ཞེ་དགུ་པ་གཟས་པའི་ལྟུང་བྱེད་འཆད་པ།

ཞེ་དགུ་པ་གཟས་པའི་ལྟུང་བྱེད་འཆད་པ་ལ།

རྩ་བར། བརྡེག་པར་གཟས་ནའོ། །རྫས་རེརེ་ལའོ། །ཞེས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུ་འཆར་ཀས་དགེསློང་ལ་བརྡེག་པར་གཟས་པ་ལས་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་རང་རིགསཀྱི་སེམས་བདེ་བ་ལ་གནོད་པའོ། །གསུམ་པ་ངོ་བོ་ནི་བཅས་ལྡན་དགེ་སློང་གི་རྙོག་པ་ཅན་གྱིསེམས་ཀྱིས་དགེ་སློང་གཞན་ལ་བརྡེག་པར་གཟས་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ནི་གང་ལ་གཟས་པའི་ཡུལ་དགེ་སློངཆོས་དྲུག་ལྡན་ནོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལབའོ། །ཀུན་སློང་ནི་རང་དགར་རྙོག་པ་ཅན་གྱི་སེམས་ཀྱིས་བརྡེག་པར་གཟས་པར་འདོད་པ་རྒྱུནམ་ཆད་པའོ། །གསུམ་པ་སྦྱོར་བ་ནི། བརྡེག་པར་གཟས་པར་ཞུགས་པའོ། །བཞི་བ་མཐར་ཐུགནི་གཟས་པ་རྫོགས་པའོ། །

ལྔ་བཅུ་པ་གནས་ངན་ལེན་འཆབ་པའི་ལྟུང་བྱེད་འཆད་པ་ལ།

རྩ་བར། ཕམ་པར་འགྱུར་བ་དང་དགེ་འདུན་གྱི་ལྷག་མ་དག་བཅབས་ནའོ། །ཞེས་སོགས་བྱུང༌། འདིའི་དོནལ་བཞི་ལས། དང་པོ་གླེང་གཞི་ནི་མཉན་ཡོད་དུ་ཉེ་དགས་གནས་ངན་ལེན་བཅབས་པ་ལས་ལྟུངབྱེད་དུ་བཅས་སོ། །གཉིས་པ་དགག་བྱ་ནི་རང་རིགས་ཀྱི་ཚུལ་ཁྲིམས་ལ་གནོད་པའོ། །གསུམ་པ་ངོབོ་ནི་བཅས་ལྡན་དགེ་སློང་གིས་མཐོལ་ཡུལ་མཚན་ཉིད་དང་ལྡན་པ་ཡོད་པའི་གནས་སུ་དགེསློང་གཞན་གྱིས་ཕམ་པའམ་དགེ་འདུན་ལྷག་མ་བཅབས་ཏེ་མཚན་མོ་འདས་པ་ལས་གྱུར་པའིལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ། གང་འཆབཔའི་དངོས་པོ་དང༌། གང་གི་འཆབ་པ་ལྟུང་བའི་བདག་པོ་དང༌། གང་དུ་འཆབ་པའི་གནས་དང༌།

