དམ་གཙང་ལས་མྱུར་བཀྲ་ཤིས་སྙིང་ཉེ་བ། །དགྲ་བླའི་དེད་དཔོན་བཛྲ་སཱ་དྷུ་སྟེ། །རྒྱུད་དང་སྒྲུབ་ཐབས་གཏེར་ཁ་ཅི་སྙེད་སྦོས། །ཀུན་ཀྱང་ཡང་ཟབ་རྣོ་མྱུར་ཐོག་འདྲ་ཡང་། །ཁྱད་པར་ཡང་ཟབ་སྤུ་གྲི་དམར་ལེན་འདི། །ཞེས་དང་། ལར་ནི་སྐྱེས་བུ་འདི་སྙིང་ཉེ། དམ་
གཙང་གདོང་བརྟར་སྣ་ཐུང་། ཟས་ནོར་ཚོལ་བ་ལ་སྣ་རྣོ། མི་སྙིང་འཕྲལ་བ་ལ་མགུལ་བར་ནུས་ཏེ། ཆོས་སྐྱོང་གི་མཆོག་ཡིན། ཟས་ནོར་ལོངས་སྤྱོད་ཆར་ལྟར་འབབས་ཏེ། རྒྱལ་པོ་ལྟ་བུར་འགྱུར་རོ། །མིའི་སྣང་བ་འཕྲལ་དུ་བསྒྱུར་ནུས། ཟས་ནོར་རྩ་བ་བུད་མེད་ལྷག་པར་འདུ། དྲག་པོར་བསྒྲུབས་ན་མཐུ་མྱུར། བུ་ཚ་དང་རིགས་རྒྱུད་འཕེལ། ཆོས་ལ་སྲུང་མ་བྱེད། བོན་ལ་གསས་བྱེད། ཚོང་པའི་ལམ་འདྲེན། དམག་ཇག་གི་དཔུང་བྱེད། ཕ་དམུ་ཡིན་པས་ལོངས་སྤྱོད་ཆེ། མ་བདུད་ཡིན་པས་དབང་ཆེ། ཁོ་རང་བཙན་ཡིན་པས་གྲགས་ཆེ། བཀའ་ཉན་མ་སངསཡིན་པས་ལས་མྱུར། གྲོགས་མོ་བརྟན་མ་ཡིན་པས་སྙིང་ཉེ། དམ་ཚིག་ལ་གནས་པས་ཆོས་བྱེད་ཙམ་ལ་སྐྱོབས། ཁྱད་པར་པདྨ་ང་ཡི་བརྒྱུད་འཛིན་དང་གཏེར་གྱི་བརྒྱུད་པ་རྣམས་ལ་ལུས་དང་གྲིབ་མ་ལྟར་འགོ་བའི་ཕྲིན་ལས་བྱེད། ཅེས་དང་། བདག་ཉིད་དབང་ཆེན་པདྨ་ཡིས། །ཡང་ཟབ་སྙིང་གི་མན་ངག་འདི། །མ་འོངས་སྐྱེས་བུའི་དོན་ཆེད་དུ། །མོན་ཁའི་བྲག་ལ་སྦས་ཏེ་བཞག །འགྲོ་བ་ཕོ་མོ་ཀུན་འདུ་ཞིང་། །ཁྱད་པར་བུད་མེད་ཀུན་ཡིད་འཕྲོག །བཀྲ་ཤིས་བྱིན་ཆེན་མི་ནོར་
འཕེལ། །མཐར་ཡང་མི་ནུབ་རྒྱལ་མཚན་འདྲ། །དུས་ངན་འགྲོ་བ་འདུལ་དཀའ་བས། །དེ་དུས་ལས་ཅན་གཅིག་ལ་གཏད། །སྒོ་གསུམ་ཞབས་ཏོག་སྒྲུབ་ནུས་པའི། །སྙིང་འདྲ་མ་གཏོགས་ངོ་བསྟོད་ཅན། །ཁ་མཁས་པོ་ལ་ཤོར་སྲིད་པས། །ཙིཏྟི་གྲྭའུར་ས་མ་ཡ། །ནོར་ལྷ་ཆེ་བཙན་གྲངས་མང་ཡང་། །སྒྲུབ་ཐག་རིང་ལ་འཁུལ་བ་དཀའ། །འདི་ནི་དམ་ལྡན་སུས་བསྒྲུབསཀྱང་། །རྣོ་མྱུར་དངོས་གྲུབ་ཆར་ལྟར་འབེབས། །སྒྲུབ་ལ་ནན་ཏན་ཆེར་འབད་ན། །མི་བཞིན་དངོས་སུ་བསྐོལ་དུ་འབྱུང་། །གཞན་ལ་ཤིན་ཏུ་གསང་བ་དང་། །བླ་མ་ལ་གུས་མཆོད་གཏོར་བརྩོན། །དམ་ཚིག་ལྡན་པ་ཤིན་ཏུ་གཉེན། །ཐུགས་ཀྱི་སྲས་དང་འཕྲད་པར་ཤོག །ཅེས་གསུངས་སོ། །འདི་ནི་དམ་ཚིག་དུ་མི་ལ་གསང་ཞིང་སྦ། མན་ངག་འདི་མང་དུ་སྤེལ་ན་རང་ལ་དངོས་གྲུབ་མི་འབྱུང་བས། སྙིང་ལ་འདྲ་བར་གཅིག་བརྒྱུད་དུ་སྤེལ་བ་མ་གཏོགས་པ་གསང་ཞིང་མནའ་རྒྱ་བཏབ་བོ། །ཞེས་གསུངས་སོ། །དམ་ཅན་ཡིད་བཞིན་ནོར་བུ་ལས། །ས་ཕྱོགས་གང་དུ་བསྡད་པའི་སར། །བཙན་དྲགས་ལོངས་སྤྱོད་ལྡན་པ་དང་། །བསྟན་པ་དར་ཞིང་རྒྱས་པ་དང་། །ཁ་དྲོ་ཞིང་དང་དཀོར་ནོར་སྤེལ། །
