གཉིས་པ་བར་དུ་བསྟན་འགྲོའི་དོན་མཛད་ཚུལ།

གཉིས་པ་བར་དུ་བསྟན་འགྲོའི་དོན་མཛད་ཚུལ་ནི།

འདི་ནས་རིམ་གྱིས་བྱུང་བ་སྟེ། དེ་ཡང་བླ་མའི་བཀའ་ནན་ཆེན་པོས་དགུང་ལོ་སོ་ལྔ་པར་གདན་སར་ཕེབས། མཁས་བཙུན་ཆེན་པོ་ཤིན་ཏུ་དགྱེས་ནས་ལོ་གཉིས་སུ་ཉེ་བ་ཞིག་ཉིན་མཚན་མེད་པར་དབང་ལུང་ཁྲིད་བཤད་པ་སོགས་བླ་མ་ཉིད་ལ་མངའ་བའི་ཆོས་ཐམས་ཅད་བསྩལ། སྤྱིར་སྐྱི་སྟོན་འཇམ་དབྱངས་དང་མཁས་བཙུན་ཆེན་པོ་ལ་ཆོས་གསན་པ་ནི་མཐའ་ཡས་ཏེ་མིང་ཙམ་འཛིན་པ་དཀའོ། ། གཞན་ཡང་བཀའ་དང་བསྟན་བཅོས་འགྱུར་རོ་འཚལ་རྫོགས་པར་ནན་ཏན་དང་བཅས་པས་ཚར་གཅིག་གཟིགས།དེ་གས་དོན་ཐམས་ཅད་མ་འདྲེས་པར་ཐུགས་སུ་ཆུད། གཞན་སྟོང་གི་ལྟ་སྒོམ་ཁྱད་པར་ཅན་ནི་མཁའ་སྤྱོད་བདེ་ལྡན་དུ་བཞུགས་པའི་ཚེ་ཐུགས་ལ་འཁྲུངས་པ་ཡིན་ཀྱང་ལོ་ཤས་ཤིག་གཞན་ལ་མ་གསུངས། སྔོན་ཆོས་རྗེ་ཀུན་སྤངས་ཆེན་པོས། གནས་འདིར་ཕ་ལས་བུ་ལྷག་བུ་ལས་ཚ་བུ་ལྷག་ཚ་ལས་ཡང་ཚ་ལྷག་པ་འབྱུང༌། ད་ལྟ་བཟང་ལྡན་གོང་མར་ཆོས་འཆད། མ་འོངས་པ་ན་བར་མར་མཆོད་རྟེན་བཞེངས་ཞེས་ལུང་བསྟན་པ་ལྟར། གདན་སར་ཕེབས་ནས་ལོ་ཤས་ནས་སྐུ་འབུམ་ཆེན་མོའི་རྨང་འདིངས་པ་དང་བཟང་ལྡན་གོང་གི་ཆོས་ཁྲིར་བཞུགས།བཤེས་གཉེན་དམ་པ་བཅུ་ལྷག་ལ་སྙིང་པོའི་མདོ་བཅུའི་བཤད་པ་རང་བཞེད་རྩལ་དུ་བཏོན་ནས་རྒྱས་པར་གསུངས། གཞན་སྟོང་སྟོན་པའི་གསུང་རབ་ཐན་ཐུན་ཀྱང་མང་དུ་མཛད་དཔེ་རྣམས་དང་ཆོས་སྐད་ཕྱོགས་ཐམས་ཅད་དུ་ཁྱབ་པས་མཁས་པ་ཕལ་གྱི་བློར་མ་ཤོང་དངོས་སུ་འབེལ་གཏམ་རྩོད་པ་ཞུས་པ་རྣམས་རྒྱ་མཚོ་ལ་ཁ་བ་བབ་པ་བཞིན་དུ་སོང་བས་དངོས་སུ་མཇལ་བ་རྣམས་གྲུབ་མཐའ་ལ་ངེས་ཤེས་དང་བླ་མ་ལ་དད་པ་ཐོབ་པ་ཤ་སྟག་བྱུང༌། རིང་ནས་ངག་ལོན་དང་རྩོད་ཡིག་བསྐུར་བ་རྣམས་ལ་ཆོས་དང་མཐུན་པའི་ལན་མཛད་པས་ངེས་པ་རྙེད།ཕྱིས་གྲུབ་མཐའ་དེ་རྩོད་བྲལ་དུ་སོང་ནས་ཕྱོགས་བཞིའི་དགེ་བཤེས་དུ་མས་བསྐུལ་ནས་ངེས་དོན་རྒྱ་མཚོ་སོགས་གྲུབ་མཐའི་ཆོས་བཅུ་དྲུག