གང་གིས་འཆབ་པའི་རྟེན་དང་བཞི། དང་པོ་ལ་གསུམ་སྟེ། ཕམ་པའམ་ལྷག་མའི་དངོས་གཞི་ཡིན།

དགེ་སློང་གཞན་དེའི་རྒྱུད་དང་འབྲེལ་བར་ཡོད། ངོ་བོ་ཤེས་སམ་ཡིད་གཉིས་ཟ་བ་སྟེ། ཕམ་པརའགྱུར་བ་དང༌། དགེ་འདུན་ལྷག་མ་དག ཅེས་དང༌། ཞུ་འགྲེལ་ལས། ཉེས་བྱས་སུ་གསུངས་པ་ནིགཞན་གྱི་ཡིན་པ་ཉིད་མེད་པའི་ཕྱིར་ཏེ། བདག་ཉིད་ཀྱི་གནས་ངན་ལེན་གྱི་ལྟུང་བ་འཆབ་པ་བཞིནནོ། །ཞེས་གསུངས་པས་ཤེས་སོ། །ངོ་བོ་ཤེས་སམ་ཡིད་གཉིས་ཟ་བ་སྟེ། དུས་དང་དུས་མིན་བསྡུབའི་གཞིའི་རྩ་བ་ལས། འཆབ་པ་ལ་དགེ་འདུན་ལྷག་མ་ཉིད་ལ་ཡིད་གཉིས་ཟ་བ་ནི་ཤེས་པདང་འདྲའོ། །ཞེས་གསུངས་པས་སོ། །གཉིས་པ་གང་གི་འཆབ་པ་ལྟུང་བའི་བདག་པོ་ནི་དགེ་འདུན་ལྷག་མ་འཆབ་པའི་ཆ་ནས་དགེ་སློང་ཆོས་དྲུག་ལྡན་ཡིན་ལ། ཕམ་པ་འཆབ་པ་ལ་ནི་ཡུལདེ་ཕམ་པས་གོས་པ་ཡན་ལག་ཏུ་དགོས་པས། དགེ་སློང་གི་སྡོམ་པ་རྣམ་པར་དག་པ་ཡན་ལགམ་ཡིན་གྱི། དགེ་སློང་གི་སྡོམ་པ་ཙམ་པོ་དང་ལྡན་པའོ། །མཚན་མཐུན་ལྟ་མཐུན་ལ་སོགས་པ་ལྔ་སྔར་དང་འདྲའོ། ། གསུམ་པ་གང་དུ་འཆབ་པའི་གནས་ནི། མཐོལ་ཡུལ་མཚན་ཉིད་དང་ལྡནཔ་ཡོད་པའི་གནས་ཡིན་པའོ། །བཞི་པ་གང་གིས་འཆབ་པའི་རྟེན་ནི། བར་ཆད་སྤང་བ་ལ་ལྟོསཔ་མ་ཡིན་པའོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལབའོ། །ཀུན་སློང་རང་དགར་འཆབ་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་འཆབཔར་ཞུགས་པའོ། །བཞི་བ་མཐར་ཐུག་ནི་མཚན་མོ་མཐའི་སྐད་ཅིག་མ་ཡིན་ཏེ། རྩ་བར། ཉིནམཚན་གྱི་མཐར་རོ། །ཞེས་དང༌། དེའི་ཊཱི་ཀ་ལས། སྐྱ་རེངས་འཆར་ཀ་ཚུན་ཆད་ཅེས་བྱ་བའིཐ་ཚིག་གོ། །ཞེས་གསུངས་སོ། །འོ་ན་སྐབས་འདིར་ལུང་རྣམ་འབྱེད་ལས་སྐྱ་རེངས་ཤར་ན་ལྟུངབྱེད་དུ་འགྱུར་རོ། །ཞེས་གསུངས་པ་དང་འགལ་ཞེ་ན། དེའི་ཚེ་ན་ལྟུང་བྱེད་དུ་གྱུར་པ་ལ་ལྟུང་བྱེད་དུ་འགྱུར་ཞེས་གསུངས་པའོ། །

