གཏེར་གསར་བསམ་པ་ལྷུན་གྲུབ་མའི་རྩ་བསྙེན་མདོར་བསྡུས་པའི་ཟིན་ཐོ།
༈ གཏེར་གསར་བསམ་པ་ལྷུན་གྲུབ་མའི་རྩ་བསྙེན་མདོར་བསྡུས་པའི་ཟིན་ཐོ་བཞུགས། ཨོཾ་སྭསྟི། གཏེར་གསར་བསམ་པ་ལྷུན་གྲུབ་མའི་བསྙེན་པ་ཟླ་བ་ཕྱེད་གཉིས་ཙམ་བཏང་བའི་དབང་དུ་བྱས་ན། ཐོག་མར་སྟབས་འགྲིགས་ན་མར་ངོའི་གཟའ་སྐར་བཟང་པོའི་ཉིན་གནས་ཁང་ཕྱགས་དར་སོགས་བྱ། མདུན་དུ་བྲིས་སྐུ་སོགས་རྟེན་ཡོད་ན་བཤམས། དེའི་མདུན་དུ་གཏོར་མ་སྒྲུབ་གཏོར་རི་རབ་བང་རིམ་བཞི་པ་དང་། རིན་ཆེན་ཟུར་བརྒྱད་སྟེང་དཔལ་གཏོར་པད་འདབ་བཞི་པ་ཅན། དེ་མདུན་མཆོད་གཏོར་རིན་ཆེན་འབར་བ། དམ་ཅན་སྤྱི་གཏོར། འབར་བ་སྤུན་བདུན་གྱི་གཏོར་མ་དམར་གཏོར་གཙོ་འཁོར་བདུན་པ་ཟས་སྣ་དང་དར་སྣ་བརྒྱན་པ། སྨན་རག་ཉེར་སྤྱོད་སོགས་བཤམས། སྔོན་གཏོར་དང་ཚོགས་ཀྱི་ཡོ་བྱད་དང་ཆད་བརྟན་སོགས་ཀྱང་འདུ་བྱ། ཕྱི་ཐུན་གྱི་ཐོག་མར་བརྒྱུད་པའི་གསོལ་འདེབས་ཆོས་སྐུ་ཀུན་བཟང་དང་། སྐྱབས་སེམས་ཚོགས་བསགས་རྗེས་དཀར་གཏོར་དང་། དེ་རྗེས་བགེགས་གཏོར་གཞུང་ལྟར་བཏང་བ་ཕྱིར་དོར་བ་དང་མཉམ་དུ་རྒྱལ་ཆེན་ཐོ་འཛུགས་བྱ། ནང་དུ་ལོག་ནས་སྲུང་འཁོར་སོགས་ལས་བྱང་གཞུང་བསྲང་། བསྙེན་པ་འོས་མཚམས་དང་། དམ་ཅན་སྤྱི་གཏོར། བཀའ་
སྲུང་གསོལ་མཆོད། གཏེར་གཞི། ཚོགས་ནས་བཟུང་བཀྲ་ཤིས་བར་སླར་སྲོད་ཐུན་ལ་བརྒྱུད་འདེབས་ནས་བཟུང་ལས་བྱང་བསྙེན་པ་སོགས་སྔར་ལྟར་དང་། ཛཔ་ཁང་བསྡུ་ཚར་ནས་གཏོང་རག་གི་མཆོད་བསྟོད་མན་སྦྲེལ། དེ་ནས་ཉིན་གསུམ་ལ་སྔོན་འགྲོ་སྐྱབས་སེམས་ཚོགས་བསགས་རྣམས་རིམ་པར་འབད་ན་ལེགས་པས། ཉིན་དང་པོར་ཐུན་བཞི་ཀར་བརྒྱུད་འདེབས་སྔོན་དུ་འགྲོ་བས་སྐྱབས་འགྲོ་བླ་མ་བདེ་གཤེགས་གཙོ་བོར་བྱས་ལ། ཐུན་རེར་སྟོང་ཕྲག་ཕྱེད་གསུམ་རེ་བགྲང་ན་ཐུན་བཞིར་ཁྲི་རེ་འགྲོ། མཇུག་ཏུ་སེམས་བསྐྱེད་མན་ལས་བྱང་ཚར་རེ་དང་བསྙེན་པ་བརྒྱ་སྟོང་སོགས་གང་འགྲུབ། ཉིན་གཉིས་པར་སེམས་བསྐྱེད་དེ་ལྟར། ཉིན་གསུམ་པར་ཚོགས་བསགས་ཐུན་རེར་སྟོང་ཕྲག་