ཆོས་ཉིད་བསམ་གྱིས་མི་ཁྱབ་པ་ཟབ་ཅིང་རྒྱ་ཆེ་བའི་གནས་ལུགས་འཇལ་བ།
༈ དེ་ཡང་ཆོས་ཉིད་བསམ་གྱིས་མི་ཁྱབ་པ་ཟབ་ཅིང་རྒྱ་ཆེ་བའི་གནས་ལུགས་འཇལ་བ་ན། མཚན་ཉིད་ཐེག་པས་གཏན་ཚིགས་ཀྱི་སྒོ་ནས་གཞལ་བའི་བསམ་ཤེས་ཀྱིས་རྗེས་སུ་དཔག་པ་ངེས་པའི་ཚད་མས་གཏན་ལ་ཕབ་པའི་དོན་དམ་བདེན་པ་བློས་བྱས་ཀྱི་གཞི་དང་། དེ་ལ་ངེས་ཤེས་ཀྱི་བློ་སྐྱེས་པ་ལ་འབད་པས་འཇོག་པའི་ཞི་གནས་དང་། དེ་ལ་རྟོག་དཔྱོད་ལྷག་མཐོང་དུ་བཏགས་པ་ཙམ་གྱིས་ཏིང་ངེ་འཛིན་དང་། དུས་རིང་པོ་ཞིག་ཏུ་ཚོགས་གྲངས་མེད་པ་འདུ་བྱས་པའི་རྒྱུ་ལས་ཐོབ་པ་ལ་ཕྱོགས་པའི་འབྲས་བུ་ལ་དམིགས་པའི་ཟབ་པ་ཙམ་དང་། རྒྱ་ཆེ་བའི་ཕུང་ཁམས་སྐྱེ་མཆེད་ལ་སོགས་ཀྱང་ཀུན་རྫོབ་ཀྱི་བདེན་པར་གཏན་ལ་ཕབ་ནས་བླང་དོར་གྱི་འདུ་ཤེས་དམ་པོས་དཀྲིས་པ་ཙམ་ལས་མེད་ལ། སྔགས་སུ་གཏན་ཚིགས་དང་བློས་བྱས་པའི་བསམ་བྱུང་གི་ཤེས་རབ་ལ་མ་ལྟོས་པར། དབང་གསུམ་པ་དང་། ཡེ་ཤེས་བཙན་ཐབས་སུ་དབབ་པ་དང་། རྡོ་རྗེ་ལུས་ཀྱི་རྟེན་འབྲེལ་ལས་རྩ་རླུང་ཐིག་ལེ་གནད་དུ་བསྣུན་པས་བློས་མ་བྱས་པའི་ཡེ་ཤེས་རྣམ་པར་མི་རྟོག་པའི་ཆོས་ཉིད་དམ་ཆོས་ཀྱི་སྐུའི་སྙིང་པོ་གཏན་ལ་ཕེབས་ནས། དེ་ཉིད་ཀྱི་ངང་དུ་རང་བཞིན་གྱིས་བློ་གནས་པས་དོན་དམ་པའི་བདེན་པ་རྟོགས་ནས་ཚེ་གཅིག་ལ་སོགས་པ་ལ་བྱང་ཆུབ་མངོན་དུ་བྱེད་པས་ཟབ་མོ་མངོན་སུམ་དུ་སྐྱེ་བ་དང་། རྒྱ་ཆེ་བ་ཡང་དབྱིངས་འོད་གསལ་གྱི་དཀྱིལ་འཁོར་དུ་ཡེ་ནས་གནས་པས་གཞི་རྒྱུད་གཏན་ལ་ཕབ་ནས། དེ་ལ་བརྟེན་པའི་ཀུན་རྫོབ་ལྟར་སྣང་བའི་སྣོད་བཅུད་སྐྱེ་མཆེད་ཐམས་ཅད་སྤང་བླང་དང་བྲལ་བའི་ལྷ་དང་གཞལ་ཡས་
ཁང་དང་ཞིང་གི་བཀོད་པར་རྟོགས་པས་ལམ་གྱི་རྒྱུད་རྣམས་ཉམས་སུ་བླང་བྱར་བསྟན་པས། ཐུན་མོང་གི་དངོས་གྲུབ་གྲུབ་པ་བརྒྱད་སོགས་དང་། ཐུན་མོང་མ་ཡིན་པ་མཐོང་ལམ་ནས་མི་སློབ་པའི་བར་གྱི་འབྲས་བུའི་རྒྱུད་གཏན་ལ་འབེབས་པའི་ཕྱིར་ཟབ་ཅིང་རྒྱ་ཆེ་བའི་དོན་ལ་རྨོངས་པ་མེད་པ་ཡིན་ནོ། །རྣམ་པ་གཞན་དུ་མྱུར་བ་དང་། བདེ་བ་དང་། ཐབས་ལ་མཁས་པས་ཀྱང་ཁྱད་པར་དུ་འཕགས་ཏེ། ཇི་ལྟར་མྱུར་བ་ཡིན་ཞེ་ན། སྐྱེ་བ་འདིའམ། སྐྱེ་བ་བཅུ་དྲུག་གམ། བསྐལ་པ་གསུམ་མམ། བསྐལ་པ་བརྒྱད་ཀྱིས་བྱང་ཆུབ་ཐོབ་པ་སྟེ། རྒྱུ་ཅིས་མྱུར་བ་ཡིན་ཞེ་ན། ཆོ་གའི་ཁྱད་པར་གྱིས་ལྷ་རྣམས་དངོས་སུ་མཆོད་པ་ལེན་པས་ཡོངས་སུ་སྤྱད་པ་ལས་བྱུང་བའི་བསོད་ནམས་ཡོད་པ་དང་། སྔགས་ཀྱི་མཐུས་ཆུ་ཐིགས་པ་གཅིག་ཀྱང་གངྒཱའི་བྱེ་སྙེད་དུ་འགྱུར་བས་དེ་སྙེད་ཀྱི་བསོད་ནམས་འབྱུང་བ་དང་། ལས་དང་པོ་པས་མ་དག་པའི་སྣང་བའི་ཞིང་སྦྱོང་བའི་ཏིང་ངེ་འཛིན་མངོན་དུ་བྱེད་པ་དང་། སྔགས་དང་ཏིང་ངེ་འཛིན་གྱི་ཁྱད་པར་རེ་རེས་ཀྱང་སེམས་ཅན་རྣམས་སྨིན་པའི་རྒྱུ་ཁྱད་པར་ཅན་འདི་དག་ཐེག་པ་འདི་ཉིད་ལ་ཞུགས་པ་ཙམ་ལའང་ཡོད་ཅིང་། ཏིང་ངེ་འཛིན་གྱི་སྤྱོད་ཡུལ་གྱིས་གཟུགས་བདེན་པ་གཉིས་ཀའི་ཚུལ་གྱིས་འབྲས་བུའི་རྣམ་པ་ལ་དམིགས་པའི་ཤེས་རབ་རྣམས་དང་པོ་ནས་ཐ་མའི་བར་དུ་ཡོད་པ་དང། ཇི་ལྟར་ན་བདེ་བ་ཡིན་ཞེ་ན། ལུས་དང་སེམས་ལ་ཚོར་བ་རྩུབ་མོ་མེད་པ་ཉིད་དེ། རྒྱུ་ཅིས་བདེ་བ་ཡིན་ཞེ་ན། འདི་ལ་བསྐལ་པ་དྲུག་དང་ལྡན་པའི་ལུས་ཀྱང་འགྲུབ་
པ་དང་། རྫུ་འཕྲུལ་དང་ཏིང་ངེ་འཛིན་མང་པོ་འཐོབ་པ་དང་། སྔགས་ཀྱིས་མཐུས་སངས་རྒྱས་རྣམས་མངོན་སུམ་དུ་བཞུགས་པ་དང་། སྔགས་དང་རྒྱུད་ཀྱི་སྦྱོར་བས་སེམས་ཅན་གྱི་བསམ་པ་ཐམས་ཅད་སྒྲུབ་པའི་ཕྱིར་དང་། ཐབས་ལ་མཁས་པ་གང་ཞེ་ན། འཕོ་བ་མེད་པའི་བདེ་བ་སོགས་ཚུལ་ཁྲིམས་ཀྱི་བསླབ་པ་དང་། མཚན་བཅས་དང་མཚན་མ་མེད་པའི་ཏིང་ངེ་འཛིན་གྱི་བསླབ་པ་དང་། བདེན་གཉིས་གདོད་ནས་དབྱེར་མེད་པའི་རང་བཞིན་དུ་རྟོགས་པའི་ཤེས་རབ་ཀྱི་བསླབ་པ་དང་། སྤྱོད་ཡུལ་ལ་འཇུག་པ་རྣམས་སོ། །གཞན་ཡང་ར་ལི་བསམ་གྱིས་མི་ཁྱབ་པའི་རྒྱུད་(དཔལ་འཁོར་ལོ་སྡོམ་པ་གསང་བ་བསམ་གྱིས་མི་ཁྱབ་པའི་རྒྱུད་ཀྱི་རྒྱལ་པོ།)ལས། ཉན་ཐོས་ལ་སོགས་ཐེག་ཆེན་ལ། །མན་ངག་ཡོད་པ་མ་ཡིན་ཏེ། །ལྟ་བ་སྤྱོད་པ་སེམས་བཟུང་དང་། །རྒྱུ་དང་ལམ་དང་འབྲས་བུ་ཡང་། །དུས་དང་ལོངས་སྤྱོད་རྣལ་འབྱོར་དང་། །བདག་གཞན་དོན་དང་དགོངས་པ་དང་། །ངལ་དུབ་མཐའ་སྤངས་ཚེགས་ཆུང་དང་། །ཚོགས་བསགས་པ་ཡི་ཁྱད་པར་དང་། །ཁྱད་པར་རྣམ་པ་བཅོ་ལྔ་ཡིས། །རིག་འཛིན་ཐེག་པ་ཁྱད་པར་འཕགས། །ཞེས་བསྟན་པས།