ཕྱོགས་ཞེན་ཁ་འཛིན་ཟེར་བ་སྐྱིད་ཀྱི་ཡན་ལག་ཏུ་སྡུག་འཚོལ་བ་ཡིན་ཚུལ་སོགས་ཀྱི་རྣམ་ཐར་བསྐོར།

ལོ་དེའི་བོད་ཟླ་བཞི་པ་ས་ག་ཟླ་བར་དཀར་ཟས་ཀྱི་སྐོར་ནས་ དགོངས་འཆར་ཞུས་པར། གསུང་ལན་བརྗོད་པ ་གནད་བསྡུས་ཙམ་ནི། ནང་བ་སངས་རྒྱས་པའི་ཆོས་འདི་འཚེ་བ་མེད་པ་སྙིང་རྗེས་རབ་ཏུ་ཕྱེ་བ་ཞིག་ཡིན་པས་ན་དཀར་ཟས་བསྟེན་པ་དེ་ཡག་པོ་འདུག །སྤྱིར་བཏང་ཤའི་གནང་བཀག་གི་ཐད་ནས་མདོར་མཚོན་ཙམ་ཞུ་ན། དམ་ཆོས་འདུལ་བའི་ནང་དུ་ཤ་ཆེན་གྱི་རིགས་དང་མི་སྒེར་བ་རང་གི་དོན་དུ་མཐོང་ཐོས་དོགས་གསུམ་ཡོད་པའི་ཤ་མ་གནང་བ་གསལ་བོ་གསལ་རྐྱང་དང༌། གསང་སྔགས་རྒྱུད་སྡེ་འོག་མ་གསུམ་དུ་ཡང་ཤ་གནང་བ་མེད་པར་མཁྱེན་གསལ་ལྟར་རེད། རྒྱུད་སྡེ་འོག་མ་གསུམ་ན་ཤ་བཀག་ལ་དེ་གཙོ་བོ་གཙང་སྦྲའི་དབང་གིས་རེད། སྔགས་བླ་མེད་ན་ཁག་མང་བོ་ཞིག་སླེབས་ཀྱིན་ཡོད་པ་རེད། ཐེག་ཆེན་གྱི་མདོ་སྡེ་འགའ་ཞིག་ན་བྱེ་བྲག་ཕྱེས་ཏེ་བཀག་པ་དང་སྤྱིར་དགག་པའི་རྣམ་པ་ལྟ་བུ་མང་པོ་ཞིག་ཡོད་པ་རེད་དེ། སྤྱིའི་ཆ་ནས་རྣམ་གསུམ་མ་དག་པའི་བསད་ཤ་དེ་དགག་གིན་ཡོད་པ་རེད། ཁྱོན་ཡོངས་ནས་བསམ་ན་ཤ་མ་གསོལ་ན་འཛམ་གླིང་གི་མིག་ལྟོས་དང༌། མི་མང་བོ་ཞིག་ལ་རང་གི་བདེ་ཐང་སོགས་ཆ་གང་ཐད་ནས་ཡག་པོ་འདུག །ལྷག་པར་དུ་འདུལ་བ་ལས་གསུངས་བ་བཞིན་རང་གི་དོན་དུ་ཡིན་པའི་མཐོང་ཐོས་དོགས་གསུམ་ཡོད་པ་དང་ཤ་ཆེན་གྱི་རིགས་རྣམས་མ་གསོལ་ན་ཧ་ཅང་བཟང་བོ་འདུག་ལ། དེ་འདྲ་བསྒྲུབ་མི་ཐུབ་པ་ཞིག་ཀྱང་མ་རེད་སེམས། འོན་ཀྱང་ཤ་འགོག་གི་ཐབས་ལམ་དེ་ལ་སློབ་གསོ་གལ་ཆེན་པོ་རེད་མ་གཏོགས། མིའི་སེམས་ཁམས་དང་དཀའ་ངལ་གང་ལ་ཡང་བསམ་བློ་མེད་པར་ཐལ་ཆེ་བའི་རིགས་དེ་མ་བྱས་ན་ཡག་པོ་ཡོད་པ་རེད། དཔེར་ན་ཤ་ཟོས་ཚར་ནས་སྡོམ་པ་ཡོད་པ་མ་རེད་དང༌། ནང་བ་སངས་རྒྱས་པ་མ་རེད། བྱམས་སྙིང་རྗེ་རྩ་བ་ནས་བྲལ་བ་རེད་ལྟ་བུ་ཧ་ཅང་ཐལ་དྲགས་པ་རེད། འཛམ་བུ་གླིང་མི་ཡོངས་ཀྱི་བསམ་བློ་གཅིག་མཐུན་ཡོང་ས་ནས་བྱ་བ་བསྒྲུབ་རྒྱུ་ཏན་ཏན་རྙཻད་རྒྱུ་ཡོད་པ་མ་རེད་དེ། དཀར་ཟས་འདི་ལ་བསམ་བློ་བཏང་ན་འཛམ་གླིང་ན་མིང་སྙན་པོ་དང་དགའ་མོས་ཡོད་སའི་བྱ་བཞག་ཅིག་ཆགས་ཡོད་པ་ཡིན་པས། སྤྱི་སྒེར་གང་གི་ཐད་ནས་ཤུགས་བརྒྱབ་ན་ཡག་པོ་རེད། དཀར་ཟས་གསོལ་བ་དེ་གཙོ་ཆེ་བ་གཞན་གྱི་ཚེ་སྲོག་ལ་གནོད་པ་མི་དགོས་པའི་ཆེད་དུ་ཡིན་ན། ང་ཚོ་མཐོ་བོད་རང་གི་ས་ཆ་ན་སྔོ་ཚལ་གྱི་རིགས་གང་མང་འདེབས་ཐུབ་རྒྱུ་རྩ་བའི་རྩ་དོན་ཞིག་རེད། རྒྱ་ནང་གི་དྲོད་ཁོལ་ཆེ་སའི་ས་ཆ་ཞིག་ནས་དང་བོ་འབུ་གསོད་འདེབས་པ་དང༌། བར་ཏུ་ཡང་འབུ་ཕྲ་རྒྱུན་པར་གསོད་ཀྱིན་ཡོད་པ་རེད། ད་དུང་རྫས་སྦྱོར་ལ་བརྟེན་ནས་ལུས་པོ་ལ་ཡང་གནོད་པ་ཆེན་པོ་ཆགས་ཀྱིན་ཡོད་པ་ཡིན་པས། ང་ཚོའི་ས་ནས་སྔོ་ཚལ་བཏབ་ན་ཡང་འབུ་སྲིན་གཏན་ནས་གསོད་མི་དགོས་པ་ཞིག་ཏ་འགྱུར་ཐུབ་གི་མ་རེད་དེ། ཆེད་དུ་དུག་རྫས་ཀྱིས་འབུ་གསོད་པ་དང་རྒྱ་ཡུལ་གྱི་གྲངས་ལྟ་བུ་མང་བོ་གསོད་དགོས་ཀྱི་ཡོད་པ་མ་རེད། དེ་འདྲ་ཡིན་དུས་བསམ་བཞིན་དུ་སྲོག་གཅོད་པ་མེད་པས་སྲོག་གཅོད་ཀྱི་དངོས་གཞི་ཡང་རྫོགས་མེད་པ་རཻད། དེས་ན་རང་ས་ནས་སྔོ་ཚལ་འདེབས་ཐུབ་རྒྱུ་བྱུང་ན་འབུ་སྲིན་གྱི་ཚེ་སྲོག་དང་མིའི་ལུས་པོའི་འཕྲོད་བསྟེན་དང་དཔལ་འབྱོར་ཚོང་ལས་ཀྱི་ཐད་གང་ལ་ཡང་ཕན་པ་རླབས་ཆེན་པོ་འདུག །ཅེས་ཕྱོགས་ལྷུང་བྲལ་བའི་གསུངས་བཤད་བཟང་པོ་གནང༌། བོད་ཟླ་བཞི་པའི་ཚེས་བཅུ་དགུར་ཁྲིན་ཏུའུ་གྲོང་ཁྱེར་དུ་རྫོགས་ཆེན་པད་མ་སྐལ་བཟང་གི་གསུང་འབུམ་འགྲེམས་སྟོན་གྱི་མཛད་སྒོ་ལ་བྱོན་ནས། མཛད་པ་ཀུན་ལས་མཆོག་ཏུ་གྱུར་བ་གསུང་གི་མཛད་པ་ཡིན་ཚུལ་སོགས་ཀྱི་གཏམ་བཤད་གནང༌། དེར་གཟན་དཀར་རིན་པོ་ཆེ་དང་མཇལ་འཕྲད་གནང་ནས་ཆོས་འབྲེལ་ཞུས། ཚེས་ཉི་ཤུ་བཞིའི་ཉིན་ཇོ་ནང་ཤམ་བྷ་ལའི་ངེས་གསང་དབུ་མ་གཞན་སྟོང་གི་བགྲོ་གླེང་ཐེངས་བཅུ་གསུམ་པ་མགོ་ལོག་ལུང་སྐྱ་དགོན་དུ་འཚོགས་པར་ཕེབས་ནས་བཀའ་སློབ་སྔ་ཕྱིར་ཐེངས་གཉིས་དང༌། མཚན་ཕུད་དམ་བཅའ་སོགས་ཀྱི་སྐབས་ལུང་རིགས་ཀྱི་བརྒལ་བརྟག་ལྷུག་པོར་མཛད། དགོན་དེའི་བཙུན་མ་རྣམས་ཡང་བཀའ་སློབ་ཟབ་རྒྱས་བསྩལ། མདོ་ལུའི་རྡོ་ཁ་དགོན་དུ་ཕེབས་ནས་གྲྭ་ཇོ་ཡོངས་ལ་བཀའ་སློབ་ཟབ་རྒྱས་གསུངས། བོད་ཟླ་ལྔ་བའི་ཚེས་བཅུ་བཞིའི་ཉིན་རྫ་ཆུ་ཁའི་བ་རོལ་དགོན་དུ་གངས་ཅན་མཁས་པའི་བགྲོ་གླེང་ཚོགས་ཆེན་ལ་བྱོན་ནས། བོད་བརྒྱུད་ནང་བསྟན་གྱི་ལྟ་སྒོམ་སྤྱོད་གསུམ་དང་འབྲེལ་བའི་གསུང་བཤད་རིན་ཐང་དང་བྲལ་བ་བསྩལ་ཞིང༌། དད་ལྡན་མང་ཚོགས་རྣམས་ལ་ཡང་ནང་ཆོས་ངོ་སྤྲོད་ཞུས། བོད་ཟླ་དྲུག་པའི་ཚེས་ཉེར་གཉིས་ཀྱི་དུས་བཟང་ཕུན་སུམ་ཚོགས་པ་ལ། གངས་ལྗོངས་རིས་མེད་མཐོ་སློབ་ནས་འདེམས་ཐོན་ལྟར། ཛ་འགོའི་ཉི་མ། འཛི་ཉིན་བདེ་ལེགས། གསང་ལུང་ཉི་འབུམ། ཉིན་ཡུལ་ཀུན་པོ། རྒྱལ་རོང་གསལ་ལྡན་བཅས་མི་ལྔ་མཁན་པོར་མངའ་གསོལ་མཛད། མཁན་པོ་རྣམས་ལ་གསུང་བཤད་གནང་དོན། སྤྱིར་མཁན་པོ་དང་སྤྲུལ་སྐུ་གང་ཡིན་ན་ཡང་དེང་སང་གི་ཆར་ཧ་ཅང་མོད་པོ་འདྲ་ཞིག་ཡོད་པ་རེད། ཡིན་ན་ཡང༌། གུང་ཐང་བསྟན་པའི་སྒྲོན་མེས། སྐུ་སྐྱེས་བསྟན་དོན་དུ་བྱོན་ན། །བཤད་སྒྲུབ་ལག་རྗེས་ལ་འཇོག་དགོས། །ཞེས་གསུངས་པ་ལྟར། མཁན་པོ་ཡིན་ན་ཡང་མིང་སྟོང་ཙམ་ཁུར་བས་ཡོང་གི་མ་རེད། ང་ཚོའི་འདི་ནས་ལོ་རེ་བཞིན་དུ་མི་ཆ་རེ་ལ་མཁན་པོའི་མིང་རེ་