སྐུ་ཁྱིམ་དགེ་བསྙེན་གྱི་བསང་མཆོད།
སྐུ་ཁྱིམ་དགེ་བསྙེན་གྱི་བསང་མཆོད་བཞུགས་སོ། །ན་མོ་པདྨ་བཛྲ་ཡེ། པདྨ་འབྱུང་གནས་སྐུ་ལ་ཕྱག་འཚལ་ལོ། །སྐུ་ཁྱིམ་བསང་མཆོད་བྱེད་འདོད་ན། །གཞི་སྟེང་ནས་ཀྱི་ཚོམ་བུའི་སྟེང་། །ཕྱེ་མར་བདུད་བཤོས་དཀར་གཏོར་དང་། །གཡག་ལུག་ར་གསུམ་གཟུགས་འགྲོས་དང་། །འབྲུ་སྣ་སྨན་སྣ་དར་ཟབ་དང་། །ཇ་ཆང་ཤ་དང་དཀར་གསུམ་མངར་གསུམ་སོགས། །གང་འབྱོར་མཆོད་པ་རྒྱས་པར་བཤམས། །རང་ཉིད་པད་འབྱུང་ང་རྒྱལ་གྱིས། །དབྱངས་དང་རོལ་མོ་བཅས་པས་འདི་སྐད་དོ།། ཀྱཻ། ཕྱོགས་ཕྱོགས་དག་ཀྱང་ཕ་ཀི་ན། །ཉི་མ་བྱང་ཕྱོགས་ཕ་ཀི་ནི། །ཡུལ་གྱི་མིང་ནི་དབྱི་ལྕིའི་སྒང་། །གནས་ཀྱི་མིང་ནི་སྐུ་ཁྱིམ་གནས། །བྲག་ནག་རིན་ཆེན་སྤུང་པ་འདྲ། །རི་བོ་རྡོ་རྗེ་གནམ་བསླང་འདྲ། །གཡའ་མ་འབྲོང་རུ་གཤིབ་པ་འདྲ། །མཚོ་མོ་ཁྱུང་གཤོག་ལྡིང་བ་འདྲ། །བྲག་དམར་རྟ་སོ་གཤིབ་པ་འདྲ། །ནམ་མཁར་ཉི་ཟླ་གཟའ་སྐར་བཀྲ། །བར་སྣང་ཐོག་གློག་ཚྭ་ཚྭ་འཕྲོ། །གཡུ་འབྲུག་ངར་སྐད་དྷི་རི་རི། །ཁུ་འཕང་སེར་བ་ཐ་ར་ར། །བདུད་རྩི་སྦྲང་ཆར་སི་ལི་ལི། །ན་བུན་སྨུག་པ་ཐིབས་སེ་ཐིབ། །རྩི་སྨན་མེ་ཏོག་བཀྲག་ལ་གསལ། །རྩེ་ལ་བྱ་རྒྱལ་ཏ་ལ་ལ། །རྩ་བར་རི་དྭགས་ཁྲོ་ལོ་ལོ། །སྐེད་པར་གཅན་གཟན་
འདུ་རུ་རུ། །གནས་མཆོག་དེ་ཡི་མངའ་བདག་ནི། །སྐུ་ཁྱིམ་དགེ་བསྙེན་དྲག་རྩལ་ཅན། །གདུང་བའི་དབྱངས་ཀྱིས་འབོད་ལགས་ན། །རྫུ་འཕྲུལ་སྐད་ཅིག་ཡུད་ཙམ་གྱིས། །གནས་འདིར་སྤྱན་འདྲེན་གཤེགས་སུ་གསོལ། །གཡས་ཀྱི་ནག་པོ་བཀྲག་མེད་དང་། །གཡོན་གྱི་ཕོ་རོག་གཡའ་སླག་དང་། །རྗེས་ཀྱི་སྨུག་པོ་རི་ཚོན་དང་། །ལྕམ་མོ་མེ་ལོང་འོ་ཐུལ་དང་། །འཁོར་དང་བློན་པོ་སྤྲུལ་པའི་ཚོགས། །བདུད་དམག་བྱེ་བ་འབུམ་དང་བཅས། །སྐད་ཅིག་ཡུད་ཙམ་འདིར་གཤེགས་ལ། །རང་རང་བཤམས་པའི་གདན་ལ་བློབཞུགས། །སྔོན་ཚེ་པདྨའི་སྤྱན་སྔ་རུ། །ཇི་ལྟར་ཁས་བླངས་དམ་བཅས་བཞིན། །རྣལ་འབྱོར་བདག་གི་སྡོང་གྲོགས་མཛོད། །བཛྲ་ས་མ་ཡ་ཛཛཿ ཛཿཧཱུྃ་བོ་ཧོཿ ས་མ་ཡ་སྟྭཾ༔ ས་མ་ཡ་ཧོཿ ཀྱཻ། སྐུ་ཁྱིམ་དགེ་བསྙེན་དྲག་རྩལ་ཅན། །འཁོར་དང་བཅས་པ་ཐམས་ཅད་ལ། །མཆོད་པ་དམ་པ་འབུལ་བ་ནི། །ཉེར་སྤྱོད་བདུན་དང་འདོད་ཡོན་ལྔ། །འབྲུ་སྣ་སྨན་སྣ་ཟས་སྣའི་ཕུད། །ཕྱེ་མར་དཀར་གཏོར་བདུད་བཤོས་དང་། །གཡག་ལུག་ར་ཡི་གཟུགས་འགྲོས་དང་། །འོ་ཞོ་ཇ་ཆང་ཤ་གཙང་ཕུད། །དར་ཟབ་
བཟང་ཤིང་དུད་སྤྲིན་སོགས། །དངོས་འབྱོར་ཡིད་སྤྲུལ་བསང་མཆོད་འབུལ། །འཁོར་བཅས་མཉེས་ཤིང་ཚིམ་པར་མཛོད། ། ཨརྒྷཾ་ནས་ཤབྡ་པྲ་ཏཱིཙྪ་ཡེ་སྭཱ་ཧཱ། དེ་ནས་མཆོད་པ་རྣམས་བསང་ཁང་ནང་ཕུལ་ལ་འདི་སྐད་དོ།། ཀྱཻ། སྐུ་ཁྱིམ་དགེ་བསྙེན་དྲག་པོ་ཅན། །སྐུ་མདོག་སྨུག་ནག་འབར་བ་ལ། །དབུ་ལ་དར་ནག་ལ་ཐོད་བཅིངས། །སྐུ་ལ་དར་ནག་བེར་ཆེན་གསོལ། །མཚལ་གྱི་ཐིག་ཕྲན་ཆོ་ལོ་རིས། །ཕྱག་གཡས་གནམ་ལྕགས་ཐོག་མདའ་
འཕེན 
། །དམ་ཉམས་དགྲ་བོ་སྤྱི་ནས་འཇོམས། །ཕྱག་གཡོན་དར་ནག་བདུད་དམག་སྡུས། །དགྲ་བོའི་ཡུལ་དུ་བདུད་དམག་དྲོངས། །སྟག་རལ་གཡས་ལ་གཟིག་ཤུབས་གཡོན། །རལ་གྲི་གློག་དམར་ཁྱུགས་སེ་ཁྱུག །ཁྲ་ནག་གདོང་སེ་ཆིབས་སུ་ཆིབས། །དར་ནག་སྟན་སྟང་ལྷབས་སེ་ལྷབ། །བསེ་སྒྲ་སྨུག་པོ་ཝངས་སེ་ཝང་། །བསེ་ཡི་ཡོབ་ལྡན་ལྷབས་སེ་ལྷབ། །མཆོང་གི་ཡོབ་ཆེན་ཁྲ་ལ་ལ། །སྦྲུལ་ནག་གོང་སྨད་ཁྱུགས་སེ་ཁྱུག །བསེ་ལྷམ་ལྕགས་མཐིལ་ཤད་དེ་ཤད། །སྔ་ཤ་བདུད་ཀྱི་ཞགས་པ་ལྡོག །ཕྱི་ཤ་མི་མགོ་ཕྲུ་ལུ་ལུ། །ལྕགས་ཀྱི་བྱ་ཁྲ་ཀླད་ལ་ལྡིང་། །གཡས་ན་
བདུད་བྱ་ཕོ་རོག་འགྱེད། །གཡོན་ན་གཡའ་གླག་གཤོག་པ་བཀྲ། །ལྕགས་སྤྱང་སྔོན་མོ་རྗེས་ན་འདུར། །དུར་སྲི་ཝ་མོ་སྡུན་ན་རྒྱུག །བདུད་དམག་འབུམ་དང་བཅས་པ་ལ། །བསང་དང་བརྔན་གྱི་མཆོད་པ་འབུལ། །མི་ནོར་ནད་ཡམས་ཞི་བ་དང་། །ཚེ་བསོད་དཔལ་འབྱོར་རྒྱས་པར་མཛོད། །སྡང་བའི་དགྲ་བོ་རྡུལ་དུ་རློགས། །ཕྲིན་ལས་གང་བཅོལ་མྱུར་དུ་སྒྲུབས། །གཡས་ཀྱི་བཀའ་ཉན་མདའ་ར་བ། །བྲ་སྨུག་དེ་ནི་བསེ་ཚོས་ཅན། །གློག་ཞགས་དགྲ་ལ་ འཕེན ་པ་ལ། །བསང་དང་བརྔན་གྱི་མཆོད་པ་འབུལ། །དགྲ་རྐུན་ཇག་གསུམ་གནོད་པ་ཟློག །གཡོན་གྱི་བཀའ་ཉན་མདུང་ར་བ། །བྲ་ནག་དེ་ནི་སྟག་ཆས་ཅན། །ཐོག་མདའ་དགྲ་ལ་ འཕེན ་པ་ལ། །བསང་དང་བརྔན་གྱི་མཆོད་པ་འབུལ། །གོད་ཁ་ལྕེ་སྤྱང་གནོད་པ་ཟློག །སྔོན་གྱི་བཀའ་ཉན་ལས་མཁན་ནི། །བཙན་བུ་དེ་ནི་སྨན་བཀྲ་ཅན། །ལྕགས་ཀྱུས་དགྲ་སྙིང་འདྲེན་པ་ལ། །བསང་དང་བརྔན་གྱི་མཆོད་པ་འབུལ། །སྡང་བྱེད་དགྲ་བོ་རྡུལ་དུ་རློགས། །རྗེས་ཀྱི་དམག་ཚོགས་གཏིང་གནོན་པ། །ཁྲ་བོ་དེ་ནི་དར་ཆས་ཅན། །གནམ་ལྕགས་ཁྲབ་རྨོག་གྱོན་པ་ལ། །བསང་
དང་བརྔན་གྱི་མཆོད་པ་འབུལ། །དགྲ་སོད་བགེགས་ཐུལ་ཕྲིན་ལས་སྒྲུབས། །ལྕམ་མོ་དེ་ནི་རྫུ་འཕྲུལ་ཅན། །མེ་ལོང་འོད་ཐུལ་ཞེས་བྱ་མ། །ནོར་གཡང་དངོས་གྲུབ་སྟེར་བ་ལ། །བསང་དང་བརྔན་གྱི་མཆོད་པ་འབུལ། །ལོངས་སྤྱོད་ནོར་གྱི་དངོས་གྲུབ་སྩོལ། །བཅོལ་བའི་ཕྲིན་ལས་མྱུར་དུ་སྒྲུབས། །ཀྱཻ། སློབ་དཔོན་པདྨ་འབྱུང་གནས་ཀྱིས། །བཀའ་ཉན་བསྟན་སྲུང་མཐུ་རྩལ་ཅན། །སྐུ་ཁྱིམ་དགེ་བསྙེན་འཁོར་བཅས་བསང་། །རྫུན་གྱི་དུར་སྲི་ཝ་མོ་བསང་། །གཡས་ཀྱི་ནག་པོ་བཀྲག་མེད་བསང། །གཡོན་གྱི་ཕོ་རོག་གཡའ་བླག་བསང་། །རྗེས་ཀྱི་སྨུག་པོ་རི་ཚོན་བསང་། །སྡུན་ན་རྒྱུག་པའི་ལས་མཁན་བསང་། །ལྕམ་མོ་མེ་ལོང་འོད་ཐུལ་བསང་། །བླ་མཚོ་ཆུ་མིག་ནག་རིང་ལ། །གནས་པའི་ཀླུ་ཡི་སྡེ་ཚོགས་བསང་། །གཞན་ཡང་འཁོར་དང་སྤྲུལ་པའི་ཚོགས། །བློན་པོ་རྟ་ཟམ་དགེ་བསྙེན་བསང་། །ཀླུ་རྒྱལ་གཙུག་ཆེན་སྦལ་མགོ་བསང། །གཙུག་ཆུང་སྦྲུལ་མགོ་འཁོར་བཅས་བསང་། །རི་ཉིད་རྒྱལ་བ་མཆེད་གསུམ་བསང་། །རྒྱལ་མོ་རི་ཕྱུག་འཁོར་བཅས་བསང་། །རྐང་ཆུང་ཁྲ་ཝང་ཨ་བྷི་བསང་། །
