ལྔ་པ་སྦྱང་དཀའ་བ་བཤད་པ།

ལྔ་པ་ས་ལྔ་པ་སྦྱང་དཀའ་བ་བཤད་པ་ལ། ས་ལྔ་པའི་ངེས་པའི་ཚིག་བཤད་པ་དང༌། བསམ་གཏན་ལྷག་ཅིང་བདེན་པ་ལ་མཁས་པར་བསྟན་པ་དང་གཉིས། དང་པོ་ནི། རྩ་བར། བདག་ཉིད་ཆེ་དེ་བདུད་རྣམས་ཀུན་གྱིས་ཀྱང༌། །སྦྱང་དཀའི་ས་ལ་ཕམ་པར་ནུས་མ་ཡིན། །

ཞེས་ས་ལྔ་པའི་ཡེ་ཤེས་ལ་སྦྱང་དཀའ་བ་ཞེས་བརྗོད་པའི་རྒྱུ་མཚན་ཡོད་དེ། བད༷ག་ཉི༷ད་ཆེ༷ན་པོ་ས་ལྔ་པ་ལ་གནས་པ་དེ༷་ནི་འཇིག་རྟེན་གྱི་ཁམས་མ་ལུས་པ་ཐམས་ཅད་ན་གནས་པའི་ལྷའི་བུའི་བདུ༷ད་རྣ༷མས་ཀུ༷ན་གྱི༷ས་ཀྱང་ནི་སྦྱ༷ང་དཀ༷འི་དོན་དམ་པའི་ས༷་ལ༷་བར་ཆད་བྱེད་པས་ཕ༷མ་པ༷ར་བྱེད་ནུ༷ས་པ་མ༷་ཡི༷ན་ན། དེ་དག་ལས་གཞན་པའི་བདུད་ཀྱི་བཀའ་ཉན་པ་བྲན་ལ་སོགས་པ་རྣམས་ཀྱིས་ཕམ་པར་བྱེད་མི་ནུས་པ་ལྟ་ཅི་སྨོས་པའི་ཕྱིར་ས་འདིའི་མིང་ལ་སྦྱང་དཀའ་བ་ཞེས་བརྗོད་པའོ། །རྒྱན་ལས། སེམས་ཅན་རྣམས་ཡོངས་སྨིན་བྱེད་ཅིང༌། །རང་གི་སེམས་ཀྱང་བསྲུང་བའི་ཕྱིར། །བློ་ལྡན་རྣམས་ཀྱིས་སྦྱང་དཀའ་བ། །དེ་ཕྱིར་སྦྱང་དཀའ་ཞེས་བྱའོ། །ཞེས་དང༌། རིན་ཆེན་ཕྲེང་བ་ལས། ལྔ་པ་ཤིན་ཏུ་སྦྱང་དཀའ་བདུད། །ཀུན་གྱིས་ཤིན་ཏུ་ཐུབ་དཀའིཕྱིར། །ཞེས་སོ། །

