སློབ་དཔོན་མ་ཁོལ།
༈ དེ་ནས་རྒྱལ་པོ་ཟླ་བ་སྦས་པའི་བུ་སྙིང་པོ་ཐིག་ལེ་ཞེས་བྱ་བ་བྱུང་། དེའི་བློན་པོ་བྲམ་ཟེ་ཙ་ར་ཀ་ཞེས་བྱ་བས་གཤིན་རྗེ་གཤེད་ཀྱི་རིག་སྔགས་གྲུབ་པས་མཐུ་ཤིན་ཏུ་ཆེ་བར་གྱུར། གྲོང་ཁྱེར་བཅུ་དྲུག་ཙམ་གྱི་རྒྱལ་བློན་མང་པོ་མངོན་སྤྱོད་ཀྱི་ལས་ཀྱིས་བསད་ཅིང་། སྨྱོ་བ་དང་། བསྐྲད་པ་དང་། དབྱེ་བ་དང་། རེངས་པ་དང་། ངག་ལྐུགས་པ་ལ་སོགས་བྱས་པའི་སྡིག་པས་ལུས་ཚལ་པར་གས་པའི་ནད་ཀྱིས་དམྱལ་བར་སྐྱེས། རྒྱལ་པོ་དེའི་ཚེ་གྲོང་ཁྱེར་མེ་ཏོག་ཅན་དུ་མེ་ཏོག་གིས་བརྒྱན་པ་ཞེས་བྱ་བའི་གཙུག་ལག་ཁང་དུ་སློབ་དཔོན་མ་ཁོལ་བཞུགས་ཏེ་ཐེག་པ་ཆེ་ཆུང་གི་ཆོས་ཤིན་ཏུ་དར་བར་མཛད། སློབ་དཔོན་དེའི་སྐུ་ཚེའི་སྨད་ལ་སྙིང་པོ་ཐིག་ལེའི་ནུ་བོའི་བུ་རྒྱལ་པོ་ཤྲི་ཙནྡྲས་རྒྱལ་སྲིད་བྱས། དེས་སྤྱན་རས་གཟིགས་ཀྱི་ལྷ་ཁང་བཞེངས་ནས་ཐེག་ཆེན་སྨྲ་བའི་དགེ་སློང་ཉིས་སྟོང་ལ་འཚོ་བ་སྦྱར། མཁན་པོ་སྒྲ་གཅན་འཛིན་གྱིས་མཛད་ཏེ། དེར་དྲིའི་གཙང་ཁང་བཅུ་གཉིས་བཞེངས་ནས་ཆོས་གཞི་མི་འདྲ་བ་ཡང་བཅུ་བཞི་བཙུགས། རྒྱལ་པོ་ཤྲི་ཙནྡྲས་རྒྱལ་སྲིད་ལོ་མང་ཙམ་སོང་བ་ན། ནུབ་ཕྱོགས་མ་ལ་ཝེའི་ཡུལ་དུ་རྒྱལ་པོ་ཀ་ཎི་ཀ་ལོ་གཞོན་ནུ་ཞིག་ལ་རྒྱལ་སར་བསྐོས་ཏེ། རིན་པོ་ཆེའི་འབྱུང་ཁུངས་ཉི་ཤུ་རྩ་བརྒྱད་གསར་དུ་བརྟོལ་བ་ལ་སོགས་པ་དཔལ་འབྱོར་ཆེན་པོ་གནས་པར་བྱེད། ཕྱོགས་བཞིར་གཙུག་ལག་ཁང་ཆེན་པོ་རེ་རེ་ཡང་བཞེངས། ཐེག་པ་ཆེ་ཆུང་གི་དགེ་སློང་སུམ་ཁྲི་རེ་རྟག་ཏུ་མཆོད་དོ། །དེ་ནི་རྒྱལ་པོ་ཀ་ཎི་ཀ་གོང་གི་དེ་དང་མི་གཅིག་པར་གྲགས། ༈ དེ་ནས་ཤར་ཕྱོགས་སུ་རྒྱལ་པོ་ཤྲི་ཙནྡྲའི་བུ་དྷརྨ་ཙནྡྲ་བྱ་བ་བྱུང་། འདིས་ཀྱང་སངས་རྒྱས་ཀྱི་བསྟན་པ་ལ་མཆོད་པ་རྒྱ་ཆེར་བྱས། དེའི་ཚེ་ཡུལ་མོ་མ་ཏཱ་ན་སྟག་གཟིག་གི་རྒྱལ་པོ་གཅིག་ཡོད་ལ། དེ་དང་རྒྱལ་པོ་དྷརྨ་ཙནྡྲ་གཉིས་རེས་འཁྲུག་རེས་བསྡུམ་པ་མང་དུ་བྱས་ནས་ཕན་ཚུན་སྐྱེས་བསྐུར་རེས་བྱས་ཏེ་ལན་གཅིག་ཉི་འོག་རྒྱལ་པོས་དྷརྨ་སྟག་གཟིག་རྒྱལ་པོ་ལ་ཟ་འོག་གི་གོས་སྲུབས་མེད་པ་ཐག་རིས་ལ་སྙིང་གའི་ཐད་དུ་རྐང་རྗེས་འདྲ་བ་བྱུང་བ་
ཞིག་བསྐུར་བ་ལ། ངན་སྔགས་བྱེད་དོ་སྙམ་དུ་ཐེ་ཚོམ་སྐྱེས། ཡང་ཀེ་ལེའི་འབྲས་བུ་ཁ་ཕྱེ་བའི་ནང་དུ་རིག་སྔགས་ཀྱི་འཁོར་ལོ་གྲོ་ག་ལ་བྲིས་པ་རླུང་གིས་བསྐྱོད་ནས་རང་ཤུགས་སུ་ཚུད་པ་ན། ནམ་ཞིག་ཤིང་ཏོག་གི་སྐྱེས་བསྐུར་བས་ཤིང་ཏོག་གི་ནང་ནས་སྔགས་ཀྱི་འཁོར་ལོ་བྱུང་བས། ངེས་པར་ངན་སྔགས་བྱེད་དོ་སྙམ་ནས། དེར་དམག་དྲངས་ཏེ་མ་ག་དྷའི་ཡུལ་ཀུན་བཅོམ་ནས་གཙུག་ལག་ཁང་མང་པོ་ཞིག་ཀྱང་བཤིགས། དཔལ་ན་ལེནྡྲར་ཡང་གནོད་པ་ཆེར་བྱུང་ནས་སངས་རྒྱས་ཀྱི་བསྟན་པ་ལ་དགྲ་བར་པ་བྱུང་ངོ་། །