ཕྲིན་ལས་ཆོས་འཕེལ་ལ་གདམས་པ།

བླ་མ་ལ་ཕྱག་འཚལ་ལོ། །བྱིན་རླབས་ཟླ་ཤེལ་འཛུམ་པའི་བསིལ་ཟེར་གྱིས། །བློ་གྲོས་ཀུནྡའི་ཚལ་རབ་རྒྱས་བྱེད་པ། །ངག་གི་དབང་ཕྱུག་ལྷག་པའི་ལྷ་མཆོག་དང་། །དབྱེར་མེད་དྲིན་ཆེན་བླ་མས་བདག་སྐྱོངས་ཤིག །ལྷག་བསམ་ཆུ་ཡི་རླན་གྱིས་སྐྱེད་བསྲིངས་ཤིང་། །བླ་མའི་ཞལ་ལུང་ཉི་ཟེར་གྱིས་བྲན་པའི། །ཡིད་འོང་གདམས་པའི་མེ་ཏོག་ཕྲེང་མཛེས་འདི། །བུ་མཆོག་ཁྱོད་ཀྱི་རྣ་བའི་རྒྱན་དུ་ལོངས། །དལ་འབྱོར་རྟེན་ཐོབ་མཚན་ལྡན་བླ་མ་མཇལ། །སྐྱེས་སྦྱང་བློ་གྲོས་མཚུངས་པ་མ་མཆིས་པ། །གྲོགས་ཁྱོད་སྐལ་པ་ཤིན་ཏུ་བཟང་ལགས་པས། །ད་ནི་སྙིང་པོའི་བཙན་ས་འཛིན་རེ་རན། །སྤྱིར་ནི་འདུས་བྱས་ཆོས་ལ་ཡིད་བརྟན་མེད། །ཁྱད་པར་སྙིགས་མའི་གནས་གྲོགས་ལོངས་སྤྱོད་ལ། །ཅི་ལྟར་བསམས་ཀྱང་སྙིང་པོ་མི་འདུག་པས། །ཞེན་པ་སྤོང་བར་མཛོད་ཅིག་སྙིང་གི་བུ། །ལྷག་བསམ་བྱང་ཆུབ་སེམས་ཀྱིས་མ་ཟིན་པའི། །བདག་དང་བདག་འདྲའི་བླ་གཟུགས་ཕལ་མོ་ཆེས། །ལྟར་སྣང་གཞན་དོན་སྒྲུབ་པའི་རྣམ་གཡེང་འདིས། །རང་གཞན་ཕུང་ལ་སྦྱར་བ་གཟིགས་ལགས་སམ། །ནམ་ཞིག་འཆི་བ་ཅིས་ཀྱང་འབྱུང་མོད་ཀྱང་། །རེ་ཞིག་མི་སྐྱོན་སྙམ་པའི་ངང་རིང་འདིས། །བདག་གི་འདི་ཕྱིའི་འདོད་དོན་ཀུན་གཏོར་བས། །རྒྱུན་དུ་བློ་སྣ་བསྟུང་བར་མཛོད་ཅིག་བུ། །སྣ་ཚོགས་རྐྱེན་མང་གཞན་དབང་རྟེན་འབྲེལ་གྱིས། །བསམ་དོན་ཐོག་ཏུ་ཁེལ་བ་དཀའ་བས་ན། །ལྷ་དང་བླ་མར་ཡིད་ཆེས་བློ་གཏད་ཀྱིས། །གང་བྱུང་ལམ་དུ་འཁྱེར་བ་གནང་དུ་ཆེ། །འཛིན་སྟངས་ཡུལ་གྱི་སྟེང་དུ་ཤོར་བ་ན། །ཀུན་ལ་དག་པའི་སྣང་བ་མི་སྐྱེ་བས། །སྒྲོ་སྐུར་རྟོག་པའི་རང་མཚང་རིག་ནས་ནི། །ཀུན་ལ་དག་པའི་སྣང་བས་ཁྱབ་པར་མཛོད། །ཐོས་བསམ་བཤད་སྒྲུབ་གང་ལ་ཞུགས་ན་ཡང་། །ཆོས་བརྒྱད་བློ་ངན་གདོན་གྱིས་མ་བསླད་པར། །འཕྲལ་དང་ཕུག་གི་ཁེ་ཉེན་མཐོང་ནས་ནི། །བརྟགས་ཤིང་དཔྱད་ནས་འཇུག་པ་མཁས་པའི་ལུགས། །སྒྲུབ་ལ་བརྩོན་པའི་གནས་སྐབས་ཐམས་ཅད་དུ། །རེ་དོགས་རྟོག་པའི་དབང་དུ་མི་འཆོར་བར། །མོས་གུས་བླ་མའི་རྣལ་འབྱོར་འདི་ཉིད་ཀྱིས། །གེགས་སེལ་བོགས་འདོན་མཐའ་དག་འགྲུབ་པར་གསུངས། །དགུང་ཉི་ཙམ་གྱི་ཚེ་མཇུག་འདི་ཉིད་ལ། །བློ་སྣ་མང་ན་ཐམས་ཅད་འགྲུབ་དཀའ་བས། །ཡི་དམ་གཅིག་ལ་ཁྱེད་ཤེས་བློ་གཏད་ཀྱིས། །ཉམས་ལེན་སྙིང་པོར་དྲིལ་བ་གནད་དུ་ཤེས། །སྔགས་ཀྱི་ཁྱད་ཆོས་དབང་གི་ཡེ་ཤེས་མཆོག །རྣལ་འབྱོར་ཐུན་བཞིས་ཉམས་སུ་ལེན་པའི་ཚུལ། །བརྒྱུད་པ་མཆོག་འདིའི་བཀའ་སྲོལ་ལས་འོང་བའི། །ཐུགས་དམ་འདི་ལ་གཅིག་ཏུ་གུས་པར་མཛོད། །རྒྱུད་ཀྱི་མདོར་བསྟན་གླེང་གཞིའི་རྣམ་དག་གིས། །གདུལ་བྱའི་ལམ་རིམ་སྟོན་པར་གསུངས་པ་ལྟར། །རྒྱས་གདབ་ལྔ་ཡིས་ཡོངས་སུ་བསྡུས་པའི་དོན། །བསྲེ་བ་གསུམ་གྱིས་ཉམས་སུ་ལེན་པའི་ཚུལ། །དག་པ་གཉིས་ལྡན་འབྲས་བུའི་ཡོན་ཏན་རྣམས། །གཞི་དང་མཚུངས་པའི་རྣམ་པ་ལམ་བྱེད་ཀྱིས། །འཁོར་འདས་བསྲེས་ནས་ལམ་བྱེད་བཞི་ལྡན་དུ། །བསྒོམས་ནས་ཐ་མལ་ཞེན་པ་་སྤོང་ལ་བརྩོན། །ཕུང་པོ་དུག་ལྔ་རྟེན་དང་བཅས་པ་ལ། །སྐུ་དང་ཡེ་ཤེས་འདུ་འབྲལ་མེད་པའི་ཚུལ། །དག་སྣང་ཡེ་ཤེས་ཆེན་པོས་རྒྱས་འདེབས་པ། །གྱ་ནོམ་ལྷར་ཞེན་འཇིག་པའི་གདམས་ངག་ཡིན། །མན་ངག་གནད་ཀྱིས་ཟིན་པའི་ཏིང་འཛིན་གྱིས། །ཕྱི་ནང་བདུད་དང་སྒྲིབ་གསུམ་མུན་པའི་ཚོགས། །སྐད་ཅིག་ཉིད་ལ་དབྱིངས་སུ་གཅོད་པ་ཡི། །ཟབ་ཆོས་འདི་འདྲ་གཞན་གྱི་ལུགས་ན་མེད། །སྐྱེ་གནས་བཞི་དང་རྩ་རླུང་ཐིག་ལེ་སོགས། །ཡེ་ཤེས་གཅིག་གི་ངོ་བོར་ངོ་སྤྲད་ནས། །སྟོང་བཞིའི་འོད་གསལ་ཟུང་འཇུག་དང་བཅས་པ། །མངོན་བྱང་ལྔ་ཡིས་ཉམས་སུ་ལེན་པ་ཡིན། །ཆོས་ཀུན་བདེན་མེད་སྒྱུ་མར་ཤེས་པའི་བློས། །དུས་གསུམ་དུས་མེད་རྟོགས་ནས་གཉིས་ཆོས་ཀུན། །གཉིས་མེད་བདེ་བ་ཆེན་པོར་རོ་སྙོམས་པ། །ལམ་བཟང་འདི་ཡི་གནད་དོན་མཆོག་གཅིག་ལགས། །འཁྲུལ་སྣང་ལས་ཉོན་ཚོགས་སུ་བསྒྱུར་བ་སོགས་། །མིག་འཕྲུལ་ལྟ་བུའི་ཏིང་འཛིན་ལ་གནས་ནས། །འཇའ་ལུས་རྒྱུ་མའི་སྐུ་མཆོག་བསྒྲུབ་པ་དང་། །སྐྱེ་མེད་ཆོས་སྐུའི་བཙན་ས་ཟིན་པར་མཛོད། །རེ་དོགས་ནང་གི་བདུད་ཆེན་གཡོས་པ་ལས། །རང་སྣང་ཕྱི་རུ་བཟུང་བའི་གདོན་བགེགས་རྣམས། །རང་སེམས་ཉིད་ལས་གཞན་དུ་མ་གྲུབ་པའི། །མ་བཅོས་གཉུག་མའི་ངང་དུ་གློད་ན་བདེ། །དུག་གསུམ་ཡན་པར་ཤོར་བའི་དྲེགས་པའི་ཚོགས། །རང་སེམས་རིག་པའི་རྩལ་ལས་མ་འདས་པས། །རིག་སྟོང་ཆོས་སྐུའི་རང་ཞལ་མཇལ་བ་ན། །དག་པ་རབ་འབྱམས་འབད་ནས་ཚོལ་མི་དགོས། །གཞི་སྣང་རྒྱུད་གསུམ་དྲེགས་པའི་ཚོགས་རྣམས་ཀུན། །ཟབ་ལམ་བསྲེ་བ་གསུམ་གྱི་མན་ངག་གིས། །སྐུ་གསུམ་འབྲས་བུའི་ངོ་བོ་ཁྱེར་ཤེས་པ། །དུས་གསུམ་རྒྱལ་བའི་དགོངས་པ་མཐར་ཐུག་ཡིན། །སྣ་ཚོགས་ཆོས་རྣམས་སེམས་ལས་བྱུང་བའི་ཕྱིར། །རང་སེམས་ཆོས་ཀྱིས་ཐུལ་བའི་སྐད་ཅིག་ལ། །ཕྱི་ཡི་ཆོས་ཀུན་དབང་དུ་འདུ་བ་ཡི། །ནང་གི་རྟེན་འབྲེལ་གནད་ལ་མཁས་པར་མཛོད། །ང་རྒྱལ་སྤངས་ཏེ་མཆོག་དམན་བར་མའི་འགྲོ། །ཀུན་ལ་མ་གུས་བརྙས་པའི་སེམས་སྤོང་བ། །སྔ་རབས་གཤེགས་པའི་རྒྱལ་བ་སྲས་བཅས་ཀྱིས། །བགྲོད་པའི་ལམ་བཟང་ཡིན་པ་ལོས་ཀྱང་དགོངས། །གཞན་ཕན་སེམས་ལ་གོམས་འདྲེས་བརྟན་པ་ན། །གཞན་དོན་ཕྲིན་ལས་འབད་མེད་འབྱུང་ངོ་ཞེས། །བདག་གི་འདྲེན་མཆོག་དགེ་བའི་བཤེས་རྣམས་ཀྱིས། །བརྩེ་བས་བདག་ལ་ཡང་ཡང་གདམས་པར་མཛད། །ཆོས་ལྡན་སྐྱེས་བུ་ཡུན་རིང་འཚོ་བ་ནི། །ཕུན་ཚོགས་དགེ་ལེགས་རྒྱ་མཚོའི་གཞི་ཡིན་པས། །བླ་མའི་ལུང་དང་བདག་གི་ངག་བཞིན་དུ། །སྐུ་ཚེ་བསྲིང་བའི་ཐབས་ལ་འབད་པར་མཛོད། །མ་དག་ལྷག་བསམ་ལྡན་པའི་སྐྱེས་བུ་ལ། །ནག་ཕྱོགས་