ཞི་བའི་སྦྱིན་སྲེག་ཉེས་ལྟུང་ཀུན་དག
ཟབ་ཆོས་པདྨ་དྲག་ཁྲོས་ལས༔ ཞི་བའི་སྦྱིན་སྲེག་ཉེས་ལྟུང་ཀུན་དག་བཞུགས༔ དྲག་པོ་རྩལ་ལ་ཕྱག་འཚལ་བསྟོད༔ ཐོད་ཕྲེང་དྲག་པོའི་རྣལ་འབྱོར་པས༔ ནད་གདོན་སྡིག་སྒྲིབ་ཞི་འདོད་ན༔ ཞི་བའི་མེ་མཆོད་འདི་ལྟར་བྱ༔ མཎྜལ་དཀར་པོ་ཟླུམ་པོའི་སྟེང་༔ ཚངས་པའི་ཐིག་གདབ་ལྟེ་བ་ཟླུམ༔ ལྷ་གྲངས་མཉམ་པའི་པད་འདབ་བཅད༔ རྡོ་རྗེའི་ཕྲེང་དང་མེ་རིས་བསྐོར༔ སྐུ་མདོག་མཚུངས་པའི་ཚོན་གྱིས་སྒྱུར༔ ཙན་དན་དཀར་པོ་ལ་སོགས་པའི༔ ཞི་བའི་ཤིང་ལ་ཐབ་བརྩེགས་ཏེ༔ ཟླུམ་པོ་རྒྱ་ཁྱོན་མཛེས་པར་བྱ༔ དཀར་གསུམ་མངར་གསུམ་ཅི་འབྱོར་དང་༔ ཞི་བའི་སྲེག་རྫས་འབྱོར་ཚད་བཤམས༔ ཡམ་ཤིང་དག་ཀྱང་དཀར་པོ་བསགས༔ ནད་གདོན་སྡིག་སྒྲིབ་ཞི་གྱུར་ཅིག༔ ཡམ་ཤིང་ངོས་ལ་འབྲི་བར་བྱ༔ སྲེག་རྫས་མཆོད་རྫས་བྱིན་གྱིས་བརླབ༔ མེ་ཐབ་མི་དམིགས་སྟོང་བའི་ངང་༔ མེ་ལྷ་དཀར་པོ་ཞི་བའི་ཚུལ༔ དྲང་སྲོང་གཟི་བརྗིད་ལྡན་པར་བསྐྱེད༔ ཨཱོཾ་ཚུར་གཤེགས་ཚུར་གཤེགས་འབྱུང་བ་ཆེ༔ ནད་གདོན་བར་ཆད་ཞི་བའི་ཕྱིར༔ མེ་ལྷ་དྲང་སྲོང་སྤྱན་འདྲེན་ནོ༔ འབར་བའི་ཀློང་དུ་བཞུགས་སུ་གསོལ༔ ཅེས་སྤྱན་དྲངས༔ ལྷ་མོ་བཞི་ཡིས་མཆོད་པར་བསམས༔ ཡམ་ཤིང་དཀར་གསུམ་མངར་གསུམ་གྱི༔ མཆོད་པ་སྤྱི་འགྲོས་རེ་རེ་བཞིན༔ སྔགས་འདི་ཅི་མང་དག་གིས་དབུལ༔ ཨཱོཾབཛྲ་ཨགྣེ་ཡེ་ཤཱནྟིང་ཀུ་རུ་ཡེ་སྭཱ་ཧཱ༔ མེ་ལྷའི་ལྟོ་བར་ལྷ་ཚོགས་བསྒོམ༔ ཐམས་ཅད་སྐུ་མདོག་དཀར་པོར་སྒྱུར༔ མཆོད་པས་དངོས་གྲུབ་འཐོབ་པར་བསམས༔ བསྟོད་པས་བསྟོད་ཅིང་ཡེ་ཤེས་གཤེགས༔ དམ་ཚིག་པ་བསྡུ་དགེ་བ་བསྔོ༔ བཀྲ་ཤིས་ལ་སོགས་མཐའ་རྒྱས་བྱ༔ ས་མ་ཡཱ༔ རྒྱ་རྒྱ་རྒྱ༔ ཞི་བའི་སྦྱིན་སྲེག་འདི་བརྩམ་ན༔ ནད་དང་གདོན་སོགས་སྡིག་སྒྲིབ་འདག༔ ཕྱི་རབ་གཅེས་སོ་ཉམས་སུ་ལོང་༔ བཀའ་ཡི་སྲུང་མས་བྱ་ར་གྱིས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་ཟབ་བུ་ལུང་ནས་གདན་དྲངས་པའོ། །མངྒ་ལཾ། །