དུམ་བུ་བཅུ་པ། ཟངས་ཡིག་ཅན་མའི་ཁྲིད་ཀྱི་རིམ་པ།
དེ་མན་ཆོད་ནི་རིག་པ་རྒྱབ་བརྟེན་དང་འགལ་བ་བསྡུས་པ་དང་། གཞན་དོན་བསྡུས་པ་དང་། རིག་པ་བསྡུས་པ་དང་། སྐུ་གསུམ་བསྡུས་པ་དང་། ལྟ་སྤྱོད་བསྡུས་པ་དང་། ཉག་གཅིག་བསྡུས་པ་དང་། དགེ་སྡིག་བསྡུས་པ་རྣམས་རིག་པ་རྡོ་རྗེ་ལུ་གུ་རྒྱུད་ལ་ངེས་ཤེས་བསྐྱེད་པའི་རྒྱབ་བརྟེན་ཡིན་པས། རྩ་བ་དང་། བི་མ་ལའི་འགྲེལ་པ་གཉིས་སྦྱར་ལ་བཤད་དོ། །སྤྱིའི་དོན་གོ་བར་བྱེད་པ་ལ་དུང་ཡིག་ཅན་གལ་ཆེའོ། །བསྟན་པའི་བུ་གཅིག་ནི་བཅངས་པས་ཡོན་ཏན་འབྱུང་བའོ། །མདོར་ན་རྒྱུད་བཅུ་བདུན་འགྲེལ་པ་གདམས་ངག་དང་བཅས་པ་དང་། མན་ངག་བརྒྱ་དང་བཅུ་དགུ་པོ་རྣམས་ལ་ལྟའོ། །སྤྲོས་པ་མེད་པ་རྣམས་ལ་ཁྲིད་ཡིག་འདི་དང་། ཟངས་ཡིག་ཅན་རྩ་བ་དང་། འགྲེལ་པ་དུམ་བུ་གཉིས་པ་དེ་དང་། རྟགས་དང་ཚད་རྣམས་ཀྱིས་ཆོག་གོ། །གཞན་ལ་སྟོན་ན་དབང་རྣམས་དགོས་སོ། །ཡན་ལག་ཁྲེགས་ཆོད་བདུན་པ་དང་། ཁྱུང་ཆེན་དང་། པྲ་ཁྲིད་ཡོད་ན་བཟང་། དུས་གཅིག་མཉམ་སྦྱོར་དང་། རྣམ་རྟོག་ཐོག་བརྫིས་གཉིས་ཀྱང་ཉམས་(༡༤༥)ལེན་གྱི་གྲོགས་སུ་འགྲོའོ། །ཟངས་ཡིག་ཅན་མའི་ཁྲིད་ཀྱི་རིམ་པ་དུམ་བུ་བཅུ་པ་རྫོགས་སོ།། །།
རྒྱལ་བས་གསུངས་པའི་དམ་ཆོས་ཀུན་གྱི་བཅུད། །ལུང་དང་རྟོགས་པར་འབྲེལ་བ་གསང་སྔགས་དོན། །རྫོགས་རིམ་སྙིང་ཕྱུང་མངོན་སུམ་ལྟ་བའི་གནད། །མན་ངག་དེབས་དང་མཐུན་པར་བདག་གིས་བསྡེབས། །ཡི་གེ་རྣམས་ལ་བལྟས་པའི་རྟོག་དཔྱོད་མིན། །བདག་ནི་བི་མ་ལ་ཡིས་བྱིན་གྱིས་བརླབས། །ཀརྨའི་ཡང་དགོན་དབེན་པར་འདུག་པའི་ཚེ། །ནམ་ལངས་དུས་མཐར་ཤར་གྱི་ཕྱོགས་རོལ་ནས། །ལྟ་བས་མི་ངོམས་འོད་ཀྱིས་མཛེས་པ་ན། །མངོན་སུམ་ལྟར་སྣང་བདག་གི་མཛོད་སྤུར་ཐིམ། །དེ་ནས་འབད་མེད་གནད་འདི་ཐམས་ཅད་གོ། །འདི་ནི་ཆོས་ཀུན་མཐུན་ཞིང་ཁྱད་པར་དུ། །མངོན་སུམ་རིག་པའི་ཁྱད་ཀྱིས་འཕགས་པ་ཡིན། །དེ་ལྟར་ཡི་གེར་བཀོད་པ་མི་འོས་ཀྱང་། །ཉམས་སུ་ལེན་དང་གཞན་ལ་ཕན་བྱེད་པའི། །སྐྱེས་ཆེན་དུ་མས་བསྐུལ་ནས་སྦྱར་བ་ཡིན། །དགེ་བས་ཆོས་ཀུན་ཟད་སར་ཕྱིན་གྱུར་ཅིག །རང་བྱུང་རྡོ་རྗེས་རང་བྱུང་གི། །ཡེ་ཤེས་མངོན་སྟོན་ཡི་གེ་སྦྱར། །ལུང་དོན་བཤད་ན་ཟད་པ་མེད། །སྤྲོས་པ་ཆོད་ན་ཉམས་སུ་ལོངས། །བྱ་ལོ་ཟླ་བ་དྲུག་པ་ལ་སྦྱར་བའོ། །གདམས་ངག་འདི་ཤེས་མིན་མི་ཤེས་མིན་རྣམས་ལ་སྦ་བར་བྱས་ལ། སྐལ་ལྡན་ཉམས་ལེན་བྱེད་པ་རྣམས་ལ་བསྟན་པར་བྱའོ། །དམ་ཚིག་དང་ལྡན་པ་རྣམས་ལ་བཀའ་སྲུང་རྣམས་ཀྱིས་བཀའ་ཁྲོལ་ལ་སྟོང་གྲོགས་མཛོད་ཅིག །དམ་མེད་ལོག་པར་ལྟ་བ་རྣམས་ལ་ཆད་པ་འབབ་བོ། །བཀྲ་ཤིས་དཔལ་འབར་ཡེ་ཤེས་རྒྱས་འབར་འཛམ་གླིང་མཛེས་པའི་རྒྱན་དུ་ཤོག། །།
ན་མོ་བི་མ་ལ་མི་ཏྲ་བྷྱ༔ ༼མཆོད་བརྗོད།༽ སྡོམ་ལྡན་དབང་ཐོབ་རྒྱུད་སྨིན་ཅིང་། །༼དབང་བཞི།༽ ངེས་འབྱུང་སྙིང་རྗེ་ཆེ་ལྡན་པ། །༼བྱང་ཆུབ་སེམས་སྦྱོང་།༽ རྩ་རླུང་ཐིག་ལེ་གནད་དུ་བསྣུན། །༼ཕྲ་ཁྲིད་རྣམས།༽ ཆོས་ཀུན་སྤྲོས་བྲལ་༼ཁྲེགས་ཆོད་ཀྱི་ཁྲིད་༽དོན་རིག་གནས། །སྣང་བ་སེམས་ཤེས་༼སྣང་སྲིད་གཉིས་༽རུ་ཤན་ཕྱེད། །དབེན་པར་སེང་གེ་༼འདུག་སྟངས་གསུམ་༽གླང་ཆེན་དང་། །དྲང་སྲོང་ལྟ་བུ་ལུས་ཀྱི་གནད། །སྟེང་འོག་ཟུར་ལ་༼ལྟ་སྟངས་གསུམ་༽(༡༤༦)མ་འགྱུར་ལྟ། །མཁའ་ལ་དབྱིངས་དང་༼ངོ་སྤྲོད་རིག་པ་གསུམ་༽རིག་པ་ཚད། །སྣང་དང་མཆེད་༼རྣམས་གོང་འཕེལ་རིག་༽དང་ཚད་དུ་ཕྱིན། །ཤེས་རབ་རང་བྱུང་སྒྲོན་མ་ཡིས། །༼ཕྱི་ནང་རིག་པ།༽ ཀུན་མཐོང་ཆོས་ཟད་མཐར་༼འབྲས་བུ་༽ཐུག་ཐོབ། །སངས་རྒྱས་ཀུན་གྱི་༼མཇུག་སྡུད་༽རྟོགས་པའི་གནད། །ཚིག་གསུམ་གནད་དྲིལ་སྙིང་ཐིག་ལ། །རྒྱུད་ལུང་ཀུན་ན་འདི་ལས་མེད། །རང་བྱུང་གིས་བསྟན་ཉམས་ལེན་མཛོད། །རྫོགས་པ་ཆེན་པོ་ཚིག་བཞི་བི་མ་ལ་ཡིས་བྱིན་གྱིས་བརླབས་པ། རང་བྱུང་རྡོ་རྗེས་བསྟན་པ་འདི། སྐལ་ལྡན་རྣམས་ཀྱིས་འཇིག་རྟེན་གྱི་བྱ་བ་སྤོངས་ལ་ཉམས་སུ་ལོངས་ཤིག །བཀའ་སྲུང་རྣམས་ཀྱིས་གཉེར་མཛོད་ཅིག །སརྦ་མངྒ་ལཾ། ཛ་ཡནྟུ།། །།