འདོགས་བཞིན་པའི་དམིགས་ཡུལ་དེ། སངས་རྒྱས་ཀྱི་བསྟན་པ་ལ་ཞབས་ཕྱི་ཞིག་ཨེ་ཡོང་བསམ་པ་ལས་དམིགས་ཡུལ་གཞན་ཅི་ཡང་ཡོད་པ་མ་རེད། འཇིག་རྟེན་ཐམས་ཅད་རྟོག་པས་བཏགས་ཙམ་ལ་ལྟོས་ནས་འགྲོ་བཞིན་པ་ཡིན་པས། ཁྱེད་རྣམ་པ་ཡིན་ན་ཡང་མཁན་པོ་ཞེས་པའི་མིང་ཙམ་ལ་བརྟེན་ནས་ཀྱང་ཅུང་ཟད་རེ་ཕན་ཐོགས་མི་སྲིད་པ་མ་རེད། དེས་ན། མིང་འདི་ལ་བརྟེན་ནས་བསྟན་འགྲོ་ཕན་པ་རེ་ཨེ་ཡོང་བལྟ་རྒྱུ་དང༌། རང་རང་སོ་སོའི་ངོས་ནས་ཀྱང་ཀུན་སྤྱོད་ཀུན་སློང་གང་གི་ཕྱོགས་ནས་ཡིན་ན་ཡང༌། སྔར་ལས་ཇེ་ལེགས་ཇེ་བཟང་དུ་བཏང་སྟེ། མིང་དེ་རང་ལ་དྲན་ཤེས་བག་ཡོད་བསྟེན་པའི་རྐྱེན་དུ་འགྱུར་ཐུབ་པའི་སྒོ་ནས། རང་གཞན་གཉིས་ཀ་ལ་ཕན་ཐོགས་ཡོད་པ་ཞིག་བཟོ་རྒྱུ་དེ་གལ་ཆེན་རེད་མ་གཏོགས། ཞབས་འདྲེན་རྩ་བ་ནས་ཞུ་ཉན་གི་མ་རེད། ད་དུང་དུ་ཡང་སློབ་གཉེར་ལ་མཚམས་འཇོག་ཁྱོན་ནས་བྱེད་མི་རུང༌། སྔོན་ཆད་གུང་ཐང་སྐུ་ཕྲེང་དྲུག་པ་མཆོག་གི་ཞལ་སྔ་ནས། མི་ཚེ་དཔེ་ཆ་དང་མ་འབྲལ་ན་དགེ་བཤེས་ཡོང་སོང་བ་རེད། མི་ཚེའི་ནང་ལ་དཔེ་ཆ་དཔེ་ཀློག་མཚམས་འཇོག་བྱས་བཞག་ན་དེ་སྔོན་ཇི་ལྟར་སྦྱངས་ཡོད་མིན་ལ་མ་ལྟོས་པར་དགེ་བཤེས་མ་འོང་པ་རེད་གསུངས་སོང༌། དེ་ནང་བཞིན་དེང་སང་སྤྲུལ་སྐུ་ཙམ་མ་ཡིན་པར་མཁན་པོ་དང་དགེ་བཤེས་ནང་ལ་ཡང་མིང་དེ་ལ་བརྟེན་ནས། རྒྱ་ཡུལ་དང་ཕྱི་རྒྱལ་ཁག་ན་ཡར་ཉུལ་མར་ཉུལ་བྱེད་བཞིན་པ་མང་པོ་ཡོད་པ་རེད། དེ་འདྲ་ཞིག་ལོགས་ཚར་ནས་ང་ཚོའི་ངོས་ནས་ཀྱང་མིང་བཏགས་པའི་དགོས་པ་མ་འགྲུབ་པར་མ་ཟད་གནོད་དུ་བུད་སོང་བ་རེད། ཅེས་སོགས་གསུངས་སོ། །བོད་ཟླ་ལྔ་བའི་ཚེས་ཉེར་བརྒྱད་ཉིན་གངས་ལྗོངས་རིས་མེད་ལྔ་རིག་མཐོ་སློབ་ཀྱི་ལོ་ཕྱེད་རྒྱུགས་སྤྲོད་ཆེན་མོ་བླངས། ཚེས་ཉི་ཤུ་དགུའི་ཉིན་ལ་མགོ་ལོག་གཙང་གོང་མའི་བཟང་སྤྱོད་ཆོས་ཚོགས་ལ་ཕེབས་ནས་སྐྱ་སེར་གཉིས་ལ་ལུགས་གཉིས་ཀྱི་བཀའ་སློབ་དང་ཆོས་འབྲེལ་ཟབ་མོ་གནང༌། བོད་ཟླ་དྲུག་པའི་ཚེས་བཅུ་གཉིས་ཉིན་ནས་བཟུང་མགོ་ལོག་ཁུལ་ནང་བསྟན་མཐུན་ཚོགས་ཀྱི་སྟེང་དུ་ཉིན་བཞིའི་རིང་ཉིན་རེར་སྔ་དྲོ་དང་ཕྱི་དྲོ་བསྡོམས་ཏེ་ཆུ་ཚོད་དྲུག་གི་ཡུན་ལ། མགོ་ལོག་རྫོང་ཁག་དྲུག་གི་རིས་མེད་དགོན་སྡེ་སོ་སོས་འཐུས་མི་རྣམས་ལ་ཇོ་ནང་གི་གཞི་ལམ་འབྲས་གསུམ་གྱི་རྣམ་བཞག་གསལ་ཞིང་རྒྱས་པར་གསུངས་པས། སྐབས་དེར་འདུས་པའི་བླ་ཆེན་འགའ་རེས་ཀྱང་དད་གུས་ཀྱི་བ་སྤུ་གཡོས་ཏེ་གུས་པའི་གཙུག་གི་ནོར་བུར་བསྟེན་པར་གྱུར་ཏོ། །ཚེས་བཅོ་ལྔའི་ཉིན་གངས་ལྗོངས་དར་རྒྱས་ཀུན་ཕན་སྨན་རྩིས་སློབ་གླིང་གི་སློབ་མ་རྣམས་ལ་ནང་བསྟན་གྱི་ལྟ་གྲུབ་རགས་བསྡུས་ངོ་སྤྲོད་ཀྱི་གསུང་བཤད་