བཞི་བ་གོ་སྒྲུབ་ཀྱི་མཚན་ཉིད་དང༌།གོ་སྒྲུབ་དྲུག་ཕན་ཚུན་ཡིན་ཁྱབ་མཉམ་ཡིན་མིན་དང༌།བྱང་སེམས་ཀྱི་སྦྱིན་པའི་ཕར་ཕྱིན་དང་སྦྱིན་པའི་གོ་སྒྲུབ་འགལ་བ་ཡིན་མིན་སོགས་ཇི་ལྟར་ཡིན་ཞེས་པའི་ལན།

བཞི་བ་གོ་སྒྲུབ་ཀྱི་མཚན་ཉིད་དང༌།གོ་སྒྲུབ་དྲུག་ཕན་ཚུན་ཡིན་ཁྱབ་མཉམ་ཡིན་མིན་དང༌།བྱང་སེམས་ཀྱི་སྦྱིན་པའི་ཕར་ཕྱིན་དང་སྦྱིན་པའི་གོ་སྒྲུབ་འགལ་བ་ཡིན་མིན་སོགས་ཇི་ལྟར་ཡིན་ཞེས་པའི་ལན།

གོ་སྒྲུབ་ཀྱི་མཚན་ཉིད་དང༌། གོ་སྒྲུབ་དྲུག་ཕན་ཚུན་ཡིན་ཁྱབ་མཉམ་ཡིན་མིན་དང༌། བྱང་སེམས་ཀྱི་སྦྱིན་པའི་ཕར་ཕྱིན་དང་སྦྱིན་པའི་གོ་སྒྲུབ་འགལ་བ་ཡིན་མིན་སོགས་ཇི་ལྟར་ཡིན་ཞེས་པའོ། །གཉིས་པ་ལན་ནི། གོ་སྒྲུབ་ཀྱི་མཚན་ཉིད། ཕར་ཕྱིན་ཉམས་སུ་ལེན་པར་གོ་བགོས་པའི་སེམས་དཔའི་མངོན་རྟོགས། འདིར་དངོས་བསྟན་གྱི་གོ་སྒྲུབ་ཀྱི་མཚན་ཉིད། ཕར་ཕྱིན་དྲུག་ལྡན་དུ་ཉམས་སུ་ལེན་པར་གོ་བགོས་པའི་སེམས་པའི་མངོན་རྟོགས། མཚན་གཞི ཕར་ཕྱིན་དྲུག་གི་ཉམས་ལེན་གྱི་ལམ་ལྟ་བུའོ། །མཚན་ཉིད་འཇོག་ཚུལ་དེ་ལྟར་འཐད་དེ། ཉ་ཊཱིཀ་ལས། མི་མཐུན་ཕྱོགས་ཀྱིས་མི་ཚུགས་པའི་གོ་ཆའི་སྒྲུབ་པའི་མཚན་ཉིད། བྱང་སེའི་སྒྲུབ་པ་གང་ཞིག་བསམ་པའི་བྱ་བ་སྟེ། གནོད་འཇོམས་སུ། གོ་ཆ་ཆེན་པོ་བགོས་པ་ཞེས་བྱ་བ་ནི་སེམས་དང་པོ་ནས་གཟུང་སྟེ་བསམ་པ་རྒྱ་ཆེ་བར་བསྟན་པའོ་ཞེས་སོ། །ས་བཅུ་བའི་འགྲེལ་བར། དེ་ལ་གོ་ཆ་ནི་སྨོན་པའོ། །ཞེས་དབྱིག་གཉེན་གྱིས་སོ། །དབྱེ་ན་དྲུག་གམ་སོ་དྲུག་གོ ། འདིར་སྨོས་གོ་སྒྲུབ་ཀྱི་མཚན་ཉིད། གང་ཞིག་ཕྱིན་དྲུག་རེ་རེར་དྲུག་དྲུག་ཚང་བར་ཉམས་སུ་ལེན་པར་གོ་བགོས་པའོ། །ཞེས་གསུངས་སོ། །དེ་ལ་ཡང་མདོ་ལུགས་མ་ལས། གོ་ཆའི་སྒྲུབ་པ་འདི་ནི་སེམས་བསྐྱེད་པ་ཉིད་ནས་རྩོམ་སྟེ། བསམ་པ་རྒྱ་ཆེ་བ་ཉིད་གཙོ་བོར་བྱུང་ཞིང༌། མདོ་སྡེ་རྒྱན་ལས་ཀྱང༌།གནས་ཆེན་པོ་སེམས་བསྐྱེད་པ་ལ་གནས་ཞེས་གསུངས་པའི་ཕྱིར་རོ། །མདོ་ལས་ཀྱང་སེམས་ཅན་ཉུང་ཟད་ཉི་ཚེ་བའི་དོན་དུ་བྱང་ཆུབ་ཀྱི་ཕྱིར་མི་སྤྱོད་ཅིང་སེམས་ཅན་ཐམས་ཅད་ཀྱི་དོན་དུ་ཕར་ཕྱིན་དྲུག་ལ་སྤྱོད་ཅེས་བསམ་པ་རྒྱ་ཆེན་བསྟན་པའི་ཕྱིར་རོ། །འཇུག་པའི་བསྒྲུབ་པ་ནི། སྦྱོར་ལམ་ཉིད་ནས་རྩོམ་སྟེ། སྐབས་འདིར་ཚེ་དང་ལྡན་པ་གང་བོས་ཞུ་བ་གསུམ་གསོལ་བ་ལས་དང་པོ་པའི་ལམ་གྱིས་གོ་སྒྲུབ་དང༌། ཕྱི་མ་གཉིས་ཀྱིས་འཇུག་སྒྲུབ་བསྟན་ལ། ཞུ་བ་བར་བ་ནི་ཐེག་པ་ཆེན་པོ་ལ་ཡང་དག་པར་ཞུགས་པ་ལགས། ཞེས་པ་ལ་གནོད་འཇོམས་ལས། ཞེས་བྱ་བ་ནི་མོས་པ་སྤྱོད་པའི་ས་ནས་བཟུང་སྟེ། ས་བདུན་བའི་བར་དུ་རྩོལ་བ་དང་བཅས་པ་རྣམ་པ་རྟོག་པ་དང་བཅས་པའི་སྤྱོད་པའི་གནས་སྐབས་ཡིན་པར་བསྟན་ཏོ། །ཞེས་སོ། །ཚོགས་ཀྱི་བསྒྲུབ་པ་ནི་ས་བཅུ་ལ་ཞུགས་པ་ཉིད་ཡིན་པར་མདོ་ལས་བྱུང་ངོ༌། །ངེས་འབྱུང་བསྒྲུབ་པ་ནི། ལྷ་མིར་བཅས་པའི་འཇིག་རྟེན་ཐམས་ཅད་ཟིལ་གྱིས་མནན་ནས་ཁམས་གསུམ་ནས་ངེས་པར་འབྱུང་ཞིང་རྣམ་མཁྱེན་དུ་གནས་ཞེས། མདོ་ལས་བྱུང་བའི་ཕྱིར། རྒྱུན་མཐའི་ཡེ་ཤེས་རྡོ་རྗེ་ལྟ་བུའི་ཏིང་ངེ་འཛིན་སྐད་ཅིག་མའི་སྦྱོར་བའི་རང་བཞིན་ནོ། །ཞེས་དང༌། ཉ་ཊཱིཀ་ལས། ཐོགས་མེད་ཀྱི་གསུང་འགྲེལ་ཆེན་དང་ཐུབ་དགོངས་སུ་དྲངས་པ། དེ་ལ་གོ་ཆ་དང་འཇུག་པའི་སྒྲུབ་པ་དག་ནི་གོ་རིམ་བཞིན་དུ་བརྒྱུད་པ་དང་དངོས་སུ་སྦྱོར་བའི་རང་བཞིན་ཚོགས་དང་མོས་པས་སྤྱོད་པའི་སས་བསྡུས་པ་ཡིན་ནོ། །ཚོགས་ཀྱི་སྒྲུབ་པ་ནི་བརྩེ་བ་ནས་བརྩམས་ཏེ་གཟུངས་ཀྱི་བར་ནི་མངོན་སུམ་དུ་སྦྱོར་བའི་རང་བཞིན་ཆོས་མཆོག་ཆེན་པོས་བསྡུས་པ་ཡིན་ནོ། །ས་དང་པོ་རབ་ཏུ་དགའ་བའི་རང་བཞིན་དུ་གྱུར་བའི་སྒྲུབ་པ་ནི་མཐོང་བའི་ལམ་གྱི་བདག་ཉིད་ཡིན་ལ། གཉིས་པ་ལ་སོགས་པའི་རང་བཞིན་ནི་སྒོམ་པའི་ལམ་གྱི་ངོ་བོ་ཉིད་ཡིན་ཞིང་གཉེན་པོའི་ཕྱོགས་ཀྱི་བདག་ཉིད་ཅན་གྱི་ཚོགས་ཀྱི་སྒྲུབ་པ་ནི་ལམ་གཉིས་ཀའི་སྤྱོད