འཇམ་དཔལ་གཤིན་རྗེའི་ཁྲོ་ཆུ་དུག་གདོང་གི་གཏོར་བྲོ་རྒྱལ་དབྱངས།
འཇམ་དཔལ་གཤིན་རྗེའི་ཁྲོ་ཆུ་དུག་གདོང་གི་གཏོར་བྲོ་རྒྱལ་དབྱངས་བཞུགས་སོ།།
སྐད་ཅིག་གིས་ས་ཡི་འོག་ནས་ལས་ཀྱི་གཤིན་རྗེ་མ་ཧེ་གླང་གི་མགོ་ཅན༔ ཁ་གནམ་ས་ཙམ་གདངས༔ མཆེ་བ་གངས་རིའི་ཕྲེང་བ་ལྟར་གཙིགས༔ ལྕེ་གློག་ལྟར་འཁྱུག་པའི་ཁ་ནང་དུ༔ གནོད་བྱེད་དགྲ་བགེགས་དམ་སྲི་སྒབ་འདྲེ་ཐམས་ཅད་ཚུད་པར་གྱུར༔ དེ་ལྟར་གསལ་བར་བསྐྱེད་ལ་བཀུག་གཞུག་ལན་གསུམ་བྱས་ནས༔ གཤིན་རྗེ་ཐམས་ཅད་ཧུར་གྱིས་ལོག་ནས༔ ས་རིམ་དགུའི་འོག་ཏུ་སོང་བའི་སྟེང་ནས༔ གཏོར་གཞོང་རྡོ་རྗེ་རྒྱ་གྲམ་རི་རབ་ཀྱི་གླིང་བཞི་དང་བཅས་པས་མནན་པའི་སྟེང་ནས༔ གཤིན་རྗེའི་ལྷ་ཚོགས་འཁོར་དང་བཅས་པས་མནན་པར་གྱུར༔ གཏོར་བྲོ་
ནི༔ ཧཱུྃ༔ དགྲ་བགེགས་བསྒྲལ་བའི་ཕུང་པོ་ལྷག་རོལ་ལ༔ ལས་ཀྱི་གཤིན་རྗེ་ཆེན་པོའི་བྲོ་བརྡུངས་བས༔ མཐིང་ནག་ཆེན་པོ་རྔམས་པའི་སྟངས་སྟབས་ཀྱིས༔ གནོད་བྱེད་ཡ་མ་དམ་སྲི་སྒབ་འདྲེ་དང་༔ བྱད་མ་རུ་ཏྲའི་ཚོགས་རྣམས་མ་ལུས་ནོན༔ ཞལ་གསུམ་ཁྲོས་པས་སྲིད་གསུམ་ཟིལ་གྱིས་གནོན༔ དབུ་གསུམ་མཆོད་རྟེན་ཁམས་གསུམ་མ་ལུས་མནན༔ སྤྱན་གསུམ་བགྲད་པས་ལྷ་སྲིན་སྡེ་བརྒྱད་མནན༔ སྤུ་གྲིའི་གཤོག་པས་བྱད་མ་རྦོད་གཏོང་མནན༔ ཆུ་སྲིན་རྔམས་ཞལ་ས་བདག་ཀླུ་གཉན་མནན༔ ཁྲོ་ཆུའི་ཕུར་པས་རུ་ཏྲ་ཕོ་མོ་མནན༔ སངས་རྒྱས་
