གཉིས་པ་རང་ལུགས་བཞག་པ།
གཉིས་པ་རང་ལུགས་བཞག་པ་ལ།
རྫས་ཆོས་ཀྱི་དོན་ཡོད་དེ། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རྫས་ཆོས་དང་མི་འགལ་བ་ཡིན་པའི་གཞི་མཐུན་པ་དེ་ཡིན་པའི་ཕྱིར། །རྫས་ཆོས་བཞག་ཏུ་ཡོད་དེ། ཤེས་བྱ། དངོས་པོ། བུམ་པ། ཀ་བ་རྣམས་ཡིན་ནོ། །རང་ཡིན་ལྡོག་ཆོས་ཀྱི་དོན་ཡོད་དེ། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་ཡིན། ཁྱོད་ཀྱི་ལྡོག་པ་རང་ཉིད་ལྡོག་ཆོས་ཀྱི་ལྡོག་པ་དང་མི་འགལ་བ་དེ་ཡིན་པའི་ཕྱིར། རང་ཡིན་ལྡོག་ཆོས་བཞག་ཏུ་ཡོད་དེ། དངོས་མེད། བདག་ཏུ་མ་གྲུབ་པ་སོགས་སོ། །རང་མ་ཡིན་གྱི་ལྡོག་ཆོས་ཀྱི་དོན་ཡོད་དེ། ཁྱོད་གཞི་གྲུབ། ཁྱོད་ཁྱོད་རང་མ་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རང་མ་ཡིན་གྱི་ལྡོག་པ་དང་མི་འགལ་བ་དེ་ཡིན་པའི་ཕྱིར། རང་མ་ཡིན་གྱི་ལྡོག་ཆོས་བཞག་ཏུ་ཡོད་དེ། ཀ་བུམ་གཉིས། ཡིན་པ་མི་སྲིད་པའི་ཤེས་བྱ། བུམ་པའི་ལྡོག་པ་སོགས་ཡིན་ནོ། །ལྡོག་ཆོས་ཕུང་སུམ་ཙམ་པོ་བའི་དོན་ཡོད་དེ། ཁྱོད་གཞི་གྲུབ། ཁྱོད་ཁྱོད་རང་མ་ཡིན། ཁྱོད་མ་ཡིན་པ་ཁྱོད་ཡིན། ཁྱོད་ཀྱི་ལྡོག་པ་ལྡོག་ཆོས་ཕུང་སུམ་ཙམ་པོ་བ་དང་མི་འགལ་བ་དེ་ཡིན་པའི་ཕྱིར། ལྡོག་ཆོས་ཕུང་སུམ་ཙམ་པོ་བ་བཞག་ཏུ་ཡོད་དེ། དངོས་པོའི་སྤྱི། ཀ་བའི་སྤྱི་སོགས་སོ། །དེ་བཞིན་དུ་སོ་སོའི་རྗེས་མཐུན་རྣམས་ཀྱི་དོན་དང་གཞི་ལྡོག་ཤེས་པར་བྱའོ།། མཚན་ཉིད་དང་རྫས་ཆོས་ལ་མུ་བཞི། དེ་བཞིན་དུ་གཞན་བདུན་ལ་མུ་བཞི་ཡོད་མེད་དང། དེ་ལྟར་མཚོན་བྱ་དང་དངོས་པོ་སོགས་དང་རྫས་ལྡོག་བརྒྱད་པོ་རེ་རེ་ལ་མུ་བཞི་ཡོད་མེད་དཔྱད་པར་བྱའོ། ། གཞན་ཡང་གཏན་ཚིགས་རིགས་པའི་དོན་བསྡུས་ལས། རྫས་ཆོས་དང་ལྡོག་ཆོས་ལ་མཚན་ཉིད་རིམ་པ་བཞིན། གཞི་གྲུབ། ཁྱོད་ཁྱོད་རང་ཡིན། ཁྱོད་མིན་ཁྱོད་མ་ཡིན་པ་དང༌། གཞི་གྲུབ། ཁྱོད་ཁྱོད་མ་ཡིན་པའམ་ཁྱོད་མ་ཡིན་ཁྱོད་ཡིན་དུ་གྲུབ་པ་གང་རུང་ཡིན་པའོ། །དབྱེ་ན་དང་པོ་ལ་དངོས་ཀྱི་འགལ་ཟླ་སྲིད་པ་དང་མི་སྲིད་པའི་རྫས་ཆོས་གཉིས་སོ། །གཉིས་པ་ལ། རང་ཉིད་ཡིན་པ་དང་མིན་པའི་ལྡོག་ཆོས་གཉིས་སོ། །ཞེས་གསུངས་སོ། །