གནང་སྟཻ་ཕྱིར་སློབ་གླིང་དུ་ལོགས། བོད་ཟླ་བརྒྱད་པའི་ཚེས་ལྔ་ནས་ཉིན་བདུན་གྱི་རིང་ལ་མགོ་ལོག་པདྨའི་རིག་གཞུང་དར་སྤེལ་མཐུན་ཚོགས་ཀྱི་རྒྱུགས་སྤྲོད་གཙོ་འགན་པའི་ཕྱག་ལས་མཛད་ཅིང༌། མི་མང་ལ་ཕར་ཕྱིན་དྲུག་གི་གོ་བདེ་བའི་ཆོས་ཁྲིད་དང༌། གྲྭ་མང་ལ་དང་པོ་ཚུལ་ཁྲིམས་རྣམ་པར་དག་པའི་སྟེང་ནས་ཐོས་པ་གལ་ཆེ་བ་དང༌། བར་དུ་བསམ་པས་ངེས་པ་བསྐྱེད་པར་བྱ་དགོས་པ་དང༌། མཐར་སྒོམ་པས་ཉམས་སུ་བླངས་ལུགས་སོགས་ཀྱི་སྒོ་ནས། བསྟན་པའི་འཇུག་རིམ་ཇི་ལྟར་དགོས་མིན་ཐད་ནས་གསུང་བཤད་བསྩལ། བཤེས་གཉེན་རིན་པོ་ཆེ་ཉིད་ནས་ནམ་ཞར་ཞར་དུ་འདྲེན་པར་མཛད་པའི་ཐོས་པའི་བསྐོར་གྱི་གལ་ཆེན་ལུང་འགའ་ཙམ་བཀོད་དེ་གསུང་ཟིན་མདོར་བསྡུས་ཤིག་ཕབ་ན། བཤེས་སྤྲིང་ལས། ཁྱོད་ཀྱི་ཚུལ་ཁྲིམས་མ་ཉམས་མོད་མི་དམའ། །མ་འདྲེས་མ་སྦགས་པ་དག་བསྟེན་པར་མཛོད། །ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལེགས་པར་གསུངས། །ཞེས་པ་ལྟར་དང་པོ་ཚུལ་ཁྲིམས་རྣམ་པར་དག་པ་ས་ལྟ་བུ་དེ་ལེགས་པར་ཡོད་ན། ས་ལ་བརྟེན་པའི་རྒྱུ་བ་སེམས་ཅན་དང་མི་རྒྱུ་བ་རྩི་ཤིང་ནགས་ཚལ་སོགས་འབྱུང་བ་ལྟར། ཚུལ་ཁྲིམས་ལ་བརྟེན་ནས་ཐོས་བསམ་སྒོམ་པའི་ཤེས་རབ་འབྱུང་དགོས་པ་རཻད། སངས་རྒྱས་གཉིས་པ་དབྱིག་གི་གཉེན་པོའི་ཞལ་སྔ་ནས། ཚུལ་གནས་ཐོས་དང་བསམ་ལྡན་པས །བསྒོམ་པ་ལ་ནི་རབ་ཏུ་སྦྱོར། །ཞེས་དང༌། རྗེ་ཙོང་ཁ་བ་ཆེན་པོའི་རྟོགས་བརྗོད་འདུན་ལེགས་མ་ལས། དང་པོར་རྒྱ་ཆེན་མང་དུ་ཐོས་པ་བཙལ། །བར་དུ་གཞུང་ལུགས་ཐམས་ཅད་གདམས་པར་ཤར། །ཐ་མར་ཉིན་མཚན་ཀུན་ཏུ་ཉམས་སུ་བླངས། །ཀུན་ཀྱང་བསྟན་པ་རྒྱས་པའི་ཆེད་དུ་བསྔོས། །ཚུལ་འདི་བསམས་ཤིང་མདུན་མ་ལེགས་ནས་གདའ། །བཀའ་དྲིན་ཆེའོ་རྗེ་བཙུན་མཁྱེན་པའི་གཏེར། །ཞེས་གསུངས་པ་བཞིན་ཐོས་བསམ་སྒོམ་གསུམ་ཡ་མ་བྲལ་ཞིང་རྒྱུ་འབྲས་ཀྱི་འཇུག་རིམ་ཡོད་པ་ཅིག་གལ་ཆེ་སྟེ། མདོ་སྡེའི་རྒྱན་ལས། གལ་ཏེ་ཐོས་པ་ཙམ་གྱིས་དོན་མཐོང་འགྱུར་ན་བསྒོམ་པ་དོན་མེད་འགྱུར། །གལ་ཏེ་མ་ཐོས་པར་ཡང་སྒོམ་འཇུག་འགྱུར་ན་བསྟེན་པ་དོན་མེད་འགྱུར། །ཞེས་དང༌། འཕགས་པ་བརྒྱད་སྟོང་པར། མ་དད་པ་ནི། མི་ཉན་ཏོ། །མ་ཉན་པས་ནི། མི་ཤེས་སོ། །མ་ཤེས་པས་ནི། མི་མཐོང་ངོ། །མ་མཐོང་བས་ནི། ཁོང་དུ་མི་ཆུད་དོ། །ཁོང་དུ་མ་ཆུད་པ་ནི། ཆོས་ཀྱིས་ཕོངས་པར་འགྱུར་བ་དང༌། ཞེས་དང༌། ཆེད་དུ་བརྗོད་པའི་ཚོམས་ལས། ཐོས་པ་གཏི་མུག་མུན་སེལ་སྒྲོན་མེ་ཡིན། །རྐུན་པོ་ལ་སོགས་མི་ཁྱེར་ནོར་གྱི་མཆོག །ཀུན་ཏུ་རྨོངས་པའི་དགྲ་འཇོམས་མཚོན་ཆ་ཡིན། །ཐབས་ཚུལ་མན་ངག་སྟོན་པའི་གྲོགས་ཀྱི་མཆོག །ཕོངས་པར་གྱུར་ཀྱང་མི་འགྱུར་མཛའ་བོ་ཡིན། །གནོད་པ་མེད་པའི་མྱ་ངན་ནད་ཀྱི་སྨན། །ཉེས་པ་ཆེན་པོ་ཡི་ནི་དཔུང་འཇོམས་པ། །གྲགས་དང་དཔལ་གྱི་གཏེར་གྱི་མཆོག་ཀྱང་ཡིན། །ཞེས་དང༌། ཐོས་པའི་རྗེས་འཇུག་བསྒྲུབ་པ་སྙིང་པོར་བྱེད། །སྐྱེ་བའི་རྫོང་ལས་ཚེགས་ཆུང་ཐར་བར་འགྱུར། །ཞེས་སོགས་རྒྱ་ཆེར་གསུངས་པ་ལྟར། དང་པོ་ཐོས་པ་བྱེད་དགོས་པ་རེད། བཅོམ་ལྡན་འདས་ཀྱིས་ཀྱང༌། ལེགས་པར་ཉོན་ལ་ཡིད་ལ་ཟུངས་ཤིག་དང་ངས་བཤད་དོ། །གསུངས་ནས་དང་པོ་ཆོས་ཐོས་པའམ་ཉན་པ་དང༌། དེ་ནས་ཡིད་ལ་བཟུང་སྟེ་བསམ་སྒོམ་བྱ་བར་སྐབས་ཐམས་ཅད་དུ་མཐུན་པར་བཀའ་བསྩལ་ཡོད་ཀྱང༌། དེང་སང་ལ་ལས་རང་གི་མ་བྱས་པ་དང་མི་ཤེས་པ་རྒྱུ་མཚན་དུ་རློམས་ནས་ཐོས་བསམ་མི་དགོས་སྒོམ་པ་ཁོ་ནས་ཆོག་ཟེར་བ་ནི། རྡོ་གྲུབ་བསྟན་པའི་ཉི་མས། སྔར་ཞིག་ཐོས་པ་ལུང་གི་མེ་ཏོག་འདིས། །ཡང་དག་ལྟར་སྣང་ཐང་ཤ་བཅད་མོད་དེ། །ད་ནི་སྟོན་ཆེན་རྟ་ཐོག་རྙེད་བཀུར་འདིས། །ཟོག་པོ་གྲུབ་རྫུའི་དབུ་འཕངས་མཐོ་བ་ལགས། །སྔར་ཞིག་ཐོས་པ་རིགས་པའི་རལ་གྲི་འདི། །ཆོས་མིན་ཞགས་པ་གཅོད་པའི་མཚོན་ཆ་སྟེ། །ད་ནི་གཟུ་ལུམ་བསྟན་སེལ་སྡེ་འཁྲུགས་འདིས། །ཆོས་མིན་སྨྲ་བ་ཤེད་ཀྱིས་བཀུར་བ་མང༌། །སྔར་ཞིག་ལེགས་བཤད་ཐོས་པའི་མེ་ཏོག་འདིས། །བློ་གསལ་སྟོང་གིས་དུས་སྟོན་བྱས་སྐད་དེ། །ད་ནི་ཐོས་སྒོག་ཚིག་གི་སྦུན་པ་ཞེས། །སྒོམ་ཆེན་སྟོང་གིས་རྣ་བ་རྟག་ཏུ་འགེབས། །སྔར་ཞིག་ཐོས་པ་ཉམས་ལེན་གཏེར་མཛོད་དེ། །དགྲ་བཅོམ་ཁྲི་ཁྲག་ཁྲི་བརྒྱའི་གཤེགས་ཤུལ་ཉིད། །ད་ནི་ཐོས་པ་སྒོམ་གྱི་གཤེད་མ་རུ། །མཐོང་བའི་རྟོགས་ལྡན་ས་ཡི་དྲེག་པ་ཙམ། །ཞེས་སྔོན་དང་ད་ལྟའི་སྒོམ་ཆེན་རྣམས་ལ་ཐོས་པ་ལ་ལྟ་ཚུལ་གྱི་ཧེ་བག་དང་ཐོས་པའི་གལ་ཆེན་ཉིང་དོན་གསུངས་པ་ལྟར་རེད། གུང་ཐང་བསྟན་པའི་སྒྲོན་མེས། དོན་གྱི་རྒན་པོ་ཚིག་གི་འཁར་བ་ལ། །བརྟེན་ཕྱིར། ཞེས་པ་ལྟར་དང་པོ་སྒྲ་སྤྱིའི་སྒོ་ནས་གོ་བ་ལེགས་པར་རྙེད་པ་དང༌། དེ་ནས་སྒྲ་སྤྱི་ཟད་པའི་སྒོམ་གྲུབ་དགོས་པ་རེད་མ་གཏོགས། དང་པོ་ཉིད་ནས་གོམས་པ་ཀློང་དུ་གྱུར་འགྲོ་ཡིན་ན། ཚད་མ་རྣམ་འགྲེལ་ལས། དེའི་ཕྱིར་ཡང་དག་ཡང་དག་མིན། །གང་གང་ཤིན་ཏུ་གོམས་པ་ལས། །བསྒོམ་པའི་སྟོབས་ནི་རྫོགས་པ་ན། །དེ་གསལ་མི་རྟོག་བློ་འབྲས་ཅན། །ཞེས་གང་གང་ཤིན་ཏུ་གོམས་གྱུར་གསུངས་མི་དགོས་ཏེ། ཐོས་པ་དང་སྒྲ་སྤྱི་སོགས་ལ་མ་བརྟེན་པར་དང་པོ་ཉིད་ནས་སྒོམ་གྲུབ་འགྲོ་བ་ཡིན་པའི་ཕྱིར་རོ། །ཁ་ཅིག་གིས། ཉོན་མོངས་པ་མ་འདུལ་བའམ་ཉམས་ལེན་མ་བྱས་ན་བཀའ་མདོ་རྒྱུད་ཐམས་ཅད་བློ་ལ་སོང་ན་ཕན་པ་མེད། ཅེས་བཤད་མཁན་གྱི་བློ་ཕུགས་ཀྱི་གཏད་སོ་ལ་བཟང་ངན་གཉིས་ལས། གཅིག་གིས་ཐོས་བསམ་རྐྱང་བ་མ་ཡིན་པར་དེའི་སྟེང་དུ་སྒོམ་པའི་ཉམས་ལེན་བྱེད་ཆེད་དུ་བཤད་པ་གདམས་ངག་རྣམ་དག་རེད། གཅིག་གིས་རང་ལ་ཐོས་བསམ་མེད་པས་ཐོས་བསམ་པ་ལ་དམའ་འབེབས་ཀྱི་ཆེད་དུ་བཤད་པ་དེ་ཐོས་བསམ་སྤངས་བ་མ་ཟད་ལུང་གི་ཆོས་སྤངས་པ་ཡིན་པས་མི་རུང་ལ། གཞུང་གི་ཚིག་ཙམ་ཐོས་པ་ལ་ཕན་ཡོན་བསམ་གྱིས་མི་ཁྱབ་པ་ཡོད་དེ། མདོ་སྡེ་ས་བཅུ་བའི་ཚིག་ཙམ་ཕུག་རོན་ཞིག་གི་གསན་ནས་ཚེ་འཕོས་ནས་འཕགས་པ་བློ་གྲོས་བརྟན་པའི་སྐྱེ་བ་བཞེས་པར་གསུངས་པ་ལྟ་བུ་རེད། ཚིག་ཙམ་འདོན་ན་ཕན་ཡོན་ཡོད་ན་ཐོས་བསམ་ལ་ཕན་ཡོན་ཡོད་པ་ལྟ་ཅི་སྨོས། ཁ་ཅིག་དགེ་སློང་ལེགས་པའི་སྐར་མ་དཔེ་འགོད་ཁུལ་བྱེད་པ་རྨོངས་བ་ཆེན་པོའི་གནས་སུ་གྱུར་ཏེ། སྤྲིན་ཆེན་པོའི་མདོ་ན་སངས་རྒྱས་ཀྱི་འཁོར་ལྷས་སྦྱིན་ཡན་ཆད་སངས་རྒྱས་ཀྱི་སྤྲུལ་བ་ཡིན་པར་གསུངས་པས་བསམ་གྱི་མི་ཁྱབ་པའི་གནས་དག་བློ་དམན་འཁྲུལ་བའི་གཞི་ཡིན་ལ། གསུང་རབ་ཡན་ལག་བཅུ་གཉིས་བློར་འགྲོ་བ་ལ་མི་བརྗེད་པའི་གཟུངས་མ་ཐོབ་ན་ཡོང་རྒྱུ་མེད་པར་རང་གིས་ཚོད་ལྟ་གྱིས་དང་གསལ་བོར་གོ་འོང་པ་རེད། དེས་ན་ཀུན་མཁྱེན་ཆེན་པོ་ཉ་དབོན་པའི་གཞི་ལམ་འབྲས་གསུམ་གྱི་དྲིས་ལན་གྱི་གཞུག་ཏུ། མན་ངག་བསྒོམ་པའི་ལུང་དང་རབ་ལྡན་ཡང༌། །ཡང་དག་ཐོས་པའི་མིག་དང་མི་ལྡན་ན། །མདོ་རྒྱུད་བསྟན་བཅོས་ལེགས་བཤད་རྩོད་པ་གསུམ། །དམུས་ལོང་མྱ་ངན་གང་དུ་འཁྱམས་དང་མཚུངས། །ཐོས་དང་བསྒོམ་པའི་ནམ་མཁའ་ཡངས་ཡོད་ཀྱང༌། །ཐོས་དོན་བསམ་བྱུང་ཉི་འོད་མེད་གྱུར་ན། །གསུང་རབ་དགོངས་དོན་གཏན་ལ་འབེབས་པའི་ཚེ། །གནས་ལུགས་འཇིག་རྟེན་གསལ་བར་ག་ལ་འགྱུར། །ཐོས་བསམ་འཛིན་མ་རབ་ཏུ་རྒྱ་ཆེ་ཡང༌། །བསྒོམ་པའི་དག་བྱེད་རྒྱུན་དང་བྲལ་གྱུར་ན། །རང་རྒྱུད་ཆགས་སྡང་རྨོངས་པ་ལ་སོགས་པའི། །དྲི་མ་མ་ལུས་སེལ་བར་ག་ལ་འགྱུར། །བསྟན་པ་གསལ་བར་ནུས་པའི་ཐོས་པ་དང༌། །གསུང་རབ་དོན་བཞིན་ངེས་པའི་བསམ་པ་དང། །གོལ་མེད་ཉམས་སུ་ལེན་པའི་སྒོམ་པ་གསུམ། །གང་ལ་མངའ་བའི་ཞབས་རྡུལ་སྤྱི་བོའི་ལོངས། །ཞེས་ཐོས་བསམ་སྒོམ་གསུམ་དང༌། འཆད་རྩོད་རྩོམ་གསུམ་གྱི་དགོས་གལ་གསུངས་པ་དེ་ལ་བསམ་མནོ་གཏོང་དགོས་པ་རེད། རང་དགར་དཀོར་ཟས་དཀོར་ཆུ་ཟོས་བསྡད་པ་ཙམ་གྱིས་རབ་ཏུ་བྱུང་བའི་དོན་པོ་གང་ཡང་འགྲུབ་མེད་པ་ཡིན་ཏེ། བཅོམ་ལྡན་འདས་ཀྱི་ཞལ་སྔ་ནས། གང་ཞིག་ངུར་སྨྲིག་བགོས་ཀྱང་སེམས་ཀྱི་སྐྱོན་མ་སྤངས། །ལག་ཏུ་ལྷུང་བཟེད་ཐོགས་ཀྱང་ཡོན་ཏན་སྣོད་མ་གྱུར། །སྐྲ་དང་ཁ་སྤུ་བྲེགས་ཀྱང་དགེ་སྦྱོང་ཚུལ་མ་ཞུགས། །རབ་ཏུ་བྱུང་ཡང་དངོས་པོ་ཀུན་ལས་ངེས་མ་བྱུང༌། །དགེ་སྦྱོང་དེ་ནི་དགེ་སྦྱོང་མ་ཡིན་ཁྱིམ་པའང་མིན། །དེ་ནི་ཆུ་མེད་ཁྲོན་པ་རི་མོའི་མར་མེ་བཞིན། །ཞེས་པ་ལྟར་གྱུར་ཡོད་པ་རེད། ཅེས་སོགས་གསུངས་སོ། །བོད་ཟླ་བརྒྱད་པའི་ཚེས་ལྔ་ཉིན་གཡུང་དྲུང་བོན་གྱི་དགོན་ཆེན་སྣང་ཞིག་དགོན་དུ་འཆད་ཉན་གྱི་དབུ་བརྙེས་ནས་ལོ་འཁོར་བརྒྱ་ལོན་པའི་མཛད་སྒོར་གངས་ལྗོངས་རིས་མེད་མཐོ་སློབ་ཀྱི་སློབ་གཉེར་བ་བརྒྱ་ལྷག་དང་བཅས་ཕེབས་ནས་རྩོད་པ་དང༌། བཤེས་གཉེན་རིན་པོ་ཆེ་ཉིད་ནས་མཐུན་ལམ་གྱི་སྐོར་བཀའ་སློབ་རྒྱ་ཆེན་གནང་བ་གནད་བསྡུས་ཙམ་ནི། དེ་ཡང༌། རྗེ་བཙུན་ཀུན་དགའ་གྲོལ་མཆོག་གིས། ཕ་ནི་ཡོངས་སུ་གསོ་བའི་ཆེད། །མ་དག་བཀུམ་པ་སྲིད་མིན་ལྟར། །རང་གི་བསྟན་པ་སྤེལ་བའི་ཕྱིར། །གཞན་གྱི་བསྟན་པ་ཇི་ལྟར་བཤིག །ཅེས་གསུངས་པ་ལྟར། རང་གི་ཆོས་བརྒྱུད་གྲུབ་མཐའ་འཛིན་སྐྱོང་སྤེལ་གསུམ་བྱེད་རྒྱུ་འོས་འགན་ཡིན་ཡང༌། གཞན་གྱི་ལྟ་གྲུབ་དང་རིག་གནས་ལ་མཐོང་ཆུང་དང༌། སྟོར་བརླག་བྱེད་པ་དེ་བྱམས་དང་སྙིང་རྗེའི་རང་བཞིན་ཅན་གྱི་ཆོས་ལུགས་ཤིག་མ་ཟད། འཛམ་གླིང་གི་འཁོར་ཕྱོགས་ཙམ་ལ་ཡང་མི་མཐུན་པ་རེད། གཞན་ལ་གནོད་པའི་ལས་ཀྱིས་རང་ཉིད་དར་རྒྱས་སུ་འགྲོ་འདོད་པ་དེ་རྩ་བ་ཉིད་ནས་ཆོས་ཤིག་ཏ་གང་ནས་ཡིན་ཏེ། འཇིག་རྟེན་ཡ་རབ་ཀྱི་ཚུལ་ལ་ཡང་གཏན་དུ་རྒྱབ་འགལ་ཁོ་ན་རེད། དེས་ན། རྒྱལ་སྲས་ཞི་བ་ལྷས། དེ་བཞིན་སེམས་ཅན་གནོད་པ་བྱས་ན་ཡང༌། །ཐུགས་རྗེ་ཆེ་རྣམས་དགྱེས་པའི་ཐབས་མེད་དོ། །ཞེས་གསུངས་པ་བཞིན་དུ། གཞན་ལ་གནོད་པའི་ལས་ཀྱིས་རྒྱལ་བ་སྲས་དང་བཅས་པའི་ཐུགས་ དགོངས་གང་ཡང་སྒྲུབ་ཚུལ་མེད་པ ་རེད། བློ་སྦྱོང་དོན་བདུན་མ་ལས། སྐྱིད་ཀྱི་ཡན་ལག་ཏུ་སྡུག་མ་འཚོལ། གསུངས་པ་དེའི་དོན་གང་རེད་ཅེ་ན། རྗེ་ཏཱ་ར་ནཱ་ཐའི་དེའི་འགྲེལ་བ་ལས། སྐྱིད་ཀྱི་ཡན་ལག་ཏུ་སྡུག་མ་ཚོལ་ཞེས་པ་ནི། ཡོན་བདག་ལ་ན་ཚ་ཤི་ཆད་བྱུང་ན་ཚོགས་གསོག་ཡོང༌། གྲྭ་རོགས་གྲོགས་མཆེད་ཤི་ན་དཔེ་ཆ་ལྷ་རྟེན་སོགས་འོང༌། རང་དང་མཉམ་པ་ཤི་ན་ང་གཅིག་པུ་ལ་བསོད་ནམས་འོང༌། དགྲ་ཤི་ན་འཚེང་སྙམ་པ་དང༌། མདོར་ན་རང་སྐྱིད་པའི་ཕྱིར་དུ་གཞན་ལ་སྡུག་བསྔལ་དང་མི་འདོད་པ་ཡོང་དུ་རེ་བ་དེ་སྤོང་བའོ། །ཞེས་གསུངས་པ་དེ་ཉིད་གནད་ཆེན་པོ་རེད། རང་གི་གྲུབ་མཐའ་དང་ཆོས་བརྒྱུད་མི་རིགས་སོགས་གང་ཡིན་ཡང༌། དེའི་དོན་དུ་གཞན་ལ་ཆགས་སྡང་དང་ཉམས་དམས་སུ་ཕྱིན་པར་འདོད་པ་དེ་སྐྱིད་ཀྱི་ཡན་ལག་ཏུ་སྡུག་འཚོལ་བ་རེད།

