རྣམ་པར་རིག་བྱེད་མ་ཡིན་པའི་གཟུགས་བཤད་པ།
གསུམ་པ་རྣམ་པར་རིག་བྱེད་མ་ཡིན་པའི་གཟུགས་བཤད་པ་ལ། ངོ་བོ། ཞར་བྱུང་གཉིས། དང་པོ་ནི། རྣམ་པར་རིག་བྱེད་མ་ཡིན་པའི་གཟུགས་དེ་ལ་ནི་འཇོག་ཚུལ་ཡོད་དེ། ཁྱད་ཆོས་བཞི་
དང་ལྡན་པའི་བསྟན་མེད་ཐོགས་མེད་ཀྱི་གཟུགས་ལ་ངོས་འཛིན་པའི་ཕྱིར། ཁྱད་ཆོས་བཞི་དང་ལྡན་པར་བརྗོད་དེ། གནས་སྐབས། ངོ་བོ། རྒྱུན། རྒྱུ་དང་བཞི་ཡོད་པའི་ཕྱིར། དང་པོ་གྲུབ་སྟེ། མ་ཡེངས་སེམས་བཅས་ཀྱི་གནས་སྐབས་སུ་འབྱུང་བར་མ་ཟད། སེམས་གཡེང་བ་དང་སེམས་མེད་པའི་གནས་སྐབས་སུ་ཡང་འབྱུང་བའི་ཕྱིར། གཉིས་པ་གྲུབ་སྟེ། དགེ་མི་དགེ་གང་རུང་གིས་བསྡུས་པའི་ཕྱིར། གསུམ་པ་གྲུབ་སྟེ། སྔ་མ་སྔ་མ་ལས་ཕྱི་མ་ཕྱི་མ་རྗེས་སུ་འབྲེལ་བའི་རྒྱུན་དང་བཅས་པའི་ཕྱིར། བཞི་པ་གྲུབ་སྟེ། འབྱུང་བ་ཆེན་པོ་བཞི་རྣམས་རྒྱུར་བྱས་པའི་འབྲས་གཟུགས་ཡིན་པའི་ཕྱིར། །གཉིས་པ་ཞར་བྱུང་ནི། འབྱུང་བའི་དབྱེ་བ། བྱེད་ལས། ངོ་བོ། འཕྲོས་པའི་དོགས་དཔྱོད་བཞི། དང་པོ་ནི། ཤེས་བྱ་ཆོས་ཅན། འབྱུང་བ་དེ་དག་ལ་དབྱེ་ན་བཞི་ཡོད་དེ། ས་ཁམས་དང་། ཆུ་དང་། མེ་དང་། རླུང་གི་ཁམས་རྣམས་སུ་ཡོད་པའི་ཕྱིར། གཉིས་པ་ནི། ཤེས་བྱ་ཆོས་ཅན། འབྱུང་བཞིའི་བྱེད་ལས་ཡོད་དེ། སས་འཛིན་པར་བྱེད། ལ་སོགས་པ་ཆུས་སྡུད་པར་བྱེད། མེས་སྨིན་པར་བྱེད། རླུང་གིས་རྒྱས་པར་བྱེད་པ་ལས་སུ་གྲུབ་པའི་ཕྱིར། གསུམ་པ་ནི། ཤེས་བྱ་ཆོས་ཅན། འབྱུང་བཞིའི་ངོ་བོ་ཡོད་དེ། སྲ་ཞིང་འཐས་པ་ས། རླན་ཞིང་གཤེར་བ་ཆུ། དྲོ་བ་ཉིད་མེ། ཡང་ཞིང་གཡོ་བ་རླུང་གི་མཚན་ཉིད་ཡིན་པའི་ཕྱིར། ཌུ་དྷཱཉ་འཛིན་པའི་བྱིངས་ལ། ཌུ་རྗེས་སུ་འགྲེལ་པ་ལས། དེའི་ཚར་པ་ལ་ཏྲྀ་མ་ཀའོ་ཞེས་པས། ཌུ་དང་། ཨིན་དང་། ཉ་དང་། ཡ་ཛ་སོགས་ལས་གཉིས་ཀའོ་ཞེས་པས་ཉ་ཕྱིས། དྷཱ་ལས་སི་ཏ་ནི་ག་མི་མ་སི་ས་ཙི་ཨ་བི་དྷཱཉ་ཀྲུ་ཤི་རྣམས་ལས་ཏུ་ནའོ་ཞེས་པས་ཏུ་པའོ་ན་རྐྱེན་བྱིན། རྗེས་འབྲེལ་ཕྱིས་པས་དྷཱ་ཏུ་ཞེས་པ་ཁམས་དང་། ཌུ་དྷྲྀ་ཉ་འཛིན་པ་ལ་པ་ཙ་སོགས་རྣམས་ལས་ཨ་ཙའོ་ཞེས་པས་ཨ་ཙའི་རྐྱེན་སྦྱར་བས་དྷ་ར་ཞེས་པ་འཛིན་པ་ཡིན་པས་གཉིས་ཀ་རྟགས་སུ་གྲུབ་ཟིན་
པར་དེ་མ་གོ་བའི། དྲུང་ཆེན་དངོས་གྲུབ། ཁམས་ཀྱི་སྐད་དོད། དྷ་ཏུ་ལ་དྷཱ་རའི་རྐྱེན་དང་སྦྱར་ཞེས་སྨྲ་བ་ནི། འཕགས་ཡུལ་གྱི་སྒྲ་མདོ་ཆེན་པོ་བརྒྱད་གང་དུ་ཡང་མ་གྲགས་པའི་བཞད་གད་ཀྱི་གཏམ་དུ་སྣང་བས། གཞན་གྱིས་དབང་མེད་དུ་ནན་གྱིས་བཀོལ་བ་ཡིན་ན་མ་གཏོགས། ཐ་སྙད་རིག་གནས་པའི་ཐུགས་ཁུར་དེ་བཞག་ནས་མཚན་ཉིད་པ་རྐྱང་པ་མཛད་ན་ལེགས་པ་འདུག་གོ །བཞི་པ་ནི། ཤེས་བྱ་ཆོས་ཅན། ས་སོགས་དང་སའི་ཁ་དོག་སོགས་ཀྱི་དབྱེ་བ་ཡོད་དེ། འཇིག་རྟེན་གྱི་ཐ་སྙད་དུ་འབྱུང་བཞིའི་ཁ་དོག་དང་དབྱིབས་ལ་འབྱུང་བཞིར་བརྗོད་པའི་ཕྱིར། དེར་ཐལ། ས་སེར་པོ་གྲུ་བཞི། ཆུ་དཀར་པོ་ཟླུམ་པོ། མེ་དམར་པོ་གྲུ་གསུམ། གཞན་ཡང་རླུང་གི་ཚོགས་ཇི་སྙེད་པ་ནི་རླུང་གི་ཁམས་ཉིད་ཡིན་པས། སྔ་མ་དེ་དང་འདྲ་བར་རླུང་སྔོན་པོ་དང་། ཟླུམ་པོ་ཞེས་བརྗོད་པའི་ཕྱིར། གཉིས་པ་དེ་ལས་ཕྱུང་སྟེ་ཁམས་དང་སྐྱེ་མཆེད་འཇོག་པ་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། ཤེས་བྱ་ཆོས་ཅན། དབང་དོན་བཅུ་པོ་དེ་དག་ཁོ་ན་ལ་སྐྱེ་མཆེད་དུ་འཇོག་ཚུལ་ཡོད་དེ། གཟུགས་ཅན་གྱི་སྐྱེ་མཆེད་བཅུར་འཇོག་པའི་ཕྱིར། ཡང་དེ་ཆོས་ཅན། ཁམས་སུ་འཇོག་པའི་ཚུལ་ཡོད་དེ། གཟུགས་ཅན་གྱི་ཁམས་བཅུར་འདོད་པའི་ཕྱིར། གཉིས་པ་མཐའ་དཔྱད་པ་ལ། ཁ་ཅིག །རང་རྒྱུད་ལྡན་གྱི་གང་ཟག་ཕོར་མཚོན་པར་བྱེད་པ་དེ་ཕོ་དབང་གི་མཚན་ཉིད། རང་རྒྱུད་ལྡན་གྱི་གང་ཟག་མོར་མཚོན་པར་བྱེད་པ་དེ་མོ་དབང་གི་མཚན་ཉིད་ཟེར་ན། མཚན་གཉིས་པ་བའི་རྒྱུད་ཀྱི་ཕོ་དབང་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། གང་ཟག་དེའི་རྒྱུད་ཀྱི་མོ་དབང་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། གང་ཟག་དེ་ཕོ་མོ་གཉིས་ཀ་ཡིན་པར་ཐལ་ལོ། ཁ་ཅིག །ཚོར་བ་སྡུག་བསྔལ་གྱི་དབང་པོ་ཡིན་ན། ཚོར་བ་ལ་
ལྔར་ཕྱེ་བའི་ཚོར་བ་སྡུག་བསྔལ་གྱི་དབང་པོ་ཡིན་པས་ཁྱབ་ཟེར་ན། ཚོར་བ་ཡིད་མི་བདེ་བའི་དབང་པོ་ཆོས་ཅན། དེར་ཐལ། དེའི་ཕྱིར། དེར་ཐལ། ཚོར་བ་ལ་བདེ་སྡུག་བཏང་སྙོམས་གསུམ་དུ་ཕྱེ་བའི་ཚོར་བ་སྡུག་བསྔལ་གྱི་དབང་པོ་ཡིན་པའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། འདོད་ན། ལུས་ཚོར་ཡིན་པར་ཐལ། འདོད་པའི་ཕྱིར། འདོད་ན། ཕྱི་ཚོར་ཡིན་པར་ཐལ་ལོ། ཁ་ཅིག །ཚོར་བ་བདེ་བའི་དབང་པོ་ཡིན་ན། ཚོར་བ་ལ་ལྔར་ཕྱེ་བའི་ཚོར་བ་བདེ་བའི་དབང་པོ་ཡིན་པས་ཁྱབ་ཟེར་ན། ཚོར་བ་བདེ་བའི་དབང་པོ་ཆོས་ཅན། དེར་ཐལ། དེའི་ཕྱིར། དེར་ཐལ། ཚོར་བ་ལ་གསུམ་དུ་ཕྱེ་བའི་ཚོར་བ་བདེ་བའི་དབང་པོ་ཡིན་པའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། ཁ་ཅིག །དད་པའི་དབང་པོ་ཡིན་ན། བྱང་ཕྱོགས་སོ་བདུན་གྱི་ནང་ཚན་དུ་གྱུར་པའི་དད་པའི་དབང་པོ་ཡིན་པས་ཁྱབ་ཟེར་ན། དེ་ཡིན་ན་ལམ་ཡིན་པས་ཁྱབ་པར་ཐལ། དམ་བཅའ་འཐད་པ་གང་ཞིག །བྱང་ཕྱོགས་སོ་བདུན་གྱི་དད་པར་ལམ་གྱིས་ཁྱབ་པའི་ཕྱིར། འདོད་ན། ལམ་མ་ཞུགས་ཀྱི་གང་ཟག་གི་རྒྱུད་ཀྱི་དད་པའི་དབང་པོ་ཆོས་ཅན། དེར་ཐལ། དེའི་ཕྱིར། འདོད་མི་ནུས།