དུས་འཁོར་ས་བཅད་སོགས་དུས་འཁོར་ཆ་ལག་བཅོ་བརྒྱད། ཡུམ་གྱི་མཆན་བུ། གསོལ་འདེབས་ཉེར་ལྔ། ཐུགས་རྗེ་ཆེན་པོའི་ཆོས་སྐོར་ཉེར་གསུམ། བསྟོད་སྐོར་བཅུ་བཞི། སྐུ་འབུམ་ཆེན་པོའི་ཆོས་སྐོར་ལྔ། རྡོ་རྗེ་འཕྲེང་བ་དབང་སྐོར་གསུམ། སྤྲིང་ཡིག་བརྒྱད། སྨོན་ལམ་གསུམ། བཀྲ་ཤིས་བཞི་སོགས་སྔ་ཕྱི་ཀུན་ཏུ་གསུང་རབ་ཀྱི་ཡིག་ཆ་མང་པོ་མཛད་པས་ཐུབ་བསྟན་སྤྱི་དང་ངེས་དོན་དབུ་མ་ཆེན་མོ་མདོ་སྔགས་ཀྱི་གནས་ལུགས་མཐར་ཐུག་ཏུ་ལུང་རིགས་དྲི་མ་མེད་པས་གཏན་ལ་ཕབས་ཏེ་རྒྱུ་དང་འབྲས་བུའི་ཐེག་པའི་ཆོས་སྒོ་མཐའ་དག་གསལ་བར་བྱས། མཆོད་རྟེན་ཆེན་མོ་བཞེངས་པའི་ཚེ་སྲོག་ཆགས་ཤིན་ཏུ་མང་པ་ལ་ལྗགས་སྔགས་མཛད་སེ་གོལ་གཏོགས་པས་སྲོག་ཆགས་ཅིག་ཀྱང་མེད་པར་སོང་ཞིང༌། ནམ་མཁའ་ལ་འཇའ་འོད་ཀྱིས་ཁེངས། ཆུ་མེད་པ་ལ་བཅའ་ལུང་གི་ཕུ་ཆུ་ནར་གྱིས་ཐོན། གཞལ་ཡས་ཁང་གི་ཐོག་ཕིབས་དང་གདུགས་ཀྱི་ཐོག་ཕིབས་ཀྱང་ཉི་མ་རེ་རེ་ཁོ་ན་ལ་ཁེལ། རླུང་ཤིན་ཏུ་ཆེ་བ་དང་ཆར་ཞོད་ཆེ་བ་བྱུང་རེས་ལ་བདེན་སྟོབས་བརྗོད་པས་འཕྲལ་ཉིད་དུ་ཞི་བ་ཁོ་ན་བྱུང༌། ཆོས་ཁྲིའི་ཁར་ཆོས་གསུང་པ་དང་བཟོ་བོ་རྣམས་ཀྱི་སར་བཀོད་པ་མཛད་པ་དང་གཟིམས་ཆུང་དུ་ཐུགས་དམ་ལ་བཞུགས་པ་སོགས་སྐུ་ལུས་ཀྱི་བཀོད་པ་གསུམ་གསུམ་དུས་གཅིག་ཏུ་བྱུང་པ་ནི་མང་པོས་ཡང་ཡང་མཐོང༌། སྐུའི་བཀོད་པ་བརྒྱད་དུས་གཅིག་ཏུ་བྱུང་བ་ཡང་འགའ་རེས་མཐོང༌། མི་དང་མི་མ་ཡིན་གྱིས་མཆོད་རྟེན་ཆེན་མོ་བཞེངས་པའི་ཆ་རྐྱེན་འབུལ་ཞིང་ལས་ཀ་ལ་རེམ་པས་ངོ་མཚར་འཕྲུལ་གྱིས་ཕྱི་ནང་གི་བཀོད་པ་ཡོངས་རྫོགས་དཀའ་ངལ་མེད་པས་གྲུབ་ཅིང་དགེ་མཚན་ལེགས་པའི་ལྟས་བཟང་ཀུན་གྱི་མངོན་གྱུར་མཐའ་ཡས་པ་དང་བཅས་རབ་གནས་མཐའ་རྒྱས་དགའ་སྟོན་གྱི་སྒོ་ནས་བསོད་ནམས་ཀྱི་ཞིང་དམ་པ་ཉེ་བར་བཞེངས་ཏེ། སྔ་ཕྱི་ཇོ་ནང་དང༌། ཕུག་མོ་ཆོས་རྫོང་དང༌། སྤྱི་བར་ཕུག་གི་བྲག་ངོས་མི་ཡེ་མི་ཐར་པ་མང་པོར་ཡུད་ཀྱིས་ཕེབས་ནས་མཆོད་རྟེན་མང་པོ་བཞེངས། ལ་ལ་ད་ལྟ་ཡང་སྣང༌། ཐོག་མ་ཇོ་ནང་དུ་ཕེབས་པའི་སྐབས་ཉིད་ཇོ་མདའ་ནས་ཡར་ཕེབས་པས་ནམ་མཁའ་ལ་དུས་ཀྱི་འཁོར་ལོའི་དཀྱིལ་འཁོར་ཡོངས་རྫོགས་གཟིགས། དེ་ནས་བཟུང་ཡི་དམ་ཞལ་གཟིགས་པ་ནི་གྲངས་ལས་འདས་ཏེ་ཆེས་ཆེར་ཡང་མི་མཛད། འཕགས་པ་སྤྱན་རས་གཟིགས་དང་མི་ལབ་པ་བཞིན་ཡོད་ལ། གུར་མགོན་དང་རྣམ་སྲས་བྲན་བཞིན་འཁོལ། ཕྱག་མཆོད་ཐུགས་དམ་མཛད་རེས་ཀྱི་རིགས་གསུམ་མགོན་པོ་དང༌། འཕགས་མ་སྒྲོལ་མ་དང༌། སྨན་བླ། བྱམས་པ་རྣམས་རེས་མོས་ཀྱིས་བྱོན། མཁའ་འགྲོ་རྒྱ་མཚོ། སྒྱུ་འཕྲུལ་དྲྭ་བ། སྡོམ་པ་ཆེ་ཆུང༌། རྡོ་རྗེ་ཕག་མོ། རྡོ་རྗེ་དབྱིངས་ལ་སོགས་པའི་དཀྱིལ་འཁོར་གཟིགས་པ་ཡང་གྲངས་ལས་འདས། བདེ་བ་ཅན་གྱི་སྨོན་ལམ་མཛད་ཚེ་བདེ་ཆེན་ཞིང་དངོས་སུ་གཟིགས་པ་དང༌། གཟིམས་ཁང་བདེ་བ་ཅན་དུ་གུ་རུའི་ཚེས་བཅུའི་མཆོད་པ་མཛད་པའི་ཚེ། སློབ་དཔོན་པདྨ་མཁའ་འགྲོའི་ཚོགས་དང་བཅས་མངོན་སུམ་དུ་བྱོན་ནས་ཤིས་བརྗོད་མཛད་པ་དང༌། མཆོད་རྟེན་བཞེངས་པའི་ལས་ལ་ཞུགས་ཚད་བདེ་བ་ཅན་དུ་འགྲོ་བའི་མཚན་མ་གཟིགས། སྤུན་གསུམ་དུ་བཞུགས་སྐབས་ཐུགས་དམ་གྱི་ལྷ་ཇོ་བོ་བྷུགྨ་ལ་རབ་གནས་མཛད་པའི་ཚེ་འཇའ་འོད་ལ་བཀྲ་ཤིས་རྟགས་བརྒྱད་ཀྱི་གཟུགས་ཤིན་ཏུ་གསལ་བ་ནུབ་ཕྱོགས་ནས་བྱུང་བ་དང༌། མེ་ཏོག་གི་ཚོགས་ཁ་དོག་སྣ་ཚོགས་པ་མང་པོ་སྙོན་མེད་དུ་བབས། ནམ་ཕྱེད་སྐུ་འབུམ་ནང་དུ་ཆུ་ཤོར་བ་སོགས་འཕྲན་བུ་རྣམས་ཀྱང་འཕྲལ་འཕྲལ་མཁྱེན་ཅིང༌། གོང་མ་ཡོན་མཆོད་ཀྱི་མངའ་ཐང་འགྱུར་ལྡོག་དང༌། རྒྱལ་ཁམས་ཀྱི་འགྱུར་ལྡོག་རྣམས་ཀྱང་ཇི་སྐད་གསུངས་པ་བཞིན་ཐོག་ཏུ་ཁེལ། ཧོར་གྱི་སྤྱན་འདྲེན་འབྱུང་བ་ཡང་སྔ་མོ་ནས་དགོངས། སྤྱན་འདྲེན་བྱུང་བའི་ཚེ། ཉིང་རོ་དང༌། བར་ཕུག་དང༌། ན་དུམ་སོགས་སུ་དབེན་པ་ཁོ་ན་བརྟེན་པ་ལོ་བཞི་ཙམ་མཛད། ཕྱིས་རྒྱལ་པོས་ལུང་བཟང་པོ་གནང་ནས་ཕེབས་མི་དགོས་པར་བྱུང་ནས་ཤིན་ཏུ་དགྱེས་ཏེ་དགོན་པར་ཕེབས། དེ་ལ་རྗེ་འདིས་ཇོ་ནང་གི་གདན་ས་ལོ་བཅུ་བདུན་མཛད་རིང་གཙོ་བོར་ཇོ་ནང་