བཅུ་ཚན་དྲུག་པ་ལ་སྡོམ་དང་སོ་སོར་བཤད་པ་དང་གཉིས་ལས། དང་པོ་ནི།

སོར་སྡོམ་ལས། བདེ་དང་མེ་དང་འདུན་པ་དང༌། །བསྙེན་པར་མ་རྫོགས་ཆོས་དང་སྨྲ། །དགེཚུལ་ཁ་དོག་བསྒྱུར་བ་དང༌། །རིན་པོ་ཆེ་དང་ཚ་བའི་དུས། །ཞེས་གཟུང་བར་བྱའོ། །གཉིས་པ་སོ་སོར་བཤད་པ་ལ་བཅུ་ལས། ང་གཅིག་པ་ཟན་གཅོད་དུ་འཇུག་པའི་ལྟུང་བྱེད་འཆད་པ་ལ། རྩ་བར། ནད་ཀྱི་གཉེན་པོའི་དོན་ཉིད་མ་གཏོགས་པ་ཆེད་དུ་བསམ་ཏེ་ཁྱིམ་པ་སྦྱིན་པ་བོལ་ཟན་གཅོད་དུ་བཅུག་ནའོ། །ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞིནི་མཉན་ཡོད་དུ་ཉེ་དགས་ཆེད་དུ་བསམས་ཏེ་དགེ་སློང་གི་ཟན་གཅོད་དུ་འཇུག་པ་ལས་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་རང་རིགས་ཀྱི་འཚོ་བ་ལ་གནོད་པའོ། །གསུམ་པ་ངོབོ་ནི་བཅས་ལྡན་དགེ་སློང་གིས་དགེ་སློང་གཞན་ལ་ཁྱིམ་པས་ཟན་འདྲེན་པ་དེ་ངག་གི་རིག་བྱེདཀྱིས་ཟན་གཅོད་དུ་བཅུག་སྟེ། ཁྱིམ་པ་དེས་དོན་གོ་བ་ལས་གྱུར་པའི་ལྟུང་བ་དངོས་གཞིའོ། །

བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ། གང་གི་ཟན་གཅོད་དུ་འཇུག་པའིཡུལ་དང༌། གང་ལ་གཅོད་དུ་འཇུག་པའི་ཡུལ་དང༌། གང་གཅོད་དུ་འཇུག་པའི་དངོས་པོ་དང༌། གང་གི་ཚེ་གཅོད་དུ་འཇུག་པའི་དུས་དང་བཞི། དང་པོ་ནི་བདུན་ཏེ་དགེ་སློང་ཆོས་དྲུག་ལྡན་གྱིསྟེང་དུ། ཟན་བཅད་པས་ཕན་པའི་ནད་དང་མི་ལྡན་པ་སྟེ། ནད་ཀྱི་གཉེན་པོའི་དོན་ཉིད་མ་གཏོགསཔར། ཞེས་གསུངས་པས་སོ། །གཉིས་པ་ལ་བཞི་ལས། ཁྱིམ་པ་ཡིན་པ་དང༌། དགེ་སློང་གཞནདེ་ལ་བསམ་པ་ཐག་པ་ནས་ཟས་སྦྱིན་པར་བསྔོ་བ་པོ་ཡིན་པ་སྟེ། ཁྱིམ་པ་སྦྱིན་པ་པོ་ཞེས་གསུངསཔས་སོ། །ཐ་སྙད་ལྔ་དང་ལྡན་པ་དང༌། ལུས་ཐ་མལ་པར་གནས་པ་གཉིས་སོ། །གསུམ་པ་ལབཞི་སྟེ། དུས་སུ་རུང་བ་ཡིན་པ་དང༌། དགེ་སློང་དེ་ལ་སྦྱིན་པར་བསྔོས་པ་དང༌། རུང་བ་དང༌། ཚད་དང་ལྡན་པ་སྟེ་བཞིའོ། །བཞི་པ་ནི་དུས་ཉི་མ་ཕྱེད་མ་ཡོལ་བ་སྟེ། ཕྱི་དྲོ་ཕན་ཆད་ནི་དགེ་སློངགི་ཟན་གཅོད་དུ་འཇུག་པ་ལ་མི་རིགས་པ་མེད་དོ། །གཉིས་པ་བསམ་པའི་ཡན་ལག་ལ་གཉིསལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་རང་དགར་ཟན་གཅོད་དུ་འཇུག་པརའདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་ངག་མཚན་ཉིད་ལྔ་ལྡན་གྱིས་ཟན་གཅོད་དུའཇུག་པར་ཞུགས་པའོ། །བཞི་བ་མཐར་ཐུག་ནི་ཁྱིམ་པ་དེས་དོན་གོ་བའོ། །