བུ་རྟ་ན་ཚ་མི་འོང་ཅིང་། །ཅི་བསམ་དོན་རྣམས་འགྲུབ་པ་ཡི། །ཞེས་གསུངས་པ་ལྟར་འབྱུང་བ་ཡིན་ནོ། །གཞན་ཡང་ཨོ་རྒྱན་གྱི་མཁན་པོ་པདྨ་སམྦྷ་ཝས་མཛད་པའི་སྐྱེས་བུ་ཆེན་པོའི་བསྟོད་པ། ཉང་ཏིང་འཛིན་བཟང་པོའི་བརྒྱུད་པའི་བཀའ་མ་དང་། རཏྣ་གླིང་པའི་གཏེར་མ་གཉིས་ཚིག་ཕལ་ཆེར་མཐུན་པར་བྱུང་སྟེ། འདི་ནི་ཆོས་ལོག་ཅན་དང་དམ་ཚིག་ཉམས་པ་དང་མནའ་ཟན་ཐམས་ཅད་ཀྱིས་གཤེད་མ་བྱེད་ཅིང་སྐྱེ་བོ་གཙང་མའི་དགྲ་བླ་བྱེད་པ། འཇིག་རྟེན་ཁམས་ཀྱི་ལེགས་ཉེས་སྟངས་འཛིན་དམ་ཚིག་རྗེས་གཅོད་པར་ཉིད་ཀྱིས་ཁས་བླངས་དམ་བཅས་ཏེ། ཆོས་ལོག་དམ་ཉམས་མནའ་ཟན་ཀུན་གྱིས་གཤེད། །སྐྱེ་བོའི་དགྲ་བླ་དགྲ་བོའི་གཤེད་མ་ཞེས། །རང་གིས་ཁས་བླངས་ཉིད་དུ་དམ་བཅས་པའི། །ལེགས་ཉེས་སྟངས་འཛིན་སྐུ་ལ་མཆོད་འབུལ་བསྟོད། །ཅེས་གསུངས་སོ། །རྫུ་འཕྲུལ་གྱིས་བོད་ཁམས་ཁྱབ་པར་རྒྱུག་གོ །རྒྱ་གར་ནུབ་ཕྱོགས་ཕ་ཝཾ་ལོང་བུ་དང་རྡོ་རྗེ་རྫོང་མཁར། བལ་པོའི་ཤེལ་མཁར་ཉི་མའི་སྒྲོན་མེ་རྒྱ་ནག་གི་གསེར་ཁང་སེར་པོའི་ཡང་རྩེ། གཞན་ཡང་ལུས་འཕགས་ལ་སོགས་གླིང་གསུམ། རྔ་ཡབ་གླིང་ནི་རི་མ་ལ་ཡའི་བྲག་ཕུག་སོགས་བཞུགས་
གནས་མང་ཡང་ཁྱད་པར་དུ་བཞུགས་ས་ནི་བོད་ཡུལ་གཙང་འོ་ཡུག་གོང་སྔོན་ཡིན་ཏེ། ཤང་དང་འོ་ཡུག་གང་སྔོན་གསུམ། །རྡོ་རྗེ་ལེགས་པའི་ཕ་ཡུལ་ཡིན། །ལྷ་ཅིག་རྡོར་ལེགས་མིན་པ་ལྡེང་ས་མེད། །ཟེར་བའི་ངག་རྒྱུན་དབུས་གཙང་དུ་འཇགས་པ་ལྟར་ཡིན་ཅིང་། དེ་རང་ཁ་བ་ཅན་པའི་ཡུལ་ལྷ་ཡང་ཡིན་ཏེ། རང་གི་ལས་དང་བསོད་ནམས་རྫུ་འཕྲུལ་གྱིས། །ལྷོ་ཕྱོགས་འཛམ་གླིང་ཁྱབ་པར་རྒྱུག་པ་ནས། །ཁྱད་པར་བཞུགས་པ་བོད་ཡུལ་ཀུན་གྱི་དཔལ། །ཡུལ་བདག་གཉེན་པོ་ཞེས་གསུངས་སོ། །ཚེ་རབས་དུ་མའི་བག་ཆགས་དང་འབྲི་གུང་སྐྱུ་རའི་ལོ་རྒྱུས་ལས། འདན་སྐྱུ་རའི་བྲག་རྩར་གྲུབ་ཐོབ་གཅིག་སྒྲུབ་པ་བྱེད་སྐབས། འདྲེར་ཁེར་བགད་ཅེས་བྱ་བས་བར་ཆད་བརྩམས་ནས་ཁྱེའུ་གཅིག་ཏུ་སྤྲུལ་ནས་ལུག་གུའི་ཤ་དང་ལྤགས་པ་ལན་མང་དུ་ཕུལ་བས། ཡིད་མ་ཆེས་ཏེ་གྲུབ་ཐོབ་དེ་བྱིའུ་རླུ་ནོར་སྤྲུལ་ནས་ལྟ་བ་ལ་སོང་ལ། དབུས་པའི་སྒར་ཆེན་གཅིག་ཕྱིན་འདུག་པའི་ཚོང་དཔོན་སྒར་དཔོན་དེ་ལ་རྡོ་རྗེ་ལེགས་པ་ཚོང་དཔོན་དུ་སྤྲུལ་ནས་གདའ་བས། ཁྱེའུ་དེ་ལ་རྡོ་རྗེ་ལེགས་པས་འདྲེ་ཁེར་བགད་ཁྱེད་འདི་ན་ཡོད་ལེ་ཨེ་ཡིན་གསུངས་པས། ཁྱེའུ་དེས་ན་རེ་མ་གསུངས་མ་གསུངས་དང་ངས་
ཤ་རྒན་ཅིག་བྲག་ར་ན་ཚུད་ལ་ཁེད་ཡོད་དོ་ཟེར་རོ། །དེ་བྱིའུས་ཐོས་ནས་ཁྱེའུ་དེ་འདྲེ་ཡིན་པར་ཤེས་ནས་ཡང་བྱུང་ཛ། གྲུབ་ཐོབ་དེས་དེད་པས་ཕ་ཝང་ལ་ཐིམ་པས་གྲུབ་ཐོབ་དེས་ཕ་ཝང་དེའི་ཕྱོགས་བཞི་དང་སྟེང་དུ་ཞབས་རྗེས་རེ་བཞག་ནས་དམ་ལ་བཏགས་པ་ད་ལྟ་ཡང་མཇལ་རྒྱུ་ཡོད་ཟེར་བ་ལྟར། ཚོང་དཔོན་མང་དུ་བྱས་པས་བག་ཆགས་དང་སྨོན་ལམ་དབང་གིས་གཞུང་མགྲོན་པོ་ཐམས་ཅད་སྒར་དཔོན་ཚུར་དུ་འབྱོན་ཏེ། སྔོན་ཚེ་ཐོག་མར་རང་གི