ལེའུ་དགུ་པའི་རྣམ་པར་བཤད་པ།

༈ དོན་གསུམ་པ་དེ་ཉིད་གསལ་བར་བྱེད་པ་གཟུགས་བརྙན་གྱི་དཀྱིལ་འཁོར་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་གསུམ་སྟེ། དཀྱིལ་འཁོར་བྲི་ཞིང་ཕན་ཡོན་བསྟན་པ། ལྷ་བསྐྱེད་ཅིང་ཇི་ལྟར་མཆོད་པ། དབང་བསྐུར་ཞིང་འབྲས་བུ་བསྟན་པའོ། །དང་པོ་ལ་བཞི་སྟེ། སའི་ཆོ་ག །ཐིག་ཚོན་གྱི་ཆོ་ག །བྲི་ཞིང་རྒྱན་དགྲམ་པ། མཆོད་པ་བཤམ་ཞིང་ཕན་ཡོན་བསྟན་པའོ། །

དང་པོ་ལ་བདུན་ལས། ས་གཞི་བརྟགས་པ་ནི་མཉམ་ཞིང་ཡིད་དུ་འོང་བ་དཀྱིལ་འཁོར་གྱི་གཞིར་འོས་པ་སྟེ། ལས་རིམ་ལས། ཟུར་བརྒྱད་ལ་སོགས་རྩེ་མང་དང་། །ཆུ་བོ་བཞིན་དུ་མ་བོ་ཡང་། །མཉམ་ཞིང་ཡིད་འོང་འོ་ཁའི་ཆུ། །ཉི་མ་ཤིན་ཏུ་གནས་པ་ནི། །ནམ་མཁའི་མཚན་ཉིད་ཤེས་པར་བྱ། །མཐོ་དང་འདུད་པ་ནུབ་བྱང་ཡིན། །ཤར་ལྷོ་གཞོལ་ཞིང་འཇམ་པ་ལ། །ཐོ་སྒྲོ་གྲོག་མདོ་ཆུ་སྣ་སོགས། །དལ་དབང་དགྲ་ཡི་མཚམས་བརྟག་བྱ། །ལྷུན་སྟུག་རི་བོ་ནགས་ཚལ་ལྡན། །རབ་ཏུ་མཉམ་ཞིང་སྣུམ་བག་ཅན། །ཆུ་བོ་དབང་གི་ཕྱོགས་ཡིན་ཏེ། །ཅུང་ཟད་ཀྱིས་ནི་རླུང་ཉུང་ཞིང་། །མེ་ཏོག་ཤིང་ཚལ་བྱ་སྐད་བརྟག །ལོ་རྒྱུས་ཤེས་པའང་མཆོག་ཏུ་གསུངས། །བདག་ཉིད་བརྟགས་ཤིང་ཉམས་དགའ་དང་། །བསམ་གཏན་དགྲ་ལས་རིང་གྱུར་པ། །རང་ཁྱིམ་ལ་སོགས་དེ་བཞིན་ཏེ། །ནན་ཏན་ནུས་མཐུ་ལྡན་ཕྱིར་ཡིན། །ཞེས་པའི་ས་ཕྱོགས་སུ། ཁྲུ་གང་ཁྲི་བཞིར་བརྐོས་པ་ན། །གྲམ་པ་ཐལ་བ་ཤིང་སོལ་དང་། །གྱོ་མོ་རུས་པ་ལ་སོགས་པ། །ཞེས་པའི་མ་དག་པ་བསལ་ཏེ་ཆུས་བཀང་ནས་གོམ་པ་བརྒྱ་ཕྱིར་སོང་ཏེ་ཆུ་དེ་ཉིད་ལ་བརྟག་པ་ནི། ཆུས་བཀང་གོམ་པ་བརྒྱ་བལྟ་བྱ། །ཞེས་པས། བྲི་བ་མེད་ན་རབ། ཕྱེད་ན་འབྲིང་། བསྐམས་ན་ངན་པའོ། །

གཉིས་པ་ས་བསླང་བ་ནི་མི་དང་མི་མ་ཡིན་ལ་དཀྱིལ་འཁོར་གྱི་(༡༥༧)ཕྱིར་སློང་བ་སྟེ། མངོན་དང་མི་མངོན་བདག་པོ་ལ། །རྩོད་པ་ཉེ་བར་ཞི་བྱའི་ཕྱིར། །སེར་སྣ་སྤངས་པའི་སེམས་ཀྱིས་ནི། །རིན་དང་བདེན་པ་བསྒོ་ལ་བསླང་། །ཞེས་སོ། །དེ་ནས་འབྲུ་དང་རིན་པོ་ཆེའི་ས་གཏེར་སྦས་ལ་ས་གཞི་མཉམ་ཏེ་དྲིའི་ཐིག་ལེ་བྱས་ལ། སའི་ལྷ་མོའི་ཆོ་ག་བྱའོ། །དེའང་སྔོན་སངས་རྒྱས་རྡོ་རྗེ་གདན་ལ་འཚང་རྒྱ་བའི་ཚེ་ས་བསླངས་ཏེ་བདུད་ལས་རྒྱལ་བ་བཞིན་དུ་རྣལ་འབྱོར་པ་ཡང་ནག་པོའི་ཕྱོགས་ལས་རྒྱལ་བའི་དགོས་པ་ཡོད་དོ། །དེའང་ལྷ་མོ་སེར་མོ་བུམ་པ་འཛིན་པ་ཕག་གི་སྟེང་ན་ཆིབས་པ་བསྐྱེད་ལ་སྤྱན་དྲངས་ཏེ། མཆོད་བསྟོད་བྱས་ལ་བདག་རྡོ་རྗེ་ཆེ་གེ་མོ་སའི་ཕྱོགས་འདིར་དཀྱིལ་འཁོར་བཞེངས་པས་གནང་བར་མཛོད་ཅིག་ཅེས་སོ། །

གསུམ་པ་དབང་དུ་བྱ་བ་ནི་ཕུར་པ་དམར་པོ་ཧེ་རུ་ཀར་གསལ་བ་བཏབ་པས་དེའི་འོད་ཟེར་གྱིས་ས་གཞི་ཁེངས་པར་བསྒོམ་པ་ནི་བགེགས་ཞི་བའི་དགོས་པ་ཡོད་དོ། །

བཞི་པ་སྦྱང་བ་ནི་ཐོག་མར་ས་བདག་ལྟོ་འཕྱེའི་ཕྱོགས་ནས་བསླང་བར་བྱ་སྟེ། བམ་བརྒྱད་ཀྱི་འགྲེལ་པ་ལས། ལྟོ་འཕྱེ་གནས་པའི་མཚན་ཉིད་ནི། །སྟོན་ཟླ་གསུམ་གྱི་ཟླ་བ་ལ། །ཉི་མ་འགྲོ་བའི་རིམ་པ་ཡིས། །མགོ་ཤར་ཁ་ལྷོ་གཡོན་གྱིས་ཉལ། །དགུན་ཟླ་གསུམ་གྱི་ཟླ་བ་ལ། །ནུབ་ཏུ་ཁ་བལྟས་མགོ་བོ་ལྷོ། །དཔྱིད་ཟླ་གསུམ་གྱི་ཟླ་བ་ལ། །བྱང་དུ་ཁ་བལྟས་ནུབ་ཏུ་མགོ། །དབྱར་ཟླ་གསུམ་གྱི་ཟླ་བ་ལ། །ཤར་དུ་ཁ་བལྟས་བྱང་དུ་མགོ། །ས་བདག་ལྟོ་འཕྱེ་དེ་ལྟར་གནས། །སྐྱེས་བུ་ཆེན་པོ་ལྟོ་འཕྱེ་བརྐོ། །ཞེས་པ་ལྟར་བསླང་ངོ་། །དེའང་མགོ་ལ་ཕོག་ན་སློབ་དཔོན་འཆི་ཞིང་། མཇུག་མ་ལ་ཕོག་ན་སློབ་མ་འཆི་བས་ལྟོ་བ་ནས་བརྐོས་ཏེ་བྱའོ། །དེ་ནས་སྟེགས་བུ་ཇི་ལྟར་རིགས་པར་བྱ་སྟེ། བྱང་ཤར་གཞོལ་ཅིང་གཞན་གཉིས་མཉམ་དབུས་ཅུང་ཟད་མཐོ་བ་བྱས་ལ། བ་བྱུང་ལྔ་དང་འབྲུ་ལྔ་ལ་སོགས་པའི་བྱུག་པ་ཡང་། རྔམ་གློག་ལས། ས་ཞག་སྤོས་ཆེན་རྣམ་ལྔ་ཡི། །ཁུ་བ་བསྲེས་ནས་ཀུན་ཏུ་ནི། །གྲུ་བཞིའི་དབུས་སུ་ལེགས་བྱ་སྟེ། །བ་ཀོ་ཙམ་དུ་སྐྱང་ནུལ་བྱ། །ཞེས་སོ། །དེ་ནས་མེས་སྦྱང་བ་ཡང་། ཀུན་ནས་མཚན་མ་ངན་གྱུར་ན། །གཞན་དུ་བགྲོད་དམ་ཞི་བ་ཡི། །མེ་ཡིས་རབ་ཏུ་དག་པར་བྱ། །ཞེས་སོ། །དེ་ནས་བདག་ཉིད་ཁྲོ་བོར་གསལ་བའི་ལག་མཐིལ་ལས་འོད་ཟེར་བྱུང་བས་ས་ཕྱོགས་རྡོ་རྗེ་རྩེ་ལྔ་པའི་རང་བཞིན་དང་མ་དག་པ་སྦྱངས་ཤིང་སྟོང་པ་ཉིད་དུའང་མོས་པར་བྱའོ། །

ལྔ་པ་བྱིན་གྱིས་བརླབ་པ་ནི་སློབ་དཔོན་གཙོ་བོར་བསྐྱེད་དེ་ས་ཕྱོགས་དེ་ཉིད་ལྷའི་གཞལ་ཡས་ཁང་དུ་གསལ་བར་སངས་རྒྱས་དང་བྱང་ཆུབ་སེམས་དཔའ་མང་པོ་དམིགས་ཏེ། བདག་ཉིད་ཆེན་པོ་ང་ཉིད་ཀྱི། །ཐམས་ཅད་བཀའ་ལས་མ་འདའ་ཞིག །ཅེས་པ་དང་སུམྦྷ་ནི་བརྗོད་ཅིང་རྡོ་(༡༥༨)རྗེའི་འགྲོས་ཀྱིས་བསྐོར་རོ། །

དྲུག་པ་བསྲུང་བ་ནི། རང་གི་སྙིང་ག་ནས་ཁྲོ་བཅུ་བྱུང་བས་ཕྱོགས་དེར་བསྲུངས་ཏེ་བསྐལ་པའི་མེ་དཔུང་འབར་བར་བསྒོམ་མོ། །

བདུན་པ་གཟུང་བ་ནི། ཐིག་བཏབ་བམ་ཐིག་ལེ་བཀོད་པ་ལྷར་བསྐྱེད་དེ་མཆོད་བསྟོད་ཅུང་ཟད་ཀྱིས་མཆོད་ནས་ཐིམ་པས་ལྷའི་གཞལ་ཡས་ཁང་གི་གཞིར་བསམ་མོ། །འདི་ཙམ་གྱིས་སའི་ཆོ་ག་ཚང་བའོ། །

གཉིས་པ་ཐུགས་ཚོན་བྱིན་གྱིས་རློབ་པ་ནི། ཁ་དོག་ལྔའམ་ཉི་ཤུ་རྩ་ལྔའི་སྣལ་མ་བུ་མོ་ལོ་བཅུ་དྲུག་ལོན་པས་བཀལ་བ་སྟེ། རྡོ་རྗེ་ལས་རིམ་ལས། པདྨའི་རྒྱུ་ལས་ཁ་དོག་བསྒྱུར། །བཅུ་དྲུག་ཕྱག་རྒྱས་ལེགས་བཀལ་ཏེ། །སྣལ་མ་གཅིག་ཀྱང་ལྔ་ལྔར་ལྡན། །ཡེ་ཤེས་རང་བཞིན་བརྟན་པར་བྱ། །ཁ་དོག་གསུམ་ལྡན་སྣལ་མ་དགུ། །རས་བལ་ལས་བཏགས་སྐུ་གསུང་ཐུགས། །གཙང་མའི་སྣོད་དུ་ལེགས་བཀོལ་ཏེ། །ཞེས་སོ། །དེ་ཉིད་དང་ཚོན་རྣམས་ཡེ་ཤེས་ལྔའི་རང་བཞིན་དུ་བྱིན་གྱིས་བརླབས་ཏེ། དཀྱིལ་འཁོར་གྱི་ཉིས་ལྡབ་ཙམ་དུ་བྱས་པ་མཚན་ལྡན་མས་བཟུང་སྟེ་རྡོ་རྗེའི་གནམ་ཐིག་ཐོག་མར་གདབ་པ་ནི་རྔམ་གློག་ལས། ཐིག་གཡོག་ལས་ཀྱི་སེམས་མ་སྟེ། །མཚན་ལྡན་བྱིན་གྱིས་བརླབས་ནས་ནི། །ཕྱག་རྒྱ་གར་དང་བཅས་པ་ཡིས། །རང་བཞིན་དཀྱིལ་འཁོར་གནམ་ཐིག་གདབ། །དེ་ནས་ས་ཐིག་གདབ་པ་ཡང་། །འདུལ་བའི་དབང་གིས་བྱེ་བྲག་ལས། །མཎྜལ་ཚད་ནི་ངེས་པ་མེད། །སོར་བཞི་པ་ནས་བརྩམ་ནས་ནི། །ཇི་སྲིད་དཔག་ཚད་ཐུག་པར་རོ། །ཞེས་པ་སྟེ། སོར་བཞི་པ་ནས་ཚད་མ་ངེས་པའི་བར་དུ་གསུངས་སོ། །བྱིན་གྱིས་བརླབ་པ་ཡང་། ཐིག་ཚོན་ལྷར་གསལ་བ་ལ་མཆོད་བསྟོད་བྱས་ཏེ་ཡེ་ཤེས་སུ་གྱུར་པས་བྱ་བ་སྟེ། ལས་རིམ་ལས། སྣོད་རིམ་མ་འདྲེས་དག་བྱས་ལ། །ཧཱུྃ་སོགས་ཡིག་འབྲུ་གཅིག་ཀྱང་ལྔ། །ཁ་དོག་རྗེས་སུ་མཐུན་བྱས་ཏེ། །ཡོངས་གྱུར་ཉི་ཤུ་རྩ་ལྔའི་ལྷ། །ཐབས་དང་ཤེས་རབ་ལྡན་པར་བསྒོམས། །ཕྱོགས་བཅུ་དུས་བཞིའི་སྐུ་གསུང་ཐུགས། །ཡོན་ཏན་འཕྲིན་ལས་ཡེ་ཤེས་ལྔ། །བསྟིམས་པས་ཡོངས་གྱུར་དངོས་པོ་ལྔ། །སྐུ་གསུང་ཡོན་ཏན་འཕྲིན་ལས་ཐུགས། །ཡེ་ཤེས་རྒྱུ་ལས་གྲུབ་པ་ཡི། །དཀྱིལ་འཁོར་རྗེས་སུ་བརྟག་པར་བྱ། །ཞེས་སོ། །དེའང་ས་ཚོན་ལ་ཡིག་འབྲུ་བྲིས་པའང་སྤུངས་ཤིང་མི་མངོན་པར་བྱ་སྟེ། སྤུངས་ཤིང་བསྣུན་པ་ལྟར་བྱས་ལ། །རྡུལ་ཚོན་སྦྱོང་བའི་སྔགས་ཕྱག་རྒྱ། །ཞེས་སོ། །དེ་ལྟར་རྡུལ་ཚོན་གྱི་ཁ་དོག་སོ་སོར་ཕྱེ་བའི་དོན་ནི། རྒྱུས་པའི་རྒྱུད་ལས། སེམས་ཅན་མ་ལུས་ཐམས་ཅད་ལ། །ཡེ་ཤེས་ལྔ་ཡིས་ཀུན་ཁྱབ་ཅིང་། །རང་གི་རྣམ་རྟོག་བསྒྲིབས་བྱས་ནས། །ཡེ་ཤེས་ལྔ་ཡི་དོན་མ་མཐོང་། །དེ་ལྟར་རྨོངས་པ་ཐམས་ཅད་ལ། །ཡེ་ཤེས་མཚན་ཉིད་བསྟན་པའི་ཕྱིར། །(༡༥༩)དཀར་དང་དམར་དང་སེར་བ་དང་། །ལྗང་གུ་ལ་སོགས་ནག་པོ་བསྟན། །ཞེས་སོ། །ཚོན་དེ་དག་གི་རྒྱུ་ཡང་རབ་རིན་པོ་ཆེ་ལ་བྱ་བར་ལས་རིམ་ལས། རིན་ཅེན་ལྔ་ལས་བྱས་པའི་ཚོན། །ཨིནྡྲ་ནཱི་ལ་ཟླ་འོད་དང་། །པུ་ཤ་རཱ་ག་བྱུ་རུ་ཟངས། །མརྒད་ཏ་ལས་བྱས་པ་དགྱེ། །དེ་བཞིན་འབྱོར་པས་གཞན་དག་བསྡུ། །མཚམས་སེམས་ཁྲོ་བོ་ལ་སོགས་ཕྱིར། །ཁ་དོག་ཉི་ཤུ་རྩ་ལྔར་གསུངས། །ཞེས་སོ། །འབྲིང་དང་ཐ་མས་ཚོན་རྩི་ཅི་འབྱོར་པའོ། །

གསུམ་པ་བྲི་ཤིང་རྒྱན་དགྲམ་པ་ལ་གཉིས་ལས། དང་པོ་ཐིག་གིས་བྲི་བ་ནི་ཡེ་ཤེས་ཀྱི་གནམ་ཐིག་བཏེག་པའི་འོག་ཏུ་འཛུལ་ནས་གདབ་སྟེ། དེ་ནས་བྲི་བའི་ཆོ་ག་ནི། །ཆས་ལྡན་དབང་ཕྱུག་ཐིག་བཏེག་ལ། །དང་པོ་དབང་ལྡན་ཕྱོགས་ནས་བསྐོར། །དེ་ནས་ཞལ་དབང་ཐོབ་པ་རྣམས། །འབྲུ་ལྡན་རྡོ་རྗེ་ཐལ་ཁུ་ཚུར། །ཕྱག་རྒྱ་ཏིང་འཛིན་ལྡན་པར་བྲི། །ཞེས་པས་ཚངས་ཟུར་ལ་སོགས་མཐོང་བ་བརྒྱུད་པ་ལྟར་སྒོ་གཉིས་བརྩེགས་སུ་གདབ་བོ། །དེའང་མན་ངག་གིས་ཅུང་ཟད་ཕྱེ་ན། ཆ་ཆེན་བཅུ་དྲུག་ནང་མ་གསུམ། །ཕྱེད་དུ་བགོས་ཏེ་དྲུག་ཏུ་བྱ། །དང་པོ་ཕྱེད་གདབ་ཕྱི་མ་གདབ། །གཉིས་པ་ཆ་བཞིར་བསྒོ་བར་བྱ། །གསུམ་པ་བཞི་པ་མི་གདབ་གཞག །ལྔ་པ་དབུས་དོར་མཐའ་གཉིས་གདབ། །དྲུག་པ་ཕྱེད་གདབ་ཕྱི་མ་གདབ། །དེ་ནི་ནང་གི་སྒོ་ཡིན་ནོ། །ཆ་ཆེན་བཞི་པ་ཕྱི་ཡི་ཁྱམས། །ལྔ་པ་དབུས་དོར་མཐའ་གཉིས་གདབ། །དྲུག་པ་ཕྱེད་གདབ་ཕྱི་མ་གདབ། །བདུན་པ་ཆ་བཞིར་བགོ་བར་བྱ། །བརྒྱད་པ་དབུས་དོར་མཐའ་གཉིས་གདབ། །ཅེས་པ་ལྟར་རོ། །དེ་ནས་འགྱིང་ཕུར་གདབ་པའི་ནང་དུ་ཡེ་ཤེས་ལྔའི་ཚོན་གྱིས་དགང་ཞིང་རིམ་གྱིས་དགྱེ་བ་ནི། རྣམ་སྣང་སྒྱུ་འཕྲུལ་དྲྭ་བ་ལས། ཚོན་ནི་ནང་ནས་དགྱེ་བར་བྱ། །ཕྱི་རོལ་ནས་ནི་ཚོན་མི་དགྱེ། །དང་པོ་བྱང་ཤར་ནས་བརྩམས་ཏེ། །ཐོག་མར་སློབ་དཔོན་ཉིད་ཀྱིས་དགྱེ། །དེ་ནས་སློབ་མས་བྱ་བར་བཤད། །ཅེས་པ་དང་། རྣམ་སྣང་མངོན་བྱང་ལས། ཚོན་ནི་ནང་ནས་དགྱེ་བར་བྱ། །ཕྱི་རོལ་ནས་ནི་ཚོན་མི་དགྱེ། །དཀར་པོ་ཐོག་མར་གཏང་བར་བྱ། །དེ་ཡི་འོག་ཏུ་དམར་པོ་སྟེ། །དེ་ནས་སེར་པོ་གཏང་བར་བྱ། །དེ་ཡི་འོག་ཏུ་ལྗང་ཁུ་གཏང་། །ཀུན་གྱི་ནང་རོལ་ནག་པོ་སྟེ། །ཚོན་གྱི་ཆོ་ག་དེ་ལྟར་བཤད། །ཅེས་པ་ལྟར་རོ། །དེའང་རྒྱས་པ་ལ་སྒོ་ཉིས་བརྩེགས་ཀྱི་དབུས་ཀྱི་ལྟེ་བ་ལ་འཁོར་ལོ་རྩིབས་བཞིའི་དབུས་དང་ལྔར་འཁོར་ལོ་རྩིབས་བཞི་པ་མུ་ཁྱུད་དང་བཅས་པ་སྟེ་ལྷའི་ཁ་དོག་དང་མཐུན་པའི་རིམ་པའོ། །དེ་ནས་གྲུ་ཆད་ནང་མ་དང་ཕྱི་མ་བཞི་ནི་ཕྱོགས་ཚོན་ནོ། །དེ་ནས་རྩིག་པ་ལྔ་ནི་ནང་ནས་རིམ་པ་བཞིན། མཐིང་ག །ལྗང་གུ། དམར་པོ། སེར་པོ། དཀར་པོའོ། །སྤྱིར་ན་རྩིག་རིམ་གཉིས་ཏེ། ཡེ་ཤེས་དང་། སྐུའི་རིམ་པའོ། །འདིར་ནང་(༡༦༠)མ་ཡེ་ཤེས་ཀྱི་རིམ་པ་ཡིན་ལ། ཕྱི་མ་སྐུའི་རིམ་པ་སྟེ། ནང་ནས་མཐིང་ག །དཀར་པོ། སེར་པོ། དམར་པོ། ལྗང་གུའོ། །ཁྱམས་ལྗང་གུ་དང་། རྟ་བབས་མཛེས་ཚོན་ལ། གཞན་རྣམས་ཕྱོགས་དང་མཛེས་ཚོན་ཅི་རིགས་སུ་བྱའོ། །ཁ་ཅིག་རྟ་བབས་ཀྱི་གཞིའི་འཁོར་ལོའི་རྩིབས་བཞི་མཚོན་པར་འདོད་ཅིང་། ཕལ་ནི་གཞན་དང་མཐུན་པར་སྦྱོར་བས་རྡོ་རྗེའི་རྭ་བཞི་ཡང་འདོད་དོ། །གང་ལྟར་ཡང་འགལ་བ་མེད་དོ། །འབྲིང་པོ་ལ་ནི་འོག་ནས་འབྱུང་བའི་དཀྱུས་བཞིན་ནོ། །བསྡུས་པ་ལ་ནི་བར་ཁྱམས་མེད་པའི་གྲུ་ཆད་བཞི་ལ་སྒོ་ཁྱུད་ལྡན་པར་བཞེད་དོ། །གནས་དེ་དག་ཏུ་མཚན་མ་དགོད་པ་ནི་གྲུབ་ན་སྐུ་དང་ཡིག་འབྲུ་དང་ཕྱག་མཚན་གང་རུང་དགོད་ཅིང་། མ་གྲུབ་ན་བརྡ་མཚོན་ཚོན་སྤུངས་ཀྱི་སྐུ་མདོག་མཚོན་པ་ཙམ་རེ་བྱའོ། །ཡང་རྔམ་གློག་ལས། གཙོ་བོ་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་པ་དག་ལ་ཡིག་འབྲུས་སོ། །ཞེས་པ་ལྟར་རོ། །

བཞི་པ་མཆོད་པ་བཤམ་ཞིང་ཕན་ཡོན་བསྟན་པ་ལ་གསུམ་ལས། དང་པོ་མཆོད་པ་བཤམ་པ་ནི་ཕྱི་ནང་གི་མཆོད་པ་དང་། རྒྱན་དང་གོས་ལ་སོགས་པ་དང་། རོལ་མོ་དང་སིལ་སྙན་ལ་སོགས་དང་། ཁ་ཟས་མང་པོས་བརྒྱན་པར་བྱའོ། །གཉིས་པ་རབ་ཏུ་གནས་པ་ནི་དཀྱིལ་འཁོར་དུ་སྐད་ཅིག་གིས་བསྐྱེད་ཅིང་ཡེ་ཤེས་པ་བཅུག་ནས་རྟེན་འབྲེལ་སྙིང་པོའམ་ཡི་གེ་འབྲུ་གསུམ་གྱིས་བརྟན་པར་བྱས་ཏེ་གཟུགས་བརྙན་ལྟ་བུར་བསྒོམ་པའོ། །དེ་སྐད་དུ་རྔམ་གློག་ལས། དཀྱིལ་འཁོར་ལ་སོགས་གང་བྱས་ཀྱང་། །རབ་གནས་ཡེ་ཤེས་མི་ལྡན་ན། །ཚོགས་དང་འབྲི་བའི་ནུས་པ་མེད། །ཅེས་སོ། །གསུམ་པ་ཕན་ཡོན་ནི་དེ་ལྟར་རྡུལ་ཚོན་གྱི་དཀྱིལ་འཁོར་བྲིས་པའི་བསོད་ནམས་ནི་དཔག་ཏུ་མེད་དེ། ཡེ་ཤེས་རྒྱས་པ་ལས། གང་གིས་རྒྱལ་བའི་དཀྱིལ་འཁོར་མཆོག །ཐིག་དང་ཚོན་གྱིས་འབྲི་བྱེད་པ། །ཕྱོགས་བཅུའི་སངས་རྒྱས་ཞིང་རྣམས་ཀུན། །རིན་ཆེན་བདུན་བྱིན་བསོད་ནམས་ལས། །དེ་ཡི་ཕུང་པོ་དཔག་ཏུ་མེད། །ལས་རྣམས་འགྲུབ་ཅིང་རྒྱལ་བས་དགོངས། །དཀྱིལ་འཁོར་བསམ་ཡས་ཐོབ་པར་འགྱུར། །ཞེས་པ་དང་། དམ་པའི་ཆོས་པདྨ་དཀར་པོ་ལས་ཀྱང་། གང་གིས་མཆོད་རྟེན་རྡོ་ལས་བྱས་པ་དང་། །གང་གིས་ཨ་ཀ་རུ་དང་ཙནྡན་ནམ། །གང་གིས་སྨན་ཤིང་མཆོད་རྟེན་བྱས་པ་དང་། །ལ་ལས་ཤིང་ངམ་གཞན་ལ་བྱས་པ་དང་། །ས་དང་སོ་ཕག་ལ་ནི་སོགས་པ་ཡིས། །རྒྱལ་བའི་མཆོད་རྟེན་དགའ་ཞིང་བྱས་པ་དང་། །དེ་བཞིན་ས་རྡུལ་ཕུང་པོ་དག་ལས་ཀྱང་། །མྱ་ངམ་དགོན་པ་དག་ཏུ་བྱས་པ་དང་། །བྱིས་པའི་རྩེད་མོར་དེ་དང་དེ་དག་ཏུ། །གང་གིས་རྒྱལ་བ་དེ་ཕྱིར་མཆོད་རྟེན་དག །བྱེ་མ་ལས་ནི་ཕུང་པོར་བྱས་པ་དང་། །གཞན་དག་གཟུགས་བརྙན་དག་ཏུ་འདྲི་བྱེད་པ། །(༡༦༡)དེ་རྣམས་ཀྱིས་ནི་བྱང་ཆུབ་ཐོབ་པར་འགྱུར། །ལ་ལས་དེ་བཞིན་རིན་ཅེན་གཟུགས་བྱས་ལ། །སུམ་ཅུ་རྩ་གཉིས་མཚན་དང་ལྡན་པའི་གཟུགས། །གང་གིས་དེ་ཕྱིར་བྱས་པ་དེ་དག་ཀྱང་། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ལ་ལས་དེ་ནི་རིན་ཆེན་སྣ་བདུན་དང་། །ལ་ལས་དེ་བཞིན་ཟངས་དང་འཁར་བ་ལས། །བདེ་བར་གཤེགས་པ་རྣམས་ཀྱི་གཟུགས་བྱས་པ། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །རོ་ཉེ་དང་ནི་ལྕགས་སམ་ས་ཡང་རུང་། །བདེ་བར་གཤེགས་པ་རྣམས་ཀྱི་གཟུགས་བྱས་ཏེ། །ལྟ་ན་སྡུག་པ་འཇིམ་པ་ལ་བྱེད་བཅུག །དེ་དག་ཐམས་ཅད་བྱང་ཆུབ་ཐོབ་པར་འགྱུར། །གང་གིས་རྩིག་ངོས་གཟུགས་ཀྱི་རི་མོ་དང་། །བསོད་ནམས་རྒྱ་ཆེན་ཡོན་ཏན་རྫོགས་པའི་སྐུ། །གང་གིས་བྲིས་སམ་འདྲི་རུ་བཅུག་ཀྱང་རུང་། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །སྐྱེས་བུ་རྒན་ནམ་འོན་ཏེ་གཞོན་ཡང་རུང་། །གང་དག་ལ་ལ་དེ་ན་སློབ་པའི་ཚེ། །རྩེད་མོ་དག་དང་གསང་བ་བྱེད་པ་ན། །རྩིག་ངོས་སེན་མོ་ཤིང་བུས་གཟུགས་བྲིས་པ། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་པ་ལྟར་རོ། །

གཉིས་པ་ལྷ་བསྐྱེད་ཅིང་ཇི་ལྟར་མཆོད་པ་ལ་གཉིས་ཏེ། དཀྱིལ་འཁོར་བསྐྱེད་ཅིང་གསལ་གདབ་པ་དང་། ཇི་ལྟར་མཆོད་པའོ། །