ང་གཉིས་པ་མེ་ལ་རེག་པའི་ལྟུང་བྱེད་འཆད་པ་ལ་གསུམ་ལས། དང་པོ་སྐབས་དངའབྲེལ་བའི་བསླབ་བྱ་ནི། རྩ་བར། སེང་གེ་ལ་རེག་པར་མི་བྱའོ། །ཞེས་སོ། །གླེང་གཞི་དངའབྲེལ་ནས་གསུངས་པའོ། །གཉིས་པ་དུས་བྱིན་གྱིས་བརླབས་ན་ལྟུང་བ་མེད་པ་ནི། རྩ་བར། སྟོན་པ་དང༌། དུས་བྱིན་གྱིས་བརླབ་པ་ཡིན་ནོ། །ཞེས་སོགས་བྱུང༌། དུས་བྱིན་གྱིས་བརླབསཔ་འདིས་མཚོན་ནས། བྱིན་གྱིས་བརླབས་པ་སྤྱིར་བཤད་ན། འདུལ་བ་ལས་བྱིན་རླབས་བཅུགཅིག་གསུངས་ཏེ། གོས་དང་ལྷུང་བཟེད་རིན་པོ་ཆེ། །ལྟུང་བ་གསོ་སྦྱོང་དབྱར་དང་ནི། །དགགདབྱེ་སྨན་དང་རུང་ཁང་དང༌། །རྙེད་པ་དུས་ཀྱི་བྱིན་རླབས་སོ། །དེའང་གཞན་རྣམས་སོ་སོའི་སྐབསསུ་སྟོན་ལ། དུས་བྱིན་གྱིས་བརླབས་པ་འདིའི་དོན་ལ་བརྒྱད་ལས། དང་པོ་དགོས་དོན་ནི། དུསབྱིན་གྱིས་བརླབས་པས་ཉེས་པ་བཞི་ཁེགས་ཏེ། མེ་རེག་ལྟ་བུའི་སྦྱོར་བའི་སྦྱོར་བའི་ཉེས་བྱསཕྲ་མོ་དང་སྦྱོར་བའི་ཉེས་བྱས་དང་དངོས་གཞིའི་ལྟུང་བ་སྟེ་ལྟུང་བ་རྣམ་གཞག་གི་ཉེས་པ་གསུམདང་དུས་བྱིན་གྱིས་མི་རློབ་པ་ཉིད་ཀྱི་བསླབ་བྱའི་ཉེས་བྱས་དང་བཞི་ཁེགས་པའོ། །དེ་ལྟར་ན་ཉེས་པ་དེ་དག་ཁེགས་པ་ནི་དངོས་ཀྱི་དགོས་པའོ། །བཅས་པའི་མཚམས་ཟིན་པ་ནི་བརྒྱུད་པའིདགོས་པའོ། །གཉིས་པ་གཞི་གང་ལ་དུས་དྲན་བྱ་བ་ནི། སྔར་བཀག་པའི་བསྒྲུབ་པ་ལས་གནངབར་གྱུར་པ་ཡིན། ངེས་པ་བཞི་ལས་གཞན་ཡིན་པ་སྟེ། སྲོག་གཅོད་པ་ལྟ་བུ་གནང་བར་འགྱུརབ་མ་ཡིན་པ་ལ་དུས་དྲན་མི་འཆགས་ལ། ངེས་པ་བཞི་ལའང་སྤྱིར་བཏང་ལ་དུས་དྲན་མི་དགོསཏེ། ཊཱི་ཀ་ལས། ཞག་བཅོ་ལྔ་ལ་ཁྲུས་ཀྱི་ཉིན་མོ་ལ་ཁྲུས་བྱ་བ་གང་ཡིན་པ་དེ་ནི་གྲགས་པ་ཡིནཔས། དེར་ཁྲུས་བྱ་བ་ལ་ནི་དུས་བྱིན་གྱིས་བརླབས་པར་བྱ་མི་དགོས་སོ། །ཞེས་དུས་ངེས་པ་ལ་དུས་དྲན་མི་དགོས་པར་གསུངས་པས། དངོས་པོ་ངེས་པ་དང༌། གང་ཟག་ངེས་པ་དང༌། ཡུལངེས་པ་ལའང་རྒྱུ་མཚན་མཚུངས་པའི་ཕྱིར་དུས་དྲན་མི་དགོས་པར་གནད་ཀྱིས་སྦྱར་རོ། །དམིགསབསལ་ནི། ཡུལ་ངེས་པ་བྱང་གི་སྒྲ་མི་སྙན་དུ་བྱིན་ལེན་མ་བྱས་པར་ཟ་བ་ལ་དུས་བྱིན་གྱིས་རློབདགོས་པ་ལུང་ལས་གསུངས་པ་དང༌། ཡུལ་ངེས་པ་ཨསྨ་པ་རན་ཏར་ཁྲུས་བྱེད་པ་ལའང་རང་གི་རྣམ་བཤད་ལས། འདིར་ཡུལ་དེ་ཉིད་དུ་དུས་རིག་པར་བྱའོ། །ཞེས་དང༌། ཊཱི་ཀ་ལས། དེརནི་བློས་ས་དེ་ཉེ་བར་བཞག་སྟེ་དུས་མ་ཡིན་པར་ཡང་ཁྲུས་བྱའོ། །ཞེས་གསུངས་སོ། །དེ་དག་དམིགས་བསལ་ཡིན་ན་ཡུལ་ངེས་པ་དུས་དྲན་མི་དགོས་པ་གང་འཇོག་དང༌། ངེས་པ་བཞི་བོ་ཅི་རིགས་ལ་དུས་དྲན་བྱེད་པ་མི་རིགས་པར་ཐལ། ངེས་པ་བཞི་བོ་ལ་སྤྱིར་བཏང་དམིགས་བསལགང་གི་དབང་དུ་བྱས་ན་བཅས་པས་མཚམས་ཟིན་པས་དུས་དྲན་བརྟེན་པ་ལ་དགོས་པ་མེད་པའི་ཕྱིར་ཟེར་ན་དཔྱད་པར་བྱའོ། །གསུམ་པ་རྟེན་གང་གིས་དུས་དྲན་པར་བྱ་བ་ནི། རབ་བྱུངསྡེ་ལྔ་གང་ཡང་རུང་བའི་སྡོམ་པ་གསོར་རུང་ཡན་ཆད་དང་ལྡན་པ་དང༌། ཤེས་པ་རང་བཞིན་དུགནས་པ་དང༌། ལུས་ཐ་མལ་པར་གནས་པ་སྟེ་གསུམ་དང༌། འདིར་ནི་གནང་བའི་རྐྱེན་ཅན་ཡིནཔ་སྟེ། གནང་བའི་རྐྱེན་མེད་ན་དུས་དྲན་མི་འཆགས་སོ། །བཞི་པ་ཆེད་དུ་བྱ་བ་གང་ལ་དུས་དྲནབྱ་བ་ནི། ཆོས་དང་ལྡན་པའི་བྱ་བའི་དོན་ཉིད་ཅེས་གསུངས་ལ། རང་གི་རྣམ་བཤད་ལས། ཆོསདང་མི་ལྡན་པའི་དོན་གྱིས་ནི་འདིར་འཇུག་པར་རིགས་པ་མ་ཡིན་ཏེ། ཞེས་སོ། །ལྔ་པ་དུས་གངགི་ཚེ་དུས་དྲན་བྱ་བ་དེ་ལ་འཇུག་པ་ནི་དེའི་སྔ་རོལ་ཏུ་སྟེ། རྩོམ་འདོད་གང༌། ཞེས་སོ། །དྲུག་པ་ཡུན་ཇི་སྲིད་དུ་དུས་དྲན་བྱ་བ་ནི། ཉིན་ཞག་གཅིག་གི་ཁོངས་སུ་གཏོགས་པའི་ཡུན་རིང་དུསྟེ། ལུང་རྣམ་འབྱེད་ལས། ཡང་དང་ཡང་དུ་བརྗེད་ངེས་པས་མེ་ལ་རེག་པའི་འགྱོད་པ་སྐྱེས་པའིསྐབས་ལས་དུས་ཡུན་རིང་དུ་བྱིན་གྱིས་བརླབ་པར་བྱའོ། །ཞེས་སོ། བདུན་པ་ཚུལ་ཇི་ལྟརདུས་དྲན་བྱ་བ་ལ། དགག་བྱ་ཉེས་དམིགས་འགེགས་པའི་དུས་དྲན་དང༌། བརྒྱུད་པ་རྒྱུར་འགྲོའགེགས་པའི་དུས་དྲན་དང་གཉིས། དང་པོ་ལ་གསུམ་ལས། ནང་སེམས་ཅན་ལ་ཆགས་པའིདགག་བྱ་ཉེས་དམིགས་འགེགས་པ་ནི་བུད་མེད་ཆུས་ཁྱེར་བ་འཛིན་པ་ན་མ་དང་སྲིང་མོའི་འདུཤེས་ཉེ་བར་བཞག་པར་གསུངས་པ་ལྟ་བུའོ། །ཕྱི་ལོངས་སྤྱོད་ལ་ཆགས་པའི་དགག་བྱ་ཉེསདམིགས་འགེགས་པ་ནི། ཆོས་འཆད་པ་པོ་རིན་པོ་ཆེའི་ཁྲི་ལ་འདུག་པ་ན་མི་རྟག་པས་ཉེན་པརའགྱུར་པ་ཡིད་ལ་བྱ་བར་གསུངས་པ་ལྟ་བུའོ། །ཞེ་སྡང་གི་དགག་བྱ་ཉེས་དམིགས་འགེགས་པནི། ཉེས་པ་གླེང་བ་དང་དྲན་པར་བྱེད་པ་ན། བྱམས་པའི་སེམས་ཉེ་བར་བཞག་པ་སྟེ། དྲན་པདང་ཤེས་བཞིན་ཉེ་བར་མ་བཞག་པར་མི་བྱའོ་ཞེས་གསུངས་པའི་གནད་ཀྱིས་ཤེས་སོ། །གཉིསཔ་བརྒྱུད་པ་རྒྱུར་འགྲོ་འགེགས་པའི་དུས་དྲན་ནི། དགེ་སློང་གིས་མེ་ལ་རེག་པ་ན། སྤྱིར་དགེ་སློང་གིས་མེ་ལ་རེག་པ་བཀག་ཀྱང༌། ཆོས་ལྡན་གྱི་བྱ་བ་འདི་ལ་མེ་རེག་གནང་ངོ་སྙམ་དུ་སེམསཀྱི་བརྟག་པ་བྱ་བ་ལྟ་བུའོ། །བརྒྱད་པ་དུས་དྲན་བྱས་པ་འཇིག་པའི་རྒྱུ་ནི་རྟེན་བབས་པ་དང༌། བྱབ་ཆོས་མི་ལྡན་དུ་གྱུར་པ་དང༌། བྱ་བ་ཟིན་པ་དང༌། ཞག་འདས་པས་ཀྱང་སྟེ། དགེ་སློང་མའི་འདུནཔ་ཞག་ལོན་པའི་གནད་ཀྱིས་ཤེས་སོ། །