འཇིག་རྟེན་གྱི་ཕྱོགས་ནས་བསམ་ན་ཡང༌། ཆེ་བ་འཛམ་གླིང་གི་ལོ་རྒྱུས་ནས་བཟུང་སྟེ། ཉེ་བ་རང་རེ་བོད་གངས་ཅན་གྱི་རྒུད་ཚོགས་ཇི་སྙེད་པ་ཚང་མ་མཐུན་འབྲེལ་མ་ཐུབ་པ་ལས་བྱུང་བ་མ་ཡིན་པ་གཅིག་ཀྱང་མེད་པ་རེད། དང་པོ་དོན་དག་མེད་ས་ནས་དོན་དག་བཟོ་བ་དང༌། སྐད་རྒྱག་མི་དགོས་ས་ནས་འུར་ཆེན་པོ་བརྒྱབ་སྟེ། དོན་མེད་ཀྱི་དཀྲུག་ཤིང་བཟོ་འདུག་ན་སུ་ཡིན་ཡང་ཡག་པོ་གཞི་ནས་ཡོད་པ་མ་རེད། དང་པོ་ཆུང་ཆུང་ཞིག་གི་སྐབས་ལ་ཚང་མ་ཁ་མི་ཉན་ཁུལ་དང༌། དོན་དག་ཆེན་པོ་ཞིག་ལ་འགྱུར་ཚར་ཕྱིན་སུས་ཀྱང་འགན་མི་འཁྱག་པར་མཐུན་ཐབས་ཤིག་ག་རེ་ཟེར་བ་དེ། ཆུང་བ་ཁྱིམ་ཚང་ནས་ཁྱིམ་ཚང་གི་བར་གྱི་དོན་དག་ནས་བཟུང་སྟེ། ཆེ་བ་རྒྱལ་ཁབ་དང་རྒྱལ་ཁབ་ཀྱི་བར་ལ་འདྲ་འདྲ་རེད། དེས་ན། ཚང་མས་མཐུན་ལམ་རྡོག་རྩ་གཅིག་སྒྲིལ་ལ་འབད་འབུངས་མི་ཞན་པ་བྱེད་རྒྱུ་རེ་བ་ཡིན། སོགས་གསུངས་སོ། །ཚེས་དགུ་ལ་ཁམས་ནང་ཆེན་བཀའ་བརྒྱུད་གོ་ཆེ་དགེ་འཕེལ་གླིང་དུ་གངས་ལྗོངས་བཀའ་བརྒྱུད་བགྲོ་གླེང་ཆེན་མོའི་སྟེང་དུ་ཕེབས་ནས་བཀའ་སློབ་དང་བརྒལ་བརྟག་གི་ཆོས་གྱི་སྐྱེས་གྱ་ནོམ་པས་ཚིམ་པར་མཛད་དོ། །བོད་ཟླ་དགུ་པའི་ཚེས་དགུའི་ཉིན་མཐོ་ལས་དགོན་དུ་མདོ་སྨད་དགུན་ཆོས་ཆེན་མོ་ཐེངས་ཉི་ཤུ་རྩ་བཞི་པའི་སྟེང་དུ་ཞབས་སོར་བཀོད་དེ། ཆོས་རར་དམ་བཅར་བཞུགས་ནས་མཁས་པ་མང་པོ་ཕན་ཚུན་ལུང་རིགས་ཀྱི་བགྲོ་གླེང་དང་བརྒལ་བརྟག་བརྒལ་ལན་གནང་སྟེ། ཉ་དབོན་ཀུན་དགའ་དཔལ་གྱི་ཞལ་སྔ་ནས། བླུན་པོས་མཁས་ཞེས་བཀུར་བས་མཁས་པ་མིན། །མཁས་པས་མཁས་ཞེས་བསྟོད་ན་མཁས་པ་ཡིན། །མཁས་སམ་མི་མཁས་རྩོམ་འཆད་རྩོད་ན་མངོན། །ཞེས་པ་ལྟར་གྱི་མཁས་པའི་སྤོབས་པ་གཞན་ལས་མཐོ་བའི་རྣམ་ཐར་བཟང་པོ་མངོན་པར་འཕགས་སོ། །བཤེས་གཉེན་རིན་པོ་ཆེ་ཉིད་གང་དུ་ཕེབས་ཀྱང་ལུང་རིགས་ཀྱིས་མངོན་པར་རྒྱལ་བའི་རྔ་ཆེན་རྣམ་པ་ཀུན་ཏུ་བརྡུང་པར་མཛད་མོད་ཀྱི། ཁོང་ནས་ནི་ང་རྒྱལ་དང་ཆེ་བསྟོད་ཅུང་ཟད་ཀྱང་མི་གནང་སྟེ། ཁོ་བོ་དང་ཐོག་སློབ་གཉེར་བྱེད་སྐབས་སུ་ཡང་རྒྱུགས་སྤྲོད་ལ་ལམ་འགྲོ་ཡོང་བ་ཡིན། མི་འགའ་རེར་སྤྱིར་མཁས་པའི་ཡོན་ཏན་ཆེན་པོ་ཡོད་ན་ཡང༌། རྒྱུགས་སྤྲོད་དང་འདུ་འཚོགས་ཆེ་ས་ན་རླུང་རྟ་མི་རྒྱུགས་པ་མང་པོ་ཡོད་པ་རེད། མ་འོངས་པ་ཅི་ཤེས་ཏེ། དེ་སྔོན་ཡིན་ན་ལས་ཤིག་གིས་ལོས་ཡིན་ལམ་འགྲོ་བཟང་པོ་རེ་ཡོང་བ་ཡིན་གསུངས་སོ། །

ང་རྒྱལ་གཞན་ཕམ་རིས་གཅོད་སྡང་ཞེན་གྱིས། །

ཆོས་སྲིད་ལུགས་གཉིས་གཞི་རྩ་ཀུན་སྟོར་བའི། །

འདས་པའི་ཉམས་མྱོང་མ་འོངས་བླང་དོར་གྱི། །

གསལ་འདེབས་ཤིག་ཏུ་དགོས་པའི་སྐུལ་མ་གནང༌། །

སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཕྱོགས་ཞེན་ཁ་འཛིན་ཟེར་བ་སྐྱིད་ཀྱི་ཡན་ལག་ཏུ་སྡུག་འཚོལ་བ་ཡིན་ཚུལ་བསྐོར་གྱི་རྣམ་ཐར་མདོར་བསྡུས་པ་སྟེ་ཉེར་དགུ་པའོ། །