སོགས་གང་འགྲུབ། དེ་ནས་དངོས་གཞི་ཞག་བཞི་བཅུ་ཞེ་ལྔའི་དབང་དུ་བྱས་ན་ཐུན་བཞི་ལ་བཛྲ་གུ་རུ་བདུན་སྟོང་ལྔ་བརྒྱ་རེ། བསྡོམས་པས་ཉིན་རེར་ཁྲི་གསུམ། ཐོར་ཐུན་ལ་བསམ་ལྷུན་ཚར་བཅུ། སྔ་ཐུན་ཕྱི་ཐུན་ལ་ཉེར་ལྔ་རེ། སྲོད་ཐུན་ལ་བཅུ་དྲུག་བཅས་ཉིན་རེར་ཚར་དོན་དྲུག ། གསོལ་འདེབས་དུས་གསུམ་སངས་རྒྱས་མཐུན་རེར་བཞི་བཅུ་ཞེ་ལྔ། ཉིན་རེར་བརྒྱ་དང་བརྒྱད་ཅུ་རེ་བཅས་འགྲོ་བར་བྱས་ན། ཟླ་བ་ཕྱེད་གཉིས་ཀྱིས་བཛྲ་གུ་རུ་འབུམ་ཕྲག་བཅུ་གསུམ་དང་ཁྲི་ཕྲག་ལྔ། །
བསམ་པ་ལྷུན་གྲུབ་སུམ་སྟོང་བཞི་བརྒྱ་ཉི་ཤུ། གསོལ་འདེབས་དུས་གསུམ་སངས་རྒྱས་མ་བརྒྱད་སྟོང་ཆིག་བརྒྱ་བཅས་གསོལ་འདེབས་ཁྲི་ཕྲག་ཁ་སྐོང་ལྷག་བཅས་འགྲོ་བ་ཡིན། ཐོད་ཕྲེང་རྩལ་ནི་སོ་སོའི་མཇུག་ཏུ་ཛཔྲ་དབྱངས་བཅས་བརྒྱ་རྩ་སོགས་གང་ནུས་བཟླ། ཐུན་བཞིར་ལས་བྱང་བཏང་ཚུལ། ཐོར་ཐུན། སྔ་ཐུན། སྲོད་ཐུན་གསུམ་ལ་བརྒྱུད་འདེབས། སྐྱབས་སེམས། ཚོགས་བསགས། མཚམས་ལྷ་བསྐྱེད་ཆོག་གི་རྒྱ་གྲོ་ཝ་ཧཱུྃ་ཕཊ་ཡན། དེ་ནས་མཚམས་བགེགས་བསང་སྦྱང་ནས་བསྔོ་བའི་བར་བསྒྱུར་ལ། ཧཱུྃ། བླ་མ་རྣམས་ཀྱི་སོགས་མན་ཆད་གཞུང་ལྟར། བསྙེན་པ་གང་འགྲུབ་ཛཔ་དབྱངས་དང་བཅས་ཐོད་ཕྲེང་རྩལ་བརྒྱ་སྟོང་། དབྱངས་གསལ་རྟེན་སྙིང་ལན་གསུམ། སྟོང་ཚིག་གི་མཆོད་བསྟོད། ཡིག་བརྒྱ་ལན་གསུམ། དེ་ནས་བསམ་པ་ལྷུན་གྲུབ་དང་། དུས་གསུམ་སངས་རྒྱས་ཀྱི་གསོལ་འདེབས་བསགས། དེ་ཡང་བསམ་པ་ལྷུན་གྲུབ་ཚར་ཁ་ཤས་མཚམས། མདུན་བསྐྱེད་སོ་སོའི་ཐུགས་ཀ་ནས༔ ཞེས་སོགས་དམིགས་པའང་སྦྱར། མཐར་ཛཔྲ་ཁང་བསྡུས་རྗེས། ཡིག་བརྒྱ༈ རྗེས་ཆོག་གི་མཆོད་བསྟོད་ནོངས་བཤགས། བྲིས་སྐུ་སོགས་རྟེན་ཡོད་ན། ཨོ། འདིར་ནི་རྟེན་དང་སོགས་བརྟན་བཞུགས། རྫོགས་རིམ་བསྡུ་ལྡང་ནས་བཀྲ་ཤིས་བར། ཕྱི་ཐུན་ཐོག་མར་