བསྟན་ལ་གནོད་པར་བྱེད་པའི་དགྲ མཐོ་རིས་ཐར་པའི་གདོན་བགེགས་བྱད་མ་ཡི༔ དམ་སྲི་རུ་ཏྲ་དགྲ་བགེགས་ཕོ་མོ་རྣམས༔ ལས་ཀྱི་གཤིན་རྗེའི་འོག་ཏུ་མནན༔ བསྐལ་པར་ལྡང་བར་བྱེད་པར་མ་གྱུར་ཅིག༔ ཨོཾ་ཨཱཿཧཱུྃ་ནན༔ དགྲ་བོ་ས་ཡི་ཁམས་སུ་ནན༔ ཆུའི་ཁམས་བཻ་ནན༔ མེའི་ཁམས་རཾ་ནན༔ རླུང་གི་ཁམས་ཡཾ་ནན༔ ནམ་མཁའི་ཁམས་ལཾ་ནན༔ རྣམ་པར་ཤེས་པའི་ཁམས་སྟེ་བྷ་ཡ་ནན༔ མཱ་ར་ཡ་ནན་ནན༔ རྗེས་སུ་བཀྲ་ཤིས་སྨོན་ལམ་དང་བཅས་པ་བྱ༔ ཞེས་པ་འདི་བསེ་སྒྲོམ་སྨུག་པོ་ནས༔ གནུབས་བན་སངས་རྒྱས་ཡེ་ཤེས་རིན་པོ་ཆེ་ཡིས་ཁོལ་བུ་ཅུང་ནས་ཟུར་དུ་བཀོད་པའོ༔ ཟབ་རྒྱ༔ རྒྱ་རྒྱ་རྒྱ༔ དེ་ནས། རྣལ་འབྱོར་བདག་ཅག་བྱང་ཆུབ་ཆེ༔ བླ་མེད་སྒྲུབ་པའི་ས་འདི་ལ༔ ཚེ་དང་བསོད་ནམས་དཔལ་འབྱོར་བཟང་དགེ་ལེགས་ཆེན་པོས་གང་གྱུར་ཅིག༔ ཨ་ལ་ལ་ཧོ༔ ཞེས་གཏོར་སྣོད་ཡར་བསྟན་འབྲུ་འཐོར༔ ༈ རྒྱལ་དབྱངས་བྱ་བ་ནི༔ ཀྱེ༔ མངོན་སྤྱོད་ལམ་དུ་བྱ་བ་ཡི༔ རིག་འཛིན་རྣལ་འབྱོར་ཆེན་པོ་བདག ཞེ་སྡང་དགྲ་ཡི་གཡུལ་ངོ་ལས༔ ད་ནི་རྒྱལ་ལོ་རྣམ་པར་རྒྱལ༔ ཞེས་ལན་གསུམ༔ ལྷ་རྒྱལ་ལོ༔ ཞེས་ཀརྨ་ཨ་རཱ་གས་བསྒྲིགས་པའོ༔ སརྦ་མངྒ་ལཾ། ཨོཾ༔
དེ་ནས་ཐོ་བཙུགས་ནས་བྱ་ཁྱུང་གིས་སྒབ་འདྲེ་མཚམས་བཅད་པ་ནི། རང་ཕྱོགས་ཀྱི་དབུ་ལ་ཁྱུང་གསལ་བར་བསྒོམས་ལ། སྒབ་འདྲེ་མཚམས་བཅད་པར་བསམ་ལ༔ ཨོཾ་བཛྲ་ག་རུ་ཌ་ཙ་ལེ་ཙ་ལེ་ཧཱུྃ ཧཱུྃ༔ ཆེ་མཆོག་སྤྲུལ་པའི་བྱ་ཁྱུང་རྒྱལ༔ མཐུ་རྩལ་སྟོབས་ཀྱིས་སྡེ་བརྒྱད་འདུལ༔ བགེགས་དང་འབྱུང་པོའི་ཕྱི་ལམ་ཆོད༔ བཛྲ་ག་རུ་ཊ་ཡ་ཧཱུྃ་ཕཊ༔ སརྦ་བུདྡྷ་ནན༔ བྱང་ལ་ཁྲོམ་བཞི་གཡུང་དྲུང་བྲིས་ལ་བཙུགས༔ ལམ་དུ་ཕྱི་མིག་མི་ལྟ་བར་རྣམ་འཇོམས་དང་བྱུང་སྔགས་བཟླ་ཞིང་འོང་སྲོལ་ཡོད༔ ཅེས་པ་ཨ་རཱ་གས་བསྡུས་པའོ༔ སརྦ་མངྒ་ལཾ། དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།