དམ་ཅན་རྡོ་རྗེ་ལེགས་པའི་གསོལ་མཆོད།
དམ་ཅན་རྡོ་རྗེ་ལེགས་པའི་གསོལ་མཆོད་བཞུགས་སོ། །
དཀོན་མཆོག་གསུམ་ལ་སྐྱབས་མཆི་ཞིང་། །འགྲོ་བའི་དོན་དུ་བྱང་ཆུབ་བསྒྲུབ། །ཨཱ༔ རྡོ་རྗེའི་ར་གུར་མེ་རིའི་དབུས། །པད་ཉི་འབྱུང་པོའི་སྟེང་དུ་ཧཱུྃ། །འཕྲོ་འདུ་ཞུ་ལས་རྡོ་རྗེ་འཛིན། །མཐིང་ནག་ཞལ་གཅིག་ཁྲོ་ཆས་རྫོགས། །རྩ་ཕྱག་འབྱུང་འདུལ་ཕྱག་རྒྱ་དང་། །འོག་གཉིས་རྡོ་རྗེ་སྡིགས་མཛུབ་ཞགས། །མེ་དཔུང་དབུས་ན་འདོར་ཐབས་བཞུགས། །གནས་གསུམ་འབྲུ་གསུམ་ཧཱུྃ་ཡིག་གིས། །ཡེ་ཤེས་པ་བསྟིམས་དབང་ལྷ་ཡིས། །དབང་བསྐུར་མི་བསྐྱོད་དབུ་རྒྱན་གྱུར། །ཐུགས་ཀར་ཉི་སྟེང་ཧཱུྃ་གི་མཐར། །སྔགས་ཕྲེང་འོད་ཀྱིས་སྡིག་སྒྲིབ་
བསལ། །བསོད་ནམས་ཡེ་ཤེས་འཕེལ་བར་གྱུར། །ཧཱུྃ་བཛྲ་ཕཊ༔ བསྙེན་པ་མང་ཉུང་ཅི་རིགས་བྱ། ཨོཾ་བཛྲ་པཱ་ཎི་ཨནྡྷཾ་སོགས་ཤབྟ་པྲ་ཏིཙྪ་ཧཱུྃ། གཏོར་མ་ཡོད་ན་བྲན། གཏོར་མ་ཡེ་ཤེས་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུྃ། ལན་གསུམ་བརྗོད། ཨོཾ་བཛྲ་པཱ་ཎི་ས་པཱ་རི་ཝཱ་ར་ཨི་དཾ་བྷ་ལི་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་བདུན་འབུལ། གསང་བའི་བདག་པོ་འཁོར་བཅས་ཀྱིས། །གཏོར་མ་འབུལ་བ་འདི་བཞེས་ལ། །ནད་གདོན་མ་ལུས་ཞི་བ་དང་། །དངོས་གྲུབ་རྣམ་གཉིས་ཐོབ་པར་མཛོད། །ཅེས་འདོད་དོན་གསོལ། ལྕང་ལོ་ཅན་གྱི་གནས་མཆོག་དམ་པ་ནས། །
གསང་སྔགས་རིག་སྔགས་ཀུན་གྱི་བདག་པོ་སྟེ། །ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པ། །བཅོམ་ལྡན་རྡོ་རྗེ་འཛིན་ལ་ཕྱག་འཚལ་བསྟོད། །ཅེས་བསྟོད། ཨོ་སྭ་བྷཱ་ཝ་སོགས། ཤུདྡྷོ྅ཧཾ། རང་མདུན་ཕ་ཝང་ལོང་བུའི་མཁར། །སྤྲིན་ནག་ཐོག་འབྲུག་འཇའ་ཚོན་འཁྱུག །རླུང་ཞགས་འཚུབ་ཅིང་ཁྲག་མཚོ་ཁོལ། །།དེ་དབུས་པད་ཉིར་ཏྲི་ཡིག་ལས། །སྐྱེས་བུ་མཐིང་ནག་རབ་ཁྲོས་པ། །ཐོ་ཆེན་ཕྱར་ཞིང་སྡུད་པ་བསྣམས། །དར་ནག་བེར་གསོལ་ར་སྐྱེས་ཆིབས། །མཆེད་ཟླ་སུམ་བརྒྱ་དྲུག་ཅུ་དང་། །དགྱེས་སྡེ་བརྟན་མ་བཅུ་གཉིས་དང་། །ཕོ་ཉ་འཛིན་གིང་བཞི་བཅུ་དང་། །ལྷ་ཀླུ་བདུད་བཙན་གནོད་སྦྱིན་དང་། །གཤིན་རྗེའི་འཁོར་ཚོགས་གྲངས་མེད་བཅས། །ཐུགས་ཀའི་ཧྲི་ཡིག་འོད་ཟེར་གྱིས། །རྒྱ་བོད་མདོ་
གཙང 
་གར་བཞུགས་ཀྱང་། །སྐད་ཅིག་ཉིད་ལ་སྤྱན་དྲངས་གྱུར། །སྤྱན་འདྲེན་པ་ནི། ཀྱི། འདོད་ཁམས་ཚངས་པ་མན་ཆད་ནས། །ན་རིག་དམྱལ་ཁམས་ཡན་ཆད་དུ། །སྐྱེས་བུ་རྡོ་རྗེ་ལེགས་པ་ལ། །མཆེད་འཁོར་སུམ་བརྒྱ་དྲུག་ཅུས་བསྐོར། །གནས་མཆོག་འདི་རུ་སྤྱན་འདྲེན་ན། །གསུར་མཆོད་འདི་ལ་གཤེགས་
སུ་གསོལ། །མ་ཐོགས་མྱུར་དུ་ད་ཚུར་བྱོན། །བཛྲ་སཱ་དྷུ་ས་མ་ཡ་ཛ་ཛཿ ཛཿཧཱུྃ་བཾ་ཧོ༔ དམ་ཅན་སྐྱེས་བུ་འཁོར་དང་བཅས། །དེང་གི་གནས་མཆོག་དམ་པ་འདིར། །དགྱེས་ཤིང་བརྟན་པར་བཞུགས་སུ་གསོལ། །ཕྱག་འཚལ་མཆོད་པ་སྣ་ཚོགས་འབུལ། །བཛྲ་སཱ་དྷུ་ཨ་ཏི་པཱུ་ཧོ༔ སརྦ་པཱུ་ཙྪ་ཧོ༔ ཧཱུཾ། རྒྱལ་བ་རྣམས་ཀྱིས་ཇི་ལྟར་བཀའ་སྩལ་པ། །ཁྲོ་རྒྱལ་རྣམས་ཀྱིས་དབང་བསྐུར་དམ་བཞག་པ། །པདྨ་བཛྲ་ཇི་ལྟར་བསྒོས་པ་བཞིན། །རང་གིས་ཁས་བླངས་དམ་ཚིག་དྲན་པར་གྱིས། །སྤྱི་བོའི་ཐད་དུ་ཨོ་རྒྱན་བསྒོམ་ལ། བཛྲ་སཱ་དྷུ་ས་མ་ཡ་ཛ་ཛཿ ཞེས་པའོ། །ཡང་ན་འོག་ནས་འབྱུང་བའི་སྔགས་རིང་བཟླའོ། ༈ །དེ་ནས་བསང་དུད་དང་གསུར་དུད་བཏང་། སྤོས་སྤྲིན་གསུར་གྱི་དུད་པ་ཡིད་འོང་བ། །དྲི་ཞིམ་ལུས་སེམས་བདེ་བ་སྐྱེད་བྱེད་ཅིང་། །ལྷ་སྲུང་རྨུགས་འཐིབས་སངས་བའི་ནུས་ལྡན་གྱུར། །ཨོཾ་ཨཱཧཱུཾ། གསུམ་གྱིས་བྱིན་གྱིས་རླབས། སྐྱེས་བུ་ཆེན་པོ་མཐུ་རྩལ་ཅན། བདག་གི་དགྲ་བླ་ཁྱེད་མཆོད་ན། །ཕྱག་ན་རྡོ་རྗེའི་བཀའ་བཞིན་དུ། །བདག་གི་བསམ་པ་འགྲུབ་པར་མཛོད། །ཁྱོད་ལ་མཆོད་པ་འབུལ་བ་ནི། །བཤོས་བུ་མཁར་ཐབས་
