ཀུན་མཁྱེན་དྲི་མེད་འོད་ཟེར་གྱི་རྡོ་རྗེའི་གླུ་སུམ་ཅུ།

༄༅། །ཀུན་མཁྱེན་དྲི་མེད་འོད་ཟེར་གྱི་རྡོ་རྗེའི་གླུ་སུམ་ཅུ་ཞེས་བྱ་བ་བཞུགས་སོ། །

༄༅། །ན་མོ་གུ་རུ་བྷྱཿ མངྒ་ལ་སྭསྟི་སིདྡྷི་ཕ་ལ་ཧོཿ ལྷུན་གྲུབ་ཕུན་སུམ་ཚོགས་ལྔའི་ཞིང་། །ཡེ་ནས་བཀྲ་ཤིས་དཔལ་འབར་བ། །དངོས་གྲུབ་ཡིད་བཞིན་ཆར་ཆེན་འབེབས། །མཆོག་གསུམ་བླ་མའི་ཞབས་ལ་འདུད། །ཐམས་ཅད་ཡེ་ནས་སངས་རྒྱས་པ། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་ཆོས་དབྱིངས་གདོད་མའི་ཞིང་། །མགོན་འདི་ཆོས་རྗེ་ཀུན་ཏུ་བཟང་། །འཁོར་འདི་ཡེ་ཤེས་རྒྱ་མཚོའི་ཚོགས། །ཆོས་འདི་རང་བཞིན་རྫོགས་པ་ཆེ། །དུས་འདི་གཞི་རྫོགས་འཕོ་འགྱུར་མེད། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་འོག་མིན་སྟུག་པོ་བཀོད། །མགོན་འདི་ཆོས་རྗེ་རྣམ་སྣང་མཛད། །འཁོར་འདི་རྒྱལ་སྲས་དག་པའི་ཚོགས། །ཆོས་འདི་བླ་མེད་ཐེག་པ་ཆེ། །དུས་འདི་རྟག་པ་འཁོར་མོའི་གཞི། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་ཤར་ཕྱོགས་མངོན་དགའི་ཞིང་། །མགོན་འདི་ཆོས་རྗེ་མི་བསྐྱོད་པ། །འཁོར་འདི་རྒྱལ་སྲས་དག་པའི་ཚོགས། །ཆོས་འདི་བླ་མེད་ཐེག་པ་ཆེ། །དུས་འདི་རྟག་པ་འཁོར་མོའི་གཞི། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་ལྷོ་ཕྱོགས་དཔལ་ལྡན་ཞིང་། །མགོན་འདི་ཆོས་རྗེ་རིན་ཆེན་འབྱུང་། །འཁོར་འདི་ཡེ་ཤེས་རྒྱ་མཚོའི་ཚོགས། །ཆོས་འདི་རང་བཞིན་རྫོགས་པ་ཆེ། །དུས་འདི་གཞི་རྫོགས་འཕོ་འགྱུར་མེད། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་ནུབ་ཕྱོགས་བདེ་ལྡན་ཞིང་། །མགོན་འདི་ཆོས་རྗེ་འོད་དཔག་མེད། །འཁོར་འདི་ཡེ་ཤེས་རྒྱ་མཚོའི་ཚོགས། །ཆོས་འདི་རང་བཞིན་རྫོགས་པ་ཆེ། །དུས་འདི་གཞི་རྫོགས་འཕོ་འགྱུར་མེད། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་བྱང་ཕྱོགས་ལས་རབ་ཞིང་། །མགོན་འདི་ཆོས་རྗེ་དོན་ཡོད་གྲུབ། །འཁོར་འདི་ཡེ་ཤེས་རྒྱ་མཚོའི་ཚོགས། །ཆོས་འདི་རང་བཞིན་རྫོགས་པ་ཆེ། །དུས་འདི་གཞི་རྫོགས་འཕོ་འགྱུར་མེད། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་འོག་མིན་ཆོས་དབྱིངས་ཞིང་། །མགོན་འདི་དྲུག་པ་རྡོ་རྗེ་འཆང་། །འཁོར་འདི་གྲུབ་པ་རིགས་སྔགས་འཆང་། །ཆོས་འདི་གསང་སྔགས་བླ་ན་མེད། །དུས་འདི་རྟག་པ་རྒྱུན་གྱི་གཞི། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་དགའ་ལྡན་དག་པའི་ཞིང་། །མགོན་འདི་(༢༨)སྤྲུལ་སྐུ་རྡོ་རྗེ་སེམས། །འཁོར་འདི་རིག་འཛིན་མཁའ་འགྲོར་བཅས། །ཆོས་འདི་གསང་བ་དོན་གྱི་དབྱིངས། །དུས་འདི་རྫོགས་ལྡན་དང་པོ་ལ། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་ལྕང་ལོ་ཅན་གྱི་ཞིང་། །མགོན་འདི་ཕྱག་ན་རྡོ་རྗེ་དཔལ། །འཁོར་འདི་མཁའ་འགྲོ་གནོད་སྦྱིན་ཚོགས། །ཆོས་འདི་ངེས་དོན་བླ་ན་མེད། །དུས་འདི་གདུལ་བྱ་ཇི་སྲིད་བར། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་དུར་ཁྲོད་ཆེན་པོའི་ཞིང་། །མགོན་འདི་རིག་འཛིན་ཆེན་པོའི་ཚོགས། །འཁོར་འདི་རིག་ཅན་དམ་པ་བཞི། །ཆོས་འདི་གསང་ཆེན་ཐིག་ལེ་བཞི། །དུས་འདི་ཆོས་འབྱུང་ཆེན་པོ་བཞི། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་རི་བོ་རྩེ་ལྔའི་ཞིང་། །མགོན་འདི་པཎ་ཆེན་བི་མ་ལ། །འཁོར་འདི་རིག་པ་འཛིན་པའི་ཚོགས། །ཆོས་འདི་ཡང་གསང་བླ་ན་མེད། །དུས་འདི་བསྐལ་པ་མ་ཞིག་བར། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་ཨོ་རྒྱན་རྔ་ཡབ་གླིང་། །མགོན་འདི་རང་བྱུང་པདྨ་རྒྱལ། །འཁོར་འདི་མཁའ་འགྲོ་དཔག་ཏུ་མེད། །ཆོས་འདི་གསང་སྔགས་རྡོ་རྗེ་ཐེག །དུས་འདི་འཇིག་རྟེན་ཇི་སྲིད་བར། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་གར་བཞུགས་ཆོས་ཀྱི་དབྱིངས། །མགོན་འདི་སྙན་རྒྱུད་རིན་པོ་ཆེ། །འཁོར་འདི་དད་ལྡན་བསགས་པ་རབ། །ཆོས་འདི་ཨ་ཏི་སྙིང་པོའི་དོན། །དུས་འདི་ཕྲིན་ལས་ཇི་སྲིད་བར། །བཀྲ་ཤིས་ཕུན་སུམ་ཚོགས་པ་ལགས། །གནས་འདི་སྐལ་བཟང་གདུལ་བྱའི་ཞིང་། །མགོན་འདི་ཆོས་རྗེ་རིན་པོ་ཆེ། །འཁོར་འདི་ལས་ཅན་དབང་པོ་རབ། །ཆོས་འདི་ཡང་གསང་རྫོགས་པ་ཆེ། །དུས་འདི་ཉིན་མཚན་ཆོས་ཀྱི་འདའ། །བཀྲ་ཤིས་ཕུན་སུམ་ཚོགས་པ་ལགས། །དགོངས་པ་བརྡ་དང་སྙན་བརྒྱུད་ཀྱི། །བཀྲ་ཤིས་དམ་པ་འདི་བརྗོད་པས། །རང་བཞིན་བདེ་ལེགས་དཔལ་འབར་ཞིང་། །བཀྲ་ཤིས་ཕུན་སུམ་ཚོགས་པར་ཤོག །ཕུན་སུམ་ཚོགས་པ་ལྔ་མ་བཀྲ་ཤིས་རྡོ་རྗེའི་གླུ། རྣལ་འབྱོར་པ་ཀློང་ཆེན་རབ་འབྱམས་ཀྱིས་ལྷུན་གྲུབ་གླིང་གི་དབེན་གནས་སུ་མཛད་པ་དགེའོ།། །།

གླུ་འདི་ལ་བླ་མའི་བྱིན་རླབས་ཡོད། །ཚིག་འདི་ལ་ཡི་དམ་མཁའ་འགྲོ་ཆགས། །བློ་འདི་ལ་དམ་ཅན་རྒྱ་མཚོ་འདུ། །བཀྲ་ཤིས་ཉི་མ་ཤར་བ་ལགས། །

༈ ཚོགས་གཉིས་རབ་རྫོགས་རྒྱ་མཚོ་ནས། །འདོད་འབྱུང་ནོར་བུ་རིན་པོ་ཆེ། །གང་འདོད་དངོས་གྲུབ་ཆར་འབེབས་པའི། །དཔལ་མགོན་བླ་མའི་ཞབས་ལ་འདུད། །གཟའ་གཏད་བྲལ་བའི་རྣལ་འབྱོར་པ། །ཕྱོགས་མེད་ཡན་པ་བློ་བདེ་ངས། །དད་ལྡན་འགྲོ་བའི་ཚོགས་རྣམས་ལ། །རང་སྣང་བདེ་བའི་ཆོས་གཞས་འབུལ། །མི་ཆོས་སྤང་ནས་ལོ་ཤས་སོང་། །ད་ལྟ་དམ་ཆོས་སྙིང་པོ་བྱེད། །འཇིག་རྟེན་སྣང་བ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །གཅིག་གཉིས་གསུམ་བྱས་ནས། །གུ་ཡངས་པའི་སྣང་བའི་(༢༩)བདེ་ཞད་ལ། །ཡན་པ་བློ་བདེའི་སྣང་བའི་བདེ་ཞད་ལ། །རང་སྣང་བདེ་བའི་ཆོས་གཞས་འབུལ། །མ་རིག་མུན་པའི་སངས་ཞད་ལ། །ཕ་ཡུལ་སྤངས་ནས་ལོ་ཤས་སོང་། །ད་ལྟ་ཕྱོགས་མེད་རི་ཁྲོད་འགྲིམ། །ཆགས་སྡང་འཆིང་བ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །གཉེན་བཤེས་སྤངས་ནས་ལོ་ཤས་སོང་། །ད་ལྟ་བཤེས་མེད་གུ་ཡངས་པས། །ཉེ་འབྲེལ་སྐྱོང་དགོས་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །འཁོར་འདབ་སྤངས་ནས་ལོ་ཤས་སོང་། །ད་ལྟ་དཔོན་མེད་གཡོག་མེད་ངང་། །ཁ་ཏ་འཆིང་རེས་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །སྡེ་ཚན་སྤངས་ནས་ལོ་ཤས་སོང་། །ད་ལྟ་ཕྱོགས་འཛིན་ཆགས་སྡང་བྲལ། །ཉེ་རིང་སྣང་བ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །ངོ་སྲུང་སྤངས་ནས་ལོ་ཤས་སོང་། །ད་ལྟ་སྣང་བ་ཐད་ཀར་གཅོད། །སེམས་འཛིན་སྡུག་བསྔལ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །བྱ་བྱེད་སྤངས་ནས་ལོ་ཤས་སོང་། །ད་ལྟར་བྱར་མེད་སོས་དལ་ངང་། །མ་ཟིན་དོགས་པ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །གསོག་འཇོག་སྤངས་ནས་ལོ་ཤས་སོང་། །ད་ལྟ་ཆགས་མེད་ཞེན་མེད་ངང་། །ཕྱི་ཚིས་འདུན་མ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །ཞེན་འདོད་སྤངས་ནས་ལོ་ཤས་སོང་། །ད་ལྟ་གང་བྱུང་གྲོགས་སུ་འཆར། །འདི་ཡིན་གཏད་སོ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །ཆེ་དྲགས་སྤངས་ནས་ལོ་ཤས་སོང་། །ད་ལྟ་སྤྲང་པོ་གུ་ཡངས་པ། །མིང་གཟུགས་ཕོ་སྒོ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །འཇིག་རྟེན་སྤངས་ནས་ལོ་ཤས་སོང་། །ད་ལྟ་ཚེ་འདིའི་ཞེན་པ་ཐོང་། །ཆོས་བརྒྱད་ཁུར་པོ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །དགོས་མེད་སྐྱེས་ནས་ལོ་ཤས་སོང་། །ད་ལྟ་གང་བྱུང་ཚོགས་སུ་གཏོང་། །སེར་སྣ་སྡུག་བསྔལ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །བསྟན་ལ་ཞུགས་ནས་ལོ་ཤས་སོང་། །ད་ལྟ་བསླབ་གསུམ་དམ་ཚིག་ལྡན། །ཉམས་ཆག་ཞིག་རལ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །ཐོས་བསམ་བྱས་ནས་ལོ་ཤས་སོང་། །ད་ལྟ་ཚིག་དོན་གནས་ལ་མཁས། །ཐེ་ཚོམ་སོམ་ཉི་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །མདོ་རྒྱུད་སྦྱངས་ནས་ལོ་ཤས་སོང་། །ད་ལྟ་ཕྱི་ནང་གྲུབ་མཐའ་ཤེས། །ཐ་སྙད་མངོན་རློམ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །དམ་པ་བསྟེན་ནས་ལོ་ཤས་སོང་། །ད་ལྟ་གོང་མའི་བྱིན་རླབས་ཞུགས། །མོས་གུས་ལྟེམ་རྐྱང་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །དབང་བཞི་རྫོགས་ནས་ལོ་ཤས་སོང་། །ད་ལྟ་བསྐྱེད་རྫོགས་ཟུང་འཇུག་ངང་། །ཐ་མལ་འཁྲུལ་རྟོག་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །ཕྱོགས་མེད་སྦྱངས་ནས་ལོ་ཤས་སོང་། །ད་ལྟ་གདམས་ངག་ཀུན་ལ་མཁས། །ཕྱོགས་གཅིག་ཁ་འཛིན་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །གནས་ལུགས་རྟོགས་ནས་ལོ་ཤས་སོང་། །ད་ལྟ་ཆོས་ཟད་བློ་འདས་ངང་། །མཐར་འཛིན་ལྟ་བ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །ཆོས་ཉིད་བསྒོམས་ནས་ལོ་ཤས་སོང་། །ད་ལྟ་རང་རིག་འོད་གསལ་ངང་། །སྟོང་བསྒོམ་མུན་རྡོ་བདག་ལ་མེད། །བདེ་སྐྱིད་མཚོ་མོ་རྡོལ་བ་ལགས། །དངོས་འཛིན་སྤངས་ནས་ལོ་ཤས་སོང་། །ད་ལྟ་མཁའ་མཉམ་རྒྱལ་བའི་ཐུགས། །ལྟ་དགོངས་ཟད་སར་བསྐྱལ་བ་ལགས། །བདེ་སྐྱིད་མཚོ་མོ་རྡོལ་བ་ལགས། །དམིགས་འཛིན་སྤངས་ནས་ལོ་ཤས་སོང་། །ད་ལྟ་ཆོས་ཉིད་གདོད་མའི་ངང་། །སྒོམ་(༣༠)པ་བློ་ལས་འདས་པ་ལགས། །བདེ་སྐྱིད་མཚོ་མོ་རྡོལ་བ་ལགས། །དགག་སྒྲུབ་སྤངས་ནས་ལོ་ཤས་སོང་། །ད་ལྟ་རང་གྲོལ་ཆོས་ཉིད་ངང་། །སྤྱོད་པ་གཟའ་གཏད་བྲལ་བ་ལགས། །བདེ་སྐྱིད་མཚོ་མོ་རྡོལ་བ་ལགས། །རེ་དོགས་སྤངས་ནས་ལོ་ཤས་སོང་། །ད་ལྟ་ཟང་ཐལ་ཆོས་ཉིད་ངང་། །འབྲས་བུ་རང་བྱུང་ཡེ་ཤེས་ལ། །བདེ་སྐྱིད་མཚོ་མོ་རྡོལ་བ་ལགས། །དཔལ་མགོན་བླ་མའི་བཀའ་དྲིན་གྱིས། །གང་ལྟར་བྱས་ཀྱང་སྐྱིད་པར་བྱུང་། །ཇི་ལྟར་བྱས་ཀྱང་བདེ་བར་བྱུང་། །བདེ་སྐྱིད་མཚོ་མོ་རྡོལ་བ་ལགས། །གཅིག་གཉིས་གསུམ་བྱས་ནས། གུ་ཡངས་པའི་སྣང་བའི་བདེ་ཞད་ལ། །ཡན་པ་བློ་བདེའི་སྣང་བའི་བདེ་ཞད་ལ། །རང་སྣང་མ་རིག་མུན་པའི་སངས་ཞད་ལ། །གླུ་ཚིག་བཟང་དོན་དུ་ལེགས་པ་འདི། །གནས་ལྷུན་གྲུབ་གླིང་གི་དབེན་གནས་སུ། །ཆོས་ཐེག་པ་མཆོག་གི་རྣལ་འབྱོར་པ། །མི་གུ་ཡངས་ཡན་པ་བློ་བདེས་བླངས། །དགེ་བས་མ་ལུས་འགྲོ་བ་ཀུན། །སྐུ་གསུམ་ཡེ་ཤེས་མཆོག་གི་གནས། །རླབས་ཆེན་ཚོགས་གཉིས་རབ་རྫོགས་ནས། །བྱང་ཆུབ་རྒྱ་མཚོ་མཐའ་ཡས་ཤོག །ཅེས་པའི་བདེ་སྐྱིད་མཚོ་མོ་མ་འདི་རྒྱལ་སྲས་བཟོད་པས་བསྐུལ་བའི་ངོར་གསུངས་པའོ།། །།

༈ ན་མོ་གུ་རུ་བྷྱཿ དངོས་གྲུབ་ཡེ་ཤེས་རྒྱ་མཚོ་ལས། །འདོད་རྒུ་ཡིད་བཞིན་རིན་ཆེན་གཏེར། །ཆོས་རྗེ་བླ་མའི་ཞབས་ལ་འདུད། །སྐྱེས་པ་འདི་ཚོའི་འཆི་ལུགས་སོམ། །སྒྱུ་མའི་ལུས་ཀྱིས་བསླུ་བསླུ་འདྲ། །སྐྱེ་ཤི་མེད་པའི་སེམས་ཉིད་ལ། །འགྱུར་མེད་བཙན་ས་བཟུང་ན་ལེགས། །འདུས་པ་འདི་ཚོའི་འབྲལ་ལུགས་སོམ། །གཉེན་འདུན་གྲོགས་ཀྱིས་བསླུ་བསླུ་འདྲ། །རང་བྱུང་ཡེ་ཤེས་སྙིང་པོའི་དོན། །འབྲལ་མེད་བཙན་ས་བཟུང་ན་ལེགས། །བསགས་པ་འདི་ཚོའི་འཛད་ལུགས་སོམ། །སྒྱུ་མའི་ནོར་གྱིས་བསླུ་བསླུ་འདྲ། །ཟས་ནོར་ལོངས་སྤྱོད་ཡོ་བྱད་ཀུན། །སྦྱིན་པའི་གཏེར་དུ་སྦས་ན་ལེགས། །མཐོན་པོ་དམའ་མོར་འགྱུར་ལུགས་སོམ། །ཆེ་དྲེགས་འབྱོར་པས་བསླུ་བསླུ་འདྲ། །རྟག་ཏུ་དམའ་བའི་ས་བཟུང་ནས། །དམ་ཆོས་ཚུལ་བཞིན་བསྒྲུབ་ན་ལེགས། །དབང་མེད་སྡིག་པའི་ལས་ལ་སྦྱོར། །འཇིག་རྟེན་དཔོན་གྱིས་བསླུ་བསླུ་འདྲ། །འདི་ཕྱིར་ལེགས་པའི་ལམ་སྟོན་པ། །བླ་མ་དམ་པ་བསྟེན་ན་ལེགས། །རྟག་ཏུ་སྡུག་བསྔལ་འཁོར་བའི་ཆོས། །ཚེ་འདིའི་འཁྲུལ་པས་བསླུ་བསླུ་འདྲ། །ཐར་པའི་ལམ་མཆོག་ཞི་བའི་ཆོས། །ཟབ་མོའི་དེ་ཉིད་བསྒོམ་ན་ལེགས། །ཆགས་ཞེན་ཉོན་མོངས་འཆིང་བའི་གཞི། །མཛའ་བཤེས་འཁོར་གྱིས་བསླུ་བསླུ་འདྲ། །ཉིན་མཚན་སྒོ་གསུམ་ཆོས་ཀྱིས་འདའ། །ཆོས་མཛད་གྲོགས་དང་འགྲོགས་ན་ལེགས། །འཁོར་བའི་བཙོན་ར་ཟུག་རྔུ་ཅན། །ཕ་ཡུལ་ཁྱིམ་གྱིས་བསླུ་བསླུ་འདྲ། །ཆགས་སྡང་འདུ་འཛིས་དབེན་པའི་གནས། །རི་ཁྲོད་དགོན་པ་(༣༡)འགྲིམ་ན་ལེགས། །འཁྲུལ་པའི་བྲེལ་དོས་ཉིན་མཚན་འདའ། །རྣམ་གཡེང་འདུ་འཛིས་བསླུ་བསླུ་འདྲ། །འཁྲུལ་སྣང་ཚེ་འདིའི་བྱ་བ་ཀུན། །ཅོག་བཞག་ལིངས་ཀྱིས་བསྐྱུར་ན་ལེགས། །སེམས་དང་སེམས་བྱུང་འཁོར་བའི་ཡིད། །གཟུང་འཛིན་རྟོག་པས་བསླུ་བསླུ་འདྲ། །མི་རྟོག་རང་བྱུང་ཡེ་ཤེས་དོན། །ཆོས་ཉིད་འོད་གསལ་གོམས་ན་ལེགས། །གཉེན་པོ་དྲན་རྟོག་གོམས་ཚུལ་ལས། །དྲོད་རྟགས་ཞེན་པས་བསླུ་བསླུ་འདྲ། །རིག་སྟོང་ཆོས་ཟད་རྗེན་པའི་ངང་། །ལྟ་སྒོམ་ཟད་སར་སྐྱོལ་ན་ལེགས། །ལེགས་པ་དམ་པ་རྡོ་རྗེའི་མགུར། །གུ་ཡངས་ཡན་པ་བློ་བདེས་བླངས། །དགེ་བས་ཁམས་གསུམ་ཡོངས་གྲོལ་ཤོག །ལེགས་པ་དམ་པའི་བཀྲ་ཤིས་ཤོག །ལེགས་པ་དམ་པ་མ་ཞེས་བྱ་བའི་གླུ། གུ་ཡངས་ཡན་པ་བློ་བདེས་བླངས་པ་དགེའོ།། །།

༈ ནོར་བུ་ཉི་མ་ཆོས་ཀྱི་གླུ། འདོད་འབྱུང་དཔག་བསམ་ཡིད་བཞིན་མཁའ། །མཚན་ལྡན་བླ་མ་རིན་པོ་ཆེ། །སྤྱི་གཙུག་འཁོར་ལོའི་རྒྱན་དུ་ཆེ། །རྟ་བདུན་རྒྱས་པ་པདྨོའི་གཉེན། །དག་པའི་མཁའ་ལ་ཤར་བའི་ཚེ། །གླིང་བཞིའི་མུན་པ་སངས་པ་དང་། །མཉམ་དུ་གེ་སར་པདྨོ་རྒྱས། །རང་བྱུང་ཡེ་ཤེས་རྟོགས་པའི་རྩལ། །རང་རིག་མཁའ་ལ་ཤར་བའི་ཚེ། །མ་རིག་མུན་པ་སངས་པ་དང་། །མཉམ་དུ་གནས་ལུགས་རྟོགས་པ་རྒྱས། །འཇིག་རྟེན་སྣང་བྱེད་འགྲོ་བའི་མིག །མཚན་མོའི་བདག་པོ་ཤར་བའི་ཚེ། །འོད་དཀར་སྣང་བ་འགྱེད་པ་དང་། །མཉམ་དུ་མེ་ཏོག་ཀུནྡ་རྒྱས། །དགོངས་པ་འགྱུར་མེད་ཆོས་སྐུའི་ཀློང་། །ངང་གདངས་འོད་གསལ་ཤར་བའི་ཚེ། །བདེ་གསལ་འོད་སྟོང་འཕྲོ་བ་དང་། །མཉམ་དུ་མི་རྟོག་ཡེ་ཤེས་རྒྱས། །བསོད་ནམས་རྒྱས་པའི་གཟི་འོད་ཀྱིས། །ཉི་ཟླའི་གཟི་འོད་འཕྲོག་པའི་ཚེ། །སྡུག་བསྔལ་སྣང་བྱེད་ནུབ་པ་དང་། །མཉམ་དུ་གཟའ་སྐར་སྣང་བ་རྒྱས། །རླུང་འཕོ་བ་བཅུ་དྲུག་དབྱིངས་སུ་ནུབ། །ཉི་ཟླ་སྒྲ་གཅན་ཟོས་པའི་ཚེ། །གཟུང་འཛིན་རྟོག་ཚོགས་ནུབ་པ་དང་། །མཉམ་དུ་འོད་གསལ་སྣང་བ་རྒྱས། །ཡིད་བཞིན་ནོར་བུ་རིན་པོ་ཆེ། །རྒྱལ་མཚན་རྩེ་མོར་བཏགས་པའི་ཚེ། །དགོས་འདོད་གསོལ་བ་བཏབ་པ་དང་། །ཅི་འདོད་དངོས་གྲུབ་ཆར་དུ་འབབ། །སེམས་ཉིད་ཡིད་བཞིན་རིན་པོ་ཆེ། །རང་རིག་རྟོགས་པའི་རྩེར་ཕྱིན་ནས། །མ་ཡེངས་གོམས་པས་བརྩོན་པ་དང་། །མཉམ་དུ་ཡོན་ཏན་ཆར་ཆེན་འབེབ། །སྐུ་གསུམ་ལྷུན་གྲུབ་རྒྱལ་བ་ལ། །དད་ལྡན་སྐྱེ་རྒུས་བསྟེན་པའི་ཚེ། །འདི་ཕྱིའི་དོན་གཉིས་འགྲུབ་པ་དང་། །མཉམ་དུ་ཡོན་ཏན་ཕུན་སུམ་ཚོགས། །མཚན་ལྡན་བླ་མ་དམ་པ་ལ། །བརྟེན་ནས་གསོལ་བ་བཏབ་(༣༢)པའི་ཚེ། །ཅི་བསམ་ཆོས་སུ་འགྲུབ་པ་དང་། །མཉམ་དུ་དངོས་གྲུབ་ཐམས་ཅད་འགྲུབ། །གླུ་དཔེ་བཞི་དོན་དང་རྣམ་པ་བརྒྱད། །བཀྲ་ཤིས་བདེ་ལེགས་འབྱུང་བ་འདི། །ཐེག་པ་མཆོག་གི་རྣལ་འབྱོར་པ། །ཀློང་ཆེན་རབ་འབྱམས་བཟང་པོས་སྦྱར། །དགེ་བས་མཐའ་ཡས་འགྲོ་བ་ཀུན། །ཐེག་པ་མཆོག་ལ་རབ་ཞུགས་ནས། །དཔལ་མགོན་བླ་མ་མཉེས་བྱེད་ཅིང་། །ཉིན་མཚན་ཆོས་ཀྱིས་འདའ་བར་ཤོག །ༀ་ཨཱཿཧཱུྃ་བྱས་ནས། ཐམས་ཅད་བདེ་ཆེན་སངས་རྒྱས་ཞིང་། །སྣང་བ་རྒྱ་གྲོལ་རྣལ་འབྱོར་ལགས། །ཆོས་ཟེར་བ་འདི་བྱས་ཀྱང་ཆོག་ལ་བཞག་ཀྱང་ཆོག །ནན་ཏར་བྱས་ན་བྱ་རྒྱུ་མེད་པ་ལགས། །ནོར་བུ་ཉི་མ་མ་ཞེས་བྱ་བ་རྡོ་རྗེའི་གླུ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས། རྣམ་གྲོལ་ཟླ་བ་ཞེས་བྱ་བས་བསྐུལ་བའི་ངོར་སྦྱར་བ་རྫོགས་སོ།། །།

༈ ན་མོ་གུ་རུ་བྷྱཿ དགོས་འདོད་མ་ལུས་འབྱུང་བའི་གནས། །དངོས་གྲུབ་རིན་ཆེན་ཆར་འབེབས་པའི། །དཔལ་མགོན་བླ་མ་རིན་པོ་ཆེ། །མི་འབྲལ་སྤྱི་གཙུག་རྒྱན་དུ་བཞུགས། །ཕ་ཡུལ་སྤངས་ནས་རི་ཁྲོད་འགྲིམ། །ཚེ་འདིའི་བྱ་བ་རྒྱབ་ཏུ་བསྐྱུར། །ཐར་པ་དམ་པའི་ལྷ་ཆོས་བྱས། །འདུན་མ་རྩེ་མོར་ཕྱིན་པ་ལགས། །ཕྱོགས་རིས་མེད་པའི་ཐོས་བསམ་བྱས། །ཐེ་ཚོམ་བློ་ཡི་མུན་པ་བསལ། །ཆོས་དང་ཆོས་མིན་བླང་དོར་ཤེས། །འདུན་མ་རྩེ་མོར་ཕྱིན་པ་ལགས། །མཚན་ལྡན་བླ་མ་རྣམས་དང་མཇལ། །དཔག་ཏུ་མེད་པའི་མོས་གུས་སྐྱེས། །བྱིན་རླབས་ཉམས་དང་རྟོགས་པ་ཤར། །འདུན་མ་རྩེ་མོར་ཕྱིན་པ་ལགས། །འཁོར་བ་འཁྲུལ་པའི་རང་བཞིན་ལ། །ངེས་འབྱུང་སྐྱོ་ཤས་དྲག་པོ་སྐྱེས། །མི་རྟག་འཆི་བས་བསྐུལ་མ་བཏབ། །འདུན་མ་རྩེ་མོར་ཕྱིན་པ་ལགས། །ཚེ་འདིའི་འཁྲུལ་སྣང་བྱ་བ་ཀུན། །ཐམས་ཅད་བྱས་པ་དོན་མེད་མཐོང་། །མ་བྱས་ཆོས་ལ་བཙན་ས་བཟུང་། །འདུན་མ་རྩེ་མོར་ཕྱིན་པ་ལགས། །ནོར་ཡོད་ཀུན་གྱིས་སྡུག་བསྔལ་མཐོང་། །ནོར་མེད་སེམས་ཀྱི་རྒྱན་དུ་ཤར། །ཆོག་ཤེས་འཕགས་པའི་ནོར་དང་ལྡན། །འདུན་མ་རྩེ་མོར་ཕྱིན་པ་ལགས། །རང་དོན་བདག་འཛིན་འཆིང་བ་བཅད། །གཞན་དོན་བྱང་ཆུབ་སེམས་ལ་སྦྱངས། །གཉིས་དོན་སྣང་བ་ཆོས་ལ་བསྒྱུར། །འདུན་མ་རྩེ་མོར་ཕྱིན་པ་ལགས། །ཡངས་སོ་ཆེའོ་ཆོས་ཀྱི་དབྱིངས། །ནམ་མཁའ་འདྲ་སྟེ་སྤྲོས་དང་བྲལ། །ལྟ་བ་རྟོགས་པའི་ཚད་དུ་ཕྱིན། །འདུན་མ་རྩེ་མོར་ཕྱིན་པ་ལགས། །བདེའོ་གསལ་ལོ་མི་རྟོག་དང་། །ཉི་ཟླ་འདྲ་སྟེ་འོད་རེ་གསལ། །སྒོམ་པ་དག་པའི་ཚད་དུ་ཕྱིན། །འདུན་མ་རྩེ་མོར་ཕྱིན་པ་ལགས། །ཐམས་ཅད་རང་སྣང་གཟུང་འཛིན་བྲལ། །སྒྱུ་མ་འདྲ་སྟེ་བདེན་ཞེན་མེད། །སྤྱོད་པ་འབྱོངས་པའི་ཚད་དུ་ཕྱིན། །འདུན་མ་རྩེ་མོར་ཕྱིན་པ་ལགས། །རང་རིག་དྲི་མེད་ཆོས་ཀྱི་སྐུ། །ནོར་བུ་འདྲ་སྟེ་ལྷུན་གྱིས་གྲུབ། །འབྲས་བུ་དག་པའི་ཚད་དུ་ཕྱིན། །འདུན་མ་ལེགས་པའི་བྲོ་(༣༣)བརྡུང་འདི། །ཆོས་ཐེག་པ་མཆོག་གི་རྣལ་འབྱོར་པ། །གུ་ཡངས་ཡན་པ་བློ་བདེས་བླངས། །དགེ་བས་ཁམས་གསུམ་ཡོངས་གྲོལ་ཤོག །གཞས་དགའ་ཡོ་སྐྱིད་དོ་རྡོ་རྗེའི་སྤུན། །རང་སྣང་དམ་པའི་ཆོས་ལ་བསྒྱུར། །ༀ་དང་མ་ཎི་པདྨེ་ཧཱུྃ་ཧྲཱིཿཡ། ༀ་མ་ཎི་པདྨེ་ཧཱུྃ། གུ་ཡངས་པའི་སྣང་བའི་བདེ་ཞད་ལ། །ཡན་པ་བློ་བདེའི་སྣང་བའི་བདེ་ཞད་ལ། །མ་རིག་པའི་མུན་པ་སངས་ཞད་ལ། །ཞེས་པ་འདི་ཉིད་སློབ་དཔོན་རིན་ཆེན་ཤེས་རབ་ལ་གསུངས་པའོ།། །།

༈ དངོས་གྲུབ་ཐམས་ཅད་འབྱུང་བའི་གནས། །བདེ་ཆེན་ཐར་པའི་གྲོང་ཁྱེར་དུ། །མ་ལུས་འགྲོ་ཀུན་འདྲེན་མཛད་པའི། །དཔལ་མགོན་བླ་མའི་ཞབས་ལ་འདུད། །གདོད་ནས་དག་པ་ཆོས་ཀྱི་དབྱིངས། །འགྱུར་བ་མེད་པ་དེ་བཞིན་ཉིད། །བློ་བྲལ་ནམ་མཁའ་ལྟ་བུ་ནི། །གཞི་གདོད་ནས་དག་པ་ཆོས་སྐུ་ལགས། །གནས་ལུགས་རྟོགས་པ་རིག་པའི་ངང་། །ཕྱི་ནང་ཡུལ་མེད་ཟང་ཀ་མ། །ཡེ་བབས་མ་བཅོས་དགོངས་པ་འདི། །ལམ་བསམ་བརྗོད་འདས་པའི་རང་བཞིན་ལགས། །ཡེ་སངས་རྒྱས་པའི་རིག་པ་ལ། །ཡང་སངས་རྒྱས་པའི་རྟོགས་པ་འཁྲུངས། །སྒྲིབ་མེད་ཟང་ཐལ་གཅེར་བུ་འདི། །འབྲས་བུ་རེ་དོགས་བྲལ་བ་ལགས། །གཞི་ལམ་འབྲས་གསུམ་རྡོ་རྗེའི་གླུ། །ཕྱོགས་མེད་ཡན་པ་བློ་བདེས་བླངས། །ལྷུན་གྲུབ་གླིང་གི་གནས་སུ་སྦྱར། །དགེ་བས་འཁོར་བ་དོང་སྤྲུགས་ཤོག །གཅིག་གཉིས་གསུམ་བྱས་ནས། །གནས་ལུགས་རྟོགས་པའི་རྣལ་འབྱོར་པ་ལགས་སོ། །གཉིས་གསུམ་དྲུག་བྱས་ནས། ཟད་སར་སྐྱོལ་བའི་རྣལ་འབྱོར་པ་ལགས་སོ། །གཞི་ལམ་འབྲས་གསུམ་རྡོ་རྗེའི་གླུ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་རྟོགས་ལྡན་བྱང་རྡོར་གྱིས་བསྐུལ་བའི་ངོར་བཀོད་པ་རྫོགས་སོ།། །།

༈ རླབས་ཆེན་ཚོགས་གཉིས་རབ་རྫོགས་ཤིང་། །ཐུགས་རྗེ་ཡིད་བཞིན་སྤྲིན་ཚོགས་ལས། །བྱིན་རླབས་དངོས་གྲུབ་ཆར་འབེབས་པའི། །བླ་མ་ཀུན་ལ་གསོལ་བ་འདེབས། །འཁོར་བ་སྡུག་བསྔལ་རྒྱ་མཚོ་ལས། །ཐར་པ་དམ་པའི་ལམ་ཞུགས་ནས། །རང་དོན་བདག་འཛིན་འཆིང་བ་བཅད། །ཉན་ཐོས་ཐེག་པ་ལྷུན་གྱིས་གྲུབ། །གཟུང་བ་ཡུལ་གྱི་ཆོས་རྣམས་ཀུན། །སྣང་ལ་ཞེན་མེད་ཆུ་ཟླ་འདྲ། །རྟེན་འབྲེལ་བསྒོམས་པས་ཉོན་མོངས་གྲོལ། །རང་རྒྱལ་ཐེག་པ་ལྷུན་གྱིས་གྲུབ། །གཞན་དོན་བརྩོན་པས་གོ་བགོས་ཏེ། །ཚོགས་གཉིས་ཤིང་རྟའི་ལམ་ཞུགས་ནས། །ཆོས་ཀུན་མཁའ་ལྟར་རྣམ་དག་པས། །བྱང་སེམས་ཐེག་པ་ལྷུན་གྱིས་གྲུབ། །སྒོ་གསུམ་རྟག་པར་དགེ་བ་ཡིས། །རབ་དཀར་ཟབ་མོའི་ཆོས་ལ་བརྩོན། །བྱ་བས་དངོས་གྲུབ་མཆོག་ལ་སྦྱོར། །ཀྲི་ཡའི་ཐེག་པ་ལྷུན་གྱིས་གྲུབ། །ལུས་དང་ངག་སེམས་(༣༤)རབ་ཞི་བས། །རིག་གསུམ་སྙིང་པོའི་དོན་ཆེན་སྒྲུབ། །དཔག་མེད་སྤྱོད་པ་རླབས་ཆེ་བས། །ཨུ་པའི་ཐེག་པ་ལྷུན་གྱིས་གྲུབ། །ཆོས་ཀུན་ཡེ་ནས་མངོན་བྱང་ལྔས། །ཏིང་འཛིན་རྒྱལ་པོ་རབ་བརྟན་ཞིང་། །རྣལ་འབྱོར་དམ་པ་རབ་བསྒྲུབ་པས། །ཡོ་གའི་ཐེག་པ་ལྷུན་གྱིས་གྲུབ། །སྣང་སྲིད་ཡེ་ནས་སངས་རྒྱས་ཞིང་། །དཀྱིལ་འཁོར་གསུམ་དུ་རབ་རྟོགས་ནས། །རིམ་གཉིས་ཟབ་གསལ་གཉིས་སུ་མེད། །མཧཱའི་ཐེག་པ་ལྷུན་གྱིས་གྲུབ། །ཐམས་ཅད་དབྱིངས་དང་ཡེ་ཤེས་ངང་། །ཐབས་དང་ཤེས་རབ་གཉིས་སུ་མེད། །བདེ་སྟོང་ཡེ་ཤེས་ཟུང་འཇུག་ངང་། །ཨ་ནུའི་ཐེག་པ་ལྷུན་གྱིས་གྲུབ། །སྣང་སྲིད་འཁོར་འདས་ཆོས་རྣམས་ཀུན། །ཐམས་ཅད་རང་བྱུང་ཡེ་ཤེས་ངང་། །རྒྱུ་འབྲས་བྱ་རྩོལ་གཉིས་མེད་པས། །ཨ་ཏིའི་ཐེག་པ་ལྷུན་གྱིས་གྲུབ། །ཐེག་པ་རིམ་དགུའི་ཆོས་གཞས་འདི། །གུ་ཡངས་ཡན་པ་བློ་བདེས་བླངས། །དགེ་བས་མ་ལུས་འགྲོ་བ་ཀུན། །ཕྱམ་གཅིག་སངས་རྒྱས་འགྲུབ་པར་ཤོག །ༀ་དང་ཨཱཿདང་ཧཱུྃ་དང་བྱས་ནས། དོན་གཉིས་འགྲུབ་པའི་རྣལ་འབྱོར་པ་ལགས་སོ། །གཅིག་གཉིས་གསུམ་བྱས་ནས། གནས་ལུགས་རྟོགས་པའི་རྣལ་འབྱོར་པ་ལགས་སོ། །ཐེག་པ་རིམ་དགུ་མ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས། ལྷུན་གྲུབ་གླིང་གི་དབེན་གནས་སུ་སྦྱར་བའོ།། །།

ཐེག་པ་རིམ་དགུ་མ་འདི་དགེ་འདུན་རིན་ཆེན་མིང་སྲིང་གཉིས་ཀྱིས་བསྐུལ་བའི་དོན་དུ་གསུངས་པ་དགེའོ།། །།

༈ དཔལ་ལྡན་སངས་རྒྱས་པདྨ་སྐྱེས། །མཁའ་འགྲོ་འབར་བའི་སྤྲིན་འཕྲོ་ཞིང་། །དངོས་གྲུབ་རིན་ཆེན་ཆར་འབེབས་པ། །རང་བྱུང་པདྨའི་ཞབས་ལ་འདུད། །ཕྱི་རུ་བལྟས་པས་སྣང་བའི་ཡུལ། །ཐམས་ཅད་ཨོ་རྒྱན་མཁའ་འགྲོའི་གནས། །འགྲོ་ཀུན་ལྷ་དང་ལྷ་མོའི་ཚུལ། །རང་སེམས་སྣང་བའི་བདེ་ཞད་ལ། །ནང་དུ་བལྟས་པས་རིག་པའི་ངང་། །གང་ཤར་རང་གྲོལ་འཛིན་པ་མེད། །ཆོས་ཟད་བློ་འདས་ཡེ་ཤེས་ངང་། །རང་སེམས་སྣང་བའི་བདེ་ཞད་ལ། །ཕར་ལ་བལྟས་པས་སྒྱུ་མའི་ཡུལ། །གང་སྣང་བདེན་མེད་རྨི་ལམ་ཙམ། །རང་སྣང་གདོད་མའི་དབྱིངས་སུ་གྲོལ། །རང་སེམས་སྣང་བའི་བདེ་ཞད་ལ། །ཚུར་ལ་བལྟས་པས་སྒྱུ་མའི་ལུས། །ཆུ་ཟླ་མིག་ཡོར་སྣང་བ་ཙམ། །བདེན་མེད་སྟོང་པའི་རང་གཟུགས་གཅིག །རང་སེམས་སྣང་བའི་བདེ་ཞད་ལ། །ཡར་ལ་བལྟས་པས་མྱ་ངན་འདས། །ཆོས་སྐུ་ཡེ་ནས་སངས་རྒྱས་པས། །མཁའ་ལྟར་དྲི་མེད་རྣམ་པར་དག །རང་སེམས་སྣང་བའི་བདེ་ཞད་ལ། །མར་ལ་བལྟས་པས་སྲིད་པའི་ཆོས། །ཁམས་གསུམ་རྨི་ལམ་སྒྱུ་མ་ཙམ། །སྣང་བཞིན་སྟོང་པས་གཞི་བྲལ་ངང་། །རང་སེམས་སྣང་བའི་བདེ་ཞད་ལ། །ལུས་ལ་བལྟས་པས་ལྷ་ཡི་སྐུ། །བར་སྣང་དག་པའི་འཇའ་ཚོན་བཞིན། །སྣང་(༣༥)ལ་རང་བཞིན་མེད་པའི་ངང་། །རང་སེམས་སྣང་བའི་བདེ་ཞད་ལ། །ངག་ལ་བལྟས་པས་སྔགས་ཀྱི་སྒྲ། །གྲགས་སྟོང་སྐྱེ་མེད་བྲག་ཆ་བཞིན། །གྲགས་པ་རང་བཞིན་མེད་པའི་ངང་། །རང་སེམས་སྣང་བའི་བདེ་ཞད་ལ། །སེམས་ལ་བལྟས་པས་ཆོས་ཉིད་ངང་། །སྟོང་གསལ་དག་པའི་ནམ་མཁའ་བཞིན། །བློ་བྲལ་རྫོགས་པ་ཆེན་པོའི་ངང་། །རང་སེམས་སྣང་བའི་བདེ་ཞད་ལ། །གཤིས་ལ་བལྟས་པས་གདོད་མའི་ངང་། །རང་བྱུང་ཡེ་ཤེས་མཐའ་དབུས་བྲལ། །དོན་དམ་པདྨ་འབྱུང་གནས་ངང་། །རང་སེམས་སྣང་བའི་བདེ་ཞད་ལ། །སེམས་ལ་བལྟས་པས་གཟུང་འཛིན་མེད། །ཡངས་སོ་ཆེའོ་རྒྱལ་བའི་ཐུགས། །ཀུན་བཟང་དགོངས་པར་ལྷུན་གྱིས་གྲུབ། །རང་སེམས་སྣང་བའི་བདེ་ཞད་ལ། །གང་ལ་བལྟས་ཀྱང་ཆོས་ཟད་ངང་། །ལྷུག་པ་ཕྱལ་པ་བར་མཚམས་མེད། །རྒྱ་གྲོལ་ནམ་མཁའ་ཕྱམ་ཕྱམ་གཅིག །རང་སེམས་སྣང་བའི་བདེ་ཞད་ལ། །གང་བལྟས་གུ་ཡངས་བློ་བདེའོ། །པདྨ་རྒྱལ་དང་འདུ་འབྲལ་མེད། །བསམ་རྒུའི་རེ་བ་འགྲུབ་པ་ལགས། །རང་སེམས་སྣང་བའི་བདེ་ཞད་ལ། །གཅིག་གཉིས་གསུམ་བྱས་ནས། ཨོ་རྒྱན་གུ་རུའི་གཅེས་ཕྲུག་ལགས། །གསུམ་དྲུག་དགུ་བྱས་ནས། སངས་རྒྱས་བསྟན་པ་དར་བ་ལགས། །ༀ་བཛྲ་གུ་རུ་པདྨ་སིདྡྷི་ཨཱཿཧཱུྃ་ཧྲཱིཿ ཨོ་རྒྱན་བྱིན་རླབས་རྡོ་རྗེའི་གླུ། །ཕྱོགས་མེད་ཡན་པ་བློ་བདེ་ཡིས། །དད་ལྡན་སྐྱེ་བོའི་ཚོགས་ལ་འབུལ། །དགེ་བས་སྐུ་ལྔ་ལྷུན་གྲུབ་ཤོག །ཨོ་རྒྱན་བྱིན་རླབས་མ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས། ལྷུན་གྲུབ་གླིང་གི་གནས་མཆོག་ཏུ་གསུངས་པའི་ཕྲིན་ལས་ཕུན་སུམ་ཚོགས་པར་གྱུར་ཅིག། །།

