འཇམ་དཔལ་གཤིན་རྗེ་ཁྲོ་ཆུ་དུག་གདོང་གི་ཟོར་ལས།
འཇམ་དཔལ་གཤིན་རྗེ་ཁྲོ་ཆུ་དུག་གདོང་གི་ཟོར་ལས་བཞུགས་སོ༔
དེ་ནས་གཟུ་དཔང་བྱ་བ་ནི༔ ཕུད་ཕྱོགས་བཅུར་གཏོར་ལ་འདི་སྐད་དོ༔ བྷྱོ༔ བདག་ནི་མ་ཉེས་མ་ལེན་ནོ༔ དུས་གསུམ་བདེ་གཤེགས་ཞི་ཁྲོ་ཆོས་སྐྱོང་དང་༔ དྲེགས་པ་ལྷ་སྲིན་སྡེ་བརྒྱད་གཞི་བདག་རྣམས༔ རང་རང་གནས་ནས་དམ་རྫས་ཕུད་བཞེས་ལ༔ གཟུ་དང་དཔང་མཛོད་མཁྱེན་པའི་ཐུགས་་ཀྱིས་དགོངས༔ བདག་གིས་སྒྲུབ་པའི་དྲག་པོའི་ཐུན་ཟོར་འདི༔ སྟེང་འོག་ཕྱོགས་མཚམས་ཀུན་ལ་བཞུགས་པ་ཡི༔ ལྷ་ཀླུ་གཞི་བདག་རྣམས་ལ་མི་འཕེན་ནོ༔ གནོད་བྱེད་དགྲ་བགེགས་འདི་ལ་འཕེན་བསམས་པས༔ གདུག་སེམས་མ་འཆང་བདག་གི་སྡོང་གྲོགས་
མཛོད༔ ཕྱོགས་བཞིར་བཞུགས་པའི་ཕོ་ཉ་སྒོ་སྲུང་ནི༔ བྱ་རྒོད་སྟག་དང་ཀང་ཀ་སྤྱང་མགོ་ཅན༔ རང་རང་ཕྱག་རྒྱས་ཕྱོགས་བཞིའི་སྒོ་ཕྱེས་ལ༔ གནོད་བྱེད་དགྲ་དང་བགེགས་ལ་ཟོར་སྣ་དྲོངས༔ དགྲ་བགེགས་བར་ཆད་ཐལ་བ་རྡུལ་དུ་རློགས༔ དེ་ནས་ཟོར་སྣ་སྒྱུར་ལ་སྐྱེས་བུ་གོ་ཆ་དང་མཚོན་ཆ་ཅན་རྣམས་ཀྱིས་བསོ་སྒྲ་དང་བཅས་པ༔ དང་པོ་ཟོར་གྱི་སྣ་འདྲེན་སྒོང་ཟོར་འཕེན་པ་ནི༔ སྒོང་ཟོར་ཐོགས་ལ་འདི་སྐད་དོ༔ བྷྱོ༔ སྲིད་པའི་བྱ་སྒོང་ཟླུམ་པོ་འདྲིལ་བའི་དབུས༔ བྲ་བོ་སྲན་མ་ཚྭ་དང་ཐལ་ཆེན་དང་ཀ་གཙོང་བཙོད་རམ་བལ་ཚོན་ལ་སོགས་པ༔ ངན་པའི་རྫས་ཀྱིས་ཟོར་གྱི་སྣ་
དྲོངས་ལ༔ སྲིད་སྡེའི་མི་ཁ་བྲ་མཆུ་ངན་པ་རྣམས༔ བསྟན་པ་བཤིགས་པའི་དགྲ་དང་བགེགས་ལ་ཟོར༔ རྩ་སྔགས་ཤམ་དུ༔ ཨཱ་མི་ཁ་ཧུར་ཐུ་རྦད་རྦད་དྲིལ་དྲིལ་ཐུ་ཐུ་ཤིག་ཤིག་བྷྱོ་བྷྱོ་ཟློག་ཟློག་སྒྱུར་སྒྱུར༔ ཁྲམ་ཟོར་ཐོགས་ལ༔ བྷྱོ༔ ཡ་མ་རཱ་ཙ་གཤིན་རྗེ་སྲོག་གི་བདག༔ སྲིད་པ་ཁྲམ་ཐོགས་གཤིན་རྗེའི་ཕོ་ཉ་རྣམས༔ སྔ་དགྲ་བདར་བའི་སྲོག་ལ་ཁྲམ་ཟོར་རྒྱབ༔ ཤོ་རྩིས་ཁྲམ་གྱིས་སྲོག་རྩ་རབ་དཀྲུགས་ནས༔ དགྲ་དཔུང་བདུན་རྒྱུད་རྩད་ཆོད་ཁྲམ་ལ་ཐོབ༔ རྩ་སྔགས་ཤམ་དུ༔ ཡ་མ་རཱ་ཙ་ཡ་བྷྱོ་ཛ༔ དགྲ་བགེགས་ཧུར་ཐུ་མཱ་ར་ཡ་ཆད༔ མདའ་ཟོར་ཐོགས་ལ༔ བྷྱོ༔ སྲོག་གཟན་དམར་པོ་ཚེ་བདག་བཙན་གྱི་གཙོ༔ སྲིད་པ་མདའ་ཐོག་བཙན་གྱི་དམག་དཔུང་རྣམས༔ ཕྱི་དགྲ་བསམ་པའི་སྙིང་ལ་མདའ་ཟོར་རྒྱོབ གྲི་ཐབས་གཟེར་ནད་རྩ་ཡི་རྒྱུད་དཀྲུག་སྟེ ཕོ་རྩ་མོ་རྩ་རྩད་ནས་ཆོད་པར་གྱིས༔ རྩ་སྔགས་ལ༔ ཨ་བྷི་ཀྵ་ཛ་བྷྱོ༔ དགྲ་བགེགས་ཧུར་ཐུ་མཱ་ར་ཡ་ཆད༔ ཁྲག་ཟོར་ཐོགས་ལ༔ བྷྱོ༔ ཨེ་ཀ་ཙ་ཏི་མ་མོ་ནད་ཀྱི་བདག༔ སྲིད་པ་རིམས་བདག་མ་མོའི་དམག་ཚོགས་རྣམས༔ ད་དགྲ་སྦྱོར་བའི་ལུས་ལ་ཁྲག་ཟོར་རྒྱོབ༔ འདུ་བ་རྣམ་བཞིས་ཁོང་
ནས་རབ་དཀྲུག་སྟེ༔ རྒྱུ་ལུས་གཟུག་ཕུང་རྡུལ་དུ་བརླག་པར་གྱིས༔ རྩ་སྔགས་ལ༔ ཨེ་ཀ་ཙ་ཏི་ཏྲག་རཀྵ་ཁ་ཐུན་བྷྱོ༔ དགྲ་བགེགས་ཧུར་ཐུ་མཱ་ར་ཡ་ཆད༔ རྡོ་ཟོར་ཐོགས་ལ༔ བྷྱོ༔ རྐོས་རྗེ་དྲང་དཀར་འཆི་བདག་བདུད་ཀྱི་གཙོ༔ སྲིད་པ་ཞགས་ཐོགས་བདུད་ཀྱི་ཕོ་ཉ་རྣམས༔ བསྟན་པ་བཤིག་པའི་དགྲ་ལ་རྡོ་ཟོར་རྒྱོབ༔ བླ་ཚེ་སྲོག་དབུགས་ཀུན་གཞིའི་རྒྱུད་དཀྲུག་སྟེ༔ ཁ་ཕུང་རྗེས་མེད་ཐལ་བ་རླུང་ལ་བསྐུར་རྩ་སྔགས་ཤམ༔ དུ་ཁྲག་དུ་ཛ་བྷྱོ༔ དགྲ་བགེགས་ཧུར་ཐུ་མཱ་ར་ཡ་ཆད༔ ཀོང་ཟོར་ཐོགས་ལ ཧཱུྃ༔ ཡབ་གཅིག་དཔལ་ཆེན་ཁྲོ་རྒྱལ་གཤིན་རྗེའི་གཤེད༔ གཟི་བརྗིད་དྲག་སྟོབས་རྔམ་པའི་གཏུལ་ཞུགས་ཅན༔ སྐུ་གསུང་ཐུགས་ཡོན་ཕྲིན་ལས་བསམ་ལས་འདས༔ དོ་ནུབ་དྲག་པོའི་ཟོར་གྱི་ཕྲིན་ལས་མཛོད༔ ཕུང་བྱེད་གདུག་པ་དྲག་པོའི་ས་སྣ་ལ༔ ཀོང་ཟོར་དམར་ནག་གྲུ་གསུམ་འཇིགས་པའི་ནང་༔ མདའ་འཕང་ནམ་རྒྱང་དམར་གཏོར་ཉུང་རྩང་གིས༔ བདུད་དང་ས་བདག་གཤིན་རྗེའི་ཆད་པ་ཟློག མཚེ་ཉུང་མར་མེ་སྤོས་དང་དུད་པ་ཡིས༔ མཁའ་འགྲོ་རྒྱལ་འགོང་གནོད་སྦྱིན་ཆད་པ་ཟློག ཤ་ཁྲག་སྦགས་ཆེར་
ཕབ་དང་དུག་སྣ་ཡིས༔ ཐེའུ་རང་གཟའ་དང་འགོང་པོའི་ཆད་པ་ཟློག གུ་གུལ་རྡ་ཚིལ་རམ་དང་བལ་ཚོན་གྱིས༔ བཙན་དང་ཀླུ་བདུད་ལྷ་ཡི་ཆད་པ་ཟློག༔ དྲག་པོའི་ཏིང་འཛིན་སྔགས་དང་འཕྲོ་འདུ་ཡིས༔ སྔགས་ཟོར་དལ་ཡམས་ཐམས་ཅད་དགྲ་ལ་ཟློག༔ བྷྱོ༔ ལེགས་ལྡན་ནག་པོ་མགོན་པོ་ཡོངས་ཀྱི་གཙོ༔ དོ་ནུབ་དྲག་པོའི་ཟོར་དང་ཐུན་ལ་རྒྱུགས༔ དབང་ཕྱུག་རེ་ཏི་མ་མོ་ཡོངས་ཀྱི་དཔོན༔ དོ་ནུབ་དྲག་པོའི་ཟོར་དང་ཐུན་ལ་རྒྱུགས༔ ཁྱབ་མཇུག་ཆེན་པོ་གཟའ་རྣམས་ཡོངས་ཀྱི་གཙོ༔ དོ་ནུབ་དྲག་པོའི་ཟོར་དང་ཐུན་ལ་རྒྱུགས༔ རྡོ་རྗེ་ལེགས་པ་མཆེད་འཁོར་སུམ་བརྒྱའི་ཚོགས༔ དོ་ནུབ་དྲག་པོའི་ཟོར་དང་ཐུན་ལ་རྒྱུགས༔ དགྲ་བླ་པེ་དཀར་སྲོག་བདག་འབུམ་དང་བཅས༔ དོ་ནུབ་དྲག་པོའི་ཟོར་དང་ཐུན་ལ་རྒྱུགས༔ ཀླུ་བདུད་མགོ་དགུ་ས་བདག་འབུམ་གྱི་གཙོ དོ་ནུབ་དྲག་པོའི་ཟོར་དང་ཐུན་ལ་རྒྱུགས༔ སྟེང་འོག་ཕྱོགས་མཚམས་ཆོས་སྐྱོང་འབུམ་སྡེའི་ཚོགས༔ དོ་ནུབ་དྲག་པོའི་ཟོར་དང་ཐུན་ལ་རྒྱུགས༔ བྷྱོ༔ སྣང་སྲིད་ལྷ་སྲིན་སྡེ་བརྒྱད་དམག་ཚོགས་རྣམས༔ དོ་ནུབ་དྲག་པོའི་ཟོར་དང་ཐུན་ལ་རྒྱུགས སྔ་དགྲ་བདར་བ་
ཕྱི་དགྲ་སེམས་པ་དང་༔ ད་དགྲ་སྦྱོར་བའི་དགྲ་དཔུང་རྡུལ་དུ་རློགས༔ དུ་ཏྲི་ཡ་མ་རཱ་ཙ༔ ཡ་མ་རཀྵ ཀྲོ་ཏ་པ་ཙ་ལ་ཏི༔ ཨ་ཡ་མ་དུ་རུ་ཙ་ཤ་ན་དགྲ་བོ་བྱད་མ་ལྷ་སྲུང་དང་བཅས་པ་ནི་དྲི་མཱ་ར་ཡ་བྷྱོ་བྷྱོ༔ ཟློག་ཟློག༔ ཤམ་བུར༔ ཨེ་ཀ་དུ་ན་ཟློག༔ མ་ཧཱ་དུ་ན་ཟློག ས་ག་དུ་ན་ཟློག༔ ཙ་དུར་སྙིང་ན་ཟློག རྭ་ཙ་དུ་ན་ཟློག༔ སུམ་ཏྲི་རཀྵ་ཟློག བྱད་ཟོར་ཕུར་ཁ་ཐམས་ཅད་དགྲ་ལ་བྷྱོ་ཟློག༔ ཅེས་དམིགས་པ་དང་བཅས་པས་ཟློག་སྔགས་བཟླ་ཞིང་ཉ་བོ་ལ་ཟོར་བརྡེགས་པས༔ ཕུང་པོ་ལུས་སེམས་རྡུལ་དུ་བརླགས་པར་བསམ༔ དེ་ནས་གཞན་ཟོར་ལྷག་རྣམས་ཕྱོགས་མཚམས་སུ་འཕངས་བས་སྣང་སྲིད་ལྷ་སྲིན་སྡེ་བརྒྱད་བྱད་ཁ་ཐམས་ཅད་བཟློག་པར་བསམ་མོ༔ དེ་ལྟར་དམིགས་པ་གསལ་ཞིང་ངར་དང་ལྡན་པ་གཅེས་སོ༔ རུ་ཏྲའི་སྙིང་ཟོར་སྡེ་བཞི་ནི༔ ཧཱུྃ༔ བཅོམ་ལྡན་དཔལ་ཆེན་འཇམ་དཔལ་གཤིན་རྗེའི་གཤེད༔ ཁྱེད་ཀྱི་བཀའ་ཉན་ལས་བྱེད་ཤན་པ་ནི༔ ཤར་གྱི་ཕྱོགས་ཀྱི་རུ་ཏྲ་དཀར་པོ་ནི༔ ཁྲག་ཟོར་འཕོངས་ཤིག་དགྲ་བགེགས་སྲོག་ལ་ཡ༔ ཉིན་གྱི་ལས་བྱེད་མར་མར་མེར་གྱི་བདག༔ དགྲ་བགེགས་ཕོ་རྒྱུད་བརླག་པའི་དུས་ལ་བབ༔ མཚན་གྱི་ལས་བྱེད་རཾ་རཾ་རུམ་གྱི་རྗེ༔ དགྲ་བགེགས་མོ་རྒྱུད་བརླག་པའི་