་བག་ཆགས་སམ། །སྨོན་ལམ་དམ་བཅས་ཉིད་ཀྱི་མོས་པ་ཡིས། །རྒྱ་བོད་མདོ་གཙང་བསྒྲོད་པའི་སྣ་འདྲེན་པ། །ཚོང་དཔོན་ཆེན་པོ་ཞེས་གསུངས་སོ། །གང་གིས་སྐྱེ་བོ་རྣམས་གཡུལ་ཆེན་འགྱེད་དམ། །འཐབ་རྩོད་བྱེད་ཚེ་འདི་ལ་གསོལ་མཆོད་བྱེད་ན། འདི་དགྲ་བླ་ཐམས་ཅད་ཀྱི་གཙོ་བོ་ཡིན་ཅིང་། མཆེད་འཁོར་རྣམས་ཀྱང་དགྲ་བླ་སུམ་བརྒྱ་དྲུག་ཅུ་ཞེས་བྱ་བ་ཡིན་པས། རང་ཉིད་རྒྱལ་ཞིང་རླུང་ཁ་ཐོབ་པས་འདི་ནི་དམག་དཔོན་གྱི་མཆོག་ཡིན་པའི་ཕྱིར། སྐྱེ་བོ་འཐབ་རྩོད་གཡུལ་ཆེན་འགྱེད་པའི་ཚེ། །གང་ཞིག་ཁྱེད་ལ་གསོལ་མཆོད་བྱེད་པ་ཡི། །ཕ་རོལ་་དཔུང་འཇོམས་པ་དམག་གི་རུ་ཟློག་པ། །དམག་དཔོན་ཆེན་
པོའི་སྐུ་ལ་ཕྱག་འཚལ་བསྟོད། །ཅེས་གསུངས་སོ། །ལྷ་ཡེ་བརྫུ་ཁ་ཆར་འདབ་མ་ཅན་དང་། ཡེ་བརྫུ་ར་ཞོན་རྒོད་ཐུལ་ཅན། སྟག་ཞོན་ཝ་ཞོན་སོགས་ཡེ་བརྫུ་སུམ་བརྒྱ་དྲུག་ཅུ་ཟེར་བ་ཡང་འདི་ཉིད་མཆེད་འཁོར་རྣམས་ཡིན་ཏེ། ཡེ་བརྫུའི་སྒྲུབ་ཐབས་ལ་འོག་རྟས་རྒ་བྲོས་བྱས་དུས་ང་ལ་བོས། ཆུང་མས་གནས་བསྡམ་བྱེད་དུས་ང་ལ་བོས། །དགྲ་བོའི་ཐོག་རྒྱོབ་བྱས་དུ་ང་ལ་བོས་ཟེར་བ་ཡོད་སྐད་འདི་དགྲ་བླའི་མཆོག་ཡིན་ནོ། །འཇིག་རྟེན་འདི་ན་ལྟ་བ་ལོག་པའི་མུ་སྟེགས་པ་མཐུ་ཆེན་པོ་རྣམས་དང་། བན་བོན་སྔགས་པ་ནུས་ཆེན་ལྟ་བུ་ལ་ནང་རྒྱལ་ན་ཡང་འདིས་བསྒྲལ་ནུས་ཏེ། ར་ལོ་ཙཱ་བ་རྡོ་རྗེ་གྲགས་པ་ཤིན་ཏུ་མཐུ་ནུས་ཆེ་ནས། ས་ཐོབ་པའི་གང་ཟག་སུམ་ཅུ་སོ་གཉིས་བསྒྲུངས། གཙང་ཚོང་འདུས་མགུར་མོ་ན་ཁྲོམ་ཆེན་པོ་འཚོགས་པའི་ནང་དུ། ང་དང་མཐུ་འདྲེན་བྱེད་མི་ཨེ་ཡོད་ཅེས། ཉི་མ་གསུམ་ཙམ་འབོད་པ་བྱེད་ཅིང་བྱོན་པས། ཚོང་དུས་མགུར་མོའི་གནས་བདག་དམ་ཅན་ཡིན་པ་ལ་ཕོག་སྟེ། །བྱིས་པ་ཅི་ཡང་མི་ཤེས་པའི་བུ་ཆུང་གཅིག་གིས་རྣ་གདོང་ནས་ང་ཡོད་སྨྱོས་ཟེར་བས། བུ་ཆུང་གིས་དེ་ལྟར་སྨྲས་སོ། །ར་ལོ་ཙཱ་ཡང་སྐྲག་ནས་ཕར་བྱོན་ནས་ཐུགས་དམ་མཛད་ཅིང་
བཞུགས། བུ་ཆུང་གིས་ངས་དེ་རིང་ངས་དེ་སྨྲས་པས་མ་ལེགས་སྙམ་ནས་སྐྱག་ཙམ་ན། རྣ་གདོང་ནང་ནས་སྐྲག་མི་དགོས་ཅིང་ཅི་ཟོའི་ཕུད་ཀྱིས་རྡོ་རྗེ་ལེགས་པ་མཆོད་ཀྱིས་། ཁྱེད་ལ་སྐྱོན་མེད་ངས་བསྲུང་ཟེར་རོ། །དེ་ནས་རི་ལོ་ཙཱའི་དྲུང་དུ་སྤྲུལ་པ་ཆོ་འཕྲུལ་ཅི་ཡང་བྱུང་སྟེ། ཁོང་རྡོ་རྗེ་འཇིགས་བྱེད་ཀྱི་ཏིང་ངེ་འཛིན་ལས་མ་གཡོས་སོ། །དེར་བུད་མེད་མཛེས་མ་ཡིད་དུ་འོང་བར་སྤྲུལ་ནས་འོང་བས་ཁོང་དེ་ལ་ཅུང་ཞིག་ཡེང་ངོ། །དེ་མ་ཐག་ཝ་དམར་པོ་གཅིག་སྤྲུལ་ནས་ཁོང་གིས་ཙིཏྟ་བཏོན་ནས་ཁྱེར་བའི་སྣང་བ་བྱུང་། དེ་ནས་ཡུན་མི་རིང་པར་གཉན་ལོ་དང་འཕྲད་དེ། མཐུ་རྒྱལ་བྱས་པས་གཉིས་ཀ་འདས་ཏེ། དེའི་རྐྱེན་ཡང་རྡོ་རྗེ་ལེགས་པས་བྱས་ཟེར་བ་ཐོས་སོ། །བྱིས་པ་དེ་ལ་སྐྱོན་ཅི་ཡང་མ་བྱུང་སྐད། དེ་ལྟར་ནུས་པ་ཅན་ཚེ་ཡང་འདིས་ཐུབ་པའི་ཕྱིར། དམ་ཅན་མདོས་ལ་བརྟེན་ནས་བྱད་ཁ་བཟློག་ཐབས་ཡང་བསྲུངས་ཞིང་། འཇིག་རྟེན་འདི་ན་ལྟ་བ་ལོག་པ་ཡི། །མུ་སྟེགས་མཁན་སྒྱུ་རྣམས་ཐོག་མར་རབས་འདུལ་ཞིང་། །དེང་འདིར་མཐུ་ཆེན་འཇིག་རྟེན་སྐྱོང་མཛད་པ། །མཐུ་ཆེན་ལྷ་མཆོག་ཁྱེད་ལ་ཕྱག་འཚལ་བསྟོད། །ཅེས་གསུངས་སོ། །དེ་བཞིན་དུ་ལྷ་གཞན་
