དམ་ཅན་དམར་པོའི་ནོར་སྒྲུབ་ཀྱི་ལས་བྱང་།
དམ་ཅན་དམར་པོའི་ནོར་སྒྲུབ་ཀྱི་ལས་བྱང་བཞུགས་སོ།
བདག་ཉིད་ཡི་དམ་དུ་གསལ་བའི་མདུན་དུ་ཏྲི་ཡོངས་སུ་གྱུར་པ་ལས། དགེ་བསྙེན་ཆེན་པོ་ཞལ་གཅིག་ཕྱག་གཉིས་སྐུ་མདོག་དམར་པོ་ཕྱག་གཡས་ལྕགས་ཀྱུའི་མི་ནོར་འགུགས་པ། །གཡོན་པས་ནེའུ་ལེས་དགོས་འདོད་སྟེར་བ། །དབུ་ལ་ཕྱིང་ཞྭ་དཀར་པོའི་སྟེང་དར་དམར་ཐོད་དུ་བཅིངས་བ་དང་། །དར་དམར་པོའི་ན་བཟའ་དང་རིན་པོ་ཆེས་བརྒྱན་པ། །ཞབས་གཉིས་སེམས་དཔའི་སྐྱིལ་མོ་ཀྲུང་གིས་བཞུགས་པ། །དེའི་པང་དུ་ཡུམ་ཀོང་བཙུན་དེ་མོ་ཞལ་གཅིག་ཕྱག་གཉིས་སྐུ་མདོག་དམར་པོ་ཕྱག་གཡས་མེ་ལོང་དང་དར་དམར། གཡོན་པས་མདའ་དར་
དཀར་པོ་བསྣམས་པ། །སྐུ་ལ་དར་དཀར་གསེར་གཡུའི་ཐིག་ཕྲན་ཅན། དབུ་ལ་གཡུ་ཐོད་དང་མུ་ཏིག་གིས་སྤྲས་པ། སྐྱེས་བུ་ཞལ་འཛུམ་པའི་མདངས་ཀྱིས་བལྟ་ཞིང་འཁྲིལ་བ་གཅིག་བསྐྱེད་དོ། །དེའི་འཁོར་དུ་བཙན་དང་ཐེའུ་རང་སྨན་མོ་དང་ས་བདག་དང་བདུད་མོ་གནོད་སྦྱིན་མོ་དང་། ཡུལ་ལྷ་ཕྱུགས་བདག་རྣམས་ཀྱིས་བསྐོར་བར་བསམ། དེ་ཐམས་ཅད་ཀྱི་སྤྱི་བོར་ཨོཾ་མགྲིན་པར་ཨཱཐུགས་ཀར་ཧཱུྃ་དེ་ལས་འོད་ཟེར་འཕྲོས་པས་ཕ་ཝང་ལོང་བུའི་སྐུ་མཁར་འཇའ་ཚོན་སྣ་ལྔའི་ཕོ་བྲང་རྒྱ་བོད་མདོ་གཙང་ཀུན་ནས་དམ་ཅན་སྐྱེས་བུ་མཆེད་འཁོར་སུམ་བརྒྱ་དྲུག་
ཅུ་དང་བཅས་པ་ཐམས་ཅད་སྤྱན་འདྲེན་མཆོད་པའི་གནས་སུ་བཛྲ་ཏྲི་ཤུ་ལ་ཛབཛྲ་སཱ་དྷུ་ས་མ་ཡ་ཛ་ཛཿ སྤྱན་འདྲེན་པ་ནི། ཧཱུྃ༔ རྒྱལ་བ་ཤཱཀ་ཐུབ་བསྟན་པ་ལ༔ རྡོ་རྗེ་འཛིན་པའི་བཀའ་བཞིན་དུ༔ བསྟན་པ་སྲུང་བའི་མཐུ་རྩལ་ཅན༔ རྡོ་རྗེ་ལེགས་པ་གཤེགས་སུ་གསོལ༔ ཉི་མ་ནུབ་ལ་མངའ་མཛད་པའི༔ གནམ་ས་ཕྱེད་ཀྱི་བདག་པོ་སྟེ༔ འཛམ་བུ་གླིང་གི་སྐྱེས་གཅིག་པུ༔ དགྲ་ལྷ་ཆེན་པོ་གཤེགས་སུ་གསོལ༔ འོ་ཡུག་ཤང་གི་གནས་མཆོག་ནས༔ སྐྱེས་མཆོག་འཁོར་བཅས་དགྲ་རྒྱལ་པོ༔ རྒྱ་བོད་མདོ་གཙང་ཀུན་གྱི་བདག༔ བཙན་རྒོད་ཆེན་པོ་གཤེགས་སུ་གསོལ༔ གཙུག་ལག་ཆོས་འཁོར་དབེན་གནས་དང་༔ གནས་མཆོག་དམ་པ་གར་བཞུགས་ཀྱང་༔ གདུང་བའི་ཡིད་ཀྱིས་སྤྱན་འདྲེན་ན༔ དམ་ཚིག་དབང་གིས་གཤེགས་སུ་གསོལ༔ ཨོཾ་བཛྲ་སཱ་དྷ་ཏྲི་ཤུ་ལ་བཛྲ་ལི་ལ་མ་ཛཿཧཱུྃ་བཾ་ཧོ༔ ས་མ་ཡ་ཛ་ཛཿ བཞུགས་གསོལ་མཆོད་འབུལ་ནི། ཧཱུྃ༔ དམ་ཅན་སྐྱེས་བུ་འཁོར་བཅས་རྣམས༔ དེང་གི་གནས་མཆོག་དམ་པ་འདིར༔ དགྱེས་པའི་གདན་ལ་བཞུགས་སུ་གསོལ༔ ཕྱག་འཚལ་མཆོད་པ་སྣ་ཚོགས་འབུལ༔ དམ་རྫས་སྨན་གཏོར་རཀྟ་དང་༔
ཕྱི་ནང་གསང་བའི་མཆོད་ཚོགས་རྣམས༔ དམ་ཅན་འཁོར་དང་བཅས་ལ་འབུལ༔ སྐྱེས་མཆོག་ཐུགས་དམ་བསྐང་གྱུར་ཅིག༔ བཅོལ་བའི་ཕྲིན་ལས་འགྲུབ་པར་མཛོད༔ བཛྲ་སཱ་དྷུ་ས་མ་ཡ་ཏྲི་ཤུ་ལ་བཛྲ་ལི་ལ་མ་མ་ཧཱ་པཉྩ་ཨ་མྲྀ་ཏ་མ་ཧཱ་བ་ལིཾ་ཏ་མ་ཧཱ་རཀྟ་སརྦ་པུ་ཙ་ཁ་ཁ་ཁཱ་ཧི་ཁཱ་ཧི༔ དེ་ནས་བསྟོད་བསྐུལ་ནི། ཀྱེ༔ ཉི་མ་ནུབ་ཕྱོགས་ཕ་ཀི་ན༔ ཕ་ནི་བདུད་ལ་མ་ནི་དམུ༔ དམུ་བདུད་བཤོས་པའི་མཐུ་བོ་ཆེ༔ སྐྱེས་བུ་དགེ་བསྙེན་ཆེན་པོ་སྟེ༔ ཞྭ་ཡི་མགོན་པོ་ར་རྟ་ཅན༔ གནོད་སྦྱིན་ནོར་བདག་མཐུ་རྩལ་ཅན༔ གཏེར་བདག་མཐུ་སྟོབས་རྫུ་འཕྲུལ་ཅན༔ ཞལ་གཅིག་ཕྱག་གཉིས་སྐུ་མདོག་དམར༔ ཕྱག་གཡས་ལྕགས་ཀྱུས་མི་ནོར་འགུགས༔ གཡོན་པས་ནེའུ་ལེས་དབུལ་འཕོང་སེལ༔ ཕྱེད་བསྐུམ་རིན་ཆེན་སྣ་ལྔས་བརྒྱན༔ ཀོང་བཙུན་མ་དང་གཉིས་སུ་མེད༔ བརྟན་མ་བཅུ་གཉིས་འཁོར་གྱིས་བསྐོར༔ སྐུ་མཆེད་སུམ་བརྒྱ་དྲུག་ཅུ་བཅས༔ ཐེའུ་རང་དམག་ཚོགས་རྫུ་འཕྲུལ་ཅན༔ རྫུ་འཕྲུལ་སྐད་ཅིག་སྟོང་གསུམ་བསྐོར༔ འཇིག་རྟེན་ཁམས་ཀྱི་ནོར་ལ་སྤྱོད༔ ཁྱོད་ཀྱི་ཐུགས་དམ་དུས་ལ་བབ༔ མི་ནོར་ཟས་གསུམ་དབང་དུ་སྡུས༔