དུས་ལ་བབ༔ ཤན་པ་རུ་ཏྲ་སྡེ་བཞི་ཡབ་ཡུམ་ནི༔ དམར་ཆེན་ཁྲག་གི་གཏོར་མ་འདི་བཞེས་ལ༔ བྱད་མ་ཁ་ལ་ཟ་ཟ་དུས་ལ་བབ༔ དགྲ་བགེགས་བྱད་མ་རང་ཤ་རང་གིས་ཟོ༔ དགྲ་བགེགས་བྱད་མ་རང་སྲོག་རང་གིས་ཆོད༔ དགྲ་བགེགས་བྱད་མ་རང་མཚོན་རང་ལ་རྒྱོབ༔ ཐུགས་དམ་དུས་ལ་བབ་བོ་ས་མ་ཡ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ བཅོམ་ལྡན་འཇམ་དཔལ་གཤིན་རྗེའི་གཤེད༔ ཁྱེད་ཀྱི་བཀའ་ཉན་ལས་བྱེད་ཤན་པ་ནི༔ ལྷོ་ཡི་ཕྱོགས་ནས་རུ་ཏྲ་སེར་པོ་ནི༔ ཁྲག་ཟོར་འཕོངས་ཤིག་དགྲ་བགེགས་སྲོག་ལ་ཡཱ༔ ཉིན་གྱི་ལས་བྱེད་མར་མར་མེར་གྱི་བདག༔ དགྲ་བགེགས་ཕོ་རྒྱུད་བརླག་པའི་དུས་ལ་བབ༔ མཚན་གྱི་ལས་བྱེད་རཾ་རཾ་རུམ་གྱི་རྗེ༔ དགྲ་བགེགས་མོ་རྒྱུད་བརླག་པའི་དུས་ལ་བབ༔ ཤན་པ་རུ་ཏྲ་སྡེ་བཞི་ཡབ་ཡུམ་ནི༔ དམར་ཆེན་ཁྲག་གི་གཏོར་མ་འདི་བཞེས་ལ༔ བྱད་མ་ཁ་ལ་ཟ་ཟ་དུས་ལ་བབ༔ དགྲ་བགེགས་བྱད་མ་རང་ཤ་རང་གིས་ཟོ༔ དགྲ་བགེགས་བྱད་མ་རང་སྲོག་རང་གིས་ཆོད༔ དགྲ་བགེགས་བྱད་མ་རང་མཚོན་རང་ལ་རྒྱོབ༔ ཐུགས་དམ་དུས་ལ་བབ་བོ་ས་མ་ཡཱ༔ རྣལ་འབྱོར་
བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ བཅོམ་ལྡན་འཇམ་དཔལ་གཤིན་རྗེའི་གཤེད༔ ཁྱེད་ཀྱི་བཀའ་ཉན་ལས་བྱེད་ཤན་པ་ནི༔ ནུབ་ཀྱི་ཕྱོགས་ནས་རུ་ཏྲ་དམར་པོ་ནི༔ ཁྲག་ཟོར་འཕོངས་ཤིག་དགྲ་བགེགས་སྲོག་ལ་ཡཱ༔ ཉིན་གྱི་ལས་བྱེད་མར་མར་མེར་གྱི་བདག༔ དགྲ་བགེགས་ཕོ་རྒྱུད་བརླག་པའི་དུས་ལ་བབ༔ མཚན་གྱི་ལས་བྱེད་རཾ་རཾ་རུམ་གྱི་རྗེ༔ དགྲ་བགེགས་མོ་རྒྱུད་བརླག་པའི་དུས་ལ་བབ༔ ཤན་པ་རུ་ཏྲ་སྡེ་བཞི་ཡབ་ཡུམ་ནི༔ དམར་ཆེན་ཁྲག་གི་གཏོར་མ་འདི་བཞེས་ལ༔ བྱད་མ་ཁ་ལ་ཟ་ཟ་དུས་ལ་བབ༔ དགྲ་བགེགས་བྱད་མ་རང་ཤ་རང་གིས་ཟོ༔ དགྲ་བགེགས་བྱད་མ་རང་སྲོག་རང་གིས་ཆོད༔ དགྲ་བགེགས་བྱད་མ་རང་མཚོན་རང་ལ་རྒྱོབ༔ ཐུགས་དམ་དུས་ལ་བབ་བོ་ས་མ་ཡ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ བཅོམ་ལྡན་འཇམ་དཔལ་གཤིན་རྗེའི་གཤེད༔ ཁྱེད་ཀྱི་བཀའ་ཉན་ལས་བྱེད་ཤན་པ་ནི༔ བྱང་གི་ཕྱོགས་ནས་རུ་ཏྲ་ལྗང་གུ་ནི༔ ཁྲག་ཟོར་འཕོངས་ཤིག་དགྲ་བགེགས་སྲོག་ལ་ཡཱ༔ ཉིན་གྱི་ལས་བྱེད་མར་མར་མེར་གྱི་བདག༔ དགྲ་བགེགས་ཕོ་རྒྱུད་བརླག་པའི་