དང་མི་འདྲ་འགྲུབ་སླ་བ་དང་། འཁུ་ལྡོག་མི་བྱེད་ཅིང་གཞུང་བཟང་བས་མི་རྒྱུད་ཚུན་ལ་མགོན་པ་དང་། གང་ནོན་སླ་བ་སྟེ། ཁྱོད་ནི་མི་ནག་སྐྱེ་བོས་རབ་བསྟེན་ཀྱང་། མཐུ་དབང་ཟས་ནོར་སྟེར་མཛད་ཁྱོད་ལ་བསྟོད། ཅེས་གསུངས་སོ། །དེ་ལྟར་སྐྱེས་བུའི་ཡོན་ཏན་ཅུང་བསྟན་ནས་ཕོ་བྲང་བཤད་པ་ནི། གོང་དུ་བཤད་པ་དེ་རྣམས་དང་། བྱང་ཡང་པ་ཅན་དུ་ལྷ་ཁང་གཅིག་གི་ནང་ནས་ཨོ་རྒྱན་པདྨས་མཐའ་དམག་གི་ཁ་གནོན་ལ་བཞེངས་ལེ་ཡིན་ཟེར་བའི་མགར་ནག་གི་སྐུ་རྩག་གཅིག་ཙམ་བཞུགས་ཏེ་བླ་མ་སོགས་ཡུལ་དུ་འབྱོན་མཁན་ཚོས་དེ་ལ་གསོལ་ཁ་བྱས་ན་ཕྲིན་ལས་དར་བ་ཡིན་ཟེར། ཞིང་སྐྱོང་གི་འཁོར་མགར་ནག་གི་ཕོ་བྲང་། ཙཱ་རིའི་ལུང་ལག་ཞིག་ཏུ་བྲག་ནག་པོ་ཕ་ཝང་ལོང་བུའི་མཁར་རྩེ་ལ་སྨུག་ཕུང་སྐྱེས་པ་ཅིག་ཡོད་སྐད། དྭགས་པོའི་ཡུལ་ཨོ་རྒྱན་གྱི་སྒྲུབ་གནས་འོལ་ཁ་མགར་ཕུག་བྱ་བ་རཏྣ་གླིང་པའི་གདན་སའི་དགོན་པ་གཅིག་གི་དཀྱིལ་ན་ཕ་ཝང་ལོང་བུ་བང་བ་ཆེ་ཤོས་ཙམ་ཡོད་དོ། །དེ་ནས་སྐྱེས་བུ་ཆེན་པོ་འདི་སུམ་ཅུ་རྩ་གསུམ་ལྷའི་གནས་ན་ལྷ་དང་ལྷ་མིན་འཐབས་པའི་ཚེ་ལྷ་དམག་གི་རུ་འདྲེན་པར་བསྐོས་སོ། །ལྷ་ཆེན་པོ་བརྒྱད་ཀྱི་མདུན་བསྐུལ་བློན་པོར་གྱུར་པས་ལྷ་དམག་
ལ་དབང་སྟེ། དམ་ཅན་དམག་འགྱེད་ལས། སྐྱེས་བུ་ཆེན་པོ་ཁྱོད་སོང་ལ། །ལྷ་ཡི་ཡུལ་དུ་དམག་སྡུས་ཤིག །བརྒྱ་བྱིན་འཁོར་དང་བཅས་པ་ཡང་། །ར་མདའ་བཟློག་ལ་དམག་ལ་ཆོས། །ཞེས་དང་། ཨོ་རྒྱན་རིན་པོ་ཆེའི་གསུང་ལས། ཆོས་བཟང་ལྷའི་མདུན་སར་ལྷ་ཆེན་བརྒྱད་ཀྱི་མདུན་བསྐུལ་མཛད་ཅིང་། ལྷ་དམག་གི་རུ་འདྲེན་པ་ཞེས་གསུངས་སོ། །དེ་བཞིན་ཁྱབ་འཇུག་རཱ་ཧུ་ལས་གཟའི་དམག་དཔོན་དུ་བསྐོས་པས་གཟའ་དམག་ལ་དབང་བསྒྱུར་ཞིང་གཟའ་བརྒྱད་ཀྱི་དམག་དཔོན་མཛད་དེ། སྐྱེས་བུ་ཆེན་པོ་ཁྱོད་སོང་ལ། གཟའི་ཡུལ་ནས་དམག་བསྡུས་ལ། །ཁྱབ་མཇུག་འཁོར་དང་བཅས་པ་ཡང་། །ར་མདའི་བཟློག་ལ་དམག་ལ་ཆོས། །ཞེས་དང་། གསོལ་ཀལས། གཟའ་ཡི་རྒྱལ་པོ་རཱ་ཧུ་ལས་དབང་བསྐུར་བས་གཟའ་ཆེན་བརྒྱད་ཀྱི་དམག་དཔོན་མཛད་པ་ཞེས་དང་། སྟོན་ཟླ་གསུམ་ལ་བར་སྣང་ལ་གནས་བཅས་ནས་ཐོག་དང་སེར་བ་འབེབས་པ་ཞེས་བྱ་སྟེ། གཟའ་དམ་ཅན་གཉིས་དང་མ་བསྡོང་བར་ཐོག་འཕེན་རྒྱུ་མེད་དེ། དམ་ཅན་མགར་བས་ཐོག་བརྡུངས་ཏེ་གཟའི་ལག་ཏུ་གཏད། དེ་རཱ་ཧུ་ལས་འཕེན་དགོས། དེ་སྡེ་བརྒྱད་སོ་སོའི་གཟའ་དང་དམ་