ཀླུ་གཉན་ས་བདག་སྟོང་སྡེ་བསང་། །ཡུལ་ལྷ་གཞི་བདག་འཁོར་བཅས་བསང་། །དཀར་ཕྱོགས་སྐྱོང་བ་ཐམས་ཅད་བསང་། །སྤྲུལ་པ་འབུམ་སྡེར་འཁོར་བཅས་བསང་། །ཡུལ་འདིར་གནས་པའི་གཞི་བདག་བསང་། །གནས་འདིར་ས་ཡི་ས་བདག་བསང་། །བཟང་ཤིང་བསྲེགས་པའི་དུད་པས་བསང་། །ཤ་གཙང་ཇ་ཆང་ཕུད་ཀྱིས་བསང་། །འོ་ཞོ་ཕྱེ་མར་གསུར་གྱིས་བསང་། །གཡག་ལུག་ར་གསུམ་གཟུགས་ཀྱིས་བསང་། །འབྲུ་སྣ་སྨན་སྣ་བསྲེགས་པས་བསང་། །གདུང་དབྱངས་རོལ་མོའི་སྒྲ་ཡིས་བསང་། །དེ་ལྟར་བསང་མཆོད་ཕུལ་བ་ཡི། །ཁྱེད་རྣམས་སྐུ་གསུང་ཐུགས་མཉེས་ནས། །རྟག་ཏུ་ཁ་འཛིན་སྡོང་གྲོགས་མཛོད། །ཟས་ནོར་ལོངས་སྤྱོད་དངོས་གྲུབ་སྩོལ། །བཅོལ་བའི་ཕྲིན་ལས་འགྲུབ་པར་མཛོད། །ཀྱཻ། སྐུ་ཁྱིམ་དགེ་བསྙེན་དྲག་རྩལ་ཅན། །ཡུལ་ལྷ་གཞི་བདག་མཐུ་བོ་ཆེ། །ས་བདག་ཀླུ་གཉན་འཁོར་བཅས་རྣམས། །བརྩེ་བའི་ཐུགས་རྗེས་དགོངས་སུ་གསོལ། །བདག་ཅག་མ་རིག་དབང་གྱུར་པས། །ཁྱེད་རྣམས་ཐུགས་དང་འགལ་བ་ཡི། །ཕོག་ཐུག་འགྲམ་འཁྲུག་གང་མཆིས་པ། །མཐོལ་ལོ་བཤགས་སོ་བཟོད་
པར་གསོལ། །ཀླུ་དང་ས་བདག་གནོད་པ་ཡི། །ནད་དང་གནོད་པ་ཞི་བར་མཛོད། །མི་ནད་ཕྱུགས་ནད་ཞི་བར་མཛོད། །གོད་ཁ་གཅན་སྤྱང་གནོད་པ་ཟློག །ལོ་ལེགས་སད་སེར་མེད་པར་མཛོད། །ཚེ་རིང་ནད་མེད་ནོར་ཕྱུགས་འཕེལ། །བདེ་ལེགས་ཕུན་སུམ་ཚོགས་པར་མཛོད། །ནད་ཁ་ཆོད་ལ་ཡམས་ཁ་ཟློག །ཆོས་དང་མཐུན་པའི་དངོས་གྲུབ་སྩོལ། །བཀྲ་ཤིས་བདེ་ལེགས་རྒྱས་པར་མཛོད། །ཅེས་པ་འདི་སྨིན་དྲུག་ཟླ་བའི་ཚེས་བཅུའི་སྔ་དྲོ་ཐུན་མཚམས་གཅིག་ལ་སྦྱར་བ་ལ། འགལ་འཁྲུལ་མཆིས་ན་སྐུ་ཁྱིམ་ཉིད་ལ་བཤགས། །དགེ་བས་བདག་སོགས་འཁོར་བཅས་ཀྱི། །མི་ནད་ཕྱུགས་ནད་ཞི་བ་དང་། །ཚེ་རིང་ནད་མེད་ནོར་ཕྱུགས་འཕེལ་བ་དང་། །དགེ་ལེགས་དཔལ་ལ་སྤྱོད་པར་ཤོག །ཅེས་རཱ་ག་ཨ་སྱས་སྦྱར་བ་འདི་ཉིད་རྗེ་གོང་མའི་བརྒྱུད་འཛིན་དགེ་སློང་ཆོས་དབྱིངས་ཀྱི་ཕྱག་དཔེ་བཀྲ་ཤིས་དར་ལ་རྒྱས་པར་ཤོག ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།