༈ རྒྱལ་སྲས་བླ་མ་ཉིད་ལྷུན་གྲུབ་གླིང་དུ་བཞུགས་པའི་དུས་སུ་སྐལ་ལྡན་འགའ་ཡིས་ཞུས་པ། ཆང་འདི་ངོ་ལྐོག་ཙམ་ལས་ཐམས་ཅད་འཐུངས་ཀྱང་། སྒོས་སུ་སྒོམ་ཆེན་པ་ཁོ་ནས་འཐུང་ཞེས་བཀའ་གདམས་འདུལ་འཛིན་ལ་སོགས་པའི་གྲྭ་ས་པ་རྣམས་ཁ་ཟེར་བར་གདའ་བས། ཐམས་ཅད་འཐུང་བའི་རྒྱུ་མཚན་དང་། ཆང་གི་ཡོན་ཏན་ལེགས་པ་ཞིག་ཆོས་གཞས་སུ་མཛད་པར་ཞུ་ཞེས་ཞུས་པའི་ལན་དུ། ཆང་གི་བྱུང་རབས་ཡོན་ཏན་བརྗོད་པ་བདུད་རྩིའི་ཟིལ་མངར་ལ་རྡོ་རྗེའི་གླུ་གསུངས་པ། ན་མོ་གུ་རུ། ཆང་གི་ཡོན་ཏན་ལ་བསྔགས་པ། དཔལ་རྡོ་རྗེ་ཕག་མོ་ལ་ཕྱག་འཚལ་ལོ། །ཆང་གི་མེས་པོ་རྡོ་རྗེ་འཆང་ཆེན་དང་། །བླ་མ་ཡི་དམ་མཁའ་འགྲོའི་ཚོགས་རྣམས་མཆོད། །སྐལ་བཟང་རྣམས་ཀྱི་བཏུང་བའི་མཆོག་གྱུར་པའི། །བདུད་རྩི་ཆང་གི་ཡོན་ཏན་བཤད་ཀྱི་ཉོན། །ཡིད་འོང་མཐོ་རིས་ལྷ་ཡི་གྲོང་ཁྱེར་ནས། །བདུད་རྩིའི་ཐིགས་པ་མཆོག་གཅིག་ལྷུང་བ་ནི། །འཛམ་གླིང་སྐྱེ་བོ་ཡོངས་ཀྱི་(༣༦)བསོད་ནམས་ལས། །འབྲུ་རྣམས་བཅུད་ཆགས་ཆང་གི་དྭངས་མར་གྱུར། །ཁ་དོག་རོ་ལྡན་སྦྲང་རྩི་ལྟ་བུ་ལ། །དྲི་བསུང་ཕུན་ཚོགས་ལྷ་ཡི་བདུད་རྩི་བཞིན། །མཐོང་ན་ཡིད་དགའ་བསྟེན་པས་འབྲལ་མི་ཕོད། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །འཐུང་བས་བདེ་བ་མྱང་ན་ཞིམ་པ་སྟེ། །ཁོང་དུ་སོང་ན་ལུས་སེམས་མཆོག་ཏུ་བདེ། །སྣང་བ་བདེ་ཁྲོལ་ཆོས་ཉིད་རྟོགས་པ་འདྲ། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །འཐུངས་པའི་རྗེས་ལ་བློ་བདེ་རང་མལ་དུ། །རྟོག་མེད་ངང་ལ་རྒྱ་ཡན་གཉིད་ཕེབས་པས། །ཏིང་འཛིན་འོད་གསལ་བསམ་གཏན་འབྱོངས་པ་འདྲ། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །འཐུང་བའི་མོད་ལ་དགའ་བའི་གཏམ་རྣམས་དང་། །ཡིད་འོང་སྙན་པའི་གླུ་དབྱངས་དུ་མ་འབྱུང་། །གཞན་ལ་མི་འཇིགས་སྤོབས་པ་དཔག་ཏུ་མེད། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །རོ་མཆོག་བརྒྱ་ལྡན་བདུད་རྩི་ཆང་ཉིད་ལ། །གཙོ་བོའི་རོ་མཆོག་མངར་སྐྱུར་ཁ་བ་གསུམ། །ཕྱོགས་སུ་མ་ཆད་གཅིག་ལ་ཀུན་ཚང་བས། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །དང་པོ་མངར་བ་ཅུང་ཟད་སྐྱུར་བའི་རོ། །འབོལ་ཞིང་འཁྲིལ་བ་ཁ་བས་འབྲལ་མི་ཕོད། །བརྟགས་ཤིང་ངོ་མཚར་རོ་མཆོག་དཔག་ཏུ་མེད། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །འཐུང་བས་ལུས་བདེ་གཟི་བརྗིད་འཕྲལ་ལ་སྐྱེ། །མགྲིན་པའི་མཚོ་རྡོལ་གྲེ་འགྱུར་ཕུན་སུམ་ཚོགས། །སྣང་བ་ཡིད་བདེ་སེམས་ལ་དགའ་བ་རྙེད། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །འདུ་བ་སྙོམས་ཤིང་ནད་རྣམས་ཀུན་ལ་ཕན། །ཁྱད་པར་བད་རླུང་འདུས་པ་སེལ་བས་ན། །སྨན་རྣམས་ནང་ནས་བདུད་རྩི་སྨན་གྱི་མཆོག །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །གང་དུ་འཕྲད་ན་བྲེལ་བའང་དལ་གྱུར་ཞིང་། །འཐུང་བའི་མོད་ལ་སེམས་ཀྱི་སྡུག་བསྔལ་འགག །ཉིན་མཚན་ཡུན་ཐུང་སོང་བ་མི་ཚོར་བས། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །སྐྱིད་སྡུག་ཀུན་ལ་རང་བཞིན་དགོས་པ་དང་། །ཆེ་ཆུང་ཀུན་གྱིས་ཡོངས་སུ་སྤྱོད་པ་དང་། །གཞི་བྱེས་ཀུན་ཏུ་མེད་ཐབས་མེད་པའི་ཕྱིར། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །དོན་རྣམས་སྒྲུབ་ཀྱང་གླེང་བའི་གཞིར་དགོས་ལ། །མཛའ་བཤེས་འདུན་ཀྱང་ངོ་དགའི་སྐྱེས་སུ་དགོས། །གཉེན་འདུན་ཚོགས་ཀྱང་སྣ་ལེན་ཕྱིར་དགོས་པས། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །མཐོན་པོར་གྱུར་པའི་མི་དབང་རྒྱལ་པོ་ནས། །བླ་མ་མཆོག་དང་བཤེས་གཉེན་མཁས་རྣམས་དང་། །ཁྲིམས་ལ་དབང་བའི་མི་ཆེན་ཆེ་རྒུས་བསྟེན། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །ཡུལ་ཁམས་སོ་སོའི་གྲོང་གི་མི་རྣམས་དང་། །སྡེ་དགོན་ཕལ་དང་དབེན་པའི་རི་ངོགས་ནའང་། །ལོངས་སྤྱོད་ཀུན་གྱི་གཞི་མདོར་བསྟེན་པས་ན། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །སྒྲིན་པོར་རློམ་པའི་བཀའ་གདམས་འདུལ་འཛིན་དང་། །མཚན་ཉིད་པ་དང་ཇོ་གདན་ལ་སོགས་ཀྱང་། །ལྐོག་ཏུ་འཐུང་ཞིང་སྲེད་པ་སུ་(༣༧)བས་ཆེ། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །སྐྱེས་པ་རྣམས་ཀྱང་ཅི་ཡོད་ཆང་ལ་འཇལ། །བུད་མེད་རྣམས་ཀྱང་བལ་སྐུད་གཏེ་བོར་འཇོག །ཡོན་ཏན་མཁན་རྣམས་བཟོ་ཡི་ཚབ་ཏུ་འཇོག །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །སྔགས་བོན་རྣམས་ཀྱང་རྔ་ཤང་རིན་དུ་འཇལ། །བཙུན་པ་རྣམས་ཀྱང་བཙུན་ཆས་ཚབ་ཏུ་འཇོག །གྲུབ་ཆེན་རྣམས་ཀྱང་ཉི་མ་གཏེ་བོར་འཇོག །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །གསང་སྔགས་ཟབ་མོའི་སྒྲུབ་རྫས་ཡིན་པ་དང་། །དབང་དང་བྱིན་རླབས་ཆོས་སྒོ་འབྱེད་པ་དང་། །བསྐྱེད་རྫོགས་ལམ་གྱི་མཐུན་རྐྱེན་ཡིན་པའི་ཕྱིར། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །བླ་མ་ཡི་དམ་མཁའ་འགྲོ་མཆོད་པ་དང་། །སྲུང་མ་དམ་ཅན་རྒྱ་མཚོ་བསྟེན་པ་དང་། །ཚོགས་ཀྱི་འཁོར་ལོའི་ལོངས་སྤྱོད་ཡིན་པའི་ཕྱིར། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །དཔའ་བོ་མཁའ་འགྲོའི་ཚོགས་རྣམས་འདུ་བ་དང་། །རྣལ་འབྱོར་དབང་ཕྱུག་ཚོགས་རྣམས་དགྱེས་པ་དང་། །ཚོགས་གཉིས་རྫོགས་པའི་དམ་རྫས་ཡིན་པའི་ཕྱིར། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །མི་རྣམས་ཀུན་ཀྱང་དགའ་བས་བསྟེན་པ་དང་། །འདྲེ་རྣམས་ཀུན་ཀྱང་ཞིམ་པས་ཁྱེར་བ་དང་། །ལྷ་རྣམས་ཀུན་ཀྱང་དགྱེས་པས་རོལ་པའི་ཕྱིར། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །དྭངས་མ་འཕེལ་བས་ལུས་སེམས་བདེ་བ་དང་། །བདེ་དྲོད་བསྐྱེད་པས་ཏིང་འཛིན་འཕེལ་བ་དང་། །རིག་ངར་ཐོན་པས་རྟོགས་པ་འཆར་བའི་ཕྱིར། །ཞིམ་མངར་ཆང་གི་ཡོན་ཏན་ཕུན་སུམ་ཚོགས། །དེ་ལ་སོགས་པའི་ཡོན་ཏན་དཔག་ཏུ་མེད། །བརྗོད་ཀྱིས་མི་ལང་ལྷ་ཡི་བདུད་རྩི་བཞིན། །མི་ཡུལ་བཏུང་བའི་རོ་མཆོག་དམ་པ་འདི། །རང་གཞན་ཀུན་གྱིས་དགྱེས་ཤིང་རོལ་པར་མཛོད། །ཚུལ་འདི་སྣང་བ་རྒྱ་ཡན་རྣལ་འབྱོར་པ། །རིག་པ་གུ་ཡངས་ཡན་པ་བློ་བདེས་བླངས། །དགེ་བ་འདི་ཡིས་བདག་དང་འགྲོ་བ་ཀུན། །ཉིན་མཚན་ཀུན་ཏུ་དགའ་བདེ་ཕྱམ་བརྡལ་ཤོག །ཆང་གི་ཡོན་ཏན་ལ་བསྔགས་པ་བདུད་རྩིའི་ཟིལ་མངར་མ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་མཛད་པའོ། །སྣང་བ་ཀུན་བན་མ་བུན་མ། རིག་པ་ཀུན་ཕྱད་མ་ཕྱོད་མ། རང་རྒྱུད་ཀུན་ཤག་མའི་ཤིག་མ། རང་སེམས་ཀུན་ཁྲལ་མའི་ཁྲོལ་མ། དགའ་ཡལ་ལེ། སྐྱིད་ཆིལ་ལེ། བན་མ་བུན་མར་ཡ། ཕྱད་མ་ཕྱོད་མར་ཡ། ཤག་མ་ཤིག་མར་ཡ། ཁྲལ་མ་ཁྲོལ་མར་ཡ། རྒྱོབ་རྒྱོབ་རྒྱོབ། བདུད་རྩི་ཆང་གི་རྦ་ཀློང་དེ་ལ་ཅོང་ངེ་བ་གཅིག་རྒྱོབ། ཞོང་ངེ་བ་གཅིག་གསོལ། ཁྲོལ་ལེ་བ་གཅིག་མཆོད། ཅེས་གསུངས་སོ། །དགེའོ།། །།

༈ ཡང་ཆོས་རྗེ་བླ་མ་ཉིད་ལྷུན་གྲུབ་གླིང་དུ་བཞུགས་དུས་སྐལ་ལྡན་རྣམས་ལ་གཏད་མེད་རྡོ་རྗེའི་གླུ་འདི་གསུངས་སོ། །ན་མོ་གུ་རུ་བྷྱཿ གཏད་མེད་ཡོངས་གྲོལ་ཆོས་ཀྱི་རྗེ། །(༣༨)དྲིན་ཆེན་བླ་མའི་ཞབས་ལ་འདུད། །མཆོག་དང་ཐུན་མོང་ལ་སོགས་པའི། །དངོས་གྲུབ་ཀུན་འབྱུང་ཨེ་མ་ཧོ། །ཡོད་ཡོད་འདྲ་ལ་མེད་བཞིན་སྣང་། །འཁོར་འདས་སྒྱུ་མ་རང་སྣང་ཆོས། །གདོད་ནས་གཞི་རྩ་བྲལ་བའི་ངང་། །མ་འགགས་འཆར་ཚུལ་ཨེ་མ་ཧོ། །བདེན་བདེན་འདྲ་ལ་མི་བདེན་པ། །འཁོར་བ་འཁྲུལ་པ་བསླུ་བའི་ཆོས། །བརྟགས་ན་གཞི་མེད་སྟོང་པའི་ངང་། །མེད་པ་གསལ་སྣང་ཨེ་མ་ཧོ། །རྫུན་རྫུན་འདྲ་ལ་མི་རྫུན་པ། །མྱ་ངན་འདས་པ་བདེན་པའི་ཆོས། །སྐུ་དང་ཡེ་ཤེས་བླ་མེད་ངང་། །མཐར་ཐུག་འཐོབ་བྱ་ཨེ་མ་ཧོ། །གྲུབ་གྲུབ་འདྲ་ལ་མ་གྲུབ་པ། །རང་བྱུང་ཡེ་ཤེས་རིག་པའི་ཆོས། །སྟོང་གསལ་མ་འགགས་ཆོས་དབྱིངས་ངང་། །ཀུན་གྱི་འབྱུང་གནས་ཨེ་མ་ཧོ། །ལྟོས་ཤིག་ལྟོས་ཤིག་མ་ལྟ་ཞིག །བལྟས་ན་ལྟ་བ་ཡུལ་དང་བཅས། །མ་བལྟས་རིག་པའི་དབྱིངས་མི་མཐོང་། །བལྟས་ལ་མ་བལྟས་ཨེ་མ་ཧོ། །སྒོམས་ཤིག་སྒོམས་ཤིག་མ་བསྒོམས་ཤིག །བསྒོམ་ན་དམིགས་གཏད་བློ་དང་བཅས། །མ་བསྒོམས་སེམས་ཉིད་དོན་མི་མཐོང་། །བསྒོམ་ལ་མ་བསྒོམས་ཨེ་མ་ཧོ། །སྤྱོད་ཅིག་སྤྱོད་ཅིག་མ་སྤྱད་ཅིག །སྤྱད་ན་གཉིས་འཛིན་རིགས་དང་བཅས། །མ་སྤྱད་དགག་སྒྲུབ་སྙེམས་མི་ཆོད། །སྤྱད་ལ་མ་སྤྱད་ཨེ་མ་ཧོ། །ཐོབ་ཅིག་ཐོབ་ཅིག་མ་ཐོབ་ཅིག །ཐོབ་ན་ཐོབ་བྱེད་གཉིས་དང་བཅས། །མ་ཐོབ་མཐར་ཐུག་འབྲས་མི་རྙེད། །ཐོབ་ལ་མ་ཐོབ་ཨེ་མ་ཧོ། །གྱིས་ཤིག་གྱིས་ཤིག་མ་བྱེད་ཅིག །བྱས་ན་བྱ་རྩོལ་འཁོར་བའི་ཆོས། །མ་བྱས་ཐར་ལམ་བསྒྲོད་དུས་མེད། །བྱས་ལ་མ་བྱས་ཨེ་མ་ཧོ། །ཡིན་ལ་མིན་པ་ཡིན་པའི་ཆོས། །གཏད་མེད་ཡོངས་གྲོལ་རྫོགས་པ་ཆེ། །རྒྱུ་འབྲས་འདས་པའི་བློ་ལ་སྦྱོངས། །མ་སྤངས་དག་པ་ཨེ་མ་ཧོ། །ཡོད་ལ་མེད་པ་ཡོད་པའི་ཆོས། །རང་བྱུང་འོད་གསལ་ངང་ལ་ལྟོས། །ཐམས་ཅད་སྐུ་དང་ཡེ་ཤེས་ངང་། །མ་བཙལ་ལྷུན་གྲུབ་ཨེ་མ་ཧོ། །སྟོང་ལ་སྣང་བ་སྟོང་པའི་ཆོས། །རང་སྣང་ཆོས་ཟད་གདོད་མར་ཕྱིན། །སྣང་གསལ་ལྷུན་གྲུབ་རིན་ཆེན་སྦུབས། །ཀུན་བཟང་ཆོས་སྐུ་ཨེ་མ་ཧོ། །འགལ་འགལ་འདྲ་ལ་མི་འགལ་བ། །གླུ་འདི་གཏད་མེད་རྡོ་རྗེའི་གླུ། །གུ་ཡངས་ཡན་པ་བློ་བདེས་བླངས། །དགེ་བས་ཁམས་གསུམ་ཡོངས་གྲོལ་ཤོག །གཏད་མེད་ཡོངས་གྲོལ་རྡོ་རྗེའི་གླུ། རྣལ་འབྱོར་པ་ཀློང་ཆེན་རབ་འབྱམས་ཀྱིས་གསུངས་པ་དགེའོ། །གནས་ལུགས་རྟོགས་པ་ཨེ་མ་ཧོ། །ཟད་སར་སྐྱོལ་བ་ཨེ་མ་ཧོ། །དོན་གཉིས་ལྷུན་གྲུབ་ཨེ་མ་ཧོ། །ཨེ་མ་ཧོ་སྟེ་ངོ་མཚར་ཆེ། །དགེའོ། །དགེའོ། །དགེའོ།། །།