གསེར་སྐྱེམས་དང་། །མདའ་དར་ར་སྐྱེས་རིན་ཆེན་ཁྲི། །ཙནྡན་ལ་སོགས་དྲི་བཟང་དང་། །བཟང་དྲུག་ལ་སོགས་སྨན་སྣ་དང་། །ཤ་ཆང་ར་ཡི་ཚིལ་བུ་དང་། །།སྦ་སྨྱུག་ལ་སོགས་རྩི་ཤིང་དང་། །གསུར་གྱི་དུད་པ་སྤྲིན་ལྟར་གཏིབས། །མཆོད་དོ་དམ་ཅན་གསུར་གྱིས་མཆོད། །དགེ་བསྙེན་ཆེན་པོ་གསུར་གྱིས་མཆོད། །ཨ་ཇོ་ཆེན་པོ་གསུར་གྱིས་མཆོད། །དམ་ཅན་ཆེན་པོ་གསུར་གྱིས་མཆོད། །སྐྱེས་བུ་ཆེན་པོ་གསུར་གྱིས་མཆོད། །དགྲ་བླ་ཆེན་པོ་གསུར་གྱིས་མཆོད། །ནོར་ལྷ་ཆེན་པོ་གསུར་གྱིས་མཆོད། །དཀོར་སྲུང་ཆེན་པོ་གསུར་གྱིས་མཆོད། །ཚོང་དཔོན་ཆེན་པོ་གསུར་གྱིས་མཆོད། །མགྲོན་དཔོན་ཆེན་པོ་གསུར་གྱིས་མཆོད། །དམག་དཔོན་ཆེན་པོ་གསུར་གྱིས་མཆོད། །སྐྱེས་བུ་འཁོར་བཅས་གསུར་གྱིས་མཆོད། །བརྟན་མ་བཅུ་གཉིས་གསུར་གྱིས་མཆོད། །དགེ་བསྙེན་སུམ་བརྒྱ་དྲུག་ཅུ་དང་། །ཡུལ་ལྷ་གཞི་བདག་གསུར་གྱིས་མཆོད། །དམ་ལ་གནས་པའི་དམ་ཅན་མཆོད། །སྡོང་གྲོགས་བྱེད་པའི་ལྷ་མགོན་མཆོད། །ཆོས་ལ་དབང་བའི་ཆོས་སྐྱོང་མཆོད། །གསུར་ལ་དབང་བ་ཐམས་ཅད་མཆོད། །ཁྱོད་ལ་ཕྲིན་ལས་བཅོལ་བ་
དག་ཅག་ཡོན་མཆོད་ཐམས་ཅད་ཀྱང་། །ཕྱོགས་བཞི་མཚམས་བརྒྱད་གར་འགྲོ་ཡང་། །སྡུན་ནས་སུས་ལ་རྒྱབ་ནས་སྐྱོལ། །བྱེས་སུ་འགྲོ་ན་བྱེས་དཔོན་གྱིས། །མགྲོན་ལ་འགྲོ་ལ་མགྲོན་དཔོན་གྱིས། །ཚོང་ལ་འགྲོ་ན་ཚོང་དཔོན་གྱིས། །དམག་ལ་འགྲོ་ན་དམག་དཔོན་གྱིས། །ཇག་ལ་འགྲོ་ན་ཇག་དཔོན་གྱིས། །ཡུལ་དུ་འདུག་ན་ཡུལ་དཔོན་གྱིས། །བདག་གི་བསམ་པ་འགྲུབ་པར་མཛོད། །བདག་ཉིད་གནས་པའི་ས་ཕྱོགས་དེར། །ལོངས་སྤྱོད་འཕེལ་ཞིང་བདེ་བ་དང་། །རྟག་ཏུ་ལོ་ལེགས་བསོད་ནམས་སྤེལ། །རྐང་འགྲོ་ཕྱུགས་དང་ནོར་འཕེལ་དང་། །ཟ་ཁ་འཐུང་ཁ་ནོར་ཁ་ཕྱེས། །བདུད་རྩི་ཆང་དང་ཟས་ལ་སོགས། །རྒྱུན་མི་འཆད་པར་བདག་ལ་སྩོལ། །ནོར་དང་རིགས་རྒྱུད་འཕེལ་བ་དང་། །མི་དང་རྟ་རྣམས་དཔའ་ལ་མགྱོགས། །མཐུ་དང་རྫུ་འཕྲུལ་ཆེ་བར་མཛོད། །སྐྱེས་མཆོག་དགྲ་བླ་ཁྱེད་རྣམས་ཀྱིས། །བདག་གིས་བསམ་ཤིང་སྨོན་པ་རྣམས། །བསམ་པ་བཞིན་དུའགྲུབ་པར་མཛོད། །མི་དང་ཕྱུགས་ལ་ནད་མེད་མཛོད། །ཟ་འདྲེ་ཕུང་འདྲེ་མེད་པར་མཛོད། །དུས་མིན་འཆི་བ་ལ་སོགས་པ། །བཟློག་
