མཚན་ཉིད་ལ་དཔྱད་པ།

མཚན་ཉིད་ལ་དཔྱད་པ།

མཚན་ཉིད་ལ་དཔྱད་པ་དང༌། དབྱེ་བ་ལ་དཔྱད་པ་གཉིས། དང་པོ་ནི། ཡང་མངོན་སུམ་ཡིན་ན་རྟོག་བྲལ་མ་འཁྲུལ་བའི་ཤེས་པ་ཡིན་པའི་ཁྱབ་པར་ཐལ། བློ་རིག་ལས། རྟོག་བྲལ་མ་འཁྲུལ་བའི་ཤེས་པ་དེ། མངོན་སུམ་གྱི་མཚན་ཉིད། ཅེས་དང༌། བསྡུས་གྲྭའི་སྤྱི་དོན་༣༢༩ལས། རྟོག་བྲལ་མ་འཁྲུལ་བའི་རིག་པ།མངོན་སུམ་གྱི་མཚན་ཉིད། ཅེས་གསུངས་པའི་ཕྱིར། འདོད་ན། སོ་སྐྱེས་ཐ་མལ་བའི་སྔོན་འཛིན་དབང་མངོན་ཆོས་ཅན། རྟོག་བྲལ་མ་འཁྲུལ་བའི་ཤེས་པ་ཡིན་པར་ཐལ། མངོན་སུམ་ཡིན་པའི་ཕྱིར། འདོད་ན། དེ་ཆོས་ཅན། མ་འཁྲུལ་བའི་ཤེས་པ་མ་ཡིན་པར་ཐལ། འཁྲུལ་བའི་ཤེས་པ་ཡིན་པའི་ཕྱིར་ཏེ། སྔོན་པོ་ལ་འཁྲུལ་བའི་ཤེས་པ་ཡིན་པའི་ཕྱིར། ཁྱབ་སྟེ། དུང་སེར་པོ་མ་ཡིན་བཞིན་དུ་སེར་པོར་སྣང་ན་དུང་ལ་འཁྲུལ་དགོས་པ་གང་ཞིག རིགས་པ་མཚུངས་པའི་ཕྱིར། གོང་གི་མ་ཁྱབ་མཚམས་ཀྱི་རྟགས་གྲུབ་སྟེ། སྔོན་པོ་ཕྱི་དོན་དུ་མ་གྲུབ་བཞིན་དུ་ཕྱི་དོན་དུ་གྲུབ་པར་སྣང་བའི་ཕྱིར། དེར་ཐལ། དེ་ལ་སྔོན་པོ་སྣང་བའི་ཚེ་ན་ནང་འཛིན་པ་ལ་མ་ལྟོས་པར་ཕྱི་རོལ་ཏུ་རྡུལ་རྫས་བསགས་སྟོབས་ལས་གྲུབ་པ་ལྟ་བུའམ། ནང་འཛིན་པ་ལ་མ་ལྟོས་པར་ཕྱི་རོལ་རྒྱང་ཆད་ཀྱི་ཚུལ་གྱིས་སྣང་བའི་ཕྱིར། གོང་དུ་སྐྱེས་བུ་ཐ་མལ་བའི་སྔོན་འཛིན་དབང་མངོན་འཁྲུལ་བའི་ཤེས་པ་ཡིན་པར་འདོད་ཟེར་ན། སོ་སྐྱེས་ཐ་མལ་བའི་སྔོ་འཛིན་དབང་མངོན་ཆོས་ཅན། འཁྲུལ་བའི་ཤེས་པ་མ་ཡིན་པར་ཐལ། རྟོག་བྲལ་མ་འཁྲུལ་བའི་ཤེས་པ་ཡིན་པའི་ཕྱིར་ཏེ། མངོན་སུམ་ཡིན་པའི་ཕྱིར། ཁྱབ་སྟེ། བསྡུས་གྲྭའི་སྤྱི་དོན་༣༢༩ལས། རྟོག་བྲལ་མ་འཁྲུལ་བའི་རིག་པ།མངོན་སུམ་གྱི་མཚན་ཉིད། ཅེས་གསུངས་པའི་ཕྱིར། དེ་ལ་རྟོག་པ་དང་བྲལ་ཞིང་འཕྲལ་རྐྱེན་གྱི་འཁྲུལ་རྒྱུས་མ་སླད་པའི་རིག་པ་དེ་མངོན་སུམ་གྱི་མཚན་ཉིད་ཅེས་པའི་དོན་ཡིན་ཟེར་ན། ཐོག་མེད་ནས་གོམ་པས་བདག་གསལ་བར་སྣང་བའི་ཡིད་ཤེས་ཆོས་ཅན། མངོན་སུམ་ཡིན་པར་ཐལ། རྟོག་པ་དང་བྲལ་ཞིང་འཕྲལ་རྐྱེན་གྱི་འཁྲུལ་རྒྱུས་མ་སླད་པའི་རིག་པ་ཡིན་པའི་ཕྱིར་རོ། །ཡང་ན་རྟོག་པ་དང་བྲལ་ཞིང་བག་ཆགས་གཏན་བྱུང་གི་མི་བསླུ་བའི་ཤེས་པ་དེ། མངོན་སུམ་གྱི་མཚན་ཉིད་ཡིན་ཏེ། རྣམ་ངེས་ལས། གཞན་བག་ཆགས་བརྟན་པའི་ཕྱིར་འཁོར་བ་ཇི་སྲིད་པར་རྗེས་སུ་འབྲེལ་བ་དེ་ནི་ཐ་སྙད་དུ་མི་བསླུ་བ་ལ་ལྟོས