༈ ཆོས་རྗེ་བླ་མ་ཉིད་ལྷུན་གྲུབ་གླིང་གི་གནས་ན་བཞུགས་པའི་དུས། ཁྲིད་ཀྱི་དགའ་སྟོན་གྱི་ཚེ་སྐལ་ལྡན་རྣམས་ལ་མཁའ་འགྲོ་དོན་གྱི་དགོངས་པ་རྡོ་རྗེའི་གླུ་འདི་གསུངས་(༣༩)སོ། །ན་མོ་གུ་རུ་བྷྱཿ དངོས་གྲུབ་རིན་ཆེན་ཆར་འབེབས་པ། །ཡིད་བཞིན་བླ་མ་རིན་པོ་ཆེ། །ཡི་དམ་མཁའ་འགྲོའི་ཚོགས་ལ་འདུད། །ངོ་མཚར་བྱིན་རླབས་ཨ་ལ་ལ། །ཐེག་པ་རིམ་དགུའི་མཐར་ཐུག་དོན། །ཡང་གསང་རྫོགས་པ་ཆེན་པོའི་རྩེ། །ཆོས་རྗེ་བླ་མའི་བཀའ་དྲིན་གྱིས། །ཟད་སར་སྐྱོལ་བ་ཨ་ལ་ལ། །མ་བཙལ་ལྷུན་གྱིས་གྲུབ་པའི་གཞི། །མ་བགྲོད་ཡེ་ནས་ཉེ་བའི་ལམ། །མ་བསྒྲུབས་གདོད་ནས་གྲུབ་པའི་འབྲས། །རང་ལ་རྙེད་པ་ཨ་ལ་ལ། །ཆོས་དབྱིངས་མཁའ་འགྲོའི་ཞིང་ཁམས་སུ། །རྡོ་རྗེ་མཁའ་འགྲོའི་མེ་ལོང་ལ། །རིན་ཆེན་མཁའ་འགྲོའི་སྣང་བ་ཤར། །པདྨའི་སྤྱན་གཟིགས་ཨ་ལ་ལ། །ལས་ཀྱི་མཁའ་འགྲོ་ཐོགས་མེད་ངང་། །ཀུན་བཟང་ དགོངས་པ་ཟང་ཐལ ་ལེ། །སྟོང་གསལ་ལྷུན་གྲུབ་ཀ་དག་དབྱིངས། །མངོན་དུ་གྱུར་པ་ཨ་ལ་ལ། །དབྱིངས་ཉིད་ཀ་ནས་དག་པའི་ཡུལ། །སྟོང་གསལ་ནམ་མཁའ་ཡངས་པ་འདི། །ཆོས་དབྱིངས་མཁའ་འགྲོའི་ཞིང་ཁམས་ལགས། །ཕྱི་ནང་དབྱིངས་གཅིག་ཨ་ལ་ལ། །སྒོ་འདི་གཟུང་འཛིན་དག་པའི་སྒོ། །རྒྱ་མཚོ་དྭངས་པའི་རང་བཞིན་འདི། །རྡོ་རྗེ་མཁའ་འགྲོའི་མེ་ལོང་ལགས། །ཕྱི་ནང་ཟང་ཐལ་ཨ་ལ་ལ། །གཞི་སྣང་རིག་པའི་ལྷུན་གྲུབ་གདངས། །སྐུ་དང་ཡེ་ཤེས་རང་སྣང་འདི། །རིན་ཆེན་མཁའ་འགྲོའི་སྣང་བ་ལགས། །སྟོང་གསལ་འཛིན་མེད་ཨ་ལ་ལ། །རང་སྣང་མ་ཡེངས་གཟིགས་པས་དག །ཕྱི་ནང་ངང་གནས་བསམ་གཏན་འདི། །པདྨ་མཁའ་འགྲོའི་སྤྱན་མཆོག་ལགས། །མ་ཆགས་ཏིང་འཛིན་ཨ་ལ་ལ། །མ་འགགས་ཤེས་རབ་ཐོགས་མེད་ངང་། ། ཟང་ཐལ་དགོངས་པ ་རང་གྲོལ་འདི། །ལས་ཀྱི་མཁའ་འགྲོའི་ཐོགས་མེད་ངང་། །ཆོས་དབྱིངས་གདོད་མར་ཨ་ལ་ལ། །ཀ་ནས་དག་པའི་རིག་པ་ལ། །འཕེལ་འགྲིབ་མེད་བཞིན་འཕེལ་དང་ཟད། །སྣང་བཞི་ཆོས་སྐུ་རང་མལ་དུ། །རླུང་སེམས་དག་ཚུལ་ཨ་ལ་ལ། །གཞི་ལས་མ་གཡོས་གདོད་མའི་ངང་། །དགོངས་པ་ཆོས་ཉིད་བར་མེད་དུ། །མ་ཡེངས་མི་གནས་འཁོར་འདས་གྲོལ། །རང་བྱུང་ཡེ་ཤེས་ཨ་ལ་ལ། །བླ་མེད་རྫོགས་པ་ཆེན་པོའི་དོན། །དབང་པོ་ཡང་རབ་སྤྱོད་ཡུལ་འདི། །སྐལ་ལྡན་རྣམས་ཀྱིས་ཉམས་སུ་ལོངས། །ཚེ་འདིར་གྲོལ་བ་ཨ་ལ་ལ། །མཁའ་འགྲོ་འདུས་པ་རྡོ་རྗེའི་གླུ། །ཀློང་ཆེན་རབ་འབྱམས་བཟང་པོས་བླངས། །དགེ་བས་འཁོར་བ་དོང་སྤྲུགས་ཏེ། །བཀྲ་ཤིས་ཕུན་ཚོགས་ཨ་ལ་ལ། །མཁའ་འགྲོ་འདུས་པ་རྡོ་རྗེའི་གླུ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཡན་པ་བློ་བདེས་བླངས་པ། གླུ་འདི་ཆོས་ཉིད་དོན་གྱི་གླུ། །བྲོ་འདི་མཁའ་འགྲོ་འདུས་པའི་བྲོ། །བླ་མ་ཡི་དམ་བྱིན་རླབས་ཡོད། །མཁའ་འགྲོ་ཆོས་སྐྱོང་ཆགས་པ་ལགས། དགེའོ།། །།(༤༠)

༈ ཡང་ཆོས་རྗེ་བླ་མ་ཉིད་ལྷུན་གྲུབ་གླིང་ན་བཞུགས་པའི་ཚེ། སྒོམ་ཆེན་རི་ཁྲོད་དུ་སྡོད་མ་ཟུག་པ་ཁ་ཅིག་འཁྱམས་སུ་འགྲོ་བ་ལ་རྡོ་རྗེའི་མགུར་འདི་གསུངས་པ། ན་མོ་གུ་རུ་བྷྱཿ དབེན་པའི་གནས་སུ་དངོས་གྲུབ་བརྙེས། །བླ་མ་གྲུབ་ཐོབ་རྣམས་ལ་འདུད། །བདེ་སྐྱིད་རི་ཁྲོད་གནས་ན་ཡོད། །གོང་མ་རྣམས་ཀྱང་རི་ཁྲོད་བསྟེན། །མ་ཚུགས་འཁྱམས་པའི་སྒོམ་ཆེན་ཀུན། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཀློང་རྡོལ་གྱི་སྒོམ་ཁང་ཁྱེར་ལགས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །དགྲ་ཀུན་གྱི་གནོད་འཚེ་བྱུང་ལགས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཁྲལ་དང་གཙེར་བ་བྱུང་ལགས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །གྲོང་དགོན་གྱི་ཁ་འཛིན་མཛད་ལགས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཁྱི་ཟ་ལོང་སྤྲང་མཛད་ལགས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཚོང་དང་སོ་ནམ་མཛད་ལགས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །མི་ཆོས་ཀྱི་འདུན་མ་མཛད་ལགས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །གྲོང་དགོན་གྱི་ཆགས་སྡང་རྩོད་ལགས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །འཇིག་རྟེན་གྱི་ཁ་ལོ་བསྒྱུར་ལགས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །འཇིག་རྟེན་གྱི་བྲེལ་དོ་ཤོམ་ལགས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཆོས་མིན་གྱི་ཀུན་སྤྱོད་སྐྱོང་ལགས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །རྣམ་གཡེང་འདུ་འཛི་མ་སྤངས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །སྙིང་ནས་བསམ་མནོ་ལེགས་པོ་ཐོངས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཚེ་འདིའི་འཁྲུལ་པས་རིག་པ་བསླུ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །འཇིག་རྟེན་ཆོས་ལ་སྙིང་པོ་མེད། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །མི་རྟག་འཆི་བ་མྱུར་དུ་འོང་། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །འགྲོས་མོ་ཆེ་ལ་ཅི་ཕན་ནམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །སྐྱས་མོ་ཆེ་ལ་ཅིས་སྟོངས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །བེམས་རིག་བྲལ་ཚེ་ཅི་བྱེད་དམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །བར་དོའི་འཕྲང་ལ་ཅིས་སྟོངས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཕྱི་མའི་ལམ་སྣ་ཨེ་ཟིན་ནམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །སེམས་ཉིད་གཏན་ལ་ཨེ་ཕེབས་སམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །གཏན་གྱི་འདུན་མ་ཨེ་གྲུབ་བམ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །གོང་མའི་རྣམ་ཐར་བསྐྱང་ན་ལེགས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །སྒྲུབ་པ་སྙིང་པོར་བྱས་ན་ལེགས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །སྒོམ་པ་ཡུན་དུ་བསྲིང་ན་ལེགས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ངེས་འབྱུང་སྐྱོ་ཤས་སྐྱེས་ན་ལེགས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །(༤༡)སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཉིན་མཚན་རྟག་ཏུ་བརྩོན་ན་ལེགས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཅིས་ཀྱང་དགོས་མེད་བསམ་ན་ལེགས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཆགས་མེད་ཞེན་མེད་སྐྱང་ན་ལེགས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཚེ་འདི་བློ་ཡིས་བཏང་ན་ལེགས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །སྙིང་རུས་སྡུག་སྲན་བསྐྱེད་ན་ལེགས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །སྐྱེས་པ་འཆི་ཞིང་འདུས་པ་འབྲལ། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །བསགས་པ་འཛད་ཅིང་མཐོན་པོ་ལྷུང་། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །གང་ལའང་སྙིང་པོ་མེད་ལ་ལྟོས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ཕྱོགས་བཅུར་མ་འཁྱམས་བསྡད་ན་ལེགས། །མཚམས་དང་འདག་སྦྱར་བྱས་ན་ལེགས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །ད་རེས་དོན་ཆེན་བསྒྲུབ་ན་ལེགས། །ད་དུང་རི་ཁྲོད་བསྟེན་ན་ལེགས། །བདེ་སྐྱིད་རི་ཁྲོད་གནས་ན་ཡོད། །སྒོམ་ཆེན་ཚོ་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་མ་ལས། ཤ་ཚ་གྲོས་སུ་འདེབས་པའི་ལེའུ་སྟེ་དང་པོའོ།། །།

ཡང་གཅིག་གསོན་དང་སྐལ་ལྡན་ཀུན། །འདུ་འཛིའི་གནས་ན་བདེ་བ་མེད། །དེ་ལ་བསྟེན་པའི་ཉེས་པ་མང་། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་སྡུག་བསྔལ་གྱི་བཙོན་ར་ཆེ། །སྡེ་དགོན་ན་གཟུང་འཛིན་གྱི་འཆིང་བ་དམ། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་དུག་ལྔའི་འཁྲུག་རྩོད་མང་། །སྡེ་དགོན་ན་ཆགས་སྡང་གི་ཟུག་རྔུ་ཆེ། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་ལས་ངན་གྱི་སྡོང་པོ་རྒྱས། །སྡེ་དགོན་ན་ཉོན་མོངས་ཀྱི་མེ་ཏོག་བཀྲ། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་འཁྲུལ་སྣང་གི་ཕྱ་ཕྱོ་མང་། །སྡེ་དགོན་ན་འདོད་ཆགས་ཀྱི་ཚ་རིམས་འབར། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་ཚེ་འདིས་བྲེལ་དོས་ཟིན། །སྡེ་དགོན་ན་ཆོས་མིན་གྱི་བྱ་བས་གཡེངས། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་ཁྲལ་དམག་གི་གཙེར་བས་དེད། །སྡེ་དགོན་ན་ལས་སྣའི་ཟེར་གྱིས་བཀོལ། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་འཐབ་རྩོད་ཀྱི་འཁྲུག་ལོང་མོད། །སྡེ་དགོན་ན་ནང་ཚན་གྱི་ཆགས་སྡང་ཆེ། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོལ་ཡུལ་ན་ཕྱོགས་རིས་ཀྱི་ཆགས་སྡང་རྩོད། །སྡེ་དགོན་ན་དོན་མེད་ཀྱི་ཁེ་དྲག་འཐེན། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་རྟག་ཏུ་རྣམ་གཡེང་ཆེ། །སྡེ་དགོན་ན་ཉིན་མཚན་འདུ་འཛིས་འདའ། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་སོ་ཚིས་ཀྱི་བྱ་བས་བྲེལ། །སྡེ་དགོན་ན་ཚོང་དང་སོ་ནམ་གྱིས་གཡེངས། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་གཟའ་ཚང་གི་སྐྱོང་དགོས་མང་། །སྡེ་དགོན་ན་དཔོན་སློབ་ཀྱི་སེམས་ལས་ཆེ། །དེང་(༤༢)སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་སྲུང་སྡོམ་གྱི་གཉེན་པོ་འཆོར། །སྡེ་དགོན་ན་ཉོན་མོངས་ཟག་པ་འཕེལ། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་ཚེ་འདི་དོན་དུ་གཉེར། །སྡེ་དགོན་ན་ཆོས་བརྒྱད་ཀྱི་ཁུར་པོ་ཆེ། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་ན་མི་ཚེ་སྟོང་པར་ཟད། །སྡེ་དགོན་ན་ཐ་མལ་ངང་དུ་འཆི། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །གྲོང་ཡུལ་གྱི་གནས་ལ་སྐྱོ་བ་སྐྱེས། །སྡེ་དགོན་གྱི་གནས་ལ་ཡིད་འབྱུང་སྐྱེས། །དེང་སང་རི་ཁྲོད་འགྲིམ་ན་ལེགས། །བདེ་སྐྱིད་རི་ཁྲོད་དབེན་པར་ཡོད། །བདེ་སྐྱིད་རི་ཁྲོད་མ་ལས། གྲོང་ཡུལ་གྱི་ཉེས་པ་བསྟན་པའི་ལེའུ་སྟེ་གཉིས་པའོ།། །།

ཡང་ཅིག་གསོན་དང་སྐལ་ལྡན་ཀུན། །གང་ལ་བསམས་ཀྱང་སྙིང་པོ་མེད། །ཅི་ལ་བསམས་ཀྱང་སྐྱོ་བ་སྐྱེས། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །དབེན་ཞིང་ཉམས་དགའ་རིག་པ་འཛིན། །སྨན་ལྗོངས་ནགས་དང་གངས་རིས་མཛེས། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །ཕུག་དང་བྲག་རིའི་ཁང་བཟང་ན། །སྨན་ཤིང་མེ་ཏོག་འབྲས་བུས་བརྒྱན། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །རྩྭ་དང་ལོ་མའི་ཁང་བཟང་དང་། །ཆུ་གཙང་ཡན་ལག་བརྒྱད་ལྡན་འབབ། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །ཡིད་འོང་བུང་བས་སྙན་སྒྲོག་ཅིང་། །བྱ་དང་རི་དྭགས་མང་པོས་གང་། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །ངང་གི་ཆོས་འཕེལ་རིག་པ་དྭངས། །དུས་བཞི་འགྱུར་བས་བློ་སྣ་ཐུང་། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །དགྲ་གཉེན་གང་དང་མ་འབྲེལ་བས། །ཆགས་སྡང་ཟག་པ་ངང་གིས་མེད། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །ཆེ་ཆུང་གང་དང་མ་འབྲེལ་པས། །ངོ་སྲུང་སེམས་འཛིན་སྡུག་བསྔལ་མེད། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །སྐྱེ་བོ་གཞན་དང་མ་འབྲེལ་བས། །ཟོག་དང་ཚུལ་འཆོས་ངང་གིས་མེད། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །གཅིག་པུར་རང་དབང་ཆོས་ལ་ཐོབ། །སུས་ཀྱང་ཚེ་འདིར་འཆིང་མཁན་མེད། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །འཇིག་རྟེན་རྣམ་གཡེང་འདུ་འཛི་མེད། །ཆགས་སྡང་ཉོན་མོངས་ངང་གིས་འགྲིབ། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །སྤྱོད་ལམ་དུས་དྲུག་ཐམས་ཅད་དུ། །ཉིན་མཚན་རྟག་ཏུ་ཆོས་ཀྱིས་འདའ། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །མི་རྟག་འཆི་བ་རྗེས་སུ་དྲན། །དད་དང་ངེས་འབྱུང་སྐྱོ་ཤས་སྐྱེ། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །ཚེ་འདིའི་ཆོས་དང་རྒྱང་བསྲིང་བས། །རྟག་ཏུ་བྱ་རྒྱུ་ཆོས་ལས་མེད། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །རྟག་ཏུ་ཆོས་ལ་དམིགས་པའི་ཕྱིར། །སྤྱོད་ལམ་ཐམས་ཅད་དགེ་བར་འགྱུར། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །མཁས་གྲུབ་བླ་མ་མཆོག་ལ་བསྟེན། །རྟག་པར་ཆོས་མཛད་གྲོགས་དང་འགྲོགས། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །སྙིང་ནས་མོས་གུས་གདུང་སེམས་བསྐྱེད། །བླ་མ་མཁའ་འགྲོས་བྱིན་གྱིས་རློབས། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །རྟག་ཏུ་སྒྲུབ་པ་སྙིང་པོར་བྱེད། །(༤༣)ཉམས་དང་རྟོགས་པ་ངང་གིས་འཆར། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །བྱས་པ་གཅིག་ལ་དོན་ཆེ་བས། །མི་ལུས་རིན་ཆེན་དོན་དང་བཅས། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །ཚེ་འདིར་ཡང་བདེ་སྟེ་ཕྱི་མའང་བདེ། །གཏན་དུ་བདེ་ལ་སྤྱོད་པ་ཡིན། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །རྒས་ཤིང་རི་ཁྲོད་ཇེ་མཐོར་ཐོངས། །སྐལ་ལྡན་ཀུན་གྱིས་དེ་བཞིན་མཛོད། །རི་ངོགས་དབེན་པར་སྒོམ་དུ་གཤེགས། །བདེ་སྐྱིད་རི་ཁྲོད་ཀྱི་གནས་ན་ཡོད། །བདེ་སྐྱིད་རི་ཁྲོད་རྡོ་རྗེའི་གླུ། །གུ་ཡངས་ཡན་པ་བློ་བདེས་བླངས། །དགེ་བས་མཁའ་མཉམ་འགྲོ་བ་ཀུན། །མངོན་པར་བྱང་ཆུབ་སངས་རྒྱས་ཤོག །བདེ་སྐྱིད་རི་ཁྲོད་མ་ལས། ཡོན་ཏན་བསྔགས་པའི་ལེའུ་སྟེ་གསུམ་པའོ།། །།

བདེ་སྐྱིད་རི་ཁྲོད་མ་ཞེས་བྱ་བ། ཕྱོགས་མེད་ཀྱི་རྣལ་འབྱོར་པ་སྣ་ཚོགས་རང་གྲོལ་གྱིས་གསུངས་པའོ། །རྣལ་འབྱོར་ངས་ཀྱང་རི་ཁྲོད་འགྲིམ། །སྐལ་ལྡན་ཀུན་ཀྱང་རི་ཁྲོད་ལ་གཤེགས། །རྟག་ཏུ་རི་ཁྲོད་དབེན་པ་བསྟེན། །གཏན་གྱི་དོན་ཆེན་བསྒྲུབ་པར་འཚལ། །དགེའོ། །དགེའོ། །དགེའོ།། །།

