དབུ་མ་ཐལ་རང་གི་ཁྱད་པར་ལ་བཤད་པ།
འཇམ་མགོན་མི་ཕམ་པའི་ལུགས་ཀྱི་ཐལ་རང་གི་ཁྱད་པར་ནི། རྣམ་གྲངས་པའི་དོན་དམ་གཙོ་ཆེར་གཏན་ལ་ཕབ་ནས་རྣམ་གྲངས་མ་ཡིན་པའི་དོན་དམ་ལ་སྦྱོར་བར་བྱེད་པ་རང་རྒྱུད་པའི་ལུགས་དང༌། ཐོག་མ་ཉིད་ནས་རྣམ་གྲངས་མ་ཡིན་པ་རྩལ་དུ་བཏོན་ནས་ཁས་ལེན་ཀུན་བྲལ་གྱི་རང་བཞིན་ཞལ་གྱིས་བཞེས་པ་དབུ་མ་ཐལ་འགྱུར་བ་ཡིན་ཞེས་གསུངས་པར་བསམ་ན། རྒྱལ་སྲས་ཞི་བ་ལྷ་ནི། ཐལ་འགྱུར་པའི་སློབ་དཔོན་ཡིན་པས་ན་དོན་དམ་ལ་རྣམ་གྲངས་ཡིན་མིན་གཉིས་སུ་དབྱེ་བར་མི་མཛད། འོ་ན། སྤྱོད་འཇུག་ལས། སྟོང་ཉིད་བག་ཆགས་གོམས་པས་ན། །སོགས་ནས། དེ་ཡང་ཕྱི་ནས་སྤང་བར་འགྱུར། །ཞེས་པའི་སྐབས་ན་རྣམ་གྲངས་པའི་དོན་དམ་ཞིག་གསུངས་ཡོད་ན། ཐལ་འགྱུར་བའི་ལུགས་ལའང་རྣམ་གྲངས་པའི་དོན་དམ་ཁས་ལེན་ནོ། །ཞེས་འགའ་ཞིག་གི་འདོད་ལ། ཡང་འགའ་ཞིག་གིས་ཐལ་འགྱུར་བས་སྒོམ་རིམ་ཞིག་ཡིན་ཞེས་བཞེད་པ་སོགས་ཡོད་མོད། འདིར་མཁས་མཆོག་ངག་དབང་བློ་གྲོས་རྒྱ་མཚོའི་ཞལ་རྒྱུན་ལྟར་ན། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་པ་ལ་བསམ་ན། དོན་དམ་བདེན་པ་ཡིན་ན་བློ་ཡི་སྤྱོད་ཡུལ་མ་ཡིན་པ་འཕགས་པའི་མཉམ་བཞག་ཡེ་ཤེས་ཀྱི་གཟིགས་ངོར་ཡིན་པ་རྒྱལ་སྲས་ཆེན་པོ་ཞི་བ་ལྷའི་གསུང་དེ་དང་། ཟླ་བའི་འཇུག་པ་ལས། ཡང་དག་མཐོང་ཡུལ་གང་དེ་དེ་ཉིད་དེ། །ཞེས་པས། ཡང་དག་འཕགས་པའི་མཉམ་བཞག་གི་ཡེ་ཤེས་ཀྱི་ཡུལ་དུ་གྱུར་པ་དོན་དམ་བདེན་པ་ཡིན་པ་གང་ཞིག་དེའི་ཡུལ་ཡིན་ན་རྣམ་གྲངས་མ་ཡིན་པའི་སྟོང་ཉིད་སྤྲོས་པ་ཐམས་ཅད་དང་བྲལ་བ་ཡིན་པས་ཁྱབ་པ་ན་དེ་གཉིས་དགོངས་པ་གཅིག་ཡིན། དེས་ན་བདེན་གྲུབ་བཀག་ཙམ་གྱི་རང་བཞིན་མེད་པ་དེ་རང་རྒྱུད་པ་རྣམས་ཀྱིས་རྣམ་གྲངས་པའི་དོན་དམ་ཞེས་དོན་དམ་གྱི་ཁོངས་སུ་བགྲངས་ཀྱང༌། འདིར་ཐལ་འགྱུར་བའི་ལུགས་ལ་དོན་དམ་རྟོགས་བྱེད་ཀྱི་ཐབས་སུ་གྱུར་པ་ཙམ་ཡིན་པ་དེས་ན་ཐ་སྙད་བདེན་པའི་ཁོངས་སུ་བསྡུ་བར་བྱེད་པ་ཡིན་ཏེ། ཟླ་བས། ཐ་སྙད་བདེན་པ་ཐབས་སུ་གྱུར་པ་དང༌། །དོན་དམ་བདེན་པ་ཐབས་བྱུང་གྱུར་པ་སྟེ། །ཞེས་གསུངས་པ་ལྟར་རོ། །རྒྱུ་མཚན་དེས་ན་རྒྱལ་སྲས་ཆེན་པོས། སྟོང་ཉིད་བག་ཆགས་གོམས་པས་ནི། །དངོས་པོའི་བག་ཆགས་སྤོང་འགྱུར་ཅིང་། །ཅི་ཡང་མེད་ཅེས་གོམས་པས་ནི། །དེ་ཡང་ཕྱི་ནས་སྤོང་བར་འགྱུར། །ཞེས་གསུངས་པ་འདི་ཡང་བདེན་པར་ཡོད་ཞེན་གྱི་རྟོག་པའི་གཉེན་པོར་དངོས་སྣང་ཀུན་བདེན་གྲུབ་བཅད་པའི་བདེན་མེད་སྟོང་ཉིད་དུ་གོམས་པར་བྱེད་པ་ཐ་སྙད་བདེན་པ་ཡིན་ཡང༌། དེ་གོམས་པས་དངོས་པོ་ལ་བདེན་ཞེན་ཨ་འཐས་ཀྱི་བག་ཆགས་དེ་སྤོང་བས་ན། དེ་ལ་གོམས་པས་སྣང་བ་ཀུན་བདེན་མེད་སྟོང་ཉིད་དུ་ངེས་རྗེས། སྟོང་དང་མི་སྟོང་ཅི་ཡང་དམིགས་སུ་མེད་པར་མཐའ་བྲལ་མཉམ་པ་ཆེན་པོར་ཡང་ཡང་གོམས་པས་བློ་ཡི་སྤྱོད་ཡུལ་མཐའ་དག་ལས་འདས་པའི་དོན་དམ་བདེན་པ་ཐལ་འགྱུར་རང་ལུགས་ལ། སྔར་མཚན་ཉིད་གཏན་ལ་དབབ་ཚེ། དོན་དམ་བློ་ཡི་སྤྱོད་ཡུལ་མིན། །ཞེས་གསུངས་པའི་དོན་ལ་རེག་པར་གྱུར་པ་ཡིན་ནོ། །དེ་ལྟར་ན་བདེན་གྲུབ་བཅད་ཙམ་དེ་གཞུང་འདིར་དོན་དམ་རྟོགས་བྱེད་ཀྱི་ཐབས་ཙམ་ལས་དོན་དམ་བདེན་པའི་ཁོངས་སུ་གཏོགས་པ་ཞིག་དངོས་ཤུགས་གང་གིས་ཀྱང་མི་སྟོན་ནོ། །ཞེས་པ་འདི་ཡང་ཀུན་གཟིགས་མཁན་ཆེན་བླ་མའི་གསུང་ཟིན་ལགས།