་ཡུལ་ཅན་ཡིན་ནོ། །ངེས་པར་འབྱུང་བའི་སྒྲུབ་པ་ནི་སྒོམ་པའི་ལམ་ལ་བརྟེན་པ་ཡིན་ནོ་ཞེས་གསུངས་སོ། །ཞེས་དང༌། ས་བཟང་གི་རྒྱན་གྱི་རྣམ་བཤད་ལས། རྣམ་དབྱེ་ནི་ལས་དང་པོ་པའི་ས་དང༌། དད་པའི་ས་དང༌། ཐར་བ་ཆ་མཐུན་དང༌། གོ་ཆའི་སྒྲུབ་པ་ལ་སོགས་པའོ། །ཞེས་དང༌། རྣམ་དབྱེ་ནི་མོས་པས་སྤྱོད་པའི་ས་དང༌། སྒོམ་ལམ་ཟག་བཅས་དང༌། ངེས་འབྱེད་ཆ་མཐུན་དང༌། འཇུག་པའི་སྒྲུབ་པ་ལ་སོགས་པའོ། །ཞེས་སོགས་གསུངས་པ་ལ་གོ་སྒྲུབ་ཀྱི་ས་མཚམས་དང་ཉ་ཊཱིཀ་ལས་གོ་སྒྲུབ་ཀྱི་མཚན་ཉིད་བཞག་པ་སོགས་ཀྱི་སྒོ་ནས་དཔྱད་པར་བྱའོ། །གོ་སྒྲུབ་དྲུག་འཇོག་ཚུལ་མང་མོད་ཕན་ཚུན་ཡིན་ཁྱབ་མཉམ་ཡིན་པར་སྣང་སྟེ། མདོ་ལུགས་མ་ལས། སྔར་གོ་བསྒྲུབ་ཏུ་ནི་རང་རང་ལས་ཕྱེ་བ་དྲུག་དྲུག་རང་རང་ལ་སོ་སོར་བསྡུས་པ་ཡིན་ལ། འདིར་ནི་རང་རང་ལས་མ་ཕྱེ་བར་དྲུག་པོ་རེ་རེས་ལྔ་ལྔ་ཕན་ཚུན་བསྡུས་པའི་ཕྱིར་འདི་གཉིས་སྡུད་ཚུལ་གཅིག་ཏུ་འཆད་པ་མདོ་དང་འགལ་ལོ། །ཞེས་དང༌། དེ་ལས། སྦྱིན་པར་གཞན་ལྔ་པོ་བསྡུས་པ་དང༌། ཚུལ་ཁྲིམས་སུ་གཞན་ལྔ་པོ་བསྡུས་པ་ལ་སོགས་པར་ཕར་ཕྱིན་རེ་རེ་ནི་དྲུག་པོ་དེ་དག་རེ་རེས་ལྔ་ལྔ་བསྡུས་པའི་ཚུལ་ཀྱིས་ཕན་ཚུན་ཐམས་ཅད་ཀྱིས་ཐམས་ཅད་བསྡུས་པའི་ཡེ་ཤེས་གང་ཡིན་པ།མཐོང་ལམ་གྱི་སྐད་ཅིག་མ་གཅིག་སྡུག་བསྔལ་ལ་ཆོས་ཤེས་པའི་བཟོད་པ་ཡིས་བསྡུས་པ་སྟེ། ཞེས་གསུངས་པའི་ཕྱིར། ཕར་ཕྱིན་དྲུག་པོ་ཡང་ཕན་ཚུན་བསྡུས་པ་ཡིན་ཏེ། རྒྱན་གྱི་ས་འགྲེལ་ལས། རྣམ་པར་ངེས་པ་བསྟན་པ་ནི། ཕན་ཚུན་བསྡུས་ཕྱིར་རབ་དབྱེའི་ཕྱིར། །ཆོས་ཉིད་ཕྱིར་དང་རྒྱུ་མཚན་ཕྱིར། །ཕ་རོལ་ཕྱིན་དྲུག་རྣམ་ཀུན་ཏུ། །རྣམ་པར་ངེས་པར་ཤེས་པར་བྱ། །ཞེས་ཕན་ཚུན་བསྡུས་པའི་ཕྱིར་རྣམ་པར་ངེས་པ་ནི་མི་འཇིགས་པ་སྦྱིན་པས་ཚུལ་ཁྲིམས་དང་བཟོད་པ་བསྡུས་ཏེ་གནོད་པ་དང་གནོད་ལན་མི་བྱེད་པའི་ཕྱིར་དང༌།ཆོས་ཀྱི་སྦྱིན་པས་བསམ་གཏན་དང་ཤེས་རབ་བསྡུས་ཏེ་དེ་དག་ལ་བརྟེན་ནས་ཆོས་སྟོན་པའི་ཕྱིར་དང༌། དེ་གཉིས་ཀས་བརྩོན་འགྲུས་བསྡུས་ཏེ་དེས་ཆོས་དང་མི་འཇིགས་པ་གཉི་ག་སྦྱིན་པར་བྱེད་པའི་ཕྱིར་དང༌། དགེ་བ་ཆོས་སྡུད་ཀྱི་ཚུལ་ཁྲིམས་ཀྱིས་ཕ་རོལ་ཏུ་ཕྱིན་པ་ཐམས་ཅད་བསྡུས་པ་དང༌། གནོད་པ་ལ་ལན་མི་བྱེད་པའི་བཟོད་པས་མི་འཇིགས་པའི་སྦྱིན་པ་དང་ཚུལ་ཁྲིམས་བསྡུས་པ་ལ་སོགས་པའོ། །ཞེས་དང༌། ཉ་ཊཱིཀ་ལས། ཚུལ་ཁྲིམས་བཟོད་ཕར་གཉིས་མི་འཇིགས་པའི་སྦྱིན་པས་བསྡུས་ཏེ། གཞན་ལ་གནོད་པ་མི་བྱེད་པ་དང་གཞན་གྱིས་བྱས་པ་ལ་བཟོད་པས་ཕ་རོལ་གདུང་བར་མི་བྱེད་པས་སོ། །བརྩོན་འགྲུས་བསམ་གཏན་ཤེས་རབ་ཕར་ཕྱིན་ཆོས་སྦྱིན་གྱིས་བསྡུས་ཏེ། མི་སྐྱོ་བར་བསམ་གཏན་རྣམས་བསྐྱེད་ནས་ཕ་རོལ་ཀྱི་བསམ་པ་ཤེས་ཏེ་ཤེས་རབ་ཀྱིས་ཇི་བཞིན་རྟོགས་ནས་སྟོན་པས་སོ། །ཞེས་ཐུབ་དགོངས་དོན་ནོ། །དགེ་བ་ཆོས་སྡུད་ཀྱིས་ལྔ་བོ་ཐམས་ཅད་བསྡུས་ཏེ། རྒྱུ་མཚན་སླའོ། །སྦྱིན་ཕར་ནི་ཟང་ཟིང་གི་སྦྱིན་པ། གཞན་ལྔ་མི་འཇིགས་པའི་སྦྱིན་པའོ། །ཐམས་ཅད་ཆོས་ཀྱི་སྦྱིན་པ་སྟེ་གཞན་གྱི་སེམས་རྒྱུད་ལ་བསྐྱེད་པས་སོ། །ཞེས་དང༌། ཚུལ་ཕར་ནི་སྦྱིན་ཕར་ཡིན་ལ། སྦྱིན་ཕར་ཡིན་ལ་ཚུལ་ཕར་མིན་པ་ཡོད་དེ། ཚུལ་ཕར་གྱིས་མ་ཟིན་པའི་སྦྱིན་ཕར་རོ། །ཕྱི་མ་འདི་འོག་མ་རྣམས་ལའང་སྦྱར་རོ། །ཞེས་དང༌། སྦྱིན་པ་ཡིན་ལ་སྦྱིན་ཕར་མིན་པ་བྱང་ཆེན་དུ་མ་བསྔོས་པའི་སྦྱིན་པའོ། །གཉིས་ཡིན་བསྔོས་པའོ། །གཉིས་མིན་དེ་གཉིས་མ་གཏོགས་པའོ། །ཤེས་རབ་ཀྱི་བར་ལ་གསུམ་མོ། །ཞེས་པ་རྣམས་ཀུན་བཏུས་འགྲེལ་བར་རོ། །ཐེག་བསྡུས་སུ། སྦྱིན་པ་ཡང་ཡིན་ལ་ཕ་རོལ་ཕྱིན་པ་མིན་པའང་ཡོད་ཅེས་མུ་བཞིའོ་ཞེས་པ་ཙམ་གསུངས་པ་ལ། བཤད་སྦྱར་དུ།དང་པོ་དམ་པ་དྲུག་བྲལ་གྱི་སྦྱིན་པ། གཉིས་པ་དྲུག་ལྡན་གྱི་ཚུལ་ཁྲིམས་སོགས། གསུམ་པ་དྲུག་ལྡན་གྱི་སྦྱིན་པ། གཉིས་མིན་ནི་དྲུག་བྲལ་གྱི་ཚུལ་ཁྲིམས་སོགས་སོ་