གཉིས་པ་གཞུང་དོན་དངོས་བསྟན་པ།

གཉིས་པ་གཞུང་དོན་དངོས་བསྟན་པ་ལ་གཉིས།

སྐབས་སྒྲུབ་པ་དང༌།དངོས་ཀྱི་དོན་བསྟན་པའོ། །དང་པོ་ལ་གཉིས་ཏེ། གོ་རིམ་ངེས་པའི་རྒྱུ་མཚན་དང༌། དེ་ལས་འཕྲོས་པ་འདུལ་བ་མདོར་བསྡུས་ཀྱི་སྤྱི་དོན་བསྟན་པའོ། །དང་པོ་ལ་གཉིས་ཏེ། རྩོད་པ་དང༌། ལན་གདབ་པའོ། །དང་པོ་ནི། མཚོ་ཊཱིཀ་ལས། རྒོལ་བ་པོ་ཁ་ཅིག་འདི་སྐད་དུ། མདོ་རྩ་བ་འདི་ཆོས་ཅན། རྩོམ་པའི་གོ་རིམ་ལོག་པ་ཡིན་ཏེ། རྒྱས་བཤད་སྔོན་ལ་བརྩམས་ནས་མདོར་བསྟན་ཕྱིས་བརྩམས་པས་མདོར་བསྟན་རྒྱས་བཤད་ཀྱི་གོ་རིམ་དང་འགལ་བའི་ཕྱིར་དང༌། ཡི་གེ་མང་ཤོས་སྔོན་ལ་བརྩམས་ནས་ཡི་གེ་ཉུང་ཤོས་ཕྱིས་བརྩམས་པས་སྒྲའི་བསྟན་བཅོས་དང་འགལ་བའི་ཕྱིར་རོ། །དེ་ཡང་དངོས་ཀྱི་བཅས་པ་རྣམས་ནི་རྒྱས་བཤད་ལྟ་བུ་སྟེ། ཡི་གེ་མང་ཤོས་ཡིན་ལ། མདོར་བསྡུས་ནི་མདོར་བསྟན་ལྟ་བུ་སྟེ། ཡི་གེ་ཉུང་ཤོས་ཡིན་པར་གཞུང་གིས་གྲུབ་བོ། །ཡི་གེ་ཉུང་ཤོས་ཕྱི་ནས་བརྩམས་པ་འདི་ནི་སྒྲའི་བསྟན་བཅོས་ལས། ཡང་ན་མཆོད་འོས་སྔོན་དུ་སྦྱར། །ཡི་གེ་ཉུང་དང་མཆོད་པར་འོས། །དང་པོར་བསྟན་པའི་འཐད་པ་ཡིན། །ཞེས་བཤད་པ་དེ་དང་ཡི་གེ་ཉུང་ཤོས་མདོར་བསྡུས་ཕྱིས་བརྩམས་པ་འདི་མི་འཐད་དོ་ཞེ་ན།