དང་པོ་ནི། མཚམས་དང་དམ་བཅའ་བརྟན་པར་བྱས་ལ། གནས་དེ་ཉིད་དུ་སྟན་བདེ་བ་ལ་འདུག་སྟེ། དང་པོ་སེམས་བསྐྱེད་པ་ནི། ཨེ་མ་ཧོཿངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ནས་སྐྱེ་བ་མེད། །ལ་སོགས་པ་བརྗོད་པས་ཆོས་ཐམས་ཅད་སྤྲོས་པ་དང་བྲལ་བའི་ངང་ནས་ཏིང་ངེ་འཛིན་གསུམ་བསྒོམ་པར་བྱ་སྟེ། ལུས་ངག་སེམས་དང་ཆོས་ཐམས་ཅད། །གང་ན་མི་གནས་མི་དམིགས་པ། །མིག་ཡོར་ཚུལ་དུ་སྦྱོར་བ་ཡིས། །ནམ་མཁའ་ལ་ནི་ནམ་མཁའ་བསྒོམ། །ཞེས་བརྗོད་པས་ཐམས་ཅད་མི་དམིགས་པ་དེ་བཞིན་ཉིད་ཀྱི་ཏིང་ངེ་འཛིན་གྱི་ངང་ལས། སེམས་ཅན་ཐམས་ཅད་ལ་དམིགས་པའི་སྙིང་རྗེ་ཆེན་པོ་ཀུན་ཏུ་སྣང་གི་ཏིང་ངེ་འཛིན་བསྒོམ་པར་བྱའོ། །དེའི་ངང་ལས་རྒྱུའི་ཏིང་ངེ་འཛིན་ནི། རྩ་བ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཅེན་སྤྲིན། །ཨ་ཞེས་བརྗོད་པས། སེམས་ཀྱི་རང་བཞིན་ཨ་དཀར་པོར་གསལ་བའི་ངང་ལས། ཨ། རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །ཞེས་བརྗོད་པས། ཨ་ལས་ཟླ་བའི་(༡༦༢)དཀྱིལ་འཁོར་གྱི་དབུས་སུ་ཨ་ལས་འཕྲོས་པས་མཚན་གྱི་ས་བོན་ཨཱ་ལི་དང་། དཔེ་བྱད་ཀྱི་ས་བོན་ཀཱ་ལིས་རིམ་པ་གཉིས་སུ་བསྐོར་བའི་རང་བཞིན། ཨ་དང་ཀྵའི་ངོ་བོ་འོད་དུ་ཞུ་བ་ལས་ཧཱུྃ་གིས་མཚན་པའི་རྡོ་རྗེར་གྱུར། དེ་ཉིད་ཀྱང་ཡོངས་སུ་གྱུར་པ་ལས་རང་བཞིན་གཞིའི་ཀུན་ཏུ་བཟང་པོ་མཐིང་ག་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་སྐུ་འོད་ཟེར་གྱི་ཕུང་པོ་འབར་བ་ལས་ནམ་མཁའི་དབྱིངས་ཁྱབ་པར་བསྒོམ་མོ། །དེའང་དེ་བཞིན་ཉིད་དང་ཀུན་ཏུ་སྣང་བ་ནི་སྟོང་པ་ཉིད་ཀྱི་ཡེ་ཤེས་ཀྱི་བདག་ཉིད་དེ་བཞིན་གཤེགས་པའི་རིགས་སོ། །ཉི་ཟླའི་དཀྱིལ་འཁོར་ནི་མེ་ལོང་ལྟ་བུའི་ཡེ་ཤེས་དང་རྡོ་རྗེའི་རིགས་སོ། །འོད་ཀྱི་གོང་བུ་མཉམ་པ་ཉིད་དང་རིན་པོ་ཆེའི་རིགས་སོ། །རྡོ་རྗེ་ཧཱུྃ་གིས་མཚན་པ་ནི་སོ་སོར་རྟོག་པ་དང་པདྨའི་རིགས་སོ། །སྐུ་ནི་བྱ་བ་གྲུབ་པ་དང་ལས་ཀྱི་རིགས་ཏེ། སངས་རྒྱས་ཀྱི་སའི་ཆོས་ཀུན་ཡོངས་སུ་རྫོགས་པར་བསྒོམ་པ་ཉིད་དོ་། །དེ་ནས་ ་བི་ཤྭ་བི་ཤུདྡྷེ་ཞེས་པས་གཞི་ཚད་མེད་པ་ཡེ་ཤེས་ཀྱི་འཁོར་ལོ་ལ་གནས་པའི་གཞལ་ཡས་ཁང་ཆེན་པོ་སྒོ་བཞི་གྲུ་བཞི་རྟ་བབས་བཞི་དང་ལྡན་པའོ། །རྩིག་པ་ལྔའི་སྟེང་ན་རིན་པོ་ཆེའི་ཕ་གུ་ལ་རིན་པོ་ཆེའི་དྲྭ་བ་དྲྭ་ཕྱེད་འཕྱང་ཞིང་། མདའ་ཡབ་དང་པུ་ཤུས་མཛེས་པ། བུམ་པ་ཟླུམ་པོ་ཀུན་ཏུ་འཁྱིལ་པས་ནམ་མཁའི་དབྱིངས་ཁྱབ་པ། ཕྱི་ནང་དག་ཅིང་ཡེ་ཤེས་ཀྱི་འོད་གསལ་བ། སྒོ་ཕྱི་ནང་གཉིས་དང་། གདུགས་དང་རྒྱལ་མཚན་དང་རོལ་མོའི་སྤྲིན་ཕུང་འཁྲིགས་ཤིང་། འདོད་ཡོན་གྱི་ལྷ་མོ་དཔག་ཏུ་མེད་པས་མཆོད་པའི་སྤྲིན་གཏིབས་ཏེ། ཡེ་ཤེས་ཕྱོགས་བཞི་དབུས་བརྟགས་ཏེ། །ཞེས་པ་ནས། ཉི་ཟླ་པདྨ་རིན་པོ་ཆེ། །ཞེས་བརྗོད་པས་གཞལ་ཡས་ཁང་ཤིན་ཏུ་གསལ་བར་བསྐྱེད་དོ། །དེ་ནས། ཨ་ནི་སྐྱེ་མེད་དེ་བཞིན་ཉིད། །ཀྵ་ནི་ཡེ་ཤེས་ཐུགས་ཀྱི་ཐུགས། །ཞེས་བརྗོད་པས་རང་གི་གཡོན་དུ་ཡུམ་ཀུན་ཏུ་བཟང་མོ་མཐིང་ག་ཡབ་དང་འདྲ་བ་བསྐྱེད་ནས། ཐབས་དང་ཤེས་རབ་དགྱེས་སྤྲིན་བྱང་ཆུབ་སེམས་ཚོགས་རྒྱུ་འཁོར་ལོ། །འབྲས་བུ་རྒྱལ་བ་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། །འདུས་མ་བྱས་ཉིད་འདུས་བྱས་རྡོ་རྗེ་དཀྱིལ་འཁོར་འབྱིན་པའི་དམ། །འདའ་བར་མི་མཛད་དབང་མེད་རྒྱུ་རྐྱེན་ཚོགས་པའི་མཐུ་ཆེན་ཡིན་ཧོ། །ཞེས་པས་ཡབ་ཡུམ་གཉིས་སུ་མེད་པར་འཁྲིལ་བའི་ཐུགས་ཀ་ནས་ཡི་གེ་སྤྲིན་འཕྲོས་ཏེ། ལྷའི་དཀྱིལ་འཁོར་དུ་གྱུར་པས་སངས་རྒྱས་ཀྱི་མཛད་པ་བསྒྲུབ་སླར་འདུས་དཀྱིལ་འཁོར་དུ་བྱོན་པར་བསམ་ཞིང་། ཋ་ནི་སྒྱུ་འཕྲུལ་རྡོ་རྗེ་ཉིད། །ཅེས་པ་ནས། ༀ་ནི་ཐམས་ཅད་ཞིག་པ་ཡིན་གྱི་བར་བརྗོད་པས། རྣམ་སྣང་ཡབ་ཡུམ་ནི་ཀུན་ཏུ་བཟང་པོ་ཡབ་ཡུམ་ལ་ཐིམ་པར་གྱུར། ལྷ་གཞན་རྣམས་ནི་རང་རང་གི་གནས་སུ་བཞུགས་པར་(༡༦༣)བསམ་མོ། །དེ་ནས་གཙོ་བོའི་ཐུགས་ཀ་ནས་རིག་པའི་ཀུན་ཏུ་བཟང་པོ་རྐང་པའི་ལོང་བུ་སྤྲད་ཅིང་ལག་པ་ཐལ་མོ་སྦྱར་ཏེ་འགྲེང་བ་སེམས་དཔའི་རྒྱན་དང་ལྡན་པ་གཅིག་འཐོན་ནས། དཀྱིལ་འཁོར་གྱི་ལྷ་རྣམས་ལ་ལན་གསུམ་བསྐོར་བ་བྱས་ཏེ་ནུབ་སྒོ་ནས་མེ་ཏོག་གཏོར་ཞིང་། ༀ། སྔོན་གྱི་ཐུགས་དམ་ཆེན་པོ་ནི། །འཇིག་རྟེན་མ་ལུས་ཐམས་ཅད་ཀུན། །རྒྱལ་བའི་ཞིང་དུ་སྦྱོར་བས་ན། །ཕྱག་རྒྱ་ཆེན་པོ་བདག་སྦྱོར་ཅིག །ཅེས་བརྗོད་པས། ལྷ་རྣམས་ཀྱིས་གནང་སྟེ་ཐབས་དང་ཤེས་རབ་ཀྱི་འོད་ཟེར་བདག་ལ་སྤྲོས་ཏེ། སེམས་ཀྱི་རྟོག་པ་དང་དེ་ལས་གྱུར་པའི་ལུས་ངག་སྦྱངས་ཏེ། གཟུང་འཛིན་གཉིས་དང་བྲལ་བའི་རང་བཞིན་འོད་ཀྱི་གོང་བུ་གཅིག་ཏུ་གྱུར་པ་ལ། ལྷ་རྣམས་ཀྱི་སྐུ་གསུང་ཐུགས་ཀྱི་འོད་ཟེར་ༀ་ཨཱཿཧཱུྃ་གི་རྣམ་པར་འཕྲོས་པ་ཕོག་ཅིང་ཐིམ་པས། འོད་ཀྱི་གོང་བུ་དེ་ཉིད་སྐུ་གསུང་ཐུགས་གཉིས་སུ་མེད་པའི་རང་བཞིན་ཡི་གེ་ཧཱུྃ་དུ་གྱུར་ནས། གཙོ་བོའི་ཐུགས་ཀར་ཐིམ་པས་གཙོ་བོའི་སྐུ་གཟི་བྱིན་དང་ལྡན་པར་བསམ་མོ། །དེ་ནས་གཙོ་བོ་ཡབ་ཡུམ་གཉིས་སུ་མེད་པའི་བྱང་ཆུབ་ཀྱི་སེམས་སུ་གྱུར་ཏེ་ཡུམ་གྱི་མཁའ་ལ་གནས་པ་ལས། ལྷ་ཐམས་ཅད་ཀྱང་རང་རང་གི་གསང་སྔགས་ཀྱི་སྒྲ་དང་བཅས་ནས་བྱང་ཆུབ་ཀྱི་སེམས་ལ་ཐིམ་པར་གྱུར་ནས། དཀྱིལ་འཁོར་གྱི་དབུས་སེང་གེ་དང་ཉི་ཟླའི་སྟེང་ན་དེ་ཐམས་ཅད་གཅིག་ཏུ་གྱུར་པ་བྱང་ཆུབ་ཀྱི་སེམས་ཀྱི་རང་བཞིན་འོད་ཀྱི་གོང་བུ་ཙམ་ཞིག་དམིགས་པ་ལས། སླར་ཡང་ཧཱུྃ་དང་མཱུྃ་དུ་གྱུར་ཏེ་འོད་ཟེར་གྱི་འཕྲོ་འདུ་ལས་རྡོ་རྗེ་དང་དྲིལ་བུར་གྱུར་ཅིང་། དེ་ཡོངས་སུ་གྱུར་པ་ལས་རྣམ་པར་སྣང་མཛད་ཡབ་ཡུམ་གྱི་སྐུར་བསམ་མོ། །དེ་ནས་ༀ་མཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ་ཞེས་པ་ལ་སོགས་པས་ཡེ་ཤེས་ལྔ་ཡི་དབང་བསྐུར་ཞིང་སྐུ་གསུང་ཐུགས་ཡོན་ཏན་འཕྲིན་ལས་ལྔས་བྱིན་གྱིས་བརླབ་བོ། །དེ་ནས་གཙོ་བོ་ཡབ་ཡུམ་གྱི་མཁའ་གསང་རྡོ་རྗེ་དང་པདྨར་བྱིན་གྱིས་བརླབས་ནས། ས་མ་ཡ་ཧོཿས་སྦྱོར་བའི་བརྡས་བསྐུལ་ནས་གཉིས་སུ་མེད་པར་སྙོམས་པར་ཞུགས་པའི་ཡབ་ཀྱི་བྱང་སེམས་ཡུམ་གྱི་མཁའ་ལ་སྤྲོས་པས་མཁའ་གཞལ་ཡས་ཁང་དུ་བྱིན་གྱིས་བརླབས་པའི་ནང་ན། ལྷ་རྣམས་ཀྱི་སྙིང་པོ་ཧཱུྃ་དང་ༀ་ལ་སོགས་པ་སོ་སོའི་ས་བོན་རྣམས་གསལ་བཏབ་ལ། ལྷ་སོ་སོའི་གསང་སྔགས་བརྗོད་པ་ཙམ་གྱིས་ལྷ་སོ་སོའི་སྐུར་གྱུར་ཏེ། ཛཿཞེས་བརྗོད་པ་ཙམ་གྱིས་ཡུམ་གྱི་མཁའ་ནས་མདུན་གྱི་ནམ་མཁའ་ལ་སྐད་ཅིག་གིས་བཏོན་ཏེ། ༀ་ཨཱཿཧཱུྃ་གིས་སྐུ་གསུང་ཐུགས་བྱིན་གྱིས་བརླབས། འོད་ཟེར་གྱི་སྤྲོ་བསྡུས་སངས་རྒྱས་ཀྱི་མཛད་པ་བསྒྲུབས་ཏེ། རང་རང་གི་གནས་སུ་བཞུགས་པར་བསམ་ཞིང་། སྔར་བསྟན་པའི་ལྷ་སོ་སོའི་སྔགས་རྣམས་བརྗོད་ཅིང་གསལ་བར་བསྐྱེད་དོ། །(༡༦༤)དེའང་ཀུན་ཏུ་བཟང་པོ་ཡབ་ཡུམ་ནི་གཙོ་བོའི་ཐུགས་ཀར་བསམ་ཞིང་། ཐུབ་དྲུག་ནི་ཕྱིའི་ཁྱམས་ལ་བཞུགས་པར་བྱའོ། །གཞན་ནི་ཇི་སྐད་སྨྲོས་པ་བཞིན་ནོ། །དཀྱིལ་འཁོར་བསྐྱེད་པའོ། །དེ་ནས་སྤྱན་དྲང་བ་ནི། ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་འགྱུར་བའི་དམ་ཚིག་མཆོག །ༀ་ཨེ་ཧྱེ་ཧི་བྷ་ག་ཝཱན་མཧཱ་ཀཱ་རུ་ཎི་ཀཱ་ཏྲ྇་ཤ་ཧོཿ ས་མ་ཡ་སྟྭཾ། ཛཿཧཱུྃ་བྃ་ཧོཿ ཞེས་བརྗོད་པས། འོག་མིན་ནས་དཀྱིལ་འཁོར་ཆེན་པོ་ཇི་ལྟར་བསྐྱེད་པ་ལྟ་བུ་མདུན་གྱི་ནམ་མཁར་བྱོན་པ་ལ། ཡིད་ཀྱིས་མཆོད་དེ། རིག་པའི་མེ་ཏོག་དོར་བ་ནི། ༀ་བཛྲ་ས་མ་ཡ་ཨཱཿ ཨཱཿབཛྲ་ས་མ་ཡ་ཨཱཿ ཧཱུྃ་བཛྲ་ས་མ་ཡ་ཧཱུྃཿ སྭཱ་བཛྲ་ས་མ་ཡ་སྭཱཿ ཧཱ་བཛྲ་ས་མ་ཡ་ཧཱཿ ཞེས་བརྗོད་པས། རང་བཞིན་གྱི་དཀྱིལ་འཁོར་རྣམས་ཀྱི་སྐུ་གསུང་ཐུགས་ཡོན་ཏན་འཕྲིན་ལས་རྣམས་དང་། ཏིང་ངེ་འཛིན་གྱི་སྐུ་གསུང་ཐུགས་ཡོན་ཏན་འཕྲིན་ལས་རྣམས་རང་བཞིན་དབྱེར་མེད་པར་རྟོགས་པར་བྱ་སྟེ། ཐམས་ཅད་སེམས་ཀྱི་རྣམ་འཕྲུལ་ཡེ་ནས་དག་པ་ཡིན་པའི་ཕྱིར་རོ། །འདི་ནི་རིག་པའི་མེ་ཏོག་དོར་བ་ཞེས་ཀྱང་བྱ། སོ་སོ་མ་ཡིན་པ་རིག་པ་འདུན་པའི་ཕྱག་ཅེས་ཀྱང་བྱ། རང་སྣང་གི་དཀྱིལ་འཁོར་དུ་འཇུག་པའི་ཚུལ་ཞེས་ཀྱང་བྱའོ། །དེ་ནས་ལྷའི་སྐུ་རྣམས་དབྱེར་མེད་དུ་བསྟིམ་པའི་ཕྱིར། ༀ་ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་འཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བ། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་པས་ལྷ་རྣམས་དངོས་གྲུབ་སྩོལ་བ་ལ་ཕྱོགས་པ་དང་། ༀ་བཛྲ་ས་མ་ཡ་ཧཱུྃ་གིས་ཡེ་ཤེས་པ་དམ་ཚིག་པ་ལ་ཆུ་ལ་ཆུ་བཞག་པ་བཞིན་དབྱེར་མེད་དུ་ཐིམ། ༀ་བཛྲ་ས་མ་ཡ་སྟྭཾ་གྱིས་རང་ཉིད་ལྷའི་དཀྱིལ་འཁོར་དུ་འཚང་མ་རྒྱས་ཀྱི་བར་ལ་བརྟན་པར་བཞུགས་པར་བསམ། ༀ་བཛྲ་ས་མ་ཡ་ཧོས་དབང་དུ་གྱུར་ཅིང་དགྱེས་པར་བསམ་མོ། །ཛཿཧཱུྃ་བཾ་ཧོཿས་བརྟན་ཞིང་གསལ་བར་གྱུར་པ་ཉིད། ཤིན་ཏུ་གསལ་བར་གྱུར་པ་ཉིད། །གདན་ལ་རྫོགས་དང་སེམས་དཔའི་ཚུལ། །ཞེས་པ་ནས། དཀྱིལ་འཁོར་བསམ་ཡས་ལྷུན་གྱིས་གྲུབ། །ཅེས་པའི་བར་བརྗོད་པས། ལྷ་རྣམས་གསལ་གདབ་བོ། །

གཉིས་པ་ཇི་ལྟར་མཆོད་པ་ལ་གསུམ་ལས། དང་པོ་ཐུན་མོང་གི་མཆོད་པ་ནི་སྔགས་ཕྱི་པ་རྣམས་དང་ཚུལ་མཐུན་པར། ལྷའི་དཀྱིལ་འཁོར་ལ་བདག་ཉིད་གཙོ་བོའི་ཐུགས་ཀ་ནས་ལས་ཀྱི་སེམས་དཔའི་ཚུལ་དུ་བྱུང་སྟེ། ཕྱག་འཚལ་བ་དང་། མཆོད་པ་དང་། བསྟོད་པ་དང་། བཤགས་པ་དང་། དངོས་གྲུབ་(༡༦༥)བླང་བ་དང་། སྨོན་ལམ་འདེབས་པ་ལ་སོགས་བྱའོ། །དེའང་སེམས་ཀྱི་རོལ་པ་ཙམ་ཡིན་པའི་ཕྱིར་ན་གཉིས་སུ་མེད་པའི་ངོ་བོར་ཤེས་པར་བྱའོ། །

གཉིས་པ་ཐུན་མོང་མ་ཡིན་པའི་མཆོད་པ་ནི་འཕྲུལ་དགའི་ལྷ་རྣམས་རང་གི་སྤྲུལ་པའི་ལོངས་སྤྱོད་ལ་སྤྱོད་པའི་ཚུལ་གྱིས། ལྷ་རྣམས་ཀྱི་ཐུགས་ཀ་ནས་འདོད་ཡོན་གྱི་ལྷ་མོ་རྣམས་སྤྲོས་ཏེ་དེ་དག་གིས་མཆོད་པར་བསམ་པ་དང་། ཕྱོགས་བཅུ་ཐམས་ཅད་སངས་རྒྱས་ཀྱི་ཞིང་ཁམས་དག་པར་བསམ་ཞིང་། ལོངས་སྤྱོད་ཆེན་པོ་རྒྱན་གྱིས་རོལ་པ་གླུ་ཚིག་རོལ་མོའི་སྤྲིན་ལ་སོགས་འདོད་དགུ་ཕུན་སུམ་ཚོགས་པའི་མཆོད་པ་ཆེན་པོ་རྒྱུན་མི་འཆད་པར་ལྷུན་གྱིས་གྲུབ་པ་ཀུན་ཏུ་བཟང་པོའི་མཆོད་སྤྲིན་བསམ་གྱིས་མི་ཁྱབ་པ་སྤྲུལ་ཏེ། ལྷ་ལ་ལྷ་རོལ་པའི་ཚུལ་གྱིས་མཆོད་པར་བྱའོ། །

གསུམ་པ་བླ་ན་མེད་པའི་མཆོད་པ་ལ་ཡང་། སྦྱོར་སྒྲོལ་གཉིས་སུ་མེད་པའི་མཆོད་པ། དམ་རྫས་བདུད་རྩིའི་མཆོད་པ། གླུ་ཡེ་ཤེས་ཕྱག་རྒྱའི་མཆོད་པ། དགྱེས་པ་ཆེན་པོ་བསྟོད་པའི་མཆོད་པ་རྣམས་གོང་འོག་ནས་འབྱུང་བ་བཞིན་འདིར་མཆོད་ཅིང་། ཁྱད་པར་དུ་བདུད་རྩིའི་རྗེས་ལ་ཡུམ་མཚན་དང་ལྡན་པ་དངོས་སམ་ཡིད་ཀྱིས་བསམ་པ་ལ་སྦྱོར་བའི་བརྡས་བསྐུལ་བའི་པདྨའི་ཁྱམས་སུ་ཡུངས་འབྲུ་ཙམ་གྱི་དཀྱིལ་འཁོར་བསྐྱེད་པ་ལ། འོག་མིན་ནས་ནམ་མཁའི་མཐའ་དང་མཉམ་པའི་དཀྱིལ་འཁོར་སྤྱན་དྲངས་ལ་བསྟིམ་ལ། རོལ་པའི་བདེ་བའི་མཆོད་པར་བྱའོ། །དེ་ཉིད་ཡུལ་སངས་རྒྱས་བདེ་བ་ཆེན་པོ་ལ། མཆོད་རྫས་བདེ་བ་ཆེན་པོས་མཆོད་པས། འབྲས་བུ་ཡེ་ཤེས་བདེ་བ་ཆེན་པོ་སངས་རྒྱས་ཀྱི་དགོངས་པ་ད་ལྟ་ཉིད་ལ་མངོན་དུ་གྱུར་པས་བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་ཀྱི་ནང་ནས་མཆོག་ཏུ་གྱུར་པ་ཡིན་ནོ། །དེ་ནས་བཟླས་བརྗོད་ཀྱི་རིམ་པ་ནི། ལྷ་རྣམས་ཀྱི་ཐུགས་ཀའི་ཡི་གེ་ལས་འོད་འཕྲོས་པ་ནམ་མཁའི་དབྱིངས་ཀྱི་མཐའ་ཀླས་པའི་སེམས་ཅན་ལ་ཕོག་པས། སྒྲིབ་པ་ཐམས་ཅད་སྦྱང་བ་ལ་སོགས་པ་ལས་བཞིའི་རིམ་པས་དམིགས་ཏེ། སེམས་ཅན་རྣམས་ཡི་གེར་གྱུར་ཐུགས་ཀར་ཐིམ་པའི་ཚུལ་གྱིས་གཙོ་བོ་ནས་སྒོ་བའི་བར་ལྷ་སོ་སོའི་སྔགས་བརྗོད་པར་བྱའོ། །ཡང་ན་སྔགས་ཀྱི་ཕྲེང་བ་ལྷ་སོ་སོའི་སྐུའི་དབྱིབས་བརྒྱུད་ཅིང་མཁའ་གསང་ནས་འཁོར་བའི་འོད་ཟེར་བདེ་བ་ཆེན་པོ་འཕྲོས་པ་སེམས་ཅན་ལ་ཕོག་པས། སྒྲིབ་པ་སྦྱངས་ཏེ་ལྷའི་རང་བཞིན་དུ་གྱུར་པ་སླར་འདུས་སྙིང་གར་ཐིམ་པའི་ཚུལ་གྱིས་རྩ་བའི་སྔགས་དང་། འཁོར་གྱི་ས་བོན་ཙམ་ཕྱོགས་གཅིག་ཏུ་བཟླས་པ་ལ་བརྩོན་པར་བྱའོ། །གྲངས་ནི་འདིར་མཐའ་གཅིག་ཏུ་ངེས་པར་མ་གསུངས་ཏེ། ཇི་ཙམ་གྲུབ་པར་གྱུར་པ་དེ་སྲིད་དུ་བཟླས་པར་འདོད་དོ། །སྤྱིར་གཙོ་བོ་ལ་བྱེ་བ། འཁོར་རྣམས་ལ་ཁྲི་ཁྲག་རེ་རེས་གྲངས་ཀྱི་བསྙེན་(༡༦༦)པ་གྲུབ་པར་བཞེད་པས་འདིར་ཡང་དེའི་རྗེས་སུ་འབྲང་བར་བྱའོ། །དེའང་དུས་ཐམས་ཅད་དུ་ལྷའི་དཀྱིལ་འཁོར་ལས་མི་འདའ་བའི་ཕྱིར་ཐུན་རྗེས་གསལ་བཏབ་པའི་ངང་ལས་ཕྱག་རྒྱ་བཞིའི་དོན་དང་། རང་བཞིན་རྫོགས་པ་ཆེན་པོའི་གནས་ལུགས་དྲན་པར་བྱས་ཏེ་མཉམ་པར་བཞག་ནས། སེམས་ཅན་གྱི་དོན་དུ་བསྔོ་བ་བྱས་ལ་ལངས་ཏེ་སྣང་སྲིད་ཐམས་ཅད་ལྷ་དང་གཞལ་ཡས་ཁང་དང་ཞིང་ཁམས་སུ་མོས་པས་སྤྱོད་ལམ་གྱི་བྱ་བ་ཅི་བདེར་བྱའོ། །

གསུམ་པ་དབང་བསྐུར་ཞིང་འབྲས་བུ་བསྟན་པ་ལ་གསུམ་སྟེ། ཐུན་མོང་གི་སྔོན་དུ་འགྲོ་བ་སྦྱིན་སྲེག་བསྟན་པ། སློབ་མ་གཞུག་ཅིང་དབང་བསྐུར་བ། བསྐྱེད་རྫོགས་བསྒོམས་པའི་འབྲས་བུ་བསྟན་པའོ། །

དང་པོ་ནི། རྡོ་རྗེ་ལས་རིམ་ལས། སྦྱིན་སྲེག་པ་རྣམ་པ་བཞིར་གསུངས་ཏེ། །ས་དང་རབ་གནས་རྣམ་གཉིས་དང་། །བདེ་བ་སྦྱིན་པའི་དུས་ཉིད་དོ། །ཞེས་པས། ས་ཆོག་གི་ཚེ་མཚན་མ་ངན་ན་ཞི་བ། དཀྱིལ་འཁོར་རབ་ཏུ་གནས་པའི་ཚེ་རྒྱས་པ། དབང་བསྐུར་བའི་ཚེ་དབང་། སློབ་མ་སྟ་གོན་གྱི་ཚེ་རྨི་ལམ་ངན་ན་དྲག་པོའོ། །དེའང་ཐབ་ཁུང་ནི་ཞི་བ་ལ་དཀར་ཞིང་ཟླུམ་པ་སྟེ། རྩིག་པ་ཡིན་ན་ཟབས་སུ་ཁྲུ་གང་ཡོད་པས་ཁ་ཁྱེར་བང་རིམ་གསུམ་ལ་འཁོར་ལོ་དང་རྡོ་རྗེ་ར་བ་དང་མདའ་བཞི་ཞགས་པ་དཀར་པོས་མཚན་པའོ། །བྲིས་པ་ཡིན་ན་འཁོར་ལོ་རྩིབས་བརྒྱད་པའི་མཐའ་མ་ༀ་དང་སེང་མགོ་སྤེལ་མ་དང་མདའ་བཞི་ཞགས་པ་དཀར་པོས་མཚན་པའོ། །རྒྱས་པ་ལ་གྲུ་བཞི་སེར་པོ་སྟེ། རྩིག་ན་གྲུ་བཞི་ཁྲུ་གང་བ་བང་རིམ་གསུམ་གྱི་ནང་མ་ལ་རིན་པོ་ཆེའི་སྒྲོམ་བུ། བར་མ་ལ་རྡོ་རྗེ། ཐ་མ་ལ་ཞགས་པ་སེར་པོས་བསྐོར་བའོ། །བྲིས་ན་རིན་པོ་ཆེ་ཟུར་བརྒྱད་པ་རྩེ་མོ་རིན་པོ་ཆེས་མཚན་པའོ། །དབང་ལ་ཟླ་གམ་དམར་པོ་སྟེ། བྲིས་ན་པདྨ་འདབ་མ་བརྒྱད། རྩིག་ན་མདའ་བཞི་གྲུ་བཞི་དམར་པོའོ། །དྲག་པོ་ལ་གྲུ་གསུམ་ནག་པོ་སྟེ། བྲིས་ན་ཁྲོ་ཞལ་གདེངས་པ། རྩིག་ན་མདའ་བཞི་ཞགས་པ་ནག་པོས་བསྐོར་བའོ། །བུད་ཤིང་ཡང་ཁ་དོག་སོ་སོའི་དབྱིབས་དང་མཐུན་པར་བརྩིགས་ཏེ། སྲེག་རྫས་ཞི་བ་ལ་དཀར་གསུམ་ཏིལ་དང་ཁ་ཟས་དཀར་པོའོ། །རྒྱས་པ་ལ་མངར་གསུམ་ཞོ་དང་འབྲུ་སྣ་ཚོགས་སེར་པོ། དབང་ལ་སྐྱུར་དང་མེ་ཏོག་བཟའ་བཏུང་སྣ་ཚོགས་དམར་པོ། དྲག་པོ་ལ་ཚ་བ་དུག་ཁྲག་ལིངྒ་སྣ་ཚོགས་ནག་པའོ། །དེ་ནས་ཐབ་དང་བསྲེག་རྫས་བསང་སྦྱངས་བྱས་ཏེ། ཡེ་ཤེས་ཀྱི་མེ་འོད་ལས་ཀྱི་ཁ་དོག་ཅན་གྱི་དབུས་སུ་ༀ་ཏྲཱཾ་ཧྲཱིཿཨཱ་ལས། ལས་གང་བྱེད་ཀྱི་མེ་ལྷ་རྭ་སྐྱེས་ཀྱི་སྟེང་ན་བགྲང་ཕྲེང་། སྒྲོམ་བུ། ཞགས་པ། ཏྲི་ཤུལ་བསྣམས་ཤིང་། གཡོན་གུནྡྷེ་འཛིན་པ་སོ་སོའི་མདོག་ཅན་དུ་བསྐྱེད་ལ། ཧཱུྃ་དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་(༡༦༧)འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ༀ་ཨགྣ་ཡེ་ཨེ་ཧྱེ་ཧི་ས་མ་ཡ་ཛ་ཛཿས་སྤྱན་དྲངས་ལ་ཛཿཧཱུྃ་བྃ་ཧོཿས་བསྟིམས་པ་ལ་མར་ཁུ་དགང་བླུགས་བདུན་གྱིས་བྱོན་ཟན་ཕུལ་ནས་མཆོད་བསྟོད་བྱས་ཏེ། མེ་ལྷའི་སྔགས་དེས་སྲེག་རྫས་ལན་བདུན་ཕུལ་ལ་བསྟོད་ནས། མེ་ལྷའི་ལྟོ་བར་ཞི་རྒྱས་གཉིས་ལ་ཞི་བའི་ལྷ། དབང་དྲག་ལ་ཁྲོ་བོ་བསྐྱེད་པའམ། མ་བསྐྱེད་ཀྱང་རུང་སྟེ་སྤྱན་དྲངས་ནས་བཞུགས་པར་གྱུར་པ་ལ། བྱོན་ཟན་དགང་བླུགས་བདུན་བདུན་གྱི་རྗེས་ལ་མཆོད་བསྟོད་བྱས་ལ། ཡམ་ཤིང་ལ་སོགས་པའི་སྲེག་རྫས་སོ་སོའི་རྩ་སྔགས་ཀྱིས་ཕུལ་བའི་རྗེས་ལ། ཤཱནྟིཾ། པུཥྚིཾ། ཝཱ་ཤཾ་ཀུ་རུ་ཡེ་སྭཱ་ཧཱ། མཱ་ར་ཡ་ཕཊ་བཏགས་ལ་བརྒྱའམ་སྟོང་ལ་སོགས་པ་ཕུལ་ནས་འདོད་དོན་ལ་གསོལ་བ་བཏབ་སྟེ་གཤེགས་པར་གསོལ་ནས། རིགས་མཐུན་པའི་ལྷ་གཞན་དང་། ཡུལ་ལྷ་གཞི་བདག་དང་། མེ་ལྷ་ཉིད་གསལ་བཏབ་ལ་ཅི་འབྱོར་པ་ཕུལ་ཏེ། འཕྲིན་ལས་བཅོལ་ནས། བཟོད་པར་གསོལ་ཏེ་གཤེགས་ནས་། བཀྲ་ཤིས་ཀྱི་བར་དུ་བྱའོ། །དེས་ནི་ལས་རྣམས་འགྲུབ་ཅིང་བར་ཆད་ཞི་བར་བྱེད་པའོ། །