གཞན་ལ་སྦྱར་རོ། །འདིར་སྦྱིན་པ་དང་ཕར་ཕྱིན་ཞེས་སོགས་སྦྱར་གྱི་སྦྱིན་པའི་ཕར་ཕྱིན་སོགས་མ་སྦྱར་རོ། །ཞེས་དང༌། སྤྱོད་འཇུག་ས་འགྲེལ་ལས། ཕན་ཚུན་རྣམ་པར་ངེས་པ་ནི། ཆོས་དང་ཟང་ཟིང་དང་མི་འཇིགས་པ་གསུམ་གའི་དབང་དུ་བྱས་ན་དྲུག་ཀ་སྦྱིན་པ་ལྟ་བུར་འདུ་ཞིང་དགེ་བ་ཆོས་སྡུད་ཀྱི་ཚུལ་ཁྲིམས་སུའང་ཐམས་ཅད་འདུ་བ་ལྟ་བུ་ཕན་ཚུན་གཅིག་གིས་གཅིག་བསྡུས་པའི་ཕྱིར་དང༌། དྲུག་པོ་རེ་རེ་ཞིང་ཡང་རང་རང་གི་གཞན་རྒྱུད་ལ་འཇོག་པའི་གཏོང་བ་དང༌། མྀ་མཐུན་ཕྱོགས་ཀྱི་གནོད་པ་སྡོམ་པ་དང༌། དཀའ་སྤྱད་ལ་ཅི་མི་སྙམ་པ་དང༌། ཕྱིར་ཞིང་སྤྲོ་བས་འཇུག་པ་དང༌། སོ་སོ་ལ་སེམས་རྩེ་གཅིག་ཏུ་གནས་པ་དང༌། གནས་ལུགས་ཕྱིན་ཅི་མ་ལོག་པར་ཤེས་པ་སྟེ་དྲུག་དྲུག་ཏུ་དབྱེར་ཡོད་པའི་ཕྱིར་དང༌། ཞེས་དང༌། ཞེས་གསུངས་སོ། །ཡང་སྦྱིན་པའི་ཕར་ཕྱིན་དང་ཚུལ་ཁྲིམས་ཀྱི་ཕར་ཕྱིན་ལ་མུ་བཞི་མེད་པར་ཐལ། ཆོས་བཞི་ལྡན་གྱི་གཏོང་སེམས་དང་སྲུང་སེམས་གཉིས་འགལ་བའི་ཕྱིར་ཟེར་ན་དཔྱད། ཕར་ཕྱིན་དྲུག་པོ་ཕན་ཚུན་བསྡུས་ཚུལ་ཉམས་ལེན་དང༌། ཡིན་པའི་ཚུལ་དང༌། ཟིན་པའི་ཚུལ་དང༌། ཕྱོགས་སུ་གཏོགས་པ་དང༌། རྒྱུ་འབྲས་ཀྱི་བསྡུ་ཚུལ་གང་ཡིན་དཔྱད། ཡང་དེ་དྲུག་ཕན་ཚུན་བསྡུས་ན་ཕར་ཕྱིན་དྲུག་གི་གོ་རིམ་ལ། རྒྱན་ལས།སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང༌། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན། །ཞེས་དང༌། ས་བཅུ་ལ་ཕར་ཕྱིན་ལྷག་ཚུལ་ལ། ཉ་ཊཱིཀ་ལས། ས་བཅུ་ལ་ཕར་ཕྱིན་བཅུ་རེ་རེ་གཙོ་ཆེར་སྤྱོད་ཅིང་གཞན་ཕལ་བའི་ཚུལ་གྱིས་སྤྱོད་དེ། དབུས་མཐར། ཁྱད་པར་ཅན་དང་ཁྱད་མེད་ནི། །ས་བཅུ་དག་ཏུ་ཤེས་པར་བྱ། །ཞེས་གསུངས་པ་དག་གི་འགྲེལ་ཚུལ་ཇི་ལྟར་ཡིན་དཔྱད་པར་བྱའོ། །སྦྱིན་པའི་ཤེས་རབ་ཀྱི་གོ་སྒྲུབ་དང༌། ཤེས་རབ་ཀྱི་གོ་སྒྲུབ་གཉིས་མི་འགལ་བར་ཐལ།སྦྱིན་པའི་འཁོར་གསུམ་མི་དམིགས་པར་རྟོགས་པའི་ཤེས་རབ་དེ་དེ་གཉིས་ཀ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེ་གཉིས་ཀ་ཡིན་པར་ཐལ། སྦྱིན་པའི་ཤེས་རབ་ཀྱི་གོ་སྒྲུབ་གང་ཞིག ཤེས་རབ་ཀྱི་གོ་སྒྲུབ་ཡིན་པའི་ཕྱིར། ཕྱི་མ་སླ། དང་པོ་གྲུབ་སྟེ། ཉི་ཁྲི་ལས།སྦྱིན་པ་ཡོངས་སུ་གཏོང་བའི་ཚེ་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱ་བས། ཆོས་ཐམས་ཅད་ཆོས་ཐམས་ཅད་སྒྱུ་མར་བྱས་པའི་འདུ་ཤེས་ཉེ་བར་གནས་ཏེ། སྦྱིན་པའང་མི་དམིགས། གཏོང་བའང་མི་དམིགས། ལེན་པའང་མི་དམིགས་པར་དགེ་བའི་རྩ་བ་དེའང་སེམས་ཅན་དང་ཐུན་མོང་དུ་བྱས་ཤིང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མི་དམིགས་པའི་ཚུལ་གྱིས་ཡོངས་སུ་བསྔོ་བ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང༌། སྦྱིན་པ་ཡོངས་སུ་གཏོང་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་གོ་ཆ་སྟེ། ཞེས་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང༌། རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱ་བས། སྦྱིན་པ་གང་ཡོངས་སུ་གཏོང་བ་དེ་དག་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་བྱས་ཤིང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མི་དམིགས་པའི་ཚུལ་གྱིས་ཡོངས་སུ་བསྔོ་བ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་སྦྱིན་པའི་ཕ་རོལ་ཏུ་ཕྱིན་པའི་གོ་ཆའོ། ཞེས་གསུངས་པའི་ཕྱིར་རོ། །འདོད་ན། དེ་ཆོས་ཅན། སྦྱིན་པའི་གོ་སྒྲུབ་ཡིན་པར་ཐལ། སྦྱིན་པའི་ཤེས་རབ་ཀྱི་གོ་སྒྲུབ་ཡིན་པའི་ཕྱིར། ཁྱབ་སྟེ། སྦྱིན་པའི་གོ་སྒྲུབ་དྲུག་སྦྱིན་པའི་གོ་སྒྲུབ་ལ་ཕྱེ་བ་ཡིན་པར་མདོ་ལུགས་མ་ལས་བཤད་པ་ལྟར་རོ། །དེ་དག་གིས་སྦྱིན་པའི་ཕར་ཕྱིན་དང་སྦྱིན་པའི་གོ་སྒྲུབ་འགལ་བ་མ་ཡིན་པ་ཤེས་པར་བྱའོ། །