ཅིག་བསྒྱུར་ཅིག་ས་མཱ་ཡ། །མིང་ཡང་མེད་པར་རྡུལ་དུ་རློགས། །ཁྱེད་ཀྱི་དམ་ཚིག་གཉན་པོ་སྟེ། །དམ་ལ་མ་འདའ་དམ་ཚིག་ཅན། །བཅོལ་བའི་ཕྲིན་ལས་འགྲུབ་པར་མཛོད་། །དམ་རྫས་གཏོར་བསྔོས་ནི། ཡཾ་རཾ་ཁཾ་དང་ཨ་རྣམས་ལས། །རླུང་མེ་ཐོད་སྐྱེད་ཀ་པཱ་ལ། །ཤ་ལྔ་བདུད་རྩི་ལྔ་ཡིས་གང་། །ཨོཾ་ཨཱཿཧཱུྃ་ཧ་ཧོ་ཧཱུྃསྭཱ་ཧཱ། ཧཱུྃ། དམ་ཅན་སྐྱེས་བུ་ཆེན་པོ་འཁོར་བཅས་ལ། །ཤ་ཁྲག་དམར་གྱི་གཏོར་མ་ཆེན་པོ་དང་། །ར་ཡི་རྣམ་ལྔ་ཚིལ་གྱི་དུད་པ་འདི། །དམ་ཅན་སྐྱེས་བུ་འཁོར་དང་བཅས་ལ་འབུལ། །ཨོཾ་བཛྲ་སཱ་དྷུ་ས་མ་ཡ་ཝཀ་ཏྭཾ་ཏྲཾ་ཤྲཱི་ནི་ཀྲ་མ་ནི་ས་མ་ཡ་སཱ་དྷུ་ཏྲི་ཛཿ ཛཿཧཱུྃ་བཾ་ཧོ༔ ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། དམ་རྫས་བདུད་རྩིའི་གཏོར་མ་རྒྱ་ཆེན་པོ་འདི་འབུལ་ལོ་ཡོངས་སུ་བཞེས་ལ། སངས་རྒྱས་ཀྱི་བསྟན་པ་སྲུང་བ་དང་། བདག་ཅག་དཔོན་སློབ་འཁོར་དང་བཅས་པ་རྣམས་ཀྱི་རྐྱེན་ཕྱི་ནང་གི་བར་དུ་གཅོད་པ་ཐམས་ཅད་ཞི་བ་དང་ཕྲིན་ལས་རྣམ་པ་བཞི་ཐོགས་པ་མེད་པར་འགྲུབ་པའི་ཕྲིན་ལས་མཛོད། འདོད་པའི་དོན་གསོལ་གང་དགོས་བྱ། ཧཱུྃ། དམ་ཅན་མགར་བའི་མཚན་ཅན་ནག་པོ་ཁྱོད། །ཞལ་གཅིག་ཕྱག་གཉིས་དབུ་སྐྲ་དམར་སེར་
འཁྱིལ། །གཡས་ཀྱི་ཕྱག་ན་ཁྲོ་ཆུའི་ཐོ་བ་ཐོགས། །གཡོན་གྱི་ཕྱག་ན་མགར་གྱི་སྤུད་པ་བསྣམས། །ར་ལ་ཆིབས་ཤིང་སྐུ་ལ་བེར་ནག་གསོལ། །སྤྱན་རྩ་དམར་ཞིང་ལྗགས་དམར་གློག་ལྟར་འཁྱུགས། །དམ་ཉམས་དགྲ་བོ་གྱུར་མིད་བགྱིད་མཛད་ཅིང་། །ཞལ་ནས་རྐན་སྒྲ་དྲག་པོ་བརྡབ་པ་ཡིས། །ལོག་པར་ལྟ་བའི་བགེགས་རྣམས་འདར་དུ་འཇུག །སྲིད་གསུམ་གདུག་པའི་ཚོགས་རྣམས་མ་ལུས་ཀུན། །ཟིལ་གྱིས་གནོན་ཅིང་དབང་དུ་སྡུད་མཛད་པ། །དམ་ཅན་མགར་བའི་ཚོགས་ལ་ཕྱག་འཚལ་བསྟོད། ༈ སླར་གཏོར་མ་གསོ་བའམ། མཆོད་པ་དང་གསུར་བྱ། ཨ་ལས་པད་སྣོད་ཡངས་པའི་ནང་། །མཆོད་སྒྲུབ་བསང་དང་རྟེན་པའི་རྫས། །ཀུན་བཟང་མཆོད་སྤྲིན་ལྟ་བུར་གྱུར་། །བཛྲ་སྤ་ར་ཎ་ཁཾ། དམ་རྫས་བརྒྱན་པའི་གཏོར་མ་རྒྱ་ཆེན་པོ་འདི། དམ་ཅན་སྐྱེས་བུ་ཆེན་པོ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །རྡོ་རྗེ་ལེགས་པ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །ཨ་ཇོ་ཆེན་པོ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །དམག་དཔོན་ཆེན་པོ་ལ་གསོལ་ལོ། །
མཆོད་དོ། །འདྲེན་ནོ། །སྦྱིན་ནོ། །ཇག་དཔོན་ཆེན་པོ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །ཚོང་དཔོན་ཆེན་པོ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །དགྲ་བླ་ཆེན་པོ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །སེར་སྐྱ་ནག་པོ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །དུག་མདའ་ནག་པོ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །སྒྲོལ་གིང་ཆེན་པོ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །ཞང་བློན་ཆེན་པོ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །སྐྱེ་བོ་ཡོངས་ཀྱི་དགྲ་བླ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །བན་བོན་ཡོངས་ཀྱི་སྲུང་མ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །རིག་པ་ཅན་གྱི་རྒྱལ་པོ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །གནམ་རལ་ཕྱེད་ཀྱི་བདག་པོ་ལ་༈ གསོལ་ལོ། །མཆོད་དོ། །འདྲེན་ནོ། །སྦྱིན་ནོ། ། གཙང ་ཆུ་ཕྱེད་ཀྱི་བདག་པོ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །མི་མགོ་ནག་གི་རྗེ་བོ་ལ་གསོལ་
