ཀློང་ཆེན་སྙིང་གི་ཐིག་ལེ་ལསཿ ཉམས་ཆག་སྐོང་བའི་མན་ངག
འུྃཿ ཀློང་ཆེན་སྙིང་གི་ཐིག་ལེ་ལསཿ ཉམས་ཆག་སྐོང་བའི་མན་ངག་བཞུགས། །རང་བྱུང་རིག་པའི་ལྷ་ལ་འདུདཿ བསྙེན་སྒྲུབ་ཟབ་མོར་འཇུག་པའི་ཚེཿ དེ་ཡི་དབང་ཐོབ་བླ་མ་དངཿ དམ་ཚིག་ཉམས་ཆག་ཡོད་སྲིད་ནཿ སྒྲུབ་འབྲས་འབྱིན་པ་བུལ་བས་ནཿ གནད་ཀྱི་མན་ངག་འདི་ལྟར་བྱཿ དབང་ལུང་ནོད་པའི་བླ་མ་དེཿ སངས་རྒྱས་ཐམས་ཅད་འདུས་པའི་སྐུརཿ བསམས་ཏེ་རང་གི་སྤྱི་བོར་བསྐྱེདཿ སྟོབས་བཞིའི་གནད་དང་ལྡན་པའི་ངངཿ གླང་པོ་རབ་འབོག་རྒྱུད་ཀྱི་དོནཿ ཡེ་ཤེས་སྐུ་མཆོག་ཚར་གསུམ་དངཿ ཡི་གེ་བརྒྱ་པ་ཅི་ནུས་མཐརཿ དབྱངས་གསལ་རྟེན་འབྲེལ་སྙིང་པོ་བརྗོདཿ དེ་རྗེས་སྤྱི་བོའི་བླ་མ་དེཿ བདག་ཉིད་ཡི་དམ་གང་བསྙེན་གྱིཿ སྐུ་རུ་ལམ་གྱིས་གནས་བསྒྱུར་ལཿ དབང་བཞི་བླང་ཞིང་རྩ་སྔགས་བཟླཿ ཡི་དམ་འོད་ཞུ་རང་ལ་བསྟིམཿ རང་ཡང་སྣང་སྟོང་བརྗོད་བྲལ་ངངཿ མི་རྟོག་རྗེན་པའི་ངང་དུ་བཞགཿ ཕྱིན་ཆད་ཉམས་ཆག་འཁོན་འཛིན་དེཿ རྒྱུད་ལ་ནམ་ཡང་གནས་མི་བྱཿ གནད་ཀྱི་ནང་ནས་མན་ངག་སྟེ། རིགས་འདུས་སྐུ་གསུམ་བླ་མ་ཡིཿ དགོངས་བརྒྱུད་བྱིན་རླབས་ཚུལ་དུ་བབསཿ སྙིང་ལ་ཕུར་ཅིག་ས་མ་ཡཿ ཿ