དང་པོ། འཇུག་པ།
༄༅། །རབ་ཏུ་སྤྲོས་པ་མེད་པའི་དབང་ཆོག་བྱིན་རླབས་ཆུ་བོ་ཞེས་བྱ་བ་བཞུགས་སོ། །
༄༅། དཔལ་ལྡན་ཚོགས་གཉིས་རྫོགས་པའི་གཙོ། །ཀུན་བཟང་ཆོས་རྗེ་བླ་མ་ལ། །དད་བརྒྱའི་སྤྱི་བོས་ཕྱག་འཚལ་ཏེ། །རབ་ཏུ་སྤྲོས་མེད་དབང་ཆོག་བྲི། །
དེ་ལ་ཤིན་ཏུ་དབེན་པའི་གནས་བླ་གབ་མེད་པར། ལྔ་ཚན་ལྔའི་མཎྜལ་ཚོགས་དང་གཏོར་མས་བརྒྱན་པ་སྟ་གོན་བྱས་ལ། ཉི་མ་རི་བོའི་རྩེར་ཤར་བའི་དུས་སུ་ཆོ་ག་དངོས་བྱ་བའི་རིམ་པ་ལ་བཞི་སྟེ། འཇུག་པ། དབང་། ངོ་སྤྲོད། གཟེངས་བསྟོད་པའོ། །དང་པོ་ནི། བླ་མས་བུ་ཁྱོད་སུ་ཡིན། ཞེས་ལན་གསུམ་དྲིས་པའི་ལན་དུ། སློབ་མས། སྐལ་ལྡན་སེམས་ཀྱི་བུ་གཅིག་པོ་ལགས། ཞེས་པ་གསུམ་བརྗོད་པ་དང་། བླ་མས། དེ་ལྟར་ཡིན་ཕན་ཆད་སེམས་ཉིད་གདོད་མ་ནས་སྐྱེ་མ་མྱོང་བའི་དཀྱིལ་འཁོར་འདི་ཉིད་དུ་ཞུགས་ཤིག་ཅེས་བརྗོད་པ་དང་། སློབ་མས་ཐལ་མོ་སྦྱར་ཏེ། ཀྱེ་བླ་མ་རྡོ་རྗེ་འཛིན་པ་ཉིད། །བདག་ལ་རབ་ཏུ་དགོངས་སུ་གསོལ། །བདག་ནི་ཁམས་གསུམ་འཁོར་གནས་སུ། །ཡུན་རིང་གནས་པ་དྲན་ཉམས་ཏེ། །འཁོར་བ་ཉིད་ལས་བརྒལ་དོན་དུ། །བླ་མ་ལ་ཡང་ཞུ་བར་བགྱིད། །བསྐལ་པ་བརྒྱ་ཕྲག་དུ་མར་ནི། །བདག་ནི་ཡང་ནས་ཡང་འཁོར་བས། །རྡོ་རྗེ་སེམས་དཔའི་ཡེ་ཤེས་རང་བྱུང་ཉིད། །སྨད་དང་རྩ་བ་བཅས་པའི་སངས་རྒྱས་སེམས་ལས་བྱུང་། །སེམས་ཀྱི་དམ་པ་བདག་ལ་བསྟན་དུ་གསོལ། །ཞེས་ལན་གསུམ་བརྗོད་ནས། བླ་མའི་ཐུགས་ཀར་ཅེ་རེར་བལྟར་བཅུག་པའི་མཚམས་སུ། བླ་མས། སེམས་གང་ཡིན་ཞེས་དྲག་ཤུལ་ཅན་གསུམ་དྲིས་པས། བརྗོད་མ་ཤེས་པའི་རིག་པ་སྟོང་པ་ནི། ཡེ་ཤེས་དབབ་པའོ། །