དུས་ལ་བབ༔ མཚན་གྱིས་ལས་བྱེད་རཾ་རཾ་རུམ་གྱི་རྗེ༔ དགྲ་བགེགས་མོ་རྒྱུད་བརླག་པའི་དུས་ལ་བབ༔ ཤན་པ་རུ་ཏྲ་སྡེ་བཞི་ཡབ་ཡུམ་ནི༔ དམར་ཆེན་ཁྲག་གི་གཏོར་མ་འདི་བཞེས་ལ༔ བྱད་མ་ཁ་ལ་ཟ་ཟ་དུས་ལ་བབ༔ དགྲ་བགེགས་བྱད་མ་རང་ཤ་རིང་གིས་ཟོ༔ དགྲ་བགེགས་བྱད་མ་རང་སྲོག་རང་གིས་ཆོད༔ དགྲ་བགེགས་བྱད་མ་རང་མཚོན་རང་ལ་རྒྱོབ༔ ཐུགས་དམ་དུས་ལ་བབ་བོ་ས་མ་ཡ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ ལྕགས་སམ་བྷནྡྷའི་སྣོད་ཡངས་ས༔ འབྲུ་སྣ་ལྔ་ལ་ངར་ཕྱེ་བྱས༔ དྲག་པོའི་བཤོས་བུ་ཟུར་གསུམ་བཞེངས༔ མདའ་མདུང་མཚེ་ཉུང་རྩང་གིས་བརྒྱན༔ མྱོས་བྱེད་དུག་དང་ཁྲག་སྣས་བྱུག༔ རྩ་བར་འདོད་ཆགས་ཁྲག་མཚོ་འཁྱིལ༔ ངོས་ལ་ཞེ་སྡང་མེ་དཔུང་འབར༔ འོག་ནས་གཏི་མུག་མུན་པ་འཐིབ༔ རྩེ་མོར་མཚོན་ཆ་བུ་ཡུག་འཚུབ༔ རྐེད་པར་གཤིན་རྗེའི་དམག་དཔུང་འཐིབ༔ འཕང་བ་གཤིན་རྗེ་ཉིད་ཀྱིས་འཕངས་རྒྱབ་པ་དམ་ཉམས་དགྲ་ལ་བརྒྱབ༔ དགྲ་ཁམས་ཐལ་བ་རྡུལ་དུ་རློགས༔ དགོངས་སུ་གསོལ་བ་ནི༔ ཧོ་དགོངས་སུ་གསོལ་ལོ༔ ལན་
གསུམ༔ ལྷོ་ཕྱོགས་རིམ་པ་བདུན་གྱི་ས་འོག ལས་ཀྱི་གཤིན་རྗེའི་ཞིང་ཁམས༔ འབྱུང་བ་ཚ་གྲངས་འཁྲུགས་པའི་གནས་ནས༔ དམ་ཅན་ལས་ཀྱི་གཤིན་རྗེ་ཁྲོ་ཆུ་དུག་གདོང་༔ སྐུའི་སྤྲུལ་པ་འཆི་བདག་ནག་པོ༔ གསུང་གི་སྤྲུལ་པ་ཚེ་བདག་དམར་པོ༔ ཐུགས་ཀྱི་སྤྲུལ་པ་སྲོག་བདག་ནག་པོ༔ ཡོན་ཏན་སྤྲུལ་གྱི་སྤྲུལ་པ་བི་བྷ་སྭ་ཏ༔ ཕྲིན་ལས་ཀྱི་སྤྲུལ་པ་ཟ་བ་ལྗང་ནག༔ གཉིས་མེད་ཀྱི་སྤྲུལ་པ་ཡ་མ་རཱ་ཛ༔ གཤེད་ཆེན་སྡེ་བཞི༔ མོན་པ་སྡེ་བཞི༔ བདུད་པོ་སྡེ་བཞི་འཆི་བདག་བཅུ་གཉིས༔ ཕོ་གཤེད་སུམ་བརྒྱ་དྲུག་ཅུ མོ་གཤེད་སུམ་བརྒྱ་དྲུག་ཅུ༔ སྒོ་བ་དྲེགས་པ་སྡེ་བཞི་སྲོག་གཅོད་རུ་ཏྲ་སྡེ་བཞི༔ བྱ་ནག་བདུན༔ ཁྱི་ནག་བདུན༔ སྦྲུལ་ནག་བདུན༔ སྡིག་པ་བདུན༔ རུས་སྦལ་བདུན༔ ཕག་རྒོད་བདུན༔ མོན་ཕོ་དྲུག༔ མོན་མོ་དྲུག༔ འཆི་བདག་བྱེ་བ་དགུ་འབུམ་གྱི་དམག་ཚོགས༔ འཇིགས་པའི་ཆ་ལུགས་དང་ལྡན་པ༔ དྲག་པོའི་ང་རོ་དང་ལྡན་པ༔ གདུག་པའི་ཞེ་སྡང་དང་ལྡན་པ་མེ་ལྕེ་བས་ཚ་བ༔ སྤུ་གྲི་བས་རྣོ་བ༔ གློག་དམར་བས་མྱུར་པ༔ ཐོག་རྒོད་བས་དྲག་པ༔ སྲིད་པ་གསུམ་