གསུམ་པ་ལྟུང་བ་རྣམ་པར་བཞག་པ་ནི།

རྩ་བར། རྩེ་བ་ཉིད་ནའོ་ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་རྒྱལ་པོའི་ཁབ་ཏུ་དྲུག་སྡེས་མེ་ལ་རྩེ་ཞིང་རེག་པལས་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་དགེ་སློང་གིས་ཟས་ཀྱི་གཡོས་བྱེད་ལ་སོགསཞུགས་ན་རྣམ་པར་གཡེང་ཞིང་དོན་དང་བྱ་བ་མང་པ་སྟེ། དེའི་མཐའ་དགག་པའི་ཕྱིར་མེ་རེག་བཀག་པ་སྟེ་རྗེན་འཚོད་བཀག་པ་བཞིན་ནོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་བུདཤིང་གི་ཡུལ་ཅན་མེ་ཡོངས་སུ་རྫོགས་པ་ལ་དུས་དྲན་མ་བྱས་པར་རེག་གམ་རེག་ཏུ་བཅུག་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལགལ། གང་ལ་རེག་པའི་ཡུལ་དང༌། གང་གིས་རེག་པའི་རྟེན་དང་གཉིས། དང་པོ་ལ་བཞི་ལས་འཇིགརྟེན་ན་གྲགས་པའི་མེ་ཡིན་པ་སྟེ། མེས་སོ། །ཞེས་སོ། །བུད་ཤིང་གི་ཡུལ་ཅན་ཡིན་པ་སྟེ། སྐྲདང་སྤུ་དང་རུས་པ་དང༌། །སེན་མོ་དང་ཞེས་ཏེ་དེ་རྣམས་མེར་བསྲེགས་ཀྱང་ན་སྨད་དུ་གསུངསཔས་སོ། །མེ་ཡོངས་སུ་རྫོགས་པ་ཡིན་པ་སྟེ། མེ་མ་མུར་ནི་ཕྱེད་ཤི་བ་ཉིད་དོ། །ཞེས་པས་སོ། །