་ཏེ་འདིར་ཚད་མ་ཡིན་ནོ། །ཞེས་དང། དེའི་འཐད་ལྡན་ལས། རྣམ་པར་རིག་པ་ཙམ་དུ་སྨྲ་བ་ལ་ནི། སློབ་དཔོན་གྱིས་བག་ཆགས་བརྟན་དང་མི་བརྟན་པ་དག་གི་རྣམ་པར་བཞག་པ་མཐོང་ལ། ཞེས་གསུངས་པའི་ཕྱིར། འདོད་ན། རྣམ་མཁྱེན་ཆོས་ཅན། རྟོག་པ་དང་བྲལ་ཞིང་བག་ཆགས་གཏན་བྱུང་གི་མི་བསླུ་བའི་ཤེས་པར་ཐལ། མངོན་སུམ་ཡིན་པའིཕྱིར། འདོད་ན། དེ་ཆོས་ཅན། བག་ཆགས་གཏན་བྱུང་གི་མི་བསླུ་བ་མ་ཡིན་པར་ཐལ། བག་ཆགས་བརྟན་པོའི་དབང་གིས་བྱུང་བ་མ་ཡིན་པའི་ཕྱིར་ཏེ། བག་ཆགས་མཐའ་དག་སྤངས་པའི་གང་ཟག་གི་ཤེས་པ་ཡིན་པའི་ཕྱིར། ཟེར་ན་དཔྱད། ཡང་སྔོ་འཛིན་མིག་ཤེས་ཆོས་ཅན། མ་འཁྲུལ་བའི་རིག་པ་ཡིན་པར་ཐལ། རྟོག་བྲལ་མ་འཁྲུལ་བའི་རིག་པ་ཡིན་པའི་ཕྱིར། འདོད་ན། སྔོ་འཛིན་མིག་ཤེས་ཆོས་ཅན། མ་འཁྲུལ་བའི་རིག་པ་མ་ཡིན་པར་ཐལ། འཁྲུལ་བའི་རིག་པ་ཡིན་པའི་ཕྱིར། དེར་ཐལ། འཁྲུལ་བའི་ཤེས་པ་ཡིན་པའི་ཕྱིར། དེར་ཐལ། འཁྲུལ་བའི་གཟུགས་ཤེས་ལྡན་མིན་འདུ་བྱེད་གསུམ་པོ་གང་རུང་ཡིན་པའི་ཕྱིར། དེར་ཐལ། འཁྲུལ་བའི་དངོས་པོ་ཡིན་པའི་ཕྱིར། མ་གྲུབ་ན། དེ་ཆོས་ཅན། འཁྲུལ་བའི་ཆོས་མ་ཡིན་པར་ཐལ། འདོད་མི་ནུས་ཏེ་བསླུ་བའི་ཆོས་དང་རྫུན་པའི་ཆོས་ཡིན་པའི་ཕྱིར་ཏེ། རྩ་ཤེས་ལས། འདུ་བྱེད་ཐམས་ཅད་སླུ་བའི་ཆོས། །དེས་ན་དེ་དག་རྫུན་པ་ཡིན། །ཞེས་དང༌། དབུ་མ་ཐེག་མཆོག་ལས། ཀུན་རྫོབ་ཡིན་ཕྱིར་སྤྱིར་ནི་རྫུན་པ་ཉིད། །ཅེས་གསུངས་པའི་ཕྱིར། ཟེར་ན་དཔྱད། ཡང་སྔོ་འཛིན་མིག་ཤེས་ཆོས་ཅན། འཁྲུལ་བའི་ཤེས་པ་ཡིན་པར་ཐལ། འཁྲུལ་བ་སྣང་བའི་ཤེས་པ་ཡིན་པའི་ཕྱིར། དེར་ཐལ། སྔོན་པོ་དེ་འཁྲུལ་བ་གང་ཞིག དེ་སྣང་བའི་ཤེས་པ་ཡིན་པའི་ཕྱིར། ཁྱབ་སྟེ། ཀུན་རྫོབ་སྣང་ན་འཁྲུལ་དགོས་པའི་རྒྱུ་མཚན་ཡོད་པའི་ཕྱིར་ཏེ། བདེན་གཉིས་གསལ་བའི་ཉི་མ་ལས། འཁྲུལ་བ་སྣང་བར་ཐལ། དོན་ལ་མེད་པའི་ཀུན་རྫོབ་ཁམས་གསུམ་པ་སྣང་བའི་བློ་ཡིན་པའི་ཕྱིར། ཁྱབ་པ་ཡོད་དེ། ཞེས་གསུངས་པའི་ཕྱིརཟེར་བ་དང༌། ཡང་སྔོ་འཛིན་མིག་ཤེས་ཆོས་ཅན། འཁྲུལ་བར་ཐལ། བག་ཆགས་ཀྱི་དབང་གིས་སྔོན་པོ་ཕྱི་རོལ་ཏུ་སྣང་བའི་ཕྱིར། ཁྱབ་སྟེ། མདོ་སྡེ་ལང་ཀར་གཤེགས་པ་ལས། བག་ཆགས་ཀྱིས་ནི་དཀྲུག་པའི་སེམས། །དོན་དུ་སྣང་བ་ཤིན་ཏུ་འབྱུང༌། །དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པ་ཡིན། །ཞེས་གསུངས་པའི་ཕྱིར། ཟེར་ན་དཔྱད།