༈ ཆོས་རྗེ་བླ་མ་ཉིད་ལྷུན་གྲུབ་གླིང་ན་བཞུགས་པའི་ཚེ། སྐལ་ལྡན་རྣམས་ལ་མྱ་ངན་ཆོས་ཉིད་དུ་གྲོལ་བ་རྡོ་རྗེའི་གླུ་འདི་བླངས་སོ། །ན་མོ་གུ་རུ་བྷྱཿ བདེ་ཆེན་འགྱུར་མེད་ཆོས་སྐུའི་ངང་། །རྟག་ཏུ་འཕོ་འགྱུར་མེད་པར་བཞུགས། །ཐུགས་རྗེས་འགྲོ་བ་འདྲེན་མཛད་པ། །ཀུན་བཟང་བླ་མའི་ཞབས་ལ་འདུད། །ཆོས་ཀུན་ཡེ་ནས་མ་སྐྱེས་པས། །མཉམ་རྫོགས་བྱང་ཆུབ་སེམས་ཀྱི་ཀློང་། །མྱ་ངན་གཞི་མེད་སྟོང་པའི་ངང་། །མི་དགའ་བྱ་བའི་མིང་ཡང་མེད། །རིག་སྟོང་གདོད་ནས་རྣམ་དག་པས། །ཐམས་ཅད་ཟབ་མོ་ཆོས་ཉིད་ཀློང་། །མྱ་ངན་གཞི་མེད་སྟོང་པའི་ངང་། །མི་དགའ་བྱ་བའི་མིང་ཡང་མེད། །ཆོས་དབྱིངས་མཁའ་ལྟར་སྟོང་གསལ་ངང་། །དུས་གསུམ་འཕོ་འགྱུར་མེད་པའི་ཀློང་། །ཡིད་མི་བདེ་བ་མཐའ་གྲོལ་ངང་། །མི་དགའ་བྱ་བའི་མིང་ཡང་མེད། །སེམས་ཉིད་གཉུག་མ་ཁྱབ་བརྡལ་བས། །འོད་གསལ་རང་བྱུང་ཡེ་ཤེས་ཀློང་། །ཟུག་རྔུ་གཞི་བྲལ་ཆོས་ཉིད་ངང་། །མི་དགའ་བྱ་བའི་མིང་ཡང་མེད། །མྱ་ངན་སེམས་ཀྱིས་བཟོས་པ་ཡིན། །སྡུག་བསྔལ་བློ་ཡིས་བཏགས་པ་ཡིན། །ཟུག་རྔུ་རང་གི་བྱས་པ་ཡིན། །མི་དགའ་བྱ་བའི་མིང་ཡང་མེད། །མི་དགར་འཛིན་པ་རང་གི་སེམས། །དེ་ལ་ཁ་དོག་དངོས་པོ་མེད། །ལྟོས་དང་སྟོང་གསལ་ནམ་མཁའ་འདྲ། །མི་དགའ་བྱ་བའི་མིང་ཡང་མེད། །ཁྲོ་བར་འཛིན་པ་རང་གི་སེམས། །དཔྱད་ན་གཞི་རྩ་དངོས་པོ་མེད། །ལྟོས་དང་མཁའ་ལ་རླངས་ཡལ་འདྲ། །མི་དགའ་བྱ་བའི་མིང་ཡང་མེད། །ཡིད་ཆད་ཡིད་འབྱུང་རང་གི་སེམས། །གཞིག་ན་ཡེ་སྟོང་དངོས་པོ་མེད། །ལྟོས་དང་བར་སྣང་སྟོང་པ་འདྲ། །མི་དགའ་བྱ་བའི་མིང་ཡང་མེད། །སྐྱོ་བར་འཛིན་པ་རང་གི་སེམས། །བརྟགས་ན་ཡུལ་མེད་སྟོང་པ་ཉིད། །ལྟོས་(༤༤)དང་ནམ་མཁའ་རྣམ་དག་འདྲ། །མི་དགའ་བྱ་བའི་མིང་ཡང་མེད། །འཇིགས་པར་འཛིན་པ་རང་གི་སེམས། །བཙལ་ན་མི་རྙེད་ཕྱོགས་ན་མེད། །ལྟོས་དང་མཁའ་ལ་སྤྲིན་དེངས་འདྲ། །མི་དགའ་བྱ་བའི་མིང་ཡང་མེད། །མཐོ་དམན་རེ་དོགས་རང་གི་སེམས། །བྱུང་བའི་དུས་ན་དོན་མེད་ལ། །ལྟོས་དང་བར་སྣང་འཇའ་ཚོན་འདྲ། །མི་དགའ་བྱ་བའི་མིང་ཡང་མེད། །ལེགས་ཉེས་བདེ་སྡུག་རང་གི་སེམས། །སྣང་བའི་དུས་ན་རང་བཞིན་མེད། །ལྟོས་དང་མཁའ་ལ་ཚེ་གཟུགས་འདྲ། །མི་དགའ་བྱ་བའི་མིང་ཡང་མེད། །འགྱོད་ཅིང་གདུང་བ་རང་གི་སེམས། །ཕྱི་ནང་བར་མེད་ངོས་བཟུང་བྲལ། །ལྟོས་དང་ནམ་མཁའ་ཡངས་པ་འདྲ། །མི་དགའ་བྱ་བའི་མིང་ཡང་མེད། །གནས་ལུགས་གཞི་མེད་དུ་བསྟན་པའི་ལེའུ་སྟེ་དང་པོའོ།། །།

ཡང་ཅིག་ལྟོས་དང་རིག་པའི་ངང་། །གང་ལྟར་ཤར་ཡང་གདོད་མའི་དབྱིངས། །གནས་ལུགས་དོན་གྱི་གསལ་འདེབས་ཡིན། །མི་དགའ་བྱ་བའི་མིང་ཡང་མེད། །དགག་སྒྲུབ་གཉིས་ཀྱི་གསལ་འདེབས་ཡིན། །དེ་ཀའི་ངང་ལ་ཚུར་ལྟོས་དང་། །ཤར་གྲོལ་རྗེན་པར་ཟང་ཐལ་ལེ། །མི་དགའ་བྱ་བའི་མིང་ཡང་མེད། །བདེ་སྡུག་རིག་པའི་གསལ་འདེབས་ཡིན། །དེ་ཀའི་ངང་ལ་ཚུར་ལྟོས་དང་། །རང་གསལ་གདོད་མར་རྗེན་ཁྲེས་སེ། །མི་དགའ་བྱ་བའི་མིང་ཡང་མེད། །རྐྱེན་ངན་ཆོས་ཉིད་གསལ་འདེབས་ཡིན། །དེ་ཀའི་ངང་ལ་ཚུར་ལྟོས་དང་། །ཆོས་ཟད་གདོད་མར་སྟོང་སང་ངེ། །མི་དགའ་བྱ་བའི་མིང་ཡང་མེད། །བར་ཆད་གེགས་སར་གསལ་འདེབས་ཡིན། །དེ་ཀའི་ངང་ལ་ཚུར་ལྟོས་དང་། །འཁུ་འཁྲིག་རང་གྲོལ་གདེང་ཡེ་རེ། །མི་དགའ་བྱ་བའི་མིང་ཡང་མེད། །གསལ་འདེབས་བོགས་འབྱིན་དུ་བསྟན་པའི་ལེའུ་སྟེ་གཉིས་པའོ།། །།

ཡང་ཅིག་ལྟོས་དང་གདོད་མའི་ངང་། །ཐམས་ཅད་ཡེ་ནས་སངས་རྒྱས་པ། །མྱ་ངན་སྡུག་བསྔལ་སྐུ་བཞིའི་ངང་། །མི་དགའ་བྱ་བའི་མིང་ཡང་མེད། །མྱ་ངན་སེམས་ལ་ཚུར་ལྟོས་དང་། །གཞི་མེད་ཡེ་གྲོལ་ཆོས་ཟད་ངང་། །སྟོང་གསལ་ཆོས་སྐུར་དགའ་ཡལ་ལེ། །མི་དགའ་བྱ་བའི་མིང་ཡང་མེད། །སྡུག་བསྔལ་སེམས་ལ་ཚུར་ལྟོས་དང་། །རྟེན་མེད་རྩ་བྲལ་རང་སངས་ངང་། །མ་འགགས་ལོངས་སྐུར་དགའ་ཡལ་ལེ། །མི་དགའ་བྱ་བའི་མིང་ཡང་མེད། །ཟུག་རྔུའི་སེམས་ལ་ཚུར་ལྟོས་དང་། །དངོས་མེད་ཡེ་གྲོལ་རང་གྲོལ་ངང་། །རང་གྲོལ་སྤྲུལ་སྐུར་དགའ་ཡལ་ལེ། །

མི་དགའ་བྱ་བའི་མིང་ཡང་མེད། །མི་དགའི་སེམས་ལ་ཚུར་ལྟོས་དང་། །གནས་མེད་ཡེ་སྟོང་རྩ་བྲལ་ངང་། །ངོ་བོ་ཉིད་སྐུར་དགའ་ཡལ་ལེ། །མི་དགའི་བྱ་བའི་མིང་ཡང་མེད། །གླུ་འདི་ངོ་སྤྲོད་གསལ་འདེབས་ཡིན། །གུ་ཡངས་ཡན་པ་བློ་བདེས་བླངས། །དགེ་བས་མ་ལུས་འགྲོ་བ་ཀུན། །མྱ་ངན་འདས་པ་ཐོབ་པར་ཤོག །སྐུ་བཞིའི་ངོ་སྤྲོད་དུ་བསྟན་པའི་ལེའུ་སྟེ་གསུམ་པའོ།། །།

མྱ་ངན་གཞི་གྲོལ་རྡོ་རྗེའི་གླུ། རྣལ་འབྱོར་པ་ཀློང་ཆེན་རབ་འབྱམས་ཀྱིས་གསུངས་པ་དགེའོ། །གཅིག་གཉིས་གསུམ་བྱས་ནས། འཁོར་བ་ཡེ་ནས་མ་གྲུབ་པས། །མྱ་ངན་གཞི་(༤༥)ནས་ཡོད་མ་མྱོང་། །མི་དགའ་བྱ་བའི་མིང་ཡང་མེད། །ཆོས་ཉིད་ངང་དུ་དགའ་ཡལ་ལེ། །དགེའོ། །དགེའོ། །དགེའོ།། །།

༈ ན་མོ་གུ་རུ་བྷྱཿ ཆོས་རྗེ་བླ་མ་ཉིད་ལྷུན་གྲུབ་གླིང་ན་བཞུགས་པའི་དུས་སུ། སྐལ་ལྡན་རྣམས་ལ་བར་དོ་འཕྲང་སྒྲོལ་གྱི་མགུར་འདི་གསུངས་སོ། །རང་དོན་ཆོས་སྐུ་འགྱུར་མེད་ངང་། །གཞན་དོན་གཟུགས་སྐུའི་དོན་མཛད་པ། །ཀུན་བཟང་ཆོས་རྗེ་བླ་མ་དང་། །ཡི་དམ་མཁའ་འགྲོའི་ཞབས་ལ་འདུད། །རིག་པའི་ངང་ལ་བར་དོ་མེད། །ངང་ལ་མི་འགག་མེད་བཞིན་སྣང་། །མཁའ་ལ་འབྱུང་བཞིའི་འཕོ་འགྱུར་བཞིན། །བར་དོ་འཕྲང་སྒྲོལ་གླུ་འདི་ཉོན། །རིག་པ་ཀ་དག་ཆོས་སྐུ་ལ། །བར་དོ་བྱ་བ་ཡོད་མ་མྱོང་། །བར་དོ་འཁོར་འདས་རང་སྣང་ཡིན། །བར་དོའི་འཕྲང་ལས་གྲོལ་བ་ལགས། །སྐྱེ་ཤི་རྨི་ལམ་འཆི་ཁ་དང་། །སྲིད་པ་འཁོར་བའི་འཁྲུལ་སྣང་སྟེ། །ཏིང་འཛིན་ཆོས་ཉིད་མྱ་ངན་འདས། །བར་དོའི་འཕྲང་ལས་གྲོལ་བ་ལགས། །བར་དོ་བྱ་བ་རང་སྣང་ཡིན། །རང་སྣང་གཞི་མེད་སྟོང་པ་ཡིན། །སྟོང་གསལ་རིག་པའི་དོན་ལ་སྦྱོང་། །བར་དོའི་འཕྲང་ལས་གྲོལ་བ་ལགས། །ད་ལྟའི་ལུས་སེམས་སྣང་བ་འདི། །སྐྱེ་ཤི་བར་དོའི་རང་སྣང་ཡིན། །གཞི་མེད་སྟོང་པའི་རྩལ་སྦྱོང་མཛོད། །བར་དོའི་འཕྲང་ལས་གྲོལ་བ་ལགས། །རླུང་སེམས་ནང་འདུས་འཁྲུལ་སྣང་གཉིད། །རྨི་ལམ་བར་དོའི་རང་སྣང་ཡིན། །རྨི་ལམ་འོད་གསལ་རྩལ་སྦྱོང་མཛོད། །བར་དོའི་འཕྲང་ལས་གྲོལ་བ་ལགས། །བདེ་གསལ་མི་རྟོག་བསམ་གཏན་འདི། །ཏིང་འཛིན་བར་དོའི་རང་སྣང་ཡིན། །རང་གནས་ངང་དྭངས་རྩལ་སྦྱོང་མཛོད། །བར་དོའི་འཕྲང་ལས་གྲོལ་བ་ལགས། །ཕྲ་རགས་འབྱུང་བའི་ཐིམ་ཚུལ་འདི། །འཆི་ཁ་བར་དོའི་རང་སྣང་ཡིན། །མ་ཡེངས་གསལ་འདེབས་རྩལ་སྦྱོང་མཛོད། །བར་དོའི་འཕྲང་ལས་གྲོལ་བ་ལགས། །སྐུ་དང་ཡེ་ཤེས་འཆར་ཚུལ་འདི། །ཆོས་ཉིད་བར་དོའི་རང་སྣང་ཡིན། །རང་ངོ་ཤེས་པའི་རྩལ་སྦྱོང་མཛོད། །བར་དོའི་འཕྲང་ལས་གྲོལ་བ་ལགས། །སྐྱེ་འཆི་གཉིས་ཀྱི་འཁྲུལ་སྣང་འདི། །སྲིད་པ་བར་དོའི་རང་སྣང་ཡིན། །དབང་པོ་གསུམ་གྱི་རྩལ་སྦྱོང་མཛོད། །བར་དོའི་འཕྲང་ལས་གྲོལ་བ་ལགས། །བར་དོའི་འཆར་ཚུལ་སྣང་བ་ཀུན། །རང་བཞིན་མེད་པ་གསལ་སྣང་ཙམ། །གཞི་མེད་སྟོང་པའི་རྩལ་སྦྱོང་མཛོད། །བར་དོའི་འཕྲང་ལས་གྲོལ་བ་ལགས། །འཁྲུལ་སྣང་ཞེན་པ་རང་དག་ན། །སྐྱེ་ཤི་བར་དོ་འབྱོངས་པའི་ཚད། །ཆོས་དབྱིངས་ངོ་བོ་ཉིད་སྐུར་གྲོལ། །བར་དོའི་འཕྲང་ལས་གྲོལ་བ་ལགས། །གཉིད་དང་རྨི་ལམ་འོད་གསལ་འདྲེས། །རྨི་ལམ་བར་དོ་འབྱོངས་པའི་ཚད། །མི་རྟོག་ཆོས་ཀྱི་སྐུ་རུ་གྲོལ། །བར་དོའི་འཕྲང་ལས་གྲོལ་བ་ལགས། །དགོངས་པ་བར་དང་མཚམས་མེད་ན། །ཏིང་འཛིན་བར་དོ་འབྱོངས་པའི་ཚད། །མི་འགྱུར་རྡོ་རྗེའི་སྐུ་རུ་གྲོལ། །བར་དོའི་འཕྲང་ལས་གྲོལ་བ་ལགས། །གོམས་པའི་གདམས་ངག་རང་གསལ་ན། །འཆི་ཁ་བར་དོ་འབྱོངས་པའི་ཚད། །མངོན་པར་བྱང་ཆུབ་སྐུ་རུ་གྲོལ། །བར་དོའི་འཕྲང་ལས་གྲོལ་བ་ལགས། །རང་སྣང་འོད་གསལ་རང་ངོ་ཤེས། །ཆོས་ཉིད་བར་དོ་འབྱོངས་པའི་ཚད། །ལོངས་སྤྱོད་རྫོགས་(༤༦)པའི་སྐུ་རུ་གྲོལ། །བར་དོའི་འཕྲང་ལས་གྲོལ་བ་ལགས། །རྐྱེན་སྣང་ཐུག་ཕྲད་གདམས་པ་དྲན། །སྲིད་པ་བར་དོ་འབྱོངས་པའི་ཚད། །ཐུགས་རྗེ་སྤྲུལ་པའི་སྐུ་རུ་གྲོལ། །བར་དོའི་འཕྲང་ལས་གྲོལ་བ་ལགས། །ཕྱིར་སྣང་བར་དོའི་དབྱིངས་སུ་ཐིམ། །དབྱིངས་ཉིད་ཆོས་སྐུ་རང་གསལ་ངང་། །མཐར་ཐུག་འབྲས་བུ་ཐོབ་པ་ལགས། །བར་དོའི་འཕྲང་ལས་གྲོལ་བ་ལགས། །འཁོར་འདས་བར་དོའི་འཕྲང་གྲོལ་གླུ། །གུ་ཡངས་ཡན་པ་བློ་བདེས་བླངས། །དགེ་བས་མ་ལུས་འགྲོ་བ་ཀུན། །གདོད་མའི་དབྱིངས་སུ་གྲོལ་བར་ཤོག །བར་དོ་འཕྲང་གྲོལ་རྡོ་རྗེའི་གླུ། རྣལ་འབྱོར་པ་ཀློང་ཆེན་རབ་འབྱམས་ཀྱིས་གསུངས་པའོ། །ཆོས་རྗེ་བླ་མ་རིན་པོ་ཆེ། །བར་དོའི་འཕྲང་འདི་འཇིགས་པ་ཆེ། །བར་དོའི་འཕྲང་སྒྲོལ་གདམས་པ་ཞུ། །བར་དོ་གྲོལ་བར་བྱིན་གྱིས་རློབས། །དགེའོ། །དགེའོ། །དགེའོ།། །།

༈ རྒྱལ་སྲས་ཆོས་རྗེ་བླ་མ་ཉིད་ལྷུན་གྲུབ་གླིང་ན་བཞུགས་པའི་དུས་སུ། རང་གཞན་གྱི་སྣང་བ་ལ་ཐུགས་སྐྱོ་ཞིང་། སྦས་ཡུལ་བགྲོད་པའི་ལོ་དང་རྟགས་མཚན་མང་པོ་འཛོམ་པར་དགོངས་ཏེ། སྐལ་ལྡན་རྣམས་ལ་སྦས་ཡུལ་བགྲོད་པའི་རྡོ་རྗེ་གླུ་འདི་གསུངས་སོ། །ན་མོ་གུ་རུ་པདྨ་བཛྲ་ཡེ། ཆོས་སྐུ་ཀུན་བཟང་ལོངས་སྐུ་འོད་དཔག་མེད། །རང་བྱུང་སྤྲུལ་སྐུ་པདྨ་འབྱུང་གནས་ལ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །འདུ་འབྲལ་མེད་པར་བྱིན་(༤༦)གྱིས་བརླབ་ཏུ་གསོལ། །དེང་སང་དུས་ངན་ལྔ་བརྒྱ་ཐ་མ་ལ། །གང་དུ་བསམས་ཀྱང་ཡིད་འབྱུང་སྐྱོ་བ་སྐྱེ། །བདག་གི་སེམས་འདི་ནགས་རིའི་ཁྲོད་དགའ་བས། །སྦས་ཡུལ་རིན་ཆེན་བགྲོད་པའི་གླུ་འདི་ཉོན། །ཡུལ་རྣམས་ཀུན་ཀྱང་རང་བཞིན་འགྱུར་བ་ལ། །མི་རྣམས་ཀུན་ཀྱང་ལོ་རེས་གཤིས་འགྱུར་ཞིང་། །ཕྱོགས་རྣམས་ཀུན་ཀྱང་དམག་དང་འཁྲུག་ལོང་རྒྱས། །སྦས་ཡུལ་རིན་ཆེན་བགྲོད་པའི་དུས་ལ་བབས། །མི་དབང་རྒྱལ་པོའི་ཁྲིམས་ཀྱང་འཇིག་ཏུ་ཉེ། །སྡིག་སྤྱོད་སོག་པོ་རྣམས་ཀྱང་ཡོང་དུ་ཉེ། །རྒྱལ་བའི་བསྟན་པ་འདི་ཡང་ནུབ་ཏུ་ཉེ། །སྦས་ཡུལ་རིན་ཆེན་བགྲོད་པའི་དུས་ལ་བབས། །བདུད་རིགས་འབྱུང་པོ་ཡུལ་གྱི་དབུས་སུ་ཞུགས། །མི་རྣམས་འཁྲུག་ཅིང་ནད་མཚོན་མུ་གེ་དར། །གཅིག་གིས་གཅིག་འཇོམས་དཀོན་མཆོག་རྟེན་གསུམ་འཇིག །སྦས་ཡུལ་རིན་ཆེན་བགྲོད་པའི་དུས་ལ་བབས། །མི་རྣམས་བདེ་སྐྱིད་ཁྲིམས་གཉིས་གྲུ་ཆེན་ཞིག །བཙུན་པ་རྣམས་ཀྱང་དམག་ཁྲལ་འུ་ལགས་འབབ། །གྲོང་ཡུལ་གོག་ཅིང་སྡེ་དགོན་ཁྱིམ་པས་འཛིན། །སྦས་ཡུལ་རིན་ཆེན་བགྲོད་པའི་དུས་ལ་བབས། །དད་ལྡན་ཉུང་ཞིང་དགེ་བའི་གྲོལ་ཐུང་ནུབ། །ཆོས་བྱེད་དམོད་ཅིང་སྡིག་ཅན་བཀུར་བ་སྟེ། །རྒྱལ་བའི་རྟེན་ལ་བཀུར་སྟི་རིམ་གྲོ་མེད། །སྦས་ཡུལ་རིན་ཆེན་བགྲོད་པའི་དུས་ལ་བབས། །ཆོས་མཛད་དམ་པ་རྣམས་ནི་སྐུ་ཚེ་ཐུང་། །ཐོས་བསམ་སྒོམ་པའི་སྒྲོན་མེ་ནུབ་ཏུ་ཉེ། །སྡོམ་དང་དམ་ཚིག་ཚུལ་བཞིན་བསྲུང་བ་ཉུང་། །སྦས་ཡུལ་རིན་ཆེན་བགྲོད་པའི་དུས་ལ་བབས། །ཐམས་ཅད་ཀུན་ཀྱང་ངོ་ཚ་ཁྲེལ་ཡོད་འདོར། །(༤༧)རིགས་དང་མི་རིགས་དོན་ལ་དཔྱོད་པ་མེད། །སྲི་ཞུའི་གནས་ལ་བཀུར་སྟི་རིམ་གྲོ་མེད། །སྦས་ཡུལ་རིན་ཆེན་བགྲོད་པའི་དུས་ལ་བབས། །སྔོན་གྱི་དབེན་གནས་གཙུག་ལག་ཁང་རྣམས་གོག །མཆོད་པ་མེད་ཅིང་སྡིག་ཅན་རྣམས་ཀྱིས་འཛིན། །དཀོར་རྣམས་སྤྱོད་ཅིང་མར་འགྲོའི་ལས་ངན་སོག །སྦས་ཡུལ་རིན་ཆེན་བགྲོད་པའི་དུས་ལ་བབས། །མཐའ་མི་དབུས་ལྷུང་དབུས་རྣམས་མཐའ་རུ་འཆུག །མཐའ་དབུས་འཁྲུག་ཅིང་སྡུག་བསྔལ་རྔོན་སྐད་འདོན། །ཕྱོགས་རྣམས་གང་ནའང་བདེ་སྐྱིད་སྐབས་མེད་པས། །སྦས་ཡུལ་རིན་ཆེན་བགྲོད་པའི་དུས་ལ་བབས། །དད་ལྡན་དགེ་བ་ཅན་རྣམས་ཡིད་འབྱུང་ཞིང་། །དབེན་པར་མོས་པས་ཟབ་དོན་སྙིང་པོ་ཚོལ། །ལྷག་པར་རང་བྱུང་པདྨའི་ཆོས་ལ་མོས། །སྦས་ཡུལ་རིན་ཆེན་བགྲོད་པའི་དུས་ལ་བབས། །ཕྱོགས་བཞི་སྦས་ཡུལ་རིན་ཆེན་སྒོ་བཞི་ཡང་། །དམ་པ་འགའ་ཡིས་ལ་ལ་རྙེད་ཅེས་གྲགས། །ཐམས་ཅད་དེང་སང་རྙེད་པའི་དུས་མིན་པས། །སྦས་ཡུལ་རིན་ཆེན་བགྲོད་པའི་དུས་ལ་བབས། །སྙིང་ནས་ཆོས་མཛད་སྐྱེ་བོ་ཀུན་གྱིས་ཀྱང་། །ད་ལྟ་ཕྱིན་ན་རང་བཞིན་ཐར་བར་གསུངས། །ཕྱི་ནས་དཀའ་བས་དེང་སང་གཤེགས་རེ་རན། །སྦས་ཡུལ་རིན་ཆེན་བགྲོད་པའི་དུས་ལ་བབས། །སྦས་ཡུལ་དུ་བགྲོད་པའི་དུས་ཚིགས་བསྟན་པ་དང་། ལས་ཅན་རྣམས་སྤྱིར་བསྐུལ་བའི་ལེའུ་སྟེ་དང་པོའོ།། །།

ཡང་ཅིག་ཉོན་དང་སྤྲང་པོ་གུ་ཡངས་པ། །རང་དབང་ཐོབ་ཅིང་དོན་ཆུང་ཅི་ལ་ཆགས། །གང་ལ་བསམས་ཀྱང་སྐྱོ་བར་མ་མཐོང་ངམ། །སྦས་ཡུལ་རིན་ཆེན་གནས་སུ་ཕྱིན་ན་ལེགས། །ཆགས་སྡང་འདུ་འཛིའི་རྣམ་པར་གཡེང་བས་གཟེང་། །བདག་འཛིན་གནས་ཀྱིས་བདག་ལ་ཅི་བྱར་ཡོད། །མ་བྱས་རང་འཁྲུངས་བྲག་རིའི་ཁང་བཟང་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །ཡོད་ཅིང་ཆོག་ཤེས་མ་མཆིས་སེར་སྣ་འཕེལ། །སྒྱུ་མའི་ནོར་གྱིས་བདག་ལ་ཅི་བྱར་ཡོད། །དྲི་མེད་འཕགས་པའི་ནོར་བདུན་འབྱུང་བའི་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །ངོམས་ཤིང་ཚད་མེད་སྤྱད་ཅིང་སྲེད་པ་འཕེལ། །བཟའ་བཏུང་ལོངས་སྤྱོད་བདག་ལ་ཅི་བྱར་ཡོད། །དཀའ་ཐུབ་བཅུད་ལེན་ངང་གིས་འགྲུབ་པའི་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །དར་ཟབ་རས་དང་སྣམ་ཐེར་ལ་སོགས་པ། །མཛེས་སྒེག་གོས་ཀྱིས་བདག་ལ་ཅི་བྱར་ཡོད། །ངན་ངོན་ཙམ་གྱིས་གྲང་བ་སྐྱོབ་པའི་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །གང་ལ་ཞོན་ནས་ཕྱོགས་རྣམས་འགྲོ་བྱེད་པ། །རྟ་སོགས་ཞོན་པས་བདག་ལ་ཅི་བྱར་ཡོད། །རང་གི་གོམས་པས་ཕྱོགས་རྣམས་བགྲོད་པའི་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །བསླབ་ན་མི་ཉན་རྟག་ཏུ་ཟག་པ་འཕེལ། །དོན་མེད་འཁོར་གྱིས་བདག་ལ་ཅི་བྱར་ཡོད། །གཅིག་པུར་གུ་ཡངས་ཆོས་ལ་སྤྱོད་པའི་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །རྣམ་གཡེང་ལོག་སྒྲུབ་ཟུག་རྔུ་རྒྱུན་མི་ཆད། །བུ་སློབ་གྲྭ་པས་བདག་ལ་ཅི་བྱར་ཡོད། །སུས་ཀྱང་མི་འཆིང་རང་དབང་བདེ་དལ་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །རྟག་ཏུ་ངོ་སྲུང་སེམས་འཛིན་རྒྱུན་མི་ཆད། །ས་གནས་ཡོན་བདག་བདག་ལ་ཅི་བྱར་ཡོད། །གང་དང་མ་འབྲེལ་གཉེན་སྒྲུབ་འཆིང་བ་མེད། །སྦས་ཡུལ་རིན་ཆེན་བགྲོད་པའི་དུས་ལ་བབས། །(༤༨)བསྟོད་པས་ཚེ་རིང་ནད་མེད་ཆོས་འཕེལ་ལམ། །སྙན་དང་གྲགས་པས་བདག་ལ་ཅི་བྱར་ཡོད། །སུས་ཀྱང་མི་ཐོས་དགག་སྒྲུབ་མེད་པའི་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །ཟོལ་མེད་ཕན་པ་སྒྲུབ་ཀྱང་སྒྲོ་སྐུར་གཞི། །དུས་ངན་གཞན་དོན་བདག་ལ་ཅི་བྱར་ཡོད། །རྟག་ཏུ་རང་དོན་ཞི་བ་སྒྲུབ་པའི་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །འཁྲུལ་སྣང་འདུ་འཛི་གཟུང་འཛིན་འཁོར་བའི་ཆོས། །ཚེ་འདིས་སྣང་བས་བདག་ལ་ཅི་བྱར་ཡོད། །ཉིན་མཚན་རྟག་ཏུ་ཆོས་ཀྱིས་འདའ་བའི་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །ཕྱི་ནང་གི་རྐྱེན་ལ་མངོན་པར་སྐྱོ་བ་དང་། རང་ལ་དགོས་སུ་བསྐུལ་བའི་ལེའུ་སྟེ་གཉིས་པའོ།། །།

ཡང་ཅིག་སྦས་ཡུལ་རིན་ཆེན་བསྔགས་པ་ཉོན། །སྐྱིད་ཅིང་ཉམས་དགའ་ལྷ་ཡི་ཡུལ་ལྟ་བུ། །ཕྱི་རབས་དོན་དུ་རིན་ཆེན་གཏེར་དུ་སྦས། །སྦས་ཡུལ་རིན་ཆེན་གནས་སུ་སྒོམ་དུ་གཤེགས། །རི་མཐོ་ས་གཙང་མཐའ་དམག་གནོད་པ་མེད། །ཡུལ་ཡང་ཉམས་དགའ་བདེ་སྐྱིད་ཕུན་སུམ་ཚོགས། །རྟག་ཏུ་བཀྲ་ཤིས་ཡོན་ཏན་བསམ་མི་ཁྱབ། །སྦས་ཡུལ་རིན་ཆེན་བགྲོད་པའི་དུས་ལ་བབས། །སྨན་ལྗོངས་ནགས་ཚལ་གངས་རིའི་ཚོགས་མང་ཞིང་། །ཡིད་འོང་བྱ་དང་རི་དྭགས་མང་པོས་གང་། །ཆུ་རྒྱུན་གཙང་མའི་ལྷུང་སྒྲ་སྙན་པར་སྒྲོག །སྦས་ཡུལ་རིན་ཆེན་བགྲོད་པའི་དུས་ལ་བབས། །རི་རྩེ་ནགས་ཀྱི་མཐོངས་རྣམས་ཉམས་དགའ་ཞིང་། །སྦ་དང་འཁྲི་ཤིང་འོད་མའི་ར་བས་བསྐོར། །རྨ་བྱ་གར་བྱེད་ཁུ་བྱུག་སྙན་པར་སྒྲོག །བྲག་རིའི་ཕུག་དང་ལོ་མའི་ཁང་བཟང་དང་། །སྨྱུག་མའི་བསིལ་ཁང་དབེན་ཞིང་ཉམས་དགའ་བ། །ཤིང་ལོའི་མལ་སྟན་འཇམ་ཞིང་མཛེས་པས་བརྒྱན། །སྦས་ཡུལ་རིན་ཆེན་བགྲོད་པའི་དུས་ལ་བབས། །མ་རྨོས་ལོ་ཏོག་གྲོ་མ་འབྲུ་ཡིས་ཚོགས། །ཤིང་བལ་རེག་ན་བདེ་བའི་གོས་བཟང་གྱོན། །སྔོ་འོད་ཤིང་འབྲས་མང་པོའི་ཁ་ཟས་ལྡན། །སྦས་ཡུལ་རིན་ཆེན་བགྲོད་པའི་དུས་ལ་བབས། །དབྱར་བཞིན་དགུན་ཡང་མེ་ཏོག་མདངས་བཀྲ་བ། །དུས་བཞིར་ནགས་ཚལ་སྔོ་འཁྲུངས་བསིལ་དྲོད་སྙོམས། །དྭངས་ལ་ཡིད་སྤྲོ་སེམས་གཙང་རིག་པ་འཛིན། །སྦས་ཡུལ་རིན་ཆེན་བགྲོད་པའི་དུས་ལ་བབས། །རང་བྱུང་པདྨས་བྱིན་གྱིས་བརླབས་པའི་གནས། །ཟབ་གཏེར་ཡོན་ཏན་འབྱོར་པས་བརྒྱན་པའི་གནས། །རྒྱལ་སྲས་སྤྲུལ་པ་མཆོག་རྣམས་འབྱོན་པའི་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །བླ་མ་ཡི་དམ་མཁའ་འགྲོ་འདུ་བའི་གནས། །མཆོག་དང་ཐུན་མོང་དངོས་གྲུབ་འབྱུང་བའི་གནས། །འོག་མིན་ཞིང་ཁམས་ཨོ་རྒྱན་གནས་མཆོག་བཞིན། །སྦས་ཡུལ་རིན་ཆེན་བགྲོད་པའི་དུས་ལ་བབས། །ལས་ཅན་དབང་པོ་རབ་རྣམས་འདུ་བའི་གནས། །ཉམས་རྟོགས་བྱིན་རླབས་དཔག་ཏུ་མེད་པའི་གནས། །ཡོན་ཏན་ཚད་མེད་གངྒཱའི་བྱེ་སྙེད་གནས། །སྦས་ཡུལ་རིན་ཆེན་བགྲོད་པའི་དུས་ལ་བབས། །སྦས་ཡུལ་རིན་ཆེན་སྒོ་བཞིར་འཇུག་པའི་གླུ། །སྣང་བ་གུ་ཡངས་ཡན་པ་བློ་བདེས་བླངས། །དགེ་བ་དེ་ཡིས་ལས་ཅན་སྐྱེ་བོ་ཀུན། །སྦས་ཡུལ་ཕྱིན་ནས་དངོས་གྲུབ་མཆོག་རབ་(༤༩)ཐོབ། །ཡུལ་གྱི་བཀོད་པ་དང་ཡོན་ཏན་ལ་བསྔགས་པའི་ལེའུ་སྟེ་གསུམ་པའོ། །སྦས་ཡུལ་རིན་ཆེན་མ་ཞེས་བྱ་བ། རྒྱལ་སྲས་དྲི་མེད་འོད་ཟེར་གྱིས་རྡོ་རྗེའི་གླུར་གསུངས་པ་དགེའོ།། །།སྦས་ཡུལ་རིན་ཆེན་སྐྱིད་ཀྱི་ཡུལ། །ཉིན་མཚན་ཆོས་ཀྱིས་འདའ་བའི་ཡུལ། །རྣལ་འབྱོར་ཉིད་ཀྱང་སྒོམ་དུ་འགྲོ། །སྐལ་ལྡན་རྣམས་ཀྱང་སྒོམ་དུ་གཤེགས། །དགེའོ། །དགེའོ། །དགེའོ།། །།