ཅན་ལ་རོགས་བཅོལ་དགོས་པ་ཡིན། གཟའ་དམ་ཅན་བསྡོངས་བས་ཐོག་དེ་མཁར་སྐུ་ཡིན་ཀྱང་ཅེས་ཀྱང་མི་བརྟན་པ་ཁོང་གཉིས་ཀྱི་ནུས་པ་ཡིན། གཟའི་རྣོ་སོ་ལ་ཡང་དམ་ཅན་ཡོད་དེ་གཟའི་བསྐང་བ་དང་བསྐུལ་བ་རྣམས་སུ་ཡོད་དེ། དཔལ་ལྡན་ལྷ་མོ་དཔྱིད་ཀྱི་རྒྱལ་མོར་སྤྲུལ་ཏེ། རླུང་ནག་འཚུབ་མར་བརྫུས་ཏེ་ས་ཆུ་བསྲོ་དུས། དམ་ཅན་གྱིས་དེའི་སྣ་འདྲེན་ཏེ། །དཔྱིད་ཟླ་གསུམ་ལ་རླུང་ནག་འཚུབ་མའི་སྣ་འདྲེན་པ་ཞེས་སོ། །ཀླུ་ཡི་རྒྱལ་པོ་དགའ་བོས་ཀླུའི་དམག་དཔོན་དུ་བསྐོས་པས་ཀླུ་དམག་ལ་དབང་སྟེ། སྐྱེས་བུ་ཆེན་པོ་ཁྱོད་སོང་ལ། །ཀླུ་ཡི་ཡུལ་དུ་དམག་བསྡུས་ལ། །དགའ་བོ་འཇོག་པོ་འཁོར་བཅས་ཀྱང་། །ར་མདའ་བཟློག་ལ་དམག་ལ་ཆོས། །ཞེས་གསུངས་པ་དང་། དབྱར་ཟླ་གསུམ་ལ་སྤྲིན་ནག་དུད་ཁ་ལ་གནས་བཅས་ནས་ཆར་པ་འབེབས་པའི་མཐུ་བོ་ཆེ། ཞེས་གསུངས་སོ། །དེ་བཞིན་བཙན་རྒོད་འབར་བ་སྤུན་བདུན་གྱི་གཅིག་རྡོ་རྗེ་ལེགས་པ་ཡིན་པ་དང་། བདུད་རེ་ལྡེ་མགོ་ཉག་གི་བུ་ཡིན་པ་དང་། ཁོ་རང་དམུ་བཙན་རོལ་པོ་སྟེ་དམུ་ཡིན་པ་དང་། གཉན་ཆེན་ཐང་ལྷ་རྨ་གཉན་སྤོམ་ར་སོགས་གཉན་ཆེན་པོ་རྣམས་དང་སྤྱན་ཡིན་པ་དང་། གཤིན་རྗེ་ཆོས་རྒྱལ་སྐྱེ་བ་
སྔ་མའི་ཕ་ཡིན་པ་དང་། བརྟན་མ་བཅུ་གཉིས་བཙུན་མོ་ཡིན་པ་དང་། དགེ་བསྙེན་མཁའ་རི་སོགས་དགེ་བསྙེན་ཉེར་གཅིག་དང་། དམ་ཅན་རྡོ་རྗེ་ཁྱུང་དྲག་ལ་སོགས་པ་འཛིན་གིང་བཞི་བཅུ་རྩ་གཉིས་འཁོར་ཡིན་པ་དང་། ལྷའི་འཁོར་ཚོགས་འབུམ་ཕྲག་གཅིག་ལ་སོགས་གཞུང་ན་གསལ་ལྟར་ཏེ། འདི་ལས་ལ་ཆས་ན་ལྷ་འདྲེ་ཐམས་ཅད་ལང་མི་དགོས་པ་གཅིག་ཀྱང་མེད་དོ། །དམ་ཅན་དམག་འགྱེད་ལས། གངས་རི་རྩེ་མཐོན་མན་ཆད་དང་། །ངམ་གྲོག་སུལ་མང་ཡན་ཆོད་ཀྱི། །འཇིག་རྟེན་ཁམས་ཀྱི་ལྷ་འདྲེ་རྣམས། །ལ་ལ་ཁྱེད་ཀྱི་ཕ་དང་མ། །ལ་ལ་ཁྱེད་ཀྱི་སྲིང་དང་མཛའ། །ལ་ལ་ཁྱེད་ཀྱི་སྟོང་གིང་པ། །ལ་ལ་ཁྱེད་ཀྱི་ཁབ་དང་དབྱལ། །ལ་ལ་ཁྱེད་ཀྱི་གཏན་དང་གྲོགས། །ལ་ལ་ཁྱེད་ཀྱི་བྲན་དང་ཁོལ། །གང་ཡང་འདུག་པའི་དབང་མེད་པས། །ར་མདའ་བཟློག་ལ་དམག་ལ་ཆོས། །དམག་དཔུང་བསྐྱེད་ལ་རུ་མཚོན་ཕྱིར། །ཞེས་གསུངས་སོ། །ཨོ་རྒྱན་གྱིས་གསུངས་པའི་མདོས་གཞུང་ལས། ཀྱེ། སྐྱེས་བུ་རྡོ་རྗེ་ལེགས་པ་ཁྱོད། །སྐུ་མདོག་མ་ངེས་ཅིར་ཡང་གསལ། །ཐུགས་ནི་སྣང་སྲིད་ཀུན་ལ་རིག། །ཕྲིན་ལས་རྣལ་འབྱོར་དོན་ལ་དགོངས། །