གྱི་སྲོག་ལ་དབང་བསྒྱུར་བ་ཁྱེད་རྣམས་ཀྱིས ཉི་ཟླ་ཙམ་གྱི་སྤྱན་བསྒྲད༔ གནམ་ས་ཙམ་གྱི་ཞལ་གདངས གངས་རི་ཙམ་གྱི་མཆེ་བ་གཙིགས༔ གློག་དམར་ཙམ་གྱི་ལྗག་སྐྱོངས་ལ་སྤྱིར་ཞིང་བཅུ་ཚང་བ་བསྟན་པའི་སྤྱི་དགྲ དོ་བསྔོ་ཞིང་འགྲས་ཚོལ་བ༔ རྣལ་འབྱོར་པ་བདག་གི་སྒོས་དགྲ༔ བསམ་ངན་སྦྱོར་རྩུབ་འཆང་བའི་བྱད་མ༔ གནོད་ཅིང་འཚེ་བའི་གདོན་བགེགས༔ གཟུགས་ལིང་ག་ལ་བྲིས་པ༔ མིང་བྱང་བུ་ལ་བཏབ་པ༔ དམ་ཉམས་ཡིད་ལ་བརྣག་པའི་དགྲ་བགེགས་འདི་ལོ་དང་ཟླ་བར་མ་བཞག༔ ཞག་དང་ཟ་མར་མ་འགོར་བར་ད་ལྟ་ཉིད་དུ་བཞེས་སུ་གསོལ་ལོ༔ རྒྱས་པར་ན་འདིའོ༔ བླ་འཁོར་ལོ་ལ་བསྐོར་བ༔ དགྲ་ཡ་དང་གྱོད་ཡ་བྱས་པ༔ འཛིངས་ཡ་དང་འཁོན་ཡ་བྱས་པ༔ འགྲས་ཡ་དང་རྩོད་ཡ་བྱས་པ༔ ཁ་འོ་མས་འཇམ་པ༔ སྙིང་ཚེར་མས་རྩུབ་པ༔ སྲུང་བའི་ལེ་གུ་ལྷ་ལོག བསླབ་པའི་སློབ་བུ་དམ་ལོག༔ བཞག་པའི་བྲན་ཁོལ་སྙིང་རིང་༔ རུས་ཀྱི་ཕ་ཚན་རྒྱབ་ལོག༔ བཅོས་པའི་ནད་པ་སོས་ལོག༔ གཏམ་པའི་ཤག་རོགས་མནའ་ཟན༔ བསྟན་པའི་མགོ་དཔོན་ཁྲེལ་མེད༔ བཀའ་ལ་འཁུ་བ༔ དམ་
ལས་ལོག་པའི་དགྲ་འདྲེ་བྱད་མ༔ གཟུགས་ལིངྒ་ལ་བྲིས་པ༔ མིང་བྱང་བུ་ལ་བཏབ་པ༔ དམ་ཉམས་ཡིད་ལ་བརྣག་པའི་དགྲ་བགེགས་ལས་ངན་འདི༔ ལོ་དང་ཟླ་བར་མ་བཞག་ཞག་དང་ཟ་མར་མ་འགོར་བར་ད་ལྟ་ཉིད་དུ་བཞེས་ཤིག༔ ཅེས་གཏོར་ཆེན་ནམ་ཡང་ན་ཟོར་ཆེན་འཕེན་ནོ༔ ༈ ཞེས་ཟོར་རྣམས་སྨྲེང་བཟློག་སྔགས་བཟླས་བཅས་རིམ་བཞིན་འཕང་ལ་ཟོར་ལིང་ག་ལ་བརྡེགས༔ ཟོར་ཆེན་སྒོང་ཟོར་ཐོགས་ལ༔ ཧོ༔ དགོངས་སུ་གསོལ་ལོ༔ ལྷོ་ཕྱོགས་རིམ་པ་བདུན་གྱི་ས་འོག༔ ལས་ཀྱི་གཤིན་རྗེའི་ཞིང་ཁམས་། འབྱུང་བ་ཚ་གྲང་འཐབ་པའི་གནས་ནས། དམ་ཅན་ལས་ཀྱི་གཤིན་རྗེ་ཁྲོ་ཆུ་དུག་གདོང་། སྐུའི་སྤྲུལ་པ་འཆི་བདག་ནག་པོ། གསུང་གི་སྤྲུལ་པ་ཚེ་བདག་དམར་པོ། ཐུགས་ཀྱི་སྤྲུལ་པ་སྲོག་བདག་ནག་པོ༔ ཡོན་ཏན་གྱི་སྤྲུལ་པ་བེ་བྷ་སྭ་ཏ། ཕྲིན་ལས་ཀྱི་སྤྲུལ་པ་ཟ་བ་ལྗང་ནག །གཉིས་མེད་ཀྱི་སྤྲུལ་པ་ཡ་མ་རཱ་ཙ། ཡུམ་དུག་ཏི་ནག་མོ། གཤེད་ཆེན་སྡེ་བཞི། མོན་པ་སྡེ་བཞི༔ བདུད་པོ་སྡེ་བཞི། འཆི་བདག་བཅུ་གཉིས། ཕོ་གཤེད་སུམ་བརྒྱ་དྲུག་ཅུ། མོ་གཤེད་སུམ་བརྒྱ་དྲུག་ཅུ། སྒོ་བ་དྲེགས་པ་སྡེ་བཞི། སྲོག་གཅོད་རུ་ཏྲ་སྡེ་བཞི། བྱ་
ནག་བདུན། ཁྱི་ནག་བདུན། སྦྲུལ་ནག་བདུན། སྡིག་པ་བདུན་། རུས་སྦལ་བདུན། ཕག་རྒོད་བདུན། མོན་ཕོ་དྲུག །མོན་མོ་དྲུག །འཆི་བདག་བྱེ་བ་དགུ་འབུམ་གྱི་དམག་ཚོགས། འཇིགས་པའི་ཆ་ལུགས་དང་ལྡན་པ། དྲག་པོའི་ང་རོ་དང་ལྡན་པ། གདུག་པའི་ཞེ་སྡང་དང་ལྡན་པ། མེ་ལྕེ་བས་ཚ་བ། སྤུ་གྲི་བས་རྣོ་བ། གློག་དམར་བས་མྱུར་བ། ཐོག་རྒོད་བས་དྲག་པ། དུག་མདའ་བས་གཟིར་བ། སྲིད་པ་གསུམ་གྱི་སྲོག་ལ་དབང་བསྒྱུར་བ་ཁྱེད་རྣམས་ཀྱིས། ཉི་ཟླ་ཙམ་གྱི་སྤྱན་བསྒྲད། གངས་རི་ཙམ་གྱི་མཆེ་བ་གཙིགས། གློག་དམར་ཙམ་གྱི་ལྗགས་རྐྱངས་ལ། སྤྱིར་ཞིང་བཅུ་ཚང་བ་བསྟན་པའི་སྤྱི་དགྲྭ། དོ་བསྔོ་ཞིང་འགྲས་ཚོལ་བ། རྣལ་འབྱོར་པ་བདག་གི་སྒོས་དགྲ། བསམ་ངན་སྦྱོར་རྩུབ་འཆང་བའི་བྱད་མ། གནོད་ཅིང་འཚེ་བའི་གདོན་བགེགས། གཟུགས་ལིང་ག་ལ་བྲིས་པ། མིང་བྱང་དམར་ལ་བཀོད་པ། དགྲ་ཡ་དང་གྱོད་ཡ་བྱེད་པ། འཛིངས་ཡ་དང་འཁོན་ཡ་བྱེད་པ། འགྲས་ཡ་དང་རྩོད་ཡ་བྱེད་པ། ཁ་འོ་མས་འཇམས་པ། སྙིང་ཚེར་བས་རྩུབ་པ། སྲུང་བའི་ལེ་གུ་ལྷ་ལོག །བསླབ་པའི་སློབ་བུ་དམ་ལོག་
བཞག་པའི་བྲན་ཁོལ་སྙིང་རིང་། རུས་ཀྱི་ཕ་ཚན་རྒྱབ་ལོག །བཅོས་པའི་ནད་པ་སོས་ལོག གཏམ་པའི་ཤག་རོག་མནའ་ཟན། བསྟན་པའི་འགོ་དཔོན་ཁྲེལ་མེད། བཀའ་ལས་འཁུ་བ་དམ་ལས་ལྡོག་པ་རྣམས་དང་། གཞན་ཡང་བསྲུང་བྱ་མི་ནོར་འཁོར་དང་བཅས་པ་ལ་གནོད་ཅིང་འཚེ་བའི་གདོན་བགེགས། ཕོ་སྲི་རི་བོའི་རྩེ་ནས་ལང་བ། མོ་སྲི་རྒྱ་མཚོའི་འགྲམ་ནས་ལང་བ། ཆུང་སྲི་རྩིག་པའི་གསིང་ནས་