བརྒྱུད་འདེབས། སྐྱབས་སེམས་ཚོགས་བསགས། མཚམས་ལྷ་བསྐྱེད་པ་ནས་བགེགས་གཏོར་བསང་སྦྱང་སོགས་བཅས་གཞུང་ལྟར་བཏང་། ཛཔྲ་ཁང་བསྡུ་བའི་བར་ཐུན་གཞན་དང་འདྲ། །དེ་ནས་དམ་ཅན་སྤྱི་གཏོར། བཀའ་སྲུང་གཏེར་གཞི། ཚོགས་ལྷག་མའི་བར། ལྷག་མ་ཕྱིར་མི་བཏང་བར་བཙོན་བཟུང་བྱ། བསྐུལ་བ་དང་། དམ་ཅན་སྤྱི་གཏོར་གཏོར་འབུལ། ཆད་བརྟན་རྒྱུན་དུ་མ་བཏང་ཡང་ཆོག །བཏང་ན་གཞུང་ལྟར་གཏོར་གཞོང་སྦུབས་ཆོག་བར། དེ་ནས་རྒྱུན་གྱི་དངོས་གྲུབ་བླང་བ་འདོན་མི་འདོན་གང་ལྟར་བྱས་ཀྱང་རུང་། ཚེས་བཅུ་སོགས་ཀྱི་སྐབས་བཏང་ན་ལེགས། །གང་ལྟར་ཡང་གཏོང་རག་གི་མཆོད་བསྟོད་ནོངས་བཤགས་མན་གཞུང་ལྟར་རོ། ༈ །གོང་དུ་ཐུན་རེར་སྔགས་ཀྱི་གྲངས་དང་། གསོལ་འདེབས་སོགས་ཀྱི་གྲངས་སོགས་བཤད་པ་སྤྱིར་བཏང་ཙམ་ལས། དམིགས་བསལ་རང་རང་གིས་གང་ཚར་ལས་མཐའ་གཅིག་ཏུ་མ་ངེས་ཀྱང་། བཛྲ་གུ་རུ་འབྲུ་འབུམ་ཁ་སྐོང་བཅས་དང་། གསོལ་འདེབས་རྒྱས་བསྡུས་ཁྲི་ཕྲག་ནི་ངེས་པར་འགྲོ་དགོས་པས་དེ་ལྟར་ངེས་པར་བྱས་ནས་ཞག་གྲངས་སོགས་གང་དགོས་རིག་པས་དཔྱད་དོ། ༈ །སང་གྲོལ་རྒྱུའི་དོ་ནུབ་མཆོད་གཏོར་སོགས་ཁ་གསོ་དང་གསར་པ་བཤམ། ནངས་པར་སྔ་བར་ལངས་ལ་བགེགས་
གཏོར་བཏང་བ་བཅས་ལས་བྱང་གི་གཞུང་ནས་བསམ་པ་ལྷུན་གྲུབ་དང་། དུས་གསུམ་སངས་རྒྱས་ཡན་ཆད་རྒྱུན་ལྟར། དེ་ནས། གང་འདོད་དོན་ཀུན་ལྷུན་གྲུབ་གྱུར༔ བར་གཞུང་ལྟར། དེ་མཚམས་དམ་ཅན་སྤྱི་གཏོར། བཀའ་སྲུང་གཏེར་གཞི་ཚོགས་མཆོད་ཚར་གཅིག་བཅས་ཀྱི་མཐར། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧཱུྃ་ཨཱ༔ ཞེས་པའི་སྔགས་བརྒྱ་སྟོང་སོགས་གང་འགྲུབ་ཛཔྲ་དབྱངས་དང་བཅས་བཟླས་མཐར། ཧཱུྃ་ཧཱུྃ༔ སྐུ་གསུམ་དབྱེར་མེད་སོགས་ཀྱིས་དངོས་གྲུབ་བླངས་སྐབས་སྒྲུབ་གཏོར་ལྷར་གསལ་བ་གནས་གསུམ་དུ་བཞག །མཐར། ཨོཾ་སརྦ་མ་ཧཱ་གུ་རུ་མཎྜལ། སོགས་ཛཔ་ཁང་བསྡུ་བས་གཏོར་མའི་ལྷ་རང་ལ་བསྟིམ། ཡི་གེ་བརྒྱ་པས་བརྟན་པར་བྱ། གཏོར་རྫས་དངོས་གྲུབ་ཀྱི་རང་བཞིན་དུ་བསམས་ལ་ཅུང་ཟད་མྱོང་ནས་གཏོར་མ་རང་མལ་དུ་བཀོད། དེ་ནས་སླར་ཡང་གཏོང་རག་གི་སླད་དུ་ཚོགས་བརྒྱ་སོགས་གང་འགྲུབ་དང་། ཚོགས་རྗེས་མར་ལྷག་མ་གསར་རྙིང་ཐམས་ཅད་ཀྱང་བཏང་། བསྐུལ་བ། གཏོར་འབུལ། ཆད་བརྟན་། རྟ་བྲོ། གཏོང་རག་གི་མཆོད་བསྟོད་སོགས་བཀྲ་ཤིས་པར་མཐའ་རྒྱས་སུ་བྱ། ༈ །དེ་ཉིན་ཕྱི་དྲོའམ། སང་ལྟ་བུར་ཁ་སྐོང་གི་སྦྱིན་སྲེག་བྱེད་ན། གཏེར་གཞུང་ལྟར་རོ། །དཔེ་མ་འབྱོར་