འབྱུང་པོས་འཚེ་བ་ཆོས་ཉིད་ཡིན། །དེ་སླད་ཐབས་མཁས་རྟེན་འབྲེལ་སྣ་ཚོགས་ཀྱིས། །འཁྲུལ་སྣང་བདུད་སྡེ་ཆོས་ཀྱི་དབྱིངས་སུ་སྐྱོལ། །བར་ཆད་ལོག་སྒྲུབ་ཅི་འདྲ་བྱུང་ན་ཡང་། །ཐམས་ཅད་གཉེན་པོས་གཞོན་གྱིས་མི་ལང་གི། རྐྱེན་ངན་ལམ་ཁྱེར་གནད་ལ་གོམས་གྱུར་ན། །ནམ་ཡང་བསླུ་བ་མེད་པའི་གྲོགས་པོ་ཡིན། །འདུས་བྱས་ཆོས་རྣམས་སྐད་ཅིག་སྐད་ཅིག་སྟེ། །ཆེད་འཛིན་བྱ་རིན་ཆོག་པ་མི་འོང་བས། །གང་ལའང་སྙིང་པོ་མེད་པའི་ཚུལ་ཤེས་ན། །འགྱོད་པའི་ཟུག་རྔུ་ལྡང་བ་མི་སྲིད་དོ། །མདོར་ན་འཇམ་མགོན་བླ་མ་ཆོས་ཀྱི་རྗེ། །རྡོ་རྗེ་འཆང་དངོས་རྫོགས་པའི་སངས་རྒྱས་དེས། །བདག་ཅག་རྗེས་འཇུག་བུ་ལ་གནང་བ་ཡི། །ཟབ་གསང་དམ་པའི་ཆོས་ཀྱི་བདུད་རྩི་རྣམས། །དད་བརྩོན་བློ་ཡི་སྙིམ་པས་ལེགས་གསོལ་ནས། །རྣམ་གཡེང་ཕྱིར་བཤོལ་དབང་དུ་མི་གཏོང་བར། །ཆོས་དང་རང་སེམས་ནང་ནས་འདྲེས་པ་དང་། །ཉམས་རྟོགས་ཡོན་ཏན་ལུས་སྟོབས་བསྐྱེད་པར་མཛོད། །གྲོགས་ཁྱོད་འཇམ་མགོན་ཆོས་ཀྱི་རྒྱལ་པོ་ཡི། །ཐུགས་བརྩེས་རྗེས་སུ་བཟུང་བའི་སྲས་ཡིན་པས། །བླ་མའི་རྣམ་ཐར་ཡིད་ལ་བཅངས་ནས་ནི། །སྒྲུབ་པའི་དམ་བཅའ་ཟུངས་ཤིག་སྙིང་གི་བུ། །ཁྱོད་ཀྱི་སྐུ་ཚེ་ཡུལ་དུ་བརྟན་པ་དང་། །ཐུགས་ཀྱི་བཞེད་དོན་ལྷུང་གྱིས་གྲུབ་ནས་ནི། །རྣམ་དཀར་ཕྲིན་ལས་འགྲོ་ལ་ཕན་འདོགས་པའི། །སྨོན་འདུན་སྤྲང་པོ་ངས་ཀྱང་ཡང་ཡང་ཞུ། །ལྷ་དང་བླ་མའི་བྱིན་རླབས་སྙིང་ལ་ཞུགས། །ལུང་དང་རྟོགས་པའི་ཆོས་ལ་དབང་འབྱོར་ནས། །རང་དང་གཞན་གྱི་དོན་གཉིས་མཐར་ཕྱིན་ཏེ། །བསྟན་འགྲོའི་དཔལ་མགོན་མཛད་པའི་བཀྲ་ཤིས་ཤོག །ཅེས་པ་འདི་ནི་མཁྱེན་རབ་ཀྱི་དབང་ཕྱུག་སྡེ་སྣོད་འཛིན་པ་ཆེན་པོ་ཕྲིན་ལས་ཆོས་འཕེལ་གྱི་བཞེད་སྐོང་དུ་ཆོས་སྨྲ་བའི་བཙུན་པ་ཀུན་དགའ་རྒྱལ་མཚན་གྱིས་བྲིས་པ་དགེ་ཞིང་བཀྲ་ཤིས་པར་གྱུར་ཅིག །