གཉིས་པ་སློབ་མ་གཞིག་ཅིང་དབང་བསྐུར་བ་ལ་གསུམ་སྟེ། སློབ་མ་གཞུག་པ་སྟ་གོན་གྱི་ཆོ་ག །དབང་བསྐུར་བ་དངོས་གཞིའི་རིམ་པ། ཕན་ཡོན་བསྒྲགས་ཤིང་དགའ་སྟོན་བྱ་བ་མཇུག་གི་ལས་སོ། །

དང་པོ་ནི། ལས་རིམ་ལས། དབང་ཕྱུག་འཇུག་དང་བཟོད་པར་གསོལ། །ཁྲུས་དགབ་དྲི་དང་ལུས་དབུལ་དང་། །བགེགས་བསྐྲད་ལྷར་རློབ་དམ་ཚིག་སྦྱིན། །དེ་ཉིད་དབོག་དང་ཆུ་ནན་དང་། །བསྒྲག་དང་རིན་ཅེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོད་ཡོན་དང་རྣམ་བཅོ་བརྒྱད། །ཅེས་པས། སློབ་དཔོན་འཇུག་པའི་ཆོས་གཅིག་དང་། སློབ་མ་འཇུག་པའི་ཆོས་བཅུ་བདུན་ནོ། །དང་པོ་ནི། རྡོ་རྗེ་སློབ་དཔོན་ཆས་གོས་དམར་པོ་དང་ལྡན་པས་དཀྱིལ་འཁོར་གྱི་ཤར་སྒོར་འདུག་སྟེ། མེ་ཏོག་བཟུང་ནས་ༀ་བཛྲ་ས་མ་ཡ་ༀ་ལ་སོགས་པའི་སྔགས་བརྗོད་པས། དཀྱིལ་འཁོར་གྱི་ལྷ་དང་སྐུ་གསུང་ཐུགས་ཡོན་ཏན་འཕྲིན་ལས་དབྱེར་མེད་པར་བསམས་ལ། ༀ་ཡེ་ཤེས་རྒྱལ་པོ་ཞེས་པ་ལ་སོགས་པའི་མཐར། ༀ་བཛྲ་ས་མ་ཡ་སྟྭྃ་ལ་སོགས་པས་དངོས་གྲུབ་བསྐུལ་ཏེ་བདག་དང་དཀྱིལ་འཁོར་ཐ་མི་དད་པར་བཞུགས་པར་བསམ་མོ། །རེ་ཞིག་བསྡུས་པ་སྟེ། རྒྱས་པར་འཇུག་ན་སློབ་མ་འཇུག་པ་བཞིན་བྱས་ལ་དབང་ལེན་པ་ཡིན་ནོ། །དེ་ནས་སློབ་མ་རྣམས་དཀྱིལ་འཁོར་གྱི་ཕྱི་རོལ་ཏུ་དྲིའི་ཆུས་ཁྲུས་བྱས་ཏེ། རས་ལ་སོགས་པའི་མིག་དར་དམར་པོས་གདོང་གཡོགས་ལ་སྙིམ་པ་མེ་ཏོག་དང་བཅས་ཏེ་བཞག་གོ། །ནང་དུ་(༡༦༨)སློབ་དཔོན་གྱིས་ཐལ་མོ་སྦྱར་ལ། རྡོ་རྗེ་ཡེ་ཤེས་ཐོབ་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་སྙིང་པོའི་དཀྱིལ་འཁོར་འདིར། །བདག་གི་སློབ་མ་གཞུག་པར་བགྱི། །བཟོད་པར་མཛད་དེ་དགོངས་སུ་གསོལ། །ཅེས་བརྗོད་པས། དེ་བཞིན་གཤེགས་པ་ཐམས་ཅད་དགྱེས་ནས་འཛུམ་པ་དང་བཅས་པས་སློབ་མ་ཆུག་པར་གནང་བ་ཐོབ་པར་བསམ་མོ། །དེ་ནས་བུ་རྣམས་མིག་དར་བཀབ་པ་དེ་ལས་ཀྱི་སློབ་དཔོན་གྱིས་དཀྱིལ་འཁོར་གྱི་དྲུང་མ་ཡིན་པའི་སྒོ་ནང་གི་བླ་མའི་དྲུང་དུ་ཁྲིད་ལ། རྡོ་རྗེ་སེམས་གཙོ་ཁྱེད་ལ་འདུད། །ཐར་ལམ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་གསོལ་ཅིང་། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་བླ་མ་ལ་ཞུའོ། །བླ་མས་བུ་ཁྱོད་ཅི་ལ་དགའ་བ་སྨྲོས་ཞེས་དྲིས་པའི་ལན་དུ། སྐལ་བ་བཟང་ལ་བདག་དགའ་ཞེས་སོ། །བླ་མས། བུ་ཁྱོད་ཤོག་ཅིག་ཅི་བདེ་བའི། །ལས་སྤྱོད་རིམ་པར་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་གཟུང་། །རྫོགས་པའི་ཡེ་ཤེས་བདེ་ཆེན་ལ། །དམིགས་པ་མེད་པར་གནས་ཕྱིར་དུ། །སེར་སྣ་སྤངས་པའི་དང་ཡིད་ཀྱིས། །གཏོང་ཞིང་རང་སེམས་བརྟན་པོར་གཟུང་། །སྒྱུ་འཕྲུལ་དྲྭ་བའི་དབང་རྫོགས་སྦྱིན། །ཞེས་སོ། །དེ་ནས་ལས་ཀྱི་སློབ་དཔོན་དེས་རྡོ་རྗེ་ཕྱེད་ལག་ཏུ་གཏད་པ་ལ་སློབ་མས་བཟུང་བ་དཀྱིལ་འཁོར་གྱི་དྲུང་དུ་ཁྲིད་ལ་ཕྱག་འཚལ་ཏེ། ༀ་སརྦ་བུདྡྷ་པཱུ་ཙ་པ་ཏ་ནཱ་མ་ཨཱ་སྨ་ནན་ནིཪྻ་ཏ་ཡཱ་མི། ཞེས་པས་ལུས་དབུལ་ལོ། །བླ་མས་བི་ཤྭ་བཛྲ་ལ་སོགས་པས་བགེགས་བསྐྲད་དེ། ལག་སོར་ལྔ་རིགས་ལྔ་ཡབ་ཡུམ་བསྐྱེད་ལ་བདེན་པ་བདར་ཏེ། སོར་མོ་བསྣོལ་བས་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་འོད་ཟེར་འཕྲོས་ནས་བུའི་སྒྲིབ་པ་བྲལ་ཏེ་འོད་དུ་ཞུ་ནས། དངུལ་ཆུ་ལྟར་གནས་པ་ལ་ཆོ་ག་གསུམ་གྱིས་སློབ་བུ་རྣམ་སྣང་དུ་བསྐྱེད་ལ་གོ་བགོ་ཞིང་བསྲུང་བ་བྱས་ཏེ་གཞག་གོ། །དེ་ནས་ཡང་། བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་མཆོད་པ་མཛད་པ་ལྟར། །ཞེས་པ་དང་། དཔལ་ལྡན་རྡོ་རྗེ་སྐུ་འཆང་བ། །ཞེས་པ་ལ་སོགས་པ་ཞུས་པའི་རྗེས་ལ། བླ་མས། ཀཱ་ཡ་སིདྡྷི་ༀ་ལ་སོགས་པ་གནས་གསུམ་དུ་འབྲུ་གསུམ་བཞག་ལ་འཕྲོ་འདུ་བྱས་ཏེ། སརྦ་ཏ་ཐཱ་ག་ཏ་ཀཱ་ཡ་སིདྡྷི་ༀ་ལ་སོགས་པ་བརྗོད་ནས་སྐུ་གསུང་ཐུགས་ཀྱི་དམ་ཚིག་སྦྱིན་ནོ། །དེའང་། སངས་རྒྱས་ཀུན་གྱི་གསང་བ་འདི། །དམ་ཉམས་མ་འདྲེས་མེད་པ་ལ། །ནམ་ཡང་སྨྲ་བར་མ་བྱེད་ཅིག །ཐེག་པ་ཆེན་པོ་སྟོན་བྱེད་པ། །ང་ལ་བརྙས་དང་སྨད་མི་རུང་། །སྐུ་གསུང་ཐུགས་ལ་རྟག་གནས་ཤིང་། །མ་ལུས་སེམས་ཅན་དོན་གྱིས་ཤིག །ཅེས་བུའི་སྙིང་གར་རྡོ་རྗེ་གཏད་ལ་དམ་ཚིག་དབོག །དེ་ནས། འདི་(༡༦༩)ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །རྡོ་རྗེ་ཁྲོ་བོ་ཆེན་པོར་འགྱུར། །རྡོ་རྗེའི་ཆུ་འདི་བཏུང་བར་གྱིས། །ༀ་བཛྲ་ཡཀྵ་ཧཱུྃ། ཞེས་དམ་ཚིག་གི་ཆུ་བླུད་ནས། ཡང་། དེ་ལྟ་བས་ན་བུ་ཁྱོད་ཀྱིས། །དམ་ཚིག་འདི་དག་བསྲུང་བར་གྱིས། །དམ་ཚིག་བསྲུངས་ན་དངོས་གྲུབ་པས། །རྡོ་རྗེ་བདུད་རྩིའི་ཆུ་འཐུང་ཞིག །ༀ་བཛྲ་ཨུ་ཀ་ཏ་ཡ་ཧཱུྃ་ཋ། ཞེས་ཡོན་གྱི་ཆུ་ནན་བྱའོ། །དེ་ནས། ཐབས་དང་ཤེས་རབ་སེམས་ཉིད་ཀྱིས། །རྟག་ཏུ་དོགས་པ་མེད་གྱིས་ལ། །འདོད་པ་ལྔ་ཡི་ཡོན་ཏན་སྤྱོད། །ཅེས་ཐོབ་པའི་དམ་ཚིག་གོ་བར་བསྒྲག་གོ། །དེ་ནས། མེ་ཏོག་ལ་སོགས་རིན་ཆེན་འཕྲེང་། །སྔོན་ཚེ་ཡེ་ཤེས་བསྙེན་པའི་ལྷ། །ཐུགས་རྗེས་གཟུང་བར་དགོངས་ནས་ཀྱང་། །གང་ཡིན་དེ་ལ་བབ་གྱུར་ཅིག །ༀ་པྲ་ཏི་ཛ་བཛྲ་ཧོས་མེ་ཏོག་གི་ཅོད་པན་དོར་ལ་ལྷ་གང་ལ་ལས་འབྲེལ་ཡོད་པ་བརྟག་གོ། །དེ་ནས་མེ་ཏོག་བླངས་ལ་སྤྱི་བོར་བཞག་ལ། མེ་ཏོག་ཕོག་པའི་ལྷ་དེ་ཉིད་ཨེ་ཧྱེ་ཧིས་བུའི་སྤྱི་བོར་སྤྱན་དྲངས་ཛཿཧཱུྃ་བྃ་ཧོཿས་བསྟིམས་ལ། བདེན་པའི་ཚིག་གི་རྗེས་སུ། ལྷ་དེའི་མཚན་ནས་བརྗོད་ནས་སློབ་མ་འདིའི་སྙིང་ལ་ཞུགས་ཏེ་འདི་ཕྱིར་དངོས་གྲུབ་ཕུན་སུམ་ཚོགས་པ་འགྲུབ་པར་གྱུར་ཅིག་ཅེས་བརྗོད་ནས། པྲ་བེ་ཤས་བུའི་ཁོག་པ་ཁ་ཕྱེ་བར་བསམས་ལ། ཨཱ་བེ་ཤས་ལྷ་དང་དེ་ཉིད་གཉིས་སུ་མེད་པར་བསམ་མོ། །དེ་ནས་མེ་ཏོག་ཕོག་པའི་ལྷའི་རིགས་དང་བསྟུན་ལ། རྡོ་རྗེ་རྒྱལ་པོ་ལ་སོགས་པའི་གསང་མཚན་གདགས་ཤིང་། ལྷ་དེའི་སྒོམ་བཟླས་དབོག་གོ། །དེ་ནས། དེ་རིང་དད་པའི་ཤུགས་ཀྱིས་ནི། །དཀྱིལ་འཁོར་དམ་པ་བལྟ་བར་བྱ། །སངས་རྒྱས་གསུང་གི་རིགས་སུ་འཁྲུངས། །དངོས་གྲུབ་མཆོག་ཏུ་གྱུར་པར་བྱེད། །བཛྲ་ཙཀྵུཿཔྲ་བེ་ཤ་ཕཊཿ ཅེས་པས་གདོང་གཡོགས་དཀྲོལ་ནས་མིག་ཕྱེ་བས་མ་རིག་པའི་མུན་པ་བསལ། ཡེ་ཤེས་ཀྱི་དཀྱིལ་འཁོར་མཐོང་བར་མོས་པར་བྱའོ། །དེ་ནས་ཆོས་རྣམས་ཐམས་ཅད་གཉིས་མེད་པའི། །དབྱིངས་སུ་ཐིམ་པའི་འོད་ཟེར་གསལ། །གཅིག་དང་སྤྲོས་པ་ཐམས་ཅད་མེད། །དཀྱིལ་འཁོར་སྤྲོས་མེད་ཟླུམ་པོའི་ཚུལ། །ཞེས་པ་ལ་སོགས་པས་དཀྱིལ་འཁོར་གྱི་དོན་རྟགས་རྣམས་དང་། ཐམས་ཅད་རང་བཞིན་རྣམ་དག་ཕྱིར། །སྒྱུ་འཕྲུལ་བཞི་བཅུ་རྩ་གཉིས་ཀྱིས། །ཐམས་ཅད་ལྷ་ཉིད་རྟག་ཏུ་སྦྱོར། །ཐམས་ཅད་མ་ལུས་དཀྱིལ་འཁོར་མཆོག །མཚན་ཉིད་ལེགས་པར་ཤེས་པར་བྱ། །ཞེས་པས་ལྷའི་དེ་ཁོ་ན་ཉིད་རྣམས་བསྟན་ཏོ། །དེ་ནས་ཡོན་ཅི་འབྱོར་པ་དངོས་སམ་མེད་ཀྱང་ཁས་བླང་བ་དང་ཡིད་ཀྱིས་ཀྱང་དབུལ་ཏེ། ཧོཿ མི་གནས་པའི་ཡེ་ཤེས་ཆེན་པོའི་བདག་ཉིད་གསང་བའི་དཀྱིལ་འཁོར་དང་བཅས་པ་དགོངས་སུ་གསོལ། རྣལ་འབྱོར་གྱི་དབང་(༡༧༠)ཕྱུག་ཆེན་པོ་བླ་མ་རྡོ་རྗེ་འཛིན་པ་ཆེ་གེ་མོའི་ཞལ་སྔ་ནས། བསྐལ་པ་ཞིང་གི་རྡུལ་སྙེད་ནས་ཤིན་ཏུ་ཕྲ་བའི་ཆོས་ཉིད་ལ་ཐུགས་སྦྱངས་པས། ད་ལྟ་གསང་བའི་དཀྱིལ་འཁོར་ཆེན་པོའི་མངའ་བདག་ཏུ་བཞུགས་པ་ཧོཿཞིང་མཆིས་ལགས། དེ་དག་ཀུན་གྱི་ཐུན་མོང་མ་ཡིན་པའི་བཀའ་ཟབ་མོ་སྒྱུ་འཕྲུལ་དྲྭ་བའི་དབང་འདི་ལྟ་བུ་ཞིག་ཞུས་ན། སྣོད་དང་མི་ལྡན་པ་ཞིག་མཆིས་ནའང་སེམས་ཅན་རང་བཞིན་གྱི་དཀྱིལ་འཁོར་ཅན་ལ་དགོངས་ནས། གནང་བ་ཧོཿཞིང་མཆིས་ལགས། བཀའ་དྲིན་གྱི་ལན་ཞོ་ཤ་མ་སྐྱུད་པའི་མཚན་མ་ཙམ་འདི་དག་འབུལ་ལགས། ཞེས་ཡོན་ཁས་བླང་ངོ་། །སློབ་མ་འཇུག་པའི་ཆོ་གའོ། །

གཉིས་པ་དབང་བསྐུར་བ་དངོས་གཞིའི་རིམ་པ་ལ་གཉིས་ལས། དང་པོ་ཕན་པའི་དབང་བཅུ་བསྐུར་བ་ནི་དབུ་རྒྱན་ཅོད་པན་ཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུགས་དང་བུམ་པ་བཟའ་བཏུང་དང་། །སྙིང་པོ་ལྔ་ཡི་དབང་བསྐུར་ན། །དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་པས། སློབ་མ་ལྷར་གསལ་བ་ལ། རིན་པོ་ཆེའི་དབུ་རྒྱན་བཅིངས་པས་ཁམས་གསུམ་ཆོས་ཀྱི་རྒྱལ་པོར་དབང་བསྐུར་ཏེ་ཕྱིར་མི་ལྡོག་པའི་མཚོན་བྱེད་དུ་རིགས་ལྔས་དབུ་བརྒྱན་པའོ། །དེའང་རྣམ་པར་ཤེས་པའི་ཚོགས་ཡེ་ཤེས་ལྔར་གསལ་བའི་དགོས་པ་ཡོད་དོ། །ཅོད་པན་བཅིངས་པས་ཐབས་དང་ཤེས་རབ་ཟུང་དུ་འབྲེལ་བའི་དགོས་པ་ཡོད་དོ། །ཕྲེང་བས་བྱང་ཆུབ་ཀྱི་ཡན་ལག་ཐོབ་ཅིང་གཟུངས་དང་ཏིང་ངེ་འཛིན་ཐོབ་པའི་དགོས་པ་ཡོད་དོ། །དེ་བཞིན་དུ་གོ་ཆས་ཉོན་མོངས་པའི་མཚོན་གྱིས་མི་ཚུགས་ཤིང་རྩ་གནས་དྲྭ་བའི་ཚུལ་དུ་གནས་པ་ས་ཡ་ཕྲག་བཅུ་གསུམ་དག་པར་བྱེད་པའོ། །རྒྱལ་མཚན་གྱིས་མི་མཐུན་པའི་ཕྱོགས་ལས་རྣམ་པར་རྒྱལ་བ་སྟེ་འཁོར་བའི་གཡུལ་ལས་རྒྱལ་བར་བྱེད་པའོ། །ཕྱག་རྒྱས་ནི་རྟོག་ཚོགས་བཞི་བཅུ་རྩ་གཉིས་ཡི་གེ་འཁོར་ལོའི་ས་ཐོབ་པར་བྱེད་དོ། །གདུགས་ཀྱིས་ཉོན་མོངས་པའི་གདུང་བ་ལས་སྐྱོབ་ཅིང་ཐུགས་རྗེའི་ཆར་འབེབས་པ་སྟེ་དུང་ཁང་ན་རྩ་འདབ་སུམ་ཅུ་རྩ་གཉིས་དག་པར་བྱེད་པའོ། །བུམ་པས་ཉོན་མོངས་པའི་དྲི་མ་སྦྱོང་ཞིང་ཟག་པ་མེད་པའི་ཆུ་རྒྱུན་གྱིས་རྒྱུད་བརླན་པར་བྱེད་པའོ། །བཟའ་བཏུང་ནི་འདོད་ཡོན་རྒྱན་དུ་ཤར་བས་རྒུད་པ་སེལ་ཞིང་བསམ་གཏན་གྱི་བདེ་བས་ཚིམ་པར་བྱེད་པའོ། །སྙིང་པོ་ལྔ་ནི་ཉོན་མོངས་པ་ལྔ་དང་ཕུང་པོ་ལྔ། ཡེ་ཤེས་ལྔ་དང་རིགས་ལྔར་དག་པར་བྱེད་པའོ། །དེ་ལྟར་དབང་བཅུ་ནི་སོ་སོའི་དབང་རྫས་ཀྱིས་བསྐུར་བས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཕུན་སུམ་ཚོགས་(༡༧༡)པའི་ནུས་པ་དང་ལྡན་པར་བསམ་མོ། །དེ་དག་གི་ངོ་བོ་ནི་ཐལ་བ་ལས། ཁམས་བཅུད་བདེ་བའི་ལམ་གཉིས་དང་། །དབུ་མ་བཅུད་མདུད་༼སྡུད་༽ཚད་༼མཚན་༽ལྡན་པར། །དྲྭ་བའི་རྩ་དང་དབང་པོ་དང་། །ཕུང་སོགས་ཡེ་ཤེས་བདེ་འཁོར་ལོ། །ཧཱུྃ་གིས་བདེ་བའི་ཡེ་ཤེས་བཅས། །ཚོགས་བརྒྱད་རང་བཞིན་ཡེ་ཤེས་ལྔ། །སྔགས་རྫས་དགོངས་པས་གང་བླངས་པ། །ཀུན་ནས་ལྡང་ཞིང་སྐྱོབ་པ་ཡིས། །སྡུག་བསྔལ་ལས་གྲོལ་རིགས་སུ་ངེས། །ཞེས་སོ། །

གཉིས་པ་ནུས་པའི་དབང་ལྔ་ལས། ཉན་པའི་དབང་ནི། བླ་མ་ཡབ་ཡུམ་གཙོ་བོ་ཡབ་ཡུམ་དུ་གསལ་བའི་སྦྱོར་མཚམས་ནས་ཡི་གེ་བྷྲུྃ་དམར་སེར་གཅིག་འཕྲོས་པ་སློབ་བུའི་རྣ་བའི་ནང་དུ་ཕོག་པར་བསམ་ཞིང་། ལས་ཀྱི་རྡོ་རྗེས་དེར་བདུད་རྩིའི་ཐིག་ལེ་རེ་བྱས་ལ། བྷྲུྃ་ཞུ་བ་ལས་རྣ་བ་གཉིས་སུ་འཁོར་ལོ་རྩིབས་བཞི་གྲུ་ཆད་བཞི་ལ་སྒོ་བཞི་གཏོད་པར། ཡི་གེ་ཏྲཱཾ་ཟུང་ལྔ་ཡ་བཅུ་ཧཱུྃ་བཞི་ཛཿཧཱུྃ་བྃ་ཧོཿདང་བཅས་པ་འོད་དུ་ཞུ་བ་ལས། རིན་ཅེན་འབྱུང་ལྡན་ཡབ་ཡུམ་གྱི་ཕྱོགས་བཞིར། རྡོ་རྗེ་རིན་ཅེན། ཉི་མ། རྒྱལ་མཚན། ཞགས་པ་བཞི། ཡུམ་མཱ་ལེ། པུཥྤེ། པཱ་ཤ །རྡོ་རྗེ་བདེ་བ་སྟེ་ཕོ་བྲང་གི་ལྷ་བཅུ། སྒོ་བ་ཡབ་ཡུམ་དང་བཅས་ཏེ་བཅོ་བརྒྱད་གསལ་བཏབ་ལ། བླ་མའི་ཐུགས་ཀ་ནས་ཕྱག་རྒྱའི་ལྷ་མོ་བཞི་སྤྲོས་ལ་འོག་མིན་ནས་ཡེ་ཤེས་པ་དེ་འདྲ་བ་སྤྱན་དྲངས་ཏེ་བསྟིམས་པས། སྤྱིར་སྒྲིབ་པ་མཐའ་དག་དག་ཅིང་སྒོས་སུ་ཆོས་ཉན་པ་ལ་སྒྲིབ་པ་ཐམས་ཅད་དག་སྟེ། སློབ་མ་ལྷ་དང་བཅས་པ་འོད་དུ་ཞུ་བ་རིན་ཅེན་འབྱུང་ལྡན་དུ་བསྐྱེད་པ་ལ་གསང་བའི་སྙིང་པོའི་པོ་ཏི་གཏད་དེ། ཏྲཱྃ། གསང་བ་གསང་ཆེན་གསང་མཆོག་གང་། །གསང་བ་ཀུན་ལས་མཉན་པར་བྱ། །གསང་བའི་དོན་ཉིད་བརྟག་པ་ལས། །གཞན་དུ་སྨྲ་བར་བྱ་བ་མིན། །ཞེས་བསྒྲག་གོ། །དེ་བཞིན་དུ་འོག་མ་ལའང་བསྒྲེས་ལ། གཉིས་པ་སྒོམ་པའི་དབང་ནི་མེ་ཏོག་ཕོག་པའི་ལྷ་གང་ཡིན་གྱི་རིགས་ལྔའི་ས་བོན་ལས་དེའི་དཀྱིལ་འཁོར་བསྐྱེད་དེ་ཞུ་བ་ལས། ཡང་ལྷ་དེ་ཉིད་དུ་བསྐྱེད་ལ། དབང་རྫས་འཕྲེང་བ་གཏད་དེ། ༀ། དུས་གསུམ་རྒྱལ་བའི་སྲས་ཆེན་པོ། །སྐུ་གསུང་ཐུགས་ཀྱི་རྡོ་རྗེ་བཟུང་། །རྒྱལ་བ་ཐམས་ཅད་མཉེས་མཆོད་ལ། །རྒྱལ་བ་ཀུན་དང་མཉམ་པར་སྦྱོར། །ཞེས་བརྗོད་དོ། །སངས་རྒྱས་གསང་བས་སྙིང་ནང་དུ་ཧཱུྃ་ལས་རྡོ་རྗེར་གྱུར་པ་མི་བསྐྱོད་པར་བསམས་པ་ལས། དབང་རྫས་རྡོ་རྗེ་ཉིད་དུ་སྦྱོར་བར་མཛད་དོ། །

གསུམ་པ་འཆད་པའི་དབང་ནི་ལྕེ་ལ་བྷྲུྃ་འཕྲོས་གཞལ་ཡས་ཁང་གི་རྣམ་པར་གྱུར་པའི་ནང་དུ་ཧྲཱིཿདང་ཛཿཧཱུྃ་བྃ་ཧོཿགྱུར་པ་ལས། སྣང་བ་མཐའ་ཡས་ཡབ་ཡུམ་ལ། རྡོ་རྗེ་ཆོས། རྣོན་པོ། འཁོར་ལོ། སྨྲ་བ་བཞི། ཡུམ་གླུ་མ། མར་མེ། ལྕགས་སྒྲོག །གསལ་བཀྲ་མ་དང་བཅས་པ་སྔར་བཞིན་ནོ། །(༡༧༢)དབང་རྫས་ཚར་རྣོན་འཁོར་ལོ་བྲིས་པ་ལག་ཏུ་གཏད་དེ། ༀ། ཆོས་ཀྱི་བདུད་རྩི་བླ་མེད་ཀྱིས། །དད་ལྡན་སྐྱེས་བུ་ངོམ་པར་བྱོས། །རབ་འབྲིང་ཐ་མའི་བློ་ཅན་ལ། །མཐུན་པར་གསང་བསྒྲག་གཞན་དུ་མིན། །ཞེས་བརྗོད་དོ། །

བཞི་པ་འཕྲིན་ལས་ཀྱི་དབང་ནི་ལག་པ་གཉིས་ལ་སྔར་བཞིན་གཞལ་ཡས་ཁང་དུ་ཧཱུྃ་ལ་སོགས་པར་གྱུར་པས། དོན་ཡོད་གྲུབ་པ་ཡབ་ཡུམ་ལ། རྡོ་རྗེ་ལས། བསྲུང་བ། གནོད་སྦྱིན། ཁུ་ཚུར། ཡུམ་གར་མ། བྱུག་པ། དྲིལ་འཁྲོལ། འབེབས་མ་དང་བཅས་པའི་དམིགས་པ་སྔར་བཞིན་འགྲེས་ལ། དབང་རྫས་རྡོ་རྗེ་རྒྱ་གྲམ་ལག་ཏུ་གཏད་དེ། ༀ་ཁྱོད་ནི་རྡོ་རྗེ་ལས་ཡིན་གྱི། །ལས་རྣམས་མ་ལུས་ཀུན་གྱིས་ཤིག །ཕོ་ཉ་མང་པོའི་འཕྲོ་འདུ་ཀུན། །ཁྱོད་ཀྱི་དགོས་པ་བྱེད་པ་ཡིན། །ཞེས་བརྗོད་དོ། །