རྣལ་འབྱོར་ནད་གདོན་ཞི་མཛད་ཕྱིར། །སེང་ཆིབས་སྐུ་མདོག་དཀར་པོ་གསལ། །འཁོར་དང་ལོངས་སྤྱོད་རྒྱས་པའི་ཕྱིར། །རྟ་ཆིབས་སྐུ་མདོག་སེར་པོ་བསྟན། །ཁམས་གསུམ་དབང་དུ་སྡུད་པའི་ཕྱིར། །རྟ་ཆིབས་སྐུ་མདོག་དམར་པོ་གསལ། །དགྲ་བགེགས་རྡུལ་དུ་བརླག་པའི་ཕྱིར། །ར་ཆིབས་སྐུ་མདོག་ནག་པོར་བསྟན། །ཅིར་ཡང་སྤྲུལ་པའི་རྫུ་འཕྲུལ་ཅན་། །མཛེས་པའི་ཁྱེའུ་ཆུང་གཞོན་ནུ་ལ། །གཞོན་མདངས་ལང་ཚོ་ཕུན་སུམ་ཚོགས། །ཞེས་སོགས་གསུངས་པས། སྐུ་མདོག་ཆ་ལུགས་མ་ངེས་ཤིང་། རྒྱ་གར་ནས་བྱོན་སྐྱེས་ཁམ་པ་ཆིབས། སུམ་པའི་ཡུལ་ནས་བྱོན་ཚེ་རྣམ་རུ་སྟེ་ཤ་བ་ཆིབས། རྒྱ་ནག་ནས་བྱོནཚེ་རྔ་མོང་གྲྭ་པ་ཆིབས། མོན་ཡུལ་ནས་བྱོན་ཚེ་མོན་ར་རྒྱ་སེར། མ་སངས་ཡུལ་ནས་བྱོན་ཚེ་གཡག་རྒོད་ཞོམ་པ། དགུངས་སྔོན་དབྱིངས་ནས་བྱོན་ཚེ་གཡུ་འབྲུག །བར་སྣང་ཁམས་ནས་བྱོན་ཚེ་ཁྱུང་ཆེན་དར་དམར། བོད་ཡུལ་དབུས་ནས་བྱོན་ཚེ་རག་པ་རྟིང་དཀར། །གཙང་འོ་ཡུག་ནས་བྱོན་ཚེ་སེང་གེ་གངས་སྔོན་ཆིབས་པ་ཡིན་ཏེ་དམ་ཅན་གྱི་སྤྱན་འདྲེན་རྒྱས་པ་ནས། རྒྱ་གར་ཡུལ་ནས་བྱོན་ཙམ་ན། །ཆིབས་སུ་ར་སྐྱེས་ཁམ་པ་ཆིབས། །ཞེས་པ་
ནས། ཉི་མ་ཟླ་བའི་རྟ་ལ་ཆིབས། །འོད་ཟེར་འབར་ཞིང་མྱུར་དུ་བྱོན། །ཞེས་སོགས་རྒྱས་པར་གསུངས་སོ། །གཞན་ཡང་དགྲ་བོའི་བླ་འགུགས་པའི་ཚེ། བྱ་ནག་དང་སྟག་དང་སྤྱང་ཀི་ལ་ཆིབས་པར་དགྲ་ཆོས་ནས་གསུངས་སོ། །ཡང་སྔོན་ལོ་ཆེན་བཟང་པོའི་ཆོས་སྐྱོང་གུར་མགོན་ཡིན་པའི་ལས་མཁན་སྤུ་ཏྲ་ཡིན་ཏེ་གསང་བའི་ལས་མཁན་གནོད་སྦྱིན་གོས་ཅན་བྱ་བ་གཅིག་ཡོད་པ་ཁོང་གིས་མ་དགོངས་བར། བོན་པོ་དང་མཐུ་འགྲན་བྱས་པས། ཕར་མཐུ་མི་འགྲོ་བའི་སྟེང་དུ་ཚུར་ལྡོག་པ་ཅིག་བྱུང་། དེ་ནས་རྒྱ་གར་ཤར་ཕྱོགས་ཀྱི་པཎྜི་ཏ་དྷརྨ་པ་ལ་ཏི་སེ་དང་མ་ཕམ་འཇལ་དུ་བྱོན་པ་ལ། གུར་གྱི་ལས་མཁན་གནོད་སྦྱིན་གོས་སྔོན་ཅན་ཞེས་ཀྱང་བྱ། གཙང་བཙན་ཞེས་ཀྱང་བྱ་བ། གུར་གྱི་རྣོ་སོར་དམ་ཅན་སྦྱར་བ་ཞུས་ནས། བོན་པོ་དང་ནུས་པ་འགྲན་པས་མཐུ་ཐོགས་པ་མེད་པར་སོང་སྐད་དོ། །དེ་ནས་གུར་གྱི་ཡང་གསང་བའི་ལས་མཁན་ཡིན་པས། ས་ལུགས་དམ་ཅན་ཡང་བྱུང་སྟེ་སྟག་ཆིབས་ར་སྐྱེས་ཁྲིད་པ་དང་ནམ་མཁར་བྱོན་ཚེ་སེང་གེ་ཆིབས་པ། བར་སྣང་དུ་བྱོན་ཚེ་གཡུ་འབྲུག །ས་གཞི་བྱོན་ཚེ་ར་སྐྱེས་ཆིབས་པར་བཤད། རྣམ་སྲས་དྲག་པོར་བསྒྲུབས་དུས་
བཀའ་སྡོད་བཞིའི་གཅིག་ནི་དམ་ཅན་ཡིན་ཏེ་དེའི་བསྐུལ་བ་ལས། སྐྱེས་བུ་འོབ་ཀྱི་འགྱིང་ཞུ་ཅན། །སྐྱེས་བུ་མི་ཡི་སྙིང་ལ་ཡ། །སྐྱེས་པ་དར་མ་ཁྲིད་ལ་ཤོག །དམ་ཉམས་དགྲ་བོའི་སྲོག་ལ་ཧུར། །ཞེས་གསུངས་སོ། །མདོར་ན་ཆོས་སྐྱོང་ཐམས་ཅད་ཀྱི་རྣོ་སོ་སྟེ། །ལེགས་ལྡན་དགྲ་ཆོས་རྒྱས་པ་དང་། ཕྱག་བཞི་པ་སོགས་དགྲ་ཆོས་རྣམས་སུ་ཡེ་ཤེས་དང་འཇིག་རྟེན་གྱི་ཆོས་སྐྱོང་ཐམས་ཅད་ཟད་པའི་མཇུག་ཏུ། རྡོ་རྗེ་ལེགས་པས་སྣ་ཁྲིད་གྱིས། །ཞེས་གསུངས་སོ། །སྤྱག་བཙན་གྱི་འཁོར་དུ་ཡོད་པ་ནི། འཁོར་མ་ཡིན་རྒྱབ་རྟེན་ཡིན་ཏེ། །སྤྱག་བཙན་སྒྲུབ་ཐབས་རྣམས་སུ། རྒྱབ་རྟེན་རྡོ་རྗེ་ལེགས་པ་ཟེར་བ་ཡོད་ཅེས་བདག་གི་སློབ་དཔོན་བླ་མ་ཝོལ་བས་གསུངས་སོ། །འོ་ཡུག་གངས་སྔོན་གཙང་པོའི་དཀྱིལ་ནང་ཕ་ཝང་ལོང་བུ་ཁང་པ་ཙམ་ཡོད་དེ་ཕོ་བྲང་དངོས་ཡིན་ནོ། །དེ་མིས་མི་མཐོང་བར་ལྕགས་མཁར་གནམ་ས་འབྲེལ་བ་ཡོད་པར་སྣང་། །དམ་ཅན་འདི་བཙན་རོལ་པ་མཆེད་བདུན་གྱི་ནང་ནས་བརྟན་མ་རོང་བཙན་རྡོ་རྗེ་ལེགས་པ་རྩལ་ཞེས་བྱ་བ་ཡིན་པས་སྟག་མོ་རོང་ཞེས་འབྲས་མོ་གཤོང་གི་ལམ་དུ་ཕོ་བྲང་བྲག་དམར་ཆེན་པོ་ཡོད་སྐད་དོ། །ཚ་བ་སྒང་ན་ཡབ་མོན་པའི་ཕོ་བྲང་། །
རྒྱལ་པོ་སྟག་ཞུ་ཅན་བྱ་བ་དང་། ཡུམ་མོན་མོའི་ཕོ་བྲང་གངས་སྨན་ཉི་མ་འཕྲུལ་བྱ་བ་དམ་ཅན་མིང་སྲིང་གི་ཕོ་བྲང་རྫོང་ནག་པོ་རྩེ་དགུ་ཞེས་པ་ཕྱི་བྲག་ནག་ལ། ནང་གནམ་ལྕགས་ཡ་ཚ་དཀར་པོའི་སྐུ་མཁར་ཡོད་དེ། དེ་ན་ཡང་སྲས་རྡོ་རྗེ་ལེགས་པ་དང་ལྕམ་སྲིང་རྡོ་རྗེ་གཡུ་སྒྲོན་མ་གནས་པས་མགར་ལྕམ་གཉིས་ཟེར། མཆེད་ཡ་དམ་ཅན་རྡོ་རྗེ་ཁྱུང་དྲག་བྱ་བ་ནི་རྒྱུན་དུ་བཞུགས་སོ། ལྕམ་མོ་ཟེར་བ་ཡང་དམ་ཅན་གྱི་ལྕམ་ཡིན་པས་སོ། །གཙང་ཇོ་མོ་གངས་དཀར་མའི་གཡས་སུ་དམ་ཅན་མགར་བ་ནག་པོ་ཡིན་ཟེར་བའི་བྲག་དཀར་ཤིན་ཏུ་ཆེ་བ་ཡོད་དེ། ཀོང་ཡུལ་ཀོང་བཙུན་དེ་མོ་དང་ཉེ་བའི་སར། གྲི་ལྷ་རྩེ་རྣོན་ཞེས་རྒྱུན་དུ་མགར་བྱེད་པའི་ཐོ་བའི་སྒྲ་འབྱུང་ཞིང་ཉེ་ལོགས་སུ་མགར་བ་གཞན་གྱིས་མགར་བྱེད་མི་ཕོད་དེ། དེ་ཡང་མགར་ནག་གི་ཕོ་བྲང་ཡིན་པར་ཀརྨ་ཆོས་འབྱུང་ནས་གསུངས་སོ། །གཞན་ཡང་ཡུམ་ཡིན་ཕྱིར་བརྟན་མ་བཅུ་གཉིས་ཀྱི་རི་རེ་རེའི་རྩར་དམ་ཅན་གྱི་ཕོ་བྲང་རེ་རེ་ཡོད་སྒྲེ་དོ། །གདན་ས་ཆེན་པོ་ཀརྨའི་མ་མཐའ་ན་དམ་ཅན་འགགས་ཞེས་བྲག་ལ་ཕོ་བྲང་ཡོད་ཟེར་བ་ལྟར། གནས་བཟང་པོ་ཕལ་ཆེར་དང་དགོན་པ་མང་པོ་སོ་སོར་མགོན་ཁང་དང་རྟེན་རྫས་
དང་། དེ་རྟགས་ཆོ་འཕྲུལ་ཡོད་ལུགས། སོ་སོའི་བླ་མ་རྣམས་ཀྱི་ཞལ་གཟིགས་ལུགས་ནི་བྲི་བར་མི་ལོང་སྟེ་དཔག་ཏུ་མེད་དོ། །གིང་ཆེན་སྡེ་བཞིའི་ལྷའི་གིང་ཆེན་ཚངས་པ་དཀར་པོ་འདི་གྲུབ་ཆེན་ཀརྨ་པཀྴིས་ཧོར་ཡུལ་ནས་ཞལ་གཟིགས་ཏེ། ཉིད་ཀྱིས་མཛད་པའི་རྣམ་ཐར་ལས། ཡང་ལོའི་རྒྱལ་པོ་ཡོས་བུའི་ལོ། །བཅུ་གཉིས་ཟླ་བའི་ཚེས་གཅིག་ལ། །ཐོ་རངས་ནམ་གྱི་ཆ་སྨད་ལ། །ཉ་རྒྱལ་ཟླ་བའི་འོད་བཞིན་དུ། །ཚངས་པ་དུང་གི་ཐོར་ཚུགས་ཅན། །མི་དཀར་འོད་དང་བཅས་པ་ཞིག །ང་ནི་བྱང་ཕྱོགས་ཡུལ་ནས་འོང་། །འདི་ན་མ་འདུག་དེང་ཞེས་གསུངས། །ཡང་དེ་ནས་གཙང་ཁའི་ཡུལ་དུ་ཕྱིན། །ཉི་ཤུ་རྩ་གཅིག་ཞག་གྲངས་ལ། །ནམ་མཁའ་འཇའ་འོད་འཁྱིལ་པ་ལས། །ཆར་རྒྱུན་མེ་ཏོག་ལྟ་བུར་བབས། །མི་དཀར་དར་གྱི་རས་དཀར་ཅན། །འཛམ་གླིང་ཀུན་ལ་ཁྱབ་པའི་སྐུ། །འོད་ཀྱི་ལུས་ཅན་ཞལ་སྔ་ནས། །ང་ནི་གནམ་ལྷ་དཀར་པོ་ཡིན། །བྱང་ཕྱོགས་ཡུལ་དུ་འགྲོ་དགོས་སྐད། །ཡང་ཕོ་ཉ་རིང་བའི་སུན་མ་བྱུང་། །འུ་ལག་མགྱོགས་པའི་རྟ་ལ་ཞོན། །ཞེས་གསུངས་ཏེ། ཧོར་སེ་ཆེན་རྒྱལ་པོའི་ཡབ་སྲས་ཀྱིས་གདན་འདྲེན་འོང་ཁ་དེའི་ལྷ་ཐེལ་དཀར་པོའི་གདན་
འདྲེན་བྱུང་ཚུལ་གསུང་ཞིང་། དམ་ཅན་དཀྱིལ་འཁོར་ལྷའི་གིང་ཆེན་འདི་གནམ་ཐེལ་ཡིན་པས་བདུད་མོ་བཀྲ་ཤིས་འོད་ཟེར་བས་ཀྱང་གསུངས་སོ། །བཀའ་བརྒྱད་གཞུང་ལས། ཟས་ནོར་དངོས་གྲུབ་བསྡུ་བའི་ཕྱིར། །གནམ་ཐེལ་དཀར་པོའི་ཐུགས་དམ་བསྐང་། །ཞེས་དང་། དམ་ཅན་རྩིས་འདེབས་ལས། གནམ་ཐེལ་དཀར་པོ་བྱ་ཡི་མགོ །ཕོ་ཡི་སྐེད་ལ་སྦྲུལ་ལྟར་འཁྲི། །མོ་ཡི་མངལ་ལ་ཁྲག་ལྟར་འཛག །དམ་ཅན་བཀའ་སྡོད་རྩིས་འདེབས་སོ། །ཞེས་གསུངས་སོ། །གཤིན་རྗེའི་གིང་ཆེན་མེ་རུ་རྩེ་དམར་པོ་ནི། བོན་གྱི་ཨག་སེ་རྒྱལ་བ་འབྲུག་ལུགས་ཀྱིས་བཙན་ཇག་པ་མེ་ལེན་ཟེར་བ་འདི་ཡིན་ནོ། །བཙན་གྱི་གིང་ཆེན་ཡམ་ཤུད་དམར་པོ་ནི། བེག་རྩེ་ཞེས་ཀྱང་བྱ། འདི་ལ་ཕོ་བྲང་མང་ཡང་ཡུལ་འདིར་སྐུ་རྒྱལ་ཤེ་ནེ་ཞེས་པ་འདི་ཡིན་ནོ། །བདུད་ཀྱི་གིང་ཆེན་ཡབ་རྗེ་ནག་པོ་ནི། མགོན་པོ་ཏྲཀཱད་ཀྱི་ཡབ་ཏེ་ཤོད་ནག་པོ་ཞེས་བྱ་བ་ཡིན་ནོ། །མཆེད་ཟླ་སུམ་བརྒྱ་ནི་རྒྱ་དཀར་ནག་སོགས་ཀྱི་གཞི་བདག་དྲག་རྩལ་ཅན་རྣམས་ཡིན་ལ། དྲུག་ཅུ་ནི་བོད་ཀྱི་མགུལ་ལྷ་བཅུ་གསུམ་ལ་སོགས་བོད་ཀྱི་གཞི་བདག་དྲག་རྩལ་ཆེན་པོ་རྣམས་ཡིན། ཟམ་བུ་ལུང་དང་
ཕུག་པ་གཅིག་གི་ནང་དུ་ར་གསུར་བཏང་ནས་ཉལ་ན་མི་སུ་ཉལ་དམ་ཅན་འབབ། དེའི་ཕྱིར་དབུས་གཙང་དུ་དམ་ཅན་འབབ་མི་ཤིན་ཏུ་མང་བ་ནི། དམ་ཅན་དངོས་མ་ཡིན་ཏེ། འཁོར་ཨ་ཙ་ར་དང་མོན་པ་སྟོང་ཕྲག་དུ་མ་ཡོད་པ་རྣམས་ཡིན་པར་འདུག་སྟེ། སྔར་རིན་སྤུང་དུ་དམ་ཅན་འབབ་མི་བཅུ་གསུམ་འཛོམས་པས། མགར་དམར་ཡིན་ཟེར་བ་ངོ་ཁྲག་གི་མདོག་ཅན་གཅིག་བབ་བྱུང་ཛ། གཞན་ཐམས་ཅད་སྐྲག་ཅིང་འདར་ནས་ཅི་བཤད་རྒྱུ་མེད་པར་ཡལ་ནས་སོང་སྐད་དོ། །དེ་བཞིན་དུ་དགོན་པ་དང་བླ་མ་དང་སྔགས་པ་དང་སྡེ་ཕ་དང་ཐ་ན་དུད་ནག་ཡན་ལ་ཡོད་ཟེར་བའི་རྟགས་ཆོ་འཕྲུལ་འབྱུང་བ། མི་མགོ་ནག་གི་རྗེ་བོ། དུད་སྔོན་ཆག་གི་རྐྱེན་ཞེས་པའི་དོན་ཏེ། སྐྱེས་བུ་ཉིད་ཀྱིས་བདག་ཏུ་བཟུང་བས། འཁོར་བྱེ་བ་དུང་ཕྱུར་ཡོད་པའི་རེ་རེ་ཁྱིམ་བསྲུང་གི་ཚུལ་དུ་བཞག་ནས་ཆོ་འཕྲུལ་དང་ཕན་གནོད་བྱེད་པར་གསལ་ལོ། །ཡུལ་འདིའི་ངོམ་རྒྱལ་དང་ཀླུ་རྒྱལ་སྤོ་ཏོ་སོགས་ཀྱང་མཆེད་དྲ་ཡིན་ཟེར་སྐད་ཏེ་བདེན་པ་འདྲའོ། །དེ་ལྟར་དམ་ཅན་སྐྱེས་བུའི་ལོ་རྒྱུས་རྒྱས་པ་འདི། ཨ་ནུ་ཚེ་དབང་རྡོ་རྗེས་བསྐུལ་བ་ལ་བརྟེན་ནས། སྔགས་འཆང་༧ ཨ་རཱ་གས་ཤིང་ལུག་གི་ལོ་ཐ་སྐར་ཟླ་བའི་ཉི་ཤུ་ལྔ་ནས་བརྩམས་ཏེ། བདུན་ལ་གྲུབ་པར་སྦྱར་བ་ལ།
འགལ་འཁྲུལ་མཆིས་ན་སྐྱེས་བུ་འཁོར་དང་བཅས་པ་ལ་བཤགས་ཤིང་། དགེ་བས་སངས་རྒྱས་ཀྱི་བསྟན་པ་དར་ཞིང་རྒྱས་པའི་རྒྱུར་གྱུར་ཅིག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།