འཕགས་མ་དབྱངས་ཅན་ལྷ་མོའི་བརྒྱུད་འདེབས་སྙིང་གི་མུན་སེལ།
༄༅།། འཕགས་མ་དབྱངས་ཅན་ལྷ་མོའི་བརྒྱུད་འདེབས་སྙིང་གི་མུན་སེལ་བཞུགས་སོ༔ ཨོཾ་སྭ་ར་སྭ་སྟི་སརྦ་སིདྡྷི་ཕ་ལ་ཧཱུྃ༔ རབ་འབྱམས་ཞིང་གི་ལས་ཅན་སྐྱེད་ཚལ་དུ༔ ཤར་བའི་མོད་ལ་ཕན་བདེའི་འོད་སྣང་གིས༔ ཐར་ལམ་འདབ་སྟོང་ཅིར་ཡང་དགོངས་མཛད་པའི༔ སྨྲ་བའི་ཉི་མ་ཤཱཀྱའི་རྒྱལ་པོ་ལ༔ གསོལ་བ་འདེབས་སོ་གཏི་མུག་མུན་པ་སོལ༔ མཁྱེན་རབ་སྣང་བ་རྒྱས་པར་བྱིན་གྱིས་རློབས༔ རྒྱལ་ཀུན་ཐུགས་བསྐྱེད་ཀུན་གསལ་ལམ་ཡངས་པོར༔ ཇི་ལྟ་ཇི་སྙེད་མཁྱེན་པའི་ལང་ཚོས་མཛེས༔ ས་གསུམ་སྐལ་བཟང་ཀུན་དྷའི་གཉེན་གཅིག་པུ༔ བློ་མཆོག་ཟླ་བ་འཇམ་དབྱངས་གཞོན་ནུ་ལ༔ གསོལ་བ་འདེབས་སོ་ཐེག་གསུམ་བདུད་རྩིའི་ཆར༔ བདག་ཡིད་ཆུ་མཚོར་འཁྱིལ་བར་བྱིན་གྱིས་རློབས༔ ཚངས་ཆེན་ཆགས་པའི་གདོང་གི་འབྲུག་སྒྲ་ཡིས༔ ཕྱི་ནང་གྲུབ་མཐའ་འཛིན་པའི་མདོངས་མཐའ་ཅན༔ གཅིག་ཏུ་དགའ་བའི་འཁྲི་ཤིང་སློང་མཛད་པ༔ མཚོ་སྐྱེས་ན་ཆུང་རྡོ་རྗེ་དབྱངས་ཅན་མར༔ གསོལ་བ་འདེབས་སོ་བློ་ལྡན་གཞོན་ནུའི་ཡིད༔ ཟག་མེད་བདེ་བས་ཚིམ་པར་བྱིན་གྱིས་རློབས༔ དཔག་ཡས་རྒྱལ་བ་སྲས་བཅས་བྱིན་ནུས་གཟུགས༔ གཅིག་བསྡུས་སྐྱེ་རྒུའི་སྐྱབས་གཅིག་སྤྲུལ་པའི་སྐུ༔ རང་བྱུང་པདྨའི་སྡོང་པོར་དགྱེས་རོལ་བ༔ གངས་ཅན་ལྷ་གཅིག་ཨོ་རྒྱན་ཆེན་པོ་ལ༔ གསོལ་བ་འདེབས་སོ་ཐུགས་བསྐྱེད་ཞལ་བཞེས་མཐུས༔ ཤེས་བྱའི་ཆོས་ཀུན་རྟོགས་པར་བྱིན་གྱིས་རློབས༔ བཅུ་དྲུག་ལང་ཚོའི་རྣམ་འགྱུར་མཐོང་བས་ཀྱང་༔ སྲིད་པའི་གདུང་སེལ་ཞི་བའི་བློ་རྨོངས་འཇོམས༔ མཐའ་བྲལ་བློ་འདས་གཟུགས་སྐུར་རོལ་པའི་འཕྲུལ༔ གསང་ཆེན་མཛོད་འཛིན་མཁའ་འགྲོ་མཚོ་རྒྱལ་ལ༔ གསོལ་བ་འདེབས་སོ་སྐྱེ་མེད་དགོངས་པའི་དོན༔ རྩོལ་མེད་རྒྱུད་ལ་འཆར་བར་བྱིན་གྱིས་རློབས༔ ཟུར་ཕུད་ལྔ་པའི་ཐུགས་བསྐྱེད་ཆུ་གཏེར་ལས༔ གངས་ཅན་ལེགས་བྱས་དེད་དཔོན་གྱིས་བོས་མགྲོན༔ བསྟན་འགྲོའི་དབུལ་སེལ་ལྷ་སྲས་ཡིད་བཞིན་ནོར༔ ཆོས་རྒྱལ་ཆེན་པོ་ཁྲི་སྲོང་ལྡེའུ་བཙན་ལ༔ གསོལ་བ་འདེབས་སོ་རང་སྣང་དབང་དུ་འདུས༔ གཞན་སྣང་ཟིལ་གྱིས་གནོན་པར་བྱིན་གྱིས་རློབས༔ མོས་གུས་སེམས་ཀྱི་བཀོད་མའི་ཆུ་མིག་ཏུ༔ མ་དག་འཁྲུལ་བའི་རྙོག་མས་ཆེར་གོས་པ༔ ཟབ་གཏེར་ལུང་སྟོན་ནོར་བུ་ཀེ་ཏ་ཀས༔ འཁྲུད་མཛད་གྲུབ་དབང་བྱང་ཆུབ་རྡོ་རྗེ་ལ༔ གསོལ་བ་འདེབས་སོ་སྨོན་འཇུག་སེམས་མཆོག་དང་༔ འབྲལ་མེད་གཞན་དོན་འགྲུབ་པར་བྱིན་གྱིས་རློབས༔ ཚེ་རབས་ཀུན་ཏུ་ཨོ་རྒྱན་བླ་མ་ཡིས༔ རྗེས་བཟུང་དམ་པ་དུ་མའི་སྨིན་གྲོལ་མཐུས༔ སྔོན་སྨོན་ལས་ཀྱི་འཕྲོ་སད་དག་སྣང་ཆོས༔ ཟོལ་མེད་འགྲོ་ལ་སྟོན་མཛད་ནིརྨ་ཀ༔ རྒྱལ་བའི་མྱུ་གུ་ལུང་རིག་གླིང་པ་ལ༔ གསོལ་བ་འདེབས་སོ་མདོ་རྒྱུད་མན་ངག་ཆོས༔ གོ་མྱོང་རྟོགས་པས་གྲོལ་བར་བྱིན་གྱིས་རློབས༔ དེ་ལྟར་སྨོན་ལམ་ལུང་བསྟན་བརྒྱུད་པ་དང་༔ ཀུན་མཁྱེན་ཆོས་རྗེ་ནས་བརྒྱུད་སྙན་བརྒྱུད་ཀྱི༔ ཆུ་ཀླུང་ཐམས་ཅད་མ་དྲོས་མཚོ་ལ་བཞིན༔ གཅིག་འདུས་རང་བྱུང་རྟོགས་པའི་ཡེ་ཤེས་ཆེ༔ རྒྱལ་ཡུམ་ཤེས་རབ་ཕ་རོལ་ཕྱིན་མ་ལ༔ གསོལ་བ་འདེབས་སོ་སྒྲིབ་དག་རྫོགས་སངས་རྒྱས༔ གཉུག་མའི་རང་ངོ་འཕྲོད་པར་བྱིན་གྱིས་རློབས༔ གཞན་ཡང་ཚེ་རབས་སྔོན་ནས་ད་ལྟའི་བར༔ དམ་ཚིག་དབང་དང་ཤེས་རབ་རྒྱུད་དོན་བཀྲོལ༔ མན་ངག་ལུང་སྦྱིན་ཉམས་ཆག་སྐོང་མཛད་པའི༔ བཀའ་དྲིན་འཁོར་མེད་རྩ་བརྒྱུད་བླ་མ་ལ༔ གསོལ་བ་འདེབས་སོ་གཟུང་འཛིན་གློ་བུར་ཆོས༔ ཡེ་གྲོལ་མཁའ་ལ་དེངས་པར་བྱིན་གྱིས་རློབས༔ ངོ་བོ་ཆོས་ཉིད་གཅིག་དང་དུ་བྲལ་གཤིས༔ ཞི་དང་ཁྲོ་གར་གདུལ་བྱའི་བློ་རིམ་བཞིན༔ ཅིར་ཡང་སྟོན་མཛད་ཡི་དམ་དཀྱིལ་འཁོར་ལྷ༔ གནས་གསུམ་མཁའ་འགྲོ་དམ་ཅན་སྲུང་མ་ལ༔ གསོལ་བ་འདེབས་སོ་ཤེས་དང་ཤེས་བྱའི་ཆོས༔ དབྱིངས་གཅིག་ངང་དུ་གྲོལ་བར་བྱིན་གྱིས་རློབས༔ ཞེས་པའང་བན་སྤྲང་ཀུ་སུ་ལུ་པ་ལུང་རྟོགས་མིང་གིས་བྲིས་པ་དུས་ཀུན་ཏུ་དགེ་བར་གྱུར་ཅིག༔