ལོ། །མཆོད་དོ། །འདྲེན་ནོ། །སྦྱིན་ནོ། །མཆེད་ཟླ་སུམ་བརྒྱ་དྲུག་ཅུ་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །དགྱེས་སྡེ་བརྟན་མ་བཅུ་གཉིས་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །ཕོ་ཉ་ལས་མཁན་ཐམས་ཅད་ལ་གསོལ་ལོ། །མཆོད་དོ། །འདྲེན་ནོ། །སྦྱིན་ནོ། །གསོལ་ཞིང་མཆོད་པ་ལ་བརྟེན་ནས། །སངོས་རྒྱས་ཀྱི་བསྟན་པ་སྲུང་། དཀོན་མཆོག་གི་དབུ་འཕང་བསྟོད། ཁྱད་པར་དུ་བདག་གི་མི་ནོར་འཁོར་དང་བཅས་པའི་ནད་གདོན་བར་དུ་གཅོད་པ་ཐམས་ཅད་ཞི་བ་དང་། ཚེ་དང་བསོད་ནམས་དཔལ་འབྱོར་ཐམས་ཅད་རྒྱས་པ་དང་། རྒྱལ་བློན་འབངས་འཁོར་དབང་དུ་འདུ་བ་དང་། གནོད་ཅིང་འཚེ་བར་བྱེད་པའི་དགྲ་བགེགས་ཐམས་ཅད་ཐལ་བ་རྡུལ་དུ་བརླག་པའི་ཕྲིན་ལས་མཛོད་ཅིག །ཡང་གཏོར་མ་གསོས་ལ། ཨ་ལས་པད་སྣོད་ཡངས་པའི་ནང་། །མཆོད་སྒྲུབ་བསྐང་དང་རྟེན་པའི་རྫས། །ལྷོ་ཀུན་བཟང་མཆོད་སྤྲིན་ལྟ་བུར་གྱུར། །ཨོཾ་བཛྲ་སྤ་ར་ཎ་ཁཾ། ཧཱུྃ། ཡང་ཅིག་ཐུགས་དམ་བསྐང་བ་ནི། །སྐྱེས་མཆོག་བཛྲ་ཐིག་ལེ་རྩལ། །དགྱེས་སྡེ་བརྟན་མ་བཅུ་གཉིས་
དང་། །མཆེད་ཟླ་སུམ་བརྒྱ་དྲུག་ཅུ་ཚོགས། །ཁྱེད་ཀྱི་ཐུགས་དམ་གཉན་པོ་བསྐང་། །ཐུགས་དམ་བསྐང་བའི་དམ་རྫས་ནི། །དམ་རྫས་མཆོད་པའི་གཏོར་མ་དང་། །རཀྟ་དམར་གྱི་ཨརྒྷཾ་དང་། །བདུད་རྩི་སྨན་གྱི་མཆོད་པ་དང་། །རིན་ཆེན་འབྲུ་སྣ་སྙིང་པོ་ལྔ། །དར་ཚོན་སྣ་ལྔའི་མཆོད་པ་དང་། །དམ་རྫས་ཚོགས་ཀྱིས་ཐུགས་དམ་བསྐང་། །ཐུགས་དམ་བསྐང་བའི་བྱིན་རླབས་ཀྱིས། །ཕྱི་ནང་བར་ཆད་བཟློག་ཏུ་གསོལ། །དེ་ནས་ཐལ་མོ་སྦྱར་ལ། ཧཱུྃ། དམ་ཅན་ཁྱོད་ཀྱི་ཐུགས་དང་ཅི་འགལ་བ། །མ་རིག་དབང་གིས་ཉེས་པོ་བྱུང་བ་རྣམས། །རབ་ཏུ་འགྱོད་པའི་སེམས་ཀྱིས་མཐོལ་ལོ་བཤགས། །སྐྱེས་བུ་ཁྱོད་ལ་ཕྲག་དོག་མ་མཆིས་ཀྱང་། །ཁྱོད་ཀྱི་འཁོར་དུ་གཏོགས་པའི་འཇིག་རྟེན་པ། །གདུག་པའི་ཚོགས་རྣམས་དེ་དག་ཐམས་ཅད་ལ། །ཐུགས་དང་འགལ་བར་གྱུར་པ་ཅི་མཆིས་པ། །རབ་ཏུ་འགྱོད་པའི་སེམས་ཀྱིས་མཐོལ་ལོ་བཤགས། །བདག་གིས་རབ་ཏུ་བཤགས་པའི་བསོད་ནམས་ཀྱིས། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱི། །མི་མཐུན་ཕྱོགས་རྣམས་མ་ལུས་ཞི་བ་དང་། །བསམ་པ་འགྲུབ་པའི་དངོས་གྲུབ་
