སློབ་བུ་ཞིག་ལ་གནང་བའི་ལུང་བྱང་།
ཡང་གསང་གསེར་གྱི་ཁ་བྱང་ལས༔ མོན་བུ་བཀྲ་ཤིས་ཁྱེ་འདྲེན་འདི༔ མ་འོངས་ཨ་ཙར་སྤྲུལ་པའི་སྲས༔ མཚོ་རྒྱལ་ཟུང་གི་གཏེར་མིང་སྤྲུལ༔ དེ་ཡི་ཆོས་ཀྱི་བདག་པོ་བ༔ ནོར་གདོལ་སྙིང་པོའི་ལྟེ་འམ་གསང༔ པ་ཎི་གཡོན་ཕྱོགས་སྨེ་ཐིག་སྤྲས༔ ཨོ་རྒྱན་མཁའ་འགྲོའི་ཟབ་ཆོས་དང༔ བཀའ་འདུས་རྩ་གསུམ་སྲུང་མ་དབང༔ མོས་གུས་ཡིད་ཆེས་དང་བླངས་ན༔ བར་ཆད་དབྱིངས་གྲོལ་ཡོན་ཏན་ཐོབ༔ ཕྱི་མའི་སྐྱེ་སྲིད་དཔལ་རིའི་ཞིང༔ བདག་དང་ཚོམ་གཅིག་གྲུབ་པ་བརྙེས༔ བསྙེན་སྒྲུབ་གནད་ལྡན་མི་ནུས་ཤིང༔ ཐེ་ཚོམ་བདུད་ཀྱིས་བསླུས་པ་ན༔ བར་ཆད་མང་ཞིང་ཚེ་ཡང་ཕྲི༔ བཀའ་ཡི་སྲུང་མས་འཁུ་ཡང་སྲིད༔ དེ་ཕྱིར་དགའ་བས་དང་དུ་ལོངས༔ པདྨའི་གཏེར་ལུང་ལས་མངོན་པ༔ ས་ར་ཧི་ཏས་བྲིས་པ་ལགས༔