བཞི་བ་བསླབ་པ་ཡོངས་སུ་སྦྱོང་བའི་སྒོ་ནས་བསྲུང་བ་ལ།
བཞི་བ་བསླབ་པ་ཡོངས་སུ་སྦྱོང་བའི་སྒོ་ནས་བསྲུང་བ་ལ།
གསོ་སྦྱོང་གི་གཞི་དང༌། དབྱར་གྱི་གཞི་དང༌། དགག་དབྱེའི་གཞི་དང་གསུམ་ལས། དང་པོ་གསོ་སྦྱོང་གི་གཞི་ལ། གཞི་གནས་ཀྱི་གསོ་སྦྱོང༌། མཐུན་པའི་གསོ་སྦྱོང་དང་གཉིས་ལས། དང་པོ་གཞི་གནས་ཀྱི་གསོ་སྦྱོང་ནི། སྤོང་ཁང་བརྩིགས་ཏེ་དེའི་ནང་ནས་སྟན་བདེ་བ་ལ་འདུག་སྟེ་ལུས་གནད་བཅོས་ཏེ་བྱང་རྒོད་སོགས་སྤང་བྱ་ལྔ་སྤངས་གཉེན་པོ་འདུ་བྱེད་བརྒྱད་བརྟེན་པའི་སྒོ་ནས་སེམས་དམིགས་པ་ལ་རྩེ་གཅིག་ཏུ་གནས་པའི་ངང་ནས། དཔྱད་འཇོག་གཉིས་ཀྱིས་ཞི་གནས་དང་ལྷག་མཐོང་སྒྲུབ་ཚུལ་ཡིན་པས། ཏིང་ངེ་འཛིན་དང་ཤེས་རབ་ཀྱི་བསླབ་པ་གཉིས་གསོ་ཞིང་དེ་དག་གི་མི་མཐུན་ཕྱོགས་སྦྱོང་བར་བྱེད་དོ། །མཐུན་པའི་གསོ་སྦྱོང་གིས་ནི་ཚུལ་ཁྲིམས་ཀྱི་བསླབ་པ་གསོ་ཞིང༌། དེའི་མི་མཐུན་ཕྱོགས་སྦྱོང་བས་གསོ་སྤྱོང་བཅུ་བཞི་པ་དྲུག་དང༌། བཅོ་ལྔ་བ་བཅོ་བརྒྱད་དེ། ལོ་གཅིག་ལ་དུས་འབྲེལ་གྱི་གསོ་སྦྱོང་ཉེར་བཞི་དང༌། བཀྲ་ཤིས་དང་གནོད་པ་ཕྱིར་བཟློག་གི་གསོ་སྦྱོང་ཚེས་གྲངས་ངེས་མེད་དུ་བྱས་ཆོག་པས་དེར་འདུས་ཏེ་བསླབ་པ་སྦྱོང་བ་དང༌། མཚམས་ནང་དེ་ནས་ན་བ་སོགས་ཀྱིས་འདུ་མ་ནུས་ན་འདུན་པ་དང༌། གསོ་སྦྱོང་འབུལ་བ་དང༌། བཞི་མ་ཚང་ན་བྱིན་གྱིས་བརླབ་པ་སོགས་བྱའོ། ། གསོ་སྦྱོང་བཅུ་བཞི་པ་ནི། ཇི་སྐད་དུ། རྒྱལ་དང་དབོ་དང་ས་ག་དང༌། ཆུ་སྟོད་ཁྲུམས་སྨད་སྨིན་དྲུག་བཅས། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པའོ། །ཞེས་པ་ལྟར་ཧོར་ཟླ་དང་པོ། གསུམ་པ། ལྔ་བ། བདུན་པ། དགུ་བ། བཅུ་གཅིག་པ་སྟེ་དྲུག་གི་ཚེས་ཉེར་དགུ་ལ་བྱའོ། །