ཉིད་དུ་བཞུགས་ཤིང་སྒྲུབ་བརྒྱུད་ཀྱི་བསྟན་པ་རྒྱ་ཆེར་སྤེལ། སྐུ་འབུམ་བཞེངས་པ་དང༌། གསུང་སྒྲོགས་དང༌། མཆོད་པ་འབུལ་བ་དང༌། མཁས་པ་དུ་མ་འདུས་པ་ལ་མདོ་སྔགས་ཀྱི་དབང་དང་གཞུང་བཤད་རྒྱ་ཆེར་བསྩལ། ཚོགས་པ་ཡང་སྒྲུབ་པ་སྙིང་བོར་བྱེད་པ་ཁོ་ན་རང་ཡང་ཉུང་དུས་སུ་སྟོང་ཙམ་རེ་འཚོགས་ཤིང༌། སྤྱིར་ཚོགས་པ་ཉུང་དུས་སུ་ཡང་ཉིས་སྟོང་ཙམ་རེ་འདུ་བ་བྱུང༌། མང་བ་ལ་ཚད་མེད། ཆོས་རྗེ་འདི་ལ་ཟབ་ལམ་གྱི་འཁྲིད་ཞུས་པ་ལ་དགེ་སྦྱོར་གྱི་སྣེ་མ་ཟིན་པ་ནི་གཅིག་ཀྱང་མེད། མུ་གེ་བྱུང་སྐབས་སློབ་མ་ཀུན་ལ་དཀའ་ཐུབ་རིགས་མང་དུ་གནང་དཔོན་སློབ་ཀུན་གྱིས་མི་ཟས་སྤངས༌། གསོལ་ཆས་ཐམས་ཅད་འཕོངས་པ་རྣམས་ལ་གནང༌། ཕྱིས་ཆོས་རྗེའི་ཐུགས་སྲས་ཀླུབས་ལོ་ཙཱ་བ་དང༌། རྗེ་ཕྱོགས་ལས་རྣམ་རྒྱལ་པས་གདན་ས་མཛད་རིང་དབེན་གནས་ངེས་མེད་ཀྱི་རི་ཁྲོད་མང་པོར་ཕེབས་ཤིང༌། ཕལ་ཆེར་ནི་ཐུགས་དམ་ལ་བཞུགས་པ་དང་ཟབ་ལམ་གྱི་འཁྲིད་འདེབས་པའི་འགྲོ་དོན་ཉིད་གཙོ་བོར་མཛད་པར་བར་དུ་ཆོས་གསུངས་པ་དང༌། རྟེན་བཞེངས་པ་ཡུལ་སོ་སོའི་ལྷ་ཁང་ལ་ཞིག་གསོས་མཛད་པ་ཡང་ཤིན་ཏུ་མང༌། ངམ་རིངས་སུ་ཆོས་སྡེ་བཏབ་ནས་འཆད་ཉན་གྱི་གྲྭ་བཙུགས། དེར་སྙུང་བ་ཞིག་གིས་རྐྱེན་བྱས་ཞག་བཅུ་གཉིས་ཀྱི་རིང་སངས་རྒྱས་ཀྱི་ཞིང་ཁམས་དང༌། ཡི་དམ་གྱི་ལྷ་བགྲང་བར་མི་དཔྱོད་པ་ཞལ་གཟིགས། རིན་སྡིང་གི་ལྕགས་ཟམ་འདྲེ་གདུག་པ་ཞུགས་པ་ཞིག་ཐུགས་རྟོག་མི་མཛད་ན་བསྣོམས་པར་ཞུ་ཞེས་བདག་པོས་ཕུལ་བ་ལ། འདྲེན་ཐག་བཏང་མཚམས་ལྕགས་ཀྱི་ཚུར་ཁ་ནས་བཀའ་ཤོག་བསྒྲགས་པ་ཙམ་གྱིས་ཕར་ཕྱོགས་ཀྱི་ལྕགས་ཐག་རང་ཆད་ལ་སོང་སྟེ། ཚུར་ཕྱོགས་ཀྱི་ཟམ་བརྡུར་དུ་ཕུང་གིས་བྱུང་བ་སོགས་ཡ་མཚན་པའི་ལྟས་མང༌། དབུས་དམག་ཡོང་བའི་སྐབས་ཤིག་ཞག་ཤས་བློ་སྦྱོང་ཁོ་ནའི་ཆོས་གསུངས་ཤིང་བཟོད་པའི་བསྔགས་པ་འབའ་ཞིག་མཛད་ཆོས་རར་བཞུགས་ཏོག་དམག་བརྒྱ་ཙམ་སླེབས། སྐུ་ལ་མདའ་རྡོ་མཚོན་ཆ་སྣ་ཚོགས་འཕངས་ཀྱང་ཅུང་ཟད་ཀྱང་མ་སྐྱོན་ཅིང་གཡོ་མེད་དུ་བཞུགས་དེ་ནས་དད་པ་སྐྱེས་ཏེ་བཤགས་པ་ཕུལ། ཡང་ས་སྐྱའི་སྒོ་རར་དབང་བསྐུར་མཛད་པའི་ཡེ་ཤེས་དབབ་པའི་རོལ་མོ་ཕྱི་རོལ་གྱང་འཆག་པའི་མིས་ཚོར་བ་ལ་ཡང་ཡེ་ཤེས་ཕེབས་པ་དང་དབང་བསྐུར་མཛད་ཚད་ལ་ཡེ་ཤེས་ཕེབས་པ་དང༌། ཤ་གྲགས་སེང་སོགས་སྐྱེས་བུ་དམ་པ་དུ་མ་ཞལ་མཐུན་པར་རིགས་ལྡན་གྱི་སྤྲུལ་པར་ལུང་བསྟན་པ་དང༌། མཆིམས་བློ་བཟང་གྲགས་པས་འཕགས་པ་སྤྱན་རས་གཟིགས་ཀྱི་སྐུ་དངོས་སུ་གཟིགས་པ་ཡང་ཡང་བྱུང་བ་དང༌། ཉེ་གནས་ནམ་མཁའ་བྱང་ཆུབ་ཀྱིས་འཇམ་དབྱངས་དངོས་སུ་མཐོང་བ་དང༌། བཅོམ་ལྡན་རྡོ་རྗེ་སྙིང་པོ་དང༌། སྣང་བ་དག་པའི་སྒྲུབ་པ་ཕོ་མོ་མང་པོས་སྐུ་ལ་མཚན་དཔེ་རྫོགས་པར་མཐོང་བ་སོགས་ངོ་མཚར་བའི་ལྟས་བསམ་གྱིས་མི་ཁྱབ་པ་མངོན་གྱུར་དུ་མངའ། དོན་དུ་ནི་འཕགས་པ་སྤྱན་རས་གཟིགས་ཀྱི་རྣམ་པར་འཕྲུལ་བ་ཡིན་པས་རིགས་ལྡན་པདྨ་དཀར་པོ་དང་གཉིས་སུ་མེད་པའི་ངོ་བོ་ཉིད་ཡིན་ཕྱིར་རྗེ་ཐམས་ཅད་མཁྱེན་པ་འདི་ལ་རིགས་ལྡན་གྱི་སྤྲུལ་པའི་སྙན་གྲགས་ཆེ་བ་དང༌། དཔལ་དུས་ཀྱི་འཁོར་ལོའི་ཆོས་ཀྱི་མངའ་བདག་ཆེན་པོར་མངོན་སུམ་དུ་བཞུགས་པ་ལ་བརྟེན་དུས་མཉམ་གྱི་དགེ་བཤེས་ཕལ་མོ་ཆེ་ཞིག་གིས། ཆོས་འདི་དང་འབྲེལ་བའི་མན་ངག་ཅི་རིགས་པ་མ་གསན་པ་མེད་པ་ལྟ་བུ་ཡིན། དབང་རྒྱུད་མན་ངག་རྫོགས་པར་གསན་པ་ཡང་སྟོང་ཕྲག་མང་པོ་དང༌། དབང་དང་ཁྲིད་ཆ་ཚང་ཐོབ་པ་ཁྲི་ཕྲག་བརྒལ་བ་དང༌། མཆོག་དབང་གོང་མ་དང་སོ་སོར་སྡུད་པའི་ཁྲིད་གསན་ཅིང་ཉམས་མྱོང་སྐྱེས་པ་ནི་བགྲང་བར་མི་དཔོག་པ་ཙམ་ཡོད་པར་གྲགས་ཤིང༌། སྤྱིར་བསྟན་པ་སྒོ་ཐམས་ཅད་ནས་རྒྱས་པར་མཛད། སྒོས་སུ་བོད་ཀྱི་རི་སུལ་ཐམས་ཅད་རྡོ་རྗེའི་རྣམ་འབྱོར་གྱི་སྒྲུབ་པ་པོས་ཁྱབ་པ་དང༌། བཤད་ཉན་གྱི་གྲྭ་ཐམས་ཅད་དུ་སྙིང་པོའི་མདོ་དང་རྒྱུད་བླ་མའི་བསྟན་བཅོས་ལས་བརྩམས་ཕྱིར་མི་ལྡོག་པ་འཁོར་ལོའི་གཏམ་བདེ་གཤེགས་སྙིང་པོ་སེང་གེའི་སྒྲས་ཁྱབ་པར་མཛད་དེ། རྔ་བོ་ཆེའི་མདོར་ལུང་བསྟན་