༈ དགོངས་པ་མཁའ་ལྟར་ཡངས་པའི་ཆོས་རྗེ་བླ་མ་ཉིད་ལྷུན་གྲུབ་གླིང་ན་བཞུགས་པའི་དུས། སྐལ་ལྡན་རྣམས་ལ་འཁོར་བ་དོང་སྤྲུགས་རྡོ་རྗེའི་གླུ་འདི་གསུངས་པ། ན་མོ་གུ་རུ་བྷྱཿ མགོན་པོ་གདོད་ནས་རྫོགས་སངས་རྒྱས། །འཁོར་འདས་ཀུན་གྱི་དཔལ་གྱུར་པ། །ཀུན་བཟང་བླ་མའི་ཞབས་ལ་འདུད། །འཁོར་བ་དོང་སྤྲུགས་དགོངས་པ་ཉོན། །ཆོས་ཀུན་ཡེ་ནས་སངས་རྒྱས་པས། །ཁམས་གསུམ་འཁོར་བའི་མིང་ཡང་མེད། །ཅིར་སྣང་རང་བྱུང་ཡེ་ཤེས་ཀློང་། །འཁོར་བ་དོང་ནས་སྤྲུགས་པ་ལགས། །སྣོད་དུ་སྣང་བ་གཞལ་ཡས་ཁང་། །བཅུད་དུ་སྣང་བ་ལྷ་ཡི་སྐུ། །རྟོག་ཚོགས་རང་གྲོལ་ཆོས་ཉིད་ཀློང་། །འཁོར་བ་དོང་ནས་སྤྲུགས་པ་ལགས། །ཕུང་པོ་རྒྱལ་བ་ཡབ་ལྔ་ལ། །འབྱུང་ལྔ་རིགས་ཀྱི་ཡུམ་དུ་ཤར། །དབང་པོ་ཁམས་རྣམས་བྱང་ཆུབ་སེམས། །འཁོར་བ་དོང་ནས་སྤྲུགས་པ་ལགས། །སྣང་སྲིད་འཁོར་འདས་ཆོས་རྣམས་ཀུན། །དཀྱིལ་འཁོར་ཀུན་ཏུ་བཟང་པོའི་ཞིང་། །ཡེ་ནས་མངོན་པར་སངས་རྒྱས་པས། །འཁོར་བ་དོང་ནས་སྤྲུགས་པ་ལགས། །སྒོ་གསུམ་གཟུགས་སྒྲ་དྲན་རིག་ཀུན། །དཀྱིལ་འཁོར་གསུམ་དུ་སངས་རྒྱས་པས། །ཡེ་ནས་བསྐྱེད་རྫོགས་བྱང་ཆུབ་ཀློང་། །འཁོར་བ་དོང་ནས་སྤྲུགས་པ་ལགས། །ཐམས་ཅད་རང་བྱུང་ཡེ་ཤེས་ཀློང་། །ཆོས་ཀུན་མཉམ་རྫོགས་ཆེན་པོ་ལས། །གཞན་དུ་ཅུང་ཟད་གཡོས་པ་མེད། །འཁོར་བ་དོང་ནས་སྤྲུགས་པ་ལགས། །བསྐྱེད་པར་སྣང་བའི་དུས་ཉིད་ནས། །རྫོགས་པའི་རིམ་པར་ལྷུན་གྲུབ་པས། །ཡེ་ནས་ཟུང་འཇུག་གཉིས་མེད་ངང་། །འཁོར་བ་དོང་ནས་སྤྲུགས་པ་ལགས། །རྫོགས་པ་ཆེན་པོའི་རང་བཞིན་དུ། །ཆོས་ཀུན་ཀ་དག་ལྷུན་གྲུབ་པས། །རྒྱུ་འབྲས་སྤང་བླང་བྱ་རྩོལ་བྲལ། །འཁོར་བ་དོང་ནས་སྤྲུགས་པ་ལགས། །ཕྱི་ལྟར་སྣང་ཡང་ཡུལ་མེད་ལ། །མེད་པ་གསལ་སྣང་སྟོང་པའི་གཟུགས། །ཐམས་ཅད་རང་བྱུང་ཡེ་ཤེས་ངང་། །འཁོར་བ་དོང་ནས་སྤྲུགས་པ་ལགས། །ནང་ལྟར་སྣང་ཡང་སེམས་མེད་ལ། །ཚོགས་བརྒྱད་ཀུན་གཞི་སྒྲོ་བཏགས་ཙམ། །ཐམས་ཅད་བློ་བྲལ་ཆོས་དབྱིངས་ངང་། །འཁོར་བ་དོང་ནས་སྤྲུགས་པ་ལགས། །བར་མེད་རིག་པ་ཟང་ཐལ་ལེ། །ཡུལ་སེམས་རྒྱ་ཆད་ཕྱོགས་ལྷུང་བྲལ། །ཕྱལ་པ་རྗེན་པ་ཕྱམ་བརྡལ་ངང་། །འཁོར་བ་དོང་ནས་སྤྲུགས་པ་ལགས། །ཆོས་ཀུན་མྱང་འདས་ཡེ་ཟིན་པས། །བྱ་དང་རྩོལ་བའི་ནད་དང་བྲལ། །བར་མེད་ངང་དུ་རྗེན་ཁྲེས་སེ། །འཁོར་བ་དོང་ནས་སྤྲུགས་པ་ལགས། །མ་བགྲོད་ཡེ་ནས་ཉེ་བའི་ལམ། །ལམ་འདིར་རང་ཆས་ལྷུན་གྲུབ་པས། །གཞན་དུ་མི་བགྲོད་གཞི་ཕྱམ་མེ། །འཁོར་བ་དོང་ནས་སྤྲུགས་པ་ལགས། །རིག་པ་གཅེར་བུ་ཟང་ཀ་(༥༠)མ། །འཁོར་འདས་གཉིས་མེད་གདོད་མའི་ངང་། །སྤང་གཉེན་མེད་པར་ཟང་ཐལ་ལེ། །འཁོར་བ་དོང་ནས་སྤྲུགས་པ་ལགས། །རང་གཤིས་རིག་སྟོང་རྗེན་པ་ལ། །ལྟ་སྒོམ་སྤྱོད་འབྲས་མིང་མེད་པས། །དམིགས་གཏད་མེད་པར་རྒྱ་ཁྲོལ་ལེ། །འཁོར་བ་དོང་ནས་སྤྲུགས་པ་ལགས། །འགྱུར་མེད་རང་རིག་རྫོགས་ཆེན་ཀློང་། །འཁོར་བ་མ་སྤང་ཀ་ནས་དག །མྱང་འདས་མ་བཙལ་ལྷུན་གྱིས་གྲུབ། །འཁོར་བ་དོང་ནས་སྤྲུགས་པ་ལགས། །རིག་པ་ཇི་བཞིན་གཡོ་མེད་ལ། །ཆེད་དུ་མ་བཙལ་མ་བསྒྲུབས་བཞིན། །ཡོན་ཏན་འཆར་སྒོ་དཔག་ཏུ་མེད། །འཁོར་བ་དོང་ནས་སྤྲུགས་པ་ལགས། །གང་ཞིག་ཅུང་ཟད་མ་སྤངས་བར། །གཟུང་འཛིན་ཉོན་མོངས་རང་སར་དག །རིག་པ་དྲི་མེད་ཤེལ་སྒོང་བཞིན། །འཁོར་བ་དོང་ནས་སྤྲུགས་པ་ལགས། །ཡིད་ལ་ཅུང་ཟད་མ་བྱས་པར། །འགྱུར་མེད་རྟོགས་པའི་གདིང་ཚད་རྙེད། །ཉམས་རྟོགས་ཡོན་ཏན་ཕུན་སུམ་ཚོགས། །འཁོར་བ་དོང་ནས་སྤྲུགས་པ་ལགས། །བརྗོད་དུ་མེད་པའི་རིག་པ་ལ། །བསམ་དང་བྲལ་བའི་གདོད་མར་ཕྱིན། །དམིགས་གཏད་བྲལ་བས་གོལ་སྒྲིབ་ཆོད། །འཁོར་བ་དོང་ནས་སྤྲུགས་པ་ལགས། །རང་གསལ་ཀ་ནས་དག་པའི་ངང་། །ལྷུན་གྲུབ་འཆར་ཚུལ་དཔག་ཏུ་མེད། །མཐར་ཐུག་ཆོས་ཀུན་ཟད་སར་ཕྱིན། །འཁོར་བ་དོང་ནས་སྤྲུགས་པ་ལགས། །རིག་སྟོང་བར་མེད་རང་གསལ་ལ། །ཕྱི་ནང་ཡུལ་སེམས་འཛིན་པ་ཟད། །ཆོས་སྐུ་རང་མལ་བློ་ལས་འདས། །འཁོར་བ་དོང་ནས་སྤྲུགས་པ་ལགས། །ཆོས་འདི་རྫོགས་པ་ཆེན་པོའི་རྩེ། །གང་དང་ཕྲད་རྣམས་གྲོལ་བ་རྙེད། །སྲིད་པ་ཐ་མའི་དམ་ཆོས་ལགས། །འཁོར་བ་དོང་ནས་སྤྲུགས་པ་ལགས། །ཚུལ་འདི་རྟོགས་པའི་རྣལ་འབྱོར་པ། །ལུས་འདི་ཐ་མལ་ཅིར་ཡང་སྣང་། །དགོངས་པ་ཆོས་ཉིད་སངས་རྒྱས་དངོས། །འཁོར་བ་དོང་ནས་སྤྲུགས་པ་ལགས། །གླུ་འདི་ཀུན་བཟང་ཆོས་སྐུའི་གླུ། །ཚིག་འདི་མི་འགྱུར་རྡོ་རྗེའི་ཚིག །བྲོ་འདི་གནས་ལུགས་རིག་པའི་བྲོ། །འཁོར་བ་དོང་ནས་སྤྲུགས་པ་ལགས། །ཁམས་གསུམ་ཡེ་ནས་གྲོལ་བའི་གླུ། །སྲིད་གསུམ་ཀ་ནས་དག་པའི་ཚིག །རྒྱུ་འབྲས་བྱ་རྩོལ་བྲལ་བའི་བྲོ། །འཁོར་བ་དོང་ནས་སྤྲུགས་པ་ལགས། །བླ་མ་ཡི་དམ་མཉེས་པའི་གླུ། །མཁའ་འགྲོ་དམ་ཅན་ཆགས་པའི་ཚིག །བྱིན་རླབས་ཉམས་རྟོགས་འབར་བའི་བྲོ། །འཁོར་བ་དོང་ནས་སྤྲུགས་པ་ལགས། །ཆོས་ཉིད་མི་འགྱུར་རྡོ་རྗེའི་གླུ། །ཀློང་ཆེན་རབ་འབྱམས་བཟང་པོས་བཀོད། །དགེ་བས་ཁམས་གསུམ་ཡོངས་གྲོལ་ཏེ། །འཁོར་བ་དོང་ནས་སྤྲུགས་པར་ཤོག །འཁོར་བ་དོང་སྤྲུགས་རྡོ་རྗེའི་གླུ། རྣལ་འབྱོར་གྱི་དབང་ཕྱུག་དམ་པ་ཀློང་ཆེན་རབ་འབྱམས་ཀྱིས་གསུངས་པའོ།། །།

གླུ་འདི་ཁམས་གསུམ་ཡོངས་གྲོལ་གླུ། །ཚིག་འདི་སྲིད་གསུམ་ཀ་དག་ཚིག །བྲོ་འདིས་བྱིན་རླབས་ཉམས་རྟོགས་འབར། །འཁོར་བ་དོང་སྤྲུགས་ཆེན་པོ་ལགས། །དགེའོ། །དགེའོ། །དགེའོ།། །།

༈ ཡང་ཆོས་རྗེ་བླ་མས་ལྷུན་གྲུབ་གླིང་དུ་སྐལ་ལྡན་རྣམས་ལ་བཀྲ་ཤིས་རྡོ་རྗེའི་གླུ་འདི་གསུངས་སོ། །ཨ་ཧོ། བཀྲ་ཤིས་དཔལ་དུ་འབར་བའི་ལྷ། །མཆོག་གསུམ་བླ་མའི་ཞབས་ལ་འདུད། །(༥༡)བཀྲ་ཤིས་རིན་ཆེན་ཆར་འབེབས་པའི། །ཕུན་སུམ་ཚོགས་པའི་བཀྲ་ཤིས་ཤོག །གནས་འདི་གང་སྣང་སངས་རྒྱས་ཞིང་། །རང་སྣང་རིག་པའི་ཞིང་ཁམས་ལ། །ཡེ་ནས་འོག་མིན་ཆོས་ཀྱི་དབྱིངས། །གནས་ཕུན་སུམ་ཚོགས་པའི་བཀྲ་ཤིས་ཤོག །མགོན་འདི་ཆོས་རྗེ་རིན་པོ་ཆེ། །འགྲོ་བ་འདྲེན་པའི་དཔལ་དུ་ཤར། །ཡེ་ནས་རྒྱལ་བའི་རྣམ་འཕྲུལ་མགོན། །སྟོན་པ་ཕུན་སུམ་ཚོགས་པའི་བཀྲ་ཤིས་ཤོག །འཁོར་འདི་སྐལ་ལྡན་དད་དང་ལྡན། །ཐར་ལམ་སྒྲུབ་པ་སྙིང་པོར་བྱེད། །ཡེ་ནས་དཔའ་བོ་མཁའ་འགྲོའི་ཚོགས། །འཁོར་ཕུན་སུམ་ཚོགས་པའི་བཀྲ་ཤིས་ཤོག །ཆོས་འདི་ཐེག་པ་ཀུན་གྱི་རྩེ། །མཆོག་ཏུ་གསང་བ་བླ་ན་མེད། །ཡེ་ནས་རྫོགས་པ་ཆེན་པོའི་ཀློང་། །ཆོས་ཕུན་སུམ་ཚོགས་པའི་བཀྲ་ཤིས་ཤོག །དུས་འདི་ཆོས་ཉིད་འཕོ་འགྱུར་མེད། །རྟག་པ་རྒྱུན་གྱི་འཁོར་ལོའི་གཞི། །ཡེ་ནས་དུས་བཞི་མཉམ་པ་ཉིད། །དུས་ཕུན་སུམ་ཚོགས་པའི་བཀྲ་ཤིས་ཤོག །བཀྲ་ཤིས་མི་འགྱུར་རྡོ་རྗེའི་གླུ། །བཀྲ་ཤིས་གུ་ཡངས་བློ་བདེས་བླངས། །བཀྲ་ཤིས་ཡིད་བཞིན་མཆོད་སྡོང་ལ། །བཀྲ་ཤིས་དཔལ་དུ་འབར་བར་ཤོག །བཀྲ་ཤིས་དཔལ་འབར་མ་ཞེས་བྱ་བ། རྣལ་འབྱོར་པ་ཀློང་ཆེན་རབ་འབྱམས་ཀྱིས་གསུངས་པ་དགེའོ། །གཅིག་གཉིས་གསུམ་བྱས་ནས། །བཀྲ་ཤིས་དཔལ་དུ་འབར་བ་ལགས། །གཉིས་གསུམ་དྲུག་བྱས་ནས། །བཀྲ་ཤིས་བསམ་པ་འགྲུབ་པ་ལགས། །དགེའོ།། །།