གསུམ་པ་ཧ་ཅང་ཐལ་བ་སྤང་བ།

གསུམ་པ་ཧ་ཅང་ཐལ་བ་སྤང་བ་ནི།

ཁ་ཅིག་ན་རེ་སྡོམ་པ་གསུམ་ལྡན་གྱི་དགེ་སློང་གཅིག་གིས་མི་གཅིག་བསད་པ་ལ་ཡང་ཉེས་པ་གསུམ་འབྱུང་སྟེ། སྡོམ་པ་ཐ་དད་གསུམ་དང་འགལ་བར་བྱས་པའི་ཕྱིར་རོ། །དེ་ཡང་ཕམ་པ་དང༌། ཕམ་པ་དང་འདྲ་བའི་ཉེས་བྱས་དང༌། བསོད་ནམས་མ་ཡིན་པ་དང་གསུམ་འབྱུང་ཞེས་ཟེར་རོ། །དེ་ནི་མི་རིགས་ཏེ་ལུང་རྣམ་འབྱེད་ཀྱི་འགྲེལ་བ་ལས་གསོད་བྱེད་གང་ཟག་གཅིག་གིས་སྲོག་ཆགས་གཅིག་བསད་ན་སྲོག་ཆགས་གཅིག་བསད་པ་ལ་ལས་ཀྱི་དངོས་གཞི་གཉིས་མི་སྲིད་པའི་ཕྱིར་རོ། །ཞེས་གསུངས་པས་གནོད་དེ། ཉེས་པ་གསུམ་བཅས་པ་ལ་དགོས་པ་མེད་པའི་ཕྱིར་རོ། །དགེ་སློང་གི་སྡོམ་པ་ཐོབ་པ་ན་སྡོམ་པ་སྔ་མ་གཉིས་ཀྱི་རྒྱུན་བག་ལ་ཞ་བའི་ཕྱིར་སྡོམ་པ་སྔ་མ་གཉིས་ཀྱི་ཆ་ནས་ཉེས་པ་ལོགས་ཤིག་ཏུ་མི་འབྱུང་སྟེ། དཔེར་ན་ཉི་མ་ཤར་བ་ན་ཟླ་བ་དང་སྐར་མའི་འོད་བག་ལ་ཞ་བའི་ཕྱིར། འོད་དེ་གཉིས་ཀྱི་ཆ་ནས་གྲིབ་མ་ལོགས་ཤིག་ཏུ་མི་འབྱུང་བ་བཞིན་ནོ། །བྱེ་བྲག་སྨྲ་བའི་ལུགས་ལ་དགེ་སློབ་མའི་རྒྱུད་ཀྱི་དགེ་ཚུལ་དང་དགེ་སློབ་མའི་སྡོམ་པ་གཉིས་མཚན་འགྱུར་གྱི་སྐབས་སུ་གཅིག་བཏང་ན་གཅིག་ཤོས་བཏང་བས་ཁྱབ་པ་མེད་པས་ངོ་བོ་གཅིག་མིན་ན་དགེ་སློབ་མའི་སྡོམ་པ་རྩ་བཞི་སྤོང་བའི་སྡོམ་པ་མ་ཡིན་པར་འགྱུར་རམ་ཅི། འགྱུར་ན་སྡོམ་པ་མ་ཡིན་པར་འགྱུར་བ་ཡོད་མེད་སོགས་དང༌། ངོ་བོ་གཅིག་ཡིན་ན་གཅིག་བཏང་ན་གཅིག་ཤོས་བཏང་དགོས་པར་འགྱུར་དགོས་ན། ལམ་དེའི་སྟེང་གི་ཟག་བཅས་ཡིན་པའི་ཆ་སོགས་བཏང་ན་ཤེས་པ་ཡིན་པའི་ཆ་སོགས་བཏང་དགོས་པ་ཡིན་མིན་དང༌། མཚོ་ཊཱིཀ་༢༠༦ལས། སྔར་དགེ་ཚུལ་མས་ཐོབ་ཟིན་པ་དེའི་སྡོམ་པའི་རྒྱུན་རྩ་བ་བཞིའི་སྡོམ་པ་དེ་ཉིད་ལ་དགེ་སློབ་མའི་སྡོམ་པ་ཞེས་བྱ་སྟེ། མཛོད་འགྲེལ་ལས། དགེ་སློབ་མ་དང་དགེ་ཚུལ་མའི་སྡོམ་པ་རྫས་གཞན་མ་ཡིན་ནོ། །ཞེས་བཤད་པས་གྲུབ་ཅིང༌། འོད་ལྡན་ལས་ཀྱང༌། དགེ་ཚུལ་ལ་སོགས་པ་དག་གི་ནི་སྤོང་བ་བཞིའི་མཚན་ཉིད་ཡིན་ཞེས་དགོངས་སོ། །ཞེས་དང༌། མཛོད་ལས། རྫས་སུ་རྣམ་པ་བཞི་ཡིན་ཏེ། །ཞེས་དང༌། མཛོད་རང་འགྲེལ་ལས། དགེ་སློབ་མ་མཚན་གྱུར་ན་དགེ་ཚུལ་ཞེས་བྱའོ། །ཞེས་གསུངས་པ་དང༌། སྡིག་ལྟུང་ངོ་བོ་གཅིག་པ་ཡོད་ཀྱང་གཅིག་ཤོས་དག་ན་གཅིག་ཤོས་དག་མི་དགོས་པར་མཚོ་ཊཱིཀ་ལས་ཕ་མའི་རྣམ་འབྱེད་བསྟན་པའི་སྤྱི་དོན་གྱི་སྐབས་སུ་གསུངས་པ་སོགས་ཀྱིས་དཔྱད་པར་བྱའོ། །སོ་ཐར་གྱི་སྡོམ་པ་ལྡན་ཚུལ་རྩ་བར། སོ་སོར་ཐར་གནས་ཇི་སྲིད་དུ། །མ་བཏང་བར་དག་ད་ལྟར་གྱི། །རྣམ་རིག་མིན་ལྡན་སྐད་ཅིག་མ། །དང་པོ་ཕྱིན་ཆད་འདས་པ་དང༌། །སྡོམ་མིན་གནས་པའང་དེ་དང་འདྲ། །ཞེས་སོ་ཐར་གྱི་སྡོམ་པ་འདས་པ་དང༌། ད་ལྟ་བའི་ལྡན་ཚུལ་ལས་མ་འོངས་པའི་ལྡན་ཚུལ་མ་གསུངས་པ་ལ་སོ་ཐར་གྱི་སྡོམ་པ་མ་འོངས་པའི་ཐོབ་པ་མེད་ན་སོ་ཐར་གྱི་སྡོམ་པ་མ་འོངས་པ་མེད་པར་འགྱུར་བ་ལ་དེ་མི་རིགས་ཏེ། མ་འོངས་པའི་དགེ་སློང་གི་རྒྱུད་ན་སོ་ཐར་གྱི་སྡོམ་པ་མ་འོངས་པ་ཡོད། བྱ་བ་བྱེད་འགྱུར་གྱི་སོ་ཐར་གྱི་སྡོམ་པ་ཡོད་པའི་ཕྱིར་ཟེར་བ་དང༌། གོང་དུ་བཀོད་པའི་རྩ་བར། དང་པོ་ཕྱིན་ཆད་འདས་པ་དང༌། །ཞེས་གསུངས་པ་ལ། སོ་ཐར་གྱི་སྡོམ་པ་འདས་པ་ཡོད་པ་མི་རིགས་ཏེ། སོ་ཐར་གྱི་སྡོམ་པ་འདོད་པའི་གཟུགས་གང་ཞིག དེ་ལ་སྔར་སྐྱེས་མེད་པའི་ཕྱིར། རྟགས་དང་པོ་སྔར་བསྒྲུབས་ཟིན། ཕྱི་མ་གྲུབ་སྟེ། རྩ་བར། འདོད་པ་ན། །གཟུགས་ཀྱི་སྔར་ནི་སྐྱེ་བ་མེད། །ཅེས་གསུངས་པའི་ཕྱིར་ཟེར་བ་དང༌། སོ་ཐར་གྱི་སྡོམ་པ་འདས་པ་འཇོག་ཚུལ་མེད་པར་ཐལ། སོ་ཐར་གྱི་སྡོམ་པ་ཐོབ་པའི་སྐད་ཅིག་གཉིས་པ་བའི་རྒྱུད་ལ་ལྡན་པའི་སོ་ཐར་གྱི་སྡོམ་པ་འདས་པ་དེ་སོ་ཐར་གྱི་སྡོམ་པ་སྐད་ཅིག་དང་པོའི་སྡོམ་པ་མི་རིགས་པ་གང་ཞིག དེ་ལས་གཞན་འཇོག་རྒྱུ་མེད་པའི་ཕྱིར་ཟེར་བ་དང༌། ཡང་སོ་ཐར་གྱི་སྡོམ་པ་མ་འོངས་པའི་ཐོབ་པ་མེད་པར་ཐལ། བསམ་གཏན་དང་ཟག་མེད་ཀྱི་སྡོམ་པ་ལ་མ་འོངས་པའི་ཐོབ་པ་ཡོད་པར་གསུངས་ཀྱང་སོ་ཐར་གྱི་སྡོམ་པ་ལ་དེ་ཡོད་པར་མཛོད་ལས་མ་གསུངས་པའི་རྒྱུ་མཚན་ཡོད་པའི་ཕྱིར། འདོད་མི་ནུས་ཏེ། མ་འོངས་པའི་སོ་ཐར་གྱི་སྡོམ་པ་ཐམས་ཅད་དང་པོ་མཁན་སློབ་ཀྱི་མདུན་ནས་ཐོབ་པ་ཡིན་པའི་ཕྱིར་ཟེར་བ་སོགས་མདོར་ན་སོ་ཐར་གྱི་སྡོམ་པ་འདས་མ་འོངས་ད་ལྟ་བ་གསུམ་དང་པོ་མཁན་སློབ་ཀྱི་མདུན་ནས་སྡོམ་པ་གསར་དུ་བླང་དུས་སུ་ཐོབ་པ་ཡིན་ཞེས་ཟེར་ན་དཔྱད་པར་བྱའོ། །