པ་བཞིན་དུ་ལོ་བརྒྱད་ཅུ་ལྷག་གི་བར་དེ་ལྟ་བུའི་རྒྱུན་གནས་པར་གྱུར་ལ། དེ་རྗེས་ལྟ་བ་མཐོ་རུ་རེ་ཞིང་དྲང་དོན་ཀུན་རྫོབ་ལ་ལྷག་པར་ཞེན་པའི་ངང་ཚུལ་ཅན་མང་དུ་བྱོན་པ་ལ་བརྟེན་སྔོན་བཞིན་གསལ་བར་མ་གྱུར་ཀྱང་དུས་ཀྱི་ཐ་མ་འདི་ལྟ་བུ་ལའང་རྡོ་རྗེའི་རྣལ་འབྱོར་སྒོམ་པ་དང༌། དེ་བཞིན་གཤེགས་པའི་སྙིང་པོའི་གཏམ་སྲོལ་ཁ་མ་ནུབ་ཙམ་ཡོད་ཅིང༌། བར་སྐབས་སུ་མང་དུ་བྱུང་བ་ནི་དམ་པ་འདི་ཁོ་ནའི་དྲིན་ནོ། ། ཡང་དམ་པ་འདིས་དང་པོ་ས་སྐྱར་འཆད་ཉན་ལ་ཐུགས་གཞོལ་སྐབས། ཀ་ཆེན་བཞི་དང༌། རིགས་ཚོགས་ལྔ། དབུ་མ་འཇུག་པ། བྱམས་ཆོས་ཕྱི་མ་བཞི་རྣམས་ལན་མང་དུ་གསུངས། སྔ་ཕྱིར་གཞུང་ཕྲན་མི་གཅིག་པ་ཡང་བཅུ་ཙམ་གསུངས། ཕྱིས་སྒྲུབ་པ་ལ་ཐེགས་ནས་མཐར་ཆགས་སུ་སྐྱོང་བའི་འཆད་ཉན་གྱི་གྲྭ་འཛུགས་པ་ནི་ཡེ་མ་མཛད། དོན་གཉེར་མཁས་པ་མང་པོ་འདུས་པ་ལ་བྱམས་ཆོས་སྡེ་ལྔ། དབུ་མ་བསྟོད་ཚོགས། འབུམ། སྙིང་པོའི་མདོ་རྣམས་དང༌། སེམས་འགྲེལ་སྐོར་གསུམ། དབང་མདོར་སྟན། ཀྱཻ་རྡོར་ནཱ་རོའི་འགྲེལ་ཆེན་རྣམས་ཡང་ཡང་གསུངས། དབུ་མ་རྩ་བ། སྤྱོད་འཇུག བསླབ་བཏུས། ཀྱཻ་རྡོར་རྒྱུད་གསུམ། མཁའ་འགྲོ་རྒྱ་མཚོ། རྡོ་རྗེ་འཕྲེང་བ། གསང་འདུས་སྒྲོན་གསལ། དམར་ནག་འཇིག་གསུམ་སོགས་ཀྱང་ལན་རེ་རེ་གཉིས་གཉིས་གསུངས། སོ་སོའི་འདོད་པ་དང་མཐུན་པར་དཀྱིལ་ཆོག་རྡོར་འཕྲེང་གི་དབང་རྣམས་དང༌། བདེ་དགྱེས་གསང་གསུམ། གཤིན་རྗེ་གཤེད། རྡོར་དབྱིངས།རྟ་མགྲིན། ཕུར་པ་སོགས་གསང་སྔགས་གསར་རྙིང་གི་དབང་ཟུར་བཀའ་ཡང་མང་དུ་གནང༌།གདམས་ངག་འཁྲིད་ཚུལ་ཐ་དད་པ་ཡང་མང་དུ་གསུངས་མོད་ཀྱི། གཙོ་བོར་ཤེར་ཕྱིན་གྱི་མདོ་དང༌། མངོན་རྟོགས་རྒྱན། སྙིང་པོའི་མདོ་དང༌། རྒྱུད་བླ་མ། དུས་འཁོར་གྱི་དབང་ཁྲིད།སེམས་འགྲེལ་སྐོར་གསུམ་གྱི་བཤད་པ་དང་བཅས་པ་རྣམས་རྟག་ཏུ་གསུངས་པ་ལྟ་བུ་ཡིན་ཅིང་ཐེག་པ་མཐའ་དག་གི་ངེས་པའི་དོན་ཡང་དེ་དག་ལས་བརྩམས་ཏེ་གསུང་ངོ༌། ། འོན་ཀྱང་རེས་འགའ་ནི་