བསྩལ་དུ་གསོལ། །ལན་གསུམ་བརྗོད། དེ་ནས་དགྲ་ལ་རྦད་ན་ནི། ཧཱུྃ། དྲེགས་པ་ལྔ་ཕུང་རྫུ་འཕྲུལ་ཅན། །མྱུར་དུ་རྒྱུག་པའི་མཐུ་བོ་ཆེ། །ལས་ལ་སྔགས་པ་དྲག་རྩལ་ཅན། །ཁྱོད་ཀྱི་ཐུགས་དམ་དུས་ལ་བབ། །མུན་པ་ལྷུན་ཆགས་སྐུ་ལ་བརྒྱན། །སྐུ་ལ་ར་བརྒྱའི་ཐུལ་པ་གསོལ། །སྲིད་གསུམ་འདུལ་བའི་མཐུ་བོ་ཆེ། །དགྲ་སྙིང་ཕྱུང་སྟེ་ཁྱེར་ལ་ཤོག །དགེ་བསྙེན་ཆེན་པོ་མཐུ་རྩལ་ཅན། །དོ་ནུབ་དམ་ཉམས་དགྲ་བོ་ཡི། །ཁ་ནས་ཁྲག་ཏུ་སྐྱུགས་སུ་ཆུག །འོ་དོད་གནམ་དུ་འབོད་དུ་ཆུག །ལག་གཉིས་བྲང་ལ་རྡུང་དུ་ཆུག །ཁྱེད་ཀྱི་ཐུགས་དམ་དུས་ལ་བབ། །ན་གེ་བུན་གྱི་བུན་ཧཱུཾ་ཤད་ཤད་ཀྱི་ཏ་རྦད། ཏྲི་ལིང་ས་མ་ཡ༔ གཏོར་མ་དམིགས་བྱའི་ཕྱོགས་སུ་ཕུ་ལ། རྟེན་གཏོར་ཡོད་ན་གཤེགས་གསོལ་མི་བྱེད། མེད་ན། བཛྲ་སཱ་དྷ་མུཿ ཞེས་བརྗོད་པར་བྱའོ། །དེ་ནས་རྫོགས་རིམ་བསྒོམ་ཞིང་། དགེ་རྩ་བསྔོ་བ་བཀྲ་ཤིས་བྱ། སྣོད་བཅུད་རང་ཐིམ་དེ་ཡང་ཧཱུྃ་ལ་ཐིམ། །ཧཱུྃ་ཡང་མས་རིམ་ནས་བསྡུས་སྟོང་པའི་ངང་། །དྲན་རིག་སྣ་ཚོགས་འཕྲོ་ཞིང་ངོ་བོ་སྟོང་། །ཡེངས་སུ་མེད་ཅིང་བསྒོམ་དུ་མེད་པ་རུ། །འདུག་རུང་འཕྲོ་རུང་གསལ་རུང་མི་གསལ་རུང་། །ཅིར་སྣང་དེ་
ཀའི་སྟེང་དུ་ཀློད་ལ་ཞོག །དགེ་བས་འགྲོ་ཀུན་རྡོ་རྗེ་འཆང་འགྲུབ་ཤོག །ནམ་མཁའ་རྒྱལ་མཚན་ཆོས་ཀྱི་རྒྱལ་མཚན་སོགས། །བརྒྱུད་པའི་བླ་མ་རྣམས་ཀྱི་བཀྲ་ཤིས་ཤོག །གསང་བདག་བྱ་རོག་མཚན་དང་རྡོར་ལེགས་སོགས། །ཡི་དམ་ཆོས་སྐྱོང་རྣམས་ཀྱི་བཀྲ་ཤིས་ཤོག །མངྒ་ལཾ། འབྱུང་པོ་འདུལ་བྱེད་ཀྱི་ཕན་ཡོན་ནི། །འབྱུང་པོ་འདུལ་བྱེད་ཀྱི་རྒྱུད་ལས། །ཡི་གེ་བཞི་པ་ཆེར་གསང་བ། །དངོས་གྲུབ་ཐམས་ཅད་སྦྱིན་བྱེད་པ། །བཀླག་པ་ཙམ་གྱིས་འགྲུབ་པའོ། །འདི་ལ་ཐེ་ཚོམ་མི་ཟའོ། །དཀྱིལ་འཁོར་མཐོང་བ་ཙམ་གྱིས་ཁམས་གསུམ་རྒྱལ་སྲིད་འཐོབ་ཅིང་། འདིའི་སྙིང་པོ་བཟླས་པ་ཙམ་གྱིས་རྡོ་རྗེ་འཆང་དང་མཚུངས་པར་འགྱུར། གལ་ཏེ་མ་འགྲུབ་ན་ཡང་གླིང་བཞི་འཁོར་ལོས་སྒྱུར་བའི་རྒྱལ་པོར་འགྱུར་རོ། །དཔལ་ལྡན་རྡོ་རྗེ་འཆང་ཁྲོ་བོའི་བདག་པོ་བཟླས་པ་ཙམ་གྱིས་འབྱུང་པོ་ཐམས་ཅད་བྲན་དུ་འགྱུར་རོ། །གལ་ཏེ་སྔགས་ཁྲོས་ནས་འཁྲོས་པ་ཙམ་གྱིས་འཇིགས་པའི་ལྷ་ཐམས་ཅད་དུམ་བུར་བསྒྱུར་ཞིང་འཇིགས་པར་འགྱུར་རོ། །ཞེས་གསུངས། སྐྱེས་བུ་རྡོ་རྗེ་ལེགས་པ་མཆོད་པའི་ཕན་ཡོན་ནི། དགྲ་བླ་སྟག་སྤྱང་ཁ་སྤྲོད་ཀྱི་རྒྱུད་ལས། ལྷས་སྲུང་དགྲ་རྣམས་ངེས་པར་འཆི། །ཞེས་དང་། ༈ མགར་དམར་གཞུང་ལས། འདིའི་ཕ་དམུ་ཡིན་པས་ནོར་ཕྱུགས། མ་བདུད་ཡིན་པས་དབང་ཆེ། ཁོ་རང་བཙན་ཡིན་པས་དྲག་རྩལ་ཆེ། བཀའ་ཉན་མ་སངས་ཡིན་པས་ཕྲིན་ལས་མྱུར། གྲོགས་
བརྟན་མ་ཡིན་པས་སྙིང་ཉེ། དམ་ཚིག་ལ་གནས་པས་ཆོས་བྱེད་སྐྱོང་། གསོལ་མཆོད་ལ་རེམ་ན་ཅི་བསམ་འགྲུབ། ཅེས་དང་། མགར་ནག་དྲག་པོ་སྲོག་གི་སྤུ་གྲིའི་གཞུང་ལས། བཀྲ་ཤིས་དམ་ གཙང ་ལས་མྱུར་སྙིང་ཉེ་བ་རྒྱལ་བའི་དེད་དཔོན་བཛྲ་སཱ་དྷུ་ཏྲི། ཞེས་གསུངས། ཡང་གཞན་ཡང་དམ་ཅན་སོགས་ཀྱི་སྦྱོང་རྒྱུད་ལས་གསུངས་པའི་བྱང་ཆུབ་སེམས་དཔའ་རྡོ་རྗེ་ལེགས་པའི་སྤྲུལ་པ་ཡིན་ཅིང་རྒྱུད་གཅིག་པས་ངན་སོང་ལས་སྐྱོབས་ནུས། ཁྲོ་རྒྱལ་རྟ་མགྲིན་སྤྲུལ་པ་ཡིན་པས་དཔུང་ཚན་ཆེ། ཞེས་བླ་མ་གོང་མ་རྣམས་ཀྱིས་གསུངས་སོ། ༈ རྫོགས་རིམ་བསྒོམ་པའི་ཕན་ཡོན་ནི། དར་བ་འཇུག་པའི་མདོ་ལས། ཁམས་གསུམ་སེམས་ཅན་ཐམས་ཅད་ཇི་སྲིད་འཚོའི་བར་དུ། འཚོ་བའི་ཡོ་བྱད་ཀྱིས་ཚོགས་བསགས་པས། རྣལ་འབྱོར་པ་སྟོང་ཉིད་ཐུན་གཅིག་བསྒོམ་པ་གལ་ཆེའོ། །ཞེས་དང་། གཙུག་ཏོར་ཆེན་མོའི་མདོ་ལས། བསྐལ་པ་མང་པོའི་བར་དུ་ཐོས་བསམ་བྱས་པ་བས། ཉིན་གཅིག་ཆོས་ཀྱི་དོན་བསྒོམས་པ་བསོད་ནམས་ཆེའོ། །ཨྠྀི། ཞེས་པ་ཨ་རཱ་གས་སྦྱར་བ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།