བཞི་པ་འོད་འཕྲོ་བ་བཤད་པ།
བཞི་པ་ས་བཞི་པ་འོད་འཕྲོ་བ་བཤད་པ་ལ། ས་འདིར་བརྩོན་འགྲུས་ལྷག་པར་བསྟན་པ། སའི་ངེས་པའི་ཚིག་བསྟན་པ། སྤངས་པའི་ཁྱད་པར་བསྟན་པ་དང་གསུམ། དང་པོ་ནི། རྩ་བར། ཡོན་ཏན་མ་ལུས་བརྩོན་འགྲུས་རྗེས་འགྲོ་ཞིང༌། །བསོད་ནམས་བློ་གྲོས་ཚོགས་ནི་གཉིས་ཀྱི་རྒྱུ། །བརྩོན་འགྲུས་གང་དུ་འབར་བར་འགྱུར་བ་ཡི། །ས་དེ་བཞི་པ་འོད་ནི་འཕྲོ་བའོ། །ཞེས་ས་བཞི་པ་འདིར་བརྩོན་འགྲུས་ཀྱི་ཕར་ཕྱིན་ལྷག་པ་ཐོབ་པ་ནི། བརྩོན་འགྲུས་ནི་སྦྱིན་སོགས་ཡོན་ཏན་གསོག་པ་ལ་སྤྲོ་བའི་བློ་དང་ལྡན་པ་ལ་མ་ཐོབ་པའི་ཡོན་ཏན་ཐོབ་པ་དང་ཐོབ་པའི་ཡོ༷ན་ཏ༷ན་གོང་ནས་གོང་དུ་འཕེལ་བས་ན་ལམ་དང་འབྲས་བུའི་ཡོན་ཏན་མ༷་ལུ༷ས་པ་ནི་བརྩོ༷ན་འགྲུ༷ས་ཀྱི་རྗེ༷ས་སུ་འགྲོ༷་བ་ཡིན་ཞི༷ང༌། དེས་ན་བརྩོན་འགྲུས་དེ་བསོ༷ད་ན༷མས་ཀྱི་ཚོགས་དང་བློ༷་གྲོ༷ས་སམ་ཡེ་ཤེས་ཀྱི་ཚོ༷གས་ནི༷་གཉི༷ས་ཀྱི༷་རྒྱུ༷་ཡིན་པར་རང་འགྲེལ་ལས། ཚོགས་གཉིས་ཀྱི་རྒྱུ་ཉིད་དུ་ནི་གོང་དུ་བཤད་ཟིན་ཏོ། །ཞེས་སོ། །དེ་འདྲ་བའི་བརྩོན་འགྲུས་ཀྱང་ས་བཞི་པར་ས་གསུམ་པའི་སྐབས་སུ་ས་དང་པོ་གཉིས་ལས་ཆེས་ཕུལ་དུ་བྱུང་བའི་ལྷག་པའི་ཏིང་ངེ་འཛིན་ཐོབ་པ་དེ་ལས་སྐྱེས་པའི་ལེ་ལོའི་ཆ་ཕྲ་མོ་ཡང་སེལ་ནུས་པའི་ཤིན་ཏུ་སྦྱངས་པ་ཁྱད་པར་ཅན་གྱིས་ཡིད་མི་རིགས་པའི་བྱ་བ་ལ་སྤྲོ་བའི་ལེ་ལོ་ལ་སོགས་པ་ལེ་ལོའི་རིགས་ཐམས་ཅད་ཆེས་ཆེར་བཅོམ་པའི་ནུས་པ་ཁྱད་པར་ཅན་དང་ལྡན་པའི་བརྩོ༷ན་འགྲུ༷ས་ལྷག་པར་ཡང་ཡང་འབར་བ་ནི་ས་བཞི་པ་ག༷ང་དུ༷་ལྷག་པར་འབ༷ར་བ་འཆང་བ༷ར་འགྱུ༷ར་བ༷་ཡི༷་ས༷་དེ༷་ནི་བཞི༷་པ༷་འོ༷ད་ནི༷་འཕྲོ༷་བཞེས་བྱ་བ༷འོ༷། །
གཉིས་པ་སའི་ངེས་ཚིག་བསྟན་པ་ནི།