ལང་བ། དགྲ་སྲི་ལ་བཙས་སྟེང་ནས་ལང་བ། གོད་སྲི་ར་བའི་མཐིལ་ནས་ལྡང་བ། གཤིད་སྲི་དུར་ཁྲོད་ཀྱི་གླིང་ནས་ལྡང་བ། སྲིད་པའི་འདྲེ་དགུ་གཙུག་ལག་གི་གདོན་བཅུ་ལ་སོགས་པའི་དགྲ་བགེགས་གཟུགས་ལིང་ག་ལ་བྲིས་པ། མིང་བྱང་བུ་ལ་བཏབ་པའི་དམ་ཉམས་ཡིད་ལ་བརྣག་པའི་དགྲ་བོ་བྱད་མ་འདི་རྣམས་ལོ་དང་ཟླ་བར་མ་བཞག་དང་། ཞག་དང་ཟ་མར་མ་འགྱང་བར་ད་ལྟ་ཉིད་དུ་བཞེས་ཤིག །ཅེས་ཟོར་འཕངས་དར་ནག་བརྡབས། གོས་མགོ་མཇུག་ལྡོག་ལ་བརྡབས། ཟློག་བསད་ཀྱི་སྔགས་དྲག་པོར་བཟླ། གལ་ཆེ་བའི་དབང་དུ་ན། གདོན་རྒོད་འདུལ་བ་ལ་ཁྲོ་བོ་སྡིག་བརྡབས་བྱ། བྱད་མ་འདུལ་ན་བྱད་མ་འབུམ་རྡུགས་སྤུ་གྲི་རེག་གཅོད་བྱ། དགྲ་བོ་བསྒྲལ་ན་ཉི་མ་མདུང་
གང་བྱ། མཐུ་ཟློག་བྱེད་ན་རི་རབ་སྟེང་བཟློག་བྱ། དེ་དག་གང་ལའང་གཞུང་དང་ཞལ་ཤེས་བསྡེབ་པའི་སྔགས་དམིགས་འཁྲུལ་འཁོར་ཤེསན་ལས་གང་ཡང་མི་འགྲུབ་མི་སྲིད་དེ་ཅིག་ཆར་དུ་འགྲུབ་པར་བྱའོ། །རླུང་ཁ་ཡེ་མ་གྱུ་ན་སྡེ་བརྒྱད་དར་ཆིངས་ཀྱི་དམིགས་པ་ཞལ་ལས་ཤེས། ཟོར་གྱུ་དང་མ་རྒྱུ་སྤེལ་མ་རེད་ན་བཟང་ངོ་། །གཏོར་མ་ལང་བྱུང་ན་ཆག་སྒོ་ཤིན་ཏུ་ཆེ་བ་ཡིན་པས་རིམ་གྲོ་ལུང་འདོགས། གཏོར་ལིང་བསྲེགས་ཐལ་མནན་ན། མཁའ་འགྲོ་རྒྱུ་ལྡོག་རྩི་ལ་གདོང་མི་གཏུགས། རང་ཉིད་གཤིན་རྗེར་གསལ་བའི་ཕྱག་མཚན་དགྲ་སྣ་ས་ལ་བརྒྱབས་པས་ས་གཞི་ཤགས་སེ་རལ་པའི་ནང་ནས་ལས་གཤིན་ཡ་མ་རཱ་ཙས་ཆུ་སྲིན་གྱི་ཞལ་རབ་ཏུ་གདངས་ནས་འོ་དོད་འབོད་པར་བསམས་ལ། འགུགས་གཞུག་བྱ། བསྟོད་བསྐུལ་བྱ། གཏོར་མ་འབུལ། ཐལ་ལིང་དོང་དུ་བྲུབ། མེ་ཆུ་རླུང་གིས་དགུ་རིམ་གཡོགས། དུར་གཡམ་ལ་རི་རབ་རྒྱ་གྲམ་བྲིས་པས་མནན། གཏོར་བྲོ་བརྡུངས། ལས་གྲུབ་པ་དང་རང་ལ་མི་ལྡོག་པའི་དྲག་སྔགས་ཅི་མང་བཟླའོ། །གཞན་ཡང་ལག་ལེན་ཞིབ་པ་པོད་གཞུང་དང་ཞལ་ལས་ཤེས། ཞེས་ཁྲོ་ཆུའི་གསེར་སྐྱེམས་སྒོ་དབྱེ་མི་གསལ་བས་མདོར་བསྡུས་ཉེར་མཁོའི་ལག་ལེན་བཅས། རཱ་ག་ཨ་སྱས་སྦྱར་བའོ། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།