ཐ་སྙད་དུ་བྱར་རུང་གི་ཚད་དང་ལྡན་པ་སྟེ། དགག་བྱའི་གནད་ཀྱིས་ཤེས་སོ། །མི་མ་ཡིན་གྱི་མེལས་གཞན་པ་སྟེ། སེལ་བ་ནི་འདྲེ་མེ་ལ་སོགས་པ་མི་མ་ཡིན་པའི་མེ་ལ་དགེ་སློང་གིས་རེག་ནཉེས་བྱས་ཏེ། ལུང་ཞུ་བ་ལས། ལྷའི་རིན་པོ་ཆེ་ལ་རེག་ན་ཉེས་བྱས་སུ་གསུངས་པའི་གནད་ཀྱིསསྦྱར་རོ། །གཉིས་པ་གང་གིས་རེག་པའི་རྟེན་ནི། དུས་བྱིན་གྱིས་བརླབས་པ་མ་ཡིན་པ་དང༌། ནདཔ་མ་ཡིན་པ་སྟེ། དུས་བྱིན་གྱིས་མ་བརླབས་པའི་དགེ་སློང་ན་བའི་དབང་ཉིད་དུ་གནས་པ་མ་ཡིན་པ། ཞེས་སོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མའཁྲུལ་བའོ། །ཀུན་སློང་ནི་རང་གར་མེ་ལ་རེག་པར་འདོད་པ་རྒྱུན་མ་ཆད་པའོ། །གསུམ་པ་སྦྱོརབ་ནི་རང་ངམ་བསྐོས་པས་རེག་པར་ཞུགས་པའོ། །བཞི་བ་མཐར་ཐུག་ནི་རེག་པ་རྫོགས་པའོ། །

ཁ་ཅིག་མེ་རེག་གི་ལྟུང་བྱེད་སྐྱེད་པ་ལ་རྩེ་བ་ཡན་ལག་ཏུ་དགོས་ཏེ། བམ་པོ་ལྔ་བཅུ་པ་ལས་འདིལ་ཡན་ལག་ལྔས་དངོས་གཞིའི་ལྟུང་བར་འགྱུར་ཏེ། མེ་ཉིད་དང་མེས་རྩེ་བ་ཉིད་དང་དུས་བྱིནགྱིས་མ་བརླབས་པ་དང་ན་བ་མ་ཡིན་པ་དང་རང་ངམ་བསྐོས་པས་རེག་པའོ། དེ་དག་ལས་ཡནལག་མ་ཚང་ན་ཅི་རིགས་པར་ན་སྨད་དོ། །ཞེས་གསུངས་སོ་ཞེ་ན། རྩེ་བ་ཡན་ལག་ཏུ་བཤདཔ་དེའི་རྗེས་སུ་མི་འབྲང་སྟེ། སོ་སོར་ཐར་པ་དང་ལུང་རྣམ་འབྱེད་ལས། མེ་ལ་རེག་གམ་རེགཏུ་འཇུག་ན་ལྟུང་བྱེད་དུ་གྱུར་ཏོ། །ཞེས་དང༌། འདི་ཉིད་ལས། སྤར་བ་དང་གསོད་པ་དང་རེགཔ་དང༌། ཞེས་གསུངས་པས་སོ། །བམ་པོ་ལྔ་བཅུ་པ་ལས་ཀྱང༌། མེ་ལ་རེག་པར་བྱེད་པ་དག་ལཡང་ན་སྨད་པ་མེད་དོ། །ཞེས་གསུངས་སོ། །རྩེ་བ་ཉིད་ནའོ་ཞེས་འདིར་གསུངས་པ་ནི་གླེང་གཞིའིདབང་གིས་མཚོན་པའོ། །