གཉིས་པ་བསམ་གཏན་ལྷག་ཅིང་བདེན་པ་ལ་མཁས་པར་བསྟན་པ་ནི།

རྩ་བར། བསམ་གཏན་ལྷག་ཅིང་བློ་བཟང་བདེན་རང་བཞིན། །ཞིབ་མོ་རྟོགས་ལའང་ཤིན་ཏུ་མཁས་པ་ཐོབ། །ཅེས་ས་ལྔ་པ་འདིར་ཕར་ཕྱིན་ལྷག་མ་དྲུག་གི་ནང་ནས་བསམ་གཏན་གྱི་ཕར་ཕྱིན་ཆེས་ལྷག་པར་འགྱུར་བ་ཡིན་ཏེ། བསམ་གཏན་གྱི་ཕར་ཕྱིན་གྱི་མི་མཐུན་ཕྱོགས་རྣམ་གཡེང་དང་བྱིང་བ་དང་ལུས་སེམས་ཀྱི་གནས་ངན་ལེན་སོགས་ཆ་ཕྲ་མོས་ཀྱང་གཏན་མི་བརྫི་བའི་བསམ་གཏན་དེ་ས་འདི་ནས་ཐོབ་ལ། དེ་འདྲ་བའི་ནུས་སྟོབས་ཙམ་ཤེས་རབ་སོགས་ལྷག་མ་ལྔ་ལ་མ་ཐོབ་པ་ཡིན་ལ། ས་ལྔ་པ་འདིར་བདེན་བཞི་ཕྲ་རགས་ལ་མཁས་པའི་ཤེས་རབ་དང་ལྡན་ཏེ། བས༷མ་གཏ༷ན་ལྷ༷ག་ཅི༷ང་དེ་མ་ཟད་བློ༷་བཟ༷ང་ཞེས་པ་འཕགས་པའི་བདེ༷ན་པ་བཞིའི་ར༷ང་བཞི༷ན་ཏེ་བཞི་པོ་རང་རང་གི་ངོ་བོ་མ་ལུས་པ་ཐམས་ཅད་ཤེས་པ་ཞི༷བ་མོ༷་ཡི་སྒོ་ནས་ཁོང་དུ་ཆུད་དགོས་པའི་ཆཕྲ་རགས་དང་བཅས་པ་རྟོ༷གས་པ་ལ༷འ༷ང་ཤི༷ན་ཏུ༷་མཁ༷ས་པ༷་ཐོ༷བ་པ་ཡིན་པའི་ཕྱིར་རོ། །

འདི་བའི་ལུགས་ལ་བདེན་འཛིན་དུ་གྱུར་བའི་མ་རིག་པ་ཡོད་པར་བཞེད་དེ། སྟོང་ཉིད་བདུན་ཅུ་པ་ལས། རྒྱུ་དང་རྐྱེན་ལས་སྐྱེ་དངོས་རྣམས། །ཡང་དག་པར་ནི་རྟོགས་པ་གང༌། །དེ་ནི་སྟོན་པས་མ་རིག་གསུངས། །དེ་ལས་ཡན་ལག་བཅུ་གཉིས་འབྱུང༌། །ཞེས་གསུངས་པའི་ཕྱིར་རོ། །

བདེན་བཞི་པོ་རྣམས་ཀྱི་རང་གི་ངོ་བོ་ཕྲ་མོ་ཤེས་ན་བདེན་བཞི་ལ་མཁས་པར་སྐབས་འདིར་གསུངས་ཏེ། རང་འགྲེལ་ལས། བློ་གྲོས་བཟང་པོའི་བདེན་པ་རྣམས་ཀྱི་རང་གི་ངོ་བོ་ཕྲ་མོ་ཤེས་པ་ལ་ཆེར་མཁས་པར་འགྱུར་རོ། །དེ་ལ་འཕགས་པའི་བདེན་པ་བཞི་ནི་སྡུག་བསྔལ་དང༌། ཀུན་འབྱུང་དང་འགོག་པ་དང་ལམ་ཞེས་བྱ་བ་རྣམས་སོ། །གལ་ཏེ་བཅོམ་ལྡན་འདས་ཀྱིས་བདེན་པ་ནི་གཉིས་ཁོ་ནར་བསྟན་ཏེ། འདི་ལྟ་སྟེ། ཀུན་རྫོབ་ཀྱི་བདེན་པ་དང༌། དོན་དམ་པའི་བདེན་པའོ། །ཇི་སྐད་དུ། ཡབ་སྲས་མཇལ་བའི་མདོ་ལས། འཇིག་རྟེན་མཁྱེན་པས་གཞན་ལས་མ་གསན་པར། །བདེན་པ་འདི་གཉིས་ཉིད་ཀྱིས་བསྟན་པར་མཛད། །གང་ཞིག་ཀུན་རྫོབ་དེ་བཞིན་དོན་དམ་སྟེ། །བདེན་པ་གསུམ་པ་འགའ་ཡང་མ་མཆིས་སོ། །ཞེས་གསུངས་སོ། །དབུ་མ་ལས་ཀྱང༌། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །

འཇིག་རྟེན་ཀུན་རྫོབ་བདེན་པ་དང༌། །དམ་པའི་དོན་གྱི་བདེན་པའོ། །ཞེས་བཤད་དོ། །དེའི་ཕྱིར་བདེན་པ་གཉིས་ལས་ཐ་དད་པར་འཕགས་པའི་བདེན་པ་བཞི་པོ་གཞན་ག་ལ་ཡོད་ཅེ་ན། བཤད་པ། གལ་ཏེ་ཡང་དེ་ལྟ་ཡིན་མོད་ཀྱི། དེ་ལྟ་ན་ཡང་བླང་བར་བྱ་བ་ཡང་སྤང་བར་བྱ་བ་དག་རེ་རེའི་རྒྱུ་དང་འབྲས་བུའི་དངོས་པོ་བསྟན་པར་བྱ་བའི་ཕྱིར། འདིར་འཕགས་པའི་བདེན་པ་བཞི་བསྙད་དོ། །དེ་ལ་སྤང་བར་བྱ་བའི་ཕྱོགས་ནི་ཀུན་ནས་ཉོན་མོངས་པའོ། །དེའི་འབྲས་བུ་ནི་སྡུག་བསྔལ་གྱི་བདེན་པའོ། །རྒྱུ་ནི་ཀུན་འབྱུང་གི་བདེན་པའོ། །བླང་བར་བྱ་བའི་ཕྱོགས་ནི་རྣམ་པར་བྱང་བ་ཡིན་ལ། དེའི་འབྲས་བུ་ནི་འགོག་པའི་བདེན་པའོ། །དེ་ཐོབ་པའི་རྒྱུ་ནི་ལམ་གྱི་བདེན་པའོ། །དེ་ལ་སྡུག་བསྔལ་དང་ཀུན་འབྱུང་དང་ལམ་གྱི་བདེན་པ་ནི་ཀུན་རྫོབ་ཀྱི་བདེན་པའི་ཁོངས་སུ་གཏོགས་སོ། །འགོག་པའི་བདེན་པ་ནི་དོན་དམ་པའི་བདེན་པའི་རང་གི་ངོ་བོའོ། །

དེ་བཞིན་དུ་བདེན་པ་གཞན་གང་ཅུང་ཟད་ཅིག་ཡོད་པ་དེ་ཡང་ཅི་རིགས་པར་བདེན་པ་གཉིས་ཀྱི་ཁོངས་སུ་གཏོགས་པ་ཁོ་ནར་ངེས་པར་བྱའོ། །ཡང་ཅི་བདེན་པ་བཞི་ལས་ཐ་དད་པའི་བདེན་པ་གཞན་ཡང་ཡོད་དམ་ཞེ་ན། བཤད་པ་ཡོད་དེ། ཇི་སྐད་དུ་བྱང་ཆུབ་སེམས་དཔའི་ས་ལྔ་པ་ལས། འདི་ནི་སྡུག་བསྔལ་འཕགས་པའི་བདེན་པའོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །

འདི་ནི་སྡུག་བསྔལ་ཀུན་འབྱུང་བའོ། །ཞེས་གསུངས་པའི་ཕྱིར་རོ། །སྐབས་འདིར་སྒོ་མང་ཡིག་ཆ་སོགས་སུ་བདེན་བཞི་ཕྲ་རགས་བཞག་ཡོད་ལ། འཇུག་ཊཱིཀ་རབ་གསལ་སྣང་བའི་རྒྱན་ལས། རང་རྒྱུ་བདེན་འཛིན་སོགས་ཀུན་འབྱུང་བདེན་པ་ཕྲ་མོས་བསྐྱེད་པའི་སྡུག་བསྔལ་བའི་ཟག་བཅས་ཉེར་ལེན་གྱི་ཕུང་པོ་ཡིན་པ་དེ། རང་ཉིད་ཕྲ་བའི་སྡུག་བདེན་ཡིན་པའི་མཚན་ཉིད་ཡིན་ཏེ།

ཕྲ་བའི་སྡུག་བདེན་དེ་ཐུང་མཐའི་སྐད་གཅིག་མ་གཅིག་གི་ཡུན་ལ་འཇིག་པའི་མི་རྟག་པ་དང༌། ཕྲ་བའི་སྡུག་བདེན་དེ་སྡུག་བསྔལ་གསུམ་པོ་ཅི་རིགས་པས་སྡུག་བསྔལ་བ་དང༌། དེ་བདེན་པས་སྟོང་པ་དང༌། དེ་རང་དབང་བའི་བདག་གི་ངོ་བོར་མེད་པ་བཞི་སྡུག་བདེན་ཕྲ་མོའི་ཁྱད་ཆོས་ཕྲ་མོ་ཡིན། བདེན་འཛིན་གྱིས་ཐུན་མོང་མ་ཡིན་པར་དྲངས་པའི་ལས་ཉོན་ཅི་རིགས་པས་བསྡུས་པའི་རང་འབྲས་སྡུག་བདེན་སྐྱེད་བྱེད་ཡིན་པ་དེ། ཀུན་འབྱུང་བདེན་པ་ཕྲ་མོའི་མཚན་ཉིད། དེ་འདྲའི་ཀུན་འབྱུང་བདེན་པ་ཕྲ་མོར་གྱུར་པའི་རྒྱུ་དང༌། དེར་གྱུར་པའི་ཀུན་འབྱུང༌། དེར་གྱུར་པའི་རྐྱེན་དང༌། དེར་གྱུར་པའི་རབ་སྐྱེ་ཞེས་བྱ་བའི་ཆ་རྣམས་ཀུན་འབྱུང་བདེན་པ་ཕྲ་མོའི་ཁྱད་ཆོས་ཕྲ་མོ་ཡིན་ཏེ། འཁོར་བར་འཕེན་འགྲུབ་ཀྱི་ལས་ཉོན་ཐམས་ཅད་བདེན་འཛིན་གྱིས་དྲངས་པ་ཡིན་ཡང་དེ་ལ་བདེན་འཛིན་དང་མངོན་པ་ནས་བཤད་པའི་ཉོན་མོངས་པས་དྲངས་པའི་ཆ་གཉིས་ཡོད་པའི་སྔ་མ་ཀུན་འབྱུང་བདེན་པ་ཕྲ་མོར་སྣང་གི་ཆ་དེའི་རྒྱུ་དང་ཀུན་འབྱུང་ལ་སོགསཡིན་པའི་ཆ་དེ་ཀུན་འབྱུང་བདེན་པ་ཕྲ་མོའི་ཁྱད་ཆོས་ལ་འཇོག་པ་ཡིན་པའི་ཕྱིར་རོ། །

ལམ་བདེན་སྒོམ་སྟོབས་ཀྱིས་སྒྲིབ་གཉིས་གང་རུང་སྤངས་པའི་ཆོས་ཉིད་དེ། ཕྲ་བའི་འགོག་བདེན་གྱི་མཚན་ཉིད་ཡིན་ཏེ། དེ་འདྲའི་འགོག་བདེན་ལ་ཕྲ་བའི་འགོག་བདེན་མ་ཡིན་པ་གཅིག་ཀྱང་མེད་པས་དེ་ལ་ཕྲ་བའི་འགོག་བདེན་གྱིས་ཁྱབ་པའི་ཕྱིར་རོ། །དེ་འདྲའི་རང་གི་སྤང་བྱ་འགོག་པ་དང་སྤང་བྱ་ཞི་བ་དང༌། དེ་མཆོག་ཡིན་པས་གྱ་ནོམ་པ་དང༌། དེ་ལས་སླར་མི་ལྡོག་པའི་ངེས་འབྱུང་གི་ཆ་བཞི་འགོག་བདེན་ཕྲ་མོའི་ཁྱད་ཆོས་ཕྲ་མོ་ཡིན། ལམ་དང་རིགས་པ་སོགས་ཁྱད་ཆོས་བཞི་ལྡན་གྱི་འཕགས་ལམ་དེ། ཕྲ་བའི་ལམ་བདེན་གྱི་མཚན་ཉིད་ཡིན་ཏེ། མཚན་ཉིད་དེ་འདྲ་ལ་ཕྲ་བའི་ལམ་བདེན་གྱིས་ཁྱབ་པའི་ཕྱིར་ཏེ། རགས་པའི་ལམ་བདེན་ལམ་བདེན་མ་ཡིན་པའི་ཕྱིར་ཏེ། ཕྲ་བའི་ལམ་བདེན་དང་ལམ་བདེན་དོན་གཅིག་པའི་ཕྱིར་རོ། །དེ་འདྲའི་ལམ་བདེན་དེ་ལམ་གྱི་བདེན་པ་ཡིན་པར་མཚོན་བྱེད་ལ་བདེན་མེད་མངོན་སུམ་དུ་རྟོགས་པའི་གནས་སྐབས་ལ་ལྟོས་ནས་བཞག་པའི་ལམ་དང༌། རིགས་པ་དང༌། སྒྲུབ་པ་དང༌། ངེས་འབྱིན་བཞི་ལམ་བདེན་གྱི་ཁྱད་ཆོས་ཕྲ་མོར་འཇོག་པ་ཡིན་ཏེ། དེ་འདྲའི་ཁྱད་ཆོས་བཞི་ནི་བདེན་མེད་མངོན་སུམ་དུ་རྟོགས་པའི་ཡེ་ཤེས་ལ་ལྡོག་པའི་ཕྱེ་ནས་འཇོག་པ་ཡིན་ཞིང༌། རྣམ་པ་དེ་བཞི་དང་ལྡན་པ་ནི་འཕགས་ལམ་མཉམ་རྗེས་ཐམས་ཅད་ཡིན་པའི་ཕྱིར་རོ། །བདེན་བཞི་རགས་པ་ཡང་ཡོད་དེ། རང་རྐྱ་ཐུབ་པའི་རྫས་ཡོད་དུ་འཛིན་པའི་བློས་དྲངས་པའི་སྡུག་བདེན་དེ། སྡུག་བདེན་རགས་པ་དང༌། རང་རྐྱ་ཐུབ་པའི་རྫས་ཡོད་དུ་གྲུབ་པར་འཛིན་པའི་བློས་དྲངས་པའི་ལས་ཉོན་གཉིས་ཀུན་འབྱུང་བདེན་པ་རགས་པ་དང༌། མངོན་པ་གཉིས་ནས་བཤད་པའི་ཉོན་མོངས་མངོན་གྱུར་རེ་ཞིག་སྤངས་པའི་སྤངས་པ་དེ་འགོག་བདེན་རགས་པ་དང༌། རང་རྐྱ་ཐུབ་པའི་རྫས་ཡོད་དུ་གྲུབ་པས་སྟོང་པ་ཙམ་མངོན་སུམ་དུ་རྟོགས་པའི་ལམ་དེ་ལམ་བདེན་རགས་པ་ཡིན་པའི་ཕྱིར་ཏེ། སྡུག་ཀུན་རགས་པ་ལ་སྡུག་ཀུན་གྱིས་ཁྱབ་ཀྱང་འགོག་ལམ་རགས་པ་ལ་འགོག་ལམ་མ་ཡིན་པས་ཁྱབ་པའི་ཕྱིར། ཞེས་བདེན་བཞི་སོ་སོའི་ཕྲ་རགས་ཀྱི་ཚད་སོ་སོར་གསུངས་པའི་ཚིག་ཟིན་དག་ལ་དཔྱད་པར་བྱའོ། །དབུ༷་མ༷་ལ༷་འཇུ༷ག་པ༷འི་ཚིག་དོན་ཟླ་བ་གྲགས་པའི་དགོངས་རྒྱན་རིན་ཆེན་སྒྲོན་མེ་ཞེས་བྱ་བ་ལ༷ས་དོན་དམ་པའི་སེ༷མས་བསྐྱེ༷ད་པ༷་ལྔ༷་པའི་རྣམ་པར་བཤདཔ༷འོ༷།། །།