ལྔ་པ་རྡོ་རྗེ་རྒྱལ་པོའི་དབང་ནི་མགོ་དང་ཡན་ལག་ལ་དཀྱིལ་འཁོར་ལྔ་དང་ཕྱི་རོལ་ཏུ་ཁྲོ་འཕྲེང་བསྒོམ་སྟེ། དེའང་དཔུང་མགོ་གཡས་སུ་མི་བསྐྱོད་པ་ཡབ་ཡུམ་གྱི་ཕྱོགས་བཞིར་སེམས་དཔའ་རྡོ་རྗེ། རིན་ཅེན་རྡོ་རྗེ། ཆོས་རྡོ་རྗེ། ལས་རྡོ་རྗེ། ཡུམ་ལྡན་མ་རྡོ་རྗེ། འབར་མ་རྡོ་རྗེ། སྡུད་མ་རྡོ་རྗེ། བསྐྱོད་མ་རྡོ་རྗེའོ། །མགོ་ལ་རྣམ་སྣང་ཡབ་ཡུམ། རྡོ་རྗེ་སེམས་དཔའ། རྒྱལ་པོ། ཆགས་པ། ལེགས་པ། ཡུམ་རྡོ་རྗེ་སྒེག་མོ། བདུག་པ། ལྕགས་ཀྱུ། སྒྲོལ་མའོ། །གཡོན་གྱི་དཔུང་མགོར་རིན་ཅེན་འབྱུང་ལྡན་གྱི་དཀྱིལ་འཁོར་སྔར་སྨྲོས་པ་བཞིན་ནོ། །རྐང་པ་གཡས་གཡོན་ལ་དོན་གྲུབ་དང་། འོད་དཔག་མེད་ཀྱི་དཀྱིལ་འཁོར་སྔར་བཞིན་ནོ། །ཕྱི་རོལ་གྱི་ཕྱོགས་མཚམས་སྟེང་འོག་བཅུར་ཁྲོ་བོ་བཅུའི་དཀྱིལ་འཁོར་བསྒོམས་ལ་ཡེ་ཤེས་པ་བསྟིམས་ཏེ། དགྱེས་ནས་སྦྱོར་བ་མཛད་པ་འོད་དུ་ཞུ་བས་སློབ་མ་ཀུན་ཏུ་བཟང་པོར་བསྐྱེད་ལ། དབང་རྫས་རྡོ་རྗེ་དང་དྲིལ་བུ་ལག་ཏུ་གཏད་དེ། ༀ་ཕྱོགས་བཅུ་དུས་བཞི་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་ཆེ། །དཀྱིལ་འཁོར་ཀུན་གྱི་བྱེད་པ་པོ། །དཀྱིལ་འཁོར་ཀུན་གྱི་སྦྱིན་པ་སྤྱོད། །ཅེས་རྗེས་སུ་གནང་བ་སྦྱིན་ནོ། །དེ་ནས་ཟབ་དབང་གི་དོན་དུ་མཎྜལ་ཕུལ་ལ་གསོལ་བ་བཏབ་པས། བླ་མ་ཡབ་ཡུམ་གཙོ་བོ་ཡབ་ཡུམ་དུ་བསྐྱེད་པའི་མཁའ་གསང་བྱིན་གྱིས་བརླབས་ཏེ། སྦྱོར་བ་མཛད་པའི་བྱང་ཆུབ་ཀྱི་སེམས་ཧཱུྃ་གི་རྣམ་པའི་རྒྱུན་ཡབ་ཀྱི་རྡོ་རྗེ་ནས་བྱུང་བ། ཡུམ་གྱི་པདྨའི་རྩེར་བསྐྱིལ་བ་རྡོ་རྗེ་སེམས་དཔའི་སྐུར་གསལ་བ་སློབ་མའི་ལྕེ་ཐོག་ཏུ་བཞག་ན་ཐབས་ཀྱི་གསང་དབང་། དེ་མ་ནུས་ན་ཡུམ་གྱི་པདྨའི་སྣ་རྩེ་ནས་བུས་ལེན་པ་ནི་ཤེས་རབ་ཀྱི་གསང་དབང་། དེ་ཡང་མ་ནུས་ན་ཡུམ་གྱི་མཁའ་ནས་ཡབ་ཀྱི་ལྕེ་ཡིས་བླངས་ཏེ་བུའི་ལྕེ་ཐོག་ཏུ་སྟེར་བ་ཐབས་ཤེས་རབ་གཉིས་སུ་མེད་པའི་གསང་དབང་བསྐུར་བའོ། །དེ་ལྟར་ལྕེ་ཐོག་ཏུ་བཞག་པས་བདུད་རྩིའི་(༡༧༣)རྒྱུན་སྙིང་གར་བབས་ཏེ། འགྲོ་དྲུག་གི་ལས་དང་གཉིད་ཀྱི་བག་ཆགས་སྦྱངས་བདེ་གསལ་མི་རྟོག་པའི་ངང་ལ་བློ་གནས་པར་བྱའོ། །དེ་ནས་ཤེས་རབ་མ་ཉིད་བུ་དང་བཅས་པ་གསང་དབང་བཞིན་བྱིན་གྱིས་བརླབས་པ་བྱས་ཏེ། སྙོམས་པར་འཇུག་པའི་བྱང་ཆུབ་ཀྱི་སེམས་པདྨའི་རྩེར་བབས་པ་ལས་ནུས་པས་བཟློག་ཅིང་བདེ་བའི་ངང་དེར་བླ་མས་གསལ་གདབ་པ་ནི་ཤེས་རབ་ཡེ་ཤེས་ཀྱི་དབང་ངོ་། །དེ་ནས་བདེ་བའི་ངང་དེ་ཉིད་གང་དུའང་མ་གྲུབ་པའི་རང་བཞིན་སྤྲོས་པའི་མཐའ་ཐམས་ཅད་དང་བྲལ་བ་རྫོགས་པ་ཆེན་པོའི་ངོ་བོར་ངོ་སྤྲད་པ་ནི་བདེ་བ་ཆེན་པོའི་དབང་སྟེ་མཐར་ཐུག་གི་ལམ་མོ། །འདིར་བླ་མས་ཤེས་རབ་ཡེ་ཤེས་ཀྱི་དབང་མ་བླངས་པར་གཞན་ལ་གསང་དབང་བསྐུར་བར་མི་ནུས་ཤིང་། སློབ་མས་ཀྱང་དབང་ཡོངས་སུ་རྫོགས་པར་མ་བྱས་པར་ལམ་མི་བགྲོད་པས་དེ་ལྟར་བསྐུར་ཞིང་ལེན་པར་བྱེད་པ་ཡིན་ནོ། །དེ་ནི་སློབ་མ་བློ་སྟོབས་ཅན་ཆགས་པ་དང་མ་བྲལ་བའི་དབང་དུ་བྱས་པའོ། །བློའི་སྟོབས་ཆུང་བ་གྲོལ་ལམ་པ་ལ་ནི་ཏིང་ངེ་འཛིན་དང་བྱང་ཆུབ་བདུད་རྩིའི་རིལ་བུ་ཙམ་གྱིས་བྱེད་པའོ། །ཁ་ཅིག་འདིར་གསང་དབང་ཙམ་དུ་འདོད་པས་ནི་དངོས་དང་ཤུགས་ཀྱི་དོན་མ་མཐོང་བ་ཡིན་ནོ། །དེ་དག་གི་རིམ་པའང་། རྡོ་རྗེ་ལས། དང་པོས་ས་བོན་འཇོག་པ་སྟེ། །གཉིས་པས་ནུས་པ་བསྐྱེད་པ་ཡིན། །གསུམ་པས་ཉམས་མྱོང་བསྐྱེད་པའོ། །བཞི་པས་དེ་ཉིད་བརྟན་པར་བྱེད། །ལྔ་པ་བརྟན་པས་ཉམས་བླངས་པས། །མཆོག་གི་དངོས་གྲུབ་ཚེ་འདིས་འགྲུབ། །ཅེས་སོ། །དེའང་སློབ་དཔོན་སྔ་མ་ཁ་ཅིག་གི་ཕན་དབང་བཅུ། ནུས་དབང་ལྔ། ཟབ་དབང་གསུམ་སྟེ་བཅོ་བརྒྱད་དུ་འདོད་ཅིང་། ཁ་ཅིག་ཟབ་དབང་གསུམ་གཅིག་ཏུ་བསྡུས་ནས་བཅུ་དྲུག་ཏུ་འདོད་ཀྱང་། འདིར་ཕན་པའི་དབང་དང་ནུས་པའི་དབང་ཞེས་གཉིས་སུ་བསྡུས་པས། ཟབ་དབང་ནི་ནུས་དབང་གི་ཁོངས་སུ་འདུ་བས་བཅོ་ལྔ་ཁོ་ནའོ། །

གསུམ་པ་ཕན་ཡོན་བསྒྲགས་ཤིང་དགའ་སྟོན་བྱ་བ་མཇུག་གི་ལས་ལ་ལྔ་ལས། དང་པོ་དབང་བསྐུར་བའི་ཕན་ཡོན་ལ་རྒྱལ་བའི་སྲས་སུ་ཆུད་པ། ཐེག་པ་དམན་པར་མི་ལྡོག་པ། དུས་ཉེ་བ། ལུང་བསྟན་ཐོབ་པ་བཞི་ལས། རྒྱལ་བའི་སྲས་སུ་ཆུད་པ་ནི་དབང་ཐོབ་པ་དེ་ནས་བཟུང་སྟེ་སངས་རྒྱས་ཀྱི་སྲས་སུ་དགོངས་ཤིང་། ཚེ་འདི་ཉིད་ལ་འདོད་པ་འགྲུབ་ཅིང་། ཕྱི་མར་མཐོ་རིས་དང་ཐར་པ་འགྲུབ་ལ། ངན་སོང་ཐམས་ཅད་རྒྱུན་ཆད་པ་སྟེ། འདི་ཉིད་ལས། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་སོ། །ཐེག་པ་དམན་པར་མི་ལྡོག་པ་ནི་རྡོ་རྗེ་རྩེ་མོ་ལས། ཇི་སྲིད་ས་བརྒྱད་མ་ཐོབ་པར། །དེ་སྲིད་ཐེག་པ་དམན་པས་འཇིགས། །གསང་(༡༧༤)ཆེན་ཐེག་པ་འདི་རུ་ནི། །ཞུགས་པ་གང་དང་གང་ཡིན་པ། །དེ་ནི་རྒྱལ་སྲས་ས་པ་ཡིན། །ཞེས་སོ། །དུས་ཉེ་བ་ནི་དེ་ཉིད་ལས། གཞན་ཚེ་བཅུ་དྲུག་གིས་ཐོབ་པ། །ཚེ་འདི་ཉིད་ལ་ཐོབ་པར་འགྱུར། །རྒྱལ་བའི་སྲས་ཀྱི་ས་ཐོབ་ཀྱང་། །དཀྱིལ་འཁོར་གསང་བར་མ་གྱུར་ན། །ཇི་ལྟར་ཁྱོད་ནི་དེ་བྱུང་བ། །དེ་བཞིན་ཐེག་པ་ཡིད་ཆེས་གྱིས། །སྐྱེ་དང་སྐྱེ་བ་ཐམས་ཅད་དུ། །རྡོ་རྗེ་ཅན་ནི་དངོས་བརྩོན་འགྱུར། །སྐྱེ་བ་བཅུ་དྲུག་མཐར་ཐུག་པས། །ཞི་བའི་སངས་རྒྱས་ཉིད་ཐོབ་འགྱུར། །རྒྱལ་བའི་སྲས་ཀྱི་ས་ཐོབ་ཀྱང་། །བསྐལ་པ་གྲངས་མེད་གཉིས་ཀ་སྤྱོད། །གསང་བའི་ཐེག་པར་མ་ཞུགས་པས། །བཅུ་དྲུག་གིས་ནི་འགྱུར་མ་ཡིན། །ཞེས་པ་དང་། ཡང་རྒྱུད་གསང་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ན་ནི། །མ་བསྒྲུབས་པ་ཡང་དངོས་གྲུབ་འཐོབ། །ཅེས་སོ། །ལུང་བསྟན་ཐོབ་པ་ནི། སངས་རྒྱས་མཉམ་སྦྱོར་གྱི་རྒྱུད་ལས། སློབ་མ་དཀྱིལ་འཁོར་བཙུད་ནས་ཀྱང་། །ཡོན་གྱི་མཆོག་དག་བླངས་ནས་ནི། །རྡོ་རྗེ་མིང་གི་དབང་བསྐུར་བས། །དེ་བཞིན་གཤེགས་པར་དེ་ལུང་བསྟན། །ཕྱག་རྒྱའི་སྦྱོར་བ་འདི་དག་གིས། །བྱང་ཆུང་སྙིང་པོའི་བར་དུ་ནི། །རྡོ་རྗེའི་མིང་དུ་རབ་ཏུ་གྲགས། །དེ་ནས་སངས་རྒྱས་སུ་ཡང་འགྱུར། །ཞེས་སོ། །དེའང་ས་ཐོབ་པའི་ཡོན་ཏན་དང་དབང་ཐོབ་པ་གཉིས་རྫུ་འཕྲུལ་ལ་སོགས་པ་མི་འདྲ་ཡང་། སངས་རྒྱས་ཐོབ་པ་ལ་འདི་ཉིད་ཉེ་བས་ལམ་ཟབ་པ་ཡིན་ནོ། །

གཉིས་པ་དབང་མ་ཐོབ་པའི་སྐྱོན་ནི། འདི་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་བརྩོན་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་པ་དང་། བྱ་རྒྱུད་ལས་ཀྱང་། གང་ཞིག་བྱང་ཆུབ་སེམས་ནི་མ་བསྐྱེད་དང་། །གང་ཞིག་དཀྱིལ་འཁོར་དུ་ནི་མ་ཞུགས་པས། །ང་ཡི་གསང་སྔགས་བཟླས་ན་ཕུང་བར་འགྱུར། །ཞེས་སོ། །

གསུམ་པ་བླ་མ་མཉེས་པར་བྱ་བ་ནི་དགོངས་འདུས་ལས། དམ་པ་བླ་མ་བཤེས་གཉེན་ཞེས། །བརྗོད་པའི་ཐོག་མར་ཞེ་ས་གཞུག །ཁྱད་པར་ཅིས་ཀྱང་མཉེས་པར་བྱ། །ཞེས་སོ། །ཇི་ལྟར་མཉེས་པར་བྱ་བ་ཡང་དེ་ལས། མཉེས་པར་བྱ་བའི་ཡོ་བྱད་བརྒྱད། །དམ་པ་དེ་ལ་རྫོགས་པར་དབུལ། །སྐྱོ་དུབ་མེད་པའི་དད་པ་དང་། །གྱོང་ཁེངས་མེད་པའི་མཉེན་ལྕུག་དང་། །སེར་སྣ་མེད་པའི་ཟང་ཟིང་དང་། །སོམ་ཉི་མེད་པའི་སྲི་ཞུ་དང་། །གཡོ་སྒྱུ་མེད་པའི་དྲང་ཐད་དང་། །ཁ་གསགས་མེད་པའི་རང་རྒྱུད་དང་། །རྨོངས་པ་མེད་པའི་ཤེས་རབ་དང་། །དྲི་མ་མེད་པའི་ལྷག་སེམས་བརྒྱད། །དམ་པ་དེ་ལ་རྫོགས་པར་དབུལ། །ཞེས་སོ། །དེའང་བླ་མའི་བཀའ་མི་བཅག་(༡༧༥)ཅིང་ཅི་བྱེད་ཀྱང་ཞུས་ཏེ་བྱ་བ་ཡང་། དེ་ལས། དཀྱིལ་འཁོར་ལ་སོགས་སྦྱིན་སྲེག་དང་། །སློབ་མ་གཟུང་དང་ཆོས་སྨྲ་བ། །ལུང་མ་བྱུང་བར་མི་བརྩམ་སྟེ། །དམ་པའི་ཡུལ་ནས་དེ་མི་རིགས། །གང་དེས་གཞན་གྱི་དོན་བྱས་ན། །དེ་ཡིས་ཡོ་བྱད་མི་སྤྱད་དེ། །དེ་ཀུན་དམ་པ་དེ་ལ་དབུལ། །དམ་པའི་སློབ་མ་སློབ་མར་ཡང་། །དམ་པའི་མདུན་དུ་མི་རིགས་སོ། །ཞེས་སོ། །བླ་མའི་ཡོ་བྱད་རང་དགར་སྤྱོད་ནའང་སྐྱོན་དུ་འགྱུར་ཏེ་དེ་ལས། དམ་པའི་ཡོ་བྱད་མངའ་དབུལ་བའི། །ཕོངས་པ་དེ་ཡིས་གཞན་བསྒྲལ་ན། །དེ་ཡང་དབུལ་པོ་ཉིད་དུ་འགྱུར། །འཚོ་བ་དམ་པ་དང་བྲལ་བས། །ལོངས་སྤྱོད་ཆེན་པོས་ཕོངས་པ་ཡི། །མུ་གེའི་དགོན་པ་ཉིད་དུ་ལྷུང་། །ཞེས་སོ། །དེའང་བླ་མར་བཟུང་ནས་གུས་པར་བྱ་སྟེ། དམ་པར་བཟུང་བར་གྱུར་ཕན་ཆད། །དམ་པར་ངེས་དང་མ་ངེས་ཀྱང་། །བཀའ་བཅག་ལུང་བོར་ག་ལ་སྲིད། །གལ་ཏེ་དེ་ཡི་རྒྱ་ཉམས་ན། །རྡོ་རྗེ་དམྱལ་བར་དེ་འགྲོ་སྟེ། །མི་བཟད་སྡུག་བསྔལ་ཆེན་པོར་འགྱུར། །ཞེས་པ་དང་། རྔམ་གློག་ལས། གལ་ཏེ་ཡོན་ཏན་མི་ལྡན་ཡང་། །བླ་མར་བཟུང་ནས་སྤངས་བྱས་ན། །ཀུན་གྱི་སློབ་དཔོན་བརྙས་པ་ཡིན། །དུས་གསུམ་སངས་རྒྱས་སྐུར་པ་ཡིན། །དེ་ཡི་ཉེས་པ་བརྗོད་མི་ལང་། །ཞེས་སོ། །མདོར་ན་ཉེས་པ་ཚད་མེད་དེ། རྡོ་རྗེ་ལས་རིམ་ལས། དངོས་གྲུབ་ཞིང་གྱུར་དབང་ཕྱུག་ནི། །སངས་རྒྱས་ཀུན་གྱི་མཚན་ཉིད་དེ། །འབད་པས་མཉེས་པར་མི་བྱེད་པ། །བསྐལ་པར་བསྒྲིབས་ནས་མུན་ནག་སོགས། །བདེ་བས་རབ་ཏུ་བྲེལ་གྱུར་ཅིང་། །ཐབས་དང་ཤེས་རབ་ལ་སོགས་ལམ། །ཤིན་ཏུ་རིང་བར་འགྱུར་བ་ཡིན། །ནུས་མཐུ་བྱིན་ལྡན་བདེ་གཤེགས་ལུང་། །ནོར་བུ་རྒྱ་མཚོ་མཁའ་ལྟ་བུ། །ས་བཅུའི་སེམས་དཔའ་ཆེན་པོས་ཀྱང་། །ནུས་མཐུ་གཟུ་ལུམས་མ་ཡིན་ཕྱིར། །གུས་པའི་རིམ་པས་བླང་བར་བྱ། །ཞེས་སོ། །

བཞི་པ་དམ་ཚིག་བསྲུང་བ་ནི། ཀུན་འདུས་ལས། དབང་རྣམས་ལེགས་པར་རྫོགས་གྱུར་པས། །རྩ་བ་ཡན་ལག་དམ་ཚིག་ཀུན། །མ་ཉམས་རབ་ཏུ་བསྲུང་བར་བྱ། །དེས་ནི་དངོས་གྲུབ་མཆོག་ཐོབ་འགྱུར། །ཞེས་སོ། །

ལྔ་པ་དགའ་སྟོན་བྱ་བ་ནི། འདི་ལས། དེ་ནས་རིགས་ཀྱི་བུ་མཆོག་དེས། །རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་འབུལ། །ཞེས་སོ། །

གསུམ་པ་བསྐྱེད་རྫོགས་གོམས་པའི་འབྲས་བུ་བསྟན་པ་ལ་གཉིས་ལས། གནས་སྐབས་སུ་དབང་ཐོབ་པ་དེས་དམ་ཚིག་ལ་གནས་ཤིང་བསྐྱེད་པ་དང་རྫོགས་པའི་རིམ་པ་བསྒོམས་པས། རྣམ་པར་སྨིན་པའི་རིག་འཛིན་ལས་ཚེ་ལ་དབང་བའི་རིག་འཛིན་འཐོབ་སྟེ། ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་(༡༧༦)བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་སོ། །དེའི་རྟེན་ལ་ཕྱག་རྒྱ་ཆེན་པོའི་རིག་འཛིན་ཡང་གྲུབ་ནས། གཉིས་པ་མཐར་ཐུག་གི་འབྲས་བུ་ལྷུན་གྱིས་གྲུབ་པའི་རིག་འཛིན་འཐོབ་སྟེ། དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཞེས་པ་ལ་སོགས་པ་སྟེ། ཚེ་ལོ་བརྒྱ་པའི་ཚེ་ལོ་བཅུ་དྲུག་ཙམ་ན་མཆོག་འགྲུབ་པར་གྲགས་ཀྱང་། རང་རང་གི་རིག་འཛིན་དེ་དུས་ཀྱི་མི་ཚེ་གང་ཡོད་ལ་བརྩིས་པའི་ཚེ་བཅུ་དྲུག་གི་ལོ་གྲངས་ན་འགྲུབ་བོ། །དེའང་རྡོ་རྗེ་རྩེ་མོ་ལས། སྐྱེ་བ་བཅུ་དྲུག་མཐར་ཐུག་པས། །ཞི་བའི་སངས་རྒྱས་ཉིད་ཐོབ་འགྱུར། །ཞེས་སོ། །སྤྱིའི་དོན་བཤད་ཟིན་ཏོ། །

གཉིས་པ་གཞུང་གི་དོན་ལ་གཉིས་ཏེ། དཀྱིལ་འཁོར་གསུངས་ཚུལ་མདོར་བསྟན་པ་དང་། དེའི་རང་བཞིན་རྒྱས་པར་བཤད་པའོ། །

དང་པོ་ནི། ཏིང་ངེ་འཛིན་གྱི་དཀྱིལ་འཁོར་བསྟན་པ་དེ༵་ནས༵་དེ༵་བཞི༵ན་གཤེ༵གས་པ༵་བསམ་གྱིས་མི་ཁྱབ་པའི་ཡེ་ཤེས་ཀྱིས་འགྲོ་བའི་དོན་ལ་དགྱེ༵ས་པ༵་ཆེན༵་པོ༵ས་ཀུན་ཏུ་བཟང་པོ་ཉིད་རྡོ༵་རྗེ༵་གས༵ང་བའི༵་དམ༵་ཚི༵ག་གི་དཀྱིལ་འཁོར་བཀོ༵ད་དེ་དབང་བསྐུར་བའི་རིམ་པ༵་ལ༵་སྙོམས༵་པར༵་ཞུག༵ས་པ་སྟེ་ཡུམ་དང་ལྷན་ཅིག་ཕྱོགས་ན༵ས་ཆེ༵ད་དུ༵་བརྗོད༵་པ༵་འདི༵་སྐད་ཅེས་བརྗོད༵་དོ༵། །

གཉིས་པ་ལ་གསུམ་སྟེ། དབང་པོ་རབ་མཆོག་གི་དཀྱིལ་འཁོར་དུ་དབང་བསྐུར་བ། དམན་པ་རྡུལ་ཚོན་གྱི་དཀྱིལ་འཁོར་དུ་དབང་བསྐུར་བ། གང་དུ་དབང་བསྐུར་བའི་དོན་བསྡུ་བའོ། །དང་པོ་ལ་གཉིས་ཏེ། ཡུམ་གྱི་དཀྱིལ་འཁོར་དུ་དབང་བསྐུར་བ་དང་། ཡབ་ཀྱི་དཀྱིལ་འཁོར་དུ་དབང་བསྐུར་བའོ། །དང་པོ་ལ་གསུམ་སྟེ། དཀྱིལ་འཁོར་དགོད་ཅིང་སྦྱིན་སྲེག་བྱ་བ། སྣང་ལ་རང་བཞིན་མེད་པའི་མཆོད་པ་དབུལ་བ། འཇུག་ཅིང་དབང་བསྐུར་བའོ། །དང་པོ་ལ་གཉིས་ཏེ། དཀྱིལ་འཁོར་དགོད་པ་དང་། སྦྱིན་སྲེག་བྱ་བའོ། །དང་པོ་ལ་གཉིས་ཏེ། དཀྱིལ་འཁོར་བསྟན་པ་དང་། མཆོད་པ་བཤམ་པའོ། །

དང་པོ་ལ་ལྔ་ལས། དང་པོ་གནས་གང་དུ་དཀྱིལ་འཁོར་དགོད་པ་ནི་མཆོག་ཏུ་གསང་བའི་བདེ་བ་ཆེན་པོ་ནི་ཤེས་ཤིང་རིག་པར་དཀའ་བས་ཤིན༵་ཏུ༵་ཕྲ༵་བ༵འི་དོན་ཡིན་ལ། དེ་ཉིད་ཚེ་འདིར་མཆོག་སྒྲུབ་པའི་མེད་དུ་མི་རུང་བའི་ད༵མ་ཚིག༵་གི་མཆོག༵་ཡིན་པས་ན། དེ་གང་ལས་སྐྱེ་ཞིང་འཛིན་པ་ཕྱ༵ག་རྒྱ༵་མཚན་ལྡན་བདེ་བ་ཆེ༵ན་པོ༵ས་ལུས་རྒྱས་པའི༵་ཕྱག༵་མཐིལ༵་ཡུམ་མཁའ་རྣམ་པར་དག་པ་ཉིད་དུ༵་དབང་བསྐུར་བའི་དཀྱིལ་འཁོར་གནས་སོ། །

གཉིས་པ་དཀྱིལ་འཁོར་གྱི་ཚད་ནི་བདེ་བ་ཆེན་པོ་གཉིས་སུ་མེད་པའི་ཡེ་ཤེས་སངས་རྒྱས་ཐམས་ཅད་ཀྱི་ཐུག༵ས་ཀྱི༵་དཀྱི༵ལ་འཁོ༵ར་དམ༵་པ༵་དེ༵་ཉིད་སོ༵ར་གྱི་ཚད་ནི༵་དགའ་བ་དང་། མཆོག་དགའ་དང་། དགའ་བྲལ་གྱི་དགའ་བ་དང་། ལྷན་ཅིག་སྐྱེས་པའི་དགའ་བ་བཞི༵་ཡི༵་ཚ༵ད་དུ༵་བྱ༵་བའོ། །དེ་སྐད་དུའང་ཀློང་གསལ་ལས། ཡུམ་མཁའ་སངས་རྒྱས་ཐམས་ཅད་ཀྱི། །གསང་བ་ཟབ་མོའི་དཀྱིལ་འཁོར་ཏེ། །ཡེ་ཤེས་བཞི་ཡི་རང་བཞིན་དུ། །གཉིས་(༡༧༧)སུ་མེད་པར་དབང་ཉིད་བསྐུར། །ཞེས་པ་ལྟར་རོ། །