སྒྲུབ་པ་ཁོ་ན་ལ་ཐུགས་གཞོལ་བ་ཡང་མཛད། ཆོས་གསུང་བའི་དུས་ན་ཡང་གཟིགས་རྟོག་བཤར་སྦྱང་ཐུགས་བསམ་སོགས་མཛད་མི་དགོས་ཏེ། ཆོས་གྲྭར་ཕེབས་པའི་དུས་དང༌། ཞལ་བཀོད་སོགས་གང་དགོས་པའི་དུས་དེ་ག་མ་གཏོགས་ཟབ་མོའི་རྣལ་འབྱོར་ཁོ་ན་ལ་བཞུགས་སོ། ། སྐུ་འཁོར་འགའ་ཞིག་གིས། བླ་མའི་མཁྱེན་རབ་འདི་ལ་མཁན་ཆེན་བུ་སྟོན་པའི་གཟིགས་རྟོག་གི་ཐུགས་རྩོལ་དང༌། འཆད་ཉན་ལ་ཐུགས་གཞོལ་བ་འདི་ཡོད་ན་སངས་རྒྱས་འཇིག་རྟེན་དུ་བྱོན་པ་ལྟ་བུ་ཅིག་ཡོང་བ་གདའ་ཞུས་པས། སྤྱིར་ཆོས་འདི་རྣམས་བསླབ་པས་གོ་བ་ཁོ་ན་རང་ཡང་མིན་ཚོགས་སྒོ་དུ་མ་ནས་གསོག་ཅིག་བསྒོམས་ན་གོ་བ་ལགས། ད་ལྟ་སྙིང་པོ་བསྡུ་བའི་སྐབས་འདིར་སྒྲུབ་པ་ཁོ་ན་ཕན་ཡོན་ཆེ་བ་ཡིན་མོད་གསུང་ངོ༌། ། སྐུ་ཚེའི་སྨད་ལ་ནུབ་ཆོས་ལུང༌། འུ་ཡུག་སྙེ་མོ། གནམ་སྟོད་ལུང་སོགས་རིམ་པས་བརྒྱུད་ནས་ཁྱད་པར་ལྷ་སར་ཕེབས་ནས་ཟླ་བ་བཅུ་གཅིག་བཞུགས། དབུས་ཕྱོགས་ཀྱི་བླ་མ་སློབ་དཔོན་དགེ་བཤེས་དཔོན་སྐྱ། སྐྱེ་བོ་ཐམས་ཅད་ཀྱིས་ཞབས་ལ་གཏུགས། གང་ཕེབས་ཐམས་ཅད་དུ་ཟབ་ལམ་རྡོ་རྗེ་རྣལ་འབྱོར་གྱི་འཁྲིད་དང༌། སྐྱེ་བོའི་ཚོགས་ལ་སེམས་བསྐྱེད་དང༌། ཡིག་དྲུག་གི་ཆོས་ཁོ་ན་གནང༌། ལྷ་སར་བཞུགས་རིང་གདོན་གྱི་གནོད་པ་ལ་བཀའ་ཤོག་བསྒྲགས་པ་ཙམ་གྱིས་ཕན་པས་བཀའ་ཤོག་ཞུ་བ་ཉིན་རེ་བཞིན་ཤིན་ཏུ་མང་སྟེ་མང་དུས་བརྒྱ་བརྒྱ་ཙམ་བྱུང་སྐད། ཟབ་ལམ་གྱི་འཁྲིད་ལན་བདུན་གནང་བ་ལ་འཁྲིད་གྲྭ་སྔ་མ་རྣམས་ལ་ཉིས་བརྒྱ་ཙམ། ལྔ་བཅུ་ཙམ་ཅི་རིགས་པ་ཡོད་ཅིང༌། འཁྲིད་རྟིང་མ་འཁྲིད་མོ་ཆེར་གྲགས་པ་ལ་དམ་པོ་འདེབས་པ་སྟོང་དང་བརྒྱད་བརྒྱ་ལྷག་ཙམ་བྱུང༌། གྲངས་སུ་མ་བཅད་པ་ལ་ཟབ་ལམ་སྒོམ་མཁན་དཔག་ཏུ་མེད་དེ། སྤྲང་བོ་ཚུན་ཆད་ཀྱང་ཆོས་ལ་དད་པ་སྐྱེས་ནས་ལམ་སྲང་རྣམས་སུ་དབེན་གསུམ་སྒོམ་པ་དང༌། སྐྱེ་བོ་སྟོང་ཕྲག་མང་པོ་ལ་མཆོག་དབང་གོང་མ་གནང་བས་མི་རྣམས་ལ་ལྟ་ཅི་སྨོས། སྲང་ཁའི་ཁྱི་ཚུན་ཆད་ལ་ཡེ་ཤེས་ཕེབས་པའི་རྣམ་འགྱུར་མང་དུ་བྱུང༌། གཞན་ཡང་དུས་འཁོར་གྱི་རྒྱུད་འགྲེལ་ཚར་གཅིག