སྡེ་བ་བཞིར་གྱེས་པ།
༈ རྒྱལ་པོ་མྱ་ངན་མེད་ལ་བུ་བཅུ་གཅིག་བྱུང་བར། དེའི་རྗེས་ཀྱི་རྒྱལ་སྲིད་མྱ་ངན་བྲལ་གྱིས་བྱས་པར། དེ་ཉིད་གཉིད་ལོག་པའི་རྨི་ལམ་དུ་ནངས་པར་ཁྱོད་ཀྱི་ཁྱིམ་དུ་དགེ་སློང་ཞིག་བསོད་སྙོམས་ལེན་པར་འབྱུང་སྟེ། དེ་ནི་མཐུ་ཆེ་བས་ཕྱོགས་ཀུན་གྱི་འཕགས་པ་བསྡུ་བས། དེ་ལ་གསོལ་བ་ཐོབ་ཅིག་ཅེས་ལྷས་ལུང་བསྟན་པ་རྨིས་པས་ནངས་པར་དགྲ་བཅོམ་པ་བསུས་འབྱིན་ཁྱིམ་དུ་བྱུང་བར་གསོལ་བ་བཏབ་པས་འཕགས་པ་བརྒྱད་ཁྲི་ཙམ་སྐད་ཅིག་ལ་འདུས་བྱུང་བར། ལོ་གསུམ་དུ་དུས་སྟོན་ཆེན་པོ་བྱས་ཏེ་མཆོད་པས། བསྟན་པ་ལ་དགའ་བའི་ལྷ་རྣམས་ཀྱིས་དེའི་ཁྱིམ་དུ་རིན་པོ་ཆེའི་ཆར་ཕབས་སོ། །དེས་ཀྱང་ཇི་སྲིད་འཚོའི་བར་དུ་སློང་བ་པོ་འབུམ་ཕྲག་རེ་ཉིན་རེ་བཞིན་ཚིམ་པར་བྱས་སོ། །མྱ་ངན་བྲལ་འདས་པའི་འོག་ཏུ་དེའི་བུ་དཔའ་བོའི་སྡེས་རྒྱལ་སྲིད་སྐྱོང་སྐབས་དགྲ་བཅོམ་པ་འོད་སྲུང་གིས་བསྟན་པ་སྤེལ་ཞིང་ཆོས་བསྟན་པའི་སྐབས། ཚོང་དཔོན་གྱི་རིགས་ལས་ལྷ་ཆེན་པོ་ཞེས་བྱ་བ། ཕ་མ་དགྲ་བཅོམ་གསུམ་བསད་པའི་མཚམས་མེད་ཀྱི་ལས་བྱས་ཀྱང་རང་གི་སྤྱོད་ཚུལ་གསངས་ནས་དགེ་སློང་བྱས་པ་བློ་རྣོ་ཞིང་སྡེ་སྣོད་ལ་མཁས་པ་བྱུང་ཡང་། རྒྱུད་བདུད་ཀྱིས་བྱིན་གྱིས་བརླབས་པའི་འཁོར་དང་བསྙེན་བཀུར་གྱིས་བརྒྱན་པ་བྱུང་། དེར་དགེ་སློང་རྣམས་སོ་ཐར་གྱི་མདོ་རེས་མོས་སུ་སྟོན་པའི་ཚེ། ལྷ་ཆེན་པོ་ལ་རེས་བབས་པ་ན་མདོ་སྟོན་པའི་མཇུག་ཏུ། ལྷ་རྣམས་མ་རིག་པ་ཡིས་བསླུས། །ལམ་ནི་སྒྲ་ཡི་རྒྱུན་ལས་བྱུང་། །ཐེ་ཚོམ་ཅན་རྣམས་གཞན་གྱིས་འཇུག། འདི་ནི་སངས་རྒྱས་བསྟན་པ་ཡིན། །ཞེས་བསྟན་པས། འཕགས་པ་རྣམས་དང་དགེ་སློང་རྒན་པོ་རྣམས་ཀྱིས་མདོའི་ཚིག་མ་ཡིན་ཞེས་བརྗོད་པས། དགེ་སློང་གཞོན་པ་རྣམས་ལྷ་ཆེན་པོའི་རྗེས་སུ་ཞུགས་ཏེ་ཕན་ཚུན་རྩོད་པའི་གནས་སུ་གྱུར་ཏོ། །དེ་ཤི་བའི་རྗེས་སུ་དགེ་སློང་བཟང་པོ་བྱུང་སྟེ། དེས་ཀྱང་། གཞན་ལན་གདབ་དང་མི་ཤེས་དང་སོགས་གཞི་ལྔ་བསྒྲགས་པས། རྒྱལ་བའི་བཀའ་ལ་གོ་བ་ལེན་ལུགས་སྣ་ཚོགས་པ་བྱུང་སྟེ་ཐེ་ཚོམ་དང་ཡིད་གཉིས་སྐྱེས་པ་མང་བས་རྩོད་པ་ལང་ལོང་དུ་གྱུར་པར་གྲགས། དེར་དགྲ་བཅོམ་པ་རྣམས་ཀྱིས་རྩོད་པ་ཞི་བར་བྱས་ཀྱང་བདུད་ཀྱི་མཐུས་ཞི་མ་ནུས་སོ། །དེ་ནས་དགྲ་བཅོམ་པ་འོད་སྲུང་མྱ་ངན་ལས་འདས་ནས། འཕགས་པ་༼ཀླུ༽ཆེན་པོ་དང་། འཕགས་པ་དགའ་བ་ཅན་གཉིས་ཀྱིས་བསྟན་པ་སྤེལ་བའི་སྐབས། རྒྱལ་པོ་དཔའ་བོའི་སྡེ་འདས་ནས་དེའི་བུ་རྒྱལ་པོ་དགའ་བོས་རྒྱལ་སྲིད་ལོ་ཉེར་དགུའི་བར་དུ་བྱས་སྐབས། དགེ་སློང་ཀླུ་ཆེན་པོ་ཞེས་བྱ་བ་བྱུང་སྟེ། གཞི་ལྔ་ལ་ཡང་ཡང་བསྔགས་པ་བརྗོད་ནས་རྩོད་པ་ཆེར་འཕེལ་བར་བྱས་ཏེ་སྡེ་པ་བཞིར་གྱེས་སོ། །