རྩ་བར། དེར་ནི་བདེ་གཤེགས་སྲས་ལ་རྫོགས་པ་ཡི། །བྱང་ཆུབ་ཕྱོགས་ལྷག་བསྒོམས་པ་ལས་སྐྱེས་པའི། །སྣང་བ་ཟངས་ཀྱི་འོད་བས་ལྷག་འབྱུང་ཞེས། །ཞེས་ཅིའི་ཕྱིར་ས་འདི་ལ་འོད་འཕྲོ་བ་ཞེས་བརྗོད་ཅེ་ན། དེ་ལྟར་བརྗོད་པའི་རྒྱུ་མཚན། ས་བཞི་པ་དེ༷ར་ནི༷་བདེ༷་བར་གཤེ༷གས་པའི་སྲ༷ས་པོ་དེ་ལ༷་རྫོ༷གས་པ༷་ཡི༷་སྟེ་རྫོགས་པའི་བྱ༷ང་ཆུ༷བ་ཀྱི་ཕྱོ༷གས་ཀྱི་ཆོས་སོ་བདུན་པོ་སྔར་ས་གསུམ་པ་ལས་ཀྱང་ལྷ༷ག་པར་བསྒོ༷མ་པ༷་ལ༷ས་སྐྱེ༷ས་པ༷འི་ཡེ་ཤེས་ཀྱི་སྣ༷ང་བ༷། ས་གསུམ་པར་ཟ༷ངས་ཀྱི༷་འོ༷ད་དང་འདྲ་བ་བྱུང་བ་དེ་བ༷ས་ལྷ༷ག་པའི་འོད་ཀྱི་སྣང་བ་རྗེས་ཐོབ་ཏུ་འབྱུ༷ང་བ་དེའི་ཕྱིར་ཡང་དག་པའི་ཡེ་ཤེས་ཀྱི་མེའི་འོད་ལྷག་པ་འབྱུང་བའི་རྒྱུ་མཚན་གྱིས་ས་བཞི་པ་དེ་ལ་འོད་འཕྲོ་བ་ཞེས་བརྗོད་པའོ། །རྒྱན་ལས། འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །
གཉིས་པོ་སྲེག་པས་འོད་འཕྲོ་ཅན། །ཞེས་དང༌། རིན་ཕྲེང་ལས། ཡེ་ཤེས་ཞི་བའི་འོད་འབྱུང་ཕྱིར། །ཞེས་སོ། །སྤྱིར་ན་བསླབ་པ་གསུམ་པོ་སྐྱེས་པ་ལའང་ཡོད་ཀྱང་ལྷག་པ་ཁྱད་པར་ཅན་གྱི་དབང་དུ་བྱས་ན་ས་དང་པོར་ཚུལ་ཁྲིམས་ཀྱི་ཕར་ཕྱིན་ལྷག་པ་མ་ཐོབ་ལ། སེར་སྣ་སྡོམ་པའི་ཚུལ་ཁྲིམས་ཀྱི་རྒྱུ་སྦྱིན་པའི་ཕར་ཕྱིན་དེ་ཡིན་ཞིང་དེ་ལྷག་པ་ཐོབ་པས་ས་དང་པོ་ནི་བསླབ་པའི་རྟེན་དང༌། བསླབ་པའི་ངོ་བོ་ལ་ས་གཉིས་པར་ལྷག་པ་ཚུལ་ཁྲིམས་ཀྱི་བསླབ་པ་ལྷག་པ་དང༌། ས་གསུམ་པར་བསམ་གཟུགས་དང་མངོན་ཤེས་སོགས་ཀྱི་ཏིང་ངེ་འཛིན་ལ་འཇུག་ལྡང་ཤིན་ཏུ་ལས་སུ་རུང་བ་ལ་དབང་ཐོབ་པས་ཏིང་ངེ་འཛིན་གྱི་བསླབ་པ་ཁྱད་པར་ཅན་དང༌། ས་འདིར་བྱང་ཆོས་རགས་པ་དང་ཕྲ་བ་མ་ལུས་པའི་ངོ་བོ་དང་མཚན་ཉིད་དབྱེ་བ་སོགས་ལ་ཆེས་མཁས་པའི་ཤེས་རབ་ཀྱི་བསླབ་པ་ཁྱད་པར་ཅན་ཐོབ་སྟེ་འདི་དང་ས་དྲུག་པའི་བར་ལ་ལྷག་པའི་ཤེས་རབ་ཀྱི་བསླབ་པ་ཁྱད་པར་ཅན་འཇོག་པ་ཡིན་ནོ། །རིན་ཆེན་ཕྲེང་བ་ལས། ཡང་དག་ཡེ་ཤེསའོད་འབྱུང་ཕྱིར། །ཞེས་སོ། །
གསུམ་པ་སྤངས་པའི་ཁྱད་པར་བསྟན་པ་ལ།
རྩ་བར། རང་དུ་ལྟ་བ་དང་འབྲེལ་ཡོངས་སུ་ཟད། །ཅེས་ས་བཞི་པར་སྤང་པ་ཁྱད་པར་ཅན་དང་ལྡན་ཏེ། ས་བཞི་པ་རང་གི་ངོས་སྐལ་གྱི་ཕྲ་བའི་འཇིག་ལྟས་ར༷ང་དུ༷་ལྟ༷་བ༷་གྱུར་བའམ་བདག་དང་བདག་གིར་ལྟ་བའི་ཤེས་རབ་ཉོན་མོངས་ཅན་གྱི་ལྟ་བ་ད༷ང༌། འབྲེ༷ལ་བ་སྟེ་དེའི་རྒྱུ་ལས་བྱུང་བའི་སེམས་ཅན་དང་གང་ཟག་སོགས་རང་རྐྱ་བའི་རྗས་ཡོད་དུ་འཛིན་པ་དང༌། ཕུང་ཁམས་སྐྱེ་མཆེད་ལ་བདེན་པར་ཞེན་པའི་ཆོས་ཀྱི་བདག་འཛིན་རྣམས་ཡོ༷ངས་སུ༷་ཟ༷ད་པ་ཡིན་ཏེ། རང་འགྲེལ་ལས། ས་འདིར་དེའི་རང་དུ་ལྟ་བ་ཟད་པར་ཡང་འགྱུར་ཏེ། ཇི་སྐད་དུ། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའི་ས་འོད་འཕྲོ་བ་ཅན་འདི་ལ་གནས་པའི་བྱང་ཆུབ་སེམས་དཔའ་དེ་འཇིག་ཚོགས་ལ་ལྟ་བ་སྔོན་དུ་འགྲོ་བའི་བདག་དང༌། སེམས་ཅན་དང༌། སྲོག་དང༌། ཞེས་པ་ནས། བདག་གིར་འཛིན་པ་རྣམས་དང༌། ནོར་དུ་འཛིན་པ་རྣམས་དང༌། འཇིག་རྟེན་གྱི་གནས་རྣམས་གང་ཡིན་པ་དེ་དག་ཐམས་ཅད་དངདེ་བྲལ་བ་ཡིན་ནོ་ཞེས་གསུངས་པ་ལྟ་བུའོ། །ཞེས་གསུངས་སོ། །
ཐལ་འགྱུར་བ་འདི་བས་འདོད་པའི་ལྷན་སྐྱེས་རགས་པའི་གང་ཟག་གི་རྫས་ཡོད་དང༌། རང་སྡེ་གཞན་གྱི་ལྷན་སྐྱེས་ཀྱི་གང་ཟག་གི་རྫས་ཡོད་དང༌། འདི་བས་ཀུན་བཏགས་སུ་འདོད་པའི་རྫས་ཡོད་གསུམ་གྱི་ཁྱད་པར་ཡོད་དེ། དཔེར་ན་ཚོང་དཔོན་ཚོང་བ་ལས་ཟུར་དུ་མི་བཀར་བ་སྟེ་ལོགས་སུ་མེད་ཀྱང་ཚོང་བ་རྣམས་ལ་དབང་སྒྱུར་བ་པོ་ཡིན་པ་ལྟར་བདག་ཕུང་པོ་ལས་སོགས་སུ་མི་བཀར་བར་ཕུང་པོའི་རང་བཞིན་ཅན་གྱི་བདག་གིས་ཕུང་པོ་ལ་དབང་བསྒྱུར་ཞིང་ཕུང་པོ་ཚུར་བདག་ལ་ལྟོས་ཀྱང༌། བདག་ཕུང་པོ་ལ་ཕར་མི་ལྟོས་པ་ཚོང་དཔོན་ལྟར་གྲུབ་པའི་བདག་དེ་དང་པོ་དང༌། དཔེར་ན་ཕྱུགས་རྫིས་ཕྱུགས་ལ་དབང་བསྒྱུར་ཞིང་ཕྱུགས་དང་མཚན་ཉིད་མི་མཐུན་པ་ལྟར་ཕུང་པོ་དང་མཚན་ཉིད་མི་མཐུན་པར་རྗེ་ཁོལ་ལྟར་དབང་བསྒྱུར་བ་སོགས་གྲུབ་པའི་བདག་དེ་གཉིས་པ་དང༌། མི་འཇིག་པའི་རྟག་པ་དང་ཆ་མེད་པའི་གཅིག་པུར་གྲུབཔའི་བདག་དེ་གསུམ་པ་ཡིན་པའོ། །དབུ༷་མ༷་ལ༷་འཇུ༷ག་པ༷འི་ཚིག་དོན་ཟླ་བ་གྲགས་པའི་དགོངས་རྒྱན་རིན་ཆེན་སྒྲོན་མེ་ཞེས་བྱ་བ་ལ༷ས་དོན་དམ་པའི་སེ༷མས་བསྐྱེ༷ད་པ༷་བཞི༷་པའི་རྣམ་པར་བཤདཔ༷འོ༷།། །།