འབུམ་གྱི་བཤད་པ་ཚར་གཅིག་དབང་མདོར་བསྟན་ཚར་གཉིས། ནཱ་རོའི་འགྲེལ་ཆེན་དང༌། སེམས་འགྲེལ་ཆུང་བ་ཚར་གཉིས། དབུ་མ་བསྟོད་ཚོགས་ཚར་གསུམ། སྙིང་པོའི་མདོ་བཅུ་དང༌། ངེས་དོན་རྒྱ་མཚོ་སོགས་མང་དུ་གསུངས། སྙེ་མོ་ནས་འདིའི་བར་ལ་སྲོག་རྩོལ་གནང་བས་ཉམས་རྟོགས་ཚད་དུ་ཕྱིན་པ་ཡང་ཉིས་བརྒྱ་ལྷག་ཙམ་བྱུང༌། ཕྱིར་ཕེབས་པའི་ཚེ་ཕྱག་འབུལ་བར་འོང་བའི་རྟ་ཁྲོམ་མི་ཁྲོམ་སྐྱང་ཐང་སྒང་ལ་མི་ཤོང་བ་ཙམ་བྱུང༌། དེ་ནས་ཀྱི་སྨད་དང༌། ཡར་འབྲོག་དང༌།ཉང་སྟོད་སོགས་སུ་རིམ་གྱིས་ཕེབས་ནས་དེ་ཀུན་ཏུ་ཡང་ཟབ་ལམ་གྱི་འཁྲིད་མང་དུ་གསུངས།ཤམ་པོ་རྩེ་ལྔ་ལ་བདེ་གཤེགས་སྙིང་པོའི་དོན་རྟོགས་པ་མང་དུ་འབྱུང་ཞེས་ལུང་བསྟན། ཐམས་ཅད་མཁྱེན་པ་གཉིས་པ་བུ་སྟོན་ཆེན་པོ་དང་འབེལ་གཏམ་མཛད་པར་བཞེད་ནའང་བུ་སྟོན་ཆེན་པོས་རྩོད་པ་མཛད་མ་ནུས་ཞེས་གྲགས་པ་ཡང་དོན་ལ་གནས། སྔ་དུས་སུ་བུ་སྟོན་ཆེན་པོས་ཇོ་ནང་གི་སྐུ་འབུམ་གཟིགས་པར་བཞེད་ནས་མནལ་ལམ་བཟུང་སྟེ་ཕེབས་པས་ཇོ་མདར་ཕེབས་པ་ན། ཀུན་མཁྱེན་ཆེན་པོས་ཕཊ་ཅེས་གསུངས་པས་མནལ་སད་དེ་གཟིགས་མ་ཐུབ་པ་སོགས་ཀྱི་ལོ་རྒྱུས་ཡོད། གང་ཕེབས་ཐམས་ཅད་དུ་སེམས་བསྐྱེད་དང༌། ཡིག་དྲུག་གི་ལུང་ཞུ་བ། དགེ་བསྙེན་ཕོ་མོ་ཞུ་བ། རབ་བྱུང་བསྙེན་རྫོགས་ཞུ་བ་སོགས་ཀྱང་རྒྱུན་མི་འཆད་པ་བྱུང༌། སྐུ་མི་འདའ་བའི་སྔོན་ལོ་ལྔ་ཙམ་ནས་བཤང་གཅིའི་རྒྱུན་ཆད་པ་དང༌། སྔ་མོ་ནས་གཏུམ་མོའི་བདེ་དྲོད་ཀྱི་འུར་ལངས་པ་ཉིན་མཚན་དང་ཐུན་ཐུན་མཚམས་མེད། མ་ཟོས་བཀྲེས་མེད་ཟོས་ཀྱང་འཇུ། ། ཞེས་པའི་ཚུལ་གྱིས་རེས་འགའ་ཞག་གྲངས་མང་བོར་ཟས་མ་གསོལ་ཀྱང་བཀྲེས་པ་མེད་ཅིང་སྟོབས་དང་ལྡན་པ་དང་རེས་འགར་ཉིན་ཞག་རེར་མི་ཟས་མང་པོ་གསོལ་ཡང་མི་འཇུ་བ་མེད་ཅིང་ལེགས་པར་འབྱོངས་པའི་བདག་ཉིད་ཅན་མི་ཕལ་བ་གཞན་དང་ཡེ་མི་འདྲ་བའི་གསང་བདག་སེམས་དཔའ་ཆེན་པོའི་ངང་ཚུལ་ཅན་ནོ། །