གསུམ་པ་ཐིག་གདབ་པ་ནི། གནས་དེའི་རྒྱུད་སྦྱོང་བ་སྟེ། དེའང་འབྲུ༵་ལྔ༵་ནི་སྐྱེ་བའི་ས་བོན་ཏེ་དུག་ལྔ་ཡེ་ཤེས་སུ་གནས་པའོ། །སྤོ༵ས་ལྔ༵་ནི་དེ་ཉིད་གནས་སུ་དག་པའི་ཡེ་ཤེས་ལྔའོ། །རི༵ན་ཅེ༵ན་ལྔ༵་ནི་ཕུང་པོ་ལྔའོ། །སྙིང༵་པོ༵་ལྔ༵་ནི༵་སྐུ་ལྔའོ། །སྨན༵་ལྔ༵་དང༵་ནི་རིགས་ལྔའོ། །བདུ༵ད་རྩི༵་ལྔ༵་ནི་སྐུ་གསུང་ཐུགས་ཡོན་ཏན་འཕྲིན་ལས་ལྔ་དབྱེར་མི་ཕྱེད་པའི་སེམས་ཉིད༵་རྣམ་པར་དག་ཅིང་འོད་གསལ་བའོ། །རབ༵་མཉམ༵་ལ་ཞེས་པ་ནི་དེ་ལྟར་ཡིན་པ་ལ་ཡིན་པར་ཤེས་པར་བྱེད་པས་ཆོས་ཐམས་ཅད་སངས་རྒྱས་པར་མཉམ་པ་ཉིད་དུ་སྟོན་པའོ། །དེ་ལྟར་རི༵ག་པ༵ས་ཡུམ་གྱི་རྒྱུད་ཡེ་ཤེས་ཆེན་པོར་གསལ་བའི་ཚངས་ཐིག༵་གི་མཆོག་རྣམ་པར་དག་པ་ནི༵་གསལ་གད༵བ་པར༵་བྱའོ༵། །དེའང་སྔར་གསང་སྔགས་ལ་རྒྱུད་མ་སྦྱངས་པའི་ཕྱག་རྒྱ་ཡིན་ན་སློབ་དཔོན་དེས་དགེ་བསྙེན་ནས་རིམ་གྱིས་རྒྱུད་དག་པར་གསལ་བར་བྱེད་པའི་ཐིག་རྣམས་གདབ་པར་བྱའོ། །རྒྱུད་སྦྱངས་ཟིན་ལ་ནི་བསྐྱེད་རྫོགས་ལ་སོགས་པ་དང་། རྩ་བཙལ་བ་ལ་སོགས་པའི་ཆོ་ག་བྱེད་པ་ལ་ཐིག་ཏུ་བརྗོད་པ་ཡིན་ནོ། །འདིར་ཁ་ཅིག་བ་སོ་ལ་སོགས་པ་ལ་དཀྱིལ་འཁོར་སོར་བཞི་བྲི་བ་སྟེ། དེ་ལ་ཐིག་གདབ་པ་ཡང་། ཕུང་པོ་ལྔ་དག་པ་སྐུ་ལྔའི་རང་བཞིན་ནས། གྲོ། སྲན་མ། ཏིལ། འབྲས་ཏེ་འབྲུ་ལྔ། དབང་པོ་ལྔ་དག་པ་འཕྲིན་ལས་ལྔའི་རང་བཞིན་ག་བུར་གུར་གུམ། ཙནྡན་དཀར་དམར། ཨ་ཀ་རུ་སྟེ་སྤོས་ལྔ། ཡུལ་ལྔ་དག་པ་ཡོན་ཏན་ལྔའི་རང་བཞིན་གསེར། དངུལ། བྱུ་རུ། མུ་ཏིག །ནོར་བུ་སྟེ་རིན་ཅེན་ལྔ། རྣམ་ཤེས་ལྔ་དག་པ་ཡེ་ཤེས་ལྔའི་རང་བཞིན་ལན་ཚྭ། སྦྲང་། བུ་རམ། མར། ཤིང་འབྲས་ཏེ་སྙིང་པོ་ལྔ། འདོད་ཡོན་ལྔ་དག་པ་གསུང་ལྔའི་རང་བཞིན་ཤུ་དག་དཀར་པོ། དབང་པོ་ལག་པ། སླེ་ཏྲེས། ཀཎྜ་ཀ་རི། ཨ་མྲའི་འབྲས་བུ་སྟེ་སྨན་ལྔ། ཁམས་ལྔ་དག་པ་རིགས་ལྔའི་རང་བཞིན་ཉི་མ། ཟླ་བ། ཆུ། ས། ཤ་ཆེན་གྱི་དྭངས་མ་སྟེ་བདུད་རྩི་ལྔ་རྣམས་ཆ་མཉམ་པའི་ཆུས་སྲད་བུ་སྦངས་ནས་ཐིག་འདེབས་པར་འདོད་ཅིང་། ཚོན་བཀྱེ་བའི་དཀྱིལ་འཁོར་དེ་སློབ་དཔོན་གྱི་ཕྱག་མཐིལ་དུ་བཞག་ནས། དེའི་ཕྱོགས་མཚམས་སུ་མཆོད་པས་བསྐོར་ནས་དཀྱིལ་འཁོར་བསྒྲུབ་པའི་བར་དུ་བྱས་ཏེ་དབང་བསྐུར་བར་བཞེད་པ་ནི། གཞུང་འདིའི་དགོངས་པ་མ་ཡིན་ཏེ། དེ་ལྟ་བུའི་དཀྱིལ་འཁོར་བྲི་བར་ཡང་མི་ནུས་ཤིང་། གལ་ཏེ་ནུས་ནའང་དེར་དབང་བསྐུར་བ་ལ་ཡོན་ཏན་ལྷག་པོ་མེད་དེ། ཆུང་བས་ཡོད་ན་སྐུ་གཟུགས་ལ་སོགས་པ་ཡང་ཤིན་ཏུ་ཆུང་བ་བསོད་ནམས་ཆེ་བར་ཐལ་བའི་ཕྱིར་དང་། བཅོས་མ་ནི་དབང་པོ་རྟུལ་པོའི་རིམ་པ་སྟེ། བདེ་མཆོག་ལས། རི་མོར་གནས་པའི་ལས་དང་ནི། །ཐིག་ལ་(༡༧༨)ཚོན་དགྱེའི་རིམ་པ་དང་། །འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་ལ་གནས་པའོ། །བཅོས་མ་གཉིས་ཀྱི་ངོ་བོ་གང་། །དེ་ནི་བསྒྲུབ་བྱའི་དཀྱིལ་འཁོར་ཏེ། །མཁས་པའི་བསྒྲུབ་བྱར་དེ་མི་འདོད། །ཅེས་གསུངས་པས། འདིར་ཡང་ཚུལ་མཐུན་ཏེ། རང་བཞིན་ལུས་ཀྱི་དཀྱིལ་འཁོར་དུ་དབང་བསྐུར་བ་ཡིན་ནོ། །

བཞི་པ་ཇི་ལྟར་བྲི་བ་ནི་ཡུམ་མཁའི་རང་བཞིན་གཞལ་ཡས་ཁང་གི་རྣམ་པར་གནས་པ་དེ་ཉིད་གསལ་བར་བྱེད་པ་སྟེ། དབུས་སུ་ལྟེ༵་བ༵་རྩི༵བས་ད༵ང་ལྡ༵ན་པ༵་ཡི༵་ངོ་བོ་བྷ་གའི་ནང་གི་རྩ་འདབ་བཞིའོ། །དེའི་རྩི༵བས་བཞི༵་པའི་འཁོ༵ར་ལོ༵་མུ༵་ཁྱུད༵་དང་བཅ༵ས་པ་དེའི་ཕྱི་རོལ་གྱི་དབྱིབས་གྲུ༵་ཆ༵ད་བཞི༵་དང༵་གྲུ༵་བ༵ཞི་པ༵་ཡི༵་རྣམ་པ་ཅན་གྱི་བ༵ར་ཁྱམ༵ས་པདྨའི་སྒོ༵་ཁྱུད༵་ལྡན༵་པ༵་ལ་དེ་ལྟར༵་གསལ་བར་བྱའོ༵། །

ལྔ་པ་མཚན་མ་དགོད་པ་ནི་ལྷའི་གནས་དེར་སྙིགས་མ་དཀར་དམར་གྱི་ངོ་བོ་མཚོན་པ་སེ༵ན་ཟླུམ༵་ཙ༵མ་གྱི༵་ཉི༵་ཟླའི༵་གདན་ལ༵་སྲན་མའི་གའུ་ཕྱེད་པ་ཙ༵་ན༵འི་འབྲུ༵་ཙ༵མ་གྱི་པ༵དྨའི༵་གད༵ན་གྱི་སྟེང་དུ་ཤིན་ཏུ་དྭངས་མ་ཡུང༵ས་འབྲུ༵་ཙ༵མ་གྱི༵་ངོ་བོ་ཡི༵་གེ༵འི་རྣམ་པ་ཧཱུྃ་དུ་གསལ་བ་ལ༵ས་རང་བཞིན་གཉིས་སུ་མེད་པའི་ཕྱག༵་རྒྱ༵་རྡོ་རྗེ་ཏིལ༵་འབྲུ༵་ཙ༵མ་དུ༵་བྲི༵ས་པ་སྟེ་གསལ་གདབ་བོ། །

གཉིས་པ་མཆོད་པ་ནི། ཕྱག་རྒྱའི་གཡོན་ཕྱོགས་སུ་དམིགས་པའི་རྟེན་ཡོད་དམ་མེད་ཀྱང་རུང་སྟེ་ཚོགས་དང་མཆོད་པས་བརྒྱན་པར་བྱ་བ་ཡང་། ཁ་དོག་བསྒྱུར་བའི་གོས་བཅོ༵ས་བུའི༵་རྣམ་པ་དར་དང་རས༵་ནི༵་སྣ༵་ཚོ༵གས་པ་དང༵་། དབུ་རྒྱན་མགུལ་རྒྱན༵་ལ་སོགས་པའི་རྒྱན་སྣ་ཚོགས་དང་། དོ་ཤལ་དང་དྲྭ་ཕྱེད་ལ་སོགས་པའི་འཕྲེང༵་བ་སྣ་ཚོགས་དང་། ཇ་དང་ཆང་ལ་སོགས་པའི་བཏུང༵་བ་སྣ་ཚོགས་དང༵་། ཤ་དང་ཐུད་དང་ཕྲུམ་ལ་སོགས་པའི་བྲོ༵་བས༵་བསྐོར༵་ཅིང་། ཤིན་ཏུ་སྙན་པའི་གླུ༵་དང་བསྟོད་པའི་ཚིག༵་མཛེས་པར་བྱེད་པའི་སྐྱེ་བོས་རྐང་པའི་བྲོ༵་དང་ལག་པའི་གར༵་བསྒྱུར་ཅིང་། དུང་དང་ཆ་ལང་དང་པི་ཝང་དང་གླིང་བུ་དང་གདུགས་དང་རྒྱལ་མཚན་ལ་སོགས་པའི་རོ༵ལ་མོ༵འི་སྤྲིན༵་ཕུང༵་བསམ་གྱིས་མི་ཁྱབ་པའི་ཚོ༵གས་ཀྱིས༵་རབ༵་ཏུ༵་མཆོ༵ད་ཅིང་། གཞན་ཡང་མཆོད་པའི་རྐྱེན་དུ་གྱུར་པའི་ཡུམ༵་ད༵ང་ཡིད་འཇོ༵་བར་བྱེད་པའི་དགའ་མ༵་དང་ན་ཚོད་གཞོན་ནུར་གྱུར་པའི་སེ༵མས་མ༵་ཡི༵ས་རོལ་པའི་དགའ་བ་བསྐྱེད་པ་དང་། རེག་བྱའི་དགའ་བ་བསྐྱེད་པ་དང་། མིག་གི་དགའ་བ་བསྐྱེད་པ་སྟེ་རྣམ་གསུམ་པོ་ཇི༵་ལྟར༵་འདོད༵་པའི༵་ལ༵ས་བཞི༵ན་མཆོ༵ད་པས་བརྒྱན་པར་བྱའོ། །སྐབས་འདིའི་མཆོད་པའི་གཙོ་བོ་ནི་བདེ་བ་སྟེར་བར་བྱེད་པའི་ཡུམ་ཕྱི་ནང་གསང་བ་གསུམ་གྱི་ཡུལ་རྣམས་ཡིན་པར་བཞེད་དོ། །

གཉིས་པ་སྦྱིན་སྲེག་གི་ལས་ལ་གཉིས་ལས། དང་པོ་ལས་བཞིའི་སྦྱིན་སྲེག་སྤྱིར་བསྟན་པ་ནི། ལས་བཞིའི་རིམ་པས་ཐབ་ཁུང་གི་དབྱི༵བས་ཀྱང་ཟླུམ་པོ་ལ་སོགས་པ་(༡༧༩)དང༵་། ཁ༵་དོག༵་ཀྱང་དཀར་པོ་ལ་སོགས་པ་སོ་སོའི་མཚ༵ན་ཉིད་ཚང་བ་དང་ལྡ༵ན་པ༵ར་མེ་ལྷའི་རང་བཞིན་མཆོད་སྦྱིན་གསོལ་བའི་ཞལ༵་དུ༵་གྱུར༵་པའི༵་ལྟོ་བར་འཇིག་རྟེན་ལས་འདས་པའི་མེ༵་ལྷ་བོ༵ས་ཏེ་སྤྱན་དྲངས་ལ༵་ཞོ་ཟན་དང་མར་ཁུ་ལ་སོགས་པ་བཟ༵འ་བཏུང༵་བྲོ༵་བ༵འི་ཚོ༵གས་རྣམ༵ས་ཀྱིས༵་མཆོད་ཅིང་། ཞི་བ་ལ་ཏིལ། རྒྱས་པ་ལ་རིན་པོ་ཆེ་ལ་སོགས་པ་ལས༵་བཞིའི༵་མཆོད༵་པ༵་སོ་སོའི་སྔགས་དང་ཏིང་ངེ་འཛིན་གྱིས་ར༵བ་ཏུ༵་སྦྱིན༵་པར་བྱའོ། །

གཉིས་པ་ཁྲོ་བོའི་སྦྱིན་སྲེག་བྱེ་བྲག་ཏུ་བཤད་པ་ནི། ཞི་བའི་སྦྱིན་སྲེག་ཇི་ལྟ་བར་ཁྲོ༵་བོ༵འི་དཀྱི༵ལ་འཁོ༵ར་དུ་ཡང་ཐབ་དང་ལྷའི་མཚན་ཉིད་ལ་སོགས་པ་དེ༵་བཞི༵ན་དུ་བྱ་སྟེ༵། ཏིང་ངེ་འཛིན་ལ་སོགས་པའི་གནད་ཤི༵ན་ཏུ༵་ཕྲ༵་ཞིང་ཟབ་མོ་རྣམས་ལ༵་རབ་ཏུ་སྦྱང༵ས་པ༵་ཡི༵ས་རྣལ་འབྱོར་པས། ལྷའི་དཀྱིལ་འཁོར་བས༵མ་ཡ༵ས་ད༵ག་ལ༵འང༵་ཆོ་གའི་རིམ་པ་དེ༵་ཁོ་ན་བཞི༵ན་དུ་སྦྱིན་སྲེག་གིས་མཉེས་པར་བྱའོ༵། །དེའང་ལྷ་གང་གི་དཀྱིལ་འཁོར་ལ་ལས་གང་གིས་སྦྱིན་སྲེག་ཇི་ལྟར་བྱེད་པའི་ཚུལ་རྣམས་ནི་གནས་སྐབས་དང་སྦྱར་བའི་རང་གི་རི༵ག་པ༵ས་ལེགས་པར་དཔ༵གས་པ༵་དེ་ཙ༵མ་དུ༵་བྱའོ༵། །

གཉིས་པ་སྣང་ལ་རང་བཞིན་མེད་པའི་མཆོད་པ་འབུལ་བ་ལ་གཉིས་ཏེ། ཏིང་ངེ་འཛིན་ཡིད་ཀྱི་མཆོད་པ་དང་། གསང་བ་བདེ་བ་ཆེན་པོའི་མཆོད་པའོ། །དང་པོ་ལ་གཉིས་ཏེ། ཀུན་རྫོབ་སྒྱུ་མའི་མཆོད་པ་དང་། དེའི་རྫོགས་རིམ་དོན་དམ་པ་ཡེ་ཤེས་ཀྱི་མཆོད་པའོ། །

དང་པོ་ལ་གཉིས་ལས། ཏིང་ངེ་འཛིན་གྱི་མཆོད་སྤྲིན་བཀོད་པ་ནི་དཀྱིལ་འཁོར་ལ་ཡིད་སྤྲུལ་གྱིས་ཇི་ལྟར་མཆོ༵ད་པ༵འི་ཕྱག༵་རྒྱ༵་ཆེ༵ན་པོ༵་ནི༵་རང་གི་སེམ༵ས་ཀྱི༵་བཀོད་པའི་ཡི༵ད་བཞི༵ན་གྱི་ནོར་བུའི་སྤྲིན༵་ཕུང་འཁྲིགས་པའི་ཚོག༵ས་ཀྱི༵ས་ཕྱོག༵ས་བཅུ༵འི་འཇིག་རྟེན་གྱི་ཁམས་ཐམ༵ས་ཅ༵ད་སང༵ས་རྒྱས༵་ཀྱི་ཞིང༵་ཁམས་རྣམ་པར་དག་པ་རིན་པོ་ཆེ་སྣ་ཚོགས་ཀྱི་རང་བཞིན་རྒྱན་སྟུག་པོ་བཀོད་པའི་ཞིང་ཁམས་ལྟ་བུར་བྷྲུྃ་གྱིས་གསལ་གདབ་བོ། །དེའང་རྒྱན་དང་བཀོད་པའི་བྱེ་བྲག་བསམ་གྱིས་མི་ཁྱབ་ཅིང་ཡིད་དུ་འོང་བས་མཛེས་པར་སྤྲས་ཤིང་། མཉེ༵ན་ལ་འཇ༵མ་ཞིང་རེ༵ག་ན༵་བདེ༵་བ༵འི་རང་བཞིན་རྒྱུ་སྣ༵་ཚོ༵གས་རི༵ན་པོ༵་ཆེ༵་ཡི༵་ས་གཞི༵་ཁོད་སྙོམས་པ་ལ། རིན་པོ་ཆེ་སྣ་ཚོགས་ཀྱིས་མིག་མང་རིས་སུ་མཛེ༵ས་པ༵ར་བྲི༵ས་ཤི༵ང་ལྷའི་ནོར་བུ་སྣ་ཚོགས་ཀྱིས་ཚོམ་བུ་རབ་ཏུ་བརྒྱན་པས་ཕྱོགས་བཅུ་ཀུན་ཏུ་འཁྱིལ་བར་སྤྲས༵་པ༵་ད༵ང་ཏྲཱཾ་ལས་འདོད་དགུ་ཀུན༵་འབྱུང༵་བའི་རིན༵་ཅེ༵ན་སྣ་བདུན་གྱི་ཕུང༵་པོ༵་འོད་ཟེར་གྱི་དྲྭ་བ་འབ༵ར་བའི་རི་བོ་ལྷུན་སྟུག་པ་དང་། ཁྃ་ལས་མཚོ་དང་ལྡེང་ཀ་ལ་སོགས་ཁ་དོག་མཛེས་ཤིང་དབྱི༵བས་ལེ༵གས་པའི་པདྨའི་རྫི༵ང་བུ༵་རོ་བྲོ༵་བའི་མཆོ༵ག་བསི༵ལ་བ་ལ་སོགས་པ་ཡན་ལག་བརྒྱད་ལྡན་གྱི་ཆུས་ཡོངས་སུ་གང་བ་མེ་ཏོག་གིས་ཁེབས་ཤིང་བྱ་སྐད་སྙན་པར་སྒྲོགས་(༡༨༠)པའོ། །བརྒྱད་ལྡན་ནི་འདུལ་བ་ལུང་ལས། ཡང་དང་དྲོ་དང་འཇམ་པ་དང་། །དྭངས་དང་བསིལ་དང་རྙོག་པ་མེད། །འཐུང་ན་ལྟོ་ལ་མི་གནོད་དང་། །མགྲིན་པ་ལའང་མི་གནོད་པ། །འདི་དག་ཡན་ལག་བརྒྱད་ལྡན་ཆུ། །ཞེས་སོ། །བྷྲཱྃ་ལས་རི༵ན་པོ་ཆེ༵འི་ཁང༵་པ༵་དབྱིབས་དང་ཁ་དོག་དང་བཀོད་པའི་བྱེ་བྲག་སྣ༵་ཚོ༵གས་པས་བརྒྱན་པ་རབ་ཏུ་མང་པོ་དང༵་། ༀ་ལས་སྐྱེད་མོས་ཚལ་གྱི་གཞིར་རིན་པོ་ཆེའི་རྒྱན༵་འཕྲེང་དང༵་ལྷའི་དཔ༵ག་བས༵མ་གྱི་ཤིང་ལྗོན༵་པ༵འི་ཚ༵ལ་གོས་དང་ནོར་བུ་སྣ་ཚོགས་ཀྱི་དྲྭ་བས་དཔྱངས་པ་དང་། ཧྲཱིཿལས་སྒྲ་སྐད་ཐམས་ཅད་གླུ༵་དབྱ༵ངས་སྙན་པ་དང་། བསྟོད་པ་དང་ཤིས་པ་བརྗོད་པ་ལ་སོགས་པའི་ཚིག༵ས་སུ༵་བཅ༵ད་པ༵འི་སྒྲ༵་རང་འབྱུང་བ་དང་། ༀ་ལས་གོས་ཀྱི་རྣམ་པ་དང་མཆོད་པའི་ཡོ་བྱད་བླ༵་རེ༵་དང་རྒྱལ༵་མཚ༵ན་དང་གདུགས་དང་སྟོད་གཡོགས་སྨད་གཡོགས་ལ་སོགས་པའི་ན༵་བཟ༵འ་སྣ་ཚོགས་དང༵་། ཏྲཱྃ་ལས་དབུ་རྒྱན་དང་མགུལ་རྒྱན་དང་དོ༵་ཤལ༵་དང་དཔུང༵་རྒྱན༵་དང་སེ༵་མོ༵་དོ༵་ལ་སོགས་པ་རྒྱན་གྱི་བྱེ་བྲག་བསམ་གྱིས་མི་ཁྱབ་པ་དང་། ༀ་ལས་རོ་མཆོག་བརྒྱ་དང་ལྡན་པའི་བཟ༵འ་བ་སྣ་ཚོགས་དང༵་། བདུད་རྩིའི་བཏུང༵་བ་ཞིམ་པོ་དང་། གོས་ཟུངས་རིན་པོ་ཆེ་སྣ་ཚོགས་ཀྱིས་སྤྲས་པའི༵་བསྒོ་བ་སྣ་ཚོག༵ས་པ་རྣམ༵ས་དང༵་། ཧཱུྃ་ལས་སེམས་ཅན་ཐམས་ཅད་ཀྱི་ལུས་དང་རང་རང༵་ལ༵་ཇི་ལྟར་འོས་པའི་གོས་དང་རྒྱན་ལ་སོགས་པས་མཛེ༵ས་པ༵ར་བརྒྱན༵་པ༵་ཡི༵་ལྷ༵་དང༵་ལྷ༵་མོ༵འི་རང་བཞིན་རྡུལ༵་ཕྲ་བ་སྙེད༵་ཀྱི༵་གྲངས་དང་མཉམ་པར་གྱུར་པ་ཐམས་ཅད་ཀྱིས་རྐང་པའི་བྲོ༵་དང་ལག་པའི་ག༵ར་དང་རོལ་མོའི་གླུ་དབྱངས་ལ༵་སོག༵ས་པ་བས༵མ་ཡ༵ས་ཀྱིས༵་མཉེས་པར་བྱས་པའོ། །དེ་ལྟ་བུའི་མཆོད་པའི་སྤྲིན་གྱིས་ཕྱོག༵ས་བཅུའི་ནམ༵་མཁའི༵་ཁམ༵ས་ཇི་སྙེད་པ་ཐམས་ཅད་ཡོངས་སུ་བཀ༵ང་ན༵ས་འཁོར་བ་དང་མྱ་ངན་ལས་འདས་པའི་དབྱིངས་ཀྱིས་བསྡུས་པའི་གཞི་ལམ་འབྲས་བུའི་དཀྱི༵ལ་འཁོ༵ར་དུ་གྱུར་ཏོ་ཅོག་ཀུན༵་ལ༵་མཆོད་སྤྲིན་དེ་དག་གིས་རེ་རེ་ཞིང་རྒྱས༵་པ༵ར་དབུ༵ལ་བའོ། །

གཉིས་པ་ཚུལ་ཇི་ལྟར་དབུལ་བ་ནི་སྐལ༵་ལྡན༵་རྣལ་འབྱོར་པའི་ཏིང་ངེ་འཛིན་མི་གསལ་བ་དང་གས༵ལ་བ༵འི་ཁྱད༵་པ༵ར་གྱི༵ས་རིམ༵་གྱི༵ས་སམ། ཡང༵་ན༵་ཅི༵ག་ཅར༵་དུ༵་གསལ་ལམ་གྱིས་རྒྱ་ཆེ་བ་ཆོ༵ས་ཀྱི༵་དབྱིང༵ས་ད༵ང་མཉ༵མ་པར་སྦྱོར༵་ཞིང༵་འབུལ་ལོ། །

གཉིས་པ་དེའི་རྫོགས་རིམ་དོན་དམ་ཡེ་ཤེས་ཀྱི་མཆོད་པ་ནི། ཏིང་ངེ་འཛིན་གྱི་མཆོད་པ་ལ་དངོས་ཞེན་སྤོང་བའི་ཕྱིར་མཆོད་སྤྲིན་དེ་དག་ཀྱང་རང་གི་སེམས་ཙམ་ལས་གང་དུའང་གྲུབ་པ་མེད་ལ་སེམས་དེ་ཡང་ནམ་མཁའ་ལྟ་བུའི་རང་བཞིན་གང་ནའང་མི་གནས་ཤིང་སྤྲོས་པའི་མཐའ་ཐམས་ཅད་དང་བྲལ་བའི་ངང་ལ་མཆོད་བྱ་དང་མཆོད་བྱེད་དང་མཆོད་པ་གསུམ་གའི་ངོ་བོ་མ་གྲུབ་པའི་ཚུལ་གྱིས་མཆོ༵ད་པ༵འི་ཕྱག༵་རྒྱ༵་ཆེ༵ན་པོ༵ར་བསྒོ༵མ་པར་བྱའོ། །དེའང་བློ་རབ་ཀྱིས་(༡༨༡)མཆོད་དུས་ཉིད་ནས་དེ་ལྟར་བསྒོམ་ཞིང་འཛིན་ཞེན་མེད་པར་བྱས་ལ། དམན་པས་རྗེས་ལ་མི་དམིགས་པའི་ངང་ལ་བཞག་གོ། །འདི་ནི་མཆོད་པའི་མཆོག་སྟེ། དཀོན་ཅོག་ཏ་ལ་ལའི་མདོ་ལས། གང་ལ་མཆོད་པ་ནམ་མཁའ་འདྲར་ཤེས་ཤིང་། །གང་གིས་མི་དམིགས་གང་དུའང་འཛིན་པ་མེད། །དེ་ནི་མཆོད་པ་ཀུན་གྱི་དམ་པ་སྟེ། །ཡེ་ཤེས་གཞལ་མེད་བསམ་ཡས་རབ་འཐོབ་འགྱུར། །ཞེས་སོ། །

གཉིས་པ་གསང་བ་བདེ་བ་ཆེན་པོའི་མཆོད་པ་ལ་གཉིས་ཏེ། ཐབས་བདེ་བ་ཆེན་པོའི་མཆོད་པ་དང་། ཤེས་རབ་མཐའ་གཉིས་ལ་མི་གནས་པའི་མཆོད་པའོ། །དང་པོ་ལ་གཉིས་ཏེ། མཆོད་པ་དངོས་དང་། དེའི་ཕན་ཡོན་བསྟན་པའོ། །

དང་པོ་ནི། ལས་ཀྱི་ཕྱག་རྒྱ་ཤེས་རབ་དང་ཏིང་ངེ་འཛིན་གས༵ལ་བར་ལྡན༵་མའམ་དེ་དང་མི་ལྡན་ན་རྣལ་འབྱོར་པས་ལྷར་བསྐྱེད་ཅིང་མཁའ་གསང་བྱིན༵་གྱིས་བརླབ༵་པ་ལ༵་སོགས་པའི་ཆོ་གས་བྱིན་གྱིས་བརླབས་ལ། པདྨའི་རྩེར་ཡུངས་འབྲུ་ཙམ་གྱི་དྭངས་མ་དཀར་དམར་དཀྱིལ་འཁོར་དུ་བསྐྱེད་དེ། སྟོང༵་གསུ༵མ་གྱི་འཇིག་རྟེན་ཐམས་ཅད་འཕགས་པའི་རྫུ་འཕྲུལ་གྱིས་ཡུངས་འབྲུར༵་གཞུག༵་ཅིང་ཚུད་པར་བྱིན་གྱིས་བརླབས་པས་སྟོང་གསུམ་ཆུང་དུ་མི་འགྲོ་ཡུངས་འབྲུ་ཆེར་མི་འགྲོ་བའི་ཚུལ༵་དུ༵་པདྨའི་ཁྱམས་རྟེན་གྱི་དཀྱིལ་འཁོར་ཆེར་མི་འགྲོ་ཡེ་ཤེས་པ་ཆུང་དུ་མི་འགྲོ་བའི་ཆོས་ཀྱི་དབྱིང༵ས་ནས༵་རྒྱལ་བའི་དཀྱིལ༵་འཁོ༵ར་དཔག་ཏུ་མེད་པ་པདྨའི་ཁྱམས་སུ་སྤྱན༵་དྲང༵ས་ཤིང་བསྟིམ་ལ། སྦྱོར་བའི་བརྡས་བསྐུལ་ཏེ་རོལ་པའི་བདེ་བས་མཆོད༵་པར་བྱའོ། །དེས་དཀྱིལ་འཁོར་གྱི་ལྷ་རྣམས་མཉེ༵ས་ན༵ས་དངོས་གྲུབ༵་ཆེན་པོ་བསམ་གྱིས་མི་ཁྱབ་པ༵འི་དམ༵་ཚི༵ག་མཆོ༵ག་གི་གོ་འཕང་ཐོབ་པར་བསམ་མོ། །དེ་ནི་སྔར་དཀྱིལ་འཁོར་བཀོད་པ་སོར་བཞི་ལ་ཡེ་ཤེས་པ་གཞུག་ཅིང་དབང་བསྐུར་བའི་སྔོན་དུ་བསྙེན་བསྒྲུབ་བྱ་བའི་རིམ་པའང་གསལ་བར་བསྟན་ཏོ། །

གཉིས་པ་དེའི་ཕན་ཡོན་ལ་གཉིས་ཏེ། གནས་སྐབས་དང་། མཐར་ཐུག་གོ། །

དང་པོ་ལ་གཉིས་ལས་སངས་རྒྱས་ཐམས་ཅད་མཉེས་པ་ནི། བདེ་བའི་བད༵ག་ཉིད༵་ཆེ༵ན་པོ༵ས་ཡུམ་མཁའི་དཀྱིལ་འཁོར་ལ་མཆོ༵ད་པ༵་ཡི༵ས་ཕྱོགས་བཅུ་དུས་བཞིའི་སང༵ས་རྒྱས༵་ཀྱི་དཀྱི༵ལ་འཁོ༵ར་མ༵་ལུས༵་པ་ཐམས་ཅད་མཉེས༵་པར་འགྱུར་རོ། །ཡང་བདག་ཉིད་ཆེན་པོ་རང་རིག་པའི་ཡེ་ཤེས་ལ་རོལ་པའི་བདེ་བས་མཆོད་པ་ཡིས་ཁམས་དང་སྐྱེ་མཆེད་ཡེ་ནས་སངས་རྒྱས་པའི་དཀྱིལ་འཁོར་བཞི་བཅུ་རྩ་གཉིས་ལ་སོགས་པའི་ལྷ་རྣམས་མཉེས་པར་འགྱུར་རོ། །ཡང་ཡབ་ཀྱིས་ཡུམ། ཡུམ་གྱིས་ཡབ་ལ་བདག་ཉིད་ཆེན་པོའི་མཆོད་རྫས་དེས་མཆོད་པས་ཐབས་དང་ཤེས་རབ་ཀྱི་ལྷ་རྣམས་མཉེས་པར་འགྱུར་བ་སྟེ་ཕྱི་ནང་གསང་བ་གསུམ་དུ་ཤེས་པར་བྱའོ། །འགྲོ་བ་ཐམས་ཅད་ཚིམས་(༡༨༢)པ་ནི། དེ་ལྟར་བདེ་བའི་རོལ་པས་ལུས་སྣང་བའི་གྲོང་ཁྱེར་འདོད་པའི་སྲིད་པ་ངག་ཕྱེད་སྣང་གི་གྲོང་ཁྱེར་གཟུགས་ཀྱི་སྲིད་པ་ཡིད་མི་སྣང་བའི་གྲོང་ཁྱེར་གཟུགས་མེད་པའི་སྲིད༵་པ་གསུམ༵་གྱིས་བསྡུས་པའི་ཚོར་བ་དང་རྟོག་ཚོགས་ཀྱི་འགྲོ༵་བ༵་ཐམ༵ས་ཅ༵ད་ལ༵་ཡེ་ཤེས་ཆེན་པོའི་དགའ༵་བ༵་བཞི་དང་གཉིས་སུ་མེད་པའི་ཆོས་ཉིད་བཞི་དང་སྤྲོས་པ་དང་བྲལ་བའི་འོད་གསལ་ཆེ༵ན་པོ༵ས་ཁྱབ༵་པ༵ར་འགྱུར༵་རོ། །ཆོས་ཉིད་བཞི་ནི་ལུས་གཉིས་སུ་མེད་པའི་ཆོས་ཉིད་ཡབ་དང་ཡུམ་དུ་འཛིན་པ་མེད་པས་གཟུང་འཛིན་མཐའ་དག་ལས་གྲོལ་བ་དང་། ངག་གཉིས་སུ་མེད་པའི་ཆོས་ཉིད་བརྗོད་དུ་མེད་པས་སྤྲོས་པ་དང་ཞེན་པ་ཀུན་ལས་གྲོལ་བ་དང་། ཡིད་གཉིས་སུ་མེད་པའི་ཆོས་ཉིད་རྟོག་ཚོགས་བདེ་བ་ཆེན་པོར་གྲོལ་བས་རང་བཞིན་ཆོས་སྐུའི་ངོ་བོ་མཐོང་བ་དང་། ཡེ་ཤེས་གཉིས་སུ་མེད་པའི་ཆོས་ཉིད་བདེ་བའི་ངང་ལ་འཛིན་མེད་ཆེན་པོར་གནས་པས་འོད་གསལ་གྱི་འཁོར་ལོ་རྒྱུན་མི་འཆད་པའོ། །འོད་གསལ་བཞི་ནི་དེའི་ཚེ་བདེ་བའི་འོད་གསལ་སྒོ་གསུམ་དགའ་བས་ཁྱབ་པས་སྣང་སྲིད་དགའ་བདེར་ཤར་བ་དང་། གསལ་བའི་འོད་གསལ་བདེ་བའི་ངང་ལས་སེམས་ཀྱི་ངོ་བོ་རང་གསལ་ཐབས་ཤེས་སུ་སྣང་བ་མ་འགགས་པ་དང་། མི་རྟོག་པའི་འོད་གསལ་ཕྲ་རགས་སུ་ཞེན་པའི་བྱུང་ཚོར་ནུབ་པས་གང་ལའང་མི་འཕྲོ་བར་རྟོག་མེད་དུ་གནས་པ་དང་། བསམ་གྱིས་མི་ཁྱབ་པའི་འོད་གསལ་ཆོས་ཉིད་ཀྱི་ངང་ལས་རྟགས་བཅུའི་སྣང་བ་ཤར་བའོ། །རྟགས་བཅུ་ནི་རླུང་སེམས་དབུ་མར་ཚུད་པས་དབྱིངས་དང་ཡེ་ཤེས་རོ་གཅིག་ཏུ་གྱུར་པའི་རྟགས་སུ། དུ་བ་དང་། སྨིག་རྒྱུ་དང་། སྤྲིན་དང་། མེ་ཁྱེར་དང་། ཉི་མ་དང་། ཟླ་བ་དང་། རིན་པོ་ཆེ་འབར་བ་དང་། སྒྲ་གཅན་དང་། སྐར་མ་དང་། འོད་ཟེར་གྱི་སྣང་བ་ལྟ་བུ་འབྱུང་བའོ། །རྒྱུད་སྡེ་གཞན་ལས་ཀྱང་དེ་དང་ཅུང་ཟད་མི་འདྲ་བའི་རྟགས་བཅུ་བཤད་དོ། །