རྣལ་འབྱོར་བདག་ལ་དངོས་གྲུབ་སྩོལ༔ ཅེས་བསྟོད་ཅིང་ཕྲིན་ལས་བཅོལ་ལོ༔ དེ་ནས་དམིགས་པ་འདི་ལྟར་བྱ། ཕྱག་གཡས་ལྕགས་ཀྱུས་འགྲོ་བ་ཕོ་མོ་ཐམས་ཅད་ཀྱི་སྙིང་དཀར་ནག་མཚམས་ནས་བཟུང་། ཚེ་བསོད་དཔལ་འབྱོར་བཀྲག་གཟི་མདངས་རྣམས་དྲངས་ནས་གཡོན་གྱི་ནེའུ་ལེར་བསྟིམ། གཞན་ཡང་འཇིག་རྟེན་ཁམས་ཀྱི་ནོར་ལ་སོགས་པ་གང་འདོད་པའི་དངོས་པོ་རྣམས་རྡོ་ཁབ་ལེན་གྱིས་ལྕགས་ཕྱེ་བླང་པ་ལྟར་བསྡུས་ནས་ནེའུ་ལེར་བསྟིམ། ནེའུ་ལེའི་ཁ་ནས་རིན་པོ་ཆེའི་ཆར་ཆེན་པོ་ཁྲ་ཉི་ལི་ལི་བྱུང་ནས་བདག་གི་གནས་ཁང་ཐམས་ཅད་གང་། རང་གིས་འདོད་པའི་དངོས་པོ་རྣམས་བདག་ལ་ཆར་བབ་པ་ལྟར་བསྒོམ། བསྙེན་པ་ནི། ཨོཾ་བཛྲ་སཱ་དྷུ་ས་མ་ཡ་སྲོག་ཏྲི་དུ་ཛ་བཛྲ་ལི་ལ་མ་ཧཱུྃ་ཛཿ ཏྲིའུ་ཏྲིའུ་པྲ་མ་དུན་ནོར་རྫས་སྐྱེས་པ་བུད་མེད་འཇིག་རྟེན་ཁམས་གང་འདོད་པའི་དངོས་པོ་ཐམས་ཅད་ཏྲི་ཡ་རཏྣ་སིདྡྷི་ཕ་ལ་ཁུག་སྐྱོལ། ཞེས་ཞག་བདུན་ནམ། བདུན་གཉིས་བདུན་གསུམ་མཚམས་དམ་པོར་བསྡད། དེ་ནས་ནངས་མ་རེ་རེ་བཞིན་དུ་མ་ཆག་པར་བརྒྱ་རེ་བཟླས་ན་ལོངས་སྤྱོད་ཆེར་འཕེལ་ལོ། །སྒྲུབ་པ་ནན་ཁྱེར་བྱས་ན་མི་བཞིན་འཁོར་བ་ཨོ་རྒྱན་གྱིས་གསུངས། གཞན་ལ་མ་སྤེལ་དངོས་གྲུབ་འབྱུང་རེ་ཙམ། ཞེས༧རཱ་གའི་མིང་གིས་སྦྱར་བའོ། །དམ་ཅན་ནོར་སྒྲུབ་འདིས་འགྲོ་བ་ཕོ་མོ་དབང་དུ་བསྡུན་ཛབ་ཀྱི་སྣེ་ལ་རྒྱ་ཡི་མགྲོན་བུ་བག་མ་བཞག་པ་ལ་སྔགས་བཏབ་ན་གང་མཐོང་དབང་དུ་འདུའོ། །