རིམ་གྱིས་ཐེག་ཆེན་དར་བའི་ཚུལ།
བསྡུ་བ་གསུམ་པ་བྱས་པའི་འོག་ཏུ་རྒྱལ་པོ་ཀ་ཎི་ཀ་ཡང་མྱ་ངན་ལས་འདས་སོ། །དེའི་བུས་ཕོ་བྲང་རྒྱལ་ལྡན་དུ་དགྲ་བཅོམ་པ་སོགས་དགེ་སློང་བརྒྱ་ཕྲག་གཅིག་ལ་ལོ་ལྔར་དུས་སྟོན་བྱས། ཆོས་སྨྲ་བའི་བཙུན་པ་དབྱིག་ཤེས་དང་དབྱངས་སྒྲོགས་སོགས་བྱུང་། གྲོང་ཁྱེར་མེ་ཏོག་ཏུ་བྲམ་ཟེ་དུ་ཙ་བྱ་བ་བྱུང་། སྡེ་སྣོད་གསུམ་སོ་སོར་ཤོ་ལོ་ཀ་འབུམ་འབུམ་ཡོད་ཅིང་། དེ་གསུམ་གྱི་གླེགས་བམ་སྟོང་ཚར་བཞེངས་ནས་མཆོད་པའི་ཡོ་བྱད་སྤེལ་བ་བྱས་ལྷོ་ནུབ་ཀྱི་ཡུལ་དུ་བྲམ་ཟེ་རིགས་ལྡན་ཞེས་བྱ་བ་བྱུང་། ཐེག་པ་ཆེན་པོ་སྟོན་པའི་གནས་བརྟན་དགྲ་བཅོམ་པ་ནནྡཱ་ཞེས་བྱ་བ་ཐེག་པ་ཆེན་པོ་ཉན་པའི་དོན་དུ་སྤྱན་དྲངས། དུས་དེ་ཙམ་ན་ཡུལ་ཐ་དད་པ་ནས་ཐེག་ཆེན་སྟོན་པའི་དགེ་བའི་བཤེས་གཉེན་དཔག་ཏུ་མེད་པ་གཅིག་བྱུང་ལ། དེ་ཐམས་ཅད་ཀྱང་སྤྱན་རས་གཟིགས་དང་། གསང་བའི་བདག་པོ་དང་། འཇམ་དཔལ་དང་། བྱམས་པ་ལ་སོགས་པ་སོ་སོ་ལ་ཆོས་གསན་པ་ཆོས་རྒྱུན་གྱི་ཏིང་ངེ་འཛིན་ཐོབ་པ་ཤ་སྟག་སྟེ་ཆོས་སྟོན་པ་ལྔ་བརྒྱ་ཙམ་བྱུང་ནས། དཀོན་མཆོག་བརྩེགས་པ་ཆོས་ཀྱི་རྣམ་གྲངས་འབུམ་འདུས་པ་སྟོང་ཡོད་པ་དང་ཕལ་ཆེན་ཆོས་ཀྱི་རྣམ་གྲངས་འབུམ་ཡོད་པ་ལེའུ་སྟོང་དང་། ལངྐར་གཤེགས་པ་ཉི་ཁྲི་ལྔ་སྟོང་པ་དང་། རྒྱན་སྟུག་པོ་བཀོད་པ་སྟོང་ཕྲག་བཅུ་གཉིས། ཆོས་ཡང་དག་པར་སྡུད་པ་སྟོང་ཕྲག་བཅུ་གཉིས་ལ་སོགས་པ་མདོ་སྡེ་ཁ་ཤས་ཤིག་གི་གླེགས་བམ་ཡང་ལྷ་དང་ཀླུ་དང་དྲི་ཟ་དང་སྲིན་པོ་ལ་སོགས་པ་གནས་ཐ་དད་པ་རྣམས་ལས་ཀླུའི་ཡུལ་ནས་བྱུང་བ་ཤས་ཆེ་བའི་ཚུལ་གྱིས་བྱུང་བར་བྱས། དེ་ལྟ་བུའི་སློབ་དཔོན་དེ་དག་ཕལ་ཆེར་བ་བྲམ་ཟེ་དེས་སྤྱན་དྲངས། གཏམ་དེ་རྒྱལ་པོ་ལཀྵ་ཨ་ཤྭས་ཐོས་ནས་དད་པ་ཆེར་སྐྱེས་ཏེ་ཨ་བྱུ་ཞེས་བྱ་བའི་རི་ལ་རྩེ་མོར་གཙུག་ལག་ཁང་ལྔ་བརྒྱ་བཞེངས་ཏེ་དེ་རྣམས་ལ་ཕུལ། རྒྱལ་པོ་ཉིད་ཀྱིས་འཁོར་དད་པ་ཆེ་ཞིང་བློ་རྣོ་བ་ལྔ་བརྒྱ་རབ་ཏུ་བྱུང་སྟེ། ཐེག་པ་ཆེན་པོ་ཉན་ཏུ་བཅུག་གོ། དེ་ནས་རྒྱལ་པོས་གླེགས་བམ་འབྲི་བར་འདོད་དེ། ཐེག་པ་ཆེན་པོའི་སྡེ་སྣོད་ཇི་ཙམ་ཞེས་དྲིས་སོ། །སྤྱིར་ཚད་བཟུང་བར་མི་ནུས་མོད་ཀྱི་ད་ལྟར་ཡོད་པ་ནི་འབུམ་ཕྲག་བརྒྱའོ། །རྒྱལ་པོས་སྨྲས་པ་མང་མོད་ཀྱི་བྲི་བར་བྱའོ་ཞེས་ཐམས་ཅད་བྲིས་ཏེ་དགེ་སློང་རྣམས་ལ་ཕུལ་ལོ། །མཐར་གླེགས་བམ་རྣམས་དཔལ་ན་ལེནྡྲར་སྤྱན་དྲངས་སོ། །དུས་དེ་ཙམ་ན་ཐེག་པ་ཆེན་པོའི་སྙན་པའི་གྲགས་པས་ཕྱོགས་ཐམས་ཅད་དུ་ཁྱབ་པ་ན། ཉན་ཐོས་རྣམས་ཀྱི་བློར་མ་ཤོང་ནས། ཐེག་ཆེན་ལ་སྐུར་བ་བཏབ་བོ། །དེའི་ཚེ་མ་ག་དྷར་བྲམ་ཟེ་ཐོ་བཙུན་གྲུབ་རྗེ་དང་། བདེ་བྱེད་བདག་པོ་ཞེས་བྱ་བ་སྤུན་གཉིས་བྱུང་སྟེ། ཐེག་པ་མཐའ་དག་གི་ཆོས་ལ་མཁས་པར་སྦྱངས། སངས་རྒྱས་དང་མུ་སྟེགས་པའི་བཟང་ངན་གྱི་ཁྱད་ཤན་འབྱེད་པའི་ཕྱིར། ཐོ་བཙུན་གྱིས་ཁྱད་པར་འཕགས་བསྟོད་དང་། བདེ་བྱེད་ཀྱིས་ལྷ་ལས་ཕུལ་བྱུང་གི་བསྟོད་པ་བརྩམས། ཚོང་འདུས་དང་རྒྱལ་པོའི་ཕོ་བྲང་སོགས་ཡུལ་ཀུན་ཏུ་དབྱངས་སུ་ལེན་པ་བྱུང་ངོ་། །