གཉིས་པ་མཐར་ཐུག་གི་འབྲས་བུ་སངས་རྒྱས་ཐོབ་པ་ནི་སྒྱུ༵་འཕྲུལ༵་དྲ༵་བ༵་ཐབས་དང་ཤེས་རབ་ཀྱི་ཏིང་ངེ་འཛིན་རྟགས་བཅུས་མཚོན་པ་དེ་ཉིད་གོམས་པ་རབ་ཏུ་བརྟན༵་པ༵་ལས་བྱུང་བ་དེ་ཡི༵ས་འབྲས་བུ་ཕྱོག༵ས་བཅུ༵་དུས༵་བཞི༵ར་གཤེ༵གས་པ༵་ཡི༵་སང༵ས་རྒྱས༵་ཀྱི་དཀྱི༵ལ་འཁོ༵ར་མ༵་ལུས༵་པའི་རང་བཞིན་དང༵་། ཁམས༵་གསུམ༵་གྱི་འགྲོ༵་བ་རྣམས་ལ་ཐུགས་རྗེས་གཟིགས་པའི་ཡེ་ཤེས་དམ་པ་མངོ༵ན་དུ༵་འགྱུར༵་རོ། །ཡང་ན་སངས་རྒྱས་ཐམས་ཅད་ཀྱི་དཀྱིལ་འཁོར་ཕུང་པོ་ཁམས་དང་སྐྱེ་མཆེད་ལྷར་གསལ་བ་མཐར་ཐུག་པ་དང་། སྒོ་གསུམ་སྐུ་གསུང་ཐུགས་ཀྱི་ངོ་བོར་འཁོར་ལོ་མངོན་དུ་འགྱུར་བ་ཞེས་བྱའོ། །

གཉིས་པ་ཤེས་རབ་མཐའ་གཉིས་ལ་མི་གནས་པའི་མཆོད་པ་ནི། དེ་ལྟར་ཡབ་ཡུམ་གཉིས་སུ་མེད་པར་སྙོམས་པར་ཞུགས་པའི་ཉོན་མོངས་པའི་འཛིན་ཞེན་དང་ཐ་མལ་གྱི་རྣམ་རྟོག་རང་སར་དག་པར་བྱ་བའི་ཕྱིར། རང་དང་ཡུམ་གྱི་ལུས༵་དང་ང༵ག་དང་སེམ༵ས་དང༵་བདེ་བས་མཚོན་པའི་ཕྱི་ནང་གི་ཆོ༵ས་ཐམ༵ས་ཅ༵ད་ཀྱི་རང་(༡༨༣)བཞིན་གཟུང་བའི་ཡུལ་གང༵་ན༵འང་མི༵་གན༵ས་ཤིང་འཛིན་པའི་སེམས་གང་དུའང་མི༵་དམི༵གས་པ༵འི་ངང་ལས། མེད་བཞིན་དུ་སྣང་བ་མི༵ག་ཡོ༵ར་ལྟ་བུའི་ཚུལ༵་དུ༵་ཡབ་ཡུམ་གཉིས་སུ་མེད་པར་སྦྱོར༵་བ༵་ཡི༵ས་ཐབས་དང་ཤེས་རབ་གཉིས་སུ་མེད་པའི་དབྱིངས་སྐྱེ་བ་མེད་པའི་ནམ༵་མཁ༵འ་ལ༵་ནི༵་སེམས་ཉིད་འགགས་པ་མེད་པའི་ཡེ་ཤེས་ནམ༵་མཁ༵འ་བསྒོ༵མ་ཞིང་དབྱེར་མེད་པའི་ཆོས་ཉིད་དོན་གྱི་ངོ་བོར་མཉམ་པར་བཞག་ཅིང་རོལ་བར་བྱའོ། །

གསུམ་པ་འཇུག་ཅིང་དབང་བསྐུར་བའི་ཚུལ་ལ་གཉིས་ཏེ། འཇུག་པ་དང་། དབང་བསྐུར་བའོ། །

དང་པོ་ལ་གཉིས་ལས། སློབ་དཔོན་བདག་ཉིད་འཇུག་པ་ནི། དེ་བཞིན་ཉིད་ཀྱི་ཏིང་ངེ་འཛིན་བསྒོམ་པ་ནས་བཟུང་སྟེ་ཆོ་གའི་སྔོན་དུ་བྱ་དགོས་པ་ཀུན༵་བྱ༵ས་ནས་ཚོགས་དང་རྣལ་འབྱོར་གྱི་དབང༵་ཕྱུག༵་རྡོ་རྗེ་སློབ་དཔོན་ཉིད་ཏིང་ངེ་འཛིན་གྱི་རིག༵་པ༵ས་དཀྱིལ་འཁོར་དུ་སྔོན་ལ་འཇུག༵་པར་བྱའོ། །

སློབ་མ་འཇུག་པ་ནི། སློབ་དཔོན་ཞུགས་པ་དེ༵་ནས༵་སློབ༵་མ༵་རྣམས་འཇུག་པའི་ཆོས་བཅུ་བདུན་གྱིས་དཀྱིལ་འཁོར་དུ་གཞུག༵་པར༵་བྱའོ༵། །

གཉིས་པ་དབང་བསྐུར་བ་ལ་གཉིས་ཏེ། ཡོན་དབུལ་བ་དང་། བློའི་རིམ་པ་དང་སྦྱར་ནས་དབང་བསྐུར་བ་དངོས་སོ། །

དང་པོ་ལ་གཉིས་ལས། ཡོན་དབུལ་བ་དངོས་ནི་འཇུག་པའི་ཆོས་རྣམས་ཚར་བའི་རྗེས་དེ༵་ནས༵་རིག༵ས་ཀྱི༵་བུ༵་སྐལ་བ་མཆོག༵་དང་ལྡན་པ་དེ༵ས་བླ་མ་ལ། རང་གི་འབྱོར་པ་ཐམས་ཅད་ཀྱིས་མཆོད་པར་བྱ་སྟེ། རྒྱལ༵་སྲིད༵་ཡུལ་འཁོར་དང་བཅས་པ་དང༵་ནི༵། རང༵་གི༵་ལུས༵་དང་བུ༵་དང༵་ཆུང༵་མ༵་དང་ནོར༵་གྱི༵་དབྱི༵ག་གསེར་དངུལ་ལ་སོགས་པའི་རིན་པོ་ཆེ་སྣ་ཚོགས་ཏེ། དེ་རྣམས་ཀྱི་གཉིས་གཉིས་ཡོད་ན་རབ༵་ཏུ༵་གཅེ༵ས་ཤོས་དེ་དང་མདོར་ན་རང་གི་ཡི༵ད་དུ་འོང་ཞིང་འཐ༵ད་པའི་དངོས་པོ་རྣམས་དབུལ༵་ལོ། །གཉིས་པ་ཕན་ཡོན་ནི་རྣལ་འབྱོར་གྱི་དབང༵་ཕྱུག༵་རྡོ་རྗེ་སློབ་དཔོན་ལ་འདོད་པའི་ལོང༵ས་སྤྱོད༵་རྣམ་པ་ལྔས༵་མཆོད༵་ན༵་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱི༵ལ་འཁོ༵ར་ཐམ༵ས་ཅ༵ད་མཆོ༵ད་པ༵་ཡི༵ན་ན། ཉེ༵་བ༵འི་དཀྱི༵ལ་འཁོ༵ར་ཡི་དམ་གྱི་ལྷ་མཆོད་པ་ལྟ་སྨོས༵་ཀྱང་ཅི༵་དགོ༵ས་ཏེ། དམ་ཚིག་རྣམ་པར་བཀོད་པའི་རྒྱུད་ལས། བླ་མ་རྡོ་རྗེ་འཛིན་མཆོད་ན། །དཀྱིལ་འཁོར་ཐམས་ཅད་མཆོད་པ་སྟེ། །ཉེ་བའི་དཀྱིལ་འཁོར་སྨོས་ཅི་དགོས། །ཉེས་ཟད་དངོས་གྲུབ་མཆོག་ཐོབ་འགྱུར། །ཞེས་སོ། །དེས་དམ་ཚིག་དག་སྡོམ་པའི་ཉེས༵་པ༵་ཐམ༵ས་ཅ༵ད་ད༵ག་པ༵ར་འགྱུར༵་བ་ཁོ་ནའོ། །

གཉིས་པ་བློའི་རིམ་པ་དང་སྦྱར་ནས་དབང་བསྐུར་བ་དངོས་ནི། དད༵་པ་དང་བརྩོན༵་པའི་བརྟུལ༵་ཞུག༵ས་རབ༵་ཏུ་རྟོགས་པའི་སྐལ་བ་ཡོད་པར་ཤེས་ན༵་དེ་ལ་ཕན༵་པའི༵་དབང༵་བཅུ༵་དང་ནུས༵་པའི༵་དབང༵་ལྔ་པོ་སློབ་དཔོན་གྱིས་ལྷག་པའི་སྙིང༵་རྗེས༵་སློབ་མའི་རྒྱུད་ཆུད༵་མ༵་ཟོ༵ས་པ༵ར་གཟུང༵་ཞིང་སྦྱིན་ནོ། །གལ་ཏེ་སྐལ་བ་མེད་ན་མི་སྦྱིན་པའམ་ཕན་དབང་(༡༨༤)ཙམ་བསྐུར་གྱི་ནུས་དབང་མི་སྦྱིན་ཏེ། ཉེས་པ་ཆེན་པོར་འགྱུར་བའི་ཕྱིར་རོ། །དེའང་ཡེ་ཤེས་བཀོད་པ་ཆེན་པོ་དམ་ཚིག་མཆོག་གི་རྒྱུད་ལས། སྣོད་དང་མི་ལྡན་སློབ་མ་ལ། །དབང་བསྐུར་བྱས་ན་གཉིས་ཀ་ཕུང་། །ཞེས་སོ། །འདིར་ཕྱིན་ཅི་ལོག་གི་ནགས་ཐིབས་པོ་ཆེ་ལོག་པར་ལྟ་བའི་མུན་པ་མི་བཟད་པས་འཐིབས་ཤིང་། ཉོན་མོངས་པའི་ཆོམ་རྐུན་རབ་ཏུ་རྩེན་པས་དཀྲུགས་ཤིང་། སངས་རྒྱས་ཀྱི་ཐུགས་རྗེ་ཉི་མའི་འོད་ཟེར་གྱི་འཕྲིན་ལས་འཇུག་པའི་གོ་སྐབས་མེད་པ་ཁ་ཅིག་ན་རེ། རྒྱུད་གཞན་ལས་དབང་བཞི་དང་། དེ་ལས་ཕྱེ་བས་བཅུ་བཞིར་གསུངས་པ་དང་། ཁྱེད་ཀྱི་འདིར་ཕན་པ་དང་ནུས་པའི་དབང་གཉིས་ལས་ཕྱེ་བའི་བཅོ་ལྔ་པོ་གྲངས་མི་མཐུན་པས། རྒྱུད་འདི་ཡང་དག་པ་མ་ཡིན་ནོ། །ཞེས་ཟེར་རོ། །ཀྱེ་མ། མ་ལ་སྐལ་བ་ངན་པ་ཁྱེད་ཅག་ལྟ་བུས་དབྱེ་བསྡུ་དང་དོན་གྱི་རིམ་པའང་ཁོང་དུ་མ་ཆུད་ཅིང་རྒྱུད་སྡེ་ཐ་དད་ཀྱི་དགོངས་པ་ཟབ་མོ་ལ་བློ་ཁ་མ་ཕྱོགས་པར་ཟད་དོ། །དེ་ལྟ་བས་ན་རྣལ་འབྱོར་གྱི་རྒྱུད་ལས་བུམ་པ་དང་། བརྟུལ་ཞུགས་དང་། རྡོ་རྗེ་སློབ་དཔོན་གྱི་དབང་དང་གསུམ་དུ་གསུངས་ལ། ངན་སོང་སྦྱོང་བ་ནས་དབང་བཅུ་གཅིག་གམ་དབྱེ་ན་བཅུ་དགུར་གསུངས་པ་དང་། དེ་ཉིད་འདུས་པ་དང་ཟླ་གསང་ཐིག་ལེའི་རྒྱུད་ལས་བུམ་པ་གསང་བ་ཤེས་རབ་ཡེ་ཤེས་གསུམ་དུ་གསུངས་པ་དང་། མཉམ་སྦྱོར་ལས། སློབ་དཔོན་དང་སློབ་མའི་དབང་གཉིས་སུ་བསྡུས་པ་ཡོད་པས་རྒྱུད་ཡང་དག་པ་མ་ཡིན་པར་འགྱུར་རོ། །དེ་དག་དོན་ལ་མཚུངས་པས་སྐྱོན་མེད་དོ་སྙམ་ན་འདི་ཡང་དོན་ལ་མཚུངས་པས་ཉེས་པ་ག་ལ་ཡོད། འདི་ནི་རྒྱུད་ཐམས་ཅད་ཀྱི་རྩ་བ་ཡིན་པས་རྒྱུད་གཞན་གྱི་དབང་བསྐུར་ཚུལ་ཐམས་ཅད་འདིར་འདུས་པ་ཡིན་ནོ། །དེའང་བུམ་པའི་དབང་དངོས་སུ་གསུངས་ལ། དེ་ཉིད་མི་བསྐྱོད་པ་ཆུའི་དབང་བསྐུར་བ་ཡིན་ནོ། །དབུ་རྒྱན་དང་ཅོད་པན་དང་མེ་ཏོག་ནི་རིན་ཅེན་འབྱུང་ལྡན་གྱི་དབང་ངོ་། །ཕྱག་རྒྱ་ནི་རྡོ་རྗེ་དང་དྲིལ་བུ་ལ་སོགས་པ་སྟེ་འོད་དཔག་མེད་དང་དོན་ཡོད་གྲུབ་པའོ། །ནུས་དབང་གི་སྐབས་སུ་ཁྱོད་ནི་རྡོ་རྗེ་ལས་ཡིན་གྱིས་ཞེས་པ་ལ་སོགས་པས་རྣམ་པར་སྣང་མཛད་ཀྱི་དབང་བསྐུར་བ་ཡིན་ལ། བརྟུལ་ཞུགས་དང་ལུང་བསྟན་དབུགས་དབྱུང་ལ་སོགས་པ་ཐམས་ཅད་རྡོ་རྗེ་རྒྱལ་པོ་ལ་སོགས་པ་ནུས་པའི་དབང་གིས་བསྟན་པ་ཡིན་ནོ། །གསང་བའི་དབང་ནི་དངོས་སུ་བསྟན་པས་ཤེས་རབ་ཡེ་ཤེས་དང་། ཚིག་དབང་རིན་པོ་ཆེ་ནི་དེའི་ནང་གསེས་སུ་ཞར་ལ་བསྟན་པ་ཡིན་ནོ། །དེ་བས་ན་རྒྱུད་སྡེ་དོན་མཐུན་པའི་ཕྱིར་ན་འདི་ལ་ཉེས་པ་ག་ལ་སྲིད། ཚུལ་འདི་ལྟ་བུ་ལ་སྨད་པས་མཐོང་བའི་ཆོས་ལ་ལྕེ་ལྐོག་མའི་འོག་ལ་དོན་པ་དང་འཆི་ཁར་མེ་ཡི་སྣང་བ་ཆེན་པོ་འབར་བས་དམྱལ་བར་འགྲོ་བའི་རྟགས་ཁྱད་པར་ཅན་རྣམས་ཁྱེད་(༡༨༥)ལས་གཞན་པ་སུ་ལ་འབྱུང་བ་སྲིད་དེ་བསྐལ་པ་དུ་མར་སྙིང་རྗེའི་འོས་སུ་གྱུར་པ་ཉིད་དོ། །

གཉིས་པ་ཡབ་ཀྱི་དཀྱིལ་འཁོར་དུ་དབང་བསྐུར་བ་ནི། ཡུམ་གྱི་དཀྱིལ་འཁོར་དུ་གསང་བ་དང་ཤེས་རབ་ཡེ་ཤེས་ཀྱི་དབང་བསྐུར་བ་དེ་ལས་གཞན་པའི་ཚུལ་ཡབ་ཀྱི་རྡོ་རྗེའི་རྩེ་ལས་དབང་བླང་བར་བསྟན་པ་ནི། ཡང༵་ན༵་ཡབ་ཀྱི་ཐལ༵་མོ༵་མཉམ་གཞག་གི་ཚུལ་གྱིས་རབ༵་ཏུ་བསྣོལ༵་ནས༵་ལྷའི་སྐུ་ཕྱག༵་རྒྱ༵་ཆེན༵་པོར༵་གསལ་བའི༵་དབ༵ང་མཛུབ་མོའི་བར་དུ་ནི༵་གུ་ཧྱ་བཛྲ་གྱི་དཀྱིལ༵་འཁོ༵ར་རིང་ཐུང་མཛུབ༵་གང༵་བའི་ཚད༵་དུ༵་ཡང༵་བདེ་བའི་ཐབས་ལ་མཁ༵ས་པས༵་དབང་བསྐུར་བའི་ཆོ༵་ག༵་བཞི༵ན་དུ༵་དྭངས་མས་བུ་ལ་དབང་བསྐུར་བར་བྱའོ༵། །དེ་ནས་དབང་རྣམས་རྫོགས་པར་སྦྱིན་ནོ། །འདིར་ཁ་ཅིག་ནུས་དབང་སྔོན་ལ་བསྐུར་ཞིང་ཕན་དབང་རྗེས་གནང་གི་ཚུལ་དུ་ཕྱི་ལ་བསྐུར་ཏེ་ཐམས་ཅད་གསང་དབང་ཁོ་ནའི་བསྐུར་བ་ནི་དབང་པོ་རྣོན་པོའི་དབང་དུ་བྱས་ལ། རྡོ་རྗེ་ལས་རིམ་ནས་གཞན་བཞིན་རྟུལ་པོའི་དབང་དུ་བྱས་སོ་ཞེས་པའང་རིགས་པར་མ་མཐོང་སྟེ། འདི་ཉིད་ལས་ཀྱང་། ཕན་པའི་དབང་དང་ནུས་པའི་དབང་། །སྙིང་རྗེས་ཆུད་མ་ཟོས་པར་གཟུང་། །ཞེས་ཕན་དབང་སྔོན་ལ་གསུངས་ཤིང་། གོ་རིམ་ཀྱང་ཐོག་མར་བུམ་དབང་དང་དེ་ནས་གསང་དབང་དང་ཤེས་རབ་ཡེ་ཤེས་བཞི་པ་རྣམས་འབྱུང་བ་ཡིན་ནོ། །

གཉིས་པ་དམན་པ་རྡུལ་ཚོན་གྱི་དཀྱིལ་འཁོར་དུ་དབང་བསྐུར་བའི་ཚུལ་ལ་གསུམ་སྟེ། དཀྱིལ་འཁོར་བྲི་བ། བསྒྲུབ་པ། བསྒྲུབ་པའི་འབྲས་བུའོ། །དང་པོ་ལ་གསུམ་སྟེ། དཀྱིལ་འཁོར་ཆུང་ངུ་། འབྲིང་། ཆེན་པོ། བྲི་བའི་ཆོ་གའོ། །

དང་པོ་ལ་གཉིས་ལས། སའི་ཆོ་ག་ནི་རབ་མཆོག་གི་དཀྱིལ་འཁོར་དུ་དབང་བསྐུར་བ་ལས་ཚུལ་གཞན་ཡ༵ང་ན༵་ས༵་གཞི༵་སའི་ཆོ་གས་རབ༵་ཏུ་མཉམ༵་པ་ལ༵་བྲིའོ། །དེའང་སྔར་མ་དག་པའི་ས་གཞི་ཕྱིས་དག་པར་བྱེད་པ་མ་ཡིན་ཏེ། ས་ཆུ་སྤྱན་དང་མཱ་མ་ཀཱི། །ཞེས་པ་ལ་སོགས་པས་ཤེས་ལ། ཡེ་ནས་ས་སྦྱངས་ཟིན་པའི་ཕྱིས་གསལ་འདེབས་པའི་ཚུལ་གྱིས་སྦྱང་བ་ཡིན་ནོ། །

གཉིས་པ་འདྲི་བ་དངོས་ནི་གཟུགས་བརྙན་གྱི་དཀྱིལ༵་འཁོ༵ར་ཆུང་ངུའི་ཆུང་ངུ་ཁྲུ༵་ག༵ང་གི༵་ཚད༵་དུ༵་བྱ༵འོ། །ཆུང་ངུའི་འབྲིང་ཡང༵་ན༵་ལུས༵་གང༵་གི༵་ཚ༵ད་དུ༵་སྟེ༵་འདོམ་གང་ངོ་། །ཆུང་ངུའི་ཆེན་པོ་ཡ༵ང་ན༵་ལུས༵་ནི༵་གསུམ༵་གྱི༵་ཚ༵ད་ཙམ་ལ། མི་རུས་ལ་སོགས་པའི་ཕུར༵་བུ༵་ནི་དཀྱིལ་འཁོར་གྱི་དབུས་སུ་འགྱིང་ཕུར་སོར་བཞི་ལ་སོགས་པ་དང་བགེགས་བསྲུང་བའི་དོན་དུ་སོར་བཅོ་བརྒྱད་པ་ལ་སོགས་པའོ། །ཆ་དབྱེ་བའི་དོན་དུ་རས་བལ་ལམ་པདྨའི་རྒྱུས་པའམ་དུར་ཁྲོད་ཀྱི་སྐྲ་ལ་སོགས་པའི་སྲ༵ད་བུ༵་ཁྲུན་དུ་དཀྱིལ་འཁོར་ཉིས་འགྱུར་ཡོད་པ་རིགས་ཐ་དད་མཚོན་པའི་དོན་དུ་ཁ་དོག་མ་འདྲེས་པའི་ཚོན༵་གྱི་ཕྱེ༵་མ་ལྔ་ལ་སོགས་པ་དང༵་། ལས་བསྒྲུབ་པའི་དོན་དུ་གོས༵་དང༵་རྒྱན༵་(༡༨༦)བཟང་པོས་མཛེ༵ས་པ༵་ཡི༵ད་དུ་འོང་བའི་གྲོ༵གས་ལས་ཀྱི་ཕྱག་རྒྱ་ལོ་བཅུ་དྲུག་ལོན་པའོ། །དེ་ནས་སྲད་བུའི་སྣ་ནས་གྲོགས་དེས་བཟུང་ལ། ཡེ་ཤེས་ཀྱི་ཐིག༵་དང་ལས་ཀྱི་ཐིག་གཉིས་གདབ༵་པའི་ཆོ༵་ག༵་ཕུན༵་སུམ༵་ཚོ༵གས་པ་དཀྱིལ་འཁོར་གྱི་ལས་ལ་མཁ༵ས་པར་ལྡན༵་པ་ཆེན༵་པོ་རྡོ་རྗེ་སློབ་དཔོན་གྱིས༵་ལུས་སེམས་མ་གཡེངས་པར་རབ་ཏུ་བསྒྲིམ༵ས་ཏེ་བྱ༵འོ། །

གཉིས་པ་འབྲིང་ལ་གསུམ་ལས་འབྲིང་གི་ཆུང་ངུ་ཡང༵་ན༵་ཁྲུ༵་ནི༵་བཅུ༵་དྲུག༵་པ་དང༵་། འབྲིང་གི་འབྲིང་ཁྲུ་ཉི༵་ཤུ༵་ཡོད་པའམ༵། འབྲིང་གི་ཆེན་པོ་ཁྲུ་ཉི༵་ཤུ༵་རྩ༵་ལྔ༵ར་བྱའོ༵། །དེ་ལ་སྔ་མ་བཞིན་དུ་ཐིག་གདབ་པར་བྱ་སྟེ། ཐིག་ཚོན་ལ་རིག༵ས་ཀྱི༵་དཀྱིལ༵་འཁོར༵་རྣམ་པ་ལྔ༵་པོ༵་རྣམ༵ས་བསྒོམ༵་ཞིང་ཞུ་བ་ལས་བྱུང་བའི་ཡེ་ཤེས་ལྔའི་ཐིག་ཚོན་ཏུ་བསམས་ཏེ། ཐིག་གདབ་ཅིང་ཚོན་བཀྱེ་ནས་ལྷའི་གནས་སོ་སོར་སྐུ༵་ཙཀ་ལིའམ་འབུར་སྐུའམ་པར་དུ་གདབ་ཅིང་། གསུང༵་ཡིག་འབྲུའམ་སྙིང་པོ་དང་། ཐུགས༵་ཕྱག་མཚན་གྱི་མཚན་མས་ལྷའི་རང་བཞིན་མཚོན་པར་ལྡན༵་པ་རྡོ་རྗེ་དང་འཁོར་ལོ་ལ་སོགས་པའི་སྐུ་གསུང་ཐུགས་མཚོན་པའི་གཟུག༵ས་གང་རུང་རྣམས་ཀྱང༵་ལྷ་སོ་སོའི་གནས་སུ་དགོ༵ད་པར་བྱའོ། །

གསུམ་པ་ཆེན་པོ་ལའང་གསུམ་ལས། ཆེན་པོའི་ཆུང་ངུ་ནི་ཡ༵ང་ན༵་རྒྱང༵་གྲག༵ས་གཅིག་གོ། །དེའི་དོན་ནི་མཛོད་ལས། སོར་མོ་ཉི་ཤུ་བཞི་ལ་ཁྲི། །ཁྲི་བཞི་ལ་ནི་གཞུ་གང་ངོ་། །དེ་དག་ལྔ་བརྒྱ་དག་ལ་ནི། །རྒྱང་གྲགས་དེ་ལ་དགོན་པར་འདོད། །དེ་བརྒྱད་དཔག་ཚད་ཅེས་བྱའོ། །ཞེས་སོ། །ཆེན་པོའི་འབྲིང་དཔག༵་ཚད༵་དམ༵། ཆེན་པོའི་ཆེན་པོ་ནམ༵་མཁའ༵་དབྱིང༵ས་ཀྱི༵་བས༵མ་ཡས༵་པར༵། རིག་འཛིན་གྱི་དཀྱིལ་འཁོར་དངོས་སུ་སྤྲུལ་པའམ། སངས༵་རྒྱ༵ས་ཀྱི་དཀྱི༵ལ་འཁོར༵་རིགས་སྣ༵་ཚོགས༵་པ་བསྒོམ༵་སྟེ་དབང་བསྐུར་བ་ཡིན་ནོ། །དེའི་དོན་ཡང་ནམ་མཁའི་དབྱིངས་ཐམས་ཅད་ཁྱབ་པའི་དཀྱིལ་འཁོར་དངོས་སུ་སྤྲུལ་ཏེ་སློབ་མ་ལ་དབང་བསྐུར་བ་ནི། སྔོན་མཚོ་མ་ཕམ་གྱི་འགྲམ་དུ་མཚོ་ལ་ཐིག་བཏབ་ནས་འཇམ་དཔལ་གྲགས་པ་ལ་སློབ་དཔོན་སངས་རྒྱས་གསང་བས་རྡོ་རྗེ་དབྱིངས་ཀྱི་དཀྱིལ་འཁོར་དངོས་སུ་བསྟན་ནས་དབང་བསྐུར་བ་དང་། སློབ་དཔོན་ཆེན་པོ་པདྨས་སྟག་ཚང་སེང་གེ་ཕུག་ཏུ་རྡོ་རྗེ་གཞོན་ནུའི་དཀྱིལ་འཁོར་ནམ་མཁའ་དང་མཉམ་པ་བསྟན་ནས་མཚོ་རྒྱལ་ལ་དབང་བསྐུར་བ་ལྟ་བུའོ། །དེའང་སེམས་ཅན་གྱི་རྒྱུད་ལ་སྐུ་ལྔ་ཡེ་ཤེས་ལྔའི་རང་བཞིན་ཡེ་གདོད་མ་ནས་གནས་ཀྱང་མ་རིག་པས་བསྒྲིབས་ནས་མ༵་མཐོ༵ང་བའི་རྨོང༵ས་པ་རྣམས་ལ༵་བསྟན༵་པའི་ཕྱིར༵་ས་ཚོན༵་གྱི་ཁ༵་དོག༵་ཀྱང་དཀར་པོ་ལྟ་བུ་རེ་རེ་ལའང་དཀར་སེར་དཀར་དམར་དཀར་ལྗང་དཀར་སྔོ་དཀར་པོ་ཉིད་དང་ལྔར་ཕྱེ་བ་བཞིན་དུ་གཞན་བཞི་ལའང་ཕྱེ་བས་ཉི༵་ཤུ༵་རྩ༵་ལྔ༵འམ༵་ནི་ཡེ་ཤེས་ཉི་ཤུ་རྩ་ལྔ་དང་མཚམས་སེམས་ལ་སོགས་པ་མཚོན་པའོ། །དེ་ཙམ་མེད་ནའང་དཀར་སེར་དམར་(༡༨༧)ལྗང་མཐིང་ག་ལྔ༵་ཡི༵་ཚོན༵་གྱིས༵་བྲི༵་བར༵་བྱའོ༵། །དེ་སྐད་དུའང་རྒྱས་པའི་རྒྱུད་ལས། སེམས་ཅན་མ་ལུས་ཐམས་ཅད་ལ། །ཡེ་ཤེས་ལྔ་ཡིས་ཀུན་ཁྱབ་ཅིང་། །རང་གི་རྣམ་རྟོག་བསྒྲིབས་བྱས་ནས། །ཡེ་ཤེས་ལྔ་ཡི་དོན་མ་མཐོང་། །དེ་ལྟར་རྨོངས་པ་ཐམས་ཅད་ལ། །ཡེ་ཤེས་མཚན་ཉིད་བསྟན་པའི་ཕྱིར། །དཀར་དང་དམར་དང་སེར་བ་དང་། །ལྗང་གུ་ལ་སོགས་ནག་པོར་བསྟན། །ཅེས་སོ། །ཇི་ལྟར་བྲི་བ་ནི་མཐོང་བ་བརྒྱུད་པའི་ལག་ལེན་རྣམ་པར་དག་པས་རྒྱས་འབྲིང་བསྡུས་པ་ལ་སོགས་པའི་རྣམ་པར་བཞག་པ་ནི་སྐབས་འདིར་འདུལ༵་བའི༵་ཆོ༵་ག༵་སྟེ་དེའི་ལུགས་བཞིན༵་དུ༵་བྲིའོ༵། །དེ་སྐད་དུའང་རྔམ་གློག་ལས། ཏིང་འཛིན་དཀྱིལ་འཁོར་ཅི་འདྲ་བ། །གཟུགས་བརྙན་ཡང་ནི་དེ་ལྟར་བྲི། །ཞེས་སོ། །འདི་ལ་ཁ་ཅིག་བྱ་སྤྱོད་ཀྱི་ལུགས་སུ་བཞེད་ཅིང་། ལ་ལ་གདུལ་བྱ་འདུལ་བ་ཞེས་སྦྱོར་བའང་མ་གོ་བར་སྣང་ངོ་། །དེའང་གཟུགས་བརྙན་གྱི་དཀྱིལ་འཁོར་རྒྱས་འབྲིང་བསྡུས་པ་གསུམ་ནི་གང་ཟག་གི་བློ་དང་འབྱོར་པས་ཕྱེ་བ་སྟེ། འཁོར་ལོས་སྒྱུར་བ་ལ་སོགས་པ་ལ་ནི་དཔག་ཚད་ལ་སོགས་པ་ཡིན་ཞིང་། ཕལ་བའི་འབྱོར་བ་མཆོག་ལ་འབྲིང་པོ་དང་། ཆུང་བ་ལ་ཆུང་ཚད་དུ་གསུངས་ཤིང་། ཆེན་པོའི་ཆེན་པོ་ནི་སློབ་མ་མཆོག་ལ་འཕགས་པའི་བླ་མས་དབང་བསྐུར་བའི་བློ་ཡིས་རིམ་པས་ཕྱེ་བ་ཡིན་ནོ། །གཞུང་གསུམ་པོའང་མ་འཁྲུགས་པར་བཤད་དེ། ཆུང་བའི་སྐབས་སུ་ཐིག་གི་རིམ་པ་གསུངས་ཤིང་། འབྲིང་གི་སྐབས་སུ་ཐིག་ཚོན་བྱིན་གྱིས་བརླབས་ཏེ་བྲིས་པ་ལ་མཚན་མ་དགོད་ཐབས་གསུངས་ལ། རྒྱས་པའི་སྐབས་སུ་ཚོན་དགྱེ་བའི་རིམ་པས་བྲི་ཐབས་རྫོགས་པར་གསུངས་པ་ཡིན་ནོ། །

གཉིས་པ་དཀྱིལ་འཁོར་བསྒྲུབ་པ་ལ་གསུམ་སྟེ། དཀྱིལ་འཁོར་བསྐྱེད་པ། སྤྱན་དྲང་བ། གཉིས་སུ་མེད་པར་བསྟིམ་པའོ། །

དང་པོ་ནི། སེམས་བསྐྱེད་པ་དང་དེ་བཞིན་ཉིད་ལ་སོགས་པའི་ཏིང་ངེ་འཛི༵ན་གྱི་རོ༵ལ་མོ༵་མཐའ༵་ཡ༵ས་པའི་མཆོག༵་ནམ་མཁའི་དབྱིངས་ཀྱི་མཐས་གཏུགས་པར་དཀྱིལ་འཁོར་བསྐྱེད་པའི་ནང་དུ། ལྷ་སོ་སོའི་གནས་སུ་རང་རང་གི་ཡི༵་གེ༵་ཋ་ལ་སོགས་པའམ་ལྷ་མཚོན་པའི་བརྡ༵་ཚོན་སྤུངས་ཀྱི་ཐིག་ལེ་སྐུ་མདོག་དང་མཐུན་པ༵འམ། སྙིང༵་པོ༵་ཧཱུྃ་དང་མཱུྃ་ལ་སོགས་པ༵འམ། ཕྱག༵་རྒྱ༵་རྡོ་རྗེ་དང་འཁོར་ལོ་ལ་སོགས་པའམ༵་གང་ཡང་རུང་བ་ལས་ལྷ་སོ་སོའི་སྐུ༵་གསུང༵་ཐུག༵ས་ཡོངས་སུ་རྫོགས་པ་དང་ལྡ༵ན་པར༵་བསྐྱེད་པ་ནི་རྡུལ་ཚོན་གྱི་དཀྱིལ་འཁོར་ཏིང་ངེ་འཛིན་ཡེ་ཤེས་ཀྱི་དཀྱིལ་འཁོར་དུ་བྱིན༵་གྱིས་བརླ༵བས་པ་ཞེས་བྱ་སྟེ། དེས་གྲུབ་དོན་ཡ༵་མཚ༵ན་པ་གནས་སྐབས་ཐུན་མོང་གི་ལས་བཞི་དང་། རྨད༵་པོ༵་ཆེ༵་མཐར་ཐུགས་ལྷའི་དཀྱིལ་འཁོར་འགྲུ༵བ་པར་འགྱུར༵་བ་ནི་སངས༵་རྒྱས༵་ཀུན༵་གྱིས༵་དམ༵་བཅས་(༡༨༨)པའི་དམ་ཚིག་ཆེན་པོ་སྟེ། འདི་ལྟར་ས༵་དང་ཤིང་དང་རྡོ་ལ༵་སོག༵ས་པའི་རྒྱུའི་དངོས་པོ་ངན་པ་ཕྱི་རོལ་ཏུ་གྱུར་པ་དེ་དག་ལས༵་སྐུ་གསུང་ཐུགས་ཀྱི་ཕྱག༵་རྒྱའི༵་གཟུགས་བཅས༵་པ་ཡང་། གདུལ་བྱའི་སྐལ་བ་དང་མཐུན་པར་རྣམ༵་པར་གྲོལ༵་བའི་རིམ༵་པ༵་བྱང་ཆུབ་གསུམ་སོ་སོར་ཐོབ༵་པར༵་འགྱུར༵་ན། རྣམ་པར་དག༵་པའི༵་ཡེ༵་ཤེ༵ས་ཏིང་ངེ་འཛིན་གྱིས༵་སྦྱང༵ས་པའི༵་སེམས་ཀྱི་དངོས་པོ་ཡེ་ནས་འོད་གསལ་བ་སངས་རྒྱས་འགྲུབ་པ་ལྟ་སྨོས༵་ཀྱང་ཅི༵་དགོ༵ས་ཏེ༵། སེམས་དེ༵་ཉིད༵་གདོད་མ་ནས་སངས་རྒྱས་ཡིན༵་པ་ལ་གསལ་བཏབ་པ་ཙམ་གྱིས་འགྲུབ་པའི་ཕྱིར་རོ། །དེ་སྐད་དུའང་འདའ་ཀ་ཡེ་ཤེས་ལས། སེམས་རྟོགས་ན་སངས་རྒྱས་ཡིན་པས། སངས་རྒྱས་གཞན་ནས་མི་བཙལ་བའི་འདུ་ཤེས་རབ་ཏུ་བསྒོམ་པར་བྱའོ། །ཞེས་པ་དང་། ཀུན་བྱེད་ལས། སེམས་ཉིད་རྫོགས་པའི་སངས་རྒྱས་ཏེ། །ཞེས་སོ། །

གཉིས་པ་སྤྱན་དྲང་བ་ནི། ཕྱོག༵ས་བཅུ་དུས༵་བཞིའི་དཀྱིལ༵་འཁོར༵་ཀུན་གྱི་བདག༵་ཉིད༵་ཆེན༵་པོ་གཤིས་ཀྱི་གནས་ལུགས་གང་དུ༵འང་མི༵་དམིག༵ས་ཤིང་སྤྲོས་པ་དང་བྲལ་བ་ནི་ཐུགས༵་ཀྱི༵་དཀྱིལ༵་འཁོར༵་ཆོས་སྐུའི་ངང་ལས༵་ཡེ་ཤེས་པའི་དཀྱི༵ལ་འཁོ༵ར་ཇི་ལྟར་འདོད་པ་ཐ༵མས་ཅད་སྤྱན༵་དྲང༵་ངོ༵་། །དེའང་བློས་བྱོན་པར་མོས་པ་བྱེད་པ་ཙམ་ལ་སྤྱན་དྲངས་པར་བརྗོད་ཅིང་། ཐམས་ཅད་མཁྱེན་པའི་ཐུགས་རྗེས་ཀྱང་བྱིན་གྱིས་རློབ་པ་ཡིན་ལ། གཙོ་བོ་རང་གི་སེམས་ཀྱི་རྣམ་འཕྲུལ་ཙམ་གོམས་པར་བྱེད་པ་ཡིན་པའི་ཕྱིར་རོ། །དེའང་སེམས་སངས་རྒྱས་ཡིན་པས་དེ་གོམས་ཤིང་གསལ་བས་དཀྱིལ་འཁོར་འགྲུབ་པ་ནི་འཐད་པའོ། །

གསུམ་པ་གཉིས་སུ་མེད་པར་བསྟིམ་པ་ནི། བསྐྱེད་པ་ཏིང་ངེ་འཛིན་གྱི་དཀྱིལ་འཁོར་དང་། གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་གཉིས་པོ་དེ་རང༵་སྣང༵་གི་ངོ་བོར་དབྱེ༵ར་མེད༵་དུ་གནས་ཏེ། རང་བཞིན་དམ་ཚིག་གི་དཀྱི༵ལ་འཁོར་ལ༵་བསྐྱེད་པ་ཡེ་ཤེས་སེམས་དཔའི་དཀྱིལ་འཁོར་སྤྱན་དྲངས་པ་དེ་ཉིད་འཇུག༵་ཅིང་བསྟིམ་པའི༵་མཚ༵ན་ཉིད༵་ཀྱིས་དཀྱིལ་འཁོར་དེ་གཉིས་ཆུ་ལ་ཆུ་བཞག་པ་བཞིན་དུ་མཉམ༵་པར་སྦྱོར༵་བའི༵་ཚུལ་གྱིས་བསྟིམ་པས། ཕྱོག༵ས་བཅུ་དུས༵་བཞི་ཀུན༵་ན༵ས་འགྲོ་བའི་དོན་ལ་གཤེ༵གས་པ༵་ཡི༵། སངས་རྒྱས་ཐམས་ཅད་ཀྱིས་སྔོན་སྤྱད་པ་སྤྱོད་པ་ན་གང་ལ་ལས་དེ་བཞིན་གཤེགས་པ་ཡིད་ལ་བྱེད་པ་དེའི་མདུན་དུ་དེ་བཞིན་གཤེགས་པ་ཉིད་བཞུགས་པར་གྱུར་ཅིག་ཅེས་སྨོན་ལམ་གྱི་བསྙེན༵་པ་མཛད་པའི༵་འབྲས་བུ་གྲུབ་ནས་དེ་ཁོ་ན་བཞིན་དོན་མཛད་པའི་འཕྲིན་ལས་ཀྱི་དཀྱི༵ལ་འཁོ༵ར་དེ་ཉིད་ཐུགས་རྗེས་བྱོན་ནས་དམ་ཚིག་པའི་དཀྱིལ་འཁོར་ལ་རབ་ཏུ་རྫོགས་པར་འཇུག་ཅིང་ཉེ༵་བུའི་སྲས་སུ་དགོངས་པར་གྱུར་པས་ན་སྤྱན་དྲངས་ཏེ་བསྟིམ་པ་ནི་དམ༵་ཚི༵ག་གི་མཆོ༵ག་ཡིན་ནོ། །

གསུམ་པ་དཀྱིལ་འཁོར་བསྒྲུབས་(༡༨༩)པའི་འབྲས་བུ་ལ་གསུམ་སྟེ། དངོས་གྲུབ་སེམས་ལས་འབྱུང་བའི་འཐད་པ་དགོད་པ། དེ་ཉིད་ཇི་ལྟར་བསྒྲུབ་པའི་ཐབས་བསྟན་པ། ཐབས་དེས་གྲུབ་པའི་འབྲས་བུ་བརྗོད་པའོ། །

དང་པོ་ལ་གསུམ་ལས། དང་པོ་དཔེ་ནི་ལྷའི་དཔག༵་བསམ༵་གྱི་ཤིང༵་དང༵་ཡིད༵་བཞི༵ན་གྱི༵་ནོར༵་བུ༵་རིན༵་པོ༵་ཆེ༵་དང༵་གཞན་ཡང་ཕྱི་རོལ་གྱི་དངོས་པོར་སྣང་བ་ལས་འདོད་དགུ་འབྱུང༵་བ༵་ཀུན༵་ལ་ཡ་མཚན་དང་ཡོན་ཏན་སོ་སོར་སྣང་ཡང་། དེ༵་ད༵ག་ལ་ཕྱི་རོལ་བདེན་པར་གྲུབ་པའི་རྫས༵་ཀྱི་དངོས་པོ་འགའ་ཞིག་ཡོད༵་པ་མ༵་ཡིན༵་ཏེ༵་གཞོན་ནུ་མེ་སྐྱེས་ཀྱི་རིན་པོ་ཆེའི་ཁང་བཟང་མ་སྐྱེས་དགྲའི་ཁང་པ་དང་བརྗེས་ཀྱང་ཁོ་རང་གི་ཕྱི་བཞིན་འབྲང་བ་དང་། ཁྲོན་པ་སྐྱེས་ཀྱི་ཁྲོན་པ་ལས་ཁོ་རང་གིས་ལག་པ་བརྐྱངས་ན་ཟས་གོས་ལ་སོགས་པ་འབྱུང་གིས་གཞན་གྱིས་མ་ཡིན་པ་དང་། ནོར་བུ་དང་དཔག་བསམ་གྱི་ཤིང་ལའང་ལྷ་དང་སྒྲ་མི་སྙན་པས་བླངས་ན་འདོད་དགུ་འབྱུང་གིས་གཞན་གྱིས་མ་ཡིན་ནོ། །འོ་ན་དེ་དག་རྒྱུ་ཅི་ལས་དེ་ལྟར་གྱུར་ཅེ་ན། སྔོན་སྦྱིན་པ་བཏང་བའི་བག་ཆགས་ཀྱི་ས་བོན་རང༵་གི་སེ༵མས་ཀུན་གཞི་ལ་གནས་པའི་བསོད༵་ནམས༵་ཀྱི་རྣམ་པར་སྨིན་པའི་འབྲས་བུ་བརྟན༵་པ་ཉིད་ཀྱི་སྣང་བ་དེར་སྨིན་ཅིང་། རྐྱེན་དེ་དག་དང་ཕྲད་ནས་དགོས་འདོད་འབྱུང་བར་སྣང་བ་ཡི༵ན་ནོ། །དེ་བཞིན་དུ་ཐོག་མ་མེད་པ་ནས་ཀུན་གཞི་ལ་ཡུལ་དུ་སྣང་བའི་བག་ཆགས་ཀྱིས་འཇིག་རྟེན་འབྱུང་བ་སོ་སོའི་གཟུགས་ཅན་དང་། ལུས་སུ་སྣང་བའི་བག་ཆགས་ཀྱིས་རང་གི་ཕུང་པོ་དང་། དོན་དུ་སྣང་བའི་བག་ཆགས་ཀྱིས་ཕྱི་ནང་གི་ཆོས་སེམས་ཅན་གྱི་ཁམས་རང་གི་ཤེས་པའི་ཚོགས་དང་བཅས་པ་དུ་མར་སྣང་ཡང་། དོན་ཐ་དད་པར་གྲུབ་པ་མེད་དེ་རྨི་ལམ་བཞིན་ནོ། །

གཉིས་པ་དོན་ནི་དེ་བཞིན་དུ་སེམས་ཉིད་དོན་གྱི་གནས་ལུགས་ལ་སྐུ་གསུང་ཐུགས་ཡོན་ཏན་འཕྲིན་ལས་ཀྱི་དཀྱིལ་འཁོར་ངོ༵་མཚ༵ར་བའི་ཆོ༵་འཕྲུལ༵་ཡ་མཚན་རྨད༵་ཀྱི༵་ཆོ༵ས་དང་གནས་སྐབས་ཀྱི་དངོས་གྲུབ་འཕྲིན་ལས་བཞི་ལ་སོགས་པ་ཐོབ་པ་རྣམས་ཀྱང་། བདག་གིས་ཕར་བགྲོད་ནས་དེའི་སྟེང་དུ་ཕྱིན་པའམ། ཕྱོགས་གཞ༵ན་ཞིག་ན༵་ཡོད༵་པ་དེ་ཚུར་བཀུག་ནས་འོང༵་བ་མ༵་ཡི༵ན་ཏེ༵། འདི་ལྟར་ཕྱི་སྣོད་གཞལ་ཡས་ཁང་ནང་བཅུད་ལྷ་དང་ལྷ་མོ་རང་ཉིད་རྒྱལ་བའི་སྐུར་གསལ་བ་ལ་སོགས་པའི་ཐབ༵ས་བསྐྱེད་པའི་རིམ་པ་སྙིང་རྗེ་ཆེན་པོ་ལ༵་སེམས་ཀྱི་གོམས་པ་རབ་ཏུ་བརྟན༵་པའི༵་ངང་ནས། ཤེས༵་ར༵བ་རྫོགས་པའི་རིམ་པ་སྤྲོས་པའི་མཐའ་ཐམས་ཅད་དང་བྲལ་བ་ལ་གོམས་པའི་དབང་གིས་ཟུང་འཇུག་གཉིས་སུ་མེད་པ་ཉིད༵་ལ་སྦྱངས་པས། བསྐྱེད་རྫོགས་དེ༵་ལྟ༵་བུ༵་ཡི༵་ངང༵་དུ༵་སྐུ་དང་ཡེ་ཤེས་ཀྱི་དཀྱིལ་འཁོར་ལྷུན་གྱིས་གྲུབ་པར་རང་བྱུང༵་ཞིང་སྣང་བ་ཡིན་ནོ། །དེའང་རང་བཞིན་སྤྲོས་པ་དང་བྲལ་བའི་ཤེས༵་རབ༵་ཆོས་(༡༩༠)ཀྱི་དབྱིངས༵་ཀྱི་དེ་བཞི༵ན་ཉིད༵་ཆོས་སྐུའི་ངང་ལས། ཐབ༵ས་ཀྱི༵་ཕྱ༵ག་རྒྱ༵་ལྷུན་སྟུག་པོ་བཀོད་པར་གཟུགས་སྐུའི་དཀྱིལ་འཁོར་རང་སྣང་དུ་བཀོད་པ་ནི་ལྷུན་གྱིས་གྲུབ་པའི་ཡེ་ཤེས་ཀྱི་རོལ་པར༵་གྱུར༵་པའི༵་ཕྱིར༵། ཆོས་སྐུའི་ཡེ༵་ཤེ༵ས་ལ༵་ནི༵་གཟུགས་སྐུའི་ཡེ་ཤེས་རོལ༵་པའི་ངང་ལས། གདུལ་བྱའི་འཇིག་རྟེན་དུ་སྣང་བ་དང་མཐུན་པར་སྤྲུལ་པའི་སྐུའི་ཡེ༵་ཤེ༵ས་རོ༵ལ་པ༵་ཉིད༵་ཀྱང༵་དེ་ལས་མ་འཕོས་བཞིན་དུ་སྣང་བ་ཆུ་ཟླ་དང་འདྲ་བས་གསོ༵ག་ཅེས་བྱ་སྟེ། ཡུམ་བར་མ་ལས། རྣམ་པ་ཐམས་ཅད་མཁྱེན་པ་ཉིད་ཀྱང་རྨི་ལམ་ལྟ་བུ་སྒྱུ་མ་ལྟ་བུ་ཆུ་ཟླ་ལྟ་བུ་མིག་ཡོར་ལྟ་བུ། རྣམ་པ་ཐམས་ཅད་མཁྱེན་པའི་ཡེ་ཤེས་ཀྱང་རྨི་ལམ་ལྟ་བུ་སྒྱུ་མ་ལྟ་བུ་ཆུ་ཟླ་དང་མིག་ཡོར་ལྟ་བུ། ཞེས་པ་ལྟར་རོ། །ཁ་ཅིག་སངས་རྒྱས་དང་དེའི་ཡེ་ཤེས་གཉིས་ལ་གསོག་ཅེས་རིམ་པས་སྦྱོར་བ་ནི་ལོངས་སྐུའི་དེ་ཉིད་དང་མ་འབྲེལ་ལོ། །

གསུམ་པ་དེས་གཞན་དོན་འབྱུང་བའི་ཚུལ་ནི། ཡེ་ཤེས་ཀྱི་རོལ་པ་གསོག་ཡིན་ན་དེས་གཞན་དོན་བྱེད་པ་མི་འཐད་དོ་སྙམ་ན། གསོག་ཉིད་དུ་སྣང་བས་དོན་མཛད་པ་ཡིན་ནོ། །ཞེས་པ་ནི། སེམས་ཅན་གྱི་མོས་པ་དང་མཐུན་པར་རྒྱལ༵་བ༵་ཐུབ་པ་དྲུག་ལ་སོགས་པ་མངོན༵་སུམ་དུ་འབྱུང༵་ཞིང་འགྲོ་བའི་སྡུག་བསྔལ་ལས་སྐྱོབ༵་པ༵་མཛད་པ་བཅུ་གཉིས་ལ་སོགས་པས་དོན་མཛད་པ་དང༵་། ཆོས་སྐུའི་ངང་ལས་ལྷུན་སྟུག་པོ་བཀོད་པའི་རང་སྣང་ལོངས་སྐུར་སྣང་བའི་བྱིན༵་རླབ༵ས་ལས། ས་བཅུའི་སེམས་དཔའ་ལ་རང་བཞིན་སྤྲུལ་སྐུ་རིགས་ལྔའི་སངས་རྒྱས་ལོངས་སྤྱོད་རྫོགས་པའི་སྐུར་སྟོན༵་པ༵འང༵་སྟོན་པའི་ཐུགས་རྗེ་དང་འགྲོ་བའི་རང་སེམས་བསོད་ནམས་གོམས་པའི་མཐུ་ལས་ནོར་བུ་དཔག་བསམ་ཤིང་གི་དཔེ་དེ༵་བཞི༵ན་དུ་སྣང་བ་ཡིན་ཏེ༵། འཇུག་པ་ལས། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་གྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བར་འགྱུར། །ཞེས་པ་ལྟར་རོ། །དེས་ན་རང་བཞིན་བདེན་པར་མ་གྲུབ་བཞིན་དུ་སྤྲུལ་པའི་སྐུས་འགྲོ་དོན་གྱི་བྱ༵་བ་བྱེད༵་ནུས༵་པ༵འི་ཚུལ་ནི་ལྷུན་གྱིས་གྲུབ་པའི་ཐུགས་རྗེའི་གཟི༵་བྱིན༵་མངའ་བའི་འཕྲིན་ལས་ཀྱི༵་རོལ་པ་རང་བྱུང་དུ་ཤར་བ་ཡིན་ཏེ། ཉི་ཟླའི་གཟི་འོད་ཀྱིས་གླིང་བཞི་སྣང་ཞིང་པདྨའི་ཁ་འབྱེད་པ་རྫིང་བུར་གཟུགས་བརྙན་སྟོན་པ་བཞིན་ནོ། །དེ་ཉིད་ཡེ་ཤེས་ཀྱི་སྒྱུ༵་མ༵་སྟེ་སྐུ་གསུང་ཐུགས་རྡོ༵་རྗེ༵འི་རང་བཞིན་ཅན་ཆོས་ཐམས་ཅད་ལ་མངའ་སྒྱུར་བས་ཆེ་བཙན༵་དམ་པའི༵་མཆོག༵་ཡིན་ཏེ། རྡོ་རྗེ་ལས། ཡེ་ཤེས་སྒྱུ་མར་རང་སྣང་བ། །རྡོ་རྗེ་བཙན་པོ་དམ་ཚིག་མཆོག །སྐུ་གསུང་ཐུགས་ཀྱི་དངོས་གྲུབ་ཆེ། །འགྲོ་བ་ཀུན་ལ་རབ་སྣང་བའོ། །ཞེས་སོ། །

གཉིས་པ་དེ་ཉིད་ཇི་ལྟར་བསྒྲུབ་པའི་ཐབས་བསྟན་པ་ནི། ལམ་མ་ནོར་བར་སྟོན་པ་བླ་མ་དགེ་བའི་བཤེས་གཉེན་གྱིས་ཟིན་པ། དེ་ལས་(༡༩༡)ཟབ་མོའི་དབང་ཐོབ་པ། དམ་ཚིག་དང་སྡོམ་པ་ལ་གནས་པ། སྒྲུབ་པའི་མན་ངག་ལ་མཁས་པ། བརྩོན་འགྲུས་ཕུན་སུམ་ཚོགས་པས་བསྒྲུབ་ནུས་པ་སྟེ། དངོས་གྲུབ་སྒྲུབ་པའི་ཆོ༵་ག༵་ལྔ༵་ནི༵་རྒྱུད་ལ་རྫོག༵ས་པར་བྱས༵་ཤིང༵་། སྒྲུབ་པའི་གནས་བར་ཆད་མེད་ཅིང་ཡིད་དང་མཐུན་པ། གྲོགས་མཚན་ཉིད་ཚང་ཞིང་སྐལ་བ་བཟང་བ། འཚོ་བའི་ཡོ་བྱད་མཐའ་གཉིས་སུ་མ་ལྷུང་ཞིང་ལོག་འཚོ་མེད་པ། དངོས་གྲུབ་ཀྱི་རྫས་ཚང་ཞིང་ཉམས་པ་མེད་པ། དམ་ཚིག་གི་རྫས་ཚོགས་ཤིང་རྟེན་དུ་ཡོད་པ་སྟེ་དངོས་གྲུབ་བསྒྲུབ་པའི་མཐུན་རྐྱེན་གྱི་ཡོ༵་བྱད༵་ལྔ༵་ནི༵་ཡོངས་སུ་རྫོ༵གས་པ༵ར་ལྡན༵་ཞིང་། བདག་གི། ལྷའི། གསང་སྔགས་ཀྱི། བཟླས་བརྗོད་ཀྱི། འཕྲོ་འདུའི་དེ་ཁོ་ན་ཉིད་དེ། གསང་སྔག༵ས་ཀྱི༵་སྒྲུབ་པའི་ཡན༵་ལག༵་ལྔ༵་རྫོ༵གས་པ༵ས། སྤྱིར་ལྟ་བ་དང་དམ་ཚིག་མ༵་ཉམ༵ས་ཤིང་བྱེ་བྲག་ཏུ་སྒྲུབ་པའི་མཐུན་རྐྱེན་ཚོགས་པ་ལས་མ་ཉམས་བསྒྲུབ་པ་ལ་འཇུག༵་པ་དང་ཞུགས་ནས་སྒྲུབ་པ་ལ༵་ཉིན་མཚན་གཉིད་དང་སྙོམས་ལས་སྤངས་ཏེ་རབ༵་ཏུ་བརྩོ༵ན་ན༵་མྱུར་དུ་འགྲུབ་ཅིང་། མི་བརྩོན་ན་མི་འགྲུབ་ཅེས་པའོ། །གཞུང་ཁ་ཅིག་ལས་བརྩོན་པས་ཞེས་ཀྱང་འབྱུང་ངོ་། །དེ་ལྟ་ན་སྤྱིའི་སྒྲར་བཤད་ཀྱི་མི་འགྲུབ་པ་མ་བསྟན་ཏོ། །དེའང་ཁ་ཅིག །དེ་བཞིན་ཉིད་ཀུན་ཏུ་སྣང་དང་། གསུང་ཡིག་འབྲུ་ཐུགས་ཕྱག་མཚན་སྐུ་རྫོགས་པ་སྟེ་ཆོ་ག་ལྔ་དང་། བཟའ་བཏུང་། བྲོ་གར། གླུ་ཚིག །གོས་རྒྱན། ཨཱ་ལི་ཀཱ་ལིའི་འབྱོར་པ་སྟེ་ཡོ་བྱད་ལྔ་དང་། ཡན་ལག་ལ་ལྷ་ལྔ་བཅུའི་དཀྱིལ་འཁོར་བསྐྱེད་པ། རྟོག་པའི་ཡན་ལག་ལྷ་བཞི་བཅུ་རྩ་གཉིས་སུ་ཤེས་པ། ལྷ་རེ་རེའང་བཞི་བཅུ་རྩ་གཉིས་སུ་དབྱེ་བ། དེ་དག་གི་སྐུ་གསུང་ཐུགས་བྱིན་གྱིས་བརླབས་པ། རིགས་ལྔས་དབང་བསྐུར་བ་སྟེ་སྔགས་ཀྱི་ཡན་ལག་ལྔར་འདོད་པ་ནི་བསྐྱེད་རིམ་འབའ་ཞིག་གི་ཕྱོགས་སུ་ལྷུང་བས་རྫོགས་རིམ་གྱི་དེ་ཉིད་དང་། གནས་དང་རྫས་ཀྱི་ཡོ་བྱད་མ་ཚང་བའི་ཕྱིར་འོས་པ་མ་ཡིན་ནོ། །

གསུམ་པ་ཐབས་དེས་གྲུབ་པའི་འབྲས་བུ་བརྗོད་པ་ལ་གཉིས་ཏེ། གནས་སྐབས་དང་། མཐར་ཐུག་གི་འབྲས་བུའོ། །