ན། རྡོར་སེམས་སྦྱིན་སྲེག་གཞིར་བཞག་ལ། དེ་ཡང་བདག་བསྐྱེད་བརྒྱུད་འདེབས་སྐྱབས་སེམས་ནས་བཟུང་ཛཔ་ཁང་པ་བསྡུ་བའི་བར་བསམ་པ་ལྷུན་གྲུབ་མ་རང་གི་ལས་བྱང་ལྟར་དང་། །སྦྱིན་སྲེག་དངོས་གཞིའི་ལྷ་བསྐྱེད་སྐབས། ཨོཾ་མ་ཧཱ་ཤུ་ནྱ་ཏཱ་སོགས། སྟོང་པའི་ངང་ལས་ཐབ་ཀྱི་དབུས་ཉིད་དུ༔ སྣོད་བཅུད་དྭངས་མ་འབྱུང་ལྔ་རིམ་བརྩེགས་སྟེང་༔ མི་ཕྱེད་རྡོ་རྗེ་སྲུང་བའི་གུར་ཆེན་དབུས༔ བྷཾ་ཡིག་ཡོངས་གྱུར་རིན་ཆེན་གཞལ་ཡས་ཁང་༔ སོགས་ནས། ས་བོན་ཧཱིཝཡིག་ཡོངས་གྱུར་སྐད་ཅིག་གིས༔ ཞེས་བསྒྱུར་བ་ཙམ་མ་གཏོགས་བསྟོད་པའི་བར་ལས་བྱང་སོར་བཞག་དང་། །གི དཀྱིལ་འཁོར་གྱི་ལྷ་ཅུང་ཟད་འཛུམ་པའི་སོགས་སྦྱིན་སྲེག་གི་གཞུང་ལྟར་ལ། སྔགས་བཛྲ་སཏཱའི་ཚབ་ཏུ་བཛྲ་གུ་རུ་སྦྱར། རྫས་གཞན་བརྒྱ་རྩ་སོགས་གང་ནུས་ཕུལ་མཐར། གྲངས་གསོག་སྐབས་རྫས་ཏིལ་དང་། སྔགས་བཛྲ་གུ་རུ་ཁོ་ནས་ཕུལ། བརྒྱ་རྩ་རེའི་མཚམས། གསང་སྔགས་ཀྱི་ལྷག་ཆད་ལ་སོགས་པའི་ཉེས་པ་ཐམས་ཅད་ཤིནྟཾ་ཀུ་རུ་སྭཱ་ཧཱ། ཞེས་སྦྱར། དེ་ལྟ་བུའི་རིམ་པས་སྔགས་ཀྱི་བཅུ་ཆའམ། ཁྲི་ཕྲག་སོགས་གང་འགྲུབ་བྱ། གཏོང་རག་གི་མཆོད་བསྟོད་སྐབས་རང་གཞུང་གི་མཆོད་བསྟོད་སྦྱར་བ་ཙམ་མ་གཏོགས་འདྲ། མཇུག་ཏུ་ལས་བྱང་ལྟར་བསྔོ་སྨོན་ཤིས་བརྗོད་བྱའོ། ༈ །དེ་
ཡང་དངོས་གྲུབ་ལེན་ཆོག་ཡར་ངོའི་ཚེས་བཅུ་ལྟ་བུའི་སྐབས་དང་འབྱོར་ན་ལེགས་ཤིང་། གང་ལྟར་ཡང་ཡར་ངོའི་སྐབས་སུ་མཚམས་གྲོལ་བ་ཕྱག་ལེན་ཡིན་པས་སྦྱིན་སྲེག་གྲུབ་པའི་ཉིན་ནམ། ཕྱི་ཉིན་ལྟ་བུར་རྒྱལ་ཆེན་ལ་གཏོང་རག་བཏང་ཞིང་ཐོ་འགྲོལ་བ་དང་། གནས་སྲུང་བའི་སླད་ཞག་གཉིས་གསུམ་བར་ཐག་རིང་དུ་མི་འགྲོ་ཞིང་། དེ་ནས་རིམ་པར་གྲོལ་བ་སོགས་སྤྱི་ལྟར་ཤེས་པར་བྱའོ། །མངྒ་ལཾ།། །།