དང་པོ་ནི། དབང་པོ་དང་བརྩོན་པ་རབ་ཀྱིས། ཞག༵་ནི༵་སུམ༵་ཅུ༵་ཕྲག༵་དྲུག༵་སྟེ་ཟླ་བ་དྲུག་གམ༵། འབྲིང་གིས་ཟླ་བ་བཅུ༵་གཉིས༵་སམ། ཐ་མས་ཟླ་བ་བཅུ༵་བཞི༵འམ། ཤིན་ཏུ་རྟུལ་པོས་ཀྱང་ཟླ་བ་བཅུ༵་དྲུག༵་གི༵ས་ཚེ་ལ་དབ༵ང་བསྒྱུར༵་བའི་རི༵ག་འཛིན་གྱི༵་དམ༵་པ༵་འགྲུབ༵་བོ། །དེའང་ཕྱག་རྒྱ་དང་ལྷུན་གྱིས་གྲུབ་པ་འདིའི་གོང་ལ་ཡོད་པ་ལ་དམ་པའི་སྒྲས་མི་སྨོས་པར། འདི་ལ་སྨོས་པ་ཅི་ཡིན་ན། རྣམ་སྨིན་ལས་འཕགས་ཤིང་ལུས་དེ་ཉིད་ཀྱིས་སངས་རྒྱས་ཐོབ་པས་དེ་སྐད་ཅེས་བཏགས་ཏེ། སྦྱོར་ལམ་ཆོས་མཆོག་ལ། ཆོས་ཀྱི་མཆོག་ཅེས་བཏགས་པ་བཞིན་ནོ། །དེ་སྐད་དུ་ཡང་ལམ་རིམ་ལས། (༡༩༢)དོན་མཐོང་འཇུག་པ་མཐར་ཕྱིན་པའི་། །ཚོགས་སྤྱོད་སྒྲུབ་པའི་དངོས་གྲུབ་ཀྱིས། །ལུས་ཁམས་སྐྱེ་གནས་ཟག་པ་ཟད། །རྡོ་རྗེའི་ལུས་གྱུར་ཚེ་ཡི་རིགས། །མཐོང་བའི་ཆོས་ལ་མྱ་ངན་འདའ། །ལུས་མ་བོར་བར་རྒྱལ་བའི་ས། །ཞེས་སོ། །ཚེ་དབང་ཐོབ་པ་དེ༵་ཉིད་ཀྱི་རྟེན་ལ་ཚེ༵་བཅུ་དྲུག་མཐུད་པའི་ལོ་གྲངས་སམ་དུས་ན་འཚང་རྒྱ་སྟེ། སྐྱེ་བ་བཅུ༵་དྲུག༵་ཚུན༵་ཆད༵་ཀྱི༵་སྐུ༵་ལྔ༵་ལྷུན༵་གྱི༵ས་རྫོ༵གས་པ༵ར་སངས་རྒྱས་ནི༵་ཐོབ་པར་བྱེད་དོ། །སྔགས་ཀྱི་གཞུང་འགའ་ལས་ཚེ་གཅིག་ལུས་གཅིག་པུ་དེས་མཁའ་སྤྱོད་བགྲོད་དེ་འཚང་རྒྱ་བ་དང་། སྐྱེ་བ་བདུན་དང་། བཅུ་དྲུག་ན་ཇི་ལྟར་འགོར་ཡང་འཚང་རྒྱ་བར་འདོད་པ་ཡིན་མོད། འདིར་ཚེ་དབང་ཐོབ་པ་དེས་ལོ་སྟོང་དྲུག་བརྒྱའི་བར་དུ་ཚེ་གཅིག་གིས་ཐུབ་པར་བྱས་ཏེ་ལྷུན་གྱིས་གྲུབ་པའི་རིག་འཛིན་ཐོབ་པར་བྱེད་དོ། །དེའང་ཚེའི་འདུ་བྱེད་ཟད་པ་ན་ཐབས་ཀྱིས་ཚེ་བསྲིངས་ཏེ་ལོ་བརྒྱ་བརྒྱ་ཕྱིར་སྣུར་བ་དེ་ལྟ་བུ་ལན་བཅུ་དྲུག་ལུས་གཅིག་གིས་གནས་པ་ཡིན་ཏེ། རྒྱས་པ་ལས། ཚེ་ནི་བཅུ་དང་དྲུག་པ་ཡིས། །བརྒྱ་བརྒྱ་དག་ཏུ་སྣུར་ཞིང་གནས། །ལུས་མ་བོར་བར་སངས་རྒྱས་སོ། །ཟག་གསུམ་ཟག་པ་དེ་ལ་མེད། །ཅེས་པ་དང་། རྡོ་རྗེ་རྩེ་མོ་ལས། སྐྱེ་བ་བཅུ་དྲུག་མཐར་ཐུག་པའི། །ཞི་བའི་སངས་རྒྱས་ཉིད་འཐོབ་འགྱུར། །ཞེས་སོ། །ཁ་ཅིག་ཚེ་གཅིག་ཡིན་ཡང་ལུས་ལན་བཅུ་དྲུག་སྣུར་ཏེ་གྲོང་འཇུག་གི་ཚུལ་དུ་བྱེད་ཅེས་པའང་ལུས་མ་བོར་བར་སངས་རྒྱས་སོ་ཞེས་པས་བཀག་པ་ཡིན་ནོ། །དེའང་འདིར་ཚེ་དབང་དང་ལྷུན་གྲུབ་གཉིས་ཀྱི་ཞར་ལ། རྣམ་པར་སྨིན་པ་དང་། ཕྱག་རྒྱ་ཆེན་པོའི་རིག་འཛིན་ཀྱང་བསྟན་པ་ཡིན་ནོ། །

གཉིས་པ་མཐར་ཐུག་གི་འབྲས་བུ་ལྷུན་གྱིས་གྲུབ་པའི་རིག་འཛིན་ལ་གསུམ་སྟེ། ལྷུན་སྟུག་པོ་བཀོད་པར་རང་སྣང་སྐུ་དང་ཡེ་ཤེས་སུ་གྲུབ་ཚུལ། དེ་ཉིད་དབྱིངས་ཆོས་སྐུའི་ཞིང་ནང་གསལ་སྤྲོས་པ་དང་བྲལ་བར་བཞུགས་ཚུལ། སླར་ཡང་གདུལ་བྱའི་འཇིག་རྟེན་དུ་སྤྲུལ་སྐུ་འཆར་ཚུལ་ལོ། །

དང་པོ་ལ་གཉིས་ལས། དང་པོ་མངོན་པར་བྱང་ཆུབ་པའི་ཚུལ་ནི་དབྱིངས་རང་བཞིན་གྱིས་དག་པའི་སེམས་ཉིད་ཡེ་ནས་སངས་རྒྱས་པའི་ཡེ༵་ཤེ༵ས་སྤྲོས་པའི་མཐའ་ཐམས་ཅད་བྲལ་བ་ཐིག༵་ལེ༵་ཉག་གཅིག་གྲུབ་བསལ་མེད་པའི་ཆོས་དེ༵་ཉིད༵་ལ༵། གློ་བུར་ཀུན་ཏུ་བཏགས་པའི་དྲི་མ་རང་སར་དག་པས་ཟད་པ་དང་སྐྱེ་བ་མེད་པའི་ཡེ༵་ཤེ༵ས་བརྙེས་ཏེ། དབྱིངས་དེར་གཉིས་སུ་མེད་པར་འདྲེས་པ་ཆུ་ལ་ཆུ་བཞག་པ་ལྟ་བུའི་ཡེ་ཤེས་རོ་གཅིག་ཏུ་གྱུར་པའི་ཐི༵ག་ལེ༵་ཉིད༵་སྣ༵ང་བ༵་ནི་མངོན་པར་བྱང་ཆུབ་པ་དང་མི་འགྱུར་རྡོ་རྗེ་དང་ཞི་བ་ཆོས་སྐུ་དང་། གསལ་བ་ལོངས་སྐུ་དང་ཡེ་ཤེས་སྤྲུལ་པའི་སྐུ་ལྔར་ལྷུན་གྱིས་གྲུབ་པས་བས༵མ་གྱིས༵་མི༵་ཁྱབ༵་ཅིང་མཐ༵འ་ཡས་(༡༩༣)པའི་མཆོ༵ག་ཕྱོག༵ས་བཅུ༵་དུས༵་བཞི༵འི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་དང་གཉིས་སུ་མེད་པར་མངོ༵ན་པར་རྫོ༵གས་པ༵ར་བྱང་ཆུབ་པས་མཆོག་གི་དངོས་གྲུབ་བརྙེས་པ་ཞེས་བྱའོ། །

གཉིས་པ་ཞིང་ཁམས་ཇི་ལྟར་སྣང་བའི་ཚུལ་ནི། དེའི་ཚེ་ལྷུན་སྟུག་པོ་བཀོད་པའི་ཞིང༵་ཁམ༵ས་ཆོས་ཀྱི་དབྱིངས་དང་ནམ་མཁའི་མཐའ་ཀླས་པར་ཁྱབ་པས་བསམ༵་ཡས༵་པའི་ངང་རང་བཞིན་གྱིས་རྣམ༵་པར་དག༵་ཅིང༵་དྲི་མ་ཐམས་ཅད་དང་བྲལ་བ་དེ་ན་རྒྱ༵་ཕྱོགས་བཅུར་མ་ཆད་ཅིང་འདི་ཙམ་ངེས་སོ་ཞེས་བློས་བསམ་པ་དང༵་བྲལ༵་བ༵འི་གཞ༵ལ་ཡ༵ས་ཁ༵ང་གཞི་ཚད་མེད་པ་ཡེ་ཤེས་ཀྱི་འཁོ༵ར་ལོ༵་ལ་བརྟེན་པའི་རྒྱན་གྱི་རྣམ་པ་ཡང་འཁོར་ལོ་རིན་པོ་ཆེས་མཚན་པ་དང༵་། འདོད་ཡོན་ཕུན་སུམ་ཚོགས་པ་ཕྱོགས་བཅུར་འཁྲིགས་པའི་རོལ༵་མོའི༵་ཚོ༵གས་ཆེན་པོ་དང་རིགས་ལྔའི་དཀྱི༵ལ་འཁོ༵ར་ནམ་མཁའི་མཐས་ཁྱབ་པར་སྣང་བ་འོད་གསལ་ལྷུན་གྱིས་གྲུབ་པ་མ༵་ལུས༵་པ་བས༵མ་ཡ༵ས་ཀུན༵་གྱི་རང་བཞིན། ཡེ་ཤེས་ཀྱི་གཟིགས་པ་དག་པའི་ཡུལ་དུ་མཐོང༵་ནས༵་ལོངས་སྤྱོད་ཆེན་པོའི་གཞིར་མངོན་སུམ་དུ་ཉེ༵་བ༵ར་མངའ་བརྙེས༵་པ༵་དང༵་། བརྗོད་པ་མེད་ཅིང་རིས་སུ་མ་ཆད་པས་རྒྱ༵་ཆེ༵ན་པོའི་གསུང༵་ཡི་གེ་ཚོགས་ཆེན་ལས༵་འགྲོ་བའི་དོན༵་ལྷུན་གྱིས་གྲུབ་པར་འབྱུ༵ང་བ༵་ནི། གཞི་ལྷུན་གྱིས་གྲུབ་པའི་དཀྱིལ་འཁོར་ཡེ་ནས་སངས་རྒྱས་པ་ལ། ལམ་ཏིང་ངེ་འཛིན་གྱི་དཀྱིལ་འཁོར་ཟབ་མོས་གསལ་བཏབ་པས། འབྲས་བུ་གདོད་མའི་གནས་ལུགས་སུ་བྱང་ཆུབ་པ་གསུམ་དབྱེར་མེད་པ་ནི་དེ་དག་རང་བཞིན་མཐུ༵ན་པའི༵་ཡེ༵་ཤེ༵ས་ཞེས་བྱ་སྟེ། ཡིན་པ་ལ་ཡིན་པར་ཤེས་པས་ཡིན་ཐོག་ཏུ་སླེབས་པ་ཡིན་ནོ། །དེ་ལྟ་བུའི་ཞིང་དེ་ཡང་ཕྱོགས་གང་ཤེད་ན་གྲུབ་པའི་ཚུལ་གྱིས་ཀུན་གྱིས་བལྟར་ཡོད་པ་མ་ཡིན་ཏེ། སངས་རྒྱས་ཉིད་ཀྱི་ཡེ་ཤེས་རང་སྣང༵་བ༵འོ། །

གཉིས་པ་ནི། དེ་ལྟར་སྣང་བའི་ཞིང་ཁམས་ཀྱང་གནམ་གང་གི་ཟླ་བ་ལྟར་དབྱིངས་ཆོས་སྐུའི་ཞིང་དུ་ཐིམ་པས་ཕྱི་རོལ་ཏུ་སྣང་ཆར་མེད་ལ་ནང་གསལ་དུ་མཁྱེན་ཆར་མ་འགགས་པ་ནི་རང་བཞིན་གཅི༵ག་དང༵་དུ༵་མ༵་དང་བྲལ༵་བ༵་ཡི༵་ཆོས་སྐུ་མཐ༵འ་དང༵་དབུ༵ས་མེ༵ད་པའི་དེ༵་བཞི༵ན་ཉིད༵་སྤྲོས་པ་ཐམས་ཅད་ཞི་བའི་དབྱིངས་ན། ཕྱིར་སྣང་ཐིམ་པར་བཞུགས་པའི་ལོངས་སྐུའི་ཆ་དེ་ཉིད་སང༵ས་རྒྱ༵ས་ཀྱི༵ས་ཀྱང༵་ཕན་ཚུན་མི༵་གཟི༵གས་ཏེ༵་ཤིན་ཏུ་ཕྲ་བའི་རང༵་བྱུང༵་གི་ཡེ༵་ཤེས༵་དེ་ཉིད་གང་དུའང་གན༵ས་པ་མེ༵ད་པར་ཞི་བའི་དབྱིངས་ན་སྣང༵་བ་སྟེ་གནས་པའི་ཕྱིར་རོ། །དེ་སྐད་དུའང་རྨད་བྱུང་རྒྱལ་པོ་ལས། ཆོས་ཀྱི་དབྱིངས་ཀྱི་ཕོ་བྲང་ན་དུས་གསུམ་གྱི་སངས་རྒྱས་ཐམས་ཅད་གཅིག་གིས་གཅིག་མི་གཟིགས་པའི་ཚུལ་གྱིས་བཞུགས་ཏེ། ཞེས་སོ། །དེའང་ཁ་ཅིག་འགྲོ་དྲུག་གིས་མི་མཐོང་ལ་སངས་རྒྱས་ཀྱིས་གཟིགས་(༡༩༤)པར་འདོད་པ་ནི་གཞུང་གི་དགོངས་པ་མ་ཡིན་ནོ། །འདིར་སྣང་བ་བཞི་མཐར་ཕྱིན་པའི་སྐབས་ཡིན་ཏེ། ཚེ་དབང་དེ་འོད་གསལ་བའི་ཡེ་ཤེས་དུ་བ་ལ་སོགས་པ་དང་པོར་མཐོང་དུས་ཆོས་ཉིད་མངོན་སུམ་གྱི་སྣང་བའོ། །དེ་ཉིད་གོང་ནས་གོང་དུ་མཆེད་པ་ལས་ཕྱི་ནང་གི་རྟགས་མཐོང་བ་ནི་ཉམས་གོང་དུ་འཕེལ་བའི་སྣང་བའོ། །དེ་ནས་སངས་རྒྱས་ལོངས་སྐུའི་ཞིང་མཐོང་བ་ནི་རིག་པ་ཚད་ཕེབས་ཀྱི་སྣང་བའོ། །དེ་ནས་དེ་ཡང་ནང་དུ་ཞི་བས་འཛིན་པ་མེད་པ་ནི་ཆོས་ཉིད་ཟད་པའི་སྣང་བའོ། །དེ་ནས་གདོད་མའི་ངང་དུ་ལོངས་སྐུའི་ཞིང་སྣང་ཐིམ་པ་ནི་གཞི་ཐོག་ཏུ་ཕྱིན་པ་སྟེ་ལྷུན་གྲུབ་རིན་པོ་ཆེའི་སྦུབས་ན་གཟིགས་པ་མེད་པར་བཞུགས་པའོ། །

གསུམ་པ་སླར་ཡང་གདུལ་བྱའི་འཇིག་རྟེན་དུ་སྤྲུལ་སྐུའི་འཆར་ཚུལ་ནི་དེ་ནས་གདུལ་བྱའི་འཇིག་རྟེན་དུ་ལྷུན་གྱིས་གྲུབ་པའི་འཕྲིན་ལས་ཀྱིས་གང་ལ་གང་འདུལ་དུ་རིག་པའི་ཡེ་ཤེས་སྤྲུལ་པའི་སྐུ་མངོན་པར་སྣང་སྟེ། དེའང་ཐུགས་རྗེ་རིག་པའི་ཡེ་ཤེས་དེ་ཉིད་ཕྱིན་ཅི་ལོག་གི་ལོ༵ག་པ༵ར་རྟོག༵་པས་ཀུན་ནས་བཏག༵ས་པའི་ངོ་བོ་སྒྲིབ་གཉིས་བག་ཆགས་དང་བཅས་པ་མ་ལུས་པ་ཐམས་ཅད་རྣ༵མ་པར་དག༵་ཅིང༵་ཇི་ལྟ་བ་དང་ཇི་སྙེད་པའི་ཤེས་བྱ་མ་ལུས་པ་ཀུན་མཁྱེན་པའི་ཡེ༵་ཤེས༵་ཕྱོགས་བཅུར་རྒྱས་ཏེ། ཡེ་ཤེས་དེ་ཉིད་ཀྱང་དབྱིང༵ས་རང་བཞིན་གྱིས་དག་པའི་ཆོས་སྐུ་ཡོན་ཏན་གྱི་གཏེར་ལ༵ས་མི༵་གཞ༵ན་པ་སྟེ་ངོ་བོ་གཅིག་ཡིན་པའི་ཕྱིར༵་རྟོག་པ་མེད་བཞིན་དུ་འགྲོ་དོན་ལྷུན་གྲུབ་ཏུ་འབྱུང་སྟེ། ཡུལ་གདུལ་བྱའི་འཇིག་རྟེན་དང་ཡུལ་ཅན་ཐམས་ཅད་མཁྱེན་པའི་ཡེ་ཤེས་གཉིས་ཡེ་ནས་ལྷུན་གྱིས་གྲུབ་པའི་ཐུག༵ས་རྗེ༵་ཆེ༵ན་པོ༵ས་ཡུལ་ཡུལ་ཅན་དུ་འབྲེ༵ལ་བ༵ས་ན༵་མ་དག་པ་འགྲོ༵་བ་རིགས་དྲུག༵་གི་འཇིག་རྟེན་དུ་འདས་མ་འོངས་ད་ལྟར་བའི་དུས༵་ཐམས་ཅད་དུ་ཡེ་ཤེས་ཀྱི་སྤྱན་གྱིས་གཟིགས་ཤིང་སུ་ནི་འདུལ་བའི་དུས་ལ་བབས་སྙམ་དུ་མཁྱེན་པ་འཇུག་པས། མཐོ་རིས་ལ་སོགས་པའི་གན༵ས་རིས་སེམས་ཅན་གྱིས་ཁྱབ་པ་མ༵་ལུས༵་པ་དེ་དག་ཏུ་ཐུབ་པ་དྲུག་ལ་སོགས་པའི་སྤྲུལ་པ་ཚད་མེད་པ་སོ་སོའི་སྣང་བ་དང་མཐུན་པར་སྣང༵་ཞིང་དོན་མཛད་པ་ཡིན་ནོ། །དེ་སྐད་དུའང་འཁོར་ལོ་བཅུ་པའི་མདོ་ལས། བདེ་གཤེགས་ཐུགས་རྗེ་དུས་རིང་འགྲོ་བ་ལ། །འདུལ་བའི་ཡུལ་དུ་མཁྱེན་ནས་དོན་མཛད་པ། །དུས་ལས་མི་ཡོལ་སྐད་ཅིག་སོ་སོར་སྣང་། །ཡེ་ཤེས་གཟིགས་པ་ཁྱོད་ལ་ཕྱག་འཚལ་ལོ། །ཞེས་སོ། །དེའང་ཆོས་སྐུ་ལས་མ་གཡོས་པར་འབྱུང་སྟེ། ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །ཞེས་སོ། །དེ་ལྟར་སྣང་བའི་སངས་རྒྱས་དེ་ཡང་ཕ་རོལ་ཏུ་ཕྱིན་པའི་ལུགས་ཀྱིས་གྲངས་མེད་པ་གསུམ་རྫོགས་པས་འགྲུབ་སྟེ། མདོ་སྡེ་རྒྱན་ལས། གྲངས་མེད་གསུམ་ནི་རྫོགས་པ་ཡིས། །(༡༩༥)བསྒོམས་པ་ཡི་ནི་མཐར་ཕྱིན་ཏོ། །ཞེས་སོ། །དེའི་མགོ་ཡང་ཚོགས་ཀྱི་ལམ་བསམ་པ་ངེས་པ་ཚུན་ཆད་ནས་འཛིན་ཏེ། དེ་ལས། བཟང་དང་སྨོན་པའི་སྟོབས་ཅན་གྱིས། །ཞེས་པ་ལ་སོགས་པའོ། །གསང་སྔགས་ཕྱི་པའི་ཚུལ་ལས་སྐལ་བ་དང་མོས་པ་དང་ཏིང་ངེ་འཛིན་རབ་ཏུ་གྱུར་པས་ལུང་མནོས་ཏེ་བསྙེན་པའི་མཚན་མ་གནས་པས་ཚེ་འདིར་སངས་རྒྱས་ཀྱི་ཞལ་མཐོང་སྟེ། དེ་ནས་ཚེ་གཅིག་གམ་གཉིས་སམ་གསུམ་ལ་སོགས་པ་ན་སངས་རྒྱས་ཐོབ་པར་གྲགས་སོ། །རྣལ་འབྱོར་ཆེན་པོའི་ལུགས་ལས་མོས་པ་དང་བརྩོན་འགྲུས་དང་དགེ་བའི་བཤེས་གཉེན་གྱི་སྟོབས་ཀྱིས་ལུས་དེས་ཚེ་ལ་དབང་བའི་ས་ཐོབ་ནས་གྲོལ་བར་གསུངས་སོ། །འདིར་དབང་ཐོབ་ཅིང་དམ་ཚིག་དང་ལྡན་པས་ཟླ་བ་དྲུག་ལ་སོགས་པས་ཚེ་དབང་བསྒྲུབས་ནས། རྟེན་དེས་བྱང་ཆུབ་ཚེ་གཅིག་ལུས་གཅིག་ལ་འགྲུབ་པར་བསྟན་ཏོ། །དེ་དག་ཀྱང་གང་ལ་ཞུགས་པ་དེའི་ལུགས་ལྟར་བདེན་གྱི། འདི་ཉིད་ཁོ་ནའི་ལྟར་ཡིན་ནོ་ཞེས་ངེས་བཟུང་མི་བྱ་སྟེ། གཉེན་པོ་དང་ལམ་དང་བརྩོན་འགྲུས་དང་རྐྱེན་གྱི་སྟོབས་སོ་སོ་བ་ཡིན་པའི་ཕྱིར་ཏེ། འདག་ཆལ་གྱི་སྟོབས་སོ་སོས་དྲི་མ་དག་པ་མགྱོགས་བུལ་དང་ཡུལ་གཅིག་ཏུ་བགྲོད་པའང་བརྩོན་འགྲུས་དང་སྟོབས་སོ་སོས་མགྱོགས་བུལ་དུ་སྣང་ཡང་ཡུལ་ལ་ཉེ་རིང་ཡོད་པ་མ་ཡིན་ནོ། །དེས་ན་སེམས་ལ་དབང་མ་ཐོབ་ཀྱི་བར་དུ་ནི་རྐྱེན་དང་ལས་ཀྱི་རྗེས་སུ་བྱེད་ལ། དེ་ཕན་ཆད་ནི་དུས་ཀྱང་ཅི་དགར་སྣང་སྟེ་རིང་བ་ཐུང་བར་བསྒྱུར་ཅིང་ཐུང་བ་རིང་བར་འཕྲུལ་པ་ལ་སོགས་པ་ཡོད་དེ། དུས་ཀྱང་སེམས་ཀྱི་སྣང་བ་ཙམ་ཡིན་པའི་ཕྱིར་རོ། །དེ་སྐད་དུའང་དྲི་མ་མེད་པར་གྲགས་པས་བསྟན་པའི་མདོ་ལས། དུས་ཐུང་བར་འདོད་པ་རྣམས་ལ་བསྐལ་པ་མང་པོ་ཞག་བདུན་གྱིས་འདའ་བར་བྱིན་གྱིས་རློབ་བོ། །ཞེས་པ་ལ་སོགས་པ་གསུངས་སོ། །དེའི་ཕྱིར་འཕགས་པའི་གོ་འཕང་ཐོབ་པ་ཚུན་ཆད་ལ་ལམ་ཟབ་མི་ཟབ་ལ་སོགས་པ་ཉེ་རིང་དུ་སྣང་ཡང་། དེ་ཕན་ཆད་སེམས་ལ་དབང་ཐོབ་པས་ཇི་ཙམ་གྱི་གྲོལ་བར་རང་དབང་ཡོད་དེ། ཡུམ་བར་མ་ལས། རབ་འབྱོར་གང་གི་ཚེ་ཆོས་རྣམས་ལ་ཆོས་ཀྱི་མིག་དྲི་མ་མེད་པ་ཐོབ་པ་དེའི་ཚེ། འདོད་ན་ཞག་བདུན་གྱིས་བླ་ན་མེད་པའི་བྱང་ཆུབ་ཏུ་འཚང་རྒྱ་ལ། འདོད་ན་བསྐལ་པ་བྱེ་བ་ཁྲག་ཁྲིག་རབ་ཏུ་མང་པོས་ཀྱང་བླ་ན་མེད་པའི་བྱང་ཆུབ་ཏུ་འཚང་རྒྱ་སྟེ། འདི་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐབས་ལ་མཁས་པའི་ཁྱད་པར་དང་པོའོ། །ཞེས་གསུངས་པ་ལྟར་རོ། །

གསུམ་པ་གང་དུ་དབང་བསྐུར་བའི་དོན་བསྡུ་བ་ནི། སྔར་བསྟན་པའི་མཆོག་དབང་བདེ༵་བ༵་ཆེ༵ན་པོ༵འི་དཀྱིལ༵་འཁོར༵་ནི༵་ཡབ་ཡུམ་སྟངས༵་དཔྱལ༵་གཉི༵ས་ས༵མ་ཡང༵་ན༵་(༡༩༦)རྡུལ་ཚོན་གྱི་དཀྱིལ་འཁོར་ཁ་དོག་ལྔ༵་པ་བྱས༵་ཏེ༵་སློབ་མ་ད༵ད་ལྡན༵་རྣམས་རབ༵་ཏུ་ཞུག༵ས་ན༵་ཇི་ལྟར་འདོད༵་པའི༵་དངོས་གྲུབ་ཡིད༵་དུ་འོང༵་བ་སྔོན་གཞན་གྱིས་ཐོབ་པ་དང་མཉ༵མ་པར༵་འཐོབ་པ༵ར་འགྱུ༵ར་རོ། །དེ་ལྟར་སྐལ༵་བ༵་མཉམ༵་པ༵འི་ཡེ༵་ཤེས༵་ཆེན་པོ་དེ༵་དོན་དུ་གཉེར༵་ན༵་ཚེ་འདི་ཉིད་ལ་དངོས་གྲུབ་ཆེན་པོ་ཉེ༵་བར༵་འབྱུང༵་བ༵་ཡི༵་རང་བཞིན་ལས་བཞི་དང་ཚེ་དབང་ཐོབ་པའི་རྟེན་དེས་མཆོག་གི་དངོས་གྲུབ་ཡ༵་མཚན༵་ཆེ༵ན་པོ༵་སངས་རྒྱས་ཉིད་འབྱུང༵་ཞིང་ཐོབ་པར༵་ངེ༵ས་སོ། །དེ་སྐད་དུའང་མེ་ལོང་ལས། རྡོ་རྗེ་སེམས་དཔའ་ལ་སོགས་ལྷའི། །དཀྱིལ་འཁོར་མངོན་དུ་མཐོང་ཞུགས་པ། །བསོད་ནམས་བསྟན་པ་གང་ཡིན་པ། །ཕྱིས་བྱས་པ་འང་དེ་བཞིན་ནོ། །ཞེས་སོ། །དེ་ལས་གཞན་དུ་ཆོས་དང་བླ་མ་ལ་དད༵་པ་མེ༵ད་ཅིང་རྩ་བ་དང་ཡན་ལག་གི་དམ་ཚིག་ཉམ༵ས་པས་བསྒྲུབས་ན༵་ཚེ་འདིར་ནད་དང་གནོད་པ་ལ་སོགས་པ་མི་འདོད་པ་སྣ་ཚོགས་འབྱུང་ཞིང་ཕྱི་མར་ངན་སོང་དུ་སྐྱེ་བས་ཕུ༵ང་བར༵་འགྱུར༵་ཏེ། རྣལ་འབྱོར་གྱི་རྒྱུད་ལས། བྱང་ཆུབ་སེམས་ནི་མ་བསྐྱེད་དང་། །ཐེ་ཚོམ་ཡོད་པ་ཉིད་དང་ནི། །བཀའ་བཞིན་སྩོལ་བ་མི་བྱེད་པ། །མ་དད་པས་ནི་མི་འགྲུབ་ཅིང་། །འདི་ཕྱིར་སྡུག་བསྔལ་ཉིད་དུ་འགྱུར། །ཞེས་པ་ལྟར་རོ། །ཚུལ་དེ་སྐད་ཅེས༵་དེ་བཞིན་གཤེགས་པ་བཙུན་མོའི་ཚོགས་དང་བཅས་པས་ཆེད༵་དུ༵་བརྗོད༵་དོ༵། །ཡེ་ནས་ལྷུན་གྱིས་གྲུབ་པའི་དཀྱིལ་འཁོར་གྱི་གནས་ལུགས་གསང༵་བའི༵་སྙིང༵་པོ༵་དོན་གྱི་ཡེ་ཤེས་དེ༵་ཁོ༵་ན༵་ཉིད༵་ངེས༵་པ༵་ལས༵་ཡེ་ནས་གྲུབ་པའི་དཀྱིལ་འཁོར་གྱི་ངོ་བོ་རྡོ༵་རྗེའི༵་མཚོན་བྱེད་གཟུགས་བརྙན་གྱི་དཀྱིལ་འཁོར་དུ་བཀོད༵་པ༵་མཆོག་ཏུ་གསང༵་བ༵་སངས་རྒྱས་ཐམས་ཅད་ཀྱི་དམ༵་ཚི༵ག་གི༵་ལེའུ༵་སྟེ༵་དགུ༵་པའི